هلا والله حبايبي اول شي صلو على محمد واستغفرو
اللهم صلى وسلم على محمد وال محمد
استغفر الله العظيم
استغفر الله والله اكبر
وخلوكم مع البارت الحلو مثلكم
في اليوم التالي يوم الجمعه الصباح في جناح سالم صحى على قبل اذان الفجر اخذ له شور توضى ونزل تحت عشان يطلع مع جده للمسجد اما عند الجد سند تحت كان الجد سند والجده ساره جالسين في المزرعة <الي فالحوش >
الجد سند :ساره
الجده ساره:سم
الجد سند:سم الله عدوك ياابوي انتي تفقدي الاغراض شوفي فيه شي ناقصكم
الجده ساره:لا والله مافيه شي ناقص الاغراض جاهزه الا حنا متى بنمشي
الجد سند:بكره ان شاءالله
الجده ساره:على خير الله يلحقنا حياة
نزل سالم وهو يسمع حديثهم
سالم :صبحهم بالخير
الجده شيخه بصدمه قامت له :يوي يويلي وليدي ياهلا ومرحبا
سالم وهو يحبها جدا وهي تحبه :هلابك ومرحبا بك ياتاج راسي واتجه لها وهو يبوس على راسها ويديها
الجد سند:حي الله ولدي حي الله سيادة الفريق
سالم :الله يحييك ويبقيك واتجه يسلم عليه
الجده ساره ببكي :اللهم لك الحمد والشكر يالله انك رجعت وليدي سالم غانم
الجد سند:قرة عيونك يام سالم <لانها تحب سالم بالحيل >
الجده ساره:قرة عينك بشوفة النبي بالجنه ان شاء الله
جلس سالم واخذتهم السوالف وهم يسالونه عن اخباره
ماهي الي دقايق واذن الفجر ووصلهم صوت الاذان
الله أكبر، الله أكبر، لا إله إلا الله والله أكبر ولله الحمد. الله أكبر، الله أكبر، لا إله إلا الله والله أكبر هي على الصلاه خي على الصلاه الصلاة خير من النوم
الجد سند:سالم ياابوك
سالم :لبيك
الجد سند ببتسامه :لبيت حاج مشينا نصلي
سالم :ماحنا منتظرين عمامي وابوي
الجد سند:يلحقونا
سالم:اجل دقايق اقرب السياره
الجد سندبعصبيه:لالا من يوم خلقت وانا اروح المسجد على رجولي والحين تالي عمري تبيني اروح على سياره طايحن من عينك انا
سالم بصدمه :لا محشوم الله يخليك لي بس قلت اليوم نروح على السياره
الجد سند:لا قم قم اخلص الصلاه لاتروح علينا
سالم :ابشر
طلعو الجد سند وسالم متجهين للمسجد والجد سند يد على عكازه ويد ماسك يد سالم فيها صادفهم جسار وعبد العزيز وصقر وبتال والجدفلاح الي كانو متجهين للمسجد بعد كانو الجد سند وسالم يمشون قدام الجد فلاح والعيال الي وجسار الي شاف زول شخص يعرفه زين يميزه بين الف رجال زول ولد عمه الي بحسبة اخوه زول الفريق اول سالم وزول جده سند وقال بصوته الجهوري والعالي
جسار :ياابن العم
سالم الي عرف الصوت وهو مو طايقه ولا بالعه لف
سالم:هلا
الجد سند الي لف من سمع الصوت وشاف خوي دربه اخوه وعضيده شاف الجد سند وعلى طول الابتسامه شقت وجيهم
الجد فلاح:صبحك الله بالخير
الجد سند:صبحك الله بالنور
واتجه الجد فلاح والعيال للجد سند وسالم سلم الاجداد على بعض وبعده سلمو العيال على الاجداد بعد وحان وقت سلام العيال لبعض سالم الي مايطيق جسار محد يعرف السبب نهائي
مد جسار يده لسالم :سلام عليكم ياابن العم
ناظر سالم فيه ومد يده وهو يشد على يد جسار :وعليكم السلام والرحمه
عبدالرحمن وصقر اكتفو فقط بقول :سلام عليكم
سالم :وعليكم السلام
كملو مشي بس تغير ترتيبهم صاور الاجداد بالنص الجد سند على اليمين وعلى يمينه سالم والجد فلاح على اليسار بتال على يساره وجنبه جسار وجنبه صقر وبعده عبدالرحمن
الاجداد ماسكين يدين بعض
كان منظرهم يجذب وجميل فيهم هيبة وفيهم رهبه فيهم شموخ فيهم عزه منظرهم كان ينحسودن عليه الاجداد كل شياب الحاره كانو يشفون حب العيال لجدانهم وحب جدانهم لهم كانو يقولون موب معقول ترابطهم وحبهم لبعض قوي لهدرجه ماكنهم اجداد واحفادهم لل بلعكس كانو اباء وعيالهم ودخلو المسجد وصفو كلهم بصف واحد جنب بعض الكتف بالكتف والرجل بالرجل ودخلو الاعمام والخوال وصلو وبعد الصلاه
الجد سند:فلاح ياخوي حياك على الفطور
الجد فلاح:اكرمك الله ياخوك مير شيخه مزهبه فطورها جاهز مقدر اخليها يوم ثاني ان شاء
الجد سند ماحب يضغط عليه :على خير فيه العافيه
ورجع كل واحد لبيته في بيت الجد سند وصلو البيت
استقبلتهم الجده شيخه بالفطور والقهوه بعد ماافطور
سالم :استاذنكم انا بطلع اريح شوي
الجد سند:اذنك معك ياابوي رح ريح واخذ لك غطه ريح جسمك وعمرك
الجده ساره :يعورك شي امي تبي اسوي لك شي قبل تنام
سالم وهو يبوس يدينها :لا يمه جعل هل يدين ماتمسها نار تامرين على شي
الجده ساره :لا امي رح ريح عمرك
سالم اشر على خشمه :ابشري
