الهَوى اسّرار وهَواجِيس واحّلام ... والىَ متّى واحّلام وصِلك بعّيده

البارت العشرين

'
هذام نطق بجدية : مغرور ايه نعم حتى بأختياراتي مغرور ولا أرضى بالسهل والرخيص الله يستر على البنت بس ماودي أكثر هرج ، ولو ماشفت بينكم فرق كان أخذتها وهي قبالي سنتين قدام !
سكتت لثواني ونطقت : هي راسلتني بالأدلة والاعترافات اللي حصلت بينك وبينها
هذام ضحك بسخرية وقال : حلو تشويه سمعة ؟ تنقلع برا مطعمي واصلاً مامعي ولا رقم من موظفيني يكلموني عن طريق صارم ولد عمي اقتنعتي الحين ؟
..
صحى من هواجيسه من ضربت كفه ونطقت : الباب يدق
وقف يمشي وأخذ الطلب ، رجع يدخل وهو كابح ضحكته مايدري وش هالسيناريو اللي دار برأسه ، جلس وألتفت لها ونطق : المهر وصلك ؟
شهد هزت راسها بالايجاب وقالت : سولف لي عنك ودي أعرفك أكثر
هذام ابتسم وقال : تمام وش تبين تعرفين
شهد : شفتك المره الثانية ببادل تحبه ؟
هذام هز راسه بالايجاب وقال : أعشقه
شهد ابتسمت وقالت : حلو بتحداك واجد
هذام : موافقين
شهد هزت راسها وبدأت تأكل ، كانت جلستهم خفيفة وأكتشف هذام إنها وقت تتوتر تكون عدوانية ، لكن ماحصل شيء وبالواقع كانت شهد تحاول تتأقلم عليه وتتعرف عليه ، ضحك بخفه ونطق بهمس : أنتقلت عدوى سطّام لي ؟
رفعت عيونها وقالت : شنو ؟
هذام : سلامتك يالعسل ودك نروح لبيت أهلي ؟
شهد : ايه حرام بحقهم والتجهيز
هذام ابتسم يوقف معها ونطق : مشينا
عدلت نقابها وتمسكت بذراعه ، ابتسم ينزلها ويتمسك بكفها ، عضّت شفايفها لثواني ومشت معه ، طلعوا من المطعم لبيت سطّام بعد ما حسّت شهد بالأريحية مع هذام وتقدر تواجه أهله ..
~ ينبع ، أحد المحلات ~
زفرت بغضّب ومشت له توريه الأطقم ونطقت : هيا أرفض
مطلق مسك راسه بصدمة ونطق : يالغنوج وافقنا على الطقم بس ماتجيبين لي وردي !!
عِقد : هذا لايت بينك يعني يناسبك !
مطلق : والله ما أشله صاحية أنتي
عِقد نزلت الطقم الوردي وأخذت الأصفر ونطقت : وهدا ؟
مطلق : أشجع الهلال
خزّته ورمت الطقمين وسحبت طقم سماوي ونطقت : طيب ؟
مطلق : مافيه غامق ؟
عِقد زفرت بغضّب وقالت : مطلق اش الذوق الصعب دا !! وبعدين أنا أبى ألوان صيفية ! الغامق شتوي
مطلق ابتسم وقال : ماتشوفيني أخترتك وبعدين أنا أحب الشتاء والغامق
عِقد استغفرت ومشت واختارت بعض الأطقم السوداء والغامقة ، عضّ شفايفه ونطق : وش لكم مع الثياب والقمصان ؟
عِقد صرخت بغضّب وقالت : حقتلك !!!
مطلق سحبها لحضّنه وهو يضحك وقال : تكفين صوتك !
عِقد دفعته عنها وقالت : عمى مليق وذوقك خايس !!
مطلق : نطلع طيب ؟
عِقد : ما حنأخد لك حاجه ؟؟
مطلق : الأسود زين هاتيه
عِقد : غيره ؟
مطلق : عطيني على ذوقك أجل
عِقد ابتسمت وقالت : حجيب البينك
مطلق : لنا الله
ضحكت وتقدمت تقبّل خده ، مشت للكاشير ودفع مطلق وطلعوا ، شاف الساعة بمعصمه ونطق : مشينا للمطار
عِقد : ايوه نسيت منو تصدق !
مطلق : معليه ماتأخرنا اساسًا
طلعوا من الأسواق واتجهوا للمطار ، وصلوا ونزل مطلق ونطق : بنت أيمن
ألتفتت له وقالت : ايوه يحبيبي ؟
مطلق ابتسم وقال : لبى روحك وش نسوي بالأكحل ؟
عِقد : إتصل على أحد تعرفو يجي ياخده
مطلق : خلاص أمشي بتصرف
عِقد : أعرف الكلمة دي قصدك تروح سيارة وأنا أسافر لوحدي ؟؟
مطلق ابتسم وقال : أعقب أمشي
مشت معه واحتضن كتفها يقربها له ، دخلوا للمطار على النداء الأول ومشوا يصعدون على متن الطيارة ، عضّ شفايفه ونطق : يالله إنك تخارجنا هذا وش !
ابتسمت بفشلة ونطقت : مطلق أسكت
جلست وجلس بجانبها ، ربطت حزامها ونطقت : أربط حزامك
مطلق برعب يسكن نبرته نطق : تكفين بنزل
عِقد توسعت عيونها وقالت : لا تستهبل ؟؟
مطلق : والله مقدر والله..
قاطعته ومسكت كفه ونطقت : حبيبي أشبك ؟ خلاص أنا جنبك !
شّد على كفها وغمض عيونه ، ابتسمت ابتسامة عريضة وقالت : اخيرًا شفت دلعك
عضّ شفايفه ونطق بهدوء : يعقب الدلع أرفعي علومك !
ضحكت وقالت : فتح لسى بدري على الإقلاع
فتح عيونه وألتفت لها ، ابتسمت وقالت : وتقولي خوافه ؟؟
مطلق رفع حاجبة وقال : فكينا يالغنوجه أول مره أركبها وآخر مره !
ضحكت بسخرية وقالت : عادي أصورك ؟
مطلق بغضّب نطق : بكسره على رأسك
تحركت الطيارة وشهق مطلق يشّد على يدها ، توسعت عيونها بألم ونطقت : مطلق يدي يدي..
توسعت عيونها على مصرعيها من فكّ حزامه ودفن وجهه بحضّنها ، حاوطت راسه بهدوء وقالت : اهدأ أشبك !
سكن بحضّنها لحّد ماتوسطت الطايرة السماء ، رفع راسه من حسّ بالثبات ونطق : أمسحيها بوجهي
عِقد ابتسمت وقبّلت خشمه وقالت : حبيبي أنت ماحصل شيء وحضني لك بأي وقت
مطلق ابتسم وقال : جعل يومي قبل يومك
عِقد اخذت نفس وقالت : لا تقولها م أحُبَها
ميّلت براسها على كتفه وابتسم ، ماسك كفها أثر خوفه من الطايرة وهي منحنيه على كتفه ..
~ بيت سطّام ~
غادروا الكل وطلعوا البنات للحوش ، شّدت جلالها عليها ونطقت : بيبو وجع وخري
ظبيه وهي تحت نفس الجلال : انطمي
ضحكت انفال وقالت : بنات وشفيكم ؟ خلاص مافيه أحد
اسرار : وشرايك أطلع قدام أخوانه ويذبحني ؟
ظبيه رفعت حاجبها وقالت : مدري عنها !
جلسوا قدام المسبح ونطقت انفال وهي تضبط حجابها : شفتوا مافي أحد !
نزلت اسرار الجلال من على شعرها وبقى على كتفها ، عكس ظبيه اللي مازالت حاضّنه اسرار ومغطيه راسها ، انفتحت البوابة وشهقت اسرار تنطق : صادق النكبه !!
ضحكت انفال ودخلت سيارة هذام ، شهقت ظبيه بصدمة وقالت : يويلي ويلاه قومي قومي !!
قامت ظبيه توقف وأنسحب الجلال من اسرار ، صرخت بصدمة وصرخت ظبيه وركضت ، طاحت انفال على اسرار تضحك وتغطيها ، مشت شهد لهم وقالت : سلام..
