واذا إن الله كتب لي في فراقه
رضيت لو ما أجد اللي له يساوي!
.
،
في هذا اليوم كان من المفترض ان يكون زواجها لكن ظروف زوجها منعته..لعلها فرصه لها وله ..لا تدري لعل في الامر خيره.. لا تنكر شوقها له الذي يتنامى له في غيابه ..
لحظات لترى دخول بشاير زميلة العمل بيدها كوب قهوه،لم تكن كالسابق بدت شاحبه وتلم شعرها بطريقه فوضويه جداً..منذ تزوجت كانت تختفي وتعود لتذهب لمكتبها مباشره وتباشر عملها بصمت.. لم تكن هكذا في السابق كانت كثيرة الثرثره عن كل شي مايعنيها ولا يعنيها..
وضعت الكوب امامها بابتسامه باهته/تفضلي
ابتسمت سلهام/مشكوره.. من حطينا آلة قهوه وحنا مرتاحين.. كان جيتي وضيفناك
بشاير/حبيت تشاركيني قهوتي.. وبس.. دايم اتقهوا عندكم
لا يخفى عليها هذا الاسلوب وتغيرها/ايوه وشلون بشاير اللي تغيرت علينا بعد الزواج.. شدعوه سحبتي علينا يا زميلاتك، والا من لقى احبابه.. نسى اصحابه.
بضيق/اي احباب واللي يرحم والديك.. والله ياليت افضي بس علشان اتواصل مع رفيقاتي واهلي كان ابرك.
فضّلت سلهام السكوت يتضح ان بشاير تريد الفضفضه وهي لا تريد سماع ما يزعجها، لا تمتلك ذلك الفضول لسماع قصص قد تؤلمها وتصدمها..
حاولت بشاير الحديث معها لتفضفض/ياحظك يا سلهام واضح انك قويه ومبسوطه بحياتك
استغربت حديثها واستنكرت كيف حكمت/وانتي كيف استنتجتي اني مرره مبسوطه وقويه.. وش دراك يمكن مريت بمشاكل الله اعلم بها وساكته وصابره ومبتسمه
بشاير بضيق/مهما كان ماهي مثل مشاكلي يا سلهام..انا جالسه اعاني
تلك النوعيه من البشر لا يعجبونها من يظنون ان لا احد عانى مثلهم/انتي تبالغين.. هذي حزة ضيق وبتعدي.. وبتتمنين انك ما قلتي هالكلام لي
اردفت بشاير/تبين تعرفين معنى النكد انك تتزوجين واحد بعد انتظار سنوات و كنتي تظنين انه عاقل وناضج دامه بأواخر الثلاثينات.. وبعد الزواج تنصدمين ان عقل المراهق اكثر اتزان منه..شخص مهمل.
ردت وهي تعبث بقلمها على الطاوله/تقدرين تعدلينه باسلوبك، مافيه شخص ماله مفاتيح دخول لعالمه
وضعت كوبها على النضد وهي تشعر بإرتجاف يديها/كل شي له حل الا شخص ما يخاف الله مايصلي ويفتخر بعلاقاته بالبنات ويجاهر بالمعاصي ويضربني!
سقط قلمها من يدها بصدمه وقررت الرد/رجل ما يصلي لا تتعبين نفسك وتنكدين على نفسك.. اتركيه وارجعي لاهلك.. اصلاً جلوسك معه حرام وهو مايصلي!
نزلت دمعتها ومسحتها بسرعه/من قالك اني ما رجعت.. لكن الله وكيلك ماقصر فيني وشتمني وسوا بي السوايا واتهمني بالتقصير معه.. تمسكن عند ابوي وابوي وقف معه ضدي وقالي ارجعي بيت زوجك ماعندنا دلع بنات واخواني كلن وراء زوجته.. مع ان أمي وقفت معي لكن امي وش بتسوي اذا ابوي مطلقها ولا يسمع لها كلمه
