ليته ماسمعني يوم قلت (يحق لك مايحق لغيرك ياعزوتي)

37

في الطيارة...
على الكراسي اللي كانو غلا وسالم واحد كانت غلا على الشباك وسالم بالوسط والرجال الثاني على الطرف
سالم اللي كان يلاحظ غلا وهي تنعس
سالم :بتنامين ؟
غلا :لا
سالم ابتسم:واضح عليك تعبانه نامي
غلا :ماودي انام
مد سالم يده وهو يمسك راسها ويحطه على كتفه :لا تعاندين ونامي
غلا بابتسامه:طيب
حطت راسها ونامت وهي فعلا كانت منهكه جدا
بعد رحلة دامت لمدة ست ساعات قدرو يوصولون لوجهتهم ...
نزلو واتجهو لفندقهم ينامون ويرتاحون لاجل يصحون بكره ......في صباح اليوم الثاني لهم في كوخ مطل على غابات صحى سالم هل مره قبل غلا على صوت المطر اللي ينزل عليهم حصل غلا نايمه غطاها وطلب لهم فطور ودخل ياخذ له شور على السريع
وصل الفطور وطق الباب اتجه له سالم وهو لاف منشفته على خصره فتح له الباب وقاله يحطه على جنب ترك الفطور وطلع سحب سالم المنشفه الثانيه وهو يجفف شعره مقدر يشغل الاستشوار عشان مايزعج غلا
صحت غلا من كثر حركته بالغرفه فتحت عيونها ونطقت بـ
غلا بابتسامه:صباح الخير
سالم لف عليها وابتسم : صباح الخير للخير كله ،ازعجتك ؟
غلا :لا ياروحي
سالم :الحمدالله شبعتي نوم ؟
غلا ضحكت:لا والله
سالم :قلنا انك تحبين النوم بس ماتوقعت للدرجه هذي !
غلا ضحكت :قلت لك محد يفوز علي بالنوم
سالم :اجل اليوم بحرمك من النوم
غلا :افا ليه
سالم اتجه لها وهو يجلس جنبها على السرير ويبوس عنقها :اشتقت لك مااشتاق لزوجتي يعني ؟
غلا حمرت خدودها :لا اشتاق عسى مايشتاق غيرك
سالم ابتسم من خجلها :ودك نطلع نفطر ولا نجلس بالفندق ؟
غلا فزت :ميته جوععع نفطر بالاول
سالم ضحك من خوفها :يخسى الجوع طلبت فطور نفطر وتبدلين عشان نطلع
غلا بابتسامه:دقايق واجهز
سالم ابتسم لها ،دخلت غلا تروشت وطلعت ...حصلت سالن محتار وش يلبس
غلا جت من وراه وقالت :شرايك تلبس اليوم على ذوقي ؟
سالم ناظرها :دامي محتار اليوم وش البس اختاري لي انت
غلا اشرت على عيونها :من ذي قبل ذي
تركها سالم وجلس على الكرسي يناظر فيها وهي تنسق له ملابس ولها كذالك
غلا لفت عليه ببراءه :سالم عادي لو اتحجب بس ؟
سالم :لا
غلا :سلوم تكفى
سالم ناظرها :وليه جايبه النقاب اجل !
غلا :تكفى هنا مافيه عرب والاجانب بيقعدون يناظرون نظرات مقززه واصلا بيفكرون اني ارها ****
سالم :يخسون
غلا :والله وترا يمكن يتعرضون لنا شفت مقاطع كثير
سالم بعصبيه:خل يفكر احد فيهم يتعرض لنا
غلا اتجهت له وهي تجلس قدامه :تكفى سالم بتحجيب حجاب كامل بس وجهي بيطلع
سالم :لا
غلا :تكفى حبيبي لاتعكر الجو علينا
سالم ناظرها وسكت
غلا اتجهت له وهي تبوسه :ها وش قلت ؟
سالم :بشرط
غلا :وشو؟
سالم :مايطلع من شعرك شي
غلا بابتسامه:من عيوني
سالم:يلا لاتتاخرين
افطرو وبعدها
طلعت غلا لسالم جنز اسود وبلوفر اسود وجاكيت طوله وسط رمادي وسكارف بابيض واسود ورمادي ...وهي لبست بنطلون واسع بني وبلوفر بني وهي سديريه بيج وحجابها واخذت معها جاكيت احتياط وحطت ميكب خفيف
سالم ناظرها :خلصتي ؟
غلا :اي
سالم اتجه لها وهو يحاوط خصرها :وش رايك. نقعد بالفندق ومانطلع
غلا :لا
سالم :ليه
غلا :شف الجو يجنن نطلع نتمشى احسن من اننا نجلس هنا
سالم بخبث:بس الجلسه هنا حلوه ولا
غلا بعدت عنه وفتحت باب الغرفه وطلعت :سبقتي الحقني
ضحك سالم :وين بتروحين مني
غلا ضحكت وسكتتتت
-
نروح للرياض عند بيت ال فلاح
جسار دخل للمجلس وناظر خواله كلهم جالسين ماعاد ذياب ،سلم عليهم وجلس
جسار ناظرهم:خالي ذياب وينه ؟
الجد فلاح:في جناحه ليه ؟
جسار :ابيه
الجد فلاح:وش تبي فيه ؟
جسار :ابيه بموضوع خاص
سكت الجد فلاح ،طلع جسار من المجلس وطلع جواله وهو يتصل على خاله ذياب
ذياب :ي مرحبا
جسار ابتسم:تبقى يا مرحب شلونك ي خال ؟
ذياب :بخير يا خالي انت شلونك ؟امك شلونها ؟
جسار :بخير دامك بخير
ذياب :امر وش بغيت يا خالي ؟
جسار :مااطول عليك بس كنت ابي اعرف جوابك وجواب كريمتك بالموضوع اللي كلمتك امي عنه ؟
ذياب :والله ياخالي انا موافق والبنت وعلمتها وقالت تبي تستخير والحين توي كنت بروح اشوف رايها عطني دقايق وارد لك خبر
جسار :لابد خذ وقتك ي خال
ذياب :تامر على شي ي خالي
جسار :سلامتك فمان الله
ذياب :فمان الكريم
قفل الخط واتجه لغرفة ملاذ طق الباب
ملاذ :مين ؟
ذياب :انا ي بابا فاضيه ؟
ملاذ :اي ي روحي تعال
دخل ذياب وهو يبوس راسها:شلونك ي بابا ؟
ملاذ ابتسمت:بخير دامك بخير
ذياب :وشلون الجامعه ؟
ملاذ :زينه
ذياب :عسى دوم ،ي بابا تو ولد عمتك مسكر مني
ملاذ :مين ؟
ذياب ضحك من توترها :طيب خليني اكمل كلامي
ملاذ بلعت ريقها وسكتت ببتسامة
ذياب :ولد عمتك جسار توه سكر مني ويقول يبي يعرف جوابك لان ترا طولنا عليه يابابا
ملاذ نزلت راسها بحياء حمرت خدودها
ذياب :وش قلتي ي بابا موافقه ؟
ملاذ رفعت راسها وناظرت فيه وهي شوي وتموت من الحياء ،ذياب عرف انها مستحيه وقال بمزح عشان يخفف توترها
ذياب ضحك:اذا مانتي موافقه علميني اكرشه واقول مالك بنت عندي
هو قالها بمزح وضحك بس مايدري انه سبب لها رعب وخوف من ان ابوها يظن انها ماتبيه قلب وجهها ولاحظ عليها ذياب وقال
ذياب :واذا موافقه علميني
ملاذ ناظرت فيه وسكتت
ذياب :ي بابا ادري انك مستحيه ومتوتره بس لازم تعلميني برايك تبينه ولالا ؟موافقه ؟ولالا ؟