سكتت تشوفهم وقالت : بسم الله وش تسوون ؟؟
شهقت انفال من نزلت دموعها من فرط الضحك وقالت : تعالي ساعديني
مشت شهد ووقفت اسرار بينهم ومشوا معها ، ابتسمت اسرار وقالت : أعذرينا على الاستقبال ذا
ضحكت شهد وقالت : شدعوة عادي
دخلوا للصالة وسحبت اسرار السليبر حقها ورمته على ظبيه اللي فاطسه ضحك ، نطقت بغضّب : بقره أنتي !! وش البجاحه ذي تأخذين جلالي وتهجين ؟؟
ضحكت ظبيه بصوت عالي وقالت : تكفييين خلاص بطني !!
رفعت حاجبها وقالت : مغص ان شاءالله
خزّتها وألتفتت لشهد اللي نطقت : أنتي أكيد اسرار
اسرار : ايه صح عليك شهد
شهد : والعسل اللي تضحك هي ظبيه وانفال اللي عند المغسلة ؟
اسرار : شاطره ماشاءالله مين وصف لك أشكالنا ؟
شهد : صدقي ولا لا مجرد تخمين
اسرار ابتسمت وقالت : طيب خمني مين بتحمل أول أنا ولا ظبيه ؟
ظبيه سكتت فجأة ونطقت : يختي وش عليك متى بحمل ؟
اسرار : انكتمي
ضحكت شهد وقالت : عسولات يابنات
ابتسمت اسرار وقالت : عمري أنتي
تقدمت ظبيه تسلم مصافحة وتجلس ، جلست انفال ونطقت شهد : اسرار ظبيه بتحمل قبلك
ضحكت اسرار وقالت : تحاول تواسيني
ضحكت ظبيه وانفال تبتسم ، ابتسمت شهد وقالت : والله مو عن بس فعلاً هذا إحساس
ظبيه : أحسن صراحة تخيلوا يجي زواجهم وهي حامل !
شهد رفعت عيونها لظبيه ونطقت : لسى ماسووا زواج ؟
ظبيه : لا يعمري عليهم
شهد نطقت بفرحة : كويس بحضر !
ضحكت اسرار وقالت : الكل فرحوا أننا لسى ماسوينا عشان يحضرون شسالفة ؟
التفتوا من أرتفع صوت سطّام وهو يقول : بِكر محمد بطلع لغرفتي
رفعت جوالها تشوف إتصالات فائته منه ، عضّت شفايفها وقامت له وقالت : تعال بس لا تشوف
رفع طرف شماغه يحطه قدامه ومشى ، مسك يدها وسحبها معه ، زفرت بملل وقالت : وش عندك ؟
سطّام : بنام ولازم تنامين معي تعرفين لأجلك
اسرار : مافهمت شلون لأجلي ؟
سطّام : مثل ماتدرين ورانا شغل وكرف بكره وضروري تنامين بدري
اسرار ابتسمت وقالت : بس الساعة لسى تسعة ! حشى دجاج
ضحك بخفه وقال : والله ماتروحين تعالي
اسرار : مابروح الله يشغل العدو
دخلوا غرفتهم وقفل الباب وراه وسحب المفتاح ، ضحكت بصدمة وقالت : ماتثق ؟
سطّام : لا
ضحك يمشي من ضربته ونطقت : متى بنسوي زواجنا ؟
سطّام ابتسم وقال : ايه يشيخ هذي المواضيع اللي أسهر عشانها !
جلست على الكنبه وهو قبالها ، ابتسم لها ونطق : متى ودك ؟
اسرار ابتسمت وقالت : ليلة خمسطعش
سطّام : الشهر ذا ؟
اسرار غمزت له وقالت : ايه عندك شيء ؟
ضحك يقوم لها ، سحبها لحضّنه وضحكت تضّمه ، قبّل شعرها وقال : بعد خمس ليالي
اسرار : زهب عمرك ياعريس
سطّام ابتسم وقال : جاهزين بس ننتظرك
اسرار : يالله عطني المفتاح بروح أتعرف على شهد وأجيك
سطّام مدّ المفتاح لها ونطق : شغلي التكييف وقفلي الباب ولا تطولين
اسرار ابتسمت وقالت : أمرك يالرسام
ابتسم يقوم للسرير من طلعت من عنده ورمى نفسه على سريره ونام علطول ..
~ امام بيت مطلق ~
نزلوا من التاكسي وهو متكسرين تعب ، أرسل لسطّام أنهم وصلوا وبيكونون حاضرين بكره ، مشت للباب ووصل لعندها بالشناط لأجل يفتحه ، مسّك ذراعها ونطق : أدخلي برجلك اليمين
ابتسمت ومشت تدخل للحوش ونطق مطلق : توو مانور بيتك يانور البيت !
شّدت على كفه ونطقت : أحُبَك
عضّ شفايفه ونطق : الا ذي
ضحكت تدخل ، فتح الباب لها ودخلوا وشهقت تنطق : للحين م أثثت ؟
مطلق : أعقب وأنتي باقي ماجيتي بكره نطلع نجهزه
عِقد : ايوه ضروري عشان لما يتزوج سطّام نعزمو
ضحك وقال : يحظك يالهَاجس دام بنت أيمن ودها بالعزمي عشانك
عِقد : عشان زيتونه مو هو !
ضحك يمشي ودخلوا والبيت كله نايم ، طلعوا للغرفة ودخلت تنطق بصدمة : مطلق ياشاطر فين تبغى ننام ؟
مطلق دخل الجلسة اللي بوسط الغرفة ، مشت وراه تشوف مرتبه على الأرض وبمفرش أبيض ، زفرت بهدوء وقالت : اشوا
ابتسم ينزل ثوبه ويفتح شناطهم ، طلعت لها ملابس وهو سوا المثل ، سحب شورت ونطق : جاز لي النوم فيه
ابتسمت وقالت : أحسب سطّام موصيك
رفع راسه لها ونطق بصدمة : وشدخل سطّام ؟
عِقد : لأنو ينام بالشورت..
قاطعها من قام بغضّب ونطق : أخو العيال صدق !! وش وراك سطّام ؟؟
عِقد رفعت حاجبها وقالت : مو أنا اللي شفتو ظبيه هيا اللي شافتو وحكت لنا وغير كذا زيتونه قالت لي !
توسعت عيونه على مصرعيها ، مايذكر ظبيه قالت له شيء وهي ماتسكت عن حاجه عنده ، رجع نظراته لعِقد ونطق بحدة : وظبيه كيف شافته ؟؟
عِقد زفرت بملل وقالت : تعبانه ححكيك بعدين
سحبها مع ذراعها يرجعها قدامه ونطق : تكلمي !
عِقد زفرت بغضّب وتكلمت بحكم إنه شيء عادي بالنسبة لها ولا حسبت حساب لردة فعل مطلق : راحت قبل زواجها بسلطان لبيتو عشان تأخرت بالشغل واتصلت علي ولمن أخذتها حكت لي خلاص ؟
طارت عيونه وهو يسمع كلامها ومشى يطلع ، رفعت كتوفها بعدم اهتمام ومشت تدخل للحمام تبدل ، ركض مع الدرج ووصل للخارج فتح الباب ومشى لبيت سطّام اللي يتواجد بآخر الحي ، ميت غضبّ وماهو مستوعب شيء ، في باله ليه سلطان أستعجل وتزوج ظبيه ، بينجلط لو صار لها شيء وبتدمر نفسيته وبينهدم كل شيء بناه لحمايتها وحماية أخوانه ، عضّ شفايفه ونطق وهو يصر ع اسنانه : إدع ي سلطان أن اللي في بالي ماهو صحيح !!
وصل قدام البيت وضرب الباب بكل قوته ، شهقت انفال وفزّوا البنات كلهم ، نطقت شهد بصدمة : تنتظرون أحد ؟؟
اسرار هزت راسها بنفي ولحظات وأرتفع صوت مطلق وهو ينادي سلطان ، توسعت عيونها وقالت : أخوي !
مشت تركض للباب وفتحته ، دخل بعصبية تطغي على رؤيته لكنها وقفته ونطقت : البنات فالحوش أصبر !!
