الهَوى اسّرار وهَواجِيس واحّلام ... والىَ متّى واحّلام وصِلك بعّيده

البارت السابع عشر

'
ماقدر يمشي لها من مسكوه عيال آل يزيد واختفت وكأنها لم تكن ، كان يصرخ ويستغيث لأجل يشوفها ويقولها أنه حارب حتى النهاية لكن بعقد ولاية هوى منها وسقط فيها بدون أي أمل يسانده ويتمسك فيه ، كانت هذي أقسى مراحل المحاولات وهو يدري إنه لا محاولات أخرى ، كانت هذه الأخيرة ..
~ في أحد المستشفيات ~
ماسك راسه بشدة ويبكي بحرقة ، دافن نفسه بآخر وأبعد زوايا عن العالم والناس في هالمكان ، عضّ شفايفه ونطق بدقن راجف : يويل حالي عليك ي جوريتي !!
بيده متمسك وبقوة على شهادة وفاة علي أخوه وأصغر أعمام جوري ، أثر طعن بسيخ متصدي ومتهالك سبب نزيف وجرثم الجرح بشكل مرعب وقوي ، ولا قدروا يسعفونه أبدًا وهوى بينهم ميت ، لعل اللي صار له راحة لبالها لكن هي ماتدري عن اللي بيصير لها وبتشوف حاجات مهولة ، عقل مراهقة بسّن الخامسة عشر استحالة يستوعبها ، قضايا وإتهامات وانقلابات ، مُنعطف شديد الخطورة بإنتظارها ، قام يوقف على رجوله اللي يحلف بالله إنها ماتشيله ، مشى يطلع من المستشفى لأجل ينقل الخبر لأبوه وأخوانه وخواته ، وكل من يعز علي ضروري ياصله العلم ، وصل بعد مدة طويلة للبيوت ونزل وهو داخله يرجف خوف وذعر على مستقبل بِكره ، ما يبيها تعيش هالأشياء ولا يبي يمسّها من الوجع طيف ، دخل للبيت وتصنع الغضّب وضرب الباب ، فزّت جوري وصافية ووقفوا بالصالة ، صرخ بحدة وقال : أخذي بناتك وولدك وأطلعوا من بيتي !!
كانت واقفة بصدمة ونطقت بخوف : بسم الله عليك مشعل وش صاير ؟
مشعل حسّ بحسرة داخله لأنه يدري إنه رمى نفسه للتهلكة وهذي الطريقة الوحيدة اللي بتخلي صافية تنفر منه ، لو يقولها الحقيقة يعرف بطبعها بنت مشبب وأخت مطلق مستحيل تتركه وترمي نفسها للجمر لأجله ، صرخ فيها وقال بحدة وحسّ بروحه تخرج من نطق : أنتي طالق !
شهقت جوري وبكت علطول وصرخ مره ثانيه ينطق : بنتك تتهم أخوي وهو ماسوى شيء !! بنت تستشرف على رؤوسنا وعلي شايف عليها حركات فالمدارس ! برا بيتي بررا !
شهقت جوري تصارخ ونطقت : لا ي أبوي كل الناس الا أنت لا تقول عني كذا !!
صرخ فيهم من جديد ومشت صافية تركض وهي مصدومة ودموعها تنزل بغزارة لكن بدون صوت ، كاتمه غيضّها تطبخ داخلها على نار هادية ، ماتدري وش التقلب ذا لكن إستحالة تجلس لثانية وحدة بعد الطلاق وإتهام عرض بنتها من أبوها ، شالت حمود ومشت تسحب جودي ، لكن أبت جوري تمشي كانت تهزه وتبكي ، تشوف دموعه اللي توضح ضعف حاله وتصارخ بوجهه وتقول : قولي وش صار !! م أروح وأنت تبكي هنا أبوي !!
طاح مشعل يبكي ويضّمها لصدره ، يستنشق جوري عطرها هي بنته وبِكره وأولى سعادته وفرحه وبهجته ، هي الأولى بقلب مشعل ولأجلها رمى مشغل نفسه للنار تحرقه من كل جهة بدون رحمة ، باس راسها ونطق بهمس : أسف ي أبوي أسف لكن مقدر أبديك على حساب أخوي اللي من لحمي ودمي
صرخت تبكي بحرقة من بدأت صافية تسحبها بغضّب وبدون تنطق بصوت واحد ، صرخت تنازع ألم ينهشها وينشب داخلها نيران ، صرخت تنطق : أبووي ليه تناقض نفسك أبوي قولي وشفيك دخيلك لا تخليني أروح بعيدة عنك أبوي مالي الا الله ثم أنت !!
طاح من طلعوا ببكي بحرقة ، تهالك جسده وهوت قوته ، كم يتمنى إنه سمع صوت صافية ولآخر مره وتهنى فيه رغم الظروف الصعبة ، كم كان يتمنى لو عاتبته وضربته وصرخت بوجهه ، لإنه يدري بعد قساوتها تجي وتضّمه لصدرها ، مثل الصغير اللي يحتاج لحُضن أمه ، لكن هالشيء ماحصل وبقى بمخيلته ، طلعت صافية تمشي بغضّب ونطقت بحدة : ما سمعتي وش قالك ولا تبيني أعيدها قدامك !! يتهمك بإنك مستشرفة !! الكلام ذا جاء من أبوك اللي كان أقرب لنا كلنا من أرواحنا ولحين لا تأمنين الغريب وأنا أمك !!
صرخت تهز راسها بالنفي وتبكي ، ركبوا مع سواق آل عمر وطلعوا من الأسوار للأبد ، يحملون معهم ألم صعب عليهم يتجاوزونه ، من أولهم صافية اللي تركت حُب حياتها وحُب طفولتها بظروف قاسية ومجهولة بدون أي أسباب تريح ضميرها ، طلقها ورماها للبعيد وللغريب ماتدري وين تروح وين وجهتها الجديدة ، خايفه تقول لمطلق إنه بدون سبب ولا فيه إي شيء مقنع ، مجرد صراخ وطلاق وإتهام ، مسحت على رأس جوري اللي تشاهق وتبكي بحرقة ، تدري بأبوها وتعرفه زين ، شخص ربت تحت حنيّته ودفء حضّنه وعذب كلامه ، ماعمره مسّها بوجع ولا بظليمة ، بالعكس كان مشعل أحن على جوري من أمها ، كان هو اللي يسهر الليالي لأجل حُمى صاحبتها بليالي شتوية ، كان الوجه المعروفة عند جوري بحال تراكم داخلها كلام وحزن مراهقين على صديقات فالمدرسة ، كان يسمعها بقلبه قبل مسامعه ، وشلون يتهمها بهالشكل المقرف ويتركها بدون تبرير ، هي شافت الخوف بعيونه والندم لكن فيه شيء أضخم وأقوى من مشعل وقاعد يصده عنهم ، يحرمه من قول الحقيقه لإنه وببساطة مستحيل يفرط في بِكره وحبيبة روحه وورد وجوري حياته ، مستحيل ومن سابع المستحيلات يفكر بهالشيء ، هو أنقضى من أصعب جزء عليه وهم عايلته ، رحيل علي خلف أول العواقب والعواصف وهي فقدان مشعل لصافية وبناته وولده ، لكن هو وبقناعة تامة مستحيل يرجع عن قراره يشوف إن فالأمر خيره وكل تأخيره ولو أبطى عنهم بيلتم شملهم وبيشوفهم ولو بعد زمان ، رحلوا للرياض تحديدًا بيت مطلق والظاهر بيكون مأوى لهم لزمان غير مسمى ..
~ عند باب المجلس ~
وقف عند باب المجلس بوجه تعبان ، يدري وش أول شيء بيفكرون فيه وهو الهواش ورفعة اليد والصوت قبل أسبوع ، لمن صرخ على علي وقام بينهم إبليس وتضاربوا وأرتفعت الأصوات قدام الشايب ، يدري إنهم مستحيل يسألون عن السبب وبديهيًا بيرتبط مخهم بالحادثة اللي قبل أسبوع ، دخل وطاح عند الباب وفزّوا أخوانه كلهم له ، صرخ أبو عادل فيه ونطق : مشعل سلامات وشفييك ؟؟
عادل برعب : عمي !! وشفييه صاير شيء ؟
أنشل لسانه عن الكلام ولا قدر ينطق بحرف واحد ، مشى عدنان لهم وهو ماسك عصاته ونطق : مشعل أهرج وأنا أبوك !
