#وجودك_أمان🤍
الحلقة[28]
كمال : مزالت ما طلعت بيها اهو بين التحاليل و الدكتورة .
نيروز : باه طمني بس مشغولة راه من الصبح واعية نرجى فيك .
كمال : إن شاء الله خير توا نبي نسكر
نيروز بحتت تلفون لقتني خاشة عليها انتظار : سلام .
سكرت فتحت عليا
انا : الو
نيروز : ايوه الحمدلله على سلامتك
أنا : الله يسلمك كيف حالك شن دايرة
نيروز : الحمدلله طمنيني عليك و الله عقلي معاك مشغولة.
أنا ابتسمت : لا أطمني الحمدلله حالي تيسر تفاهمت مع بالقاسم .
نيروز فرحت بس صوتها مخنوق : باهي الحمد لله يا ربي ربي يكمل عليك بالخير .
أنا : إن شاء الله كيف حال عمتي شن دايرة و البنات كيف حالهن .
نيروز : و الله شن نقولك إن شاء الله خير و خلاص ماما مريضة توا في مصر نرجوا في إتصالات كمال بفارغ الصبر .
أنا شهقت : كنها بسم الله.
نيروز : و الله دكاترة كل حد يقول حاجة تقول في حاجة توجع فيا في بطني درنالها تحاليل في اللي يقول كتلة و في اللي يقول سرطان بعيد عنك .
قعدت تبكي ،،،
أنا وجعتني خنقتني العبرة : لا إن شاء الله خير ربي يعافيها يا رب إن شاء الله تكون بسيطة ، خلاص اسكتي نيروز كنك تفاولي عليها .
نيروز سكتت ،،،
أنا : إن شاء الله ما فيه الا كل الخير دعاء بس ادعي ربي يشفع بحالها ويطمنكم
نيروز : إن شاء الله يا رب
انا : طمنيني عليها الله يربحك بين فترة و فترة أنا توا نرن عليك نبي نطمنك الأيام الجايا برقم دولي طالعة لتركيا
نيروز : ما شاء الله ربي عوضك يا روحي إن شاء الله بالهناء و الراحة خلاص تمام نرجاك .
أنا : سلميلي على خواتك كلهن ربي يطمنكم عليها إن شاء الله تردلكن صحيحة و بعافيتها خير من قبل .
نيروز : إن شاء الله بالسلامة
أنا : سلام .
.........
وداد : قتلك احكي معاه قاللي ما تطلعيش للجيران و لها كم يوم ترجى فيا المرأه .
فتحية : ساهل بعد يروحوا من العمل
وداد : أكيد مراته الحقيرة زانه على وذنه.
فتحية : صبي حطي الغداء لعويلك خلي المرأه عنك .
وداد قربت من فتحية : يا ماما و الله المراه ما هي متربية صدقيني أنا مسكت عليها كم موقف.
فتحية : شن ماسكة عليها و هيا من نهار عركتكم معش نزلت
وداد بهزوة : توا يخش رمضان و الأعياد تنزل كيف الكلبة كيف أيام ما كنت عند الحقيرة عمتي كانت مقطرة في عيونا الثوم وإنت شي .
فتحية : نبي نصبي نصلي الظهر شوفي حاجة عويلك .
وداد : كيف حال أم نيروز ماعندكش عليها أخبار
فتحية : ماشي معاها اوليدها كمال بس نيروز أول ما مرضت مينتها قعدت معاها قالوا كيف روحت لحوشها بعد أمها عدت لمصر أطمن فيا مرة مرة على التليفون.
وداد : إن شاء الله ربي يشفيها
فتحية بزعل : إن شاء الله يا رب
عدت تصلي وداد خشت للمطبخ
........
ثاني يوم
بالقاسم خش الدار فتح الضي
أنا نتلوى على الفراش راسي في مخدة إيديا على بطني : امممم اااااه امممم اممممممم.
بالقاسم حط الشكاير ع الطاولة و يبحت فيا و خايف قريب مني رقد جنبي حط يده اليمين على شعري اليسار على ظهري : ما قلتيش تبي تمرضي هكي كان هذا ما خليتك تسيبيهن .