سكن للحظات يشوفها قدامه ونطق : ليه يالظبي ؟
توسعت عيونها بصدمة وقالت : وشفيك بسم الله !! لا تخوفني
مطلق عضّ شفايفه ونطق بحدة : لييه تزوجك سلطان !!!
وقفت بصدمة تشوفه ومشت اسرار بجلالها وقالت : مطلق ؟ صّل على النبي يولد عمي..
قاطعها صوته وهو يصرخ على ظبيه وينطق : أنا دخيلك لا توجعيني ! ليه جيتي لبيته قبل يتقدم لك ليييه !
وقف شعَر جسدها بصدمة ، هو شلون عرف وشلون بتبرر له الحين ، عرفت علطول وش جاء بباله ، وقفت اسرار بصدمة برضو من تذكرت السالفة اللي توقفت في منتصفها ولا سمعتها كاملة من الرسام ، مسك راسه ومشت له علطول وقالت : لا لا..
قاطعها من ضرب الباب وراه وصرخ : نادوه لي !!
فزّت انفال تركض للداخل ، ألتفت لظبيه ونطق : والله وشوفيني حلفت لا تتحاسبين على اللي صار وعلى سكوتك !
اسرار رفعت حاجبها وقالت بحدة : تعوذ من أبليس اللي راكبك !! وش الكلام ذا بيجي سلطان وبنفهم أنت طيرت عقل البنت ولا عاد لها قوة تشرح لك وتبرر !
ألتفت لأسرار وضحك بخفه وقال : مايخصك أتوقع
اسرار : بنشوف
مشى سلطان يركض وهذام معه وسلمان بعد ، وصلوا للمدخل الرئيسي وشافوه واقف ، نطق سلمان : اسرار أدخلي !
لفّت اسرار له ونطقت : لحظة
سلمان سحبها من جلالها ونطق : مافيه لحظة أقلها أرجعي داخل وأنتي مسنتره قدام الباب !
رجعت ورا سلمان وتقدم يغطيها ، كان بدَل سطّام وشابهه كثير لدرجة صدمتها ، ابتسم سلطان ونطق : حيّ الله مطلق
مطلق : وش صار بينك وبين ظبيه لأجل تتزوجها ؟
بانت ملامح الاستغراب على وجه سلطان ونطق : كيف يعني ؟
مطلق صرخ بغضّب ونطق : خلني أذكرك ! ظبيه ليه جات معك للبيت قبل تتقدم لها
فزّت صدور أخوانه من نطق مطلق بالكلام ، ضرب كتفه بصدمة ونطق : وش السالفة ؟؟
ألتفت سلطان لهذام ونطق : بفهمك
مطلق مسح وجهه وشنبه واستغفر وقال : آخ ولا أنكرت !
سلطان : سلامات مطلق ؟ وش جايك ثايرٍ علينا ؟؟ تأخرنا بهذيك الليلة فالشركة ولمن أنتهت أشغالنا طلعت ولقيتها تنتظر برا وتتصل على ضاحي ومايرد عليها ! ولمن قلت لها بتصل عليك رفضت لأجل ماتشغلك وتجيها من المسافات البعيدة بآخر الليل ! وتعرف قلب الأخت وتعرف الظبي زين يامطلق ! تخاف وتخاف لأجل كذا ما إتصلت عليك
سكن مطلق لثواني وهز راسه وكمل سلطان ينطق : وقلت لها تجي معي للبيت وهي في وجهي من كل شر يمسّها ولو إنه مني وسطّام فوق وقبله ربي شاهدٍ علي أني مامسّيتها بأذى وأنتظرت حَرمك لحّد ماجات وراحت معها وأتصل وتأكد !
مسح وجهه ومشى يسحب ظبيه وينطق : بنتحاسب عشان السكوت اللي حصل مفروض عندي علم وبعدين وش خايفه تشغليني ؟ أكد وأرمي عمري لأجلك مابيننا ذا الكلام ياريحة أمي ! لكن هيّن
مشى يطلع من عندهم وقفل سلمان الباب ، ألتفت لهم كلهم ونطق : بنات خلصتوا تعارف ؟ أدخلوا داخل
قاموا شهد وانفال ومشت اسرار يدخلون ، سحب سلطان ظبيه اللي تبكي ونطق : ماودي أدعي عليه
ظبيه هزت راسها بنفي مرارًا وتكرارًا ، ضحك بخفه يقبّل جبينها وينطق : خلاص أجل دموعك توجعني !
ابتسمت تمسح دموعها ومشوا يدخلون للداخل ، زفرت اسرار ونطقت : خرب أم سالفتي
ضحكت شهد وقالت : نكمل بكره
اسرار : نسيتها اصلاً
ضحكوا البنات ومشت اسرار تدخل المصعد ، ضغطت على الطابق الثاني وحسّت بالغثيان ، عضّت شفايفها تمنع نفسها وبدأت تأخذ نفس ، مشت تركض ووصلت لباب الغرفة ، دخلت تشوفه نايم على فراشه ومشت للحمام ومن وصلت حسّت بنفسها أحسن شوي ، سكنت لثواني وبعدها تأكدت إنها بخير تمامًا ، مشت ترجع للسرير وانسدحت على الجهة الثانية وغطّت بنومها العميق بعد عشاء لذيذ مع البنات وعلى ذوق شهد ..
~ بيت مطلق ، بالغرفة ~
دخل يشوفها نايمه وسبقته لعالم الأحلام ، انسدح وتحركت من حسّت فيه وحطت راسها على صدره ، حاوط خصرها وهو يهوجس باللي حصل ، للحظة لعب الشيطان بأعصابه وأفكاره لكن هو متأكد إن اللي حصل من خوفه وقلقه الدائم على أخوانه كلهم حتى لو تفرقوا بالبيوت مازال مطلق يدق ويسأل ويزور ويتعنى ، غفى بدون مايحسّ بعد تفكير طويل ..
~ صباح الجمعة ، بيت سطّام ~
ريحة العود والعطورات والتجهيزات للغداء اللي بيصير الظهر ، صوت سورة الكهف ينتشر بأنحاء بيت سطّام ، كشخة العيال للصلاة وريحة عطوراتهم الثقيلة ، ضرب عصا نهيّان فالأرض وهو يمشي وصوت مناداه للعيال وأنهم تأخروا ، مشى سطّام يطلع وهو ينسف شماغه والعيال وراه ، ركبوا الجمس ، نهيّان يسوق سطّام راكب بجانبه والثلاثة فالخلف ، ابتسم نهيّان يودع رواف اللي يهز يده وهو بحضّن انفال ، ونطق بأبتسامة عريضة : عقبال مايروح يصلي معنا
ابتسموا العيال كلهم ونطقوا بـ ' امين ' ، مشى سطّام للجامع لأجل يلحقون الصلاة مع المسلمين ..
~ الصالة ~
شالوا ظبيه واسرار وشهد عباياتهم ، ضحكت انفال وقالت : حمدلله إني مرتاحه بعبايتي وحجابي
اسرار رفعت حاجبها وقالت : تعالي نخلص وفكينا من السوالف
ظبيه نطقت بغضّب : يبنات بطني أمس قتلني ! يمغصني وخوفي أكون حامل الله ينكب شهد !
شهد ضحكت بصدمة وقالت : خير وشدخلني ؟
اسرار : لا يحبيبي أنا بعد بغيت أموت
شهد بخبث نطقت : يمكن حامل مثلها ؟
ظبيه قامت تتشمر وتنطق : بتغدا عليها وخروا
ضحكت بصوت عالي وضحكت انفال معها ، ضحكت اسرار وقالت : ما نمنعك يابنت عمي أمشي ندعس عليهم
ضحكت انفال وقالت : اوه بدينا نغلط ؟
شهد : يبنت الحلال بدعسهم لحالي
فطست اسرار ضحك من طاحت شهد على الأرض وظبيه فوقها ، ابتسمت ظبيه وقالت وهي تضرب صدر شهد بسبابتها : ها حبي تدعسين من ؟
شهد ضحكت وقالت : استسلم بس بشكيك عند المغرور
ظبيه قامت وسحبتها توقف معها ونطقت : أدعسه مثلك مايهم
انفال : وش المغرور ؟
شهد نطقت بضحكه : هذام
توسعت عيونها بصدمة وقالت : أمزح وش أدعس بعد !! هذا بيهفني من بعيد وبطير
ضحكت اسرار وقالت : صادقه ماشاءالله عليهم عندهم بُنية جسدية مرعبة
انفال ابتسمت تجلس ونطقت : كل أهلنا كذا
صرخوا البنات بصدمة ونطقت ظبيه : تقربين لهم !!!