زفر سليمان بتوتر ونطق : مشعل وأنا أخوك تكلم !!
مشعل أردف بصعوبة ، بينتهي كل شيء وهو داري لكنه أقدم وقال : أنا ذبحت علي
خمد الانفعال وأنقطعت الأصوات وسكنت الحركة ، الكل واقف بصدمة يبون يستوعبون كلامه ، نطق صويلح بصدمة : وش قاعد يقول ذا ؟
طاح الشايب وفزّوا كلهم له وصرخ مشعل يقول : أبوي..
دفعه أبو مصعب وقال بحدة : وش اللي قلته قبل شوي !!
طاح على الأرض والكل واقفين ينتظرون تبرير ، ضحك صويلح بصدمة وقال : ذبحت أخوك عشانه رفع صوته عليك ؟
مشعل هز راسه بنفي مرارًا وتكرارًا وقال : لا لا ببر.. ببرر لكم والله..
قاطعه سليمان بغضّب : صاحي أنت !!! وين علي ؟؟
صرخ أبو عادل أكبرهم ونطق : تعالوا لأبوي !!
شالوا الشايب وطلعوا كلهم فيه للمستشفى ، ألتفت مشعل من نطق مجيد : مشعل وش سويت ؟
مشعل مشى لمجيد ونطق : وقسم بالله بالغلط والله !
مجيد بصدمة نطق : وش صار يخوك علمني !
مشعل برجفته أشر على المخزن ونطق : أكيد تدري بالسالفة
مجيد : ايوه إنه يقرب من جوري ؟
بكى مشعل من حرقة صدره ومسكه مجيد يضمّه ، حاوط أخوه الأصغر بعد فقدان علي وقال : كان يلاحقها وجيت أبي الحق بنتي وسحبت سيخ أبي اهدده لكن مدري وش صار وطعنته ، والله إني حاولت أسعفه ورحت به للمستشفى لكنه مات ي مجيد مات والله إني نادم وإني لا أرضى بأي عقوبة بس تكفون لا تأخذكم الهوشة وتحسبوني عاضّ على غيضّي وأبي اذبحه !!
مجيد وقف بصدمة ونطق : والله العظيم إني مادري وش أقول تعرف ماني قريب من علي وساكن بعيد عنكم وماجيت الا اليوم ولا أقدر أخدمك بشيء الا حاجه وحدة وهي سبب المشكلة !
مشعل ابتسم لأن مجيد يخفف عليه ونطق : أنا في وجهك علمهم بيسمعون منك
مجيد ابتسم وباس راس أخوه الكبير ونطق : ولا عُمر أحد سمع لمجيد غير أخوي عمر الله يرحمه تهقى العيال يسمعوني ؟ لكن والله لا أحاول
مشعل طاح قدام الباب من سمع صراخ خواته وأمه ، دليل واضح أن الخبر وصلهم ، فزّ مجيد يركض لهم بيمسك الجنس اللطيف بصف مشعل وهالشيء بيفيده ، أما بالنسبة لمشعل فهو خسر كل شيء نفسه وعايلته وأهله جميع وكل شيء صار دفعة وحدة ..
~ أمام بيت مطلق ~
عضّت شفايفها السُفلية لثواني ، اسرار ماترد عليها والرسام بيته ساكن ووهذا غير عن عادته ، بعد أمس رجعت للبيت ونامت ولمن صحت بعد روتينها علطول مشت لبيته ، اخذت نفس وقالت : يارب هدا البيت
رنت على الجرس وأنتشر الصوت داخل البيت ، وقف من الصالة وفنجاله بيده ، ابتسم لحمد ونطق : دقايق يبو محمد
ركض ضاحي ونطق بخفه دمه : منو ياينا هالحزه ؟
مطلق طلع يسبقه ومشى ضاحي يجلس مع جده ، وصل للباب وكان معتقد إنها العامل اللي طلبه للأبواب ، فتح ووقف بصدمة يشوفها قدامه ونطق : بنت أيمن !
عِقد ابتسمت وقالت : حمدلله ع السلامة أجي ؟
طار قلبه من بين ضلوعه ليت كان دخولها يعني عدم خروجها مره ثانية ، يليتها صارت من سكان البيت وبالأخص صاحبة البيت لأن مطلق مابيتردد ثانية وحدة يحط البيت بأسمها ، هز راسه بالايجاب ومشت تدخل للحوش ، ابتسمت ابتسامة عريضة وقالت : مره خيييال البيت ماشاءالله
مطلق ابتسم وقال : عقبال ماتهنى عيني بشوفك فيه أربع وعشرين ساعة
عِقد ابتسمت تشوف المسافة بينهم ، لطالما كانت بينهم مسافة لكن قلوبهم متلاحمة وترفض هالمسافات ، نطقت بهدوء : أتصل عليك الرسام ؟
مطلق سحب جواله وماشاف اتصال ، هز راسه بنفي ونطق : ليه عسى م شر ؟
عِقد رفعت كتوفها بعدم معرفة وقالت : بس اسأل لأنو زي ماتعرف اليوم أولى جلساتهم واسرار مختفية
بدون مايتردد اتصل على سطّام واخذ دقايق حتى أنتهى الإتصال بدون أي إجابة ، عضّ شفايفه ونطق : مايرد
عِقد بتوتر : ياخوفي حصل شيء !!
مطلق : اركدي يابنت أيمن لا تحوسيني مع الصباح
عِقد اخذت نفس طويل وزفرته ، مشت من الشمس وقالت : فين أقدر أجلس ؟
مطلق : اي مكان براحتك
عِقد : تعال فالمجلس في تكييف ؟
مطلق دخل وهز راسه بالايجاب ، ابتسمت تشوف فراشه مرتب على أحد الزوايا ونطقت : ماتخلي عوايدك ؟
مطلق : عندي غرفة فوق بس حالف م أطبها الا معك
عِقد ابتسمت بخجل وقالت : اوكيي !
جلست وجلس مطلق قبالها ، دخل ضاحي وقال : مطلق أبطي..
وقف يشوفها قدامه جالسه ونطق : هلابي بو مطحس
عِقد ابتسمت وهمست لمطلق : الله حسيبك يشيخ !!
مطلق ابتسم وقال : والله يلوق لك وش أسوي
ضاحي تقدم يسلم من بعيد ونطق : بجيب جدي يشوف مرتك
عِقد توسعت عيونها بصدمة وقالت : اووها !! مستعجل ؟ وكيف وصلك الموضوع من الأساس
ضاحي ابتسم بخوف ونطق : يويلي من مطلق !
لفّت له تشوف ملامح الغضّب عليه ، وتغيير وجهه بالكامل ، نطقت بهدوء : ما حيسوي لك حاجه
ضاحي ضحك بسخرية ونطق : الله يعز أرضك يشيخه اخيرًا جاء الشخص اللي يوقف بوجه مطيليق !
عِقد : أسمع ضاحي
ضاحي ابتسم وقال : يالبيه تعرفين أسمي !
وقف مطلق بغضّب ونطق : بتذلف ولا وش ؟
ضاحي ابتسم وحبّ يجرب للحظة ونطق : لا وش بتسوي ؟
مطلق سحب سبحته ونطق : أخوك يالهَاجس !!
ضاحي عبّس بملامحه ونطق : شفتي ؟ مايعترف فيني
عِقد وقفت بصدمة وقالت : اش حتسوي ؟ بتضربو مثلاً !
