လူတိုင်းကငါ့ကိုသည်းသည်းလှုပ်နေကြတယ်

(38)

Unicode

ရဲ့ချင်ဟာ ရဲ့လင်းဝူကိုကြောင်အအ အမူအရာဖြင့် ရပ်ကြည့်နေမိလေသည်။ သူဘယ်လိုရှင်းပြရမှန်းအမှန်တကယ်မသိတော့ပေ။

ရဲ့ချင်၏ခဏတာငြိမ်သက်နေမှုက တစ်စုံတစ်ယောက်ကိုအခွင့်အရေးပေးလိုက်သကဲ့သို့ဖြစ်သွားစေသည်။ ရဲ့လင်းဝူ၏ အမူအရာမှာ အကြီးအကျယ်ပြောင်းလဲသွား၏။ တိုက်ခိုက်နေဆဲဖြစ်သည့်သားရဲတွေကြားမှာ ပုန်းအောင်းရင်း အခွင့်အရေးကောင်းကိုစောင့်ဆိုင်းနေသည့် အဆင့်၃ မှော်သားရဲတစ်ကောင်က ရဲ့ချင်ကိုအနောက်ကနေ ခုန်အုပ်လာသည်။

ကျောင်းသူလေးတွေဆီက ကြောက်လန့်တကြားအော်ဟစ်သံတွေဆူညံသွားပြီး မည်သူမှ သူတို့ကြားထဲတွင်အဆင့်၃ သားရဲတစ်ကောင်ရောက်နေမှန်းထင်မှတ်မထားခဲ့ပေ။ ပြီးတော့ ၎င်းအမျိုးအစားက ကျားသစ်နက်ဖြစ်ပြီး လျှင်မြန်မှုအရာတွင်ပြိုင်ဘက်ကင်းသည်။

ဝှစ်!!

ထိုအခိုက်အတန့်လေးမှာပင် ရဲ့ချင်ကိုနောက်ကျောဘက်က ခုန်အုပ်တိုက်ခိုက်လာသည့် ကျားသစ်နက်ဟာတစ်စုံတစ်ခု၏ဂုတ်ကနေကိုက်ဆွဲခြင်းကိုခံလိုက်ရသည်။ ထိုအရာကထူးဆန်းသည်။ ကျားနဲ့ဆင်တူသော်လည်း ကျားတစ်ကောင်မဟုတ်ပေ။ ၎င်း၏ခန္ဓာကိုယ်က လူတစ်ရပ်စာလောက်ကြီးမားပြီး ခန္ဓာကိုယ်က နက်ပြာရောင်မှင်ရည်တွေဖြင့်ဖွဲ့စည်းထားခြင်းဖြစ်သည်။

မှင်ရည်တွေဖြင့်ဖွဲ့စည်းထားသည့် အမည်မသိသတ္တဝါကြီးမှာ ကျားသစ်နက်၏လည်မျိုကိုသွေးတွေပန်းထွက်လာသည်အထိကိုက်ခဲထားပြီး ရဲ့ချင်ကို နူးညံ့သိမ်မွေ့သည့်ကြောင်ပေါက်လေးတစ်ကောင်ကဲ့သို့ မျက်လုံးဖြင့်ကြည့်လာသည်။ ကျားသစ်နက်ဟာ နောက်ဆုံးထွက်သက်သို့ရောက်နေမှန်းသိ၍လား မသေချာပေမယ့် နောက်ဆုံးသောဟိန်းဟောက်သံတစ်ချက်ကိုပြုလုပ်လိုက်သည်။

လေထုထဲတွင် သေးငယ်သည့်ပြောင်းလဲမှုတစ်ရပ်ဖြစ်ပေါ်လာပြီး မူလကရဲ့ချင်ကိုကြောက်လန့်နေသေးသည့် မှော်သားရဲတွေ၏မျက်လုံးတွေမှာရဲရဲနီလာသည်။ မှော်သားရဲအားလုံး ထိန်းချုပ်ခံလိုက်ရသလိုမျိုး သူတို့နဲ့ တိုက်ခိုက်နေဆဲ ဆင့်ခေါ်သားရဲတွေကိုလျစ်လျူရှု့၍ ရဲ့ချင်ရှိရာဆီသို့တဟုန်ထိုးပြေးဝင်လာကြသည်။