أنا نهز : اممممم ااااه معش نقدر ااااااه
بالقاسم : حبيبي اهو جبتلك حاجتك يهوّن عليك شوي .
أنا صبيت نجري الحمام استفرغت
بالقاسم ورايا خذا الشكارة حطها في الحمام
أنا كملت غسلت وجهي .
بالقاسم عطاني المنشف : تعالي تريحي برا .
أنا : لا لا نبي نغسل و نغير
بالقاسم ماسكني زين : حبيبي راك دوخي .
أنا بحتت فيه ابتسمت : لا لا تخافش
بالقاسم حط يده ع الحوض : تسكريش بالمفتاح .
أنا : حاضر.
بالقاسم طلع نزل جاب اميه خذا شكارة الدواء حطها جنبه قمعز ع السرير
أنا سكرت الحمام غسلت و غيرت و طلعت بخيت عطر .
بالقاسم رفع عيونه حول الورغان : تعالي جنبي .
أنا خشيت في السرير أنا نرعش ،
بالقاسم كرني بشويش في حضنه يوشوش : مزال فيه ألم .
أنا هزيت رأسي بمعنى أها.
بالقاسم خذا الشكارة و حطها في نصنا : اهو جبتلك الدواء اللي ديما نجيب فيه و جبت مقويات اللي كتبتيهن ليا هذا أوميجا ثري و هذا فوليد أسيد نوضي خوذيهن عشان يخفف عليك التعب و الإرهاق.
أنا رفعت روحي شوي قعدت ناخذ في الدواء بالقاسم يمدلي في أمية رديت رقدت في حضنه سمعنا جرس الحوش.
بالقاسم حط رأسي على مخدته : تريحي توا ننزل أنا .
أنا غمضت عيوني .
بالقاسم نزل لقاها الخادمه جايبه الغداء خذاه منها سكر الباب بكراعه ركب بيه فوق : هي نوضي تغدي و بعدها قيلي .
أنا نضت .
بالقاسم حط الغداء ع الطاولة قمعزنا تغدينا عيونه فيا مبتسم كملنا نزل السفرة حطها ركب رقدنا نحن حاضنين بعضنا .
..........
أميمة تسلس خشت طول
إسماعيل قرن حواجبه : احم شوي و نرن عليك ، اه تمام تم يا معلم أوكي
سكر بحت فيها .
إسماعيل : كنك تسلسي إنت .
أميمة بشك : و أنت كنك خشيت الدار تكلم .
إسماعيل : شن دخلك بيا بعدين مش تبي تباتي عند هلك .
أميمة : غيرت رأي الجمعة نمشوا نتغدوا عند هلك و السبت عند هلي
إسماعيل بهزوة : أووووو تكرمتي علينا يا أستاذة أميمه معلش تعبناك.
أميمة كشخت.
إسماعيل صبى : كنك رايحة هكي ، أزف من أول ما أزوج بالقاسم تغيرتي و فوقها خطبت محمد .
أميمة : مش أنا اللي تغيرت أنت اللي حالك أدهور كرهتني كل شيء نطلبه تقوللي مش شاريتلك مش شلتك شنو هذا الراجل يشري لمراته مرة وحده بس .
إسماعيل : هذا كله نشري مرة وحده
أميمة : تي مرة و بعد كم عركة بينا حتى شكلي من دون خواتي ديما أقل وحدة فيهن و رحمه هذه اللي دايرينها ليا وين دكتورة دكتورة حتى الجزارين يلبسوا فيه البالطو الأبيض أمك و خواتك بعد نحكي أنا ما يعبرني بعد رحمه ادير حاجة الكل أوووه عليك طواطي يديرنهن تقول أول مرة ياكلوا منها حاجة هذه و لا هلها قريب يشيلوهم من الأرض كان جو و بالقاسم هذا اللي رافع خشمه علينا داير روحه إلا وين هو حتى سلام ربي يسلم فيه من بعيد كان تكرم ، تقولي إنت تغيرتي تي أنت و هلك اللي تغيرتوا شن درتلكم اه شنو
إسماعيل : أنا كان نبي نحكي عليك من العيوب معش نسكت إنت اللي تغيرتي طلعتي عينك فارغة حاسدة البشرية حتي على ضحكتهم مراة بالقاسم اللي حاطه راسك و راسها المراة شبعانه عينها مليانة ما تبحت في ه الحاجات التافهه .
