بعد شهر عدا على ابطالي بتحديد عند ورد الي كانت مسافره بتفكيرها وهذا حالها من فتره رجعت شعرها على ورا بقسوه وجلست تتامل الشارع بشرود حست بخطوات بندر وراها مسحت دموعها بسرعه الي صارت ملازمتها اغلب الوقت ، حاوط خصرها وهو يقول بمزح رغم جرحه وحزنه من نفورها عنه : حلوتي وش تفكر فيه؟
تجمدت بين يدينه من قسوة الواقع وقسوة التعليقات الي تجيها وصارت حاجز بينها وبين الشخص الي ماحبت غيره ووقف جمبها لما طلع بالتقرير انها ماتجيب عيال ، احترم رغبتها في تسكير الموضوع نهائيا لكن نفورها منه يقطعه يطعنه ، لفه له عشان تقابله كانت عيونها حمرا من البكي وهالاتها واضحه من الارهاق وقلة النوم قلت بصوت كله حزن: انا تعبانه يابندر
انقبض قلبه هو عارف تعبها نفسي مو جسدي حاوط وجه محبوبته بين كفينه : قوليلي وش يريحك ونا اسويه لاتحسبين شوفتي لك كذا تسعدني اذا تعبتي كاني انا التعبان
شهقت وماقدرت تكتم دموعها سندت راسها على صدره ،ضمها بكل قوته وهو يغمض عيونه بالم صارلهم خمس سنوات معترفين لبعضهم وكانت من احسن السنوات الي مرت عليهم ، هي الوحيده الي حبها بكل مافيها ولا همه لا عيال ولا غيره بس يبيها بقربه مايقدر يعيش بدونها !
هو عارف كلهم يحبون زوجته وماحد فتح معها طاري العيال عشان مايجرحونها لكن هذا مامنع عمه اليوم بالشركه الي هو مسعود ابو ورد ! من انه يفتح معه الموضوع تاخر حمل والي يضحك هو الي طلب منه يتزوج ولاكانه يتكلم مع زوج بنته!
__
قبل ساعات بالشركه
مسعود بدون مقدمات: مو عاجبني وضعك يابندر الكلام مو هين علي زي ماهو هين عليك لكنك انت وورد واحد عندي حرام تضيع شبابك تزوج الثانيه وشوف حياتك
تمالك بندر اعصابه من قسوة الكلام الي ابدا ماتوقعه قال وهو شاد على اسنانه بحاولة انه يهدي نفسه : اعذريني ياعمي عيشتي مع زوجتي ماهي مضيعة وقت، وشكرا لك على رايك لكني ما احتاجه
تنهد مسعود وكمل:ياولدي ورد مابتقدر تجيب لك عيال
وقف بندر وعيونه تلمع من الكلام الي كانه رصاصه تخترق صدره قال بصوت مجروح من يوم ماعرف بالخبر ماوقف جرحه وكل يوم ينزف اكثر واكثر: سكر على الموضوع ياعم ولاتزيد اوجاعي ولو يخيروني بين ورد ومية طفل من صلبي بختار ورد
وصل بندر لباب المكتب وقبل لا يطلع قاله مسعود: حنا لقينالك بنت و....
ماكمل كلامه الا وبندر طالع وصافع الباب بقوه حس بانه مخنوق المكان ماعاد يوسعه يبي يطلع ماهو قادر!
____
رجع للواقع بعد ما ابعدت عنه بنفور حاول يقربها له لكنها رفضت قال بصوته الحزين : لاتصيرين انتي والظروف ضدي ياحبيبة قلبي
كمل وهو يناظر بعيونها الي تقطر حزن : انا احبك ياغاليتي وين وعدك لي؟؟ وين حبك وين راح كلامك ولا كان كله مجرد حروف نطقيتها مالها اي قيمه عندك
