الهَوى اسّرار وهَواجِيس واحّلام ... والىَ متّى واحّلام وصِلك بعّيده

البارت الثاني عشر

~ غرفة اسرار ، بيت عِقد ~
منسدحين ويطالعون السقف ، ابتسمت وقالت : حتسوين زواج ؟
اسرار : مدري شلون تفهمون ؟
عِقد جلست وقالت : أعترفي ترا مره واضح
اسرار لفّت لها وقالت : ايوه ايوه ؟
عِقد ضحكت بسخرية وقالت : ماجمعك ربي فيه الا عشانو خيرة بحياتك ليش تحاولي تبعديه عنك ؟
اسرار عضّت شفايفها لثواني ونطقت : ويمكن تكون خيرة له أني أبعد منه ؟
عِقد : أنتي كنتي تبكي قبل لحظة ومنهارة إنك ماتركتيه يكلمك أقنعيني انك ماتبغيه !
اسرار صدّت تعطي عِقد ظهرها ونطقت : ماتبغي تتكلمي معايا ؟
ماردت اسرار ومشت عِقد تطلع من عندها ، غمضت عيونها وقالت : يارب م ألمحه قريب يارب
استسلمت للنوم من فرط تعبها والأحداث اللي حصلت لها ..
~ فالديرة ، بيت مطلق ~
دخل يقفل باب بيته ويمشي للمقلط ، شاف ضاحي منبطح على بطنه وجواله يشتغل ، قرب منه يشوفه يتابع مسلسل مترجم ونطق : أخو الهَاجس تتابع نساوين ؟؟
فزّ ضاحي برعب وقال : هاه ؟ لا لا أبي أتعلم انقليزي عشاني بتوظف بشركة نسيبي
مطلق : ماشاءالله وصلك العلم ؟
ضاحي ابتسم وقال : ايه هو أرسل لي يستشيرني اذا يكلمك ولا لا وقلت له يطلق حجاجه
جلس مطلق وقال : نكبته ونكبتني ! وطف البلاء طفه لا تخسفنا ذلحين
لفّ لضاحي اللي يضحك بدون صوت وقال : علامك ؟
ضاحي انصرع يضحك وقال : مطلق لاتستشرف فوق راسي
مطلق رفع حاجبة وقال : أعقب !
ضاحي نطق بسخرية : عرفت من هو بو مطحس
توسعت عيونه وكمل ضاحي يقول : وتقول نسيتها أثرك بالبلاء وطحت لها زود ؟
مطلق تنحنح وقال : كيف عرفت ؟
ضاحي : بحثت عن رقمها
فزّ مطلق عليه وصرخ ضاحي يضحك وقال : تغااار يكلب !!!
أستوعب مطلق على نفسه وقام ، رفس ضاحي وقال : أعقل
ضاحي : حسايف يبو مشبب مسرعك طحت ؟
مطلق طلع سبحته يلعب بها ونطق : من بلاه الهوى ربي يعييّنه
ضاحي ابتسم وقال : صابه الهم ولا مات مغبوون
ابتسم مطلق وقال : انخمد ورانا شّده الصباح
ضاحي : لا تقول بنشّد بالحلال !
مطلق : إيه وأنا جايكم من الرياض عينت لي محلٍ يهول وبيناسب مكحولة وأهلها
ضحك ضاحي وقال : يالله يالله بتكلم ظبيه ؟
مطلق : بروح لها ذلحين
طلع مطلق وقفل باب المقلط على ضاحي ، ابتسم ضاحي يرجع ينبطح على بطنه وشغل المسلسل ونطق : يالبيه شقراء وبيضاء وشعرها حدر ذنبها
ابتسم وقال : مدري وش تقولين بس ايلافيو
عضّ شفايفه يتأمل وهو لا صوب التعلم ولا صوب الانقليزية ..
~ غرفة ظبيه ~
جالسة تكلم صافية وتجدّل شعرها الكثيف والطويل ، لفّت من دق الباب وقالت : مطلق ؟
فتح الباب وطّل براسه يقول : أجيك ؟
ظبيه : تعال تعال
دخل مطلق يشوفها قدام المراية تجدّل شعرها ، ابتسم من سمع صوت صافيه ونطق : العوده مرحبا !
ابتسمت صافيه وقالت : ارحب يحبيب أختك
جلس القرفصاء على الأرض وقال : البقى ي مرحب
ظبيه همست له : تعال أجلس على سريري
مطلق : محلي زين
ظبيه تثاوبت ونطقت : صافيه بنخمد اذلفي لورعانك
ضحكت صافيه وقالت : يالله صدق بروح اسوي رضاعة لحمودي
مطلق ابتسم وقال : لبى عمره واحشني الصغير
صافيه : بنجيكم بكره عشان اللي خبري خبرك
مطلق توسعت عيونه وقال : يلعني في ضاحي نعم !
ظبيه : بقفل
قفلت الجوال ولفّت لمطلق وقالت : هو صدق ؟
ابتسمت بتوتر وكملت : أكيد صدق دامك جيتني بذا الوقت
مطلق قام يوقف وبيده سبحته وقال : ايه صدق ودك ولا ماعندي مشكلة بـ ردّ الرجال ؟
ظبيه ابتسمت وقالت : شورك وهداية الله
مطلق : شوري الرجال طيب أصل وساس وراس ومعرب الجد والخال وقريب لي وأعرفه من عاده ورع وموافق عليه
ظبيه : وأنا موافقه
مطلق ابتسم بخفه ونزل يبوس جبينها وينطق : تعرفيني لو أدري بشيء يضرك يعقب هو واللي خلفوه يقربون لك
ضحكت وقالت : أدري بك
مطلق : أجل تمسي على خير
مشى يطلع وقفلت الباب وراه ، اخذت نفس طويل وقالت : الصراحة مزيون يعني قام حظي وأخيرًا ! وجات منه بعد
مسكت قرونها وصارت تدور بالغرفة وترقص ، ضحكت وهمست : جبت راسه بدون أي مجهود
صارت تفّر بالغرفة وقرونها تتطاير بالهواء معها ، صفقت وهي عاضّه شفايفها ونطقت : عاشت الظبي عاشت
مسكت نفسها وصرخت بحماس وقالت : وربي لا أغيض بنات عمي بكره أنا أوريهم صرت أنا واسرار كنائن للشيخ والتاجر والمعروف فالجبيّل والشرقية كلها نهيّان !
انسدحت بحماس وقالت : تصبحين على خير آخر ليلة وأنا سنقل
ضحكت تحاول تنام لكنها أخذت فترة طويلة وهي تناظر السقف من الحماس لحّد مانامت ..
~ يوم الجمعة ، بعد الصلاة ~
طلعوا من الجامع ، نهيّان يمشي قدامهم وعياله وراه ، سطّام بثوبه وشماغه مثل بقية أخوانه من غير هذام اللي رابط شعره ولابس كاب ، ضحك سلطان وقال : ايوه وتقول كسرت خشمك ؟
سلمان ضحك يضرب سلطان وينطق : هذي اللي فعليًا كسرت خشم رجال
سطّام ابتسم يشوف أخوانه يذبون على هذام اللي كابت غضبّه وساكت ، نهيّان ابتسم وقال : يستاهل اللي يروح ويشوف حريم الناس كذا يصير له
هذام زمّ شفايفه ونطق : بس ماكنت عندها كنت بالملعب !
سلطان بضحك قال : أنتهى كسرت خشمك وباقي تبرر
هذام نطق بحدة : شعره ! مو كسر وبعدين سليّط والله أقص لسانك وشوف اذا بتقدر تخطب الليلة وتكرر بعد الشيخ ولا لا يوجه القنفذ !
سلمان ضحك بخفه وقال : بس أنت وياه
سطّام نطق بحدة يدقهم بالكلام وقال : كملوا بالعكس مبسوطين عليكم يالعقال ! ماشاءالله تبارك الله !
سكتوا أثنينهم ومشوا يركبون السيارة ، ابتسم نهيّان وقال : مايعرف لكم الا سطّام
سطّام : فشلونا
سلطان لفّ لأبوه وقال : أبوي متى بنروح ؟
نهيّان : بنبدل فالبيت ونمشي نبي نملك قبل غروب الشمس وعسى الله ييسر لك يالعنقود
سلمان : مستعجل سليّط ؟
سلطان ابتسم وقال : لا شدعوة بس اسأل وخلونا نروح بدون هذام عشان ماينفجعون المساكين بوجهه المورم
هذام : ايه ايه خايف أسرق العروس منك ؟
ضحك سلطان وصدّ هذام بغضّب ، استغفر نهيّان بهدوء وسكتوا يرجعون لبيت سطّام ، ومن وصلوا بدأوا بالتجهيزات اللازمة للحفل الليلة ، دخل سلطان يشوف بشته وأغراضه جاهزة اخذ نفس ومشى يتجهز ..