ملاذ هزت راسها بايه
ذياب ضحك :يعني موافقه ؟
ملاذ بهمس وحياء :اي
ابتسم ذياب ووقف وهو يتجه لها يحضنها :عساه مبارك ي بنيتي وربي يوفقكم
ملاذ :امين
ذياب :اجل انا اروح ابلغ جسار
هزت راسها بايه ،طلع ذياب واتجه ياخذ جواله يتصل على جسار
فز جسار من شاف جواله يرن واخذه وطلع من المجلس يرد
جسار :لبيه
ذياب :وينك فيه ؟
جسار :تحت بالمجلس امر
ذياب :مايامر عليك عدو مير قبل شوي كنت عند ملاذ
جسار بتوتر :اي
ذياب ضحك:انتم علامكم العجلة تمشي فيكم
جسار :مين تقصد بحنا ؟
ذياب :انت وياها
جسار :مافهمت والله
ذياب :ماعلينا خلنا بموضوعنا الحين توي كنت عندها قبل شوي
جسار شدت اعصابه وتوتر واكتفى بالصمت
ذياب :كلمتها وتقول انها موافقه
ارتخت اعصاب جسار وتنفس براحه
كمل ذياب:متى مابغيت تجون تخطبون تعالو
جسار:ي خال انا مستعجل ودامي امي كلمتكم وانت موافق والبنت موافقه وبعد اذنك اشوف ان الخطبه مالها داعي لان ودي نملك الاسبوع ذا لان وراي عمليات ودوام وانت ادرى بشغلي
ذياب :الله يعينك ي خالي ابدا مثل ماتبي البنت موجوده ودك تملكون اليوم ماعندي مشكله
ضحك جسار :لا مو كذا الله يهديك ياخال اول شي نخلص امور المستشفى وبعدها يصير خير
ذياب :اي نسيت المستشفى
جسار :خل موضوع المستشفى علي ارسلي هويتها وانا بحجز على بكره
ذياب :اصبر خلني اشوف كم محاضره عليها بكره واعلمك
جسار :زين اجل انتظرك
-
نروح لعذاري وصقر
عذاري :صقر
صقر :عيونه
عذاري :طفشانه ودي نطلع
صقر :تم وين تبين نروح ؟
عذاري :مدري
صقر :فيه مكان معين براسك تبنيه ولانروح نفر بس
عذاري :نروح نفر ونتعشى ونرجع
صقر ضحك :قولي تبين تاكلين
عذاري :الحين لا بس شوي يمكن اجوع بعدين تذكر اللي يجوع ولدك مو انا
صقر ابتسم ومسك وجها وهو يحركه يمين ويسار :ي عله عافيه على ولدي وعلى ام ولدي يحدر ولا يتكدر قولي امين
عذاري ضحكت:امين
صقر :اجل قومي اجهزي عشان نطلع
عذاري :يلا
اتجهت تلبس وجهزت وطلعو هي وصقر للسياره
-
نرجع لغلا وسالم
غلا :الاجواء ترد الروح
سالم حاوط خصرها وهم يمشون :بس انا اقول ان قربك يرد الروح
غلا بابتسامه:صامل للحين ؟
سالم ضحك :اكيد صامل
غلا :انسى مافيه اليوم لو تموت
سالم كشر بوجه :ليه ؟
غلا لفت عليه وهي تحط يدينها على رقبته حاوطها سالم من خصرها
غلا :لان اليوم بنتمشى ونسولف ونضحك
سالم :مو مشكله عادي
غلا ضربته بخفه على كتفه :ي حيوان اكلمك يمين تكلمني يسار
سالم ضحك :اذا رجعنا يصير خير
غلا بضحكه :اقولك من الحين انسىىىىى
سالم ضحك :يصير خير
غلا :احس تعبت وانا امشي خلنا نجلس هنا (كانو في حديقه )
سالم :خلاص نرجع الفندق اجل
غلا :سااااااالم
سالم :لبيه ي عين ابوي
غلا بابتسامه:تكفى خلاص
سالم ضحك :ابشري
جلسو وهم يناظرون في الاطفال اللي كانو يلعبون لكن غلا كانت عينها على سالم وهو يناظر للاطفال وكل ماشاف طفل بيطح فز من مكانه
غلا :ي عيوني اهلهم معهم ليه خايف عليه هل كثر
سالم :مابي يتعورون
غلا :عادي الواحد لازم يتعور عشان يتعلم
سالم :بس هم توهم صغار
غلا :يتعلمون من هم صغار عشان اذا كبرو يعرفون
سكتو وهم يناظر فيهم ناظر سالم لغلا اللي حاطه راسها على كتفه وتناظر
سالم :ماودك يصير عندنا فريخ مثل هذولا
غلا ضحكت :ي راسي وشو فريخ ؟
سالم وهو ياشر بيده بمعنى صغير :فريخ ما تعرفين فريخ
غلا :لا وش يعني
سالم :يعنيي ورع صغيرور
غلا ضحكت :طيب قل بيبي طفل رضيع فريخ هذي من وين جبتها
سالم :عاد هذا اللي اعرفه
غلا :تونا تونا باقي يبي لنا سنه اقل شي
سالم ناظر لها ورفع احدى حاجبيه:وشو سنه !
غلا :اي اكيد لاتتوقع اني بوافق احمل الحين !
سالم :وليه ان شاء الله ماتبين ؟
غلا :قلت لك من البدايه وراي جامعه ومستحيل اني اوافق احمل من اول سنه ياسالم حنا ماندري نكمل مع بعض ولالا
سالم بحده :وشو اللي نكمل مع بعض ولال !اكيد بنكمل مع بعض ماني تارك لين ادفنك وتدفنيني
غلا قرصته بخفه :لاتجيببب طاري الموت كم مره اقولك !
سالم :هذا اللي عندي انسى اني اتركك او انك تتركيني حطيه براسك ذا الشي
غلا:ان شاء الله
سالم :وش صار على الجامعه قدمتي ؟
غلا :اي انتظر الرساله عاد ي قبول ي رفض
سالم :اكيد انه قبول فيه احد يرفض حرم سالم ؟
غلا بضحكه :وهم وش دراهم اني حرم سالم ؟
سالم :يعرفون يعرفون
غلا توترت:يوه يا سلوم ليتك ماذكرتني
سالم :علامس
غلا :بطني قام يمغصني
سالم ضحك :حتى لو ماقبولك ادخلك بخشم الريال ولا يتكدر خاطرك ي عين ابوي
غلا ابتسمت له وباست خده : ربي لايخليني منك قل امين
سالم وهو يبوس راسها:اللهم امين ولا منك
-
عند عذاري وصقر
عذاري :صقرررر
لف عليها :هلا
عذاري :تكفى ابي ذره مشويه
صقر :الحين !
عذاري :اي مع زبده زياده وليمونننن وملح
صقر :وين القى لك ذره مشويه الحين
عذاري :تكفى صقر اشتهيتها مره
صقر :المشكله ماحن ببشتاء عشان نلقى ذره مشويه
عذاري :طيب ابي وش السوات
صقر :السوات اننا نشري الذره ونشويها بالبيت شرايك
عذاري ضحكت:تم اهم شي اكل ذره مشويه اليوم
صقر :ابشري من عيوني كم عذاري عندي انا
عذاري رفعت سبباتها له وضحكت :وحده بس
صقر :يا حلوها هل وحده
اخذ جواله وهو يتصل على عزوز
عزوز :هلا
صقر :وينك
عزوز:بالبيت امر
صقر :مايامر عليك عدو بس طلع لي المنقل بالله
عزوز استغرب :ليه
صقر :بشوي ذره
عزوز ضحك:لايكون مرتك متوحمه علو ذره مشويه بعد !