طلع سالم لجناحه واخذ لهم قيلوله صارت الساعه ١١:٣٠صحى سالم وصحو البنات عند غلا الي الشمس جت على وجها قامت وهي متضايقة من نور الشمس قامت شافت الساعه تاخرت على القومه اليوم كله بسبب السهر امس قامت وتوجهت للحمام <تكرمون>اخذت لها شاور وصلت الفجر على السريع وطلعت جففت شعرها وطلعت لها ثوب مخور من طقوس الجمعه عند غلا تلبس ثوب مخور ولبسته ومشطت شعرها سوت حواجبها وحطت قلوس وبلشر خفيف وشوية اكسسوارات ورشه من عطرها الي ياخذ العقل وولعت بخور تبخر وتعطرت ولفت طرحتها ونزلت لجدتها وجدها
غلا وهي تبوس على روسهم:صباح الخير جمعه مباركه
الجده ساره:صباح النور
الجد سند:صباح الخير والسرور
غلا ببتسامه قربت من عند جدتها
غلا ومدت لها المشط والبكله :يمه عادي تجدلينه لي شعري
الجده ساره:من عيوني ان ماجدلت لك اجدل لمن اقعدي
قعدت غلا قدام جدتها وابتدات الجده ساره تمشط شعر غلا بهدو وهي تسمي عليها بسم الله
الجده ساره: يابنيتي وش رايك ازين لك حناء احني راسك
غلا وهي ماتحب الحناء :لا يمه تكفين اعفيني منه هالمره
الجده ساره:وليه يامي ماتبين
غلا :يمه تكفين والله مااحبه
الجده ساره:واحد مايحب الحناء يامي هي من ورق الجنه وش زينها وش زين ريحتها لجت فالشعر تهبل
غلا :يمه ادري ان ريحتها حلوه وانها من ورق الجنه بس تكفين هل مره ماابيه
الجده ساره:ان شاءالله
عند سالم الي كان يسمع الحوار هذا كله تنحنح
سالم :احححم احم ياولد
غلا الي خافت من صوته الجهوري وحست جسمها برد
الجده ساره:ايه ايه يامي دقيقه
الجده ساره ناظرت غلا:حطي على راسك يابنت
غلا لفت طرحتها وتغطت فيها وقامت تجلس على الكراسي
الجده ساره:ادخل ادخل ياوليدي
دخل سالم وجلس عند الجده ساره
الجده ساره:صح النوم
سالم :صح بدنك
الجده ساره:عسى ارتحت
سالم :اي شوي
عند غلا الي بدت تنسحب بشويش وقدرت تطلع وعلى طول ارسلت بالقروب بنات مين ذا الي عند جدتي <لانها ماقد شافته ماتعرفه دايما اذا جاء سالم بس يسلم على جده وجدته وابوه واحيانا على خواته وبعدين يروح بيته
جاها الرد من نادين :مين
غلا :مدري انا اسالكم
نادين :انتي وين
غلا :انا نزلت لمي تجدل شعري ودخل هذا
نادين :شافك ؟
غلا :لا طق الباب قبل يدخل
نادين :الحين انتي وين ؟
غلا :طالعه لجناحي
نادين :تعالي عندي وبنات اذا قايمين تعالو ابيكم بموضوع
غلا :يلا جايتك
وردت طيف :لايكون سالم اخوي
غلا :مدري مااعرفه
طيف :دامه موب غيث اكيد سالم
غلا :يمه شكله كان يخوف
ساره :ليه بسم الله عليه
غلا :وش ذا جسمه ضخم وطويل مره قسم لو يعطيني كف لموت
ساره :من هيبته خفتي
غلا :اقول روحي بسم انا ماخاف الا من الي خلقني
طيف :اي واضح
غلا :المهم تعالو عند ندو خلونا نشوف ووش موضوعها
طيف :حبيبي انا بنزل لجدتي وجدي وسالم
غلا :لو احلف انك بتنزلين بس عشان سالم
طيف :لاتفهمني صح ياخي
غلا :ابشر يلا قرة عيونك ياروحي الله يخليه لكم
طيف :قرة عينك بشوفة نبيك اللهم امين
اللقاء المنتظر عند طيف الي نزلت بسرعه حطت طرحتها عليها ونزلت وبخطواتها السريعه وصلت للمجلس ودخلت
شافت اخوها عزها سندها وعيونها طيف الي كانت تحب سالم كثير دخلت وشافته وامتلت عيونها دمووع وفرح
شافها سالم ووقف لها عشان يسلم عليها اتجهت له طيف
وفتحت يدينها له <سالم مايحب الحضن ابدا >بس ماقدر يخليها بخاطرها وحضنته طيف حط يده على ظهرها
طيف بشهقة ودموع :يامرحبا بعزي وسندي
سالم :مرحبا بك ي ذخري وعزي
طيف :ابطيت هل مره بالحيل علينا
سالم :شغل يااخوك وش نسوي
طيف :الله يقويك ويحميك
جلست طيف عندهم ويسالون سالم عن اخباره واموره
نزلت ساره : هلا هلا ومية هلا باابو عبدالله
وقف سالم :هلابك
ساره <ملاحظه ان سالم كل مايحضنه احد يتغير لونه ومايحضن الي جالس يحضنه> فـ ماحبت تحرجه واكتفت بمصافحة عند نادين وغلا في جناح نادين
غلا :طولو هذولي
نادين :حبيبتي تبين يخلون سالم تحت ويجونك
غلا :آي حبي شوفي انا تارك جسار وصقر واخواني وجايتهم
نادين :حياتتتي انتي اخوانك بوجهك كل يوم هم لهم كم ماشافوه
غلا :روحي بس اقول جسار وعبدالرحمن مانشوفهم كثير
نادين :طيب خلاص ماقلنا شي خذا هو شفتيه وشافك خليهم شوي مع اخوهم وبيجون
غلا :تمام
نادين:اقول امشي خلينا نزل لهم بس
غلا :سلامات وين انزل
نادين :عادي ترا تحجبي وانزل
غلا :لا ياعيوني على كيفك
نادين :ترا بزر امشي لاالوطك لوط
غلا :يابنت احس لا يخوف
نادين :وش الي يخوف
غلا :ياخي ما تعودت اني انزل وسالم فيه
نادين :الحين لو غيث فيه بتنزلين ولالا
غلا :اي
نادين :طيب وش الفرق
غلا :الفرق سلمك الله انه غيث متعودين عليه دايما معنا اما سالم ابد ماتعودت عليه حتى وجهه مااعرفه