مطلق لفّ عليها ، عادت به الذاكرة ليوم الضرب اللي صار بينه وبين يعقوب وكيف نفرت منه ، أكيد وراها قصة وتسكن عقل عِقد لكن بيجي اليوم اللي يكشف مطلق الستار عن كل ماضيها ويلامس جروحها ويغطيها ، ابتسم وقال : مو ضرب عاد ! لسعه خفيفه
ضاحي : كذاب تقعد تحرقني أسبوع
مطلق رفع حاجبة وقال : بو مشبب
ضاحي ابتسم وباس خشم مطلق من بعيد ونطق : خشمك
مطلق رفع راسه لضاحي ومشى ضاحي يطلع ، جلس وجلست معه ونطق بصدمة : بتغيرين فيني زود التغيير اللي حصل ؟
عِقد اخذت نفس وقالت : أنت برضو بتغير فيني بس مو موضوعنا أنا وأنت
مطلق : سطّام وبنت محمد ؟
عِقد : وربي شوف أحلف لك أنو حصل شيء
مطلق : نمشي لبيتهم ؟
عِقد شدّت على يدينها ونطقت : مافيه أحد
مطلق وقف يمشي ويطلع ومشت وراه ، وقف وضربت فيه وشهقت تطيح على الدرج ، ماكان الضرر قوي لأنه مسك يدها ونطق : اسم الله عليك ! جاك شيء ؟
وقفت تضحك بفشلة ونطقت : لا
مطلق ابتسم وقال : بشويش وش العجلة فيه يالسيد الغنادير ؟
عِقد ابتسمت وسحبت يدها من ذراعه ونطقت : لأنك وقفت قدامي ولا أنا ماكنت مستعجلة اساسًا
مطلق : طيب عرضي وطولي كأني الجدار ماشفتيني ؟
عِقد : وهدا هو اللي عثر لي ماشاءالله يعني
ابتسم يمشي وألتفت يشوفها واقفه ، ضحك لأنها خافت من طوله وعرضه بالنسبة لها ، مدّ يده وسحبها مع عبايتها ونطق : أمشي قدامي يالغنوجه
مشت تطلع ونطقت : تجي بسيارتي ؟
مطلق ابتسم وقال : بلحقك بالأكحل
هزت راسها ومشت لسيارتها ، ركب الشاص وشغله وحرك من قدام بيته ، ولحقته بالبورش وراه ..
~ فيلا سلطان ، زيلامسي ~
توترت من كثر حركته صار له نصف ساعة يطلع ويرجع يدخل للبيت ، وقفت ومسكت ذراعه ونطقت : سلطان !
ألتفت لها ونطق : سمّي ي أخت مطلق ؟
ظبيه : حصل شيء ؟
سلطان : وصلتني نتايج المحكمة من مشهور وخذوا اسرار من سطّام وأدق عليه من الصباح وللحين مارد
ظبيه شهقت بصدمة وقالت : وش بتسوي ؟؟
سلطان : قصدك وش سويت ؟
ظبيه رفعت عيونها له وابتسم ينطق : ماشين السعودية واعذريني ماطولنا..
قاطعته من حطت يدها على خده ونطقت : شدعوة سلطان ؟ اصلاً ضروري نرجع حتى أختي صار لها سالفة
سلطان ابتسم يحط يده فوق كفها ونطق : عساني م انحرم من الحنيّة اللي يحملها كفك
ابتسمت له ونطقت : أجهز الأغراض ؟
سلطان : يالله
مشت تركض لغرفتهم ورتبت كل الأغراض ، صار الوقت اللي ضروري يرجعون فيه أثنينهم ، عضّت شفايفها السُفلية لثواني ودعّت داخلها ونطقت : يارب نروح للرياض !
أنتهت بعد ربع ساعة ومشت للصالة ، دخل سلطان وقال : البسي وتعالي
سحبت أغراضها من الشماعه وطلعت ، دخلوا العمال ونقلوا الأغراض مباشرةً للمطار ، ركب بجانبها ومشوا للمطار وبعد دقايق نطقت ظبيه : وين بنروح
سلطان : لبيت أهلي فالجبيّل
غمضت عيونها بقوة وهمست داخلها : العن حظي ولا وش ؟
سلطان لفّ عليها وقال : ليه ماودك ؟
ظبيه ابتسمت وقالت : لا وشفيك بس اسأل
سلطان ابتسم يمسك يدها ويثبتها ، حمّرت ملامحها وصدّت لجهة الشباك تتأمل زيلامسي لآخر مره ، وصلوا للمطار وتقدم للصالات وهو ماسك يدها ، جلست وجلس بجانبها ونطق : تبين قهوة ؟
ظبيه هزت راسها بنفي وقالت : أجلس خلاص
سلطان عضّ شفايفه ونطق : جعلها بضلوعي عنك ي أخوي
ظبيه مسكت يده وقالت : لا تقول كذا عمرك طويل !
سلطان شّد على يدها ونطق : سطّام تعلق فيها بشكل كبير صارت العوض عن أمي له والحين ياخذونها !!
ظبيه : حتى اسرار والله صح إنها ماتتكلم وماتوضح لكنها تبيه لو إنها ماتبيه كان ماجلست معه المدة الطويلة ذي
سلطان : الله يجمع شملهم بالخير
ظبيه ابتسمت وقالت : امين ريح قلبك خلاص محلولة
سلطان ابتسم وانحنى لها ومسكته ، سكن بحضّنها وخذاه النوم لساعات وصحى بعد مدة طويلة ، ألتفت مايشوفها وقفز قلبه بين ضلوعه رعبًا من فكرة فقدان الظبي ، صار يركض فالصالات ويتصل على جوالها لكن دون جدوى ، مشى للموظف وسأل عن الرحلة وأخبره إنها تأجلت بسبب عطل فالطائرة وبتقلع قبل الساعة الثامنة مساءً ، زفر بضيق وقال بهمس : وينك ي أخت مطلق !!
ألتفت بسرعة من سمعها تناديه وشافها شايله بيتزا بيدينها وتبتسم ، ركض لها وسحب الصندوق وضمّها له ، توسعت عيونها بصدمة وضحكت وقالت : بشويش وشفيه ؟
سلطان بحدة : ماهقيتك كذا تحبين تخوفيني عليك !! ولا وش معنى تتركيني وتروحين وأنا نايم ؟
ظبيه بضحك نطقت : جعت وسحبت عليك !
ضحك يبتعد عنها ونطق : أوريك
ظبيه ابتسمت وقالت : تعال بس
مشوا يجلسون وسموا بالله وبدأوا يأكلون ينتظرون رحلتهم للسعودية ..
~ على حدود شمال السعودية ، القريات ~
مرت قرابة الاحدى عشر ساعة على غياب سطّام وفقدانه لأسرار ، نزلوا من السيارة ومشت معهم بدون روح ولا طاقة تساندها ، سحبوا كل أوراقها من الرياض وأنسحبت قسرًا عن وظيفة أحلامها ، دفنوا كل شيء يخصها وكأنها ماتت ولا بقى لها وجود ، رموها عن أحد الأبواب ونطق أبو بجاد بحدة : دقي الباب وادخلي داخل ولعاد أشوف لك خطوة خارج ذا البيت سامعة ؟؟ بذبحك والله
قامت توقف بصعوبة ، هي م أفطرت من الصباح وبتكمل يومين مو مأكله شيء ، ضربت الباب ومرت ثواني وانفتح وطاحت ، شهقت زهراء ومسكتها ونطقت : بسم الله عليك !
رفعت عيونها وللأسف ماقدرت تلمح الشخص اللي مسكها من أغمى عليها ، أبو بجاد نطق بحدة : قفلوا الباب والبنت لكم مانبيها
قفلت زهراء الباب ومشت تنادي خواتها وخالتها يساعدونها ، طلعوا البنات وخالتهم نوير تقول : امسكوها بسم الله عليها حسبي الله على من كان السبب !
مشت هاجر ونور لها ومسكوها ودخلوا داخل البيت ، قفلوا البيبان كلها وتجمعوا بالصالة ، ابتسمت زهراء ونطقت : بالله مافيها من خاله ريم ؟
ضحكت هاجر بسخرية وقالت : تكفين زوزي اسكتي
نوير مشت تجلس ونطقت بضيق : يبناتي فيه عشاء الليلة وش بنسوي ؟؟
نور نطقت بهدوء نبرتها : أكيد يعرفوننا ولا مستحيل يرمون البنت كذا علينا
نوير زفرت بغضّب ونطقت : ايوه هذا بتال عرفته من صوته
سكتوا البنات وزفرت تنطق : يخي وشفيكم ذاك اللي رفضته لمن تقدم لوجدان
شهقت هاجر بنرفزة وقالت : الشايب ؟؟
نوير : الله عليك
نطقت نور تكمل وقالت : تم أجل عادي بنكذب على الناس ونقول وجدان رجعت من الخارج !