صقر :اي
عزوز :الله يعينك اجل
صقر :امين بس طلع لي بالله وعلم العايله بجيب كميه خلوهم ينزلون الحوش
عزوز :ابشر
صقر :توصي على شي من براء اجيبه لك
عزوز :سلامتك يا حبيب اخوه
صقر :الله يسلمك فمان الله
عزوز :فمان الكريم
اتجه يطلع يطلع المنقل ،اخذ جواله وكتب بقروب العايله
عزوز :صقر بجيب ذره بنشوي بالحوش اللي يبي ينزل ترا توه ماجاء
نوضا :اذا جاء علميني
عزوز :طيب
مها :وانا
عزوز :طيب
دحوم :عاد طالع من المركز مهلوك حيلي وابي شي اكله
مها :ومالقيت تاكل غير ذره عاد
دحوم :الجود منن الموجود
مها :انا بسوي لي بطاطس مشوي تبي ؟فيه احد يبي غير دحوم ؟
دحوم :اي بالله ابي
فتون :ابي انا بعد
سهم :وانا
عزوز :مي تو
مها :تم اجل بسوي كميه واجيبها معي احطها بالمنقل
جابر :لاتنسوني بجييي
مها :طيبب
اختفو من القروب اول ماشافو حاكم متصل
سيف :عاد الجوء بدا يزين ونسمات الشتاء بدت تطل جزاك الله خير ي صقر على الجمعه اللي بتخلينا نجتمعها
صقر:اللهم امين وياك عاد واحشني ي خال ماعاد نشوفك
سيف :انتي اللي ماعاد تنشاف وانا خالك من تزوجت ماشفناك
صقر :اليوم بطفشك مني
سيف :ماني بطافش منك وانا خالك
صقر :الله يديمك لنا
سيف:اللهم امين ويخليكم لنا ويصلحكم ويهديكم جميع
صقر :دحوم جسار بيجي معك ؟
دحوم :لا بيطول هو شوي يقول عنده شغل
صقر :زين
عزوز :متعب وينك ؟بتجي ؟نبي تطربنا
متعب :بجي متاخر عندي مريضه بعد ساعه اخلصها واجي
عزوز:زين اهم شي تجي
متعب :ابشر
-
في بيت ام ملاك
ملاك :يمه وين فايز
ام ملاك :مدري والله ليه وش فيك
ملاك:عندي موعد اسناني اليوم ابيه يوديني
ام ملاك :دقي عليه يجي يوديك
ملاك :كلميه انتي عشان يجي انا لو بكلمه بيسحب علي
ام ملاك :طيب
اخذت جوالها وهي تتصل علي فايز
فايز:سمي
ام ملاك:وينك
فايز :عند العيال
ام ملاك :تعال ود ملاك للمستشفى عندها موعد
فايز:هي مالقت تحط موعدها الا ذا الحزه!
ملاك :مافيه الا ذا الموعد بطلعت الروح حصلته (كان على السبيكر )
ام ملاك :اعجل تعال لايروح الموعد
فايز :طيب طيب جاي
قفلت وناظرت ملاك
ام ملاك:قومي تجهزي بسرعه
ملاك :ابشري
اتجهت تتجهز وجلست تنتظره يجي ،وصل واتصل عليها
فايز:الو
ملاك :هلا
:اطلعي انا عند الباب
ملاك:طيب جايه
طلعت واخذها واتجهو للمستشفى لموعدها
فايز:دكتورك متعب للحين ؟
ملاك:اي ليه
فايز :غيريه
ملاك:ليه !
فايز :عاجبك وهو يناظر لوجهك ؟
ملاك:ماله دخل يعني اذا غيرته لدكتور ثاني ماراح يشوفني ؟
فايز:هذا نسيبنا
ملاك:يعني !هو ماسك حالتي وماني مستعده اغيره بعد مابدت بعلاجي معه خصوصا ان ضرسي يوجعني
فايز زفر:يصير خير
ملاك : علمتك ماراح اغيره
فايز :خلاص انطمي
ملاك خذته ووصلو للمستشفى
-
متعب نادى الممرضه :ماجت المريضه ؟
..:لا
متعب :متى موعدها ؟
...:بعد نص ساعهه
متعب :زين
طلعت الممرضه وهي رجعت تنادي ملاك ،دخلو فايز وملاك لمتعب
فايز:سلام عليكم
متعب :وعليك السلام لو تاخرتو ثلاث دقايق زياده كان راح موعدكم وتاخذون موعد جديد
فايز :افا ي رجل
معتب :والله ياخوك اليوم ماسك يجي حوالي ال 24حاله واختك الحين رقم 25وصداع راسي بينفجر منه
فايز :الله يعينك اذا كنت تعبان معليه ناخذ موعد ليوم ثاني
ملاك ناظرت في فايز بصدمه وهي يالله بالموت حصلت موعد عنده واخر شي يقول ناخذ موعد ثاني بكل بساطه !!
متعب ناظر لعيون ملاك اللي كانت شوي وتذبح فايز فيهم بنظراتها ضحك وقال
متعب :لا دامكم جيتو وهو موعدكم معليه اصلا انتم اخر موعد
فايز :عساك للقوه
متعب :وياك
ناظر لملاك وقال :استريحي على الكرسي
اتجهت ملاك للكرسي وهي تشيل النقاب اتجه متعب قدامها وبدا يساله من تحسن ضرسها وكيفها الحين
ملاك :والله للحين توجعني بس خف عن اول
متعب :حلو اهم شي يخف الالم
ملاك :هو خف بس مو كثير
متعب :تمام الحين بنظفه لك وكتب لك مسكن
ملاك :حلو
متعب :بعدين نسوي جلسة تنظيف ثانيه وبعدها نركب حشوه تمام
ملاك :تمام
ابتدا متعب يسوي شغله
-
عند الفريق وحرمه
غلا :سالم
سالم:لبيه ياعين ابوي انتي
غلا :بردت خلنا نرجع للفندق
سالم :يلا
وقفو واتجهو يمشون للفندق بعد ماوصلو
سالم :نتعشى وبعدها نطلع للجناح شرايك ؟
غلا :ماني جوعانه
سالم :من الصبح ماكليتي شي !