أميمة تهزب : أنا نحسد و شن العيوب اللي فيا مش عاجبتك يا إسماعيل اه شنو.
إسماعيل : مش قتلك تغيرتي تي حتى بعد نبيك حقي الشرعي نعطيك في فلوس بعد تمشي لهلي دبش جديد ، و كان عندك دبش ادفعيني حق عطر ماركة على قولك قبلها نقولك أنا ماعندي بس توا نسلف ، بالقاسم اللي تحكي عليه هذا هو اللي مساندني في مصاريف الحوش هو اللي يعطي نقوله توا نردلك يقولي مش بينا تنقصك حاجة قولي ، مراته اللي تحكي عليها انظر تعرف و لا ما تعرف أني ناخذ منه في فلوس ، نشوف فيها كيف تبحت فيك عادية بكل مرات ما تبحت فيك بكل كان بنت أخرى راه قالتلك العز اللي قاعدة فيه من وراء راجلي ، بالقاسم اللي تحكي عليه هذا هو اللي صبى لمحمد في خطبته هو اللي فتحله مشروع و عطاه رأس المال و رسم خريطة حوشه دز العمال كله على حسابه محمد خذا خفيف و متحشم ايدير ما يذل فينا يعطي و يصبي معانا كلنا مش عشان يفتخر و إلا يذل لااا ايدير هكي عشان نحن خوته ما يبينا نصبوا ع البراني يجري وراء باتي و أمي ياخذ في رضاهم ربي رزقه بمراه حتي بعد غاب عليها شهر ما طلعت صوت خاطري نمشي لحوش هلي نسمع أمي تقول الله لا يربحك يا رحمه ع اللي درتيه فينا تي البنت من كثر ما هي محترمه راجلها في غيابه و حظوره أفعالها سابقة تي أمي تدعيلها أكثر منه نحن عويلها يا راء استيقظي روحك دنيا فانية مش كل شي فلوس يا أخي استحي شويا خلي في قلبك رحمه عيشينا عيشه هنية مش عشاني عشان بناتك بكرا بعد بكرا يكبرن يجوزن تفكيرك هذا تخربي به حتي على بناتك و من يبي يأخذ بنتك طبعها و تفكيرها البنت تاخذ طبايع أمها احترمي سنك ريحي إعظامك و ريحيني معاك تعب و نكد كل يوم ليش
أميمة : ما شاء الله هذا كله في جوفك يا إسماعيل عليا توا طلع أنا اعععي في نظرك كلي عيوب يا راجل على الأقل عد العشرة قول فيا حاجة كويسة .
اسماعيل : هذا زمان بداية زواجنا بس إنت ما ينفع معاك .
طلع و سيبها .
أميمة قمعزت قعدت تحرق و تهزب رنت على أختها قالتلها كل شي أختها حرضتها على أنها ما تسكت على حقها
........
بالقاسم طلع جاب عشاء من برا تعشينا لم السفرة عزق الباقي ركب رقدني في حضنه : شن تمام .
أنا : في ألم بسيط يجي و يعدي
بالقاسم يبوس فيا يدي شبك يدي في يده : ساهلة حبيبي شوي يأخذ الدواء مفعولة .
أنا قربت راسي من رقبته نستشق في عطره
بالقاسم يلعب على يدي اليسار يلعب بدبلتي .
أنا : حبيبي نبي نسألك.
بالقاسم : شن قولي
أنا بحتت فيه و ابتسمت : ليش ديما تلعب على الدبلة
بالقاسم : إيديك حلوات بكل بس مرات نحسها واسعه عليك يعني أنتي ناقصة يعني أنتي مش تمام نزعل ، بس لما نلقاها كويسه عليك انتريح و نفرح نقول معناها متريحة .
