قدر مراهقة

الجزء 01

#قدر_مراهقة
#بقلم_فريال_اللفعى 🐍😒
اول مرة نحط القصة في 23ماي 2023
الجزء 1
نحبك كلمة تعبر على مشاعرنا وكي نقولوها لشخص معناها عندو مكانة في قلوبنا ومستعدين نحاربو الدنيا على جالو ونديرو كلش باش يكون الطرف الثاني بخير وسعيد حتى ويكون عايش بعيد علينا المهم يكون مرتاح، الحب هو انو تشوف الشخص الي تحبو سعيد مرتاح نفسيا وجسديا مهوش تملك ماشي شرط الشخص الي تحبو يكون معاك وبجنبك باش تبين حبك ليه. الحب الحقيقي هو انو تشوف الي تحبو فرحان ومرتاح في حياتو حتى ويكون بعيد عليك مع شخص غيرك المهم يكون لباس عليه.
الشخص الي يحب ميآذيش ميدمرش الي يحبو يصونو ويحتارمو ميذلوش يحاول يخليه فرحان ميسرقولش فرحتو ميقضيش على سعادتو واحلامو وبرائتو وطفولتو.
خارجة من ليسي كارهة جد حياتي اصلا انا منحبش نقرا نجي هكاك باش نكمل رقادي. نمشي ونكركر في رجليا حتى نحس بيد جبدتني كانت صاحبتي ولا نقولو اختي الي مجابتهاش ماما قالتلي وش بيك هبلتي وينو عقلك الطوموبيل كانت راح تخبطك وانت مش فايقة _عادي الموت حق وكامل راح نموتو _نسكت خير انت مهبولة وانا منحبش نعاندك راح تجهليني ونوض نسبك ونربح ذنوب في جرتك_زعما تحبيني وانت حابة تدخلي للجنة وحدك وتخليني نتشوط فجهنامة_ياربي صبرني وشكون قال بلي انت راح تدخلي لنار وش درتي زعما _فرعون بعثلي دعوة نروح عندو ميصلحش نخليه وحدو وانتوما اقعدو فالجنة _هههههه والله غير مهبولة فشلتيني بالضحك ياخي طفلة ياخي _علبالي بلي نهبل وبلا بيا تسماط الدنيا _غير حطي رجليك فلرض مكلاه تديها في روحك بزاف وطيري علينا_متخافيش كي نطير نديك معايا _يعجز اللسان عن الكلام والله معاك تتلفلي _ومعاك غادي نكوووون هيا كملي خلينا نغنيو _ههههههههه ياربي شوفي الناس كامل راهي تشوف فينا ذوك يقولو وش لمهابل هذو _اخطيك منهم واقعدي انا تعبت _هيا نوضي نروحو _شوفي علبالي نمشي خطوة تبداي تحكي وتقصري امالا خلينا نقعدو هنا ونحكيو وكي نخلصو نوضو انا رجليا ضروني من الوقفة _لي يشوفك يقول كنتي تحرثي وانت نهار كامل لاصقة فالكورسي وراقدة_حاسدتني حتى على طرف حطب نقعد عليه_نحسد الناس كامل غير انت منقدرش راكي ختي صديقتي نصفي الثاني توأم روحي _قلبي الصغير لايتحمل كل هذا الكلام _ايا نوضي بزايدي من التمسخير الاختبارات بقالهم سمانة وحنا نتمسخرو _راكي قلتيها بقاتلهم سمانة ومش راح نشوفك فيها خلي نقصرو شوي، جات قعدت قدامي على الطروطوار كملنا قصرتنا طبعا بالتمهبيل والتمنشير تعرفو لبنات على وش يحكيو. حنا هكاك نضحكو بالصوت ويوقف فوق راسنا الشيطان كابوس حياتي وش نكرهو منشموش حتى هو ميحملنيش وين يلقاني ينوض يعيط عليا، لوكان نلقى الموت نطيشها عليه.