نادين :اذا كان من ناحية التعود عادي بتتعودين اذا من ناحية الوجه بتشبعين من وجهه بس امشي خلصيني
غلا :لا لا انزلي انتي
نادين :كل تراب وامشي
نزلو نادين وغلا كانت متحجبه دخلو نادين وغلا
نادين :سلام عليكم حي الله ولد اخوي
سالم :وعليكم السلام الله يحييك
نادين :يقولون من طول الغيبات جاب الغنايم
دخلت غلا وراء نادين غلا الي وجها صار احمر من كثر الحياء
دخلت وقالت غلا:سلام عليكم
سالم ونادين والباقي :وعليكم السلام
غلا بصوت مبحوح وهي شوي وتموت من الحياء والخوف :الحمدالله على السلامه ياابن العم
سالم والي عرف الزول واليدين هي نفسها هي الي امس ماسمحت له ينام من كثر تفكيره فيها حس براحه لما عرف انها بنت عمه بس اي واحد من عمامه وحط عينه بعينها وقال :الله يسلمك يابنت العم
غلا الي من جت عينه بعينها توترت ونزلت عينها وجلسو يكلمون سوالف وجو باقي العياله يسلمون على سالم
سالم الي مانزل عيونه من على غلا بس يناظر فيها ويسرح الكل كان ملاحظ نظراته لها ونادين ودها تساله ليش وقف يناظرها وهي ترقص امس بس سكتت الجد سند كان مستغرب وقال :سالم ياابوك وين وصلت
سالم صحى من سرحانه فيها :هلا موجود
نادين باستفزاز:والله شكلك رحت بعيد منت معنا مركز على شي وحنا ماندري وشهو
سالم :على وش بركز ووش الي ماتدرون عنه
نادين وعينها على غلا:وش دراني ماغير تناظر فالبنت وتسرح
سالم وهو عاقد حواجبه:ماناظرت فالبنت ولاشي اناظر بالجدار
طيف الي كانت جنب غلا همست لهابضحك :اكلك بعيونه ويقول اناظر الجدار
غلا :الله يلعنك اووص لا توتريني
نادين :الا تعال متى جيت
سالم :جيت امس الفجر
نادين :على الساعه كم تقريبا
سالم :على ٢ونص او ٣
نادين وهي تضغط عليه :غريبه ماشفناك امس كنا سهرانين انا وغلا وطيف وساره بالمجلس الي بالحووش
سالم توتر لايكون شافته:مدري انا دخلت ورحت لجناحي
نادين بقلبها بالله: عليك دخلت وطلعت لجناحك هين هين اوريك
نادين :بس غريبه كيف دخلت مااحد شافك او انتبه لك
سالم بعصبيه:دخلت وخلاص وش تبين الحين
نادين برواق :ابد سلامتك ماابي شي
قاطعهم جوال نادين الي دق كانت العمه ندى طلع سالم عشان يدخن
نادين :هلا
ندى :هلابك وينكم
نادين :بالبيت
ندى :طيب افتحي لي الباب جايه انا ونور وفهد
نادين :طيب
غلا :مين
نادين:ندى
طيف :وش فيها
نادين :تقول افتحو الباب جايه
ساره:ايوا عشان تكتمل الشله
نادين وهي تبي تقهر سالم قالت دام فهد بيجي اخلي غلا تطلع تفتح الباب :غلا حبي
غلا :هلا حياتي
نادين :روحي افتحي الباب انتي
غلا :ليه ماتخلين احد العاملات
نادين :العاملات يطبخون وينظفون روحي انتي اسرع
غلا بتافف :طيب
في الحوش عند سالم الي كان مشمر اكمام ثوب وبيده زقاته ولافة عصبته كان يكلم سعود بس من شاف زول احد متجه لباب الشارع قال
سالم :سعود شوي اكلمك
سعود :تمام وقفل الخط
اتجه سالم وراها وقال :يابنت العم
غلا اللي انخرشت لفت عليه وقالت كلمه متعوده عليها:لبيه
سالم الي دخلت قلبه الكلمه وحس فيها روح وحنان له وقال:لبيتي حاجه وينك رايحه
غلا الي ابتسمت له :عمه ندى بتجي بفتح لها الباب
سالم عقد حواجبه :وليه انتي الي تفتحينه
غلا :نادين قالت لي
تقدم سالم لها وناظر فيها:وانتي تسمعين اي كلام ينقال لك
غلا الي انقبص قلبها وهو كل شوي يتقدم لها وهي ترجع على وراء وماقدرت ترد عليه
سالم :شكلك تسمعين اي كلام ينقال لك
غلا الي اخيرا قدرت تتكلم :مهوب انا الي اسمع اي كلام
سالم وهو يتقدم لها بزياده وهي ترجع :بس هذاك تسمعين كلام نادين
غلا :سمعت كلامها على شي يسوا رايحه افتح الباب لعمتي موب لي اي احد
سالم الي كان انظاره عليها وشاف العتبه وراءها كانت بتطيح لو ترجع خطوه وحده ومد يده دخلها وراء خصرها وسحبها له بقوه غلا الي تجمدت مكانها ماهي قادره تتحرك
سالم بعدها عنه :غبيه انتي احد يمشي على وراء لو انك طايحه الحين
غلا الي للحين ماهي قادره تتكلم او تتحرك من صدمتها كيف يمسكها كيف سوي كذا
سالم بغضب :هوووب اتكلم معك انا
غلا اخيرا تكلمت :خيررر ومن قال لك تمسكني من سمح لك اصلا
سالم :ايش
غلا :الي سمعته باي حق تمسكني
سالم :يعني عادي اشوفك تطيحين واتركك
غلاوهي رافعه اصبعها تهدده :احسن لي اني اطيح ولا انك تمسكني واسممع علمن يوصلك ويتعداك ان عدتها مره ثانيه لا تلوم الا نفسك فاهم ولالا
سالم :اول شي اصبعك نزليه ثاني شي نبرة صوتك لاترتفع ثالث شي مهوب انا الي تهددني مره
غلا :اول شي اصبعي ومالك دخل فيه ثاني شي نبرة صوتي ماهيب نبرة صوتك ارفعها اقصرها مايعنيك وثالث شي انا اهدد الي ابي والي يغلط على اهله ومحارمه