ضحكت انفال بصدمة وقالت : وجع خير ! ايوه
اسرار مسكت راسها وقالت : وش وش ؟
شهد ضحكت وقالت : وربي مره ماتشبهينهم !
ضحكت انفال بصوت عالي وقالت : شوفوا الغبيه ! بنت عمهم أكيد ما بشبه لهم
اسرار : أمانه أنتي بنت عم الرسام ؟
انفال : ايوه بنت عمهم سعود
ظبيه عضّت شفايفها لثواني ونطقت : صدمة صدمة !!
انفال : المهم أعمامي وعيالهم طالعين على جدي الله يرحمه تخيلوا طوله وصل للميتين !
شهد توسعت عيونها بصدمة وقالت : يا ماشاءالله ! هذام كم تحمست أعرف
انفال : صراحة مدري بس أعرف طول سلمان
ظبيه : أبو السالفة يبنات قوموا نخلص
قامت اسرار ومشت للمغاسل ونطقت : بيبو كيف بطنك ؟
ظبيه ابتسمت وقالت : رحت للحمام الصباح وأنتي بالكرامة وحمدلله أحسن بكثير
اسرار : كويس مثلي
غسلت يدينها من التمر اللي أكلته ومشت ، بدأوا يكملون التجهيزات لعزيمة مطلق وعِقد من سطّام والليل عزيمة اسرار لظبيه وسلطان ..
~ بيت مطلق ~
رافعة السماعة وتنتظر الرد ، هي صحت ولقت إتصال فائت من رقم غريب وضرب وترها الحسّاس وفضولها ، ابتسمت من وصلها صوت شخص ونطقت : مين ؟
قصي رفع حاجبة وقال : أنتي اللي إتصلتي
صافية : بس أنت دقيت علي الصباح
قصي فزّ يوقف ونطق : أنتي صافية ؟
صافية : ايه نعم مين ؟
قصي ابتسم ونطق : جيت أبشرك بخروج مشعل بن عدنان آل عمر
توسعت عيونها بصدمة وقالت بنبرة باكية : اسألك بالله !
قصي : ايه نعم طال عمرك بيطلع العصر وأنا المحامي اللي جيته من طرف أخوك مطلق
طاحت على سرير ضاحي وبكت بدون صوت ، ابتسم من عرف ردة فعلها الغير مستغربة عنده ونطق : تقدرين تتصلين فيه فالعصر ان شاءالله معسلامة
سكر ورمت جوالها تبكي ، ماتدري متى قدر مطلق يفضي عمره لها ولسالفتها ، تبكي من فرحتها لأنها عندها سند وأخ مثل مطلق ونطقت : مامثل مطلق أخ ولا من مطلق أثنين !
عضّت شفايفها ومشت تصحي جوري ، فتحت عيونها لأمها ونطقت بصدمة : بسم الله وشفيك ي أمي ؟
صافية بكت علطول وقالت : أبوك جاي
توسعت عيونها وسرعان م تغورقت بدموعها ونطقت : تكفين !
ابتسمت صافية بوسع ثغرها تشوف فرحة بنتها بعيونها ونطقت : والله يبنتي أبو الجوري مايترك للجوري درب بدونه !
عضّت شفايفها السُفلية وهي تبكي ونطقت : يجعل يوم جوري قبل أبوها !
شّدت صافية عليها ونطقت : بسم الله عليكم قومي تجهزي عند خالك عزيمة
جوري ضحكت وقالت : ببيته الفاضي ؟ منجدك
ضحكت صافية وقالت : بيت زوج اسرار
جوري : اووه اسرار أجل تم بجي
صافية : غصب عليك ي أمي
ضحكت تقوم ومشت صافية تنزل للطابق السفلي ..
~ غرفة مطلق ~
صحت ماشافته وخمنت إنه قام للصلاة ، طلع يركض من الحمام وهو بمنشفته ، ابتسمت تفتح جوالها ونطقت : لسى يمديك
مطلق : تعالي ساعديني
قامت توقف وركضت للشنطة ، طلعت ثوبه ونطق : ضاحي عنده كواية
عِقد : أجلس حروح أنا
ركضت تطلع وشافت جوري ونطقت : بنت ! سوري ماعرفك بس تعرفي فين ألاقي مكواة ؟
جوري ابتسمت وقالت : أنا جوري وهاتي ثوب خالي أكويه
عِقد ابتسمت وقالت : حياتي جوري ماتقصري أستعجلي يروحي
مشت جوري تركض ووقفت عِقد تنتظرها ، صرخ مطلق وقال : بنت الشايب وين الثوب !!
صرخت بغضّب وقالت : بابا شباب كيف تفهم أنت وبعدين ثواني وأجي !
مشت تركض جوري ومسكت عِقد الثوب ، مشت تدخل وقفلت الباب وراها ونطق : هاتيه
لبسه بسرعة وسحبت المبخر الكهربائي وحطت فوقه العود ، تعطر مطلق وسحبته لها وبخرته ونطقت وهي تتأمل شعره من تحت الطاقيه : يلا يلا يالشايب
ابتسم يبوس خشمها وينطق : لبيك يعيون الشايب
عِقد : مشّيب والله
مطلق : من جور السنين ماعمره كان كِبر
ابتسمت بضيق وباست جبينه ونطقت : ياحبيب فؤادي أنت
طلع يركض مستعجل للصلاة ، ابتسمت تدخل تلبس وتتجهز للعزيمة ..
~ الجامع الكبير ~
طلعوا أنتهت الصلاة ، ابتسم نهيّان ونطق : والله لو مغير انتوا كان حلفت تجون معنا الحين
مطلق ابتسم وقال : كلها ساعة بالكثير وحنا قدام باب بيت الهَاجس
ابتسم سطّام وقال : حياكم الله
ضاحي سحب مطلق ونطق بهمس : بسرعة أبي الحمام !!
ابتسم مطلق بفشلة ومشى يدفع حمد بكرسيه ، ركض ضاحي ومطلق معه يشوفون البيت ، وصلوا بعد دقايق وصرخ ضاحي : أفتح الباب لا أفتح قبرك !!
مطلق توسعت عيونه وقال : سد حلقك !!
ضاحي عضّ شفايفه ونطق : بسده بس مقدرت على..
صرخ مطلق يقاطعه وقال : أدخل الله يقرفك !!!
ضحك حمد ونطق : مسيكين قومه العشاء أمس
ضحك ضاحي وهو يركض ودخل حمام الرجال ، مشى مطلق بحمد ونطق : وش متعشي أنت ؟
ضاحي نطق وهو فالحمام : كنتاكي الله ياخذ جوري !!
ضحك مطلق ونطق : ياكلب لا تقول أسم ربي فالحمام ؟!
استغفر ضاحي بالداخل وشهق ، ضرب مطلق الباب ونطق : حمار !
مشى يدخل للبيت ونطق بعلّو صوته : اعجلوا علينا ياعرب !
حمد مسك عجلات كرسيه ومشى لغرفته ، فتح مطلق باب الصالة وجلس على العتبه الصغيرة ، سحب بوكيت دخانه وولاعته ونطق : ‏الشيب ماطلع لكبّر سنك يابو مشبب طيب فعايلك بيضت لك سواده !
ابتسم يسحب دخانه لصدره وينفثه ، مشت تنزل بكعبها وكشختها ونطقت : مطلق فينك ؟
مطلق ابتسم وقال : هنا يالروح هنا
مشت من سمعت صوته وتقدمت له تنطق : اووها تدخن ؟
مطلق ابتسم وبلل شفايفه ونطق : وما أحرق جوفي الا زينك
عضّت شفايفها السُفلية لثواني ونطقت : نمشي ؟
مطلق : جهزوا كلهم ؟
عِقد : أقصد أنا وأنت بس
مطلق ابتسم يوقف ونطق : بنروح مشي لبيت سطّام عشان كذا أقولك
عِقد رفعت حاجبها وقالت : مجنون ؟ بالكعب والشمس وأمشي ؟
مطلق : الأكحل في ينبع معلوم وش تبيني أسوي أشيلك
ضحكت بخفه وقالت : آخ لو رجعنا سيارة مو أحسن
مطلق : عيّتي علينا يابنت أيمن
عِقد : بديت أندم طيب قول لسطّام يجيب سيارة..