غلا :طيب
سالم :شلون ماجعتي ؟
غلا :انا كذا مااحب الاكل اطلب لي قهوه مااقول لا
سالم :منتي بصاحيه قهوه اليوم مافيه
غلا :سلومي تكفى
سالم :والله لو تسوين اللي تسوين مافيه
غلا بابتسامه:حتى لو بوسه
سالم:حتى لو بوسه مافيه انسي
غلا :تكفى حرام عليك امس ماشربت
سالم فتح عيونه بقوه :واللي بالمطار امس تشربينها وشو ؟
غلا توهقت :ماتعتبر قهوه امس
سالم :اجل وش تعتبر
غلا :تعبتر قهوت يوم الزواج لاني ماشربت
سالم ابتسم:ي كذابه نادين ماخذه لك قهوه وانا محول لها فلوس عشان تشتري لك قهوه وماتتوترين
غلا ابتسمت :صدق انت اللي قايل لها تشتري لي قهوه ؟
سالم :اي والله ماقالت لك هي ؟
غلا :لا اوريها الحيوانه
سالم :هذا الحين عرفتي واليوم انسي مافيه قهوه
غلا :تكفىىىى
سالم سحبها ومشي :مااافيه
غلا :اوريك ي سويلم اوريييك
سالم :يصير خير امشي انتي الحين ووريني بعدين
غلا :وين بنروح ؟
سالم :للفندق نتعشى فيه وبعدها نطلع لجناحنا
غلا :ماابي ارجع الفندق الحين
سالم :ليه
غلا :بس
سالم :ي خوافه ماراح اسوي شي ارتاحي
غلا :ماني خوافه ماله داخل بس الجو حلو ولا ابي اروح الفندق
سالم :واللي تقول برد أمش للفندق مين ؟
غلا :اي ببدل لبسي والبس لبس اثقل من هذا ونطلع
سالم ضحك :والله ماراح اسوي شي وخلينا نجلس بالفندق نسولف لاني تعبت من المشي
غلا :نرتاح شوي ونطلع شرايك ؟
سالم :على خشمي ابشري
اتجهو للفندق يتعشون وبعدها يطلعون لجناحهم
-
في بيت ال فلاح
ارسل صقر :انا تحت انزلو
مها :عزوز شغلت النار
دحوم :اي
مها :اجل بجيب البطاطس واجي انا وماريا
سهم :مهاوي جيبي لي فروتي معكم والبسو شي ثقيل الهواء بارد وجيبي فروه لضاري بعد
مها:ابشر
فتون :انا بجي الحين
جابر :فتون بالله جيبي لي معك كاس شاهي
فتون :شف نوضا بالمطبخ تسوي شاهي رح اخذ لك
جابر :طيب
عزوز:دحوم انا بالجناح تبي اجيب لك فروه ؟
دحوم :اي والله تسوي فيني خير
عزوز :طيب صقر معك ولا اجيب لك ؟
صقر :لا فروتي في جناحي عذاري بتجيبها وتجي
عزوز :زين
صقر اخذ جواله وهو يتصل على جسار
جسار :ارحب
صقر :وينك ي ولد
جسار فرك عيونه من قدام وهو يغمض ولايدري عن شي :فالمركز شفيك ؟
صقر :ماراح تجي ؟
جسار :وين اجي ؟
صقر :لللبيت ماشفت القروب !
جسار :لا والله ياخوك مامعي وقت افتح جوالي وش صاير
صقر :ابدا والله اجواء الشتاء بدت عندنا ومشغلين المنقل بنشوي ذره وبطاطس تعال
جسار: م يمديني والله
صقر :ليه ؟
جسار:وراي شغل ي خوك
صقر :تكفى تعال كلنا مجتمعين وبننبسط تعال
جسار :بشوف
صقر :لا تشوف ولا شي تعال
جسار :اصلا وش فايده جمعكتم وغلا مهي فيها ؟
صقر ابتسم:انشهد تصدق ي ولد لها فقده من غير شر
جسار :اي والله اشتقت لها وفاقد حسها بالبيت من غير شر ي رب
صقر :الله يرجعهم سالمين غانمين
جسار :اللهم امين
صقر :ها بتجي ؟
جسار :اشوف وارد لك خبر
صقر :زين تامر على شي؟
جسار:سلامتك ي حبيب اخوك
صقر :فمان الله
جسار:فمان الكريم
نروح عند نوضا اللي شافت مها وهي نازله معها بطاطس
نوضا :مها وش ذا
مها :م شفتي القروب ؟
نوضا :لا والله
مها :بطاطس بنشويه
نوضا :والذره وش صار عليها
مها :اي بنشوي الاثنين
نوضا :صدق
مها :اي ليه
نوضا :اجل وش رايك نسوي دجاج مشوي بعد ؟مره وحده
مها :تم شوفيهم
نوضا :عمه وينها ؟
مها :توي شفتها بالصاله
نوضا :شفتي احد العيال هنا وانتي طالعه ؟
مها :لا
نوضا :زين بروح اشوف اذا عمه مسويه عشاء ماراح اسوي دجاج اذا ماسوت بسويه وبسوي معه سلطه يكون عشاء كامل وش رايك ؟
مها :حلو والله احسن شي
نوضا :اجل بروح لعمه
مها :وانا بطلع
اتجهت نوضا وهي تدور معالي ،جابر وهو رايح لنوضا عشان الشاهي جاه اتصال وراح من جهة المزرعه من وراء ودريشه المطبخ تطل على المزرعه
وقف وهو يكلم صديقه اللي دق يسولف معه نتركهم ونرجع لنوضا ومعالي
نوضا وهي تنادي :عمهه
معالي :هلا ي امي
نوضا :عمه وينك ؟
معالي :هنا ي امي تعالي
نوضا وهي تبوس راسها :شلونك عمه
معالي :بخير ي امي انتي شلونك
نوضا :بخير دامك بخير
معالي ناظرتها :ي امي وين جلالك
نوضا :حطيته بالمطبخ
معالي :وش يسوي بالمطبخ ؟
نوضا :كنت اسوي الشاهي واشغلني كل شوي يقش له شي ويطيح شي وفكيته قلت اذا طلعت البسه والعيال براء مافيه احد هنا معليك
معالي :زين اجل
نوضا:عمه سويتي عشاء؟
معالي :لا ي عمه بروح الحين اسوي
نوضا :لا اجل لاتسوين مها مسويه بطاطس بنشويه وصقر جايب ذره وانا اقول اطلع دجاج واتبله ونشويه واسوي معها سطله ونتعشاه مو احسن ؟
معالي :زين ي امي الله يقويك سوي اللي تقولين
نوضا :ابشري بروح الحين اسويه
طلعت نوضا متجهه للمطبخ اخذ صحن وطلعت الخضار وغسلتهم وحطتهم على جنب وراحت تطلع الدجاج واتجهت تغسله فتحت الشباك من حست ان المطبخ مكتوم وحطت الدجاج وشغلت عليه المويه الحاره وراحت تاخذ جوالها تشغل اغاني فيه حطته على الطاوله واتجهت للدجاج ابتدات تنظفه
انتهى جابر من المكالمه وشافها فتحت شباك المطبخ تعيجز انه يرجع من ورا المزرعه للبيت من قدام قال اروح اخذ الشاي منها من الشباك احسن
نوضا اللي كانت تغسل الدجاج وترقصها وتضحك فجاءه نط جابر بوجها وهو كان متوقع انها متغطيه ولابسه جلالها بس انصدم من انها ماكان عليها شيي وصرخ بوجهااا ب
جابر :بووووو
نوضا شقهت بقوه وضربته بل دجاجه اللي كانت بيدها على راسها كانت متجمده
جابر صرخ بخفه بالم
نوضا :عساك للي ماني قايله ي حيوان
وبعدت عن الشباك وهي تلبس  الجلال ورجعت تهاوشه :الله ياخذ بليسك قل امين
جابر وهو حاط يده على عينه اللي رمت عليها الدجاج وهي بارده :اكلي تبن ي غبيه
نوضا ناظرته بحده :م اكلك ي حيوان
جابر نزل وهو يشيل الدجاجه :ي حيوانه احد يضرب بدجاجه متجمده !!
نوضا :اي
جابر :والله مايضرب الا المجنون مثلك
نوضا :انا مجنون عندك شي ؟
جابر :حسبي الله على عدوك بس عيني ودعت
نوضا :محد قالك تنط بوجهي خربت روقاني ي حيوان
جابر :ماني حيوان لا اصكك في دجاجتك ذي
نوضا :حيوان ونص بعد
جابر :صبرك ي ربي
نوضا :بعدين وش تبي جاي
جابر :ابي شاهي بس خلاص ماعاد ابي شي بروح اشوف عيني لايكون انفقعت
نوضا رحمته :وخر يدك اشوفها
جابر بعد يده وهو الرويه صارت مغبشه عنده
نوضا شهقت من شافت الاحمرار على جبهته :ي خراشييي
جابر :وش فيه !