هاجر : تستهبلين ؟؟
نور : لا ! هذا حلنا الوحيد مايعرفون ملامح وجدان خلاص نكذب وش بيصير مثلاً
نوير : صادقه والله أجل تم بدق على ريم وانتوا قوموا ألبسوا وأنا بحاول اصحيها
ريماس دخلت للصالة وشهقت تنطق : بسم الله مين هذي ؟؟
دخلت ريمان بعدها ونطقت : يالبيه ماشاءالله يالجمال ! تشبه خاله ريم
هاجر سحبت التوأم ونطقت : مو وقتكم وقالته زوزي قبلكم
دخلوا البنات كلهم ومابقى الا نوير واسرار على الكنبه قدامها ، زفرت بغضّب ونطقت : الله ياخذك ي بتال
اتصلت على ريم ووصلها صوتها وهي تقول : ايوه نوني ؟
نوير ابتسمت وقالت : ريمو وينك فيه ؟
ريم : والله سافرت
نوير : تستهبلين ؟
ريم ضحكت وقالت : لا والله منجد رُحت لجده
نوير : البلشة صدق
ريم : اشبك ؟ اش صار
نوير بتوتر نطقت : ولا شيء ! بس فيه عشاء عند ام حمدان وتعرفيني م أحبها
ريم ضحكت وقالت : محد يحُبها صراحة
نوير : خلاص بقفل مشغولة مع بنات أختي
ريم ابتسمت ابتسامة عريضة وقالت : الله يجزاكي الخير كفلتي البنات كُلهم بعد وفاة نورهان
نوير : امين يالله ريمو معسلامة
ريم : باي باي
قفلت الجوال وفزّت من نطقت اسرار : من أنتي ؟
نوير شهقت وقالت : بسم الله مايصير يابنتي طيرتي مابقى لي من عقل !!
اسرار مسكت راسها بقوة وقالت : سألتك صح ؟
نوير قامت من الأرض ومشت تجلس على الكنب قبال اسرار ونطقت : أنا نوير أم لسبع بنات
اسرار رفعت حاجبها وقالت : ماشاءالله الله يزيدهم
ضحكت نوير وقالت : بنات أختي كلهم أنا عقيم وارملة
اسرار : طيب مين انتوا ؟
نوير : شفتي بتال اللي رماك عند باب بيتي ؟
اسرار هزت راسها بالايجاب وكملت نوير تقول : تقدم لوحده من بنات أختي وكانت تصغره بسبع وثلاثين سنه وأتوقع عرف إنها ماهي بنتي وإني احتوي البنات وجابك
اسرار مسحت دموعها بعنّف وقالت : أنا ماشيه
وقفت وسرعان ماهوت ومسكتها نوير وقالت : وين ماشيه يابنتي ماتعرفين الديار وغير كذا مانتي ماكله شيء
اسرار مشت طواعيه مع نوير للمطبخ ، كمية دفء وحنان غير طبيعية فهالبيت ، جلست على الطاولة وشغلت نوير الأنوار وشهقت تضرب سكر ونطقت : وش تسوين فالظلام ياخفاش !
سكر ضحكت وقالت : خاله ! وش أسوي النت يجنن فالمطبخ
قامت توقف وشافت اسرار ونطقت : سبحان ربي والشبه !!
نوير : خلاص تشبه ريم يالله اطلعي تكشخي وانزلي مع خواتك
سكر ضحكت وقالت : وربي نسخه..
قاطعهم صوت اسرار من نطقت : ريم ؟؟
نوير : لا تهتمين يابنتي
ضربت سكر وطلعت تركض من المطبخ ، مشت تسوي بيض لأسرار ونطقت : تحبين البيض ؟
اسرار هزت راسها بنعم وقالت : مين ريم ؟
نوير : أختنا
اسرار : أخت البنات ؟
نوير هزت راسها بنفي وقالت : لا أختي أنا وبالأصل صديقة العايلة من قديم الزمان
اسرار هزت راسها وسكتت ، كملت نوير تطبخ ومن نضج حضرته لها وبدأت اسرار تاكل ، دخلوا السته كلهم بدون وجدان اللي تكون السابعه ، ومشوا ووقفوا قدام اسرار يطالعون بعيونها ، تقدمت ريمان وقالت : عدسات ؟
ابتسمت وقالت : ايوه
لفّت لهاجر من نطقت : واضح طبيعية بس انتوا مشافيح
مشت نور لها وقالت : أنا نور
لفّت على خواتها ونطقت : هذول التوأم ريماس وريمان وهذي رجال بيتنا هاجر
ضحكوا البنات وضربتها هاجر ونطقت : حيوانه !
نور ابتسمت وقالت : وهذي زهراء وهذي سكر
اسرار : وأنا..
قاطعتها نور وقالت : أنتي وجدان من اليوم وحتى تطلعين من القريات تمام ؟
اسرار قطّبت حواجبها ونطقت : لحظة ايش ؟
نوير ضحكت وقالت : فجعتي البنت
نور : أسفه ماقصدي بس أبيها تتعود على الأسم
نوير لفّت وقالت : وش أسمك
اسرار بسخرية : وجدان
ضحكوا البنات كلهم ونطقت زهراء : اصلاً يناسبك
سكر نطقت بحدة : خير بنات ؟ طيب أتركوها تقول أسمها !
اسرار : مو مهم خلاص اصلاً مابطول
نوير عضّت شفايفها السُفلية لثواني ونطقت : والله مع جيتك لنا ماظنتي ماتطولين الا بتجلسين زمن طويل يابنتي
اسرار ضحكت وقالت : تمام عادي ماهي فارقه اصلاً
هاجر : خالتي تأخرنا على أم حمدان
اسرار : مابجي
سكر ابتسمت وقالت : مع الأسف ضروري تجين عيال الحاره يطبون ببيتنا دايم بكل عزيمة نروح لها نرجع والبيت مفتوح
اسرار : وش الحياة ذي ؟؟
هاجر رفعت حاجبها وقالت : عسى م شر ؟ م أعجبناك ؟ احمدي ربك بس !!
اسرار هزت راسها بنفي مرارًا وتكرارًا وقالت : لا ماقصدي
سكر : مايدخلون بس فالحوش ويمكن تخافين لو تجلسني وفهمناك تعالي معنا وخلاص
نور : بس ضروري تلبسين عدسات لأنهم يعرفون عيون وجدان
اسرار ابتسمت وقالت : هذا اللي ناقص بعد
هاجر طلعت من المطبخ ولحقوها التوأم ، زفرت زهراء ونطقت : هاجر شوي حساسه اسحبي عليها
اسرار : طيب وين ألبس ؟
سكر ضحكت وقالت : يونس أخت جديده تعالي معي
مشت اسرار معها ودخلوا غرفة فيها سريرين واحد جديد والثاني خاص بسكر ، ابتسمت وقالت : أنا الوحيده اللي أنام لوحدي وعندي سرير احتياط وكويس جيتي !
اسرار ابتسمت وقالت : أنتي اي وحده ؟
سكر ضحكت وقالت : افا سكر أنا
اسرار : أنا اسرار
سكر ابتسمت وابعدت ترقص وقالت : أسمك يجنن !!
اسرار ابتسمت وقالت : وأنتي بعد سكر مره حلو !
سكر ضحكت وقالت : أنتي الحلوه يالله نبدأ ؟
اسرار هزت راسها بالايجاب وبدأت سكر تساعدها حتى ما أنتهت من اللبس وكل شيء ، ضبطت عدسات باللون البني الغامق على عيونها ونطقت : صرت وجدان ؟
سكر نطقت بصدمة من جمال اسرار : مررره !
اسرار : نمشي ؟
سكر سحبت احد العبايات ومدّتها لأسرار ولبسوا وطلعوا ، صرخوا البنات وضحكت بصدمة وقالت : وشفيكم !!
نور : والله حلال عليك ي سكر !
هاجر : مشينا ؟
نوير وقفت وقالت : يالله
طلعوا كلهم من البيت ومررت أنظارها للمكان ، ديره وبيوت وبقاله قديمة بزاوية الحيّ ، حياة جديدة بأسم جديد ، تدعي داخلها ما تضطر تتعود على العيشه هنا ، زفرت بضيق وقالت تحت انفاسها : ماتوقعت أني بيوم بقولها بس أشتقت لك ي بِكر نهيّان !
تمردت دموعها عليها وعضّت شفايفها تمنع دموعها تنزل ، زفرت بضيق تشوف نظرات العيال عليها عن بدّ البنات اللي السته اللي تمشي معهم ، لفّت سكر لها وقالت : لأنهم ماتعودوا يشوفوننا ثمانية
اسرار : بس حنا سبعه ؟
سكر : عيب عليك تنسين نوير !
