#وجودك_أمان 🤍
الحلقة [17]
درس على فم باب الصالة
بالقاسم : خليك
نزل و جاء نزلني فتح باب القاعة رفعت خماري و عطاني مريم يبوس فيها طبس عند وذني استنشق عطري : ربي يحفظك
و طلع
أنا مصبيه في مكاني منصدمه نفكر في الكلمة و في بالقاسم حتى و هو مزعلني " رفعت يدي نبي انش على وجهي شفت الحنة اذكرت عزقت الفلوس و عياطه عليا " كل ما نشوف ايديا نزعل بدال ما نفرح بالحنة و الأغنية و كيف ماسك مريم و يبوس فيها قعدت مركزة عليه في السيارة وقت يبوسها في خدودها أو يديها ندعي ما يبوسش في رقبتها خفت يبوسها فيها، صح خالها و صح طفلة بس هو لما يبوس رقبتي غير نحس بيه ذايب فيا صح مش مبين ليا مشاعره بس أحساسي هنا يفرق عن أي أحساس آخر ممكن عشان أنه أول مكان لمسني فيه باسني فيه بس و الله هو كان غير حتى نفسه يتغير هنا
خشيت و أنا نرعش منه و من اللي يراجي فيا بعدين و خايفة أول مناسبة و أول مرة نطلع بعد فرحي خايفة من أي موقف يصير معايا و مش عارفة هلي جايين و إلا نبي نقعد حتى اليوم بروحي قدام عايلتهم قمعزت على الصالون نبي نهدأ شوي و نسلح عبايتي و نخش حطيت مريم جنبي و فكيت الخمار و نفتح في العباية صبيت نسلح فيها مع طلعت عميمه تحكي بالتليفون شافتني في الإستقبال جتني فرحانة
عميمه : اللهم صلي وسلم وبارك على سيدنا محمد ماشاءالله عيني عليك باردة إن شاء الله نشوفك شايلة اعويلتك يارب
أنا ابتسمت
عميمه خذت عبايتي مني : توه نحطوها مع دبشنا و أنتي خشي
رندا خذت مني مريم مبتسمه : ما شاء الله على مرات بالقا
أنا ابتسمت
رندا : خياااال خيال
خشت نزهة سلحت سقمنا أروحنا
نزهة : هيا معاي نسلموا ع الضيوف اللي سبقونا
عميمه : ما طولنش بيش تصبن احدايا
نزهه : حاضر
عميمه : رحمه
أنا بحتت فيها : نعم
عميمه : اقري المعوذات سلم بنتي
أنا ابتسمت : حاضر
خشينا للقاعة و قعدنا نسلموا ونزهه تعرف فيا على الضيوف و ردينا لعميمه بدت الفرقة طول بنات ساخنات معاها شوي و لحقنا أميمه و سالمين أميمه تبحت فيا عيني عينك تكشخ كانت لابسه فستان قصير و الحنه لعند أفخادها بس مش صابغة واجد أنا لابسه فستان عنابي سالمين مرة مرة تنقلب عليا مع أني ماعنديش معاهن كلام اشوي و خشت اجديده و معاها عميمه كريمه و حليمه و أمي فتحية فرحت بجيتهن بكل و باركلي ع النجاح و خشيت بيهن قمعزتهن على طاولة قعدت معاهن اشوي و صبيت لعميمه و بعدها قعدت مرة مرة نجي نقمعز معاهن مرة نسلم جت زهور قالن محمد يبي يخششها طول خشيت للغرفة في الإستقبال لين خشش محمد زهور للمسرح صور معاها و طلع أنا طلعت ركبت أنا و نزهة و البنات كلهن قعدن يصفقن مع الفرقة أنا بعيده شوي نصفق بشويش مبتسمه بنات كل مرة خاشه وحده ترقص بدت الفرقة تغني على قديم و البنات يتعيطن
الفرقة مراه : بعد تلقيهم عيت قديم بعد تلقيهم بعد تلقيهم عيت قديم بعد تلقيهم .. ديري روحك ما ريتيهم بعد تلقيهم
الفراقة راجل : خلاص لقينا يا قديم خلاص لقينا يا قديم خلاص لقينا.. هواي على ايديه اخفينا
الفرقة المرأه : كني ما نخاف علي روحي كني ما نخاف العشرة تبي ناس انظاف
بنات : وووووووووه
الفرقة : مزمار يا حمادي
نزهه قربت من الفرقة حكتلها وشيرت عليا أنا ما انتبهتش كنت نبحت في البنات هنا يتعايطن..
