قدر مراهقة

الجزء 88

#قدر_مراهقة
الجزء 88
جبت 8 ايام وانا في سبيطار منتحركش من بلاصتي كلش يجيني للفم فنهار نبقى وحدي مع لفرمليات والطبيبة مخلاونيش وصاهم مجد عليا وزيد كلينيك بريفي يقومو بيا بلا مزيتهم وفليل يبات معايا مجد يوكلني يشربلي دوايا يعاوني نروح لتوالات يبدلي قشي يدوشني ، ايه هو الي يدوشني وانا ساكتة منقولو والو غير ساكتة اصلا منقدر نقولو والو وهو زي الحيط ميحكيش معايا خلاص كأني منبانش قدامو يخدم خدمتو ويروح . فالفترة هذي زاد تعلقي ببنتي نظل نحكي معاها ونقصر نطلب السماح حبيتها تاع الصح وراني غير نستنى في الوقت الي تجي لدنيا هذي ونحضنها ونبوسها (راح تقولو وش الي هلاك تبدلي رايك بهاذ السرعة شتو اليومين الي مفقتش فيهم شفت بنتي في منامي تبكي وكل مانجي نرفدها تختفي نحوس نحوس ملقيتهاش من بعد جا مجد وفي يدو طفلة تشبهلي بزاف بدا يلوم فيا وبعدها داها وناض). عرفت غلطتي وندمت وراني نحاول نصححها وليت نقرا على الحمل والحوايج الي يضرو وينفعو البيبي تقريبا عرفت كلش ، بصح الشي الي مخوفني هو سكوت مجد خايفة منو بزاف جامي سمطني كان ديما يحكي معايا يالوكان كلمة وذوك كلمة صغيرة ميقولهاليش . فقت على صوت لفرملية تنوض فيا عاونتي رحت لدوش غسلت ورجعت قالتلي بلي اليوم نقدر نخرج ومن بعد تجي الطبيبة تشوف حالة البيبي واذا لازم نزيد نقعد ولا لا. هي خرجت شوي هك جا داخل مجد حالتو حالة عينيه منفخين ليساغن دايرين حالة باين من وجهو تعبان مهلوك 10أيام وهو شايط يجري بين خدمتو وسبيطار تعبتو بزاف. لحقت طبيبة دارتلي الايكو شفت بنتي اليوم قفلت 4شهر سمعت صوت دقات قلبها كان اجمل صوت سمعتو طلبت منها تعطيني تسجيل لصوت قلبها بغيت نسمعو وصورة للايكو ، جات تدي تليفوني باش تسجل فيه مدلها مجد تليفونو ودا الفوطو من عندها. كي خرجت قولتلو معليش تبعثلي الصوت سمطني مجاوبنيش زدت قولتلو ناض يعيط عليا _ بلعي ر** فمك احمدي ربي مزالني متحكم في اعصابي ومبردتكش بطريحة على فعايلك _ علبالي غلطت وراني ندمانة _ غلطتي وندمانة لوكان ماتت بنتي لوكان متي انت وش كنت حاندير انا ميفاه نكمل حياتي بلا بيكم مخممتيش فيا نقولو معليش غلطت معاك ونستاهل ووالديك خاوتك نسيتيهم مخممتيش فيهم كيفاه راح يتحملو فراقك.
#فريال