#وجودك_أمان 🤍
الحلقة [21]
أنيس : تعال نقمعزوا بعيد شوي
صبوا قعدوا يتمشوا لين وصلوا مكان هادي قمعزوا فيه
أنيس : أنا على قصاد ما فهمت مهنيتك من هلك لكن أنت شنو متهني معاها
بالقاسم ساكت و يبحت في التراب
أنيس هزه
بالقاسم بحت فيه ابتسم : أها
أنيس : شن جوك معاها تعوض فيها على غيابك لما تجي تلقاها مع هلك شن شعورك احكي ازح نكر في الكلام كر أهو كلنا نحكوا إلا أنت ديما ساكت تسمع أكثر ما تحكي
بالقاسم ضحك بشويش : لا مش هكي بس بعد نروح نلقى هلي فرحانين و مهنيتهم أمي تشكر و باتي يربح لها و يربحلي باقي هلي ملتمات معاها
أنيس : و أنت شنو معاها مش مع هلك
بالقاسم : عادي
أنيس : ياراجل شن عادي قريب تكفر أمي هكي ظلمتها راه مفروض عطيت لروحك فرصة معاها و ارتخيت اشوي هي تتعب على خاطرك و أنت راعيها ما فيش بين الراجل و مراته رسميات اشكرها عبر لها عن فرحتك بيها اطلب اللي في خاطرك معاها مش كل شي أوامر أنت مش بين موظفين في شركتك
بالقاسم : لا مش قصة أوامر بس أنا نبي نريح راسي
ما نبيش نقعد في الشغل و عقلي يدوي يقول انظر شن دايرة مع هلي أنت شوف الشباب كل مرة يرنوا بس أنا متريح
أنيس ركز في عيون بالقاسم : أنت شن وجهه نظرك فيها
بالقاسم حول عيونه طول : تي في البداية كلهن هك تمثل توريك إن هيا البريئة الهادية بس أنا ما يمشيش معايا حطيت شروط من أول يوم و صار بعدها بينا نقاش ذكرتها بالشروط و زدت عليهن
أنيس : قصدك حواجز مش شروط ، و شنو تمثل هذه تي ليش تفكيرك هكي يا راجل
بالقاسم : السنة الأولى كلهن يمسكن أرواحهن يبقن يمثلن لين يركعن الراجل يقعد ما يتحمل فيهن شي لدرجة يرد على هله و يدافع عليها هيا نفس هالنماذج من صبايا الشباب أهو سمعت واحد يسيق و الثاني عشان تخدم في أمه راقيتله و الثالث يتجدى فيها عشان غداء الجمعة بس أنا مش هكي مازالت ماسك روحي قدامها
أنيس ضحك : آخر جملة هذه هي الصح و هذه اللي نبي نسمعها " خبطه على كتفه " تعال تعال انديروا مكرونه للشباب
بالقاسم فطن لروحه سكت لحق أنيس
أنيس يكبر في النار و بالقاسم يجيب في حاجات مكرونه
حسام جاء معاهم يساعد فيهم بدأ ايدير في المكرونه
بالقاسم مصبي سارح
حسام : أنيس الزيت كمل أزح كيف يصير
أنيس : توا قلتها راه قاعدين في غابة نحن مش في وسط البلاد
حسام : توا نطلع أنا أول محل يقابلني
أنيس : لا لا وين أطوول ، بالقاسم
بالقاسم فطن : إنعم
أنيس : عندك زيت سيارات
بالقاسم : أها
حسام انصدم
أنيس ضحك : ترا جيبلنا بالله
بالقاسم : كنكم
حسام يضحك : هذا مش معانا
أنيس : عقله ال ### يرقد في قلبه و يقسي فيه
حسام : كلا العقل هذا ما يودر صاحبه القلب هو اللي مودرنا
بالقاسم فنص في أنيس
أنيس : غير جيب بس ما تخليش الشباب يحقوك بالذات عبدالله وسواس نظافة هذا فوته
بالقاسم عدا جاب الزيت وجاء
أنيس حط ابطنجرة ع الحطب صب شوي زيت سيارات : عزق اللحم و البصل بسرعة .