أنا من طريقة تفكيره فيا لين عيوني غرغرن من الفرحة نبحت في عيونه مركزة ما جش في بالي إن يفكر هك بكل من قلة كلامه معايا نظراته ليا وقتها كان في بالي إني بجد ما نعنيله شيء .
بالقاسم باس خشمي : حبيبي السرحان .
أنا مسحت عيوني : سرحانه فيك حبيبي.
بالقاسم غمزلي
أنا : نعوضك على كل شي على تقصيري معاك في شكلي لبسي في كل شي نعوضك
بالقاسم : أنا راضي ديما نقولك فيها راضي بيك هك إنت هكي هبلتيني و قتلك إنت مش محتاجة تغريني أنا هك و طايح فيك إنت حتى بعد تبكي مغرية كان نلقى نبوسك لين نشبع عارف روحي كان جيتي قدامي ما نشبع منك ، حتى نظراتك ليا و حضن منك و لا بوسة بس اقسم بالله تكفيني ميه سنة قدام ، فرحتي بيك مش قادر حتي اندسها كنت خايف تريحي مني بُعدك عليا فترة الأخيرة خوفني من ردة فعلك لدرجة ندعي أنه ما تحكي معايا أنا ما نبي منك شي إلا تبقي كيف ما إنت بين إيديا و في حضني.
أنا فكيت يدي حضنته كلامه أسعدني بشكل هو بروحه ما يتصوره : ربي ما يحرمني منك أنت #وجودك_أمان_ليا أنت الدنيا كلها كنت و ح تبقى أغلى من روحي يا روحي .
بالقاسم رقد على ظهره فرحان بالكلام رقدني عليه : و لا يحرمني منك #وجودك_في_حياتي مأمن عليك في روحي و هلي ما قصرتي معاهم حتي اللي نقدم فيه لك نحس في روحي مقصر في حقك .
أنا : أنا ما نبي شي إلا تبقي معايا، نسمع صوتك و تحضني أنا نفقد في روحي بعد تغيب عليا كأني ميته ، طلتك عليا ترد في النفس.
بالقاسم وخرني يبوس في وجهي بشويش يحكي : و ربي اللي خالقني أنك أغلى من روحي حبيتك من قلبي تعلقت بيك نخاف عليك من أي حد قريب مني و لا بعيد و لما كلمني حمادي قاللي كيف مش مدورها و لا تكلم فيها لنقاني فرحت قلت شكلها فقدتني ، بس زعلت عليك حسيت بيك فقدتني كيف ما أنا فاقدك وجعتني فيك حسيتك موجوعه كيفي انا ما نبي حاجة تمسك هذا عليش روحت طول قلتلكم على العمرة و ندعي ربي أنك تفرحي عشان جيتي في خطبة حمادي حسيتك مش معبرتيني رديت طرابلس أنا نحرق عشان ما دورتيني حتي بنظرة قعدت نحس أني نبي نفقدك تبي تخليني أنا وقتها خلاص كنت مش بس ذايب، كنت عاشق كنتي بعد نتخايلك بس نتعب كان سمعت صوتك نتعب زيادة .
أنا : أنت جيتك هذه كأني انولدت من جديد كنت تعبانة بكل ندعي من قلبي ربي يرطب قلبك عليا.
بالقاسم يبوس فيا : أنا اللي ندعي و نحمد ربي عشان تحملتيني تقبلتيني
أنا كنت مازلت خايفة ، بالقاسم كان معايا صريح بكل و في نفس الوقت مش عطيني فرصة نعبر كان مغرقني بحبه و حنيته عليا كل ما نفكر نقرب منه نلقاه هو اللي يحضن و يبوس ممكن وقتها أكثر حاجة اندير فيها أني نعبر بإحساسي بس بالقاسم يحكي على حياتنا قبل و يعبر على مشاعره بالكلام و شعوره يوصل فيه ليا بطريقة أنا نذوب فيها بين إيديه
بالقاسم : تعرفي إني مكتفى بيك حتى هك راضي بكل تصرافاتك معايا عارفك مستغربة فيا بس لنقاني ما عاد نقدر نتحمل نبعد من الآخر هكي مش متحكم في روحي أنا معاك .