نوضا ضحكت :ولا شي
جابر :خلصيني وش فيه !
نوضا :بس حمرت شوي
جابر :بذمتك ؟
نوضا :قسم بالله شوي بس حط عليه ثلج ويروح
جابر بنفخ :شلون اطلع قدامهم كذا و وجهي احمر !
نوضا :نط من الشباك
جابر :صادقه انتي ؟
نوضا وهي تشيل الاغراض من حوالين الشباك:شايفني استهبل ؟
جابر رمى الدجاجه عليه :امسكي دجاجتك ي دجاجه
نوضا :جويبر ترا ذا المره بسكر الشباك على اصابعك افرمها لك
جابر :فكيني تكفيت يكفيني اللي جاني منك
نوضا :خلاص اهجد
جابر نط وناظره :الحين خليتي انط وش اسوي ؟
نوضا :اقعد بجيب لك ثلج وحطه على عينك
جابر ضحك:شوفي وش سويتي فيني حسبي عليك
نوضا ضحكت :احسن خوفتني وتستاهل ماجاك
جابر :يلا معليه فدا
نوضا ناظرته بنظرات غريبه:اقول انطق وانت ساكت ولا اخذ ثلجك وانقلع عني
جابر :انتي شفيك ماتحبين الكلام الحلو
نوضا :لان الله خلقني كذا
جابر :ياخي قمت احس ان ابوي هو اللي مربيك على اسلوبك ذا
نوضا :لا مهي تربية ابوك ذي تربية ذياب ابن فلاح تعرفه ؟
جابر ضحك:اعرفه والنعم وسبعة انعام بعد
نوضا :معليك زود
مدت له الثلج وقالت :حطه عليها بس لاتضغط بقوه
جابر :طيب
اتجهت وهي تاخذ الدجاجه اللي كانت على الطاوله عنده اللي رمتها عليها وحطتها مع الباقي وكملت غسيلهم
جابر :الا نوضا بسالك
نوضا :ي ربي ي جابر ي كثر ماتهرج وي كثر ماتسال
ناظرها جابر وسكت ناظرته وقالت
نوضا :وش كنت بتسال ؟
جابر :وش قاعده تسوين ؟
ضحكت نوضا :ماتوفر لازم تسال
جابر ضحك من ضحكتها :ياخي شسوي طيب
نوضا :وش تشوف اسوي انت ؟قاعده اغسل دجاج
جابر :اي ادري لوش ؟
نوضا :شفت مها بتسوي بطاطس وصقر جايب ذره وعمه ماسويت عشاء قلت اسوي معهم دجاج وسلطه ويصير عشاء
جابر :كفو تنطح كفو
نوضا :كفوك الطيب
جابر :تبين اساعدك بشي ؟
نوضا :اي
جابر :وشو
نوضا :انك تسكت عني شوي
جابر :طيب
نوضا :ولاتنزل الثلج عن عينك
جابر ابتسم :طيب
-
فالحوش عند العايله الكريمه وهم جالسين يسولفون
معالي :صقر امي
صقر :لبيه ياعيوني
معالي :فيه ذره خالصه يمه جبها لعذاري
صقر ابتسم:ابشري ثواني وتخلص واجيبهم
معالي :زين يمه
نزلو ريوف وفتون
الجد فلاح:ي صقر
صقر :لبيه
الجد فلاح:ي ابوك عيونك راحت من النار خل دحوم عندها وتعال
صقر :معليه ي جدي دقايق بس
الجد فلاح:اخذ لامك وزجتك وتعال الباقي يكملها دحوم
دحوم وقف وهو يتجه للنار :رح انا برادن اصلا بقعد هنا
صقر :وين فروتك انت ؟
دحوم :فالمشب
صقر :وش تسوي
دحوم :ماابيها مشتهي اقعد يم النار
صقر ابتسم:البسها وانا اخوك البرد لا يذبحك
دحوم ابتسم :ابشر
معالي :مها يمه
مها فزت :سمي عميمه
معالي :وين بطاطسك ي امي
مها :هنا شوفيه
معالي :ليه ماحطيتيه على النار ؟
مها :مافيه مكان الذره على الجمر
دحوم:جيبيه الحين فيه مكان
مها :طيب
احذتها واتجهت لدحوم وهي كان عليها جلابيه وطرحتها بس ابتسمت لدحوم
دحوم :هاتيه
مها :انا بحطها
دحوم :انا احطها طيب
مها :لان فيه وحده لي فيها جبن وشطه زياده
دحوم :بس وحده ؟
مها ابتسمت :سويت ثنين لي ولك ادري انك تحبها جبن وشطه زياده
دحوم ابتسم :شكرا
مها :ولو م بينا
مها حطت الصينيه وجلست عند النار وهمست :برد
دحوم :وين فروتك ؟
مها :الشيخه ماما كبتها تحسبها حقت ماريا القديمه
دحوم :طيب كان جبتي لك جاكيت شي
مها :مالي خلق اقعد ادورهم
دحوم :شوفي فروتي بالمشب اخذيها
مها قلب لون وجها :لا مشكور
دحوم :ليش ؟
مها :مابي بقعد عند النار شوي واروح
دحوم :مهيان
مها ناظرته بستغراب وسكتت
دحوم :قومي اخذيها
مها :وش تبيهم يقولون ؟
دحوم :وش يقولون
مها :بيحسون ان فيه شي
دحوم :خليهم يحسون اللي يبونه اهم شي انتي لاتبردين
مها :دحومي مشكور بس ماابي
دحوم :يعني تبين انا اقوم اجيبه واعطيك اياه عشان يحسون ان فيه شي ؟
مها توترت:لا
دحوم :خلاص اخذيه
الجد فلاح:مها ي ابوك
مها لفت بخوف : لبيه
الجد فلاح:وين فروتك ي جدي برد عليك
مها :ماما كبتها بالغلط تحسبها حقت ماريا القديمه
الجد فلاح:طيب جاكيت شي
مها :وصخات ي جدي
الجد فلاح وهو ينزل فروته عنه :تعالي اخذيها
مها :لا جدي عادي الجو حلو
الجد فلاح:تعالي اخذيه ي جدي برد عليك
دحوم ناظر جده :جدي خل حقتك عليك وخلها تاخذ فروتي ماابيها
الجد فلاح:وانت الثاني ليه ماتبيها
دحوم :انا قريب من النار ماراح ابرد
الجد فلاح:لا ي جدي مها تعالي اخذي حقتي
دحوم :مها اخذي حقتي شوفيها بالمشب وجدي خل حقتك عليك اذا بردت اخذت لي جاكيت
الجد فلاح :زين اجل مها اخذي فروة دحيم
مها هزت راسها باايه وناظرت دحوم :وينها
وقف دحوم :تعالي اخذيها
مشى دحوم للمشب ومها وراه دخل ووقفت عند الباب مها تنتظره يطلع ،طلع ومد لها الفروه وقال بهمس
دحوم :ثاني مره لا قلت لك اخذي الشي يعني اخذيه فهمتي ؟
مها همست :طيب
دحوم :يلا اخذيها ورحي اجلسي
مها :طيب
-
في المطبخ
كانت نوضا جالسه قدام جابر تقطع السلطه خلصت تتبيل الدجاج وحطته بالثلاجه
نوضا :ورني اشوف عينك
جابر اللي كان مقابلها ويتاملها بعد الثلج عن عينه
نوضا :خلاص مافيها شي
جابر :طيب
نوضا :وشو طيب
جابر :وش اسوي يعني
نوضا :قم انقلع شكلك عجبتك الجلسه هنا
جابر :اللي والله عاجبتني
نوضا ضحكت :اعقب وانا بنت ابوي صدق
جابر :شفيتس
نوضا :قم اذلف خلاص عينك سليمه
جابر:ماني طالع كاني قاعد فوق راسك عاد
نوضا :لو يجي احد ويشوفك جالس وش يقول !