~ حيّ الياسمين ، بيت عِقد ~
قامت بكسل تسحب البطانية معها ، نزلت مع الدرج تشوف عِقد حاطه ماسك وقدامها فساتين مختلفة بجميع الألوان والأشكال المميزة والفريدة ، مشت لها وقالت : صباح الخير
عِقد ابتسمت وقالت : أنتي الخير ي أمي خذي لك دش صح وتعالي نختار لك فستان ونسوي الميكب والأظافر
اسرار فركت عيونها بنعاس ونطقت : وش صاير ؟
عِقد لفّت لها وقالت : بيبو بتتزوج
اسرار توسعت عيونها بصدمة وقالت : من المعرس ؟؟
عِقد ضحكت وقالت : أخو زوجك الصغير
اسرار توهقت ، هي أمس دعت بآخر الليل ومن أعماق قلبها م تتضطر تلمحه واليوم أخوه خاطب ببنت عمها ، زفرت برعب وقالت  : بسم الله وش صاير فالدنيا ؟!
عِقد : بيكون الحفل فالليل بس تبغي نحضر كتب الكتاب بالعصر ؟
اسرار : ايه ضروري نكون معها
عِقد : اممم أنا برضو قلت كدا خلاص تمام نروح العصر ونأخد غيار فساتين معانا
اسرار : مابكشخ بكتب الكتاب الليل بس
عِقد : اللي تبغيه سويه حُبي
مشت تطلع لغرفتها ودخلت داخل الحمام ، نزعت ملابسها ودخلت تحت الدش تأخذ شاور ، طلعت بعد مدة تعتبر طويلة وطلعت قطنه ، مشت للمراية تحط مرطبات وماسكات ، ابتسمت تشوف شعرها المبلول وجففته ، وبدأت تصففه بنفسها وحطت ميكب خفيف وناعم ، مشت تنزل بالروب وقالت : كيف ؟
لفّت عِقد لها ونطقت : زيتونتي !! والله خييييال !
مشت تسحب فستان ناعم جدًا وبدون تفاصيل كثيرة ، يتزين باللون الأورنج وأهم وأبرز تفاصيله فتحته من جهة الظهر ، ابتسمت عِقد وقالت : حلوو اللون تعجبيني ينفع للصيف بس حق العصر ولا الليل ؟
اسرار : العصر مع الشمس
ابتسمت عِقد تصفق وتنطق : برافو !
ابتسمت تجلس وتقول : ايوه وش بيصير وش الجدول ؟
عِقد : بيبو كلمتني الصباح وحكتني عن كل حاجه ، أولاً مطلق رفض يصير كتب الكتاب خارج الديرة ووافقوا على طلبو وقالو تمام كتب الكتاب بالمزرعة
اسرار زفرت بغضّب وقالت : يعني فالديرة
عِقد : اقهريهم كُلهم سامعة ؟
ضحكت وقالت : كملي كملي
عِقد : بعدو جاء العريس وقلو يبغى الحفل ضخم لأنو حيجيب حضور من الشرقية وكدا وحجزوا الريتز كارلتون بالرياض
توسعت عيونها بحُب وقالت : الحب ي جاهلينه اخذ لها الريتز كارلتون كامل !
ضحكت عِقد وقالت : تشوفي ؟ وبيبو الخفيفه تقولي اخيرًا قام حظي
ابتسمت اسرار تضحك بخفه ، مشت تطلع لأجل تلبس ، قفلت الباب وراها وسرعان م أختفت ابتسامتها وتذكرت المكان اللي بترجع له بس هالمره مابتكون تنتمي له ورغم الذكريات الجميلة اللي عاشتها تحت ظل عفيفة ومنّير والأيام اللطيفة اللي كان وصال يناديها ببنته طولة عمرها ، عضّت شفايفها وبكت بدون صوت ، دموعها تحرق وجنتيها وشهقاتها تقبض بقلبها بشكل موجع ، هي لطالما كانت غير مرغوبة بهذاك المكان لكن له وقته وله تأثيره عليها ، بترجع وهي غريبة عليه ولا كأنها وقعت وبكت وضحكت ونامت فيه لمدة عقدين كاملين وسنة زود ، ضحكت وسط ألمها ونطقت تحت شهقاتها : إذا بيتي وأهلي وجماعتي غدروا فيني بأبشع الطرق شلون تبيني أمنك ي بِكر نهيّان ؟ إذا اللي قال فيهم الدين ووصانا على وصلهم وأنهم الأولى بالمعروف علينا ؟ كذا يسوون ببنت أخوهم اليتيمة أنت من ؟ يالله صدق أنت من يالرسام بحياتي ووش مبتغاك منها ؟
قامت تمشي وتمسح دموعها بعنّف ، بدأت تجدد مكياجها وتضيف بعض ألوان الأورنج بمختلف درجاته على جفونها تحليها أكثر وأكثر ، حطت آخر لمساتها روج لحمي يناسب ويتناسق مع كل شيء ، عدلت فستانها وأخذت شنطتها ومشت تلبس عبايتها وتنزل ، ابتسمت تشوف عِقد متزينة باللون الفوشي كعادتها وضحكت تقول : فوشي !
عِقد ابتسمت وقالت : أحلى باربي صح ؟
ابتسمت لها اسرار تمشي لها وتضّمها وتنطق : أحلى أم وأخت وصاحبة وصديقة وروح والله أحبك
ابتسمت ابتسامة عريضة وقالت : يالله صدق تعرفي إني مره أحُبِك !
ابتسمت اسرار تمنع دموعها تنزل ونطقت : أعرف
عِقد باست خدها ونطقت : ولا تشكي أبدًا
مشت تطلع وهي ماسكه يد اسرار ، ركبت اسرار تشوف فستان ظبيه بالخلف ، ابتسمت بدهشة من تفاصيله ولفّت من مشت عِقد وقالت : حصل كل شيء بسرعة
عِقد ابتسمت وقالت : حسيت بس نصيب والله يوفقها يارب ويسعدها حبيبي بيبو تستاهل كل خير والله
اسرار : اي والله قسمة ونصيب وامين
لفّت تشوف الطريق قدامهم للمكان المشؤوم بالنسبة لها ، تتمنى لو ما اضطرت ترجع له بس لعيون الظبي تكرم مداين والكل بيتعنى من الرياض ومن الخرج لأجلها ..
~ حيّ الصحافه ، بيت سطّام ~
نزل سلطان يشوف سلمان يضّبط كبك هذام ، مشى لهم وقال : يعيال تكفون متوتر
هذام ابتسم وقال : تصير تصير يوحش
سلمان ضرب راسه ونطق : أهجد يالوحش كل ماضبط الكبك تحرك وعفسه وجع
ضحك سلطان وتألم هذام يناظر سلمان ، لفّوا من أنفتح المصعد وطلع نهيّان يستند على عصاته ومضاوي ماسكه ذراعه اليمنى ، زغرطت بفرحة وقالت : ماشاءالله على عريسنا
ابتسم سلطان يتقدم لهم وباس راس أبوه ولفّ لها يسلم عليها ، ضحكت تبوس خده وتنطق : بسم الله عليك من الحساد
سلطان لفّ لنهيّان من نطق : جعل عيني ماتبكيك ي سمّي أبوي
ابتسم سلطان وقال : جعلني قبلك ي أبوي
سلمان ابتسم وقال : هلا هلا بالطش والرش والزين كله
ضحكت أنفال تعدل حجابها وتنطق : هلا حبيبي
حاوط خصرها وشّدها عليه وقال : فاتني شكلك
ابتسمت وقالت بهمس : لاحق عليه
باس جبينها وقال : مشينا ؟
سلطان : وين سطيّم ؟
هذام : روح شكله غرق بهواجيسه
ضحك سلطان يناديه من عند الدرج ، ونطق وهو بالأعلى : جاي جاي
ضحك وقال : أعجل ابطينا
نهيّان : قلتي لحليمة تمسك الأطفال ؟
مضاوي شّدت على ذراعه ونطقت : ايه ولا يهم..
قاطعها سطّام من نزل ، يلفّ بشته بطريقة مختلفة وتلفت الأنظار ، لبس بشت بني فاتح يختلف عن بقية أخوانه اللي اختاروا الأبيض والمعرس أسود ، ابتسم وقال : مشينا ؟
ابتسمت انفال وقالت : أنت بعد عريس ماشاءالله
ابتسم وقال : لا يعقب سليّط يشبهني بعرسي
ضحكوا كلهم وعبّس سلطان ، ابتسم يضمّه ويمشي معه ، طلعوا كلهم وركبوا الجموس يتجهون لديرة آل يزيد ..