سكنت لثواني وضحكت تنطق : الغنوجه موجودة !!
ضحك مطلق بصدمة وقال : ويين ؟
عِقد : وقفها ضاحي فالكراج تحت لمن مشيت للمطار
مطلق مسك راسه ونطق : أقلع أبو الحاله لو داري رحت للصلاة عليه
عِقد : شمس الصباح مفيدة حبيبي
مطلق : أي صباح صرنا ظهر
ضحكت تتمسك بذراعه من نزلوا صافية وجوري وحمود وجودي معهم ، طلعوا من البيت مع حمد وضاحي والباقين ونطقت بهمس في أذنه : كيف حتكفي السيارة ؟
مطلق : بنروح دفعات
ضحكت بسخرية وقالت : أحسن حاجه لأنو استحالة تكفي
مطلق ابتسم وقال : ضاحي أركب سوق وأنا بجيكم مشي مع أبو محمد
ابتسم حمد ونطق : حيّ ماجاء مشوارٍ معك
ابتسم يبوس راس جده ويلتفت لها من نطقت : أكرهك
ابتسم ورفع كتوفه وميّل راسه لها ونطق : أهواك
خزّته بغضّب ومشت تركب فالخلف ، ركبت صافية مع حمود بجانب ضاحي وجوري وجودي بالخلف ، مشى لبيت سطّام وتبعهم مطلق وهو يمشي على رجوله للبيت اللي يقع بآخر الحيّ ..
~ بيت سطّام ~
واقفين فالمجلس وينتظرون ضيفانهم ، ألتفت سطّام لنهيّان من همس ونطق : ريم بتجي ؟
ضحك بخفه وقال : استخفيت يأبو سلطان ؟
دقه بغضّب وضحك سطّام يلتفت من دخل أيار وهمس لنهيّان : أبشرك قبل مطلق حتى
سلم ورحبوا فيه وألتفتوا من دخلوا جينار وسنجار وراه ، ابتسم أيار ونطق : أخواني
سطّام ابتسم وقال : الله يحييكم
ابتسم سنجار ونطق : الله يبقيك يالنسيب !
تقدم سطّام أول واحد وسلم عليهم ، دخلوا داخل المجلس وجلسوا وسرعان مارجعوا يوقفون من دخل قصي وهو يبتسم وفزّ سطّام له ونطق : ارحب يأبو عبدالرحمن !!
تقدم قصي يسلم عليهم وهو ينطق : الله يبقي من يرحب
دخل مطلق وضاحي وحمد للمجلس ومشوا عيال نهيّان يسلمون ، أكتمل المجلس وبدأت السوالف والسؤال عن الحال كأي وضع طبيعي في أي مجلس ..
~ الصالة ~
دخلت ريم وبناتها وابتسمت اسرار توقف وتنطق : يالله إنك تحييهم يامرحبا ي أهلي جعل ماهو بآخر عهد لكم
ابتسمت ريم وقالت : يابعد قلبي وروحي
تقدمت تسلم على أمها وخواتها وألتفت تشوف عِقد جايه ووراها صافية وجوري وأطفالها ، ابتسمت تنطق : دودي !
رفعت عيونها لأسرار ونطقت : عيوني زيتونتي !!
تقدمت لها وسلمت عليها ، حاوطتها عِقد وقالت : حنتخاصم إيش الكلافه هادي !
ابتسمت اسرار وقالت : ماجات الا من محبة يعلم الله
ابتسمت عِقد تبوس خدها وتنطق : أحُبِك طيب
ابتسمت اسرار تتقدم تسلم على صافية وتنطق : أنا بعد
ضحكت عِقد ومشت تدخل تسلم على الباقين ، ساعدتهم اسرار وخيرية بالعبايات والشنط وتعليقهم ، ومشت من أنتهت وسكرت باب الصالة للطاولة وبدأت تحضر الحلى مع انفال وشهد تصُب لهم قهوة وظبيه توزع تمر ، ابتسمت ريم وقالت : ارتاحوا بنات
ابتسمت اسرار وقالت : مرتاحين ولا يهمك
تقدمت تحضر الحلى على طاولات الخدمة الصغيرة اللي تتواجد أمام كل وحدة فالجلسة ، ومن أنتهت رجعت تجلس وتشرب قهوتها ، ابتسمت وقالت : وشخباركم جميع ؟
الكل ردوا بالإيجاب وابتسمت عِقد تنطق : أنتي شخبارك فيه حاجه جديدة ؟ تنتظرين شيء
ضحكت اسرار بخجل وقالت : لا لسى بدري
ريم : أتمنى يستعجل شويا صراحة م أضمن بكرا
اسرار توسعت عيونها بصدمة وقالت : وش الكلام ذا
ظبيه ابتسمت وقالت : إحساسي أقوى من إحساس شهد الشخصونيه ويقول إنك بتحملين قبلي
ضحكت شهد بسخرية وقالت : اصلاً كنت أفلم عليكم
اسرار : ماظنتي بس الله يجيب الصالح
الكل ردد بـ ' امين ' ، قامت اسرار من دق الباب ونطقت : معليش شوي وأجيكم
ابتسمت عِقد ونطقت : خدي راحتك
فتحت نصف الباب ونطق سطّام : جددوا البيالات والفناجيل
هو ماشافها لكن عطاها الصينية لأنه مستعجل ، أخذتها منه ومشت تعطيها لخيرية وترجع تقفل الباب ، سحبت الباب ونطق : استعجلوا علينا
اسرار ابتسمت وقالت : ثواني بس
رجعت خيرية ونطقت اسرار : عطيها بابا سطّام
هزت راسها ومشت تفتح الباب ، طّل براسه وشاف خيرية وسرعان ماكشر وسحب الصينية بغضّب ومشى يطلع لمجلس الرجال ، قفلت الباب وراه ومشت للمطبخ ، ابتسمت اسرار وقالت : حاولوا ماتكثرون من القهوة والشاهي والحلى وتنسون من الغداء
أنهار نطقت بأستغراب : متى بتحضرون ؟
اسرار : بعد شوي ننتظر رد بِكر نهيّان
انفال رفعت عينها وقالت : طبعًا مستحيل تتنازل اسرار وتقول أسمه سطّام !
اسرار ابتسمت وقالت : كذا تعودت
عِقد : ولا الرسام قسم بالله عبيطه تعبت منها
ضحكت بخفه منهم ومن كلامهم ومسكت فنجالها تشربه ..
~ أمام بيت سطّام ~
كان صادق ينزل الصحون وخيرية تشيل معه ، سطّام واقف وشماغه على كتفه ويجهز معهم ويشرف عليهم ، هز راسه بنفي ونطق : صادق أسحب السجاد زيادة عشان الشمس
هز صادق راسه ومشى يسحب السجاد الأحمر ، تقدم سطّام يزبط محل الصحون على السَفر ونطق : جيبوا التقديمات والعصاير والسلطات
رفع راسه لخيرية اللي واقفه ونطق : وين بِكر محمد ؟
خيرية ابتسمت بكلافه ونطقت : مين ؟
سطّام : اسرار
خيرية : داخل
سطّام رفع حاجبة وقال : وش أسوي فيها إذا داخل ناديها تطلع لي
مشت خيرية تدخل ونطقت : ماما اسرار بابا يبغى أنتي
هزت راسها توقف ومشت معها ، نطقت بتساؤل : عندك أحد ؟
سطّام ألتفت لجهة صوتها ونطق : لا تعالي
مشت تطلع للحوش الأمامي ونطقت : ماتحسّ بالحر ؟
سطّام ألتفت لها ووقف يتأملها للحظات ، عضّ شفايفه يصدّ عنها يكبح شعوره ورغبته بتقبيّلها ونطق : الجو زين وخايف على الشيبان من التكييف
طلع جينار من المجلس وألتفت يشوف سطّام وأمامه اسرار ، ضحك بصدمة ونطق : ما ألومك والله لمن أخدتها !