الفرقة قربت مني مسكتني من يدي تكر فيا في وسط المسرح : الصقر اللي دايرلك قيمة الصقر اللي
شاب : دايرلك قيمه
الفرقة : انعنك تحت جناحه ديما
أنا قعدت نرقص بالشويش ركبت رندا تبحت فيا مبتسمه جت جنب نزهه
الفرقة : ايوووووه على دكاترة يا حمادي
شاب : اللي ياخذ ياخذ دكتورة الي يأخذ يأخذ دكتورة .. سمحة صيت و سمحة صورة
الفرقة : الله يحفظنا م الحاسدين الله يحفظنا من الحاسدين ... غوالينا مهندسين اللعبي يلااااااا
خوات بالقاسم عيطن
أميمه لقيتها جايا شور المسرح بالثقة و بشويش
خوات بالقاسم بصوت واحد : خرف ياللي تريد تخرف خرف ياللي تريد تخرف دكتورة و الصيت يشرف
شاب : مهندس واخذ دكتورة مهندس واخذ دكتورة.. سمحة صيت وسمحة الصورة
بنات عيطن
أنا جيت نبي نوقف جاتني نزهه ورندا مسكني
نزهه : رحمه يا أم غثيث مسافي في ظل الغالي ما تخافي
الفرقة : هذاااا كلام
أميمه ركبت راقيلها ربطت الوشاح و جت ترقص
أنا نزلت عديت جنب هلي
اجديده : جدك مرايف عليك حتى العيد ما جيتينا
أنا ما عرفتش نرد سكتت
اجديده : فرح على نجاحك قريب طار
أنا : و الله يا اجديده كمل رمضان بديت نصيم كملت الصيام بديت في امتحانات كملتهن علق الفرح طول إن شاء الله توا نجيكم
اجديده : إن شاء الله على راحتك بنيتي و فضوت راجلك
بعدها صبت غيرت زهور الميدي لونه أحمر جو عربها جابوه الكسوة كاملة غنن جنبها و حنوها بخاتم ذهب تعشوا و روحوا بعدها معازيم قعدوا اللي هذا يروح بدينا نلموا في الزايد نبوا نروحوا بالقاسم و محمد يطلعوا في الطناجر الكبار معاهم نزهه
بالقاسم : هذا خفيف خليه آخر حاجة
نزهه : باهي توا نقربه لكم
محمد : لا ما تشيليش ثقيل عليك توا نردوا عليه
طلعوا بالطنجرة و ردوا
بالقاسم : نزهه قولي لرحمه ما تطلعش لين نخش نقوللها سيارتي بعيده
نزهه : زهور مع من تركب
محمد نط : معايا بالقاسم ركبت في سيارته دبشها
نزهه : باه تمام خوذ معاك رندا
بالقاسم بحت في محمد و ابتسم
محمد غمزله
نزهه رن تلبفونها ألتهت فيه
أنا ماسكة تليفوني نراجي في بالقاسم يرن عليا ما رنش
طلعوا الحاجات و الصبايا طلعن ركبن في السيارات نزهه طلعت زهور و ساجده مع بعضهن و هيا ركبت مع راجلها رندا خشت تشوف في المطبخ أنا لبست عبايتي بس مش مغطية وجهي
بالقاسم خش للقاعة لقاني مقمعزة على الكنبه مرفعه الخمار نرجى
أنا سمعت حد خش بس ما رفعت وجهي و كنت نبي نغطي
بالقاسم : كملتوا
أنا غطيت وجي : إن شاء الله
بالقاسم : هيا
أنا : نراجي رندا
بالقاسم : باهي لكن هي مروحة مع محمد مش معانا
رندا طلعت : هي خلاص
طلعنا رندا ركبت مع محمد وأنا و بالقاسم في سيارته
بالقاسم فاتح أغاني بس يبيب فاتح الفرتشات الأربعة و ساكت طريق كلها وصلنا نزلني
البنات خشن يصفقن و يغنن
بالقاسم و محمد و اسماعيل ينزلوا في الدبش في الجنان
