قدر مراهقة

الجزء 68

#قدر_مراهقة
الجزء 68
هو خرج وانا رجعت رقدت تعبت بزاف وقلبي دار عليا لوكان نبقى واقفة نرد مصارني امالا نهرب لرقاد خير ملجأي الوحيد بلا بيه نهبل. فقت من رقادي ولا نقولو غيبوبتي لانو الناس العادية ترقد 8 سوايع برك وانا نرقد 10 سوايع ل14 ساعة وهكاك نوض ديخانة منشبعش الرقاد. روحت دوشت وخرجت لبست قشي شيحت شعري شميت ريحة القهوة جاية من الكوزينة كي طليت لقيتها رنيم توجد فلفطور كي حست بيا دارت صبحت عليا وباستني على خدي وانا غير ساكتة ومخليتها على راحتها ذوك راني فشلانة ولا راني بردتها بطريحة نوريلها السماح كيفاه داير عندي . قعدنا فطرنا سقسيتها شكون جاب لحوايج هذو لانو الدار كانت فارغة من نهار العرس ماجبنا والو وزيد حاط في بالو منعرفش نطيب،  قالتلي بلي العساس جابهم وصاه مجد وعلى لغدا ياك حانخرجو لبرا _ ايه صح نسيت خلاص هيا نوضي البسي او راح الحال _ مزال جهدها 11 _هذاك هو ياربي ندورو شوي او سخون حال رانا في اوت الشمس تصرع _ ايه عندك الحق. وكدنا رواحنا انا لبست حجاب في البلو سيال وخيمار بيض ومعاه بشماق ثاني فلبلو سيال ودرت ساك بيض ورنيم لبست روب فولار حد الركبة وباسكات بيضة و ساك بيض المكياج مدرناش اصلا منحبوهش،  رفدت دراهم من لخزانة قيس مانشريو انا ورنيم ونتغداو.  هبطنا لتحت جينا خارجين عيطلنا العساس هذاك قالنا بلي مجد وصاه يدبرلنا طاكسي توصلنا تكون ثقة لانو ولاية كبيرة كيف هذي فيها بزاف الناس ويجيوها من كل بلاصة على جال سهرات الليالي.  ركبنا ديراكسيو السونتر فيل هبطنا بقينا ندورو ماخلينا لا بازار لا حانوت لا سوق كامل دخلناهم والشي الي يعجنا نشريوه،  رنيم شرات 5حجابات شرعية تفاجأت من قرارها مكنتش متوقعة انو تتحجب وحتى واذا تحجبت حايكون خيمار برك مش حجاب شرعي،  فرحتلها من قلبي هكا خير احسن حاجة ممكن ديرها الطفلة هي انها تستر روحها حاجة مادوم ودنيا فانية نهار تموت ماتدي والو غير اعمالك ( ذوك تقولو ياك مام انت كنتي مش متحجبة وراجلك الي دارلك الحجاب بالاجبار وفرضو عليك ،  لا هو كان سبب برك انا اصلا كنت ناوية نديرو كي نرجع من العطلة). انا ثاني زدت شريت زوج حجابات ،  لقيت غوب ميني فكحل سامبل جاية محلولة على صدر نصو يبان وبذرعين فولار عجبتني شريتها ، كي جينا رايحين نسلكو لقينا واحد الفرويتي خدام لثم عيفلي قلبي بحركاتو وكي شفتو كيفاه يتحرك زي النسا ويتعوح على الرجال قلبي طلع منو حكمتها بالسيف ، سلكنا كل وحدة بدراهمها عيت في رنيم محبتش. روحنا تغدينا وكيف العادة انا خلطتها كليت كلش وش نشوف قدامي ندومونديه وناكلو كامل حتى وجعتني كرشي وزدت عليها قرعة كوكا هذيك لكبيرة عيات فيا رنيم منشربهاش اي تضرني وانا كيف لحمارة مسنطحة وياريتني سمعت كلامها وحبستها لانو ضرتنا بزاف ولزوج عانينا منها وكانت سبابنا.
#فريال