سالم الي اوجعته كلمتها بيغلط على اهله ومحارمه قال :الشره علي اني مساعدك
غلا :ياخي تقدر تساعدني بدون ماتلمس
سالم :بالله كيف
غلا :باانك تقول ياغلا ترا وراك عتبه بعدين انت ليش تمشي لمي
سالم الي اخيرا قدر يعرف اسمها :صدق والله بعدين مين الي لعب عليك وقايل اني امشي لك
غلا :انت هماك تمشي بتجاهي
سالم :امشي بتجاهك ليني باطلع للباب
قطع حوراهم الباب وهو يطق
سالم :مييين
فهد :انا انا ياابن الخال
سالم :ارحب جايك ناظر غلا ونزل نفسها لها ولحد قرب وجهه لوجها وقال :حديثي ينقطع معك هنا والحين ادخلي ولا اشوفك هنا لااكسر رجولك
غلا :نعم تكسر رجول مين يابابا مالك دخل فيني
سالم بغضب :ادخلي دام النفس طيبه للحين
غلا بعناد :اذا بدخل بدخل عشان فهيدان موجود ولا انت ماعلي منك ومشت بتدخل بسسس وقفها لما سحب يدها بقوه وغضب خير تقول فهيدان وقال :اذا انتي طالعه من ظهر رجال عيدي الي قلتيه
غلا اللي خافت هل مره بجد وخصوصا انه مساك يدها بقوة بس وين وهو تحداها بكلمة هذي <اذا انتي طالعه من ظهر رجال >
غلا جمعت شجاعتهاوقالت:الي سمعته
سالم :عيديه
غلابتوتر :وخر يدك ياابن العم
سالم الي ضغط علي يدها بقوة وبصراخ :عيديه
غلا بنفس نبرة صوته :اذا بدخل بدخل عشان فهد فيه ولا انتي ماعلي منك
سالم ضغط على يدها بقوه :انا وش قدامك رجل كرسي وانا مدري
غلا :يعني عارف نفسك
سالم اللي ارتفع ضغطه منها ورفع يده بيضربها كف غلا قدامه واقفه بجمود لا تحركت كان يبي يخوفها بس شافه سند غلا وعزها وقال بصوت عالي:سالممممم
سالم لف نظره له وفك يد غلا ونزل يده الثاني :سم
اتجه له الجد سند وهو كل شي عنده الا غلا وقف قدامه
رفع يده بيضربه كف نفس ماكان بيسوي بغلا بسسس وقفت قدامه غلا وقالت :لا تكفى ياابوي
الجد سند:وخري ماعاش من يمد يده عليك وانا حي
غلا :تكفى ياابوي ان كان لي قدر عندك ولو شوي
الجد سند:اه يالي ماتستحي على وجهك تمد يدك على بنيه
سالم الي مانطق بولا حرف انصدم بتصرفها معه
الجد سند:وش هي مسويه عشان تمد يدك
سالم :تعرف وش هي مسويه وطلع متجه للباب فتحه
كان قدامه فهد وعمته وبنتها سلم على عمته واتجه لسيارته شغلها وحرك بسرعه هائلة ندى الي انقبض قلبها من سرعتها وقالت :استودعتك الله ياعيوني
دخلت سلمت على ابوها الي كان غاضب جدا
ندى :سلام عليكم يبه شلونك
الجد سند:وعليكم السلام ورحمة الله بخير وناظر غلا تكلمي وش فيه وش صاير
غلا :اذا هديت نادني وطلعت متجه لجناحها وهي فيها الصيحه طلعت وراها نادين
نادين :بنت عسى ماشر وش صاير
غلا بعصبية :قولي وش الي ماصار
نادين:اهدي طيب وش فيه وش صاير
غلا :ابد والله ولد اخووك المحترم سيادة الفريق وصلت فيه انه يمد يده علي
نادين الي ماتوقعت ابدا سالم يسوي كذا :ليه وش سويتي
غلا :دايم كذا تسالون البنات وش سوينا ليه ماتسالون العيال وش سوو
نادين:بسم الله محد قد سوا كذا وترا مجرد سوالل
غلا :نادين اتركيني لحالي شوي عارفه لو تقعدين عندي بطلع حرتي فيك
نادين :تمام اذا موجوده اذا هديتي دقي علي
طلعت نادين ونزلت تحت البنات وهم ينتظرون نادين تجي
ساره :عرفتي وش صار
نادين :اول مره اشوف غلا بحياتي كلها معصبه وزعلانه لهدرجه
ندى :اجل وش تقولين لو تشوفين ابوي
نور :غريبه وش سوا سالم
نادين :مادري الله يهدي النفوس بينهم
ندى :تعالو ماراح ترحون العرس اليوم
نادين :عرس مين
ندى :تستهبلين عرس خزام ولد خالتي فاطمه
نادين :امانه اليوم
ندى :اي
نادين :مدري نشوف شوي الاوضاع
عند غلا الي تفكر فيه خصوصا انه طلع بسيارة مسرع وبدت تحس نفسها هدت ارسلت لنادين :بنت تعالي لحالك لي فوق جاها الرد من نادين :ابشري كم عندي غلو انا
طلعت نادين لغلا ودخلت جناحها :بشري حبي هديتي
غلا :اي
نادين :حلو علميني وش صار
غلا :ياختي موب قلتي لي اطلع افتحي الباب
نادين :اي
غلا:حلو كنت طالعه جاء من وراي يقول يابنت العم وابتدت تسرد لها القصه لحد وصلت عند وقلت له اذا بدخل بدخل عشان فهيدان موجود ولا انت ماعلي منك
نادين الي ابتسمت :يعني عصب بعد ماقلتي له هل كلام
غلا :اي
نادين :تدرين ليه عصب
غلا :لان غلطت عليه وقلت له انه رجل كرسي وانه موب رجال
نادين :ههههههههههههههه والله ماطق لكلامك هذا خبر
غلا :اجل
نادين :اشتغلت عنده الغيره
غلا :كيف يعني
نادين :عشان قلتي فهيدان
غلا بعدم فهمان :كيف يعني
نادين :ياغبيه يعني واضحه مثل الشمس
غلا :مافهمت وش قصدك
نادين :قصدي انه غارررررر
غلا بصدمه :وش تقولين انتي انهبلتي يغار على وش
نادين :واضح وصريحه يغار عليك