اسرار هزت راسها ومشوا لبيت أم حمدان بآخر الديره..
~ قصر نهيّان ، فالجبيّل ~
جالسين بالصالة والهدوء يعم المكان ، نطق نهيّان بهدوء وقال : وينها الحين ؟
سطّام مارد ومن دخل ماكان يتكلم ، زفر سلمان بغضّب لأنه يشوف سطّام بأيام وفاة أمهم ، مشى له وضربه على كتوفه ونطق بحدة : ماماتت ي أخوي بدري على الهدوء ذا !!
رفع عيونه لسلمان وسحبه يوقف ، حط جبينه على جبين سطّام ونطق : ما بسمح لك ترجع لحالتك اللي هدتني معك ما بسمح ي سطّام تسمع !! وبتمشي معي نفر المملكة كلها لحّد م نحصلها سامع !
سطّام سحب سلمان لحضّنه ، شهق بحضّن أخوه وانهدم بكى بشكل سيء جدًا ، سطّام عاطفي وجدًا وشخص يحب بجميع حواسه ، طاح سلمان على الأرض من ثقل سطّام وأنهار معه ، سلمان كان محتاج لحضّن سطّام من وقت طويل ، تعب من المكابر والسلام من بعيد تعب ويحتاج سنده وذراعه اليمين ، كان مايفارق سطّام والحين مايعرفون بعض ، أنتهت الأزمة وطاحوا عند بعضهم وتخالطت دموعهم معًا ، ضحك سلمان ونطق : أشتقت لك
سطّام ابتسم يمسح دموعه ويرفع عيونه ، شاف انفال منهارة بكى من المنظر ونهيّان يمسح خشمه ويصدّ منهم يخفي دموعه ، هذام واقف وعاضّ شفايفه ويبكي بدون صوت ، اخيرًا عادوا الأخوان اخيرًا عاد زمن سلمان وسطّام ، فتحت دُرة الباب ودخل سلطان ووقف بصدمة يشوف الكل يبكي وسطّام بحضّن سلمان ، طاحت شنطته من يده ونزلت دموعه علطول ونطق : مابغيتوا الله ياخذكم !!
ضحكوا كلهم وقام سلمان وهو تحت ذراع سطّام ، ابتسم وقال : جعل من جابها للجنة ماتراضينا الا عشان سالفتها
سطّام عضّ شفايفه ونطق : اللهم امين
انفال مسحت دموعها وقالت : بندور لها كلنا سوا
نهيّان وقف بمساعدة معكازه وقال : وبروح أبلغ الشرطة
سطّام : جاي معك
نهيّان : رضيت على سلمان متى دور أبو سلطان ؟
ابتسم سطّام وباس راس نهيّان وكفه ونزل وسرعان ما فزّوا أخوانه يرفعونه ، دفعهم عنه وقال : وش بلاكم يرجال ؟ هذا أبوي إذا م انحنى ظهري له وقبّلت رجوله من يستحقها ؟؟
نهيّان ابتسم يرفعه وقال : لأن مقامك فوق الرأس ي بِكر نهيّان مانرضى لك الانحناء ولو إنه على حسابي الله يرضى عليك يولدي ويرد لك حَرمك وبنتي وتقّر عيوننا برجعتها سالمة
سطّام انحنى يقبّل ركبته ونطق : جعل عمرك طويل ي أبوي
انفال رمت الوسادة على الطاولة وصاحبت معها صوت مزعج ولفّوا كلهم ، كانت تشهق وتبكي وقالت : والله لا أقول لأبوي إنكم بكيتوني !!
ضحكوا كلهم ومشى سلمان لها ، ابتسم يضمّها وضحكت بطعم الدموع وهي تحاوطه ، لفّوا كلهم من شهقت ظبيه وكتمت نفسها علطول ، شهق سلطان بأنفعال وقال : بيذبحني مطلق خلاص تكفين جعل من بكاك المرض !
نهيّان صرخ فيه وقال : استغفر يحيوان !!
ضحكوا العيال كلهم وضحكت من دخل أصابعه تحت نقابها ومسح دموعها وباس راسها ونطق : بالهون ي أخت مطلق
ابتسمت وقالت : الله يديمكم لبعض بس أنا انحرمت من أبوي وأمي ولا أتذكرهم ابدًا الا من الصور وتأثرت عشاني بعيده من أخواني
نهيّان مشى لها يضمّها له وقال بصوته الرخّيم : أنا أبوك يابنتي والثلاثة الشجعان ذولا أخوانك والسلطان زوجك وانفال أختك مامن غريب يالظبي وتوو مانور بيت نهيّان وعساه مايخلى من حسّك وحسّ سليّط
ابتسمت من دفء كلامه ونطقت : وعساني م انحرم من سلطان وأهله
هذام ابتسم وقال : أبشري باللي تبينه يعيون أخوك
سطّام : وماخذينا الا أخت الغالي مطيليق جعل يومي قبله !
سلمان ابتسم وقال : انشهد بالله ونعم الرجال مطلق وضاحي
نهيّان : يالله خلص وقت المشاعر والدموع ! حَرم سطّام حاليًا هي أهم أولوياتنا ومابنوقف بهالأيام ومابنفرح الا برجعتها توكلنا على الله
مشوا كل عيال نهيّان وطلعوا من البيت ، مشت ظبيه تشيل نقابها وعبايتها ، فلّت شعرها وضبطته وقالت : والله هلكت من السفرة
انفال نادت دُرة ونطقت : يعمري والله
جلست وجات دُرة تاخذ عبايتها وأغراضها هي وسلطان لغرفته ونطقت انفال : تبين تتقهوين ؟
ظبيه : عادي
لفّت أنظارها ونطقت : ماشاءالله البيت كبير
انفال : بيجلدك عمي لو يسمعك تقولين بيت يسميه قصره
ضحكت ظبيه وقالت : مايقدر أبوي هو !
انفال ضحكت وقالت : صادقه والله يعمري اسرار اف
ظبيه : ذيبه بنت عمي الا وبنحصلها وقولوا ماقلته
انفال : ان شاءالله
كملوا سوالف وفناجيل القهوة قدامهم وينتظرون خبر من نهيّان وعياله ..
~ حيّ الصحافه ، بيت مطلق ~
وصلوا للموقع اللي أرسله ضاحي لهم ، نزلت تشيل حمود اللي نايم بين يدينها وجوري تمشي وجودي بيدينها ، دقوا الجرس وفتح ضاحي علطول وشال حمود وباس راس أخته ونطق : ادخلوا ادخلوا
دخلت صافية ودخلت جوري للبيت ، قفل الباب وراهم ومشوا للداخل ، جلسوا فالمجلس على السجاد اللي كانت عِقد ومطلق جالسين عليه الظهر ، زفرت بتعب تشيل نقابها وعبايتها ونطقت : ضويّحي لبى قلبك جب لي مويه
ضاحي ابتسم وقال : أبشري بحط حمود بغرفة جدي عشان نسمعه إذا صحى
هزت راسها ومشى ضاحي ، لفّت لجوري ونطقت : بكذب عليهم يويلك تتكلمين
جوري هزت راسها بالايجاب وقالت : أبوي فيه شيء والله ي أمي مايهنى لي نوم وأنا مدري عنه ومقفل جواله !
صافية نطقت بغضّب : فاللعنة ان شاءالله ماهمني !!
زفرت جوري بضيق ومشت تطلع فالحوش ، رغم حرارة الرياض الا أنها فالليل بارده وبها نسناس ، مشت تحت الأشجار والنخل ونطقت : من وين جات خالي الفلوس ؟
رفعت عيونها وابتسمت تشوف عشّ حمام ، تعرف نفسها وكيف تعشق الطيور لكنها سرعان ماضاقت من تذكرت الحمامة حقتها بشباك غرفتها فالخرج ، جلست على الأرض وشبكت سماعتها وبدأت تغني مع طلال المداح وتنطق :
راح وخلاني وحيد اشكي صده من بعيد
يا ترى يرضى يعيد  ذكرياتي من جديد
كيف يبغاني انام بعده مرتاح الضمير
بالله خذله يا حمام خذ سلام مني وطير
-
~ فالداخل ~
مشى ضاحي بالقهوة والشاهي وجلس قبال صافية ، ابتسم وقال : غردي وأنا أخوك
صافية : معاد إبي مشعل
ضاحي ابتسم بصدمة وقال : اللهم السلامة وش جاك أنتي نزوج وحده وتجينا الثانية تبي البعاد ؟
صافية زفرت بغضّب وقالت : طلقني
فزّ ضاحي بصدمة ونطق : وش ؟؟
صافية : إذا جاء مطلق بقولكم أنت طايش بتروح للخرج وتذبحه
ضحك بسخرية وقال : بعدي ي أختي طلقك !