جابر :بقولهم الشيخه نوضا فقعت عيني بالدجاجه المتجمده والحين جالس احط ثلج عشان ماتقعد الكدمات فيني
نوضا :ي مجنون لاتقول كذا
جابر :ليه
نوضا :تخرب سمعتي قدام جدي
جابر :وش سمعته
نوضا :انا مسويه نفسي قدامه هاديه وماني راعية مشاكل
جابر: يويلي يكذبك
نوضا :وانا صادقه
جابر :انتي مانتي راعية مشاكل !!!
نوضا:اي والله مااتمشكل الا على اللي يغلط علي
جابر :ي ضالمه والدجاجه اللي فقعتي راسي فيها وشو
نوضا :انت روعتني وتستاهل ماجاك
جابر :كنت بسوي مثل مشاري
نوضا بسخريه :مشاري اصلا مايمقلبني
جابر ضحك:مالومه والله
نوضا :وليه ان شاء الله
جابر :خايف تصقعينه بالي قدامك
نوضا :والله شف اللي يغلط يتحمل اللي يجيه انا مالي دخل هي ردة فعل لكل فعل
جابر :التوبه امقلبك
نوضا :اصلا بعد ذا الصقعه مااتوقع انك بتفكر انك تمقلبني
جابر ضحك:اي والله
نوضا وقفت وهي خلصت من السلطه وبتحطها بالثلاجه :ها يلا عاد انقلع
جابر وقف وناظره :شكرا على الثلج
نوضا :العفو
حط الثلج بالثلاجه وصد بيطلع وقفه صوتها وهي تنادي لف
جابر :لبيه
نوضا مدت له كاس الشاي :امسك
جابر ابتسم :اف يا لبيه جاء بوقته عاد
نوضا :يلا انقلع
جابر ضحك:ابشري
صد وهو يطلع وضحكت نوضا وهي تهمس
نوضا :ياخي ذا الولد مجنون
-
وصل جسار دخل وهو فعلا مهلوك وتعبان بس بيجلس معهم شوي ويططلع لجناحه
دخل وهو يقول بصوته الجهوري
جسار:سلام عليكم
الجميع :وعليكم السلام ورحمة الله وبركاته
جسار اتجه يسلم على امه وجده وجدته :شلونك يمه
معالي :بخير ي امي انت شلونك لك كم يوم غاط مانشوففك
جسار وعيونه صايره حمراء من قل النوم :مشغول ي قلبي انتي
معالي قربت منه وهي تهمس :مانمت زين صح ؟
جسار ابتسم وهو مايبي يقول لها عشان لاينشغل بالها عليه :الا نمت
معالي :عيونك حمراء ي امي كيف نمت ؟
جسار:نمت ي قلبي لا تشيلين هم
معالي :كم ساعه نمت ؟ساعه ؟ولا ساعتين ؟
جسار ابتسم:خمس ساعات ي روحي
معالي باستهزاء :واضح انك نمت
جسار :احلف لك ؟
معالي :لا بس الحين تاكل وتروح تنام ولا تداوم  بكره فاهم
جسار ابستم من تعامل امه لهم وهم كبار لكن تعاملهم كانهم صغار  :ابشري
ملاذ اللي من دخل جسار وهي ترتجف خوف ومتوتره ،جسار ماشافها من كثرهم مشاءالله
جلس يدورها بعيونه لين طاحت عينه بعينها ملاذ نزلت عيونها بسرعه وهي تصد عنه قامت بسرعه وهي تنحاش
ناظر جسار لخاله ذياب واتجه له :خال
ذياب ضحك:عارف وش بتقول ي خالي عارف
جسار:تسمح لي بشويات ؟
ذياب رفع سبباته لجسار:اسمحلك ي خالي بس لاتغلط شفني علمتك
جسار :ماتجي مني الغلطه ي خالي وانت عارفني بس بقول لها شي مهم
ذياب :رح وانا خالك لو اني ماني واثق فيك ماكان وافقت ولا قلت لك رح
وقف جسار وهو يتجه وراها شافها طالعه للدرج بتروح لغرفتها
طلع الدرج بسرعه وهو يسحبها من يدها ماامدها تستوعب الا وهو مدخلها غرفته
ملاذ سحبت يدها منه وقالت :خيرر !
جسار :ابوك عنده علم وقلت له بكلمك
ملاذ :تكلمني !هنا بالغرفه ؟وابوي يدري انك مدخلني غرفتك وراضي ؟
جسار ناظرها :قلت لك يدري اني بكلمك
ملاذ :يدري انه هنا بغرفتك ؟
جسار قرب منها :ملاذ انتي وش جاك
ملاذ ارتجفت من قربه منها ومن طريقة نطقه لاسمها
ملاذ :وش جاني؟ ما جاني شي
جسار :اجل وش تصرفاتك هذي ؟
ملاذ :وش سويت !
جسار :تنفخين واسلوبك متغير وكل ماجيت اكلمك صديتي ؟وش ذا الاسلوب ؟
لاتتوقعين انك اذا سويتي بروح الحقك واسوي حركات المراهقين !
ملاذ :ومن قالك ابيك تلحقني ؟
جسار :انتي مانتي ملاذ اللي اعرفها انا مانتي ملاذي
ملاذ ارتجف قلبها لطريقة نطقه لكلمة (مانتي ملاذي )
ملاذ :انا نفسها ملاذ
جسار قرب منها اكثر وهي ترجع للجدار انحنى وهمس باذنها:مانتي ملاذي
ملاذ بخوف لاول مره جسار يسوي كذا وهمست :جسار
جسار:لاتخربين علينا وراجعي لي رجعي لي ملاذي اللي اعرفها واللي احتلت قلبي
ملاذ :طيب
جسار:لاتقولين طيب وانتي ماتفعلين !ليه اسلوبك صاير كذا!ليه من بعد ماخطبتك تغيرتي ؟خالك جابرك علي ؟ماودك فيني ؟
ناظرت ملاذ وبلعت ريقها وهزت راسها بلا
جسار :ردي علي جاوبيني
ملاذ :لا
جسار :لا ايش
ملاذ :محد جبرني
جسار :اجل ليه تغيرتي ؟ليه ماعدتي مثل ملاذي الاوليه ؟
ملاذ :جسار تكفى مضغوطه من الجامعه ولا انا تراي انا ماتغيرت
جسار :الجامعه ماتغير الشخص للدرجه هذي ي ملاذ
ملاذ :تغير ي جسار وتغير كثير بعد
جسار :وش ضاغطين عليك فيه
ملاذ :تعرف اخر سنه لي وضاغطينا اختبارات وتدريبات وامور كثيره
جسار :متى تخلصين ومتى ترجعين لي ملاذي. اللي سلبت عقلي مني
ملاذ ابتسمت :ابشر
جسار :ليه انحشتي يوم شفتيني جيت ؟
ملاذ :لاني كنت ادري انك تكلم بابا عشان تكلمني وبابا اعرفه ما يقدر يقولك لا
جسار :وقلتي انحاش لغرفتي عشان مايكلمني ولا اقابله ؟
ملاذ :لا مو كذا
جسار :اجل كيف تفسرين فعلتك هذي ؟
ملاذ :توترت بس
جسار :ليه تتوترين ؟
ملاذ :مدري
جسار :طيب كنت بقولك متى تبين تتم الملكه ؟
ملاذ بلعت ريقها:مو الحين تكفى
جسار :ليه
ملاذ :قلت لك جامعتي وونفسيتي تعبانه
جسار :متى اجل ؟
ملاذ :الشهر الجاي خلها
جسار :مقدر لازم الاسبوعين هذي
ملاذ:ليه
جسار :وراي عمليات واشغال
ملاذ :تكفى مقدر
جسار :علمتك ومن ناحية نفسيتك وتوترك ماراح يكون فيه تواصل كثير بينا بحكم شغلي وبحكم دوامك
ملاذ :ماله دخل التواصل
جسار :اجل !