أنا خشيت لحوشي و بالقاسم فطنلي بحت في محمد
محمد شيرله يعدي
بالقاسم زرق بينهم رد لحوشنا دق الباب
أنا كنت محوله العباية : من
بالقاسم : أنا افتحي
أنا زمطت ريقي خذيت نفس و لبست العباية عشان الحنة مانبيش نضايقه و فتحت وخرت من الباب
بالقاسم خش يبحت فيا : نسيت المفتاح
أنا ماشية جيهة الدروج : توا ندورهن لك
بالقاسم لحقني لدارنا : لا توا ندور بروحي
أنا مارديتش
بالقاسم برم في الدار عيونه عليا ما نزلهنش بكل
أنا : تبي تغير دبشك
بالقاسم جاء مقبلني : لا نبي نصلي
أنا كنت مازالت زعلانة مش بالساهل نرضى لأن عارفته مستحيل يتأسف بحتت فيه نزلت راسي اندس في ايديا ع الحنه
بالقاسم حط يده ع حنكي رفع راسي مسح الروج بصبعه شوي و نزل باسني على فمي مسحه بكل
أنا صح فرحت بحركاته بس عطاني أمر على الحنه و المزين و خلاص و بعدين جاني يبوس و غير رأيه و مشى الموضوع عادي و صح أنا طالعة من جمال و ضربه ليا بس مش معناها عندي عادي أنا حتى النظرة تأثر في و تقهرني
بالقاسم وخر و يبحت فيا خش للحمام توضي وطلع يصلي
أنا خشيت دوشت نحاول نبيش نفكر في تصرفاته و لبست جلابية تطريز أردني طويلة و خفيفة و طلعت لقيته مقمعز يرجى فيا نشفت شعري لفيته خذيت الشنطة اللي كانت معايا في القاعة فيها عطري طلعته نبي نحطه على الزيانه
بالقاسم : ما تبخيش عطر
أنا هزيت راسي و حطيته ما عنديش نية حتي نبررله لبست الوشاح و السباط
أنا : طالعة للحوش لآخر
بالقاسم : هيا طالع معاك
و طلعنا أنا خشيت لحوش عمي لقيت خالتهم و عماتهم و عميمه و البنات يسخنن في العشاء و يحطن خشيت معاهن و قعدوا يمدوا و طلعن الصبايا الكبار و نحن تعشينا في المطبخ
نزهة : أنتي ما تغسليش خلاص عدي تريحي في حوشك
أنا : لا معقولة على الأقل نمسح و نرد معاكن
ساجدة : خليها يا خيا ساد أميمه روحت
أنا قعدت نمسح معاهن و ساكتة بدن البنات في التعليق أنا قعدت ماسكة ضحكتي لعند معش قدرت ضحكت بحتن فيا ضحكن كملنا المواعين طلعن البنات للنوم
نزهه دارت سفرة حليب و حلويات : تعالي رحمه
أنا لبست الوشاح طلعت معاها للجنان لقيت بالقاسم و محمد مقمعزين على طاولة جينا قمعزنا معاهم
بالقاسم كالعادة بعد نقمعز معاه مع هله و لا كأني قاعدة ما يبحتش فيا بكل
أنا مرة مرة نبحت فيه لقيته مدوش لابس شرت لعند الركبه أسود و تيشرت أخضر سباط أسود
نزهه تصبلهم في حليب مدتلي
أنا : لا مانبيش صحيتي
نزهه : كنك
أنا : ماعنديش نية
نزهه : على راحتك
قعدوا يهدرزوا و يضحكوا أنا ساكتة نوعا ما نفسيا متريحة
أنا صبيت : تصبحوا على خير
نزهه و محمد : و إنت بخير
بالقاسم صبي : هي ليلتكم سعيدة
نزهه و محمد : ليلتك أسعد
مشينا شوي
محمد ضبح : بالقااااسم
أنا كملت طريقي
محمد : راك تنسى كيف ما قتلك
بالقاسم ألتفت عليه دار له حركة زي التهديد" نذبحك ذبح "
محمد يضحك : خلاص سامحنا