~ فالديرة ، المزرعة ~
العقود متمسكة بأعالي النخل مزينة المنظر ، والوقت على عصيّر والشمس دافئة ، البركة تحفّها الطاولات والكراسي وبمنتصف البركة بلونات تتزين وبوسطها مراية تحمل أسم ظبيه وسلطان تحت لفظ ' عقد قرآن ' مشت تدخل وهي تركض وقالت : مدري ليه كل التجهيزات ذي ؟؟
هديل زفرت بغضّب وقالت : منيرة ! سلوى تحب ظبيه وش تبيني أسوي أوقف بوجهها وهي عجوز ؟؟
منيرة : يمه !
هديل : بس اسكتي بس !
مشت تسنيم تدخل وقالت : الحريم بالمزرعة ؟ والرجال ؟
سلوى وهي واقفة وتشّيك على كل شيء لفّت ونطقت : الرجال فالمجلس وش تبين بهم ؟
تسنيم ابتسمت وقالت : اسأل ي جده وشفيك ؟
سلوى : خلصوني وين الضيافة ؟ ووين ظبيه ؟
وداد مشت تركض وقالت : بشوف ظبيه وانتوا روحوا للضيافة
نهال زفرت بملل وقالت : طيب منيرة تعالي
منيرة ضحكت بسخرية وقالت : والله م أقوم
مشت نهال تسحب تسنيم ومشوا للمدخل لأجل المعازيم ، دخلت وداد ونطقت : ظبيه
طلعت ظبيه من الحمام وهي متوضيه وقالت : نعم ؟
وداد شهقت وقالت : للحين م جهزتي ؟؟؟
ظبيه : وخير ياطير وشفيك مستعجلة
وداد عضّت أصبعها وقالت : يغبية بيوصلون بعد شوي
ظبيه : حياهم الله
وداد زفرت بغضّب وقالت تحت انفاسها : حسايف أن آل عقيل مالقوا الا أنتي واسرار !
رجعت شعرها وراء ظهرها ومشت تدخل ، ظبيه لفّت لها وهي تضبط حجابها وكبرت تصلي ، زفرت بملل وقالت : اذا خلصتي صلاة ناديني
طلعت وشافت صافية تدخل مع الباب وقالت : اصبر ضاحي وداد موجودة
وداد شهقت بأنفعال ونطقت صافية : بشوييش !
وداد نطقت بغضّب : تستهبلين وصال يغار علي
وقفت جوري بصدمة مثل صافية ، مشت تتمخطر بمشيتها وطلعت من البيت ، جوري مسكت بطنها وقالت : يمه بستفرغ
صافية بصدمة نطقت : بعذرك يبنتي
لفّت لضاحي اللي رجع وقال : صافية مطلق مشغول مع الرجال اذا فضى بيجي يسلم عليكم
جوري ابتسمت وقالت : يووه أشتقت له مره
ضاحي : ايه يحيوانه وأنا م أشتقتي لي
ضحكت وقالت : لا للاسف توو شفتك
ضحكت بصوت عالي وشهقت من أنطلق ضاحي يركض وراها ، ضحكت ظبيه تطلع وقالت : هلا والله بوخيتي
مشت صافية تسلم على ظبيه وقالت : عروستنا
ظبيه ابتسمت وقالت : لبيه ؟
صافية كانت بتتكلم بس قاطعتها عِقد وهي تزغرط بأعلى صوتها ، ضحك ضاحي وقال : هلابي بو مطحس
لفّت له بصدمة وقالت : أبعد عني بس
ضحك يطلع وشاف اسرار جايه وقال : ارحبي يبنت محمد ارحبي جعلني م أعدم حسّك
ابتسمت له وقالت : البقى ي أخوي الصغير
ضحك يركض للمجلس ، دخلت وشهقت تقول : صافية !!
لفّت صافية ونطقت : اسراري !
ابتسمت وقالت : ارحبي يروحي ارحبي
تقدمت تضّمها وتسلم عليها وتنطق : البقى يبنت محمد
اسرار ابتسمت وقالت : شخبارك وحشتيني
صافية ابتسمت لها وقالت : والله بخير وأنتي ؟
اسرار : على حالي
عِقد لفّت لها وقالت : بخير زيتونه بخيير
ابتسمت تمسك ذراع عِقد ونطقت : الظبي
ظبيه ضحكت تسلم عليها وتنطق : عروستنا قمر والله قمر
ظبيه ابتسمت بخجل وقالت : يوه خلاص اصلاً مافيه وقت وانتوا فاضين تتغزلون
ضحكت عِقد وقالت : من حقنا بيبو ولا ؟
ظبيه : امشوا ندخل
دخلوا غرفة ظبيه وبدأت عِقد بمهاراتها بالميكب تبدع وتجمل وتبرز ملامح ظبيه ، ابتسمت من أنتهت بغضون وقت قصير ونطقت : خلصنا يعروس تلبسي ؟
قامت ظبيه تشوف فستانها وابتسمت بوسع ثغرها ونطقت : نفس ماطلبت !
عِقد ابتسمت ابتسامة عريضة وقالت : عيب عليكي أنتي طلبتي عِقد
لفّت وباست خدها وقالت : أعنبو حظه اللي بيأخذك ي دودي
ضحكت بخجل وقالت : لا لا
ابتسمت ظبيه وقالت : بلبس ونطلع ؟
اسرار ضبطت شعرها وقالت : أجل بسبقكم أنا وجوري
جوري قامت وقالت : اسرار نكبتيني !
ضحكت اسرار تسحبها ويطلعون ، مشت تشوف الشراع بينهم وبين قسم الرجال ونطقت : جوري اسبقيني
زفرت جوري بتوتر ومشت للمزرعة ، لفّت تمشي للبداية الشراع وشافت السيارات تدخل من البوابة وصوت التراحيب أرتفع ، صدّت بتوتر ونزلت عيونها لصدرها اللي بدأ يرتفع وينزل بتوتر ومشت تركض للمزرعة ..
~ عند الرجال ~
نزل نهيّان ورجاله وراه ونطق : البقى يرجال !
مشى مطلق وابتسم له نهيّان ينطق : ولد مشبب ؟
ابتسم مطلق يسلم على كتفه وينطق : ارحب يبو سلطان زارتنا البركة والله
نهيّان شّد على كتف مطلق وقال : اي والله وعسى ربي ييسر وتتم الأمور بينهم
مطلق ابتسم وقال : امين الله يوفقهم
ألتفت يشوف سطّام واقف مبتسم وقال : عريس ماشاءالله ؟
ضحك سطّام يسلم بالخشوم ونطق : طيب مو أنا عريس فعلاً ؟
ابتسم مطلق وقال : وخر بس
ضحك وابتسم مطلق ينطق : الشيخ أبو رواف
ابتسم سلمان ونطق : الشيخة ماتجي للي مايعرفك يالشيخ
سلموا على بعض ومشى يسلم على هذام ونطق : سلامتك
ابتسم هذام ونطق بتوتر : ضرب المضرب فيني وأنا بالملعب
كتم سلطان ضحكته وقال : ايه سلامتك ي حبيب أخوك
ضحك بصوت عالي من ضربه هذام وقال : يمرحبا ي مطلق
مطلق ضّمه وقال : البقى يعريس البقى
سلطان ابتسم وقال : والله توو عرفت طعم الحياة واستوعبتها من ظبيه وعسى الله يبارك لنا
مطلق توسعت عيونه وقال : اييه لاتمدح واجد وتلحق هذام
ضحك سلطان وقال : الله يقطعك وش سويت ؟
مطلق : أسر أسر
ضحك يدخل ووقف مطلق يكمل مشواره مع الضيفان ..
~ عند الحريم ~
مشت مضاوي وكعبها تجرح من التراب ، زفرت بغضّب وقالت : يقهر مقدر أمشي
انفال ضحكت وقالت : منجد الله يعين
دخلوا ووقفوا لثواني لكن مشت لهم نهال وقالت : مرحبًا ألف
انفال ابتسمت وقالت : هلا هلا
تقدموا يسلمون عليها ومشت تسنيم تبخرهم بالعود الأزرق ونطقت مضاوي : وين نحط عباياتنا ؟
تسنيم : عطوني أخذها
انفال ابتسمت تمد عبايتها ولفّت تشوف الأورنج جايه ، ابتسمت بوسع ثغرها ونطقت : اسرار !
ابتسمت لها وقالت : هلا عيوني ارحبوا توو نورت الحله
مشت تضّمها وتسلم عليها ، لفّت لمضاوي اللي تصنعت الابتسامة بصعوبة وسلمت عليها ، ابتسمت انفال من خطتها اللي نجحت وصارت مضاوي تمشي على السراط المستقيم وتترك منها اللف والدوران ، اسرار مشت معهم وقالت : بس انتوا ؟ غريب وين أم العريس ؟
توسعت عيون انفال بصدمة وقالت : ماتدرين ؟
مضاوي ضحكت بسخرية وقالت : مستحيييل !