ألتفتت له علطول من نطق ومشى لها ، أستوعبت من اللهجة إنه أحد أخوانها ونطقت : ياربي ياحبيبي
ضحك يضمّها وابتسمت تحاوط رقبته ، شّد سطّام على فكه يصدّ للجهة الثانية ويردف بغضّب : خلصوا مامعنا وقت !
ضحكت بسخرية وقالت : شخبارك ؟؟ جينار صح !
جينار ابتسم وقال : ياعيني عليك ايوه جينار
ابتسمت تلعب بخصلات شعره وتنطق : تجنن بسم الله عليك
ابتسم بوسع ثغره ونطق : تستهبلي صح ؟ والله إنك خييييال
سطّام زفر بغضّب وقال بهمس : ياصبر أيوب
رفع راسه ومشى يسحبها له ويهمس : عجلي لا أحوسك !!
ابتسمت له بتوتر ومشت تجهز ، أنتهت من التحضير ونطق سنجار : اهلاً بحبيبة قلبي
رفعت جسدها توقف ولعن سطّام نفسه من دعاها ، صدّ يسحب شماغه من كتفه ويضبطه ، ضحكت تحاوط سنجار وتسلم عليه وطلع أيار وبدأوا أخوانها يمازحونها ويسألونها ويحضنونها كل ثانية وأخرى ، نطق أيار وهو ماسكها : متى الزواج ؟
جينار : بالله عليكي قولي قريب
ابتسمت وقالت : غريب ماقالكم ؟
سنجار همس بأذنها : إذا تسمحين لي بالقول
ميّلت شفايفها السُفلية لثواني ونطقت : تفضل
سنجار بنفس الهمس : ماتوفقتي بالأختيار نفسية ويجيب الضيم
ضحكوا أخوانها وضحكت معهم ، هو أرسل لسلطان وسلمان يطلعون لأجل تفزّ وتدخل منهم وفعلاً نطق سلطان : ياولد
فزّوا أخوانها يغطونها ونطق أيار : تعال
توسعت عيونه بصدمة وقال : لا لحظة !!
مشى ووصل لعندها ومسك ذراعها ونطق : أمشي !
سحب سنجار يد سطّام منها ونطق : بناخذها الليلة إذا تسمح
ابتسم يخفي غضبّه ونطق : والله ودي بس تعرف وراها عزيمة
اسرار ابتسمت وقالت : صادق والله والمصيبة أنا اللي مسويتها
جينار ابتسم وقال : يابنتي عادي سهرة صباحية
سلمان نطق بغضّب زائف : يبو نهيّان أعجل ندخل ؟
سطّام سحبها بدون ماتعطيهم رد ونطق : الليلة أبيك تسمعين ؟
اسرار ألتفتت لنبرة صوته ونطقت : موجودة وشفيك ؟
سطّام : مابتروحين مكان
اسرار : حرام طلبوني
سطّام : كلمتي تمشي
اسرار رفعت حاجبها وقالت : يكرهي لصيغة الأمر ذي
سطّام اخذ نفس ونطق : فكينا من الهواش قلت لا مو لازم أكرر على رأسك كأنك بزر
اسرار سحبت ذراعها منه ونطقت : وقلت لك قبل ي بِكر نهيّان أنا رأسي عنيد
سطّام نطق بحدة صوته وهو يهمس : أكسر رأسك ي بِكر محمد !
ضحكت بسخرية وقالت : ماودي اتعزوى وأنا عن ألف رجال لكن أنتبه وراك ثلاث شجعان يأكلونك ترا !
دخلت بدون ماتسمع رد ثاني منه ، زفر بغضّب ونطق : ماهي عوايدي الغيرة لكن ما قويّت أشوفها بهاللبس ولو إنه قدام أخوانها !
عضّ شفايفه يسيطر على نفسه ، هو مع الحر والكرف وهواشات حدثت مع المطاعم تلفت أعصابه ، ولمن شافها بالفستان الماسك اللي يزينه اللون الأسود زاد انفعاله ولا ماهو يسمى الغيور ، مشى لهم ونطق أيار : حجي أخدها الليلة
سطّام تمالك نفسه ونطق : إذا خلصنا عشانا على خير أبشر
ابتسم سنجار ونطق : تبشر بالجنة
مشى سطّام يدخل للمجلس وينطق : حياكم الله على كرامة مطلق والله يوفقه ويبني بيته
ابتسم مطلق يوقف وينطق : الله يكثر خيرك يا أخوك ومابيننا والله الكلافة
ابتسم سطّام وقال : جات من قلب أخو لأخوه يامطيليق !
ابتسم يبوس خشمه وينطق : جعلني ماعدمك
طلعوا الرجال للحوش وجلسوا على الصحون ، حضور الليلة أكثف وأكثر بحيث أنهم عزموا أهلهم على كرامة سلطان ، وكل آل عقيل بيكونون موجودين بهالليلة ، جلسوا وبدأ التقديم والأكل سواء بقسم الحريم داخل ولا الرجال بالخارج ..
~ داخل البيت ، المرسم ~
دخلته ورفعت جوالها ترسل ، جلست على الكرسي ونزلت عينها من وصلتها رسالة من نفس الشخص وزفرت بغضّب تكتب : مابيني وبينك شيء كل اللي حصل غلطة كبيرة وأتمنى معاد تزيد فيها !!
أرسلتها وجلست ثواني ووصلها رده وهو يقول : توفى عمي وولده والسبب أنتي وماتت جدتي وبرضو السبب أنتي والحين تقولين مابيني وبينك شيء ؟ أنتي ربيتي ونمتي بحضني عشرين سنة بتنكرين كل شيء سويته لك ؟!
زفرت بغضّب ومسكت راسها لثواني ورجعت تكتب : وصال أنت وأنا ضحايا لبتال وخلاص أنتهى كل شيء وأنت شفت حياتك مع وداد ليش باقي تنبش بالماضي وتبيني أرجع أفتح لك قلبي ! أنت كنت أخ لفترة طويلة من الزمان لكن عطيتني ثمن مشاعري لك بشكل قاسي وكرهتني بوجودك وبالأخير أتضح إنه مابيننا حتى رضاع وإنك مجرد إبن عم ! والله يرحم ميتكم لكن أنا عمري مابسامحك لا أنت ولا غيرك سواء حيين ولا ميتين
حظرت رقم جواله ومسحت دموعها بحرقة وقالت : اسرار خلاص شفتي العوض كيف وكيف ربي رزقك بثلاثة مو واحد !
كانت تحس بقشعريرة ورجفة بكامل جسدها ، عضّت شفايفها لثواني ونطقت : يارب أتحمل لليل
طلعت من شافت البنات واقفين وبعباياتهم ، ابتسمت لأمها واحتضنت كتفها ونطقت : أمي أشوفكم الليلة ؟
ريم ابتسمت ابتسامة عريضة وقالت : والله ودي لكن سامحيني وراي موعد الليلة بجِدة وضروري أمشي
ابتسمت وقالت : الله يحفظكم تعالوا أودعكم
ريم : الأولاد موجودين ترا
اسرار ضحكت وقالت : أعرف عازميني
أنهار ابتسمت بأنتصار وقالت : وناسه جايه معاكم
اسرار : الله يحييك والباقين نعوضهم
أبرار وأزهار ابتسموا لها وتقدمت تسلم عليهم ، ودعت أمها وطلعوا كلهم من الصالة ، مشت تجلس جنب عِقد وقالت : ايوه وش خططكم ؟
ظبيه : كلمني سلطان عن سفرة لنا كلنا
شهد : مين كلنا ؟
ظبيه : كلنا يعني الأربع أخوان وأحنا يالاربعه بس مدري مطلق بيجي ولا لا
عِقد ابتسمت ونطقت : عناد حخليه ينشب لكم
ضحكت ظبيه وقالت : زين ماتسوين
اسرار : بعد العشاء بطلع مع أخواني وأنهار وبرجع متأخر لا يفوتني شيء
انفال رفعت عيونها وقالت : ماشاءالله بنات عندي جدول الليلة خطيييير
شهد : أنا بعد بغني لكم
ظبيه : وأنا بسوي لكم ألذ مكرونه بشاميل بحياتكم كلها
عِقد ضحكت تشوف نظرات اسرار ونطقت : صراحة بيبو جابتها صح !