نزهه : كنكم
محمد : خلاص شيلي سفرة خشي ارقدي
بالقاسم يمشي بسرعة و وصل فيا و سبقني فتح الباب خشينا ركبنا طول لدار خشيت للحمام غسلت سنوني لبست بجامه طلعت لقيته مظلم الدار مخلي وناسته بس صبى و جاء مقابلني
بالقاسم : شن جو الفرح
أنا : تمام جو يهبل
بالقاسم يبوس في فمي : كيف يهبل
أنا كل ما يوخر نحكي ببرود : يعني سمح
بالقاسم رد يبوس : زهور متريحة ما نقصها شي
أنا غمضت عيوني و فتحتهن بالنفس البرود : أها كويسة متريحة
بالقاسم حس أني نتعامل معاه ببرود باسني بالقوه في فمي
أنا غمضت عيوني بالقوة
بالقاسم وخر بحت فيا
أنا مابيتش نفتح عيوني
بالقاسم مرر ايديه على شعري فكه نزلهن على وسطي نزل ع رقبتي و مشى بيا شور السرير كل ما يحس في برود من ناحيتي يضغط عليا طفي الوناسة كان يومها عنيف بكل تعبني معاه كانت ليلتنا مش كيف بعد العيد اللي كانت كلها حنان و هدوء رقدني على السرير جاء فوقي رحنا في خبر كان....
بعد ساعة رفع راسه فتح الوناسة و شاف لعيوني
أنا ما عرفتش يبي يسألني أو يبي يلخبطني بنظرته غمضت عيوني بالقوة عشان ما نبكيش
بالقاسم طفي الوناسة رد نزل عليا أخرى و رحنا في خبر كان...
أنا نضت خشيت دوشت و طلعت خش بالقاسم يدوش أنا لبست بيجامه جففت شعري دهنت ايديا طلعت بنطلون و بلوزة طويلة و طلعت لبالقاسم بنطلون و تيشرت كل شي محدد و واتي خشيت للسرير كنت تعبانه ع الآخر
بالقاسم طلع لبس خش معايا ع السرير و قرب مني رقد معايا في نفس المخدة رقدنا .......
......
زهور ناضت تبكي جنبها رندا تبكي
ساجده : تي خلاص يا خيا كنكن نكد على صبح
نزهه ماسكة روحها : مش عارفة عليش البكاء بس
ريحان : دراما كملتن
رندا ضحكت تمسح في دموعها
زهور تبكي من جدها
نزهه حضنتها : تي خلاص عاد توا تشوفك ماما تبكي
.....
أنا نضت ساعة 12 غسلت توضيت و صليت لبست و نزلت درت فطور
بالقاسم ناض توضى و صلى لبس نزلي : صباح الخير
أنا : صباح النور
بالقاسم يبحت في الفطور خذا فنجال القهوة يشرب فيه : ما نبيش نفطر
أنا : هو وقت غذاء بس قلت مرات تبقي جعان
بالقاسم : جعان غير قلت نتغذا طول
أنا نلف في الفطور و نحط في التلاجة كملت وطلعنا على حوش عمي أنا خشيت لقيت البنات يبكن و يضحكن و بالقاسم صبح على عميمه و سأل في حاجة ناقصه قالوله لا خش لمربوعة الرجالة لقي عمامه و محمد و عمي
بالقاسم : السلام عليكم
كلهم : عليكم السلام
بالقاسم ما بش يبحت في محمد بكل
محمد مبتسم دزله مسج : " صباحك مبروك و عدوك مهلوك يا عريس "
بالقاسم قراها دزله " سكر ### ع الصبح
محمد اطربق ضحك
شوي و خش اسماعيل ابتسامه من الوذن للوذن : السلام عليكم
رددوا كلهم السلام ماعدا محمد ضحك
بالقاسم فنص فيه
اسماعيل قمعز جنب عمي
بعد ساعة تغذوا الرجالة قعدوا عاد كل حد يجري وراء طلبات مراته محمد شال زهور للمزين
.......