اسرار انقبض قلبها لوهلة ، ابتسمت بهدوء وقالت : وش ؟
انفال : زوجة عمي الأولى وأم سطّام متوفية من قريب العشر سنين
جمدت ملامحها وقالت : الله يرحمها بس أنا كنت ببيته قبل فترة وشفته ينادي وحدة بـ أمي ؟
مضاوي : هذي مرضعته وممرضة أمه سابقًا أسمها حليمة
اسرار عضّت شفايفها السُفلية لثواني ونطقت : تقولونه بس شلون رضعته ؟
انفال ابتسمت وقالت : ليش م تسألينه ترا سطّام يحب يتكلم عن ماضيه ولو إنه يوجعه
مضاوي : طولنا واقفين والشمس احرقتني
ضحكت اسرار وقالت : معليش تفضلوا
مشت مضاوي ومعها انفال ، اخذت نفس طويل ورفعت عيونها تشوف وصال واقف ، يكثر ماتتمنى يناديها وتجي قربه اشتاقت له وبالحيل ، توسعت عيونها بهدوء من قال : اسرار ؟
تقدم يمشي لها وغمضت عيونها ، هي تتذكر قبل يوم كان واقف ولا وقف بوجه بتال مع أخته ، رجعت تفتح عيونها من مسك كتفها وقال : وش ذا الزين ؟
ابتسمت تبعد يده عنها ونطقت : صار عادي إنك تلمسني ؟
تبدلت ملامحه للأستغراب ونطق : مو أنتي أختي ؟
دفعته عنها وقالت : وش يضمني أن أمك فعلاً رضعتني ؟؟
ضحك وقال : مو وقتها السوالف ذي
لفّت تشوف عفيفة تتقدم لهم ونطقت : لا بالعكس أفضل وقت وقت كلنا نعرف الحقيقة !
ابتسمت عفيفة وقالت : اسرار ؟
اسرار : لو سمحتي ممكن تعطيني إجابة أخيرة ؟
وصال رفع حاجبة وقال : صبرك يارب !
اسرار لفّت له وقالت : سد حلقك
ضحكت عفيفة وقالت : من أنتي عشان تسكتينه ؟؟
توسعت عيونها بصدمة وقالت : واو !
عفيفة مسكت كتف وصال وقالت : وين وداد ؟
وصال ابتسم وقال : والله مدري يمه أكيد داخل
اسرار شّدت على فستانها ونطقت : م رضعت معه خمس رضعات مشبعه صح ؟
عفيفة ضحكت بسخرية وقالت : لا طبعًا م رضعتي مني نهائيًا
رفعت عيونها لوصال وقالت بدقن راجف : أنتهى ؟
ابتسم يشوف الدموع بعيونها وقال : م يهمني يبنت محمد
لفّت تمشي وتعطيهم ظهرها ، لؤلؤ عيونها يبرق تحت شعاع الشمس ، دخلت المزرعة ومشت تبتعد عنهم كلهم ، صدرها ينزل ويرتفع ويدينها ترجف بشكل مرعب ، كيف قدروا على عفيفة في يوم وليلة ؟ شلون صارت تكلمها ببرود وسخرية ، عضّت شفايفها لثواني تمنع دموعها تنزل ونطقت : يويلك اسرار يويلك تبكين عليهم !
وصلت لأواخر المزرعة ومشت للجلسة الخشبية القديمة ، وقفت على اسوارها الشاهقة تشوف الجبال والوديان تحتها ، الهواء قوي ويلفح وجهها ويلاعب شعرها ، لفّت تستند على الأسوار من وراها وشافته ، شافت الرسام من بعيد من جهة الرجال ، واقف ويسولف مع أحد هي ماتعرفه وخمنت أنه أخوه ، بثوبه وشماغه وبشته وبشكله الوسيم جدًا ، غمضت عيونها لدقايق تحسّ بالرياح وقوتها ، تشبع رئتيها من هواء ربها وتوسع ضيقتها بأدعية هادئة تطمن راحة قلبها ، فتحت عيونها وشافته يناظرها ، تنحنحت بحرج تعدل وقفتها ورجعت شعرها وراء ظهرها ومشت ترجع ..
~ عند سطّام ~
ضحك بسخرية ونطق : هذام بس يالدلوع
هذام : وربي مو قادر أتحمل نظراتهم !
سطّام : أجلس جنب أبوي وانتهينا
زفر هذام بغضّب ومشى يتخطى سطّام ، ابتسم يشرب فنجاله ولفّ بيرجع لكن شّده الأورنج بين الخضار ، هو ميزها علطول من محاجرها ، هي ماهي بعيدة بالحيل ولو هي بعيدة كل البُعد بتكون مميزة بعيونه وبيعرفها علطول ، ابتسم وقال : أورنج ي بِكر محمد ؟ تلعبين معي ولا شنو
عضّ شفايفه من رفعت عيونها تطالعه ، ابتسم يضّبط بشته وضحك من مشت تركض واختفت ، لفّ يدخل للمجلس وجلس جنب سلمان ، وقف أبو بجاد وقال : وش سبب الزيارة ؟
نهيّان رفع حاجبة بأستغراب وقال بهمس : صاحي ذا ؟
سلطان بصدمة نطق : مدري !
استغفر نهيّان ونطق : جايين نخطب بنت مشبب لسلطان ربعه وأصغر سلاطين نهيّان آل عقيل
ابتسم أبو بجاد وقال : ايه ايه كتب الكتاب بيتأجل
وقف مطلق وسحبه ضاحي ونطق بهمس : خله يمطلق خله
مطلق نطق بغضّب : تستهبل ؟؟
ضاحي برعب نطق : والله أنهم مسويين شيء أسكت منهم
قام سلطان يوقف وقال : معليش على السؤال بس ذكرني من أنت ؟ لأن ما أتذكر إنك من الأشخاص المهمين لأجل تتخذ قرار مثل كذا
أبو بجاد ابتسم وقال : إذا أنت سلطان فأنا سلطان محلي وكلمتي ماتنرد الا بأمرك ولبيه وتم ! أنا عمها الكبير وولي آمرها
ضحكوا الرجال كلهم يعززون له ، شّد على قبضته ونطق : ونعم والله بس ليه يتأجل ؟
أبو بجاد : ماقد خذينا الرأي وتعرف الزواج ماهو بلعبه
سلطان لفّ بصدمة على مطلق اللي جالس وقال : درينا إنه ماهو بلعبه بس خذينا الكلام من مطلق ومشينا على كلامه ؟
أبو بجاد ضحك بسخرية وقال : مطلق ورع من يأخذ كلامه ؟
نهيّان وقف على عصاته ونطق : الشعر مالي وجهه شلون تقوله ورع ماتستحي أنت ؟
أبو بجاد : لا يكثر الهرج ! رديناكم خايبين كتب الكتاب فالقصر وانتهينا
سطّام وقف وقال : لعبة هي ؟ توافقون وتعطون كلامكم للرجال ولامنه جاء الموعد انسحبتوا ؟؟
أبو بجاد وقف وقال : تبون المشاكل انتوا ؟ قلنا تأجل ماعطيناكم رفض
سلمان وقف ونطق بحدة : وش يضمنا ماترفضون ؟ القصر بيجمع كل عربنا وناسنا وأهلنا وماخذينه لأجل الحفل ماهو كتب الكتاب ي سلطان قومك !
نهيّان : بتصير الشوفة الحين وكتب الكتاب
أبو بجاد نطق بحدة وقال : بدا
سطّام لفّ لمطلق وقال : أبو مشبب ؟
وقف مطلق ونطق : مابيحصل الا اللي يطيب خاطركم
نهيّان لفّ له ونطق بحدة : مانبي منكم طيبة خاطر عطونا البنت لولدنا على سنة الله ورسوله !
مطلق : يرجال الشيطان شاطر استهدوا بالله
سلمان نطق بغضّب : لعبة وتحدي السالفة ولا شنو ؟؟
أبو بتال نطق بسخرية : اصلاً سلومنا وعاداتنا البنت مالها الا ولد عمها
ضحك سلمان يجلس وقال : حلو بدينا
سطّام تقدم ينتصف المجالس الضخمة ونطق : وش قلت ؟
أبو بجاد ابتسم وقال : وأخوي نايف صادق البنت ماتروح لغريب
سطّام رفع دبلته وقال : أنا مآخذ بنتكم طيب
أنتفض المجلس كله ووقفوا الرجال ، ابتسم وقال : يشيخ الحين قمتوا ؟ تبونها بعناد فـ أنا ي سطّام بِكر نهيّان بن سلطان آل عقيل زوج اسرار بنت محمد بنت حمد آل يزيد
أبو بجاد نطق بصدمة : وش تقول أنت ؟؟
سطّام نطق بجدية وقال : أقول والله أن تتحاسب على فعلتك فيها وهي على ذمة رجال مايخشى الرخوم والله أن تأخذ حقها منك دام راسي يشم الهواء !