أنا بسته في خده : نحبك .
بالقاسم فرحان باسني على فمي : أنا اللي نحبك نموت فيك .
أنا : حبيبي نبي نسأل في حاجة أخرى .
بالقاسم : احكيلي كل حاجة تبي تعرفيها .
أنا سكتت نتألم : اممممم .
بالقاسم : كنك حبيبتي
أنا : شويا بس يخف الألم .
بالقاسم حط يده على بطني يقرأ في القرآن لين تريحت : تريحتي
أنا هزيت راسي بأها .
بالقاسم : شنو تبي تعرفي قوليلي
أنا بصوت هادي : أنت في شغلك في طرابلس لدرجة هذه كنت مشغول عليا
بالقاسم : آسف سامحيني حبيبي مش قاصد و الله غادي نبقى وقتي كله شغل مرات حتى الشقة نجيها آخر الليل مرات من التعب نرقد في المكتب على كرسي لو نفكر ناخذك نظلمك لأنه شغلي العام اللي فات كان دسم و كنت نخليك 24 ساعة سبع أيام في الأسبوع بروحك مش ح نفضى لك لكن مع هلي مونسينك و مونستيهم .
يطمنوا فيا عليك لعند آخر شهور لخبطوني ، كان كلمني باتي يقول تعال خوذ مراتك .كان كلمتني أمي تقول ربي يلم شملكم .
كان كلمني حمادي يقولي كلمها أنشد عليها حرام عليك ، شغلوني عليك لكن كنت مضغوووط بكل في الشغل أقسم بذات الرحمن مرات تفوت عليا وجبة الغداء أنا غير نجري بين مواقع الفيلات
حتى فترة إمتحاناتك تمنيت نجي و نقعد معاك بس ما قدرتش لما قلتي على التكريم رغم الضغط قلت باهي كلمتني ندبر ، كأني كنت نراجي فيك تقوليها ليا فرحت و جيتك و الله مروح بالسيارة و نبي نسابق الوقت نحضر الحفل و نرد للشغل عارف روحي زودتها عليك ، لكن كنت نقول هانت خلاص . أنا قررت غادي مش ح ناخذ مشروع كبير زي اللي فات لا ح نخلي الشركة مفتوحة و فيها كادر مهندسين ممتاز و طاقم عُمال و موظفين ممتاز و أنا انتابعهم من هنا لو يلزم السفر ح يكون أيام بس معش نبي نغيب على حبيبي فترة طويلة ساد اللي ضاع منا .
أنا فرحت بكلامه قعدت نبوس فيه
بالقاسم غمض عيونه كأنه يبني أكثر منسجم مبتسم .
أنا بسته آخر بوسه على خده و نبي نوخر ،
بالقاسم رقدني على ظهري نزل يبوس فيا تقريبا قعدنا على الحالة هذه ساعة و نص يوقف شوي يتغزل فيا و يرد يبوس أنا من كثر فرحتي بكلامه لين شادة فيه.
.........
أنا قعدت مريضة ستة أيام تعبت بكل بالقاسم معايا يحكي لي كل مرة موقف صاير في الشغل يضّحك فيا مرات نذكروا حاجات بينا خاصة يتعذر ببوساته و كلامه اللي يهبل و نعذره طول .
طبعا ما طلعتش بكل عميمة دزت عاملة ليا و أثنين قعدن عندهم الغداء يوميا من عيت عمي و العشاء يجيبه من برة و تكمل الشغالة الحوسة و تمشي ترقد عن عيت عمي في الملحق اللي عطوه لهن .
جو كلهم يوم الجمعة قبل الغداء
بالقاسم دوش و طلع لصلاة ،
أنا دوشت قعدت نوتي في شناطي السفر ليا و لبالقاسم كملت لبست خذيت حجابي قمعزت في الصالة لين جاء بالقاسم عدينا لحوش عيت عمي
أميمة تبحت فيا و ورايا وين ما نمشي كملنا قمعزنا مع بعضنا في الصالة
ناصر : تمشوا و تجوا طيبين إن شاء الله.
