في كل حزة لك مع البال ميعاد

بارت"26"

انتهت ايام العزا اللي صعبه وثقيله على اهل الديره كلهم وعلى اهل بيت ابو سطام اللي كانو يشوفون هذي الحياه باهته بدون وجوده

عند ميعاد كانت داخله حالة اكتئاب وطول وقتها بلحالها وتكره احد يكلمها لانها ضعيفه وهي تكره تشوف نفسها ب هذا الضعف ورافضه ان احد يقرب منها وفضلت تعتزل الكل وتكون بغرفتها بعيد عن الناس كلهم تنهدت بضيق وقامت تصلي الوتر ودعت بكل حرقه ودموع :- "يارب ألطف بقلبي يارب صبر وثبات وقوه " واتجهت لسريرها تبكي وغفت بدون ماتحس
غاليه طول وقتها مع امها ودموعها تسابقها تكره الموت لانه اخذ منها اعز اشخاصها تنهدت بحزن وهي تشوف امها منهاره بصمت ورفعت راسها للسماء ودعت:- يارب استودعتك قلب امي يارب كن معها
ام سطام كانت ماسكه الحداد وضايق خاطرها وهي تشوف وضع وحال عيالها اللي كلهم منكسرين ومحد فيهم قوي لفت راسها تشوف محمد يمسح دموعه بكل حرقه واتجهت له تحضنه وتشاركه دموعه
سلطانه وبناتها كانو ببيتهم ويجبرون بعضهم بالكلام ويقوون امهم لانها مصدر القوه ل ليلى واخوانها الباقين
سالم وسطام طول وقتهم برا يتهربون من مشاعر اهلهم ودموعهم وحزنهم وضيقهم
نياف وسلمان وماجد كانو مشغولين ب اشغال الجد واعماله وقررو يمسكون المزرعه والغنم ويهتمون فيها لجل تبقى لهم ذكرى منه

السيف وسياف كانو كل يوم ينتظرون ام السيف ترجع لهم وتطمنهم على زوجاتهم
تنهد السيف بحزن بعد ماسمع امه تقول :- ميعاد ماهي مع العالم دايم وهي بحجرتها وماتبي احد يشاركها ضيقها وحزنها
تنهد السيف بكل ضيق وقرر ياخذ رقمها ويتواصل معها ويحاول يطلعها من حزنها وضيقها قبل يكبر معها

بعد اسبوعين من العزا كانو مجتمعين ام السيف وام سطام وليلى وسلطانه وام نياف وجالسين بالحوش لجل يغيرون جو ام سطام
رفعت ام سطام بحب وهي تشوف ميعاد تمشي ومتجهه لجلستهم وقالت :-يامرحبا بنور هالمكان ليه تطولين عني ي امي
ميعاد بتمثيل ابتسامه:- الله لايحرمني منك ومن ترحيبك يامي واتجهت لها وباست راسها بكل حُب وحنيه
كملو جلستهم بحب وحنيه وسوالف وتجمعو حفيدات ام سطام كلهم حولها وصار هذا روتينهم كل يوم يكوونون معها وحولها

بعد 7شهور مضت مابين ايام ثقال وحزن ودموع وضيق واهل الديره كانو يساندون عيال ابو سطام وبناته خلصت ام سطام العده وبدو يتعايشون مع الفقد صحيح ان قلوبهم مكسوره لكن الحياه جبرتهم يتعايشون بكل قوه  ...

يوم الخميس الساعه5 العصر اتجهت ام السيف ل سلطانه بعد ماتصلت عليها وقالت لها بجي اكلمك بموضوع يخص سياف والمها
دخلت ام السيف لبيت سلطانه واستقبلتها بكل حب وترحيب وحفاوه ودخلت عليهم ليلى

ام السيف:- اقول ياسلطانه عارفه ان جرح قلوبكم توه طري لكن وليدي سياف مستعجل ووده بالعرس هالفتره وجيت اخبركم ولو الحزن بيرجع ابو سطام والله مانعيش الفرح يوم
ليلى:- صح والله وهذي الحياه لابد تمشي ياخيتي
تنهدت سلطانه بضيق وهي أخرت زواج بنتها سنه لاجل ظروف ابوها وتعبه وموته ونطقت:- بكلم المها واشوف رأيها
ابتسمت ام السيف بحب وقالت:- عسى الله يوفقهم ويتمم لهم على خير يارب
كملو جلستهم وسوالفهم المعتاده وكانهم خوات واكثر من خوات حُب ليلى وسلطانه لام السيف حب حنون ودائماً يشوفونها قطعه منهم

عند ميعاد جالسه على سريرها وتتامل السقف تنهدت بضيق من سمعت جوالها يرن رفعت جوالها واستغربت مين هذا ؟
ميعاد:- اهلاً مين معي ؟
السيف:- معك زوجك السيف ابغى اقولك كم كلمه وابيك تسمعيني لين اخلص
ميعاد بخوف:- تفضل قول اللي عندك
السيف :- ياميعاد هذا قضاء الله وقدره وحزنك ودموعك وضيقك هذا يتعبه وهو في قبره خليك قويه وصابره وراضيه ب قضاء الله وقدره وهذي الدنياء تحتاج منا صبر وقوة عزم والله اني ضايق من حزنك وانها اشد الايام اللي مريت فيها ماقويت اشوف الحزن كاسيك ولا اسوي شي انا معك وانا سندك وانا امانك لا تضيق بك دنياك بوجودي
بكت ميعاد بكل حرقة وهي فعلاً تشوف هالدنياء كلها ضايقه فيها وكاتمه على انفسها
السيف تنهد بضيق وهو يسمع شهقاتها اللي ماهي قادره تخفيها وقال:-        كفكفي دمعك ترى دمعك ثمين
‏.                   كل شي إلا دموعك فاهمه
وبدا يهدي فيها وقرر مايقفل المكالمه الا وهو سامع ضحكتها
تنهدت ميعاد ومسحت دموعها بكل حنيه وهي تشوف كيف يحاول يخليها قويه ويساعدها تطلع من حزنها ابتسمت بحب من سمعته يقول :- هذي المكالمه عذري فيها انك حزينه المره الجايه وش عذري منك يابنت جسار ؟
عجزت ميعاد تخفي ضحكتها من كلامه اللي كان يوضح لها خوفه منها لانها تمشي على مبادئي الديره وعاداتهم ومتاكد انه مستحيل تسمح له يسمع صوتها المره الجايه وقال :-
‏اضحكي وان مابغيتي تضحكين
‏أنتي اجمل وجه وانتي باكيه