#وجودك_أمان 🤍
الحلقة [31]
كملنا نزلنا حضنتني عميمه عزتني طلعنا ركبني بالقاسم في السيارة و عميمه ركبت طلع ، أنا نبكي بشويش أول ما خشينا الشارع شفتهم يركبوا في خيمة الصبايا كانت زحمه .
بالقاسم : ما تنزليش لين نقرب من فم حوش العزاء .
قرب من باب الحوش نزلنا أنا و عميمه خشيت مع طلعت كمال ، صوت العياط للشارع انهرت بكاء بعد قابلتني نيروز تعيط تنط و تندب ...
نيروز : وووه عليا أمي وووه عليا جنتي ووووه عليا وووه عليا " شافتني" ووووه عليا يا رحمه ووووووووووه "طاحت" .
بالقاسم ماسك عميمة ماشي بها شور الخيمة : أمي عينك عليها راه طيح و لا دوخ .
عميمه مسكت في رواق الخيمة : باه ما تخاف أنا معاها.
أنا عديت جيهة نيروز حضنتها نبكي .
نيروز تبكي حضنتني : نعليا ماما يا رحمه نعليا الغالية يا رحمه ، عدت وخلتني يا رحمه ، نعليا الحنونه كسرتيني يا ماما يا عازتي فيك يا الحنونه .
عميمه جت جنبي تسكت فيا تفك فينا : قولن لا الله إلا الله، الله يرحمها الله يرحمها .
أنا نبكي معش قدرت نمسك روحي صوتي طلع ، وجعتني بكل و صوت نيروز و كلامها يزيد فيا يذكر فيا في وفاة ماما فراق ام واعر
نيروز : حي عليا وحي تيتمت من الجيهتين لا بات لا أم حي عليا من وين نجيب الحن، حي عليا عدوا و خلونا بروحنا ووووه عليا يا أمي وووووه وووه عليا يا ماما من اللي يبي ينشد على حالي يا ماما من يسأل عليا و أنا بعيده ، من اللي يخاف عليا و يقول خيتكم خلوها توصل طيبة بعدين قولولها ، ووووه عليا يا عوزتي فيك ووووووه عليا ديما حي عليا حي عليا حي .
الجارات فكنا ،،،
عميمه قمعزتني على كرسي ،،،
أنا نبكي نشوف في نيروز قلبي والعه فيه النار يحضنن فيها الجارات و تعيط على طول صوتها .
أنا صبيت حضنت خواتها نبكي معاهن ما خلن في وحده عزم هنا يتعايط و يتنادب ، قعدنا نحضنوا في بعضنا و الجارات حضنني و نتباكوا ما في وحده ماسكة روحها و أمي فتحية و سمية حتي هنا يبكن .
......
بالقاسم يسلم : عظم الله أجركم .
جمال : أجرنا و أجرك على الله .
بالقاسم يبلس في الكندرة طلعوا من الجامع ،
كمال و خوته الدموع في عيونهم مصبين رفعوا تابوت أمهم طلعوا بيه حطوه في سيارة الإسعاف ركبوا الرجاله كلهم في سياراتهم عدوا للمقبرة .
الشيخ : اللهم! أغفر لحينا و ميتنا، و شاهدنا و غائبنا ، و صغيرنا و كبيرنا ، و ذكرنا و أناثنا ، اللهم من أحييته منا فأحييه على الإسلام ، و من توفيته منا فتوفه على الإيمان .
الرجاله : آمين
بالقاسم كان جنب جمال و حكيم و كمال في وسطهم .
كمال يبكي ،،،
الشيخ : اللهم إغفر لها و إرحمها و عافها و أعف عنها و أكرم نزلها .
الرجاله : آمين .
الشيخ : و وسع مدخلها و أغسلها بالماء و الثلج و البرد .
الرجاله : آمين .
الشيخ : و نقها من الخطايا كما ينقى الثوب الأبيض من الدنس .
الرجالة : آمين .
الشيخ : و أبدلها داراً خيراً من دارها ، و أهلا خيراً من أهلها ، و زوجا خيراً من زوجها و أدخلها الجنة و أعذها من عذاب القبر .
الرجالة : آمين .
كمال قمعز قعد يبكي ،،،
الشيخ : الفاتحة
رجاله كلهم قروا سورة الفاتحة
جمال و حكيم قمعزوا جنبه ،،،
حكيم : صلي على نبيك يا كمال الله يرحمها و يسكنها فسيح جناته .
جمال : إنا لله وإنا إليه راجعون البقاء لله .
ماهر : قول لا لله إلا الله يا راجل الله يرحمها شد حيلك .
كمال مطبس رأسه يبكي بصوت واطي : لا لله إلا الله لا إله إلا الله .
بالقاسم يبحت فيهم بينه و بين نفسه : إنا لله وإنا إليه لراجعون .
جمال و حكيم صبوا كمال جنب خوته يعزوه الناس كرعيه مش شيلاته ، قعدوا يطلعوا من المقبرة طلعوا الرجالة ردوا للمنطقة ...
..............
نيروز راقدة على كتفي تهز : ماما يا ماما تعالي يا ماما خليتينا بروحنا يا الحنونه حطوك في قبرك يا امييييي تبي ارقدي بروحي يا حبيبتي يا عيوني يا ماما يا نعليا قلبي نعليا كبدي محروقه عليك يا عيوني .
أنا دموعي ينزلن حاطه يدي على قلبها : الله يرحمها و يسامحها يا نيروز أهدي تريحي ، قلبك قريب يوقف .
نيروز : هذه ماما يا رحمه حي عليا ، كان يقولولي أبكي عمرك كله يردوها ليا نبكي يا رحمه ، حي عليا من بيا ، من اللي بينشد عليا من قوليلي بس .
أنا : و الله ما يفيدها إلا الدعاء يا ما بكيت و مازلت نبكي على ماما و بابا بس الله غالب هذا حد عمرهم ربي يختبر في صبرنا في أغلى حاجة عندنا الصبر يا رب ، ربي يبرد قلبك و يصبرك على قد حبك لها ، يصبرك الله .
نيروز : يا رب يا رب يا رب .
.
.
أذن المغرب خشت نجوى و آمال و وداد ، دمعتي ما وقفت نشوف في جارات ماما و نشوف في حوشنا ما نقدر نخشه كمدتها نبكي و خلاص جت نجوى و آمال بكن مع نيروز و أنا جنبها نجوى بكت معايا و عزتني و آمال عزتني و وداد عزت نيروز و أنا خطمت من جنبي و لا كأنها شافتني سكتت .
مشى الوقت و أنا مع نيروز و اللي تجي تعزيها تبكي معاها و تعزيني تبكي معايا .