بالقاسم مقمعز جنب عمي ع اليمين : إن شاء الله .
عميمة جنب عمي اليسار : شيلي ثقيل معاك باهي بلاد برا أكيد صقع مش كيفنا.
أنا جنب عميمة : حاضر.
أميمة توشوش لسالمين : وين ماشين
سالمين : بالقاسم توا قال طالع هو و رحمه لتركيا طيارتهم مع 10 اليوم .
أميمة فنصت بحتت في إسماعيل طول .
إسماعيل كاين ما يبحت فيها
أميمة بحتت فيا بحقد لين رعشتني
عميمة قربت على بالقاسم : قسومه دير بالك منها سلم اوليدي .
بالقاسم قرب عشان يسمع : حاضر .
العويل يلعبوا قالبين الدنيا .
بالقاسم : محمد شن جو الحوش ماشين تمام .
محمد : ميه ميه الكل يخدم مش مقصر .
أميمة تحرق
بالقاسم ابتسم : ما شاء الله .
هدرزوا شوي بنت إسماعيل طاحت على شُكّبه جنب الباب كانت خاشه تجري .
أميمة صبت : نعلي بنيتي وووه عليا دم حي عليا يا إسماعيل دم.
إسماعيل نط خذا البنت الي منفحمه من البكاء لدرجة صوتها ما هو طالع
كلنا انفجعنا صبينا أميمه تعيط.
عمي خبط بعكوزه : اسكتي يا بنت شن هالعياط إسماعيل اسعف البنت
إسماعيل طاب البنت يضغط ع الجرح يخض فيها عشان اطلع صوت بكاءها : بابا بابا جوجو .
أميمة تبكي : نبي نعدي نطمن على بنيتي شيلني معاك .
بالقاسم : خليك إنت هدي روحك إن شاء الله ساهلة.
جوجو طلعت بكيتها ،،،
إسماعيل حضنها.
بالقاسم يدف فيه شور الباب : اطلع خلينا نسعفوها .
إسماعيل طلع
أميمة ضبحت : إسماعيل نبي نمشي نطمن على بنتي.
بالقاسم طلع ،
إسماعيل : كان خايفة عليها راه مراعيتها.
طلع و سيبها أميمه تبكي غابوا علينا ساعتين و خشت جوجو حاضنها بالقاسم في يدها شكارة شوكلاطات و عصاير
إسماعيل ماسك تورته و شكارة مشروب
بالقاسم : قوليلهم السلام عليكم
نحن صبينا كلنا ،،،
جوجو : السلام عليكم .
نحن : عليكم السلام .
عمي : كيف حالها البنت توا
بالقاسم : لا بسيطة بونتوا غير كانت تجري ساخنه هذا عليش نزفت دم واجد
أميمة مسكت يد جوجو : شن يا ماما جاتك ساهلة .
جوجو طاحت على أميمة : ثوفي عمو شن شرالي .
محمد : حمدلله على سلامتك يا شيطانه
أميمة خذت بناتها قمعزت بيهن ،،،
نحن : حمدلله على سلامتها
أميمة فوق نفس : الله يسلمكن
إسماعيل : هذه حاجات جابهن بالقاسم على سلامتها.
الخدامه خذتهن خشت بيهن
بالقاسم شيرلي هيا و إلا مزال
أنا شيرتله براحتك.
عميمة : قمعزوا خلونا نشربوا قهوة العشية .
أنا ابتسمت قمعزت
كلهم قمعزوا مشى الجو عادي أميمه لمت بناتها عدت لهلها جن البنات هدرزن مع الساعة 7 عديت أنا و بالقاسم للحوش متأخرين لمينا الشناطي و حاجتنا كلها طلعنا مع محمد وصلنا للمطار أول ما عدا محمد بالقاسم مسك يدي ركبنا لطيارة منها لتركيا وصلنا ليل كان حاجز في فندق خيال بكل حاجز جناح عرسان خشينا من تعب دوشنا و رقدنا
........