نهيّان ابتسم بفخر واعتزاز في بِكره ونطق : ونعم يبو نهيّان ونعم !
ابتسم سطّام وقال : والحين أعقلوا قبل يصير شيء مايطيب خاطركم
جلسوا كلهم الا بجاد اللي ظل واقف بصدمة ، هي شلون صارت حَرم سطّام بدون صوت وبدون همس ولا حتى حسّ ، نطق بصدمة يشوفه قدامه والدبلة بيده : كيف تزوجتها ؟
سطّام رفع حاجبة وقال : ذكرني من أنت عشان المره الجايه أحرص على إني أخذ رأيك ؟
بجاد : مستحيل مستحيل !
سلمان : رسولنا وديننا قال عادي الشخص يقضي حوائج حياته بالكتمان ولا ي ولد السلطان ؟
ضحك هذام بصوت عالي وقال : الله يقطعك ي سلمان علقت على سالفة سلطان
أبو بجاد استحقر سلمان ونطق بحدة : ورني كرت العائلة
ابتسم سطّام وهو جالس وقال : أمرك تعال
سلمان : وشفيك قوله ي سلطان قومك عشان يجيك
ضحك سلطان وهذام واكتفى سطّام بأبتسامة سخرية على ملامحه وطلع محفظته وسحب الكرت ووقف بتال يمشي له وقرأ أسمها تحت أسمه ، وزادت لواهيب صدره ، هي خذت بِكر نهيّان وماعاد هي تحت سيطرته ، هي صارت وراء ظهر رجال بطول وعرض وعزوة وراه أب وأخوان ماتركوه ، هي صارت تحت ظل وأمان آل نهيّان بن سلطان من بعد الله ، هي تخلت عن كل شيء هنا وبعد نظراتها عرف إنها ناوية شر وحرب وجروح ومعارك فالقريب ، نظراتها كانت تبعث الرعب بقلب بتال لأنها تذكره بنظرات محمد المرعبة بزمانه ، وكأنها تجسد روح محمد بعد سنين طويلة ، رجع بخطواته ونطق : بيتم الزواج ي نهيّان بس كلامي ماينرد وكتب الكتاب بالقصر
نهيّان ابتسم وقال : اذا سمحتوا بنروح نشوف بنتنا
وقف يمسك سلطان ومشوا مع مطلق ، وقف ضاحي يسحب خنجره ويركض فالمجالس وهو يرقص ويقزوع فالسماء ، سحب شماغه يرميه فالسماء وضحكوا سلمان وسطّام وهذام ووقفوا يصفون لأجله ، ابتسم لهم وسحب نايف ولد بتال وقام يرقص معه وصرخ من رفع حمد يده وصار يتمايل بها ، ضحك وغمز له وابتسم حمد بخفه يصدّ منه لأجل ماينفضح من استهبال ضاحي ، تقدم ضاحي يسلم على عيال نهيّان وقال : هلا بالأنساب
جلس جنبهم وقال : بروح معكم الجبيّل تكفون
ضحك سطّام يصدّ وقال ضاحي : وش رفضتوني ؟؟ أصبروا أبرر طيب
سطّام لفّ عليه وقال : مين رفضك ؟
ضاحي : أنت لفيت وجهك مني
سطّام : ايه لأني ساكن بالرياض
ضاحي ابتسم وقال : يوه ياللعب كل واحد في مدينة ؟ هلابي يالنشاما !
ضحك سلمان ونطق : ضاحي أعقل
ضاحي سكت وقال : المعذرة بقوم أشوف العريس والعروس
هذام ابتسم وقال : صور لي إبي أشوف
لفّ له وقال بحدة : أعقب !
ضحكوا وابتسم ضاحي يجلس بجانبهم ..
~ بيت مطلق ~
ضرب الباب ومشت صافية تفتحه ، دخل وابتسم ينطق : ي مرحبا يالعوده !
ابتسمت تحاوط أخوها وتنطق : البقى يالعضيد والسند
ابتسم مطلق يبوس راسها ونطق : وين الظبي ؟
صافية : ادخلوا فالمجلس
مشت تطلع من الباب الخلفي وألتفت مطلق لنهيّان وسلطان بجانبه ونطق : اقلطوا
ابتسم نهيّان يدخل ونطق : بسم الله على بركة الله وين بنتي ؟
ابتسم مطلق وقال : فالمجلس على يسارك
دخلوا ووقفت ظبيه وهي ترجف من التوتر ، ابتسم بوسع ثغره ونطق : بسم الله تبارك الرحمن صدقوا يوم سموك ظبيه !
ابتسمت بخجل من كلام نهيّان ، دخل سلطان ووقف بصدمة يتأملها ، كيف الجمال ذا كله سكنها ، كيف كانت بجانبه ولا حسّ بمنبع الجمال يتفجر منها ، عيون عسلية وساع وشعر أسود كثيف وطويل ، ملامح وجه ناعمة وتسُر الناظر ، جسد متناسق وخصر مزوي ، كاملة والكامل خالقها ، مشى يدخل ونطق : سبحانه اللي سواك
نبض قلبها بتسارع غير عن العادة ، وزادت رجفتها من جلس بجانبها وجلست ، ابتسم نهيّان من كمية التناسق واخيرًا بيفرح بولده ، جلس بجانب مطلق ونطق : بنتي
نطقت بتوتر : سمّ ؟
نهيّان : موافقه يكون سلطان زوجك وشريك حياتك وسندك وموافقه أكون لك أب وظهر تشّدين نفسك فيه ؟
ابتسمت ظبيه وقالت : موافقه وأنا مع شور مطلق أخوي ودام راس مطلق حي ماحتجنا لأحد
ابتسم نهيّان ونطق : والله ونعم الأخ وونعم الأخت عسى الله يمدكم بالصحة والعافية
مطلق ابتسم وقال : امين
سلطان ابتسم وقال : أبوي شوي تعطونا وقت ؟
قام مطلق وقال : لا تباطى وتفلها
ضحك سلطان ومشى نهيّان مع مطلق يطلعون ، لفّ لظبيه ونطق : الحلاوة ذي كانت تداوم معي ؟
كسى اللون الأحمر ملامحها ولفّت له بصدمة ، ابتسم يشوف خجلها واضح له ونطق : استعجلت فالزواج بس أنا جاهز ومستحيل أندم على استعجالي وفترة وتتعرفين علي زين وأتعرف عليك ولا ؟
ظبيه نطقت وهي متمسكة بكفوفها : أكيد
سلطان ابتسم وقال : تعرفين وش جاب راسي ؟
رفعت عيونها له وقالت : وش ؟
سلطان ابتسم بوسع ثغره وقال : زيلامسي
ضحكت بصدمة وقالت : مستحيل !!
سلطان : والله شوفيني أحلف إن كانها تمت بيننا على خير شهر العسل كله فالنمسا
ظبيه ابتسمت وقالت : مستحيل تنسى صح ؟
سلطان توسعت عيونه بصدمة يشوفها قدامه خجولة ونطق : تكفين ي أخت مطلق إذا ضايقتك قولي والله معاد تتكرر بس قلت لك والله م أقصد شيء
لفّت وقربت منه من غير قصد منها وبدون إحساس ونطقت بهدوء : سلطان بشويش م قلت شيء !
وقف يتأمل ملامحها وقربها منه ونطق : أول مره أسمع أسمي بطريقة مُلفته وجذابة تكفين أنا داخلٍ على الله ثم عليك م تحرميني من دعاك لي
أبعدت بسرعتها وصدّت ، ابتسم يوقف وقال : بنكتب كتابنا الليلة بأذن الواحد الاحد وبتجين معي لبيتي
ضحكت وقالت : جيت قبل كتب الكتاب
ضحك وقال : لا هذاك بيت سطّام
رفعت عيونها له وقالت : عندك بيت ؟
سلطان : افااااا تقولين كذا لسلطان نهيّان ؟
وقفت وقالت بابتسامة : على خير يارب
سلطان : ودي اسلم عليك بس مايحل لي
ظبيه : مستعجل ؟
سلطان نطق بجدية : حييل
نزلت عيونها ومشى يطلع ، اخذت نفس وتوسعت عيونها بصدمة من دخلوا البنات وصرخوا بحماس ، ضحكت بصدمة وقالت : طيرتوا عقلي !