صافية : سد حلقك وأطلع شوف وين راحت جوري
وقف ضاحي ومشى يطلع للحوش ، طل براسه وشافها ورجع يدخ ونطق : جالسه فالحوش
صافية : بطلع لغرفتك إذا جاء مطلق صحوني
ضاحي ابتسم وقال : أبشري
مسكت جودي ومشت معها تطلع لغرفته ، زفر بضيق وجلس يشرب بيالة شاهي وينتظر مطلق ..
~ أمام النيابة العامة ~
مشت تطلع منها وشافته قدام المدخل ونطق : ايوه ؟
عِقد زفرت بغضّب وقالت : استقالت
مطلق فزّ ونطق : أخوك يالهَاجس وش تقولين ؟؟
عِقد : وربي ! ماقلت لك أنا فيه حاجه صايره
مطلق : والهَاجس مايرد علي
عِقد : مصيرو يفتح الجوال ويرد تعال نبلغ الشرطة
مطلق كتم ضحكته وقال : والله من الغباء لنا من الظهر ندور وذلحين نبي نبلغ الشرطة
عِقد عبّست بملامحها ونطقت : مطلق والله مره مو وقتك !
مطلق اشر بأصبعه ع خشمه وقال : ع ذا الخشم مشينا
مشوا بسياراتهم لمركز الشرطة ، وفعلاً تم البلاغ عن فقدان اسرار ووضعوا لمن يجدها مكافأة مالية سواء حية كانت أو ميتة ، طلعت ونطقت : اخ ي صاحبتي والله عانيتي الكثير !
مطلق ابتسم وقال : بس أشهد بالله إنها ذيبه !
عِقد مشت وتبعها مطلق ونطقت : يقول الشرطي مافي فايده بالبحث عنها وبس بنضيع وقتنا
مطلق : داري خلاص مسكوا موضوعها السلطات وان شاءالله نحصلها
عِقد : لا تنسى موضوعنا بنسافر بكره للحجاز
مطلق : على خير
عِقد : حضطر أودعك بعد شوي
مطلق ابتسم وقال : هانت يوم وتجين غصب عنك معي
عِقد ضحكت بسخرية وقالت : كلي لك
ركضت وعضّ مطلق شفايفه ، سحب بوكيت دخانه وثبتها بين شفايفه ونطق : والله مايفيدك الهياط يالغنوج
ضحكت ومشت بجانبه ، مسكت ذراعه من مرت سياره بجانبهم ، ابتسم ونطق : مايمسّك حتى النسناس وأنا معك
ابتسمت وقالت : أعرف وأدري بك !
ابتسم من بدأت تسحب لهجته ونطق : قولي أحوبك
عِقد ضحكت تهرب من وصلوا للمواقف اخيرًا ومشت تتركه واتجهت لسيارتها وحركت ، ركب مطلق الشاص ومشى يحرك من عند مركز الشرطة للبيت عشان صافية وسالفتها ..
~ القريات ، بيت أم حمدان ~
جالسين والصمت سيد الموقف ، ابتسمت أم حمدان ونطقت : كيف الخارج ي وجدان
اسرار كانت ساهية لأنها ما عهدت تسمع هالأسم ، ضربتها سكر بخفه وقالت : وش ؟
سكر ابتسمت بفشلة وقالت : يسألونك
لفّت اسرار لهم وقالت : هلا ؟
أم حمدان ضحكت وقالت : شكلك متعوده تسمعين الأنقليزي واجد ؟
اسرار ابتسمت بكلافه ونطقت : ايوه صح
ابتسمت فلوه ونطقت : وش شهادتك ؟
هاجر ضحكت وقالت : ماستر فالهندسة !
فلوه : ماشاءالله !
الكل نطق بـ ' ماشاءالله ' وعمّ الصمت من جديد ، زفرت بملل وهمست لسكر وقالت : بطلع أتنفس شوي
سكر : أجي معك ؟
هزت راسها بنفي وقالت : مابطول
وقفت تطلع للحوش وتوسعت عيونها من عدم وجود أسوار ، ابتسمت وقالت : لا والله أسحب كلامي هذي الحياة الزينه ماهي مثل أسوار أعمامي !
طلعت تتمشى تحت ضو القمر ، بعيدة عن أهلها مسافة النُصف يوم ، فزّت من نطق شخص بحدة : بنت وش مطلعك كذا ؟؟
ألتفتت لجهة الصوت وشافت شخص طويل وعريض ، كم يشابه حبيّب القلب وأنيس الروح ، يشابه سطّام بالهيئة وبشكل كبير ، شهقت ونزلت دموعها بحرقة ، بكت بشكل مأساوي هي اشتاقت وشوقها مفضوح من عيونها ، عضّت شفايفها من ركض لها ونطق : أخو العيال ! ليه تبكين ؟؟ خوفتك ؟ أسف والله أسف
رفعت عيونها تشوف نظراته لها ، توسعت عيونه من لون الفردوس بعيونها ، نطق بثغر واسع : عيونك خُضر !
شهقت ورفسته بعيد عنها ، طاح على الأرض وركضت داخل البيت ، غطت عينها اليمين ونطقت : وين الحمام ؟
ابتسمت سراب بأستغراب وقالت : وشفيك وجدان أول مره تجين بيتنا ؟
اسرار ابتسمت وقالت : لا بس تغيير الأثاث عشان كذا ضيعت
سراب رفعت حاجبها وقالت : بس لنا عشرين سنة ماغيرنا الأثاث
اسرار زفرت بغضّب وقالت : خلاص أختي تحقيق هو وين الحمام ؟؟
سراب اشرت بيدها ومشت اسرار تركض ، دخلت ولعنت بتال وكل من له يد بوجودها هنا ، ماحصلت مرايا ولا معها جوال وماتدري وين العدسة راحت وفعليًا ابتلشت ، دخلت للحمام وسدّت خشمها من الريحة ونطقت : أكرهكم كلكم !!
زفرت بغضّب من تذكرت أنها ما عاد هي مُدعية عامة وأنتهت الحكاية بالرياض ، نزلت عيونها تشوف دبلته وعضّت شفايفها لثواني ونطقت : أتمنى ماتكون تخليت عني يالرسام
دق الباب وشهقت تلعن اللي يدق والعدسة اللي ابدًا ماهو وقتها ، تقدمت ونطقت برعب : مين ؟
نور ابتسمت وقالت : أنا نور
فتحت علطول ونطقت : العدسة طاحت مني !
نور ضحكت بخفه وشالت العدسة من خدها ، ابتسمت وقالت : كانت متمسكة فيك
اسرار ضحكت بكلافه ونطقت : غريب صح ؟
نور : خلصي ضبطيها بنتعشى ونمشي
اسرار : اخيرًا !
نور : كويس حتى أنتي ماحبيتيهم
اسرار : لا طبعًا بس أبي معقم
نور : غسليها والبسيها
مشت تطلع ورفعت اسرار حاجبها ونطقت : والله ما مصبرني عليكم الا ريم لأن عندي إحساس كبير أنها أمي
تقدمت تغسلها وتلبسها ، غمضت عيونها لثواني ومشت تطلع ، جلست بالصالة ومشت سعيدة ونطقت : العشاء يبنت
اسرار ابتسمت وقالت : ماتعودت على اللحم
سعيدة : ياي ! قومي بس وعن الدلع
اسرار ضحكت وصدّت عنها وهي من دخلت للبيت كسب اثامهم كلهم ، زفرت بغضّب ونطقت تحت انفاسها : وبتال جعله القص ماترك جوالي معي ؟؟
مرت دقايق طويلة وبطيئة ، لفّت من سمعت نفس الصوت لنفس الشخص ومشت سعيدة له ونطقت : لبيه ي ليث ؟
ليث نطق بحدة صوته وقال : وين أمي ؟ حمدان يبيها
سعيدة : بناديها تعال مافيه أحد
توسعت عيونها بصدمة وقالت : خير أنا فيه !!