محمد ابتسم : سقدتهم عقبال ما يسقدونا .
وفاء ضحكت : إن شاء الله يا خيا و الله فرحتهم بعد حكيتلي .
محمد : هذا كله إحساس بس وجعني حالهم.
وفاء : ربي يحفظهم .
محمد : و يحفظنا يا نور عيوني .
وفاء : بعد توصل رن عليا .
محمد : إن شاء الله تمام .
.......
أنا طلعت من الحمام : صباح الخير.
بالقاسم : صباح النور جهزي روحك نصلوا نطلعوا.
أنا : تمام إن شاء الله.
بالقاسم خش للحمام غسل توضأ لبسنا ثقيل شوي و طلعنا فطرنا في مطعم برا فندق قعدنا انتمشوا أكثر من إننا ناخذوا مواصلات و يدي ما طلقها من يده و إلا حاط يده على كتفي .
تغذينا طلعنا لمكانات حلوة للقرية المائية أكوافلوريا
مكان حلو مطعم ع البحر و أحواض أسماك قعدنا لعند ليل نحن ندهوروا نحكوا بالقاسم مرة مرة يبوس يدي و راسي و يأخذني في حضنه من جنب روحنا دوشنا و رحنا في خبر كان
.......
تاني يوم دوشنا و طلعنا بعد ابفطور لمسجد السلطان أيوب تغدينا بره شوي روحنا غيرنا الدبش و ردينا طلعنا بعد صلاة العشاء حاجز في مطعم خيال خشينا كان إضائته خافتة و طاولات فيهن خصوصية كل أثنين في حالهم.
بالقاسم وخرلي الكرسي شيرلي مبتسم ،
أنا ابتسمت قمعزت،،،
بالقاسم قمعز مقابلني مد إيديه مسك إيديا باسهن ليا .
أنا نبحت فيه : تعرف فيش خاطري
بالقاسم : عيوني لك شن.
أنا : و أنا الوقت معاك يوقف نبي حياتي كلها هك أنا وياك مع بعضنا الوقت كله .
بالقاسم : أنا معاك مش ح نسيبك،
القارسون حكى مع بالقاسم و عدا
أنا : تعرف عمري ما حسيت أنك تعامل فيا أني زوجتك مش كيف توا بكل.
بالقاسم : حتى أنتي ما حسستيني أنك معتبرتني زوجك إلا في مكالمة متاع الزردة
أنا : أها مرة هذي اللي كلمتك فيها كنت مرايفة عليك .
بالقاسم : لما قلتيلي ناقصني وجودك قريب ولعت السيارة و روحت غير شديت روحي كنت واخذ جرعة نكد من الشباب الله لا تروعك يحكوا على مشاكلهم و أنا نسمع كنت نحكي زعما حتى هيا نفسهن بعدين نقول لا لا مش كيفهن تي هيا نظرتها ليا بس فيها صدق ، بعدها جاء الدور عليا نحكي قعدوا جو يركبوا عليا قلتلهم اللي واخذها ماشية معايا كيف ما نبي شباب انصدموا قالولي تسمع في كلامك قلتلهم اها تسمع في كلامي واحد من الشباب قال معش فيها منها النوعية هذه هنا عرفت قيمتك على قد ما نقدر ما نحكي عليك أقسم بالله كنت خايف عليهم يعينوني فيك
أنا ابتسمت،،،
بالقاسم : انقنها مرارتك الصبارة اللي ساعدت .
أنا : الحمد لله المهم أنك توا معايا
بالقاسم باس يدي : معاك عمري كله
صبى قمعز في الكرسي اللي جنبي جاء القارسون حط العشاء ، تعشينا بروحنا كان يومنا جميل بكل ما تعنيه الكلمة رقد معايا أخرى ورقدنا.
........
#يتبع...
.
.
.
حنردوا نفس جدول تنزيل الأحد و خميس
##Fafy_faa