غلا :ياليل انتي بوادي وانا بوادي
نادين :حبيبي انتي تحسبين مسكت الخصر عبث
غلا رمت المخده عليها:كلي خرا الله يلعني يوم قلت لك
نادين :يويلي بنتنا طلعت تستحي
غلا :استحي من وش معيره الرجال ماخليت عليه كلمه وهذي تتفلسف على راسي تقول يغار متى عرفني هو عشان يغار
نادين :حياتي هذا يسمونه الحب من اول نظره
غلا :اي نظره اي بطيخ وين شافني هو
نادين :حبيبتي اكلك بعيونه قبل شوي
غلا بخجل وتوتر:نادين وش رايك تذلفين قبل اتوثم فيك
نادين :فديت اللي يستحون والله
غلا رمت عليها المخده :وربي لادق خشمك اطلعي
نادين الي هربت قبل تصقع فيها المخده :ابشر طال عمرك
طلعت نادين ونزلت تحت ومسكتها ندى الي كانت طالعه من المطبخ
ندى :تعالي تعالي
نادين :بسم الله وش فيك
ندى :عرفتي السالفه
نادين :اي
ندى:ها بسرعه غردي وش صاير
نادين :اذا حطيتي يدك على جيبك علمتك
ندى:اه ياقليلة الحياء تاخذين من اختك فلوس
نادين :اي حياتي مافيه شي ببلاش
ندى :اقول اهرجي اخلصي
نادين وهي ترفع يدينها :مالي دخل تجي غلا وتقول لكم ونحاشت
ندى :والله مااخلقك يانادين انا اوريك
نادين :هههههههههه ان شاءالله
بس وقف ضحكها صراخ الجد سند وبغضب وعصبيه
الجد سند:نادين ووجع
نادين :سم
الجد سند:نادي لي غلا بسررعه خليها تجي مكتبي
نادين :ابشر
طلعت نادين لجناح غلا ركض فتحت الباب بقوه فزت غلا
غلا :بسم الله وش فيك خير
نادين :انزلي بسرعه ابوي يبيك معصب
غلا:انزلي بلحقك
نادين وهي توجه اصبعها السبابه لغلا :لاتتاخرين
غلا :قلت طيب
نزلت نادين ماهي الاثواني ونزلت غلا وراها
غلا :وين ابوي
نادين :ينتظرك في مكتبه
غلا وهي متوتره وخايفه اتجهت للمكتب وقفت قدام الباب تاخذ نفس وتهدي نفسها وطقت الباب
الجد سند:منهو
غلا:انا غلا
الجد سند:ادخلي
دخلت غلا ووقفت بنص المكتب
وقف الجد سند واشر لها تجلس على الكرسي جلست غلا وجلس قبالها
الجد سند وهو يهدي نفسه :ياابوي انتي وش صاير وش مسويه لدرجه وصلت فيه انه يمد يده عليك
غلا :ماسويت شي
الجد سند:اجل ليه يقول اسالها وش مسويه
غلا :السالفه ومافيها كنت طالعه افتح الباب لعمتي قالت له كل شي ماعدا انه مسكها مع خصرها اساسا كيف تقول وماتقدر
الجد سند بتفكير :وانتي ليه تقولين ليه رجل كرسي
غلا :لان ماله دخل فيني
الجد سند:ياابوك كيف ماله دخل فيك
غلا :لاهو ابوي ولا هو اخوي ماله حق علي
الجد سند:لا يابنيتي له حق انتي بنت عمه ملزومتن عليه وانتي شعره من شعر دقنه انتي في وجهه من صدوف الليالي
غلا سكتت
بس كان راي الجد سند من راي نادين :وانتي ليش تقولين فهيدان
غلا :ابوي طلعت من غير قصد وترا فهد نفس اخوي
الجد سند:انا ادري انه مثل اخوك وهو اخوك بس سالم وش يعرفه
غلا :وهو وش عليه
الجد سند بدا يفكر نفس نادين خصوصا تاكد بعد نظراته لغلا
الجد سند:خلاص ياعيون ابوك روحي وانا اتفاهم معه
طلعت غلا واتجهت للصاله الي موجودين فيها ودخلت
غلا :رجاء لااحد يسال عن شي سالفه وراحت
سكتو البنات وغلا باين عليها متضايقه
ندى :يمه مارح تروحين العرس اليوم ؟
الجده ساره :عرس من
ندى :يمه وش فيك عرس خزام ولد خالتي فاطمه
الجده ساره:يوه اجل هو اليوم
ندى :اي
الجده ساره:اجل قومن قومن اجهزن يلا يابنات
غلا :يمه انا ماراح اروح
الجده ساره:ليه يمه
غلا :مالي خلق
الجده ساره:عشاني ياامي قومي ولا بزعل عليك
طيف :وربي مالك داعي
حلا الي نزلت قبل شويات :اذا انتي مارحت ماراح اروح
ساره :حتى انا
غلا :بروح بس ماراح اطول
الجده ساره:مع من بترجعين
غلا :مدري بكلم احد اخواني ولا مشاري او بتال
الجد سندالي سمع كلام غلا :خير ان شاء لله وينك رايحه
الجده ساره:بنروح لعرس ولد اختي فاطمه اليوم وتقول ماراح اطول برجع بدري
الجد سند:اجل اليوم عرسه
ندى :وش فيكم كلكم ناسين
الجد سند:اختلفنا اجل قومو اجهزو وانا بدق على العيال يجهزون
نادين :بنات انا بروح اكشخ عند غلا
ساره :اجل كلنا بنجي عندكم
غلا :لاتكفون مالي خلق ازعاج
حلا رمت المخده عليها :ياحيوانه الحين حنا مزعجين
غلا الي مالها خلق شي :ياخي موب عن انكم تسون ازعاج
ساره :اجل
غلا :مالي خلق للزحمه وانتي نادين جناحك وش مقصر فيه
نادين :قليلة ادب كل يوم وانتط مرتزه عندي اليوم وربي لانشب لك ماعلي منك
حلا :صراحه انا بعد الطرده هذي ماراح اجيك بروح غرفتي
غلا :يابنات لاتزيدون همي هم مالي خلق موب عن طرده
طيف :معليك منهم بس وانتي صادقه وش يحدك تتحملين ازعاجهم وحوستهم
غلا :ياخي تدرين
طيف :وش
غلا :وربي احبك
طيف :وانا اموت عليك
نادين :وع ياكبدي اتركو التغزل وقومو نتغداء ونروح نكشخ
