ما ارتاح رماح من قرار معن المفاجئ ذا
فـ حرك خيله ووقف قدام معن مانعه من انه يتحرك وهو يقول: وش الي جابه لك الصقر.
ناظر معن بعيون رماح وتكلم: لازم نرجع لـ سحيم
رماح بجدية: منب راجعين لين توريني وش الي شفته
تنهد معن وفكر شوي قبل ما يتكلم: ذاك السفاح كان كذاب ويبينا نبعد عشان يقتل سحيم.
اتسعت عين سيف، اما فيصل ناظر في معن بقلق.
كريستوفر بأستغراب وخوف: يا إلهي، أليس سحيم قائدهم.؟
رد شجاع: كنت داري
تكلم رماح بعد ما سمعهم: هذا المكتوب في الورقة؟
بلع معن ريقه وجاوب: يبيني اجيب مداح
حرك رماح خيله وقال: بنمشي للحجاز
ما اعجب معن القرار وعارض: روحتنا للحجاز صعبة، ويمكن ينقتل سحيم وقتها.
رماح: والخيار اننا نروح لهالسفاحين بنفسنا؟
انزعج معن وسأل بهدوء رغم انه على اعصابه: ليه؟ مو انت الي تتفاخر فيه الارض كلها بأنه القناص؟
رد رماح وهو يصر على اسنانه: قنص الأرواح مهوب من اختصاصي يا معن.
شد معن على اللجام: ابروح لحالي اجل
اخذ رماح نفس عميق وبعدها تكلم: اعرف انك خايف على ابوك، لكن من كلامه يدل انه يعرف مين راح ينجيه ..
ناظر معن في رماح وهو عاقد حواجبه من الي سمعه،
وقبل ما يتكلم، تنهد شجاع من هالدراما الي يشوفها قدامه وبعدها قال: انا بروح
التفتوا كلهم له بعدها تكلم شجاع: انا بروح اجيب مداح، وانتو راقبوهم
تدخل سيف معارض الفكرة: لا
التفت شجاع لـ سيف وسأل: ليه.؟
ناظر سيف في شجاع وجاوبه: حنا جينا مع بعض، نروح مع بعض.
رد كريستوفر وهو يفكر: انا اوافق رأي شجاع
التفت سيف لـ كريستوفر وعقد حواجبه لكنه انصدم من موافقة رماح بعد وهو يقول: انا معكم
معن ما اعطى رد وفيصل بعد
تكلم شجاع: اجل خلوني اجهز اغراضي