اسرار : ايه لأنها حقيرة وماتسوى..
ضحكت من رمت ظبيه الوساده عليها وقالت : تستاهلين يوسخه أجل تسحبين علينا ؟
عِقد : هي ماهي ضامنه الروحه لأنو العشاء ممكن يكون كبير وفيه ناس وكدا فاهمين ؟
اسرار ابتسمت وقالت : بس هم طلبوني يارب أقدر أطلع معهم
انفال : وش قال سطّام ؟
اسرار : وافق غصبًا عنه
شهد ضحكت وقالت : تعجبني المسيطرة
اسرار : والله ما أداني الدلع ذا
عِقد : ايوه صح بطله !
ظبيه ابتسمت وقالت : طيب صوري لنا
اسرار ابتسمت وقالت : بحاول
شهد : من بحاول أعرفها والله بتسحب علينا
ضحكت تشرب الشاهي حقها وتستمع لسواليف البنات ..
~ حوش سطّام ، قدام المسبح ~
جالس على السجاد مع أخوانه ومطلق فقط ، الكل غادروا البيت وبحكم إن ضاحي مشى للخرج لأجل سالفة مشعل مابقى الا مطلق عشان عِقد ، عدل نهيّان جلسته ونطق : ردوا عليك يأبو رواف ؟
سلمان ابتسم وقال : أعمامي ؟
هز نهيّان راسه بالايجاب وكمل سلمان ينطق : ايوه كلهم بيجون
سطّام : الله يحييهم
نهيّان تثاوب ونطق بتعب : ودي أقيّل شوي
هذام : أبد أطلع لغرفة الضيوف ونام فيها وبنصحيك قبل المغيب
نهيّان أشر لسطّام ووقف يساعد أبوه ، وقف ومسك عصاته ونطق : لا تنسون مني
ابتسم سطّام وقال : ماعليك
مشى نهيّان ورجع سطّام يجلس ونطق : ياعيال اليوم حار !
مطلق : مامن جديد هذا جو الرياض من عرفناها
هذام : توه يستوعب وهو مغدينا برا
سلمان ضحك وقال : أجل ودكم نطلع كوفي ؟
هذام ضرب كتفه وقال : وقسم بالله جوي !
سلطان وقف وقال : مشينا بسرعه عشان يمديها للرجعة
سطّام وقف ومشوا كلهم للسيارة ، طلعوا على الجمس اللي كفى ووفى لهم ، ابتسم سلطان ونطق : ياعيال ترا مجهز سفرة بعد عرس الشيخ
سطّام زفر بقرف ونطق : ياعيال !! فيه شيء أسمه شهر عسل سمعتوا فيه ولا لا ؟
مطلق نطق وهو بجانبه : لا وين بدري عليك ! تأخرت مره
سطّام اخذ نفس وسكت يناظر الطريق ، ضحك سلطان بسخرية وقال : حبيبي الخصوصية ألف ترا وبعدين بنطلع سوا نغير جو
سطّام : مابي أغير جو معكم ناشبين لي بكل محل بتقولون غصب يعني ؟
سلمان رفع حاجبة وقال : من زينك عاد ! أحمد ربك نبي نغير جو معك ؟
هذام نطق بحدة : وعن موضوع إذا غصب ولا لا ايه غصب مع الأسف وبتجي طرق عن خشمك !!
ضحك سطّام ونطق : خلاص بسافر ولاية ثانية وإذا خلصت أسبوع أو أسبوعين لحقناكم سهلة !
مطلق : خلوه خلوه مرده لنا
ابتسم يكمل طريقه للكوفي اللي أختاره سلمان لهم ..
~ الخرج ، أمام بوابة السجون ~
انفتحت البوابة وطلع مشعل ومعه أثنين من الحرس ، عضّ شفايفه من شاف جوري تركض له وسرعان ما أنهمرت دموعه واحتضنها بشدة ، حاوطته وهي تبكي بدون صوت لأجل ماتوجعه رغم إنه يبكي معها ، ابتسم يشوف صافية وتقدم لها ونطق بكل شعوره : رجعتك !
نزلت رأسها توافق على كلامه وسرعان ما حضّنها له ، حاوطته وهي تبكي وهمست له : جوري ماتدري عن شيء خله على كذا
هز راسه بالايجاب وباس راسها ونطق : ارحب
ابتسم ضاحي يمسح دموعه بطرف شماغه وينطق : البقى تأثرت معليش
ضحكت صافية وسلم ضاحي على مشعل ونطق : خطاك الشر يأبو حمود
ابتسم مشعل ونطق : مايجيك
ألتفت من شاف مجيد نازل من سيارة مشعل ، ضحك بصوت عالي وقال : يامرحبا
ابتسم مجيد وقال : البقى ياعين أخوك
سلم عليه ولفّ مجيد ينطق : هذي سيارتك وأرجع أقض أيامك مع أهلك أنا بيوصلني ضاحي
ابتسم ضاحي ونطق : على عيني ورأسي أمش
مشعل : أمي وأبوي ؟
مجيد : محد موجود الكل فالديرة
مشعل هز راسه بالايجاب ومشى مع صافية وأطفالهم ، مشى مجيد يركب بجانب ضاحي ونطق : وصلني للبيت
ضاحي هز راسه وشغل السيارة ومشى يطلع من المكان ..
~ بيت سطّام ~
طلعوا البنات فالحوش ، رفعت ظبيه جوالها من أتصل عليها سلطان ونطقت : هدوء شوي
سكتوا البنات يجلسون قدام المسبح ، جلست بجانب اسرار ونطقت : هلا سلطان ؟
سلطان ابتسم وقال : ماهو طبيعي كل ماسمعت صوتك أطيب
ظبيه ابتسمت بخجل وقالت : ياحبيبي ياعين الظبي
ضحكت اسرار وقالت تغيضها : ياعين الظبي !
رفستها وطاحت بحضّن عِقد اللي ضحكت معها ، أنتهى الإتصال ونطقت : بنات العيال كلهم برا وبيطولون جازت لهم القعدة
عِقد : وبما إن الجو صيف وأنا صراحة ماشبعت من ينبع اش رأيكم نسبح ؟
شهد قامت توقف وقالت : تم !!
ظبيه ابتسمت وقالت : يمدي ؟
انفال : ايوه بس لحظة اسرار قومي شيكي وين صادق
اسرار : ماعليك مستحيل يجي تحت في غرفته
انفال ضحكت بخفه وقالت : طيب بجيب رواف يسبح معنا
ضحكت اسرار وقالت : اف جيبيه !!
هزت راسها ومشت تجيبه ، تجهزوا البنات ونزلوا كلهم فالمسبح ، ضحكت عِقد وقالت : أنا بأسعد لحظات حياتي
اسرار ابتسمت وقالت : بقتلكم لو أتعب ووراي عشاء
ظبيه : أنا أعفيك عنه مو العشاء لي ؟
اسرار ابتسمت تميّل راسها على حافة المسبح ، غمضت عيونها من تذكرت رسايل وصال ونطقت تحت انفاسها : اللهم أكفنيهم بما شئت وكيفما شئت إنك على ماتشاء قدير
سكنت تسمع صراخ البنات ولعبهم ، لفّت من حسّت بأنامل وكف صغير ابتسمت ترفع راسها وشافت رواف بالشورت الأزرق ، ضحكت تسحبه وتنطق : ياحبيب عمتك أنت
انفال ضحكت وقالت : أجمل عمه !
ضحكت تحتضّنه ومشت فيه وهو يضحك ويصارخ ، ابتسمت ابتسامة عريضة وهمست له : يمكن يجيك ولد عم قريب ؟
ضحكت تتأكد محد سمعها وكملت تلاعبه وتلعب مع البنات ..
~ الكوفي ~
جالسين على الطاولة ، مطلق يدخن وصادّ عنهم والسوالف تدور عليهم بمختلف المواضيع ، ضحك سطّام وقال : الله يقلع شكلك يأبو رواف !!
ضحك سلمان ونطق : والله أنتظرتكم ولحد سوا شيء قلت أجيب لولدي أخو ولا أخت يتسلى فيهم
ضحك سلطان وقال : مستعجل !