حسام يضحك
بالقاسم مبتسم : عيبه يا شباب هذه
أنيس : و الله طعمه لا قوة إلا بالله اسكتوا بس
بالقاسم : تي كان تصير فيهم حاجة شن يبي يفضها
حسام يحرك في البصل و اللحم بنه فاحت
أنيس حول حسام و غطى الطنجرة طول
عبدالله يعيط : شنوووو بنه هذه يا شباب
أنيس : حطب حطب مش عارفه كنه شكلكم ### عليه
و الشباب طربقوا ضحك بالقاسم وخر منهم يضحك و يكح
عبدالله يضحك : لا يا راجل معقولة كان هذا ما ولعش
حسام يكح من ضحك : لا ما ولعنش كبرت النار بروحها صار قوة تفاعل بين ### و #### ولعت ههههههههههههههههههه
شباب يضحكوا
بالقاسم : خشيتوافي كلام خطير راه في الأصل مش شور بعضه
أنيس يحط في باقي حاجات المكرونه وراه بعضهن : هني روحك أنت
شباب جوه يبوا يصبوا
أنيس كب اميه و سكر ابطنجرة طول : خلييييييكم في طرح الكارطه أنا جايين حسام ولعلنا ارقيله بسرعة
حسام : بالحطب ### و لا فحم ههههههه
أنيس وخر من الطنجرة يضحك : تي صبي يا مسخ
بالقاسم عطاه مفاتيح سيارته : طلع معاك الشطرنج
حسام خذاه و عدا
قعدوا يلعبوا و يضحكوا أنيس بس يشوف في الطنجرة حطوا العشاء تعشوا كلهم و بالقاسم و حسام و أنيس ياكلوا و يضحكوا
عبدالله : تي كان ### هلكم تضاحكوا
أنيس : شن رأيك في المكرونه على لحم وطني
عبدالله ياكل و تلحلح : اقسم بالله حاجة صح غير حارة نار لا قوة إلا بالله
توفيق : حلفتك كم رأس فلفل
أنيس : و رب الكعبة الشريفة 30 رأس فلفل حمر
عبدالله : لا إله إلا الله عليك كفر يا راجل معقولة مش لدرجة هذه
الشباب يضحكوا
بالقاسم ياكل : حتي هو زيت البركة ولعها زيادة
حسام طح على أنيس و يضحك
كملوا الشباب وخروا يتكيوا
فرحات جاء بالشاهي
أنيس يبحت فيهم كملوا الشاهي : عليك طاسة تعنقر الرأس بعد هالمكرونة الباهية
فرحات : خير من تسواي الصبايا
عبدالله : و الله عندك الحق
أنيس : لا هو من ناحية خير فهو خير بس يا شباب بعد نروحوا كل حد يبرم على روحه كان جاء إسهال و إلا رجع بالله يرن عليا طول " صبى" المكرونه طيبتها لكم بزيت سيارات " قعد يجري "
شباب يضحكوا ما عادا عبدالله مسك بطنه انصدم
بالقاسم ماسك ضحكته : كنك يا عبدو
عبد الله منصدم : قالك زيت سيارات ال ###
بالقاسم : باهي عادي ههههه
عبدالله صبى يجري وراء أنيس و يحذف فيه و يعيط : شن عادي شن تشوف فيا محرك سته يا ###
أنيس يجري و وقف : دهشت يا راه
عبدالله وقف جنبه داهش : معقوله ازف زيت سيارات
أنيس : عادي و الله ما حطيت واجد اقطيرات
عبدالله : تي نحن من غادي محركات الله أكبر بعد الزيت إن شاء الله نفوزوا
أنيس ضحك : الحمدلله ربي يدوم الصحة محرك لازيره ستة شغال 24 قراط
حسام : ههههه أنيس محرك أمريكي نحن صيني يا شباب
توفيق : من الهم اللي عندنا تسد نيتك حتي كان محرك مفخرة هههههه
أنيس : صلوا على نبيكم ازف كان تعاركت أنا و الحكومة اقسم بالله يصير فيها جو حقير
الشباب صلوا على النبي و يضحكوا
........
ثاني يوم قبل ما يروح بالقاسم من الزردة
أنيس قرب من بالقاسم بصوت واطي : جيب هلك خليها اتعرف على صبايانا من حقها تطلع زي ما أنت تطلع
بالقاسم هز رأسه ضحك
ركبوا في السيارات و طلعوا شور بنغازي مع ساعة 11 وصل بالقاسم سلم على هله و جاني في الحوش
أول ما سمعت الباب انفتح و اسكر قريب طرت من الفرحة طلعت من المطبخ لقيته قدامي
بالقاسم شم بنه الحوش ابتسم : السلام عليكم
أنا ابتسمت : عليكم السلام حمدلله على سلامتك
بالقاسم حط الشنطه و جاني باسني جنب فمي : الله يسلمك شن الجو
أنا مش عارفه ليش فرحت بحركته : الحمدلله كيف حالك أنت
بالقاسم يطربق في ظهره : تمام
أنا عرفته تعبان من الطريق : تعشيت و إلا انديرلك عشاء
بالقاسم : لا متعشي إنت كليتي
أنا : اها كنت ناكل
بالقاسم رد خذا الشنطه : صحة . شن جو القرايا
أنا : تمام واخذه وقتي كله قرايا
بالقاسم : باهي ما شاء الله
ركبنا للدار بالقاسم طلع دبشه اللي في الشنطة خش للحمام حطه في السلة و خش للغرفة الملابس خذا دبش و خش للحمام
أنا لميت شيتاتي حطيتهن في الدار اللي نقرأ فيها رديت لسرير قمعزت لين بالقاسم طلع من الحمام مصبي يبحت فيا يمسح في شعره كويس رد عزق منشف في السلة خش طفى الضي و جاء عزق روحه ع السرير .
بالقاسم بتعب : ااااه
أنا ساكته معش عرفت نبحت فيه
بالقاسم مسك يدي خذاني في حضنه وناستي مفتوحه جاء بثقله عليا معش قدرت حتي نتنفس بحت فيا بس أنا مارفعتش عيني طفى الوناسة و حضني و رقدنا استغربته ما رقدتش معايا كنت وقتها صاحه بس حمدت ربي عشان ما يصير حمل...
........
ثاني يوم فطرنا و عدينا للعيت عمي تغذينا و روحنا
بالقاسم مقمعز يتفرج : قتلك
أنا بحتت فيه : نعم
بالقاسم : صاحبي زايد عليه مولود و هذي لمة لصبايا أصحابي بس. كان عندك وقت تبي تمشي نشيلك عادي