ساره :ماهمك الاكرشك
نادين :طبعا ليه عندي شي غيره
غلا :عليكم بالعافيه انا بطلع ارتب جناحي واجهز اغراضي
ساره :تمام غلا ياروحي لا تفكرين انسي الي صار
غلا :من عيوني
طلعت غلا لجناحها رمت نفسها على سريرها وهي تفكر فيه تفكر بالي ماله يوم جاي واشغل تفكيرها وش صار عليه وش فيه ياترا هو حي ولا ميت صدم ولالا وين راح
اما عند سالم الي اتجه للبرحه الي كل ماضاق اتجه لها ويقفل جواله وبعد مرور ساعتين وسالم مايرد على اتصالات
سعود ولا جده عرف سعود انه فيه شي مضايقه واتجه للبرحه لف سالم على صوت السياره الي جايه باتجاهه عرف السياره انها لسعود وقف عنده سعود ونزل له وقرب وهو يخبط كتف سالم
الفريق اول سعود:عسى ماشر وش فيك
الفريق اول سالم:مافيه شي
الفريق اول سعود:خبز يدي انت تعلمني فيك
الفريق اول سالم:ياابن الحلال مافيني شي
<سالم جداا كتوم ومايعرف له الاسعود >
الفريق اول سعود:دام مافيك شي ليه جاي للبرحه
الفريق اول سالم بضيق :ياخي داخلن على الله ثم عليك لاتسال
الفريق اول سعود عرف دام قاله كذا يعني السالفه خاصه وقال :ابشر على خشمي وحط يده على كتف سالم مير ياخوك ان بغيت تفضف وتقول ترا موجود
الفريق اول سالم:الله يخليك لي يااخوي
بعد ساعه اتصل جوال سعود طلعه من جيبه ويضوي وكان مسجل بعمي سند لف الجوال لسالم
سالم :لاترد
سعود :دامه دق علي اكيد فجر جوالك ولارديت
سالم :خله شوي اكلمه
سعود :مايصير مارد عليه
سالم :رد بس لاتقول انك معي
سعود بعبط وهو يغمز لسالم :اوامر ثاني حياتي
سالم وهو يلف كتف سعود :ودك تتسطر حياتي انت
سعود لف كل جسمه مع لفة يده :اح اح التوبه التوبه
سالم :خلك كذا
سعود :ياخي وش فيك انت روق
سالم :رد لا يقفل الخط
سعود رد وهو الضحكه فيه حطه سبكر :ارحب
الجد سند وهو يمون على سعود :وينك فيه يالمروح عن الجوال
سعود انفجر ضحك :ههههههه موجود جعلني قبلك
الجد سند:وين المروح الثاني معك
سالم الي رفع حاجبه
سعود :مدري ادق عليه مايرد
الجد سند:سالم ماتدري وينه وانت جالس تضحك وعادي عندك الموضوع
سعود :مدري عنه دقيت ولايرد قلت اكيد نايم
الجد سند:اقول كب الكذب عني ادري انه جنبك مير قله ان ماعود البيت وفتح جواله لا يلوم الا نفسه
سعود :ابشر اذا شفته بقول له
الجد سند:انته الظاهر تشوفني ورع عندك
سعود :لا محشوم طال عمرك
الجد سند:اجل علمه ووصل له العلم
سعود :على خشمي تامر بشي طال عمرك
سند :لا وقفل الخط
سعود :وش انت مسوي دامه قفل الخط اجل الامر كايد
سالم :ماعلينا انا بروح اخلص لي شغله وبعدها بروح البيت تبي شي
سعود :سلامتك بس رح اول شي للبيت واضح انه زعلان
سالم :ماعليه اتركه انا اعرف له
وتفرقو سعود راح لشغله وسالم راح للمركز يشوف وصار فيه من تطور احداث وغيرها
عند البنات في جناح غلا تحديدا دخلت نادين
نادين بشهقه :ماسويتي شي للحين
غلا الي قامت من السرير :وش فيك تو الوقت
نادين :وين تو الوقت الساعه ٤وحنا ماخلصنا ولا طلعنا
غلا :كلها دقايق واخلص
نادين :وش بتلبسين
غلا :مدري
نادين :يويلي بتجلطني قومي هذا من غير الحين الميكب والشعر ومتى بنطلع من البيت قومي اخلصي
غلا :خلاص ياخي لاتقروشيني بخلص
نادين :قومي شوفي وش بتلبسين
اتجهت غلا للدولاب وفتحته خذت اول فستان قدامها كان بالون الاحمر الطاغي كان بكتف واحد ومعه كم يلبس وقصير لفوق الركبه وفيه زي الطبقات من تحت
غلا :شوفي هذا حلو ولالا
نادين :اوف هذا بيطلع عليك نار
غلا :شوفي الكعب البيج هذا حلو صح
نادين :اي لايق عليه بس منكري اضافر رجولك
غلا :تمام على مااحط مناكيري سوي شعرك
نادين :طيب
غلا :وش بتلبسين انتي
نادين :شفتي فستاني الجديد الي شريته
غلا :اي واحد ناسيته
نادين :الاسود الماسك الي اكمام ريش ومن عند فوق الركبه ريش بعد
غلا :اي اي هذاك حريقه عليك
نادين :فديتني صاروخ
غلا :ياشين الثقه الزايده
نادين خذت الايلاينر ورمته عليها :وربي انك وصخه المروض تمدحين عمتك
غلا :اقول اخلصي بس
بدو يجهزون انفسهم فستان حلا الي كان بالون البيج كان ماسك على الصدر بدون اكمام ولتحت الركبه وفيه زي الطبقات اما طيف كان بالون الموفي كم واحد ماسك وقصير فيه زي الكرمشه لنص الساق وفيه من على البطن زي الحزام بالون الفضي اما ساره كان بالون السكري اكمامه طايحه على الاكتاف وفيه من عند الثدر لون كحلي كلا طويل
فستان نور كان بالون السماوي الفاتح وماسك على الصدر فيه زي الرسمات من فوق ومن تحت خلصو البنات
نزلت غلا ونادين غلا وهذ حاطه عبايتها على يده
