قدر مراهقة

الجزء 86

#قدر_مراهقة
الجزء 86
فات على هذاك النهار سمانة انا منحكيش مع مجد خلاص وكرهي ليه زاد اضعاف مضاعفة وليت وين مانشوفو نوض نعيط وهو غير يساعف فيا. سمانة وانا في عذاب من جيهة لوحم ومدار فيا ومن جيهة خايفة يعرفو دارنا بحملي وينكشف كلش ولثم نتفضح ونفضحهم معايا. فليل روح مجد جابلي لعشا كيف العادة يدخل يوكلني بالسيف عليا ويشربني الدوا ويخرج ، الليلة هذي قعد قدامي وقالي بلي عرس بنت خالتو غدوا اذا نروح معاه نبدل الجو شوي انا رفضت منيش قادرة نتحرك وزيد بأي وجه حانقابلهم بيه ولا بكرشي هذي الي خارجة تبخص بيا، عيا فيا باش يديني محبيتش خشنت راسي وقعدت في شومبرة نخمم كيفاه نطيح البيبي ونتهنى منو هزيت تليفون وبديت نحوس لقيت بزاف معلومات وثاني بلي القرفة مضرة للجنين لوكان نشرب بزاف رام تقتل البيبي. رقدت على امل غدوا نتخلص منو ونرجع لدارنا مستحيل نزيد نبقى معاه قبل منعرف بحملي كنت ناوية نبدا معاه من جديد بصح بعد ماعرفت صاي كرهتو وموليتش حاملة نشوف خليقتو لوكان نلقاه يتحرق قدامي نزيد نحرقو الرخيس في جرتو رفدت بولد حرام انا الي طول عمري محافزة على اسم بابا جا هو خلاني نطيحو ونعفس عليه. فقت الصباح روحت دوشت فت للكوزينة ملقيتوش قولت هذي فرصتي لبست حجابي وخرجت شريت قرفة وجيت لدار خبيتها نخاف يشوفها ويعرف على وش ناوية. روح هو دوش ووجد روحو جا يهبل للحظة غرت منو وبغيت نتفو، كي شافني نخزر فيع قالي كوليني خير _ حاشاك انا مناكلش لحم الخنزير _ بصح نعرف لكلاب ياكلو كلش _ راك تقول عليا انا كلبة _ حاشا لا انت كلبة انت حمارة برك _ لحمار يعرف خوه _ شتي حمار وحمارة مع بعض جينا كوبل يهبل. سمطتو مرديتلوش جا خارج من بعد رجع قالي نوصيك مكلاه ديري كاش حاجة هني روحك واقعدي عاقلة لا تشوفي شي ميعجبكش، تقول حس بواش ناوية ندير _ معندي مندير رايحة نرقد وصاي _ كشما حتجتي عيطيلي نجيك _ روح برك خليني نرقد. هو خرج وانا قعدت نستنى شوي وطليت على البالكو لقيتو ديمارا باللوطو، رحت جرية للكوزينة حطيت الماء والقرفة يغليو من بعد قطرتهم وحطيتهم في قرعة وطحت نشرب حتى تحرق راسي نص قرعة شربتها وخليتها فوق البوطاجي. روحت تكيت شوي هكا ناضلي سطر في كرشي غطيت روحي مليح باش كي يجي يحسبني رقدت وقعدت نتلوى كل مايقوى السطر فاتت ساعة وانا نحس بالدم يهبط مني فرحت بزاف واخيرا راح نتهنى منو ولا منها منعرف اذا طفل ولا طفلة (هوصح قالولي بلي طفلة بصح منيش مصدقتهم ومش حابة نعرف وش عندي) بصح كل الي نعرفو انو بسبابو راني هنا. نضت حطيت ورقة على الباب كتبت فيها مكلاه تقلقني راني راقدة ومنيش حابة نشوف وجهك وسكرت الباب بالمفتاح ورجعت لبلاصتي السطر قطعني وليت نبكي بصح قلت لازم نتحمل الوجع باش نتهنى منو ومن شوفت وجهو وبقيت ندعي ياربي نموت انا وياه، انا هكاك ونسمع صوت الباب تحل اوووف وش جابو هذا ثاني ياخي راح للعرس لوكان غير ميدخلش ويشوفني بالحالة هذي. طبطب فالباب درت روحي راقدة زاد عاود شوي هكا راح باين شاف الورقة، زدت نص ساعة والسطر قتلني والدم داير حالة وحكمتني الرجفة حاسة روحي راح تخرج هو جا طبطب فالباب كي محبيتش نفتح بدا يعيط قالي وش راح ديري بالقرفة الي فوق البوطاجي الكمية هذيك كامل ويااا نندب حناكي شافها كيفاش نسيتها وش راني بغلة كان لازم نسيح الي بقات. بقا يعيط وانا فشلت كي محكيتش معاه كسر الباب ودخل جا عندي وقفني قالي وش كنتي ناوية اهدري انا سكت اصلا عيت نحكي الوجع كل دقيقة يزيد هو كي شاف وجهي صفر فهمها طايرة بلي درت حاجة نحا لغطا وهو يتخلع من الدم الي تحتي عيط عليا ياالمهبولة وش درتي وعلاه عليك الناس مشتاقة للذرية وانت تقتلي فيها المهم قعد يعيط انا كلمة سمعتها وعشرة لا مكنتش في وعي هزني هكاك بالغطا وداني لسبيطار من ثم ماشفيت على والو.
#فريال