هذام : لحّد يطالع فيني
طفى مطلق زقارته وسحب كاسه الشاهي ، ألتفت سطّام له ونطق : وش مشغل بالك ؟
مطلق : أبد والله سلامتك
سطّام : غرد ودندن
مطلق ابتسم وقال : ياخي تعبت أفكر بالسفرة حقت سلطان
سلطان ابتسم وقال : لييه ؟
مطلق : البلا ذا اللي نركبه ويطير بنا يارجال ما ادانيه يمرضني
ضحكوا العيال ونطق سطّام : أبد تبي حضني ؟
مطلق رفع حاجبة وقال بهمس قريب لأذن سطّام : ماودنا نضيق المكان على بنت عمي
ضحك سطّام بصدمة ونطق : تعقب ولا هي بحولك !
مطلق دفع بلسانه خده ونطق بضحكه : ماقلنا شيء يالهَاجس ؟
ابتسم سطّام ونطق : نرجع للبيت ؟
سلطان : ماتقدرون تحددون ؟ مره بنطول ومره بنرجع
هذام ضحك بصدمة وقال : ياعيال سطّام متناقض حتى بقراراته !!
سطّام : ليتني اتوطى ببطنك وراي عشاء
هذام ابتسم وقال : معك وقت عن العبط
سطّام : بكيفكم
سلمان ابتسم وقال : مطلق بديت تشتغل ؟
مطلق : أبشرك مدير بعد الله يخلي لنا الهَاجس
سطّام : تستاهل كل خير ومهما فعلت مابرد جمايلك يأبو مشبب
ابتسم مطلق وقال : اعنبو واحدٍ مايحبك !
سطّام ابتسم وقال : ياصديق واحد براد شاهي
هذام : أبشركم جاز له المحل
ضحك سلطان وقال : ايييه
ضحك سطّام ومسك البراد يصّب له شاهي ..
~ بيت سطّام ~
صرخت تطلع من تحت المويه ونطقت : حصلتها !!!
طلعوا البنات ونطقت ظبيه : ياخي عِقد غشاشه ! كم مره فازت
ضحكت عِقد وقالت : ايوه عذركم يافشله إني غشاشه ؟
اسرار : صراحة برافو عليك ماشاءالله بس السدادة صغيرة شلون تحصلينه ؟؟
شهد كحت من الكلور ونطقت : ماشاءالله أنا راوند واحد وهلكت
ضحكت انفال وقالت : أنا لو ألعب جبتها
شهد : هاتي رواف وورينا شطارتك
انفال مشت تعطي شهد رواف ، مسكت عِقد السدادة الصغيرة ورمتها وأنتظروا فترة ، بعدها بدأ العد وغطسوا كلهم يدورون عليها ، ضحكت شهد وهمست : صح أنهم مجانين ؟
ابتسمت تنتظرهم يطلعون ، طلعت اسرار ونطقت : أحد حصلها ؟
شهد ضحكت وقالت : لا بس أنتظر عِقد تطلع وتصارخ
ضحكت اسرار ورجعت تأخذ نفس وتغطس من جديد ، طلعت ظبيه وعِقد مع بعض ونطقت ظبيه : بشري فزتي ؟
عِقد : والله عجزت أحصل شيء أبيض حتى
ظبيه : هذا اللي حنا قاعدين نشوفه لنا جولتين كاملة
ضحكت عِقد وطلعت انفال ونطقت : بنات ويينها ؟
اسرار طلعت وهي تضحك ونطقت : جبتها وأنا بنت محمد !
صرخت ظبيه وقالت : فخر الدنيا كلها
شهد ضحكت وقالت : حسافة الهياط ي انفال تعالي أمسكي ولدك بس
ضحكت انفال وقالت : يارب والله كنت قريبه
اسرار ضحكت وقالت : يكذابه ولا هي حولك حتى
ابتسمت انفال ترجع شعرها للخلف ونطقت : وشرايكم نطلع عشان يمدي نجهز ونكشخ ؟
اسرار : صدق والله خصوصًا أنا مايمديني لأني بكرف
شهد ضحكت وقالت : شدعوة نساعدك كلنا
طلعوا كلهم الا عِقد اللي طلبتهم ينتظرونها وبتتبعهم بدقايق ، مشوا كلهم للداخل يجهزون للعزيمة فالليل ..
~ أمام باب بيت سطّام ~
مشوا ينزلون ونطق مطلق : عندي كم شغلة بخلصها وأجيكم بس نادوا لي بنت أيمن
هز سطّام راسه بالايجاب وقال : ثواني بس
مشوا يدخلون كلهم وركض هذام يقول : بصحي أبوي
سلمان : ايه ايه عشان ما ننسى منه
مشى سطّام يدخل ونطق : حَرم مطلق تطلع له
ابتسمت عِقد ونطقت : شهود سلميلي عليهم أنا ماشيه
شهد ابتسمت وقالت : ليه ياروحي مابتجين ؟
عِقد : بحاول
شهد هزت راسها ومشت عِقد تطلع لمطلق ، ركبت معه وقالت : حنجي الليلة ؟
مطلق : والله تعبان
عِقد : اسم الله عليك أشبك ؟
مطلق كح بقوة وقال : ولا شيء يمكن برد
عِقد نطقت برعب : بنص الصيف ؟؟
مطلق مسح خشمه ونطق : برجعك البيت وبروح للمستشفى
عِقد : تخسى حجي معاك !
مطلق : يابنتي والله مافيني شيء
عِقد ربطت حزامها ونطقت : ستل جايه !
مطلق ابتسم يحرك من عند البيت للمستشفى ، مايدري وش صار فيه لكنه رايح يفحص ويشوف ، زفرت بغضّب وقالت : كلو عشان الدخان دا !
ضحك مطلق وقال : واحدٍ من زوجاتي مقدر أبعده
عِقد : ماشاءالله ؟
مطلق : ما أنتي بالأولى مثل ماتحسبين
عضّت شفايفها السُفلية لثواني وصدّت للشباك تتجاهله ، هو يحسبها من ظبيه بتتفهم إنها مزحة ومابتشيل بخاطرها لكن اللي ماحسب حسابه حصل وشالت بخاطرها لأنها تحب تكون الأولى دايم ..
~ بيت سطّام ، العشاء ~
اصطفاف السيارات وازدحام الناس أمام الأبواب ، الأطفال والشباب والكبار والشيبان موجودين ، واللعب من جهة الأطفال والصراخ والترحيب عند الرجال وريحة العطور والعود والبخور لآخر الحيّ واصل ، والكل عرف إن سطّام مسوي عشاء ، مشى سلمان ونطق : سطّام أنت مادخلت تشيك على التجهيزات والعشاء ؟
سطّام هز راسه بنفي ونطق : مطلق مايرد
سلمان : يرحم والديك ماهو وقت مطلق
سطّام : خلاص كلم انفال وأدخل أنت
سلمان رفع حاجبة وقال : بيتك يالخوي ؟ أمش بسرعه
زفر سطّام بضيق ومشى يدخل جواله بجيبه ، دخل داخل البيت وضرب الباب ، ركضت خيرية وفتحت الباب ، نطق من وراه : أدخل
خيرية توسعت عيونها وقالت : لا بابا كلو موجود
سطّام : وين اسرار
خيرية : باقي مايجي
سطّام : فوق ؟
خيرية : ايوه بابا
سطّام : شوفي لي طريق بطلع لها
مشت انفال وقالت : وشفيه ؟
سطّام سمع صوتها ونطق : أم رواف شوفي لي طريق لغرفتي
انفال : تقدر تعدي بس لا تلتفت للصالة
هز راسه ومشى يدخل ورقى الدرج علطول ، وصل للطابق وأخذ نفس عميق من وصلته ريحة عطرها ونطق : من الحين ؟
مشى ووصل لباب غرفته وفتحه ، دخل ووقف يشوفها لابسة
'
انتهى البارت ادعموني بنجمة وكومنت عشان اتحفز اكملكم 🩵
" وحشتوني والله ، بتطول الغيبة وبنرجع ببارتات لذيذة يوم الخميس الجاي لأن دوامي بيبدأ 😔😔😔 ، لا تنسون النجمة يحباااااني أشوفكم ببارت جديد "