عِقد : قولي قولي اش صار بينكم ؟؟
صافية : اصبروا اصبروا ندخل الغرفة
ظبيه ابتسمت وقالت : ايه مافيه وقت
عِقد توسعت عيونها وقالت : صار لك ساعة تقولي مافيه وقت ليش مستعجلة لهالدرجه بيبو حلو ؟
ضحكت بصدمة وقالت : حيوانه دودي !!
جوري دخلت وقالت : يمه وين خالي مطلق ؟
صافية : برا
مشت تطلع ونطقت : ي خال !
لفّ مطلق لها وقال : ارحبي !!
ضحكت تركض له ورفعها لحضّنه ، حاوطته ونزلت دموعها بشوق وقالت : مره أشتقت لك مررره
ضحك وقال : يالبى عيونك لا تبكين ي جوريتي
نزلها ونطقت وهي ماسكة يديه : معاد أبي أرجع والله ي خال تعبت أبيك وأبي أسكن عندك
نزل مطلق يتساوى بطولها وقال : ليه عسى م شر ؟
هزت راسها برفض وهي تبكي ، توسعت عيونه وقال : بنت !
سحبته تضّمه وحاوط ظهرها ينطق : تكلمي والله إن تسكنين عندي وبين عيوني وداخل ضلوعي
شًدت عليه وقالت : علي
توسعت عيونه بصدمة وارتخت يدينه وهمس بصدمة : عمك
هزت راسها بنعم وقالت ببكي : ايه ايه
مشى مطلق فيها وبكت تقول : لا لا ي خال أمي ماتدري
مطلق لفّ لها ونطق : اسكتي أنا بتفاهم معها !
عضّت شفايفها وبكت بدون صوت ، صرخ بصوته وقال : يولد
فزّت عِقد اللي كانت على جوالها فالصالة ونطقت برعب : اش صاير عندكم ليش تصارخو !!
ارتخى من سمع صوتها وفي بيته ، ي كم يتمنى لو تسكن بيته مثل م سكنت قلبه ، ي كم تشتهي مسامعه لصوتها وهو يدوي في داره مثل م صوتها ساكن صدره ، ابتسم وقال : بدخل
مشت عِقد تقفل عليها باب المجلس ونطقت : أدخل
دخل مطلق ينادي صافية وطلعت له مستعجلة وقالت : لبيه
مطلق : جوري بتجلس عندي
صافية : طيب ؟
مطلق ابتسم وقال : للأبد
صافية توسعت عيونها وقالت : بنت ! وشفيه على خالك لا تزعجينه
مطلق لفّ يبوس راس جوري ونطق : بشتحن على صوت البنيات إذا راح الظبي وأبيها عندي
صافية : مطلق ومدرستها وصديقاتها ؟
مطلق : تنقل عندي
صافية هزت راسها بنفي وقالت : وش السبب ؟
مطلق : عندكم واحد..
قاطعته من بكت وقالت : لا ي خالي لا
صافية سحبتها ونطقت : تكلمي !!
مطلق : علي تحرش فيها
وقفت بصدمة وطاحت ذراعها من بنتها ، أختل توازنها ومسكها مطلق ينطق : أذكري الله يالعوده
صافية عضّت شفايفها لثواني ونطقت : مستحيل ليه ماقلتي
جوري ضمّت أمها وبكت تقول : أبوي مستحيل يصدق في أخوه
صافية نطقت بحدة : وش دخل أبوك بهينه هو وأخوه !
مطلق ابتسم وقال : حي ي بِكر مشبب
صافية : بنرجع كلنا وبدخل أصابعي أنا وأبوك بعيونه وتشوفين
جوري ابتسمت وقالت : والله ؟
صافية : ورب الكعبة م يسلم مني
مطلق : وإن كان احتجتوا شيء عطوني رنه
ضحكت صافية وقالت : لا مانبي تصير مجزره هناك
مطلق ابتسم يضبط شماغه ونطق : أنا ماشي للرجال
جوري هزت راسها ومشى يبوس خدها ويطلع ، لفّ لباب المجلس وشاف الأنوار شغله ، زفر بغضّب وقال : يبون الكهرب يخلص !
فتح الباب وضرب بظهرها ونطقت : اوتش !
رجع خطوتين وهو م لمح الا طرف ثوبها الفوشي ، اخذ نفس ونطق : بنت الحجاز ؟
وقفت تنفض فستانها وقالت : ايوه يالخايس اش تبى ؟
ابتسم من استوعب انه ماقالها وش صار بأسرار ونطق : افا
عِقد نطقت بغضّب : وبعدين سِت المُدن غير عن الحجاز وقف تقولي بنت الحجاز أنا بنت سِت المُدن !
زفر ونطق : يطول الأسم وش أسم الوالد ؟
عِقد عبّست ونطقت : أيمن
عضّ شفايفه ونطق : ونعم يبنت أيمن
عِقد : اش أرد ؟
ضحك ينسف شماغه وينطق : اللي ودك راضي به
مشى يطلع ونطقت بهمس : شكرًا ؟
م وصلها رد ومشت تطلع وم شافته ، زفرت بغضّب وقالت : ليش راح ؟
مشت تركض ودخلت غرفة ظبيه ..
~ عند مجالس الرجال ~
رجع سلطان ونهيّان معه ودخلوا للمجالس ، قاموا الكل لهم ونطق أبو بجاد : اتفقنا ؟
نهيّان رفع حاجبة وقال : اتفقت أنا وبنتي وش موقعك بالإعراب أنت ؟
غص ضاحي بالقهوة يضحك ، انفجر هذام جنبه ومال عليه يضحكون ، مشى سلطان مبتسم وقال : حمدلله مشت الأمور وكتب الكتاب فالليل مشينا ؟
نهيّان : ضروري نمشي كل آل عقيل بيوصلون بعد ساعة
سطّام وقف يرتب بشته ويعلقه بذراعه وينطق : اي والله مشينا
سلمان وقف ومشوا يطلعون ، وبالنسبة لأبو بجاد انلجم ولا قدر ينطق بحرف ثاني ، مشوا يركبون السيارات ونطق سطّام : بشوف زوجتي وأجيكم
وقف نهيّان قبل يركب ونطق : أجي معك ؟
ابتسم سطّام وقال : بخاطرك تشوفها ي أبوي ؟
ابتسم نهيّان له وهز راسه بنعم ، كم يتمنى يكون بين حشود وزحمة ناس لأجل يقوله سطّام ' أبوي ' وهو مايقولها الا لما يكون بين زحمة وناس ولو أنه ماحولهم أحد مايحب يوضح كيف علاقته بأهله ، مشى نهيّان وسطّام معه ووقف مطلق يطالعهم وقال : لبيه ؟
سطّام : أبي أشوف حَرمي
مطلق : على خشمي خلني أشوف لك وينها
مشى يدخل ونطق : جودي تعالي
مشت جودي بهدوء له ونطقت : خالو
ابتسم يضمّها وينطق : يعيونه روحي شوفي وين اسرار
هزت راسها بنعم وقالت : تمام
مشت ووقف مطلق ينتظرها ، كان خلف النخل واقف لأجل مايلمح أحد ، بس لمح طرف الفوشي ونطق : ارحبي ارحب..
وقف بصدمة من شاف ابتسامة تسنيم له وقالت : أنت اللي ارحب يدهر القلب ورجعانه
كان يحسّ بدمه واقف ووجهه جامد ، هي تعمدت تلبس نفس عِقد لما سمعت بالليلة الماضية حديث مطلق وضاحي مع الشباك ، ابتسمت له وهو واقف عجزان حتى يصدّ ، وبالنسبة لعِقد كانت جايه تسأل تسنيم عن عبايات حَرم آل عقيل ووقفت بصدمة من سمعت كل شيء ، هي تحلم ولا اللي صار قدامها واقع ومطلق رحب بتسنيم ، دار برأسها مية وستين ألف سؤال ويتصدرها ' وش يدور بينهم ' عضّت شفايفها تمنع دموع غضبّها وغيرتها من غير سبب تنزل ، شّدت ع قبضتها ونطقت بصوتها الغنوج اللي يلعب بمطلق لعب : تسنيم حياتي وين عبايات البنات..