وقف علطول من نطقت وألتفت يرجع للباب ، دخلت سعيدة وقالت بسخرية : وشفيك مشتطه ؟ مادرا عنك ومخطوب بعد
توسعت عيونها على مصرعيها ونطقت بحدة : وش قلت يامهووسة !! شكلك مقهوره عشانه م ألتفت لك
ضحكت سعيدة بصدمة وقالت : أخوي !!
صفر وجه اسرار وكأن الدم نفر منه ، كم تتمنى من الأرض تنشق وتبلعها ، سمعت ضحكه عند الباب ونطقت تحت انفاسها : الله يلعنك ي اسرار ! قومي قومي
مشت تلبس عبايتها وطلعت ، وقفت قدامه ونطق : ليه تخبين لون عيونك ؟
اسرار زفزت بغضّب وقالت : وش تقول أنت
ضحك ليث ونطق : سلامتك
مشت تتخطاه وتتجه للبيت ، وصلت وشافت الباب منفتح ونطقت : طلعوا صادقين
توجهت للداخل وفتحت الباب بالمفتاح اللي أخذته من شنطة نوير ، دخلت ورمت عبايتها وفتحت علبة موية ورمت العدسات بداخلها ، زفرت بغضّب وانسدحت على الكنب تشوف المروحة تدور فالسقف والجو أقل مايقال عنه كئيب ، الحياة نبذتها بعيد عنه بعيد وجدًا ، حتى ماتقدر تهرب من هالمكان لأنها تجهله وتجهل المسافات ، غمضت عيونها وسمحت صوت ورجعت تفتح ، شهقت من تذكرت أنها تركت الباب مفتوح وعضّت شفايفها برعب ، مشت للمطبخ وسحبت طاوه البيض اللي أكلت فيها سابقًا ، وقفت خلف الجدار وشافت الظل يقترب منها ، صرخت وضربت ، مسكت ريم الطاوه ونطقت : أعوذ بالله اش دا !!!
وقفت بصدمة تشوف أنثى بالأربعين من عمرها ، واقفة وعبايتها تتلون بالأورنج الفاتح ، نزلت الطاوه ونطقت : حسبتك أحد عيال الحاره !
ريم ضحكت وقالت : حرام عليكي كل هالأنوثه وعيال حاره ؟
اسرار مشت تنزل الطاوه ، تقدمت ريم تشوف نفسها بالصغر وابتسمت تتسأل عن هوية الأنثى اللي تشابهها وقالت : صح من أنتي ؟
اسرار خافت لوهلة ونطقت : وجدان
ريم ضحكت تجلس وقالت : أمي مين علمك الكذب ؟ وجداني ربت قُدامي وعيونها مو خُضر !
اسرار رفعت حاجبها وقالت : مين أنتي ؟؟
ريم : أنا ريم خالة البنات هِنا
اسرار : بس ماتتكلمين نفسهم
ريم ابتسمت وقالت : خالتهم بالاحترام
فسخت عبايتها وألتفت تنطق : أزهار فينك ي أمي !
دخلت أزهار ومشت لهم ووقفت من شافت اسرار ونطقت : بسم الله عليك الرحمن الرحيم والجمال !
صدّت اسرار بخجل وقالت : أنتي الحلوه
جلست أزهار ودخلت أبرار ونطقت : حلو ماجيتو تساعدوني
ريم : تعالي يالدلوعه
اسرار عضّت شفايفها وبكت بدون صوت ، تذكرت عِقد ولهجتها وضحكاتها من أشكالهم ، ماتدري إذا بترجع تشوفها ولا لا ، دخلت أبرار ونطقت : اشبها تبكي ؟
لفّت ريم لها وأشرت للبنات يقومون ، مشوا يدخلون للبيت وتقدمت ريم تمسك كتفها ، قلبها نبض من مسكت كتفها وشافت شامة خدها ، اختبصت علطول وارتفعت حرارة جسدها ونطقت برجفتها : اسرار
لفّت اسرار لها وشهقت ريم علطول ، هي من دخلت وهي شاكه لكن الحين تأكد كل حاجه قدامها ، غطت وجهها بيدينها وصرخت تبكي ، بكت اسرار برعب وقالت : لا لا لا لا تقولينها م أبيها ولا أبيك لا تقولينها تكفين !!
عضّت ريم شفايفها السُفلية ونطقت بحسرة : أمي وأول بناتي !
هزت راسها بنفي ووقفت ونطقت : لاا قلت لك يويلك تقولينها أنا م أعرفك لا تحوسيني وتذبحيني حية تكفين !
قامت ريم وسحبتها لحضّنها ، كانت الرجفة والدموع سيدة الموقف ولا وحده فيهم قادرة تسيطر على مشاعرها ، كانت تشوف البنات واقفين بصدمة ودموعهم تنزل بأنسيابيه ، عضّت شفايفها وبكت بحرقة وقالت : ليش مافكرتي فيني ليش ماحرقتيهم وخذيتيني منهم ليش تاركتني أعاني السنين الطويلة ذي !!!
ريم شّدت عليها وقالت : والله أنهلكت روحي وأنا أحاول فيهم يرجعوكي بس هددوني ببناتي..
دفعتها اسرار ونطقت : وشفتي أنهم أولى مني ؟؟ وجايه بكل برود تقولين لي أرجع لك !!
ريم غطت وجهها بيدينها تبكي وقالت : سوري ي أمي سوري ياروحي إني ما بذلت كل جهدي لك بس ما أبيكي بعد الفراق تروحي عني أمانه روحي تتقطع عليكي والله !
اسرار ضحكت بصدمة ونطقت وسط دموعها : أبوي وينه ؟
ريم بكت علطول وقالت : قتلوه
توسعت عيونها بصدمة وقالت : وش تقولين ؟!!
ريم ببكاء نطقت : بتال قتلو وطردني وخدوكي غصب عني من ثالث يوم فالعزاء !
طاحت اسرار بصدمة وقالت : تكفين تكفين خلاص
مشت لها تضّمها وقالت : خليني أشبع منك والله حعوضك كل حاجه فقدتيها بس ماتبعدي مني
اسرار حاوطت رقبة أمها وصرخت تبكي ، ضربت ظهرها ونطقت بحرقة صدر : تدرين قد إيش أشتقت لك وأنا ماتذكر ولا شيء عنك تدرين قد إيش تعبت وأنا أدور عليك ! أمي ليه يصير فيني كذا وتروحين بعيد عني تدرين كيف تخلوا عني ورموني ! تدرين إني متزوجه ولا ماتدرين !!
كانت ريم بحالة سيئة جدًا وهي تسمع كلام اسرار ، عضّت شفايفها ونطقت ببكي : أنا كنت أعد أيامي بدونك كنت أفكر حموت وأنتي ماشفتيني لكن ربك يقدر يسوي المستحيل وأسفه أني ماكنت زي إي أم توقف بزفاف بنتها..
قاطعتها اسرار وقالت : باقي فالملكه ماسوينا زواج
ريم مسحت على ظهرها وقالت : آخ يارب م أعظمها من لحظة ياقرة عيوني فيكي ي خلّف دُنيتي كلها !
اسرار ابتسمت وقالت : توني صرت بخير..
قاطع كلامها الغصة بحلقها وانهدت تبكي ، اشرت ريم للبنات ونطقت : هدي أختكم أسرار
جلسوا أبرار وأزهار ونطقت أزهار : أسرار خلاص لا تبكي
كانت بحضّن ريم دافنه نفسها ، تستنشق ربيع أمها ويزيد لهيبها ودموعها مع كل نفس تأخذه ، تقدموا وضموها كلهم وابتسمت تنطق : وعندي خوات بعد !
ريم ضحكت وسط دموعها وقالت : وأخوان كمان
رفعت راسها ونطقت : كم ؟
ريم ابتسمت ابتسامة عريضة وقالت : عندي من زوجي الثاني الله يرحمو سته ثلاثه بنات وثلاثه أولاد
اسرار ابتسمت وقالت : ماشاءالله ي أمي ماشاءالله
ريم مسكت خدها تبوسه وتنطق : أيار أكبر أولادي بعدو جاء جينار وبعدو سنجار ووقفت أولاد وجات أنهار وتزوجت خلاص وبعدها أزهار وبعدها جات الدلوعه آخو العنقود أبرار
اسرار ابتسمت وقالت : كلهم نهاية اسمائهم ألف وراء
ريم : عشانك
اسرار فركت خشمها تمنع نفسها من البكاء ، ابتسمت أبرار ونطقت : هدي دبلتك ؟
اسرار هزت راسها بالايجاب وابتسمت ريم تنطق : مين سعيد الحظ !