الجده ساره والعمه ندى الي انبهرو بجمالهم وخصوصا غلا على ان ثوبها عادي وناعم لكن كانت اية بالجمال
الجده ساره:بسم الله حصنتكم بالله الله يحفظكم
غلا الي كان شكلها فوق التقيم من جمال الجسم ولا جمال الخشه ولا وجمال الشعر الي مسوية ويفي كانت فعلا غاية بالجمال ولا يهونو باقي البنات نزلو كلهم وهم يمدحون بعض
نور :بنات وربي كلنا نهبل
طيف :اي والله بسم الله علينا
حلا :فديتنا ياحلونا
نور :بس اكثر وحده عجبني شكلها فينا صراحه غلا
غلا بغرور وهي ترجع خلصة شعرها وراء :اكيد حبي وش جاب النجوم لقمرها
نادين :اقول اسكتي بس لااصقعك
ندى :بذي يحق لها عاد وهي صادقه احلاكم غلا
نور:اح ماما وانا
ندى :انتي بعد تهبلين بس غلا الصدق الي عجبني شكلها
غلا وهي تبوس راس عمتها :ياختي اموت عليك قسم بالله
ندى بضحكه :وانا اموت عليك ياعيون عمتك
غلا وهي تخز نادين :تعلمي شوي
نادين :يمها شوفي بنتك
الجده ساره:وهي صادقه مير كلكن موت حصنتكم بالله يلا يلا قومن تاخرنا تعالن تبخرن
دخل الجد سند وهو يشوف البنات كاشخين وجميلات جدا :مشاءالله مشاءالله على بناتي الله يحفظكم
نادين :يبه تعال انصفني مين احلا وحده فينا
الجد سند:كلكن مزاين الله يحفظكن
نادين :لا يبه يعني واحده فارقه عننا مزيونه بالحيل
الجد سندبعبط:ها اجل تبين الصدق الصدق ولا الكذب الكذب
نادين :لا والله ابي الصدق الصدق
الجد سند وهو يناظر غلا :الصدق ان احلاكم غلا
حلا وهي تناظر نادين :اتوقع انك سالتي الشخص الغلط كلنا عارفين انه بيقول غلا
نادين :اي والله
اما غلا الي اتجهت لجدها وهي تبوس على راسه :الله لايحرمني نادين وصلتك الاجابه ولا للحين
نادين :لا وصلت على اتم وجهه بعد
غلا :اشوا اجل
الجده ساره:سند كلمت العيال
الجد سند:اي بيروح معنا صقر وعبد الرحمن
الجده ساره:والباقي
الجد سند:جسار يقول عند مهمه وعبد العزيز يقول عنده شغله ضروريه
الجده ساره:سالم وغيث بيروحون
الجد سند:غيث توه جاي من سفر يقول بيجي متاخر ماراح يروح معنا اما سالم ادق مايرد علي
الجده ساره الي انقبض قلبها :ليكون فيه شي
غلا الي حست بخوف من كلمة جدتها خصوصا اذا صار له شي غلا بتنهار بيكون كله بسببها طلع مسرع بسببها
الجد سند:لا كلمت سعود وانا ادري انه جنب سعود
الجده ساره:كلمك
الجد سند:لا بس دام سعود مرتاح اكيد انه مافيه شي
غلا الي ارتاحت شوي بس مابينت لحد انها مهتمه للموضوع
الجده ساره:زين اجل دامك تقول كذا
عند سالم الي وقف قدام البيت بينزل ودخل لاكن وقف صوت جده وهو يقول
الجد سند:ندى فهد بيروح
ندى :اي يبه كلمته الحين بيجي
الجد سند :اجل انا وساره بنروح مع صقر وعبدالرحمن ونادين وسالم اذا جاء يروحون معه حلا وطيف وساره
وانتي روحي انتي وبنتك وغلا معكم عند سالم الي بس سمع اسمها وانها بتروح مع فهد شوي ويطق فيه عرق حس انه كره فهد من غير سبب وده يمسكه ويفرمه
سالم تنحنح وقال :ياولد
تغطو غلا وحلا ونور
الجد سند:ادخل
سالم :وش فيكم وش هل الدعثه
الجد سند:الحقني انا اعلمك الدعثه وشنهي
وطلع متجه لمكتبه وسالم وراه دخلو
الجد سند :اقعد
قعد سالم :وش فيه
الجد سند:انا الي المفروض اسالك وش فيه وش صاير
سالم :ابد طال عمرك ماصار شي
سند :سالم وش الي وصلك لحالة تمد يدك على بنت عمك
سالم :مامديت يدي
سند :لو ماوقفت كان ضاربه وخالص
سالم :حتى لو ماجيت ماكنت راح امد يدي
سند :والي انا شفته وش
سالم :كنت ابي اخوفها بس
سند :وليه تخوفها
سالم :سبب يخصني
سند :ووش هل سبب
سالم :قلت لك يخصني ووقف فيه شي ثاني طال عمرك
سند الي عرفه انه ماراح يتكلم ولا راح يقول شي له قال :اي
سالم:وش هو
سند :اليوم عرس ولد فاطمه خزام بنروح له
سالم :الله يستر عليك انا ماراح اروح
سند :الا بتروح وبتاخذ معك حلا وطيف وساره
سالم وهو بيطلع : قلت لك الله يستر عليكم
سند :كلمتي وحده ياسالم تقدر تطلع الحين
سالم الي مايقدر يكسر كلمة جده سكت وطلع نطحته طيف
سالم :طيف
طيف :هلا
سالم :اذا بطلع اتروش خلوكم جاهزين
طيف :ابشر
بعد ساعه جو العيال وبنفس ترتيبهم طلع سالم يشغل السياره ورجع
سالم:طيف اطلعي انتي والبنات للسياره برا بجيب شماغي واجي
طيف :طيب
عند فهد الي وقف قدام البيت واتصل على امه
فهد :الو يمه
ندى :هلا امي
فهد :اطلعو انا برا
ندى :طيب يلا يابنات فهد برا
غلا :عمه اطلعو بالحقكم بلبس كعبي واجي
ندى :اعجلي لاتتاخرين
طلعو ندى ونور بقى غلا طلع سالم قبل غلا شاف فهد برا واقف واتجه له يسلم عليه او بالاصح مايبيه يشوف غلا اذا طلعت وراح له ولفه بحيث يكون ظهر فهد على الباب وهو ماسك يد فهد
سالم :ارحب وشلونك