وقفت بصدمة وقالت : اوه سوري قاطعت حاجه ؟
تسنيم ابتسمت ابتسامة عريضة وقالت : ايوه مع الأسف
صرت ع اسنانها وابتسمت بحدة تنطق : معليش يالحبايب بس تعالي ضروري
تسنيم لفّت لمطلق ونطقت : شوي وأجيك
كانت عينه عليها ، لاحظ تقلبات ملامحها بكل مره تنطق تسنيم بكلمة ، هز راسه بنفي ونطق تحت انفاسه : اعنبوها لا تغار وهي ماتدري محد ملئ عيني غيرها ! تغار علي منهم ومحد منهم قرب لقلبي وسكنه غيرها ! تغار وهي الثابته بينهم ؟؟
نزل عيونه من جات جودي ونطقت : خالو اسرار مشغولة
هز راسه بنعم وهو مايدري وين عقله ، شلون تغار ؟ مستحيل تحبه ، لكنه يدري محد يغار الا الحبيب ولحد يرضى قرب حبيبه من أنثى ثانيه ، عضّ شفايفه يطلع ولفّ سطّام ونطق : علامك ابطيت ؟
مطلق نطق بعدم شعور : مشغولة
سطّام : كيف مشغولة ؟
مطلق رفع راسه وقال : مدري قلت لهم ينادونها وقالوا لي كذا
نهيّان مسك ذراع سطّام ونطق : لا تضغط عليها بتقابلها بالحفل
سطّام : المعذرة ي أبوي بس حرام مايفوتني الأورنج وعلى الغروب بعد !
مشى ونطق : شوف لي طريق
توسعت عيونه بصدمة وقال : تستهبل سطّام ؟ حريمنا داخل
سطّام نطق بحدة : منعمي اعنبو غيركم عيوني ماتشوف غيرها بشر !
مطلق اخذ نفس وقال : امش
دخل سطّام يشوف انفال ومضاوي بعباياتهم ونطق : وين اسرار ؟
انفال ابتسمت ابتسامة عريضة وقالت : داخل
سطّام مشى لهم وقال : أطلعوا لأبوي برا
مضاوي مشت ومشت وراها انفال ، كان مطلق صاد بعيونه ومن مشوا نطق بصوته : يولد وين بنت محمد
وقفت اسرار تمشي ونطقت : ايوه ؟
ابتسم ونطق مطلق : تعالي هنا بطلع وكلميني من عند الباب
ميّلت راسها بأستغراب ونطقت : كلمني طيب
مارد مطلق يطلع وزفرت بملل ، مشت ووقفت من شافته واقف وبشته على ذراعه ، طوله وعرضه بالثوب مستحيل ، تقدم وقال : بِكر محمد ؟
اخذت نفس تمشي له ونطقت : الرسام
ابتسم يقرب لها ويسلم عليها ، سلمت عليه خدادي ونطقت : بغيت شيء ؟
سطّام ابتسم وقال : بغيتك
اسرار : بأيش ؟
سطّام انحنى يقبل خدها وهمس : بكل شيء فيك
وقف شعر جسدها بصدمة ، ولفّت من سمعت صوت وسحبته تركض معه داخل المزرعة ، ابتسم وقال : بالهون ي بِكر محمد بالهون !
وقفت من توسطوا غابة جدانها ، تحت أشجار الصفصاف والأوكتوليا والنخل وأشجار السدر ، لفّت عليه ونطقت : لا تصعبها علي ي بِكر نهيّان
سطّام سحبها من خصرها وشّدها عليه وقال : أنتي اللي لا تصعبين الأمور علي وارفقي بحالي جايك وأنا مهزوم لك وخاسر الكثير لأجل عيونك ولا بطالبك بحاجه بس اكسبيني بصفك بدال ماتخسريني
ثبتت يدينها على صدره ونطقت : بِكر نهيّان أنا م أبيك
دفعته عنها ورجع يتمسك بذراعها وينطق : بِكر نهيّان يبيك ي بِكر محمد يبيك زوجة ويبيك حبيبة ويبيك شريكة حياته البائسه تزيدينها بهجة
حاوطها وقرب لأذنها يهمس : يبيك أم له يجرب معك شعور الحنيّة والحنين والعاطفة بكل السنين أم لذريته بنات وبنين وعشرة زوجة طول العمر بِكر نهيّان تخلى عن كل شيء مقابلك أنتي انتصار لكل هزيمة أنتي اللي أراهن عليك ولا أخسر م حيّيت ، لا تهدين حيلي وتتركين طريقي وتهجرين هواجيسي !
عضّت شفايفها وبكت بدون صوت ، انحنى لها وقال : ضميني ضميني ي بِكر محمد
هزت راسها بالنفي مرارًا وتكرارًا ، زفر بضيق ونطق : فهميني غموضك واحكي لي حكايتك وعيشي معي حياتك ونفك أسرارك مع بعض
شهقت تبكي وأبعدت منه تقول : أنا اللي تخلى عني كل بشر قريب مني أنا هجروني وتركوني لوحدي أنا مابقى شخص واحد بصفي أنا انغدرت من منهم أقرب لدمي شلون أضمنك يالغريب وأرتمي بأحضانك وأنت م أنت لي قريب ؟ شلون يرتاح لي بال بقربك ي بِكر نهيّان
مشى لها ينطق : اضمنيني بصفك ووالله م أخذلك
هزت راسها بنفي وقالت : أنا رميت دبلتك بأسفل الوادي لأني م أنتمي لدرب من دروبك تركتك وخذلتك مرتين ولا أشعر بالأسف عليها لأنك م تهمني ! أنا وأنت مثل الشروق والمغيب والقمر والشمس والشتاء والصيف أنا بنت البر وأنت ولد الساحل وبيننا البين وضاد التضاد أنا وأنت مستحيل ! أنسى وأنساني أنا م أحتاج لدرع يساندني بمعاركي لطالما كنت سند وقوة لنفسي أنا م أبيك اتركني ي بِكر نهيّان !
سحب يدها يتأكد وحسّ بكسرة كبيرة من شاف يدها بدون دبلته ، زفر بضيق وقال : بحاولك وبمشي بدروبك ولو إن الشوك يملأها ! بس لا ترديني كذا والدبلة غيرها مليون بس لا تقفلين الدروب وتسكرين البيبان بوجهي أنا في وجه الله ي بنت محمد
سحبت يدها منه وقالت : لا تضغط علي..
قاطعها سطّام ونطق : بضغط عليك لحّد م تنفجرين بحضّني بحتويك وبسمعك ! بِكر محمد أنتي محتاجه لشخص يسمع لك وأنا مستعد أكون معك ليش خايفه ؟
سحبها يقربها ونطق : ليش خايفه مني ؟
عضّت شفايفها السُفلية لثواني تمنع دموعها تنزل ، هي تخافه وتخاف غدره تجي بعد محبة ومعزة ، ودها تفك كل دروبها له وتمشي معه وتنهار وتتخلى عن الضغوطات معه وتشاركه كل هم هّد حيلها ، لكنها تصعب عليها وجدًا بعد غدر أهلها وأصحاب حياتها وشلون تأمن ، م سمع منها رد وقرب لها يلفها داخل بشته وينطق : ضميني وبالهون على نفسك ضميني ولا تخافين على روحك معي والله م يمسك شيء ضميني لا تخافين
رفعت عيونها له ورفعت ذراعيها ، لكنها سرعان م فزّت وطاح بشته على الأرض من نطقت منيرة : وش قاعد يصير ؟؟
أبعدت عنه ومشت تركض تبعد من المكان ، شّد على بشته يرفعه من الأرض وصدّ يمشي تارك المكان لكنه وقف من نطق منيرة : وش تسوي هنا معها ؟
كتم غضبّه ومشى يطلع ، هو مستحيل يلتفت ويكلم أنثى غيرها ، مشى يلحق على اسرار لأجل تروح معه ، هو دخلت براسه فكرة أنهم يتجهزون لكتب الكتاب سوا ببيته ، مشى يشوفها واقفه وعبايتها معها ونطق : بِكر محمد الحقيني
لفّت تشوفه يمشي ونطقت : وين ؟
سطّام : تعرفين وش بسوي لو م تجين صح ؟
توسعت عيونها وقالت : مو صاحي !
