.
.
إختارت الفراق لتُبقي على محبته .. فلو انها بقيت معه لماتت مشاعرها كمداً!!
كعادتها تخرج لعملها باكراً.. دخلت وهي تتجه الى مكتبها وتفكر بما ستقدمه في الخطه القادمه للاداره بما أنه قد تقرر استحداث فصول للمتفوقين والمتميزين دراسياً..ذهبت لمديرة الفرع ولم تجدها في مكتبها.. رفعت يدها لترى ساعة معصمها (شفيهم يتأخرون هذول.. والا انا اللي اداوم بدري!!)
عادت الى مكتبها مجدداً وهي تجلس بتملل لم تأتي شريكتها في المكتب والتي تجلس في الطرف الآخر من الغرفه، ابتسمت وهي ترى كوب على مكتب زميلتها يتزين بشعار "نادي الاتفاق" وتحدثت بعفويه/ماني مصدقه!
دخلت في هذه اللحظات وهي تراها عند مكتبها وتمسك بكوب القهوه/السلام عليكم
التفتت اليها سلهام بابتسامتها/وعليكم السلام ..وش ذا يا نوال
ابتسمت نوال واجابت بهيام/العشق.. ماتعرفين بعد شعار الاتفاق!!
وضعت سلهام الكوب على مكتب زميلتها وهي ترمقها بنظرات استغراب وبإبتسامتها المشاكسه/اعرفه بس.. اول مره اشوف اتفاقيه على الطبيعه!!
شعرت نوال باحباط وهي تاخذ الكوب منها/والله عاد ابوي عضو شرف اتفاقي و عايلتنا كلها اتفاقيه.. وانتي؟
عادت لتجلس على مكتبها و هي تجيبها بفخر/العااالمي.
كشرت في وجهها/اجل الله يعيني عليك
ضحكت سلهام وهي تشير اليها/ماعلينا من هالسالفه هاللحين.. المهم شسوييتي بالملف اللي طلبته المديره.. ترى اليووم بنجتمع كلنا وبنسوي الخطه سوا
تذكرت نوال وهي تعبس/يا ررربي يا سلهام البارح سهرت ليلي كله مع بنتي بس كحه وحراره، ويادووب فضيت راجعت الملف شوي ونمت..
شعرت بملل بعد عذرها المعروف/اووه بزارين وسهر و.و.و ، شرايك تقصين قصة حياتك بعد!!
نوال برجاء/بليييز سلهام تعالي راجعي معي الباقي.. بكرا يجيلك بزارين بعد واقدر ظروفك..
اتجهت اليها وهي تعبس/حبيبتي اذا جبت بزارين هذاك الوقت ماراح اسهر عليهم لحالي.. بيسر ابوهم بعد.. ليه داايم انتي اللي تسهرين.. ماقد سمعتك تقولين ابوها اخذها
ردت بغباء النساء/يختي يداوم و..
قاطعتها سلهام وهي تاخذ الملف وتفتحه وهي وتتحدث بسخريه/ويطلع من الدوام يرتاح شوي بالبيت ويطلع للاستراحه او يتمشى مع الشلّه وينبسط ويجي دايخ يبي ينام... اووه معك حق ماعنده وقت بس انتي اللي متفرغه وما وراك دوام ولا شي.
تفاجأت نوال بها وضحكت/والله كأنك معي بالبيت
سلهام بجديه ممزوجه بسخريه/ما يحتاح ، معروف الاسباني هذا جدوله