خلينا شغلات يلمن و نحن جتنا المزينة تمكيج فينا أميمه و سالمين طلعن يبن يتحزمن عند المزين برا
كلمني بالقاسم طلعت
أنا : نعم
بالقاسم مدلي فلوس : خوذي هذينا نزهه قالتلي حتي اليوم جايبين مراه
أنا خذينهن
بالقاسم : تنقصك حاجة دزيلي رسالة
أنا : تمام
بالقاسم طلع و أنا خشيت
بدت تمكيج للبنات
نزهة : هيا لحوشك توا مرات عمي تحزمك طرابلسي غادي و تجي هنا تمكيجك طول
أنا : باهي صبينا و جت مرات عمهم
خشينا للحوش نزلت بدلة العربية امتاعي اللي شاريها ليا أكرم من طرابلس بدلة أزرق في ذهبي و طلعت العقد و النبيلة اللي جابوهن لها و التاج و الشناقيل اللي طالعة بيهن من هلي و قصبة ذهب و خلخال و حزام ذهب لماما درت عصير و الشوكولاطه قدمت عليهن شوي بدن يلبسن فيا كملنا و ردينا لحوش عيت عمي لقيت المزين ترجى فيا شافتني ابتسمت قمعزت على الكرسي بدأت فيا طلعت أحلى من أمس غيرتلي المكياج بكل كان ثقيل مختلف كنت أنا و أثنين من قريباتهم لابسات طرابلسي و الباقي كلهن شرقاوي كملت جت عميمه جنبي شوي و خشت سالمين سلمت من بعيد و قمعزت
بالقاسم من باب المطبخ : نزززهه رنداااا رنداا
رندا كانت تكلم في زهور سمعاته جاته : نعم نعم
بالقاسم : كلمي رحمه
رندا : خليك هنا شوي توا نكلمها لك
بالقاسم اتكي على الساس
رندا خشت تضحك قبلتها نزهه : وين طالعه إنت
نزهه : قالولي في حد يضبح برا
رندا خذتها ردت بيها جوا : هذا بالقاسم يبي رحمه خليه يرجي شويا
نزهه ضحكت : طح سعدك
رندا : ما تقوليلهش عارفتها هبلة توا تصبي طول خلي يرجى شن يبي ينقص منه
نزهه : ههههههههههههه
خشن يضحكن شفتهن بس ماعدلتش الحق بعد عشرة دقائق
رندا : قتلك
أنا : نعم
رندا : بالقاسم يبيك برا
أنا صبيت
رندا : اصبري كنك
أنا : مرات يبي قهوة
رندا تسقم في شكلي : اديرله نقتلك يعدي يدور وين يشربها
أنا قرنت حواجبي نفكر كان خوك جمال راه ما تحكي هكي بكل
رندا : افردي ظهرك واطلعي
أنا طلعت بشويش البدلة ثقيلة و الذهب أثقل
بالقاسم سمع طقت الكعب رفع راسه طول شافني
أنا : نعم
بالقاسم بحت في الجنان و رد بحت فيا و قرب شوي : تطلعيش وقت الزفة توه بعد تطلع زهور و الصبايا نجيك ناخذك سيارتي قدام حوشنا
أنا : حاضر
بالقاسم يبحت في جنان : خلاص خشي
أنا برمت خشيت بالقاسم يبحت فيا و أنا خاشه شوي و طلع
أميمه خشت طول قعدت ادور فيا شافتني كشخت قمعزت بعيد عليا أنا فتتها بعدها طول خشت زهور قمعزنها في المربوعه جنبي فتحنا لها المكيف و جت الزفة و طلعت زهور مع خوات العريس و ركبوا الصبايا كلهن أنا قعدت جوه لبست الكاب البدلة العربية معايا
عميمه و جارتها و الشغلات بس
بالقاسم خش يضبح : رحمه
عميمه : خش ياليد
أنا صبيت قربت عند الباب خذاني برم بيا من عند حوشنا و طلعنا من باب حوشنا ركبني و طلعنا فات السيارات و شير لهم لحقوه كلهم وراه زفه هل العريس فتح أغنية بحت فيا بسرعة بحت في طريق...
أنا خذيت نفس قعدت مركزة مع الموسيقى و الأغنية مش عارفة ليش بس حبيت ننسجم حتي لو دقائق
بالقاسم يسوق و يدربك بصوابعه ع الدومان يدندن بصوت واطي بكل ..