لفّت لعِقد اللي ساكته وسرحانه ونطقت : دودي أنا ماشيه
رفعت عيونها لها وقالت : كيف ؟
اسرار : من التهديد عرفت إنه يبي يأخذني معه
عِقد ابتسمت وقالت : الله ! روحي روحي
ابتسمت اسرار تبوس خدها وتمشي ، قامت عِقد ونطقت تحت انفاسها : الرخيصة كانت لابسه مثلي بالزبط ! هل ممكن يكون لخبط بيني وبينها ؟
ضحكت تمشي وحطت حجابها على راسها وطلعت ، مشت لسيارتها ووقفت من شافته عندها ، قربت ونطقت : مطلق ؟
مطلق وقف وقال : بنت أيمن
ابتسمت وقالت : تعودت على الأسم أشوف ؟
مشت بجانبه بتركب لكن جسده منعها لأنه واقف قدامها ، وقفت ونطقت : ما معايا وقت اتكلم ازا تبى حاجه ؟
وقف مطلق ينفض ثوبه ونطق : ببرر لك اللي حصل
ابتسمت وقالت : م يحتاج صراحة لا تتعب نفسك
مطلق : مابه تعب غير ماودي تروحين وأنتي ببالك حاجه غير عن اللي حصلت
عِقد : اوكيه مطلق حقولك اش شافت عيوني واش فهمت من اللي صار ، البنت لبست نفس فستاني بس من الطرف لأنو بدري عليها تجيب نفسو صراحة وأنت حسبت إني اللي كنت جايه ورحبت لأنك تحب تستهبل معايا وتضحك وشخصيتك هي كدا معايا بس لأنو أشوفك معاهم الصلب والثقيل ومدري ايش
ابتسم لأنها م شالت على نفسها لكن خاف ، خاف تكون ماغارت ويكون كله وهم هو أوهم نفسه وعاش فيه ، اخذ نفس وقال : ملامحك تغيرت وقتها
عِقد ابتسمت وقالت : ايوه لأنو الرخيصة هدي رمت أغراضي وشنطتي الصغيرة وهيا متعمدة ولما كنت جايه اخاصمها قالوا لي البنات يبغو عباياتهم وكنت جايه معصبة ولما شفتك صراحة استحيت أقولها حاجه او حتى أرفع صوتي بس لما انفردت فيها أعطيتها درس بشكل محترم وكويس كيف م تلعب معايا ولا ماهمني اللي صار ابدًا !!
كان مستمتع وبالحيل بسوالفها وده أنها م تسكت ابدًا ، ابتسم لها وقال : وأنا حسبت اللي حاصل قد هو غيره ومدري وش طلع الموضوع كذا
ضحكت وقالت : ليش تبغاني أغار عليك ؟
مطلق : ودي تتطمنين أن مهما لمحتي بجانبي أنثى غيرك أني ماني بصوبها وأن محد غيرك يبنت أيمن مستوطنه ضلوعي
عِقد ابتسمت وقالت : الغيرة تقتل المشاعر وتدفن الحُب م أنصح فيها
مطلق : والغيرة م جات الا دليلٍ على الحُب وأنا رجال ربيت على الغيرة يبنت أيمن
عِقد : مشكلتك صراحة بس أنا م أحُبَها
مطلق توسعت عيونه ، هي شلون مافهمت من تلميحاته إنه يحبها ، عضّ شفايفه ونطق : وش سالفتك يبنت أيمن فاهمة علي وتستغبين ولا مابعد وصلك الأرسال !
عِقد ميّلت شفايفها السُفلية لثواني ونطقت : فاهمه بس م أبغى..
سكتت تأخذ نفس ونطق مطلق : م تبغين بدوي ؟
عِقد : صراحة ايوه لأنو كنت أبني أحلامي على شخص ومادري اش أسوي فيك
مطلق نطق وهو يحسّ بالحرارة بجسده : منهو ؟
عِقد : مو مهم ومو لازم تعرفو اصلاً ما أعرف ازا يبادلني ولا لا
شّد ع قبضته ونطق : تحبينه ؟
عِقد : ايوه أحُبو
مطلق صدّ بعيونه ونطق : هنيا له
عِقد : ماتزعل مني وعادي ازا تبى تشوف حياتك مع..
قاطعها من لفّ عليها ونطق : مابي الحياة بدونك تمشي ولا أبي أعد الأيام وأنتي بعيدة ولا أرضى بحياة ما أنتي فيها !
عِقد : مطلق !
مطلق نطق بصعوبة : أثر المحبة يبنت أيمن باين على وجهي وراعي الهوى مفضوح أمره !
عِقد : يالله مطلق..
قاطعها يكمل ونطق : أخفيت عن العالم هواك من غيرة لأجل محد يشاركك فيني وبلحظه كشفوني لأنهم شافوك بعيوني أنا عند هواك مفضوح كل م جلست وسجيت لقيتك جنبي ماتفارقيني ولا ترحلين عن بالي ! ومهما وضح لك أني م أحبك فأنا والله أحبك كل م أصحبت وليّا مني أمسيت أحبك صبح وعشية ! ووقت وصفتي نفسك بالبحر وأنا يبنت أيمن أغوص فيك وأغرق ببحرك ولا بطلب نجاة لأني غرقت وأنقضى امري ، لا ترديني بدونك والله صعب أعيش
اخذت نفس طويل ، هو هز كيانها بجمال حروفه وعذب كلامه ، رفعت يدها ولأول مره تمسك مطلق فيها ، أنتفض من مسكت كفوفه ونطقت : أنا أخاف من مجتمعك وأخاف اخسرك منهم أنت عايش جوا كمية حقد وحسد وكره تعورني لما أشوفها خايفه أبتدي معاك وأخسرك نفس م خسرت شخص يسكن عندكم
شابك يدينه بيدينها ونطق بقربها : والله مايمسك شيء مني ووالله وأنتي معي محد يقرب لك ويأذيك
عِقد عبّست بملامحها ونطقت : مطلق
مطلق : لبيه يعيون مطلق لبيه ياللي ماغيرك أحدٍ ألبي له !
عضّت شفايفها ونطقت : خلاص تمام
استهل وجهه ونطق : وافقتي على حبي ولو إنك م تحبيني ؟
عِقد هزت راسها بنعم وابتسم ينطق : يجعلني م أبكيك يبنت أيمن
سحب يده منها ونطق : أيام وأن طالت للشهور ماهو بيدي لكن بشتغل على نفسي وأقرب لك من الشيخ أيمن
ضحكت وقالت : عاد بابا مايرضى بالقليل
مطلق : أحرق الرياض كلها لعيونه..
تنحنح ونطق : قصدي لعيون بنته
ضحكت عِقد تتأمله وقالت : أنت خيال تدري ولا لا ؟
مطلق : أدري مامني أثنين
ابتسمت وقالت : أحُب ثقتك بنفسك
مطلق : عقبال ما تحوبيني
توسعت عيونها من ضحك على لهجتها وقالت : اوكييه استاز مطلق أحلم تسمعها
مطلق : يبنت الحلال استهدي بالله والله إني طايح قدام منطوقك الحجازي والله ماعمري سمعت حجازي الا منك وعجزت اتلزم وأمسك عمري ، من وقت ماسمعتك تبكين جعل من بكاك الوجع وأنا غارقٍ لك وفيك ولتفاصيلك !
عِقد ابتسمت وقالت : طولنا ي مطلق ؟
مطلق : والله ود مطلق إنها تطول ولا تفارقين عيونه لكن أمري لله
عِقد ابتسمت ابتسامة عريضة وقالت : أشوفك فالحفل ؟
مطلق : تكفين لا تحرميني شوفك أنا والله م أرضى عليك الرذيلة بس قلبي رهيف ولا يقوى بعدك
عِقد : اشبك عادي الكل يشوفني ترا
مطلق : هذا اللي حاسرٍ قلبي
عِقد : اسم الله على قلبك أنا ماشيه أنتبه لنفسك
مطلق ابتسم وقال : يويل قلبك ي مطلق
ركبت سيارتها وتكى عليها ، سحبت شماغه ورمته بحضّنها ونطقت : عجبني
عضّ شفايفه من عفست شعره وطاح عقاله عندها ، ابتسم وقال : جاهي عندك يبنت أيمن
شالت عقاله وقالت : فينو ؟
ضحك وقال : عقالي
رفعت نفسها له ومسكت شعره ترجع ترتبه ولبسته طاقيته وحطت عقاله عليها ونطقت : كويس صح ؟
مطلق : أحبك
ابتسمت وقالت : أنا كمان أحُبَني
ضحك وقال : شماغي ؟
عِقد : اتركو معايا ابغاه
مطلق ابتسم يرجع لوراء ونطق : يليتني شماغ بس عشان تقولين لي ابغاك
مشت ترجع بسيارتها وهي تضحك ، صدّ من طلعت وفتح ازرار ثوبه ، هو أفصح بمشاعره لها وبالفصيح نطق ' أحبك ' ولا رفضته وهالشيء خلاه بأسعد فترات حياته ..
~ سيارة سطّام ~
مشت توقف وتحاول تلمح سيارته ، ضرب هورن لها ولفّت له تمشي فتحت الباب ونطقت : مدري وش ناوي تسوي ي بِكر نهيّان
سطّام حط ذراعه وراها وألتفت يرجع بالسيارة ونطق : بنكمل اللي تركناه ناقص
فهمت مقصده وأنه يبيها تضّمه وصدّت عنه ، مشى يتوسط الخط متجه للرياض تحديدًا شقته بعيدًا عن أهله
'
انتهى البارت ادعموني بنجمة وكومنت عشان اتحفز اكملكم 🩵
" دلع دلع وين تلاقون مثلي ؟ عطوها حقها يحباااااني ولاتنسون النجمة 🫦"
للمرة المليون تعالوا أنستا " Jwuiri "