اسرار : تجين عندي وتشوفينه
مرت الساعات بدون رجعة نوير والبنات اللي تأخروا عمد من وصلتهم رسالة ريم ، ضحكت اسرار من نطقت أبرار : تعالي وتشوفي قد إيش أنا عضل !
ضحكت اسرار وصرخت من رفعتها أبرار وضحكوا ريم وأزهار عليهم ، طاحت عليها وضموا بعض ، كانت ريحة العايلة أعظم شيء مر على اسرار ، شيء هي كانت فاقدته من زمن طويل وأخيرًا لقته ، مشت أزهار هي وأبرار وطلعت للغرفة الثانية وتقدمت ريم ونطقت : تحُبيه ؟
اسرار عضّت شفايفها لثواني ونطقت : ماودي بس قدرني وأنا ماقدرت عليه
ريم ابتسمت ابتسامة عريضة وقالت : مين هو ؟
اسرار هزت راسها بنفي وقالت : بروح معك صح ؟
ريم ضمّتها ونطقت : أكيد مستحيل أتركك !!
اسرار : خلاص بتشوفيه
ريم ابتسمت ونطقت : عادي أنام معاكي ؟
اسرار : كنت بقولك بس خفت أزعجك
ريم تقدمت تبوس عيون اسرار وجبينها وتنطق : إصحك ي اسراري تفكري مرتين أي حاجه تبغيها قولي لي
اسرار ابتسمت وقالت : تمام عادي تعطيني جوالك ؟
ريم ابتسمت وقالت : اووها بتتصل على حبيب القلب
اسرار : أمي ! ضروري اطمنه
ريم ابتسمت وقالت : امسكيه
أخذت جوال أمها ومشت تطلع للحوش الخلفي ، كتبت رقمه اللي حافظته عن ظهر قلب ، ارتجفت يدها تدعي يرد ويحييها ويغيثها زود عن شعورها بلمّ شملها مع أمها ، انتظرت وقت طويل وقربت بتسكر وشافت المكالمة بدأت تنحسب ، فزّت تقرب الجوال وسمعت البريد الصوتي ، غمضت عيونها بقهر ورجعت تتصل مرارًا وتكرارًا ، ماوصلها رد وقفلت الجوال ومشت تدخل ، مشت للصالة وشافت ريم نايمه على عباية اسرار ، عبّست بملامحها ونطقت : يارب لا تحرمني منها يارب
مشت لها ودفنت وجهها بحضّنها ، ابتسمت ريم تستنشق ندى عطرها وريحتها اللي ماتغيرت من عشرين عام ، ناموا بأحضان بعض بعيد عن الناس كلهم ، أم وبنتها وأول بهجتها وفرحتها ، ليلة تسمى بأسم ' أم ولقت ضناها ' ..
~ الرياض ، بيت مطلق ~
دخل وهو يدندن معزوفته المعروفه وينطق : من بلاه الهوى ربي يعييّنه صابه الهم ولا مات مغبوون !
لفّ للجهة الثانية من الحوش وشاف جوري نايمه على الأرض ، فزّ يركض لها وشالها بين يدينه ، حاوطت أكتافه ونطقت بهمس : أبوي ؟
مطلق رفع حاجبة وقال : بسم الله عليك
نامت من جديد ومشى يدخل فيها ، دخل لغرفة ضاحي وفزّت صافية ، نزلها على السرير ونطق : تعالي
وقفت من سجادتها ومشت تطلع ، وصلوا للمجلس ونطق مطلق : وش صاير ؟
صافية بكت علطول ونطقت : مشعل طلقني
مطلق نطق بحدة : عسى م شر ماخذك هو عشان يطلقك !!
صافية رفعت كتوفها بعدم معرفة وقالت : والله مدري يامطلق وش جاه دخل يهاوش ويتهم جوري بإنها تكذب عليه وإن علي بريء !
مطلق سحب جواله واتصل عليه ، وصله الرد لكن كان من شخص ثاني يقول : مطلق ؟
مطلق صرخ بحدة وقال : لا عزرائيل !! وش معنى يطلق ويتهم بنته هاه ؟؟
مجيد انتفض من صوت مطلق ونطق : استهد بالله يامطلق مشعل مسجون
ارتخت ملامحه ونطق : هاه ؟
مجيد : انسجن قبل ساعات مؤبد عشانه قتل علي
شّد ع قبضته ونطق : وش تقول أنت !!
تقدمت له برعب ونطقت : وش !!
سكتها من نطق مجيد : والله يامطلق باعوه أهلي وحطوا السبب في مشكلة صارت قبل أسبوع بينه وبين علي الله يرحمه
مطلق : أحسن الله عزاكم في أخوكم
شهقت ونزلت دموعها بحرقة وقالت : مات !!!
مطلق بعد الجوال وقال : ترا بهفك بيدي لا مامات علي توفى ومشعل اللي ذابحه !
توسعت عيونها بصدمة وقالت : وش !!؟
مطلق : مجيد بجيكم بكرة أنا وضاحي
مجيد ابتسم وقال : ماتقصر يبو مشبب وأكيد إن اللي حصل بين مشعل وصافية ماهو حقيقي ويمكن خاف مشعل يسمعون بسجنه المؤبد وينفرون منه ولا ينحكم عليهم بعيشة تحت سخط أهلي اللي مارحموا ولدهم !
مطلق : الله يصلح الحال وأنا أخوك
مجيد : ماودي ابطي عليك ودعناك الله
قفل الجوال ولفّ وشافها تبكي ، سحبها يضمّها ونطق : طلقك ثلاث ؟
هزت راسها بنفي وكمل وهو يقول : أجل والله إنه خايف عليكم صدق
صافية بكت بحرقة ونطقت : وينه ؟؟
مطلق : مسجون ومؤبد تعرفين وش صار ؟
صافية نطقت ببكي : لا !
مطلق جلس وسحب الماء ونطق : أشربي وقولي لي وش صار لكم قبلها بأيام
صافية أخذت المويه وشربت ونطقت : أسوء الأحداث بقولها
مطلق : اسلمي يالعوده
صافية نطقت ببحة صوتها : دخلت قبل أمس على جوري وشفت رجلها تنزف وفيها جرح عميق ونظفته وعقمته وطلعت ماحصلت مشعل واختفى يوم كامل ورجع من مدري وين وصرخ علينا وطلقني طلقه وحدة وكانت جوري تبكي ومتمسكه فيه وتقول لا تناقض نفسك وهو كان يبكي معها
مطلق ابتسم بضيق وقال : نعى وجهي له رمى نفسه للموت وأهلك حياته عشان بنته والله ونعم !
صافية نطقت بعدم فهم : كيف يعني ؟؟
مطلق همس لها ونطق : جوري صار بينها وبين علي شيء وجاتكم مصابه وأكيد أن مشعل فهمها وعرف وشفيها وركض لأخوه وشافه مصاب ولا ميت مدري وجاكم يخوفكم منه ويبعدكم غصب عشان م تسألون وراه
شهقت صافية ونزلت دموعها بحرقة وقالت : لا لا بنتي ماتسوي كذا
مطلق : هي تحت السن القانوني ترا ! وغير كذا دفاع عن النفس !
صافية مسحت دموعها ورفعت حاجبها وقالت : لحظة مطلق ! كيف تعرف هالأشياء كلها ؟
مطلق : الحُب علمني
صافية : من ؟
مطلق ابتسم وقال : بو مطحس وراي مشوارين بكره تقدرين تطلعين ؟
ابتسمت تبوس جبينه وتنطق : نوم العافية
مطلق باس خشمها ونطق : أنتي ووجودك عندي هو عافيتي والله
مشت تطلع وسحب فراشه ، كان بيكلم عِقد ويقولها عن شغله بكره لكنه بيجبر نفسه يخلص كل أشغاله ويحضر فالمطار بالوقت المناسب ..
~ قصر نهيّان ، الجبيّل ~
كان مغمض عيونه بالصالة ، فتحها بهدوء يشوف سلمان
'
انتهى البارت ادعموني بنجمة وكومنت عشان اتحفز اكملكم 🩵
" رجعنا من جديد ، عطوها حقها يحباااااني ولاتنسون النجمة انفدا خشتكم 🫦 "