ملاذ :انا الحين ماقدر
جسار :اذا عشان الجامعه لاتشيلين هم ماراح اكلمك ولا راح اضغط عليك لين تخلصين بس ضروري نملك ذا الاسبوعين
ملاذ اللي كانت بتنطق وتقول انها ماتقدر لانها مضغوظه مره من الجامعه
سكتها جسار وقال :لاتجادليني ولا تقولين شي شوفي اي يوم مرتاحه فيه وماعندك شي وبلغيني ولو تبين تكون الملكه محفوفه ماعندي مشكله اللي يريحك لو تبين كبيره اللي تبين
ملاذ :ماله داعي الكبيره كلها توقيع نخليها بينا وخلاص
جسار :زين اجل اي يوم تبين ؟
ملاذ :الاسبوع الجاي يوم الجمعه تقدر ؟
جسار :اشوف وارد لك خبر
ملاذ ابتسمت بخفه :طيب
لف جسار وهو يشيل جاكيته ويرميه على السرير ،لف من حس بحركتها تبي تطلع
جسار :وين رايحه ؟
ملاذ بلعت ريقها:بنزل
جسار :ليه ؟
ملاذ :كيف ليه !
جسار :ماخلصت كلامي انا
ملاذ :جالس تشيل ملابسك تبي اقعد !
جسار ضحك :ي بنت الحلال بشيل الجاكيت بس
ملاذ بلعت ريقها:اها
جسار:اقعدي
ملاذ :جسار انت فيك شي اليوم ؟
جسار :لا ليه
ملاذ :وربي اذا شافني ابوي هنا بغرفتك اذا يفصل راسي عن جسمي انا وانت
جسار :مايلحقك ضرر وراسي يشم الهواء وقلت لك ابوك عنده خبر
ملاذ:حتى لو ابوي عند خبر هنا ماراح اجلس اذا ودك تسولف معي تعال للصاله ولا قدامهم تحت اما هنا مقدر والله اعذرني
جسار ابتسم:زين انزلي انتظريني بالصاله ببدل واجيك
ملاذ ابتسمت بهدوء :تمام
-
نروح تحت عند العايله
صقر ناظر لعذاري :خلصتي حقتك ؟
عذاري :اي
صقر :تبين وحده ثانيه ؟
عذاري :اي والله وتكفى كثر الملح والليمون فيها
صقر ابتسم:من عيوني ابشري
اتجه ياخذ لها ذره ثانيه وسواها نفس ماتبي واخذها لها
صقر :سمي ي قلبي بالف عافيه
عذاري ابتسمت :الله يعافيك حبيبي تسلم يدينك
صقر :اذا بغيتي غيرها علميني
عذاري ضحكت:لا خلاص 2يكفون
صقر :اللي ودك اهم شي لاتخلين بخاطرك شي
عذاري ابتسمت :ي عساي ماخلى اي والله
طلعت نوضا وبيدها الصينيه اللي كانت حاطه فيها الدجاج والسلطه
نوضا بشب صراخ :دحيييم
دحوم ناظر لها :هااا
نوضا :بسرعههه وخر اي شي عن النار
دحوم ناظر الصينيه اللي بيدها :وش جايبه انتي ؟
نوضا :عشاكم يعني وش جايبه !
دحوم :هاتيه هاتيه
نوضا اتجهت له ومدت له الصينيه
الجد فلاح:بعدي ي بنيتي بعدي كثر الله خيرك
نوضا ناظرته وابتسمت :خيرك اكثر ماسويت شي وقليل بحقكم ولا هو واجبكم وابشرو بالي ازين منه وابشرو باللحم اللي يدسم الشارب
الجد فلاح ضحك :كفو ي جدي كفو
نوضا :كفوك الطيب ي عيوني انت
الجد فلاح:وينك رايحه
نوضا :بروح اجيب الشاهي وابلغ العامله تجهز اغراض العشاء
الجد فلاح:والله ماقصرتي ي جدي مسويه شاهي بعد
نوضا :سويت لك شاهي حبق يحبه قلبك وسويت كرك طبو وتخيرو
الجد فلاح:عساها يمينً ماتعطب
نوضا ضحكت: هذي عاد مدري وش يردون عليها
ضحك الجد فلاح:روحي خلصي اغراضك وتعالي انا اعلمك وش يردون عليها
نوضا :تم
اتجهت نوضا للمطبخ شافت ملاذ جالسه
نوضا :شعندك هنا ؟ليه ماطلعتي برا ؟
ملاذ :بقعد انتظر جسار
نوضا :وليه ان شاء الله تنتظرينه !لايكون زوجته وحنا ماندري ؟
ملاذ :تقدرين تقولين زوجته المستقبليه
نوضا تخصرت :وشوو وشو !
ملاذ :اعلمك بعدين بس تعالي غريبه بابا ما قال لكم ؟
نوضا :لا ماقال لنا شي وش يقول اصلا ؟
ملاذ :اما ما قال لكم ان جسار خطبني ؟
نوضا شهقت:بذمتك؟
ملاذ :اي وقسم
نوضا ضحكت:قسم اني كنت عااااارفه
ملاذ :وش عارفه
نوضا :اي جويسر حاط عينه عليك
ملاذ :ي ويلي كلكم تقولون انكم تدرون انه حاط عينه علي الا انا ليه ؟
نوضا :لانس خبله
ملاذ :بنت احترميني
نوضا :عشتو من انتي
ملاذ :اختك الكبيره
نوضا سكتت من شافت جسار جاي وهمست لها :ابوي يدري انكم جالسين مع بعض ؟
ملاذ :اي يدري
نوضا :اكيد ؟
ملاذ :اي ي مجنونه يعني انا بسوي شي وابوي مايدري عنه
وصل لهم جسار وقال :عسى ما قاطعتكم ؟
نوضا ناظرته:لا تفضل
جسار اكتفى بالصمت
نوضا وقفت وهي تناظر فيهم
ملاذ همست لها :اذلفي !
نوضا بصوت مسموع :بذلف عنكم بس عيوني عليكم اياني واياكم اشوف عليك غلطه بسيطه
جسار بحده :نوضا
نوضا فزت من صوته :نعم
جسار :انتي عارفتني زين وعارفه اختك صح ولالا ؟
نوضا :اي
جسار :لا اجل طسي
نوضا ضحكت:احح كذا من بدايتها
ملاذ ضحكت :تستاهليييين
نوضا :بعتيني يا خاينه عشان واحد للحين ماصار زوجك حتى !