فهد :البقى بخير الحمد لله انت شلونك
سالم :بخير دامك بخير وش علومك
فهد :والله الحمدالله تمام
طلعت غلا وهي متغطيه شافها سالم وهو يحاول يلهي فهد
سالم :وشركتك كيف امورها
فهد :على ماتسرك زينه
سالم :الحمدالله عسى دوم وابوك شلون
فهد الي عرف ان فيه شي لا سالم للان مافك يده
فهد :الحمدالله انت وشلون الدوام معك
سالم :الحمد لله
فهد :عسى دوم
سالم وهو يخترع اسئله لين تركب غلا وركبت غلا وارتاح سالم ان فهد ماشاف زولها
العمه ندى:فهد مهوب وقت السوالف اخلصو عاد
فهد :خلصتو
ندى :ايه ركبت غلا اخلص علينا
فهد وهو يسحب يده من سالم :يلا اجل استاذنك ياابو عبدالله
غلا الي اعجبها اسم <ابو عبدالله >ابتسمت
سالم الي ماهو قادر يتركها مع فهد بس وش يسوي حتى لو يقول لها امشي مع ماراح تروح مشى مع فهد لين ركبه السياره وسكر الباب ودخل راسه مع الدريشه
سالم وعينه على غلا:انتبه يافهد لاتسرع نخاف على عمتي
فهد :ماعليك عمتك بالحفظ والصون ومن ناحية السرعه مانيبي حق سرعه انا
سالم وهو يخبط كتف فهد:يلا اجل انتبه وتوكل على الله
فهد :توصي شي
سالم :سلامتك
حرك فهد وبعد صقر وبعده سالم وهو وده يوقف فهد وياخذها معه بس عزة نفسه اهم شي عنده حتى لو وقفه ماراح تنزل وتروح معه هو عرف عنادها وعزة نفسها
وصلو للقاعه ونزلو البنات من سيارة سالم وصل فهد بعده وبعد صقر الي المفروض اول واحد وصل بس وين وجده كل شوي يهاوشه لا تسرع وهد ماعلينا من هذا كله دخلو البنات للقاعه دخلو وفكو عبيهم ودخلو وجلسو جنب بعض كلهم وهو شايلين العرس شيل لانه عرس ولد خالتهم واكثر من تعب فيهم ندى ونادين لان عرس ولد خالتهم وخالتهم فاطمه لها من العيال ثلاثه خزام ونادر فهاد
وبدت الطقاقه ترحب وتغني وتقول من ضمن الاغاني
(كل ال زياد يعزون عز الورق في غصونه )
ونزلو الكل لساحه وسط ردح عظيم وهي تنتقل بينهم وتمدح بسطور معتاده لكن لها وقع فالقلب وفرحه
(جعل ام خزام مايجيها الكدر ولاتشوف الباس في عيالها )
وانتلقت للمقطع الثاني وصوتها العالي وهي تقول
وخزام لاتخلونه ..يشيله ماتشلونه ...يشيل الدرع بموتونه ..وخزام دار باروده ....كسرهم ماانكسر عودهه )
وميثى <زوجته>يتعزون ابها وذياب الشاش تطربها
ويازين ميثى بينهم تسوى قلايد خييلهمم
وكملت على هل موال الي مايخلى منه اي عرس سعودي وهي تمدح والباقيين والكل يدرح
طاحت عينها على غلا الي جالسه ومالها خلق لحد وقالت
(انت ياهالموت الاحمر ليه عن هالناس لاهي قم مدام الله عطاك الي عطاك وبه تبختر بس ابسال في الكثير الي خذيته من تباهي لافزين ولافلين ولا في مظهر تبختر وش علييك )
نادين الي سحبت غلا تقوم ترقص معها وقامت غلا رهي ترقص بهدوء وتمايل احد العجز الي موجودين انهبلت على غلا بعد ماانتهت غلا من الرقص وراحت تجلس جلست جنبها العجوز
العجوز :سلام عليكم
غلا :هلا ياخاله وعليكم السلام
العجوز :مشاءالله تبارك الله انتي من بنتن له
غلا :انا غلا بنت فارس ال سند
العجوز :والله ونعم انتي بنت معالي
غلا :ماعليك زود اي ياخاله امري
العجوز :مايامر عليك عدو بسالك
غلا :لبيه
العجوز :انتي معرس
غلا باحراج :لا ياخاله توي صغيره
العجوز :امس وينها
غلا :انا جايه مع جدتي امي ماجت
العجوز :وينها فيه جدتك
غلا:شوفيها هناك هذي هي
قامت العجوز واتجهت للجده ساره وجلست جنبها
العجوز :سلام عليكم مساك الله بالخير يام فارس
الجده ساره:وعليكم السلام مساك الله بالنور
العجوز :عرفتيني
الجده ساره:لاوالله العذر
العجوز:انا ام حمد عرفتيني
الجده ساره:ايه ايه هلا ومرحبا بام حمد وشلونك
ام حمد :والله بخير انتي وشلونك
الجده ساره:نحمد الله بخير
ام حمد :ياساره بطلب منك طلب
الجده ساره:امري
ام حمد :انا بخطب بنت ولدك فارس غلا لولدي حمد
الجده ساره الي انصدمت :هذي الساعه المباركه مير بشوف راي ابوها وجدها وراي البنيه وارد لك خبر
ام حمد :عانيني انتظرك ردي لي خبر
الجده ساره:ابشري الله يكتب الي فيه الخير ان شاء الله
ننهي البارت السابع هنا حبايبي مجبوره اني اوقف هل الاسبوع لان عندي اختبارات واتوقع الاغلب عنده اختبارات ان شاء الله كلها اسبوع وبرجع لكم في بارت يكسر الدنيا اعذروني 😔🤍
أنت تقرأ
ليته ماسمعني يوم قلت (يحق لك مايحق لغيرك ياعزوتي)
Randomهالروايه فيها احداث تدور بين عايلتين عايله ال فلاح وعايله ال سند يجمعهم حبهم لبعض وتربطهم في بعض وحبهم ل احفادهم فيها مخيم للعايله وديره روايتنا تتكلم عن احداث ابطالي سالم ومين تتوقعون وتبداء من البارت الرابع سند يوصي سالم على عين السيح ويحمله م...