جسار :بيصير زوجها قريب لاتخافين
نوضا ضحكت:يلا اخليكم لحالكم مسوين لي فيها عصافير الحب
ملاذ رمت عليها دبة المويه :اذلفي
نوضا ضحكت:شدعوه عصبتي
جسار :انتي من متى صايره تضحكين وتمزحين ؟
نوضا :ي خراشششي من زمان
جسار :اول مره اشوفك تنكتين وتضكين وش صاير بالدنيا
نوضا :مو صاير شي تبون شاهي حبق ؟
جسار :اي والله
نوضا :طيب
تركتهم نوضا واتجهت للمطبخ وهي تصب لهم اكواب شاهي
ابتدوا يسولفون ملاذ وجسار
عطتهم الاكواب وطلعت للحوش
جابر ناظر للبنات :تلعبون بلوت اكسر روسكم ؟
نوضا :العب اونو وانا اكسر راسك
جابر :تم
نوضا :يلا
جلسو يلعبون اونو ،صقر يسولف هو وعذاري مع معالي ،وملاذ وجسار يسولفون
كانو البنات يصورون لغلا
-
بعد ماخلصو عشاء ورجعو لجناحهم اخذت غلا جوالها وهي تتفرج على تصور البنات وجلست تصيح
سالم التفت عليها واتجه لها :وش فيك ؟
غلا سكتت وهي  تغطى وجهاا بيدينها وتبكي وتشهق
سالم وهو يبعد يدينها عن وجهها :وش فيك !
غلا ورته التصوير :شف
سالم :وش فيهم ؟
غلا :مجتمعينننن بالحوش ويشوون ويلعبون بدونييي
سالم: طيب عادي وشو يعني
غلا :ابي ارجع لهم
سالم انصدم :وشو ؟
غلا :تكفى خلنا نرجع
سالم مسك ضحكته:فيك شي انتي ؟شلون نرجع وحنا تونا واصلين ؟بعدين تتركين الاجواء هذي وترجعين للحر ؟
غلا :اي عادي متعودين حنا على الحر خلنا نرجع تكفى
سالم :تبين ارجع وانا يالله اخذت اجازه بالموتت !!
غلا :عادي تكمل اجازتك وانت بالسعوديه
سالم :حنا كلها خمس ايام وراجعين
غلا :ابي الحين
سالم :يصير خير
غلا :تكفى
سالم :خلاص قلت لك يصير خير
قام وهو يتجه يسوي له شاهي ويحاول يسوي لها قهوه نفس قهوتها يبي يراضيها
سمعها وهي تبكي وتشهق وهي مو متعوده اصلا تبعد ولو يوم واحد عن اهلها
تنحنح وهو يجر صوته ويغني
سالم :
لا عاد تبكين قطعتي معاليقي
مادام قلبي معك وش داعي الدمعه
سكتت غلا من سمعت صوته واتجهت له
سالم لف عليها وهو يمد لها كوب القهوه اللي سواه لها
سالم :سويته و ي رب يكون نفس اللي تسوينها
غلا ابتسمت وهي تبوس خده واخذتها منه :حتى لو مو حلوه مدام انت سويتها بتكون حلوه
سالم :ان شاء الله اني ضبطتها
غلا :شرف المحاوله لحاله يكفي
سالم ابتسم:اكيد
غلا :سالم
لف عليها وهو يرتشف من الشاهي :لبيه ياعين ابوي سمي
غلا :لاتزعل علي لاني بكيت وقلت خلنا نرجع
سالم :ليه ازعل ؟
غلا :مدري حسيتك زعلت
سالم حاوط خصرها بيده وبيده الثانيه ماسك كوب الشاهي :ان كاني زعلت فاني زعلت على دموعك اللي نزلت ولا غيره مازعلت
غلا بابتسامه:ياخي احبك والله
سالم وهو يبوس عنقها وهمس لها :ماتجين كثر حبي لتس
غلا اكتفت بابتسامتها فقط
رفع سالم نظره لها :ابعدي عني ولا تراي ماني مسوول عن اللي بيصير
غلا بعدت بسرعه :اجل انز اعلن انسحابي
ضحك سالم:تبين نقعد بالبلكونه ؟
غلا :شرايك نشوف فلم ؟
سالم :مهو جوي بس يلا عشانك اشوف
غلا :وش تحسن افضل نشوف فلم ؟
سالم:اللي يعجبك
غلا :انت وش جاي على بالك تشوف اليوم ؟رومنسي ؟كومدي ؟اكشن ؟
سالم :شوفي لنا شي حلو وخلينا نشوفه
غلا :طيب
سالم:بطلع اكلم سعود على ما بال تطلعين لنا فلم
غلا هزت راسها بتمام
سالم طلع وهو يتصل على جسار كذب عليها بانه سعود عشان ماتزعل
رد جسار:ارحب ابو نسب
سالم ابتسم:البقى شلونك ؟
جسار :بخير دامك بخير انت بشرني عنك وعن بنتي
سالم ابتسم:بخير كلنا بخير
جسار :امر وش بغيت ؟
سالم :بالله ي جسار ولا عليك امر بس كلم الاهل عندك لايرسلون لغلا من جمعتهم شي
جسار باستغراب:ليه ؟
سالم :جلست تبكي وتصيح تبي ترجع عشان جلسة الحوش
ضحك جسار :انت صادق ؟
سالم :اي والله يالله سكتت بالموت
جسار :يحول بنتي ام دمعيه ترا ماتقدر تبعد عننا ارفق عليها
سالم :بعيوني والله ي جسار بس اللي عندك يقهرونها على جلستهم وهي تصيح المسكيينه
جسار :لا معليك الحين بكلمهم واقول لهم
سالم :زين اسمع لاتقول لغلا اني اتصلت عليك وبلغهم لايقولون لها
جسار :ابشر
سالم :تراها ماتدري اني دقيت عليك قلت لها بكلم سعود
جسار ضحك :طيب
سالم :يلا تامر على شي ؟
جسار :سلامتك
سالم:فمان الله
جسار :فمان الكريم
-
طلع جسار وطلعت بعده بمده ملاذ
جسار :ي بنات و ياعيال
التفتو كلهم عليه
جسار :تو كلمني سالم يقول لاحد يرسل لغلا شي ولاتصورن لها جلستنا
نوضا :ليش ؟
جسار :يقول جلست تبكي تقول رجعني لاهلي
معالي :امي هي دق لي عليها
جسار :لا يمه الله يرضى لي عليك سالم يقول يالله سكتت من البكاء ويقول لاتعلمونها اني اتصلت عليكم وانتي تبين تكلمينها عشان ترجع تبكي ؟
معالي :بتطمن عليها بس
جسار :بكره كلميها اليوم لا
معالي :ان شاء الله
جسار ناظرهم :سمعتوني ؟
العيال +البنات :اي ،طيب ،زين
كملو لعب وفازت نوضا على جابر
نوضا :هههههههه جبتها وانا بنت ابوي من اللي كسر راس الثاني الحين
جابر :والله انك غاشه
نوضا :قدامكم كيف بغش ؟
جابر :مغبيه اوراق تحتك
نوضا وقفت :وينها الاوراق اللي تقول ؟
جابر :عادي المره الجايه انا اكسر راسك
نوضا ضحكت:كسرت راسك وانا بنت ذياااب
جابر :عمي والنعم فيه اما انتي لا
نوضا :ماني بحاجة نعمك اصلا
سهم :العب
مها :منتي هينه والله
نوضا :بنت ذياب محدً يقدر علي
ذياب :كفو والله ي بابا كفو
نوضا :كفوك الطيب
الجد فلاح:دقو على متعب شوفو وينه
انفتح الباب دخل متعب
متعب:هذاي جيت
الجد فلاح:تاخرت ي جدي وينك
متعب :كان عندي مريضه خلصتها وجيت
الجد فلاح:دام متعب جاء حطو العشاء خلونا تنعشى ونرقد ورانا صلاة جمعه بكره
العيال قامو يساعدون دحوم ويحطون العشاء والتمو على السفره كلهم وهم ياكلون بعد ماتعشو وانتهو اتجه الكل لجناحه ونامو ومرت ليلتهم بحلوها قبل مرها
وروني تفاعلكم الحلو اللي يحمس واذا تبون انزل بارت الجمعه وصلو هذا 100نجمه تقدرون عليها 💋