- في دبي
سهير : يا هتحكي يا مش هتاخدي الموبايل
هنا ' بتتمالك أعصابها ' : هو انتي عاوزه ايه ، عاوزه ..
_ قاطعها صوت مكالمة فيديو كول
سهير ' حطت ايديها علي بوقها ، ضحكت بإستهزاء ' : اسكتي انتي دلوقتي
سهير | خبت الكاميرا ، فتحت الفيديو
_________________
_ في عربية يوسف
علياء | بعيدة عن الكاميرا ، قلعت الهيلز وحطيته في الشنطة
يوسف | قدام الكاميرا ، الشاشة سودا
يوسف : هنا !! ، في مشكلة عندك في الموبايل
علياء ' بتقرب علي يوسف قدام الكاميرا '
يوسف | بأشارة لعلياء بإيديه انها تستني
علياء | مش فاهمة وبتقرب
سهير ' جابت الكاميرا علي وشها ' : مش هعرف اكلمك يعني ولا ايه
يوسف | بسرعة ملحوظة جدا ، بعد علياء بايديه عن الكاميرا
علياء | إتخضت من تصرف يوسف ، بصتله بإستغراب
سهير ' خدت بالها ' : معاك حد
يوسف : فين هنا !
سهير ' لفت الكاميرا علي هنا ' : أهي هنا كويسة قاعدة قدامي
هنا | بصتله إن غصب عنها
سهير ' لفت الكاميرا عليها ' : فين علياء !
يوسف : إبقي كلميني يا هنا وانتي لوحدك سلام
يوسف | قفل الفيديو مع سهير
يوسف | ظهر علي وشه انه اضايق
علياء : عملت كده ليه
يوسف : خايف عليكي وعلينا
علياء : هيجي يوم وتعرف واتعرف عليها كمان فمش للدرجادي انك تخاف علينا منها
يوسف : اقسم بالله وأكتر من الدرجادي
___________________
_ يوسف وصل علياء ، رجع البيت
يوسف | دماغه مصدعة من التفكير ، قاطع تفكيره صوت رسالة من علياء
' ازيك انا خطيبتك فاكرني '
يوسف | ضحك وبيتصل عليها
علياء : بقالك ساعتين مكلمتنيش شكلك مغصوب علي الخطوبة
يوسف : عاوزه تتخانقي
علياء : بصراحة أه
يوسف : يالا اتخانقي
علياء : مبقاش يهمك والدبلة مقويالك قلبك
يوسف : النكش ده وراه إيه
علياء : إحم
يوسف : لا
علياء ' بتضحك ' : لا إيه انت عرفت هاقولك ايه
يوسف : أه
علياء : طب هقولك
يوسف : لا
علياء : اسمعني
يوسف : لا لا
علياء : هو لا وخلاص
يوسف : أه
علياء : اديني فرصة هقنعك
يوسف : مش هقتنع بحاجة مرفوضة
علياء : ليه مرفوضة هسافر يوم مع صحابي وأهل صاحبتنا معانا كمان مش لوحدينا
يوسف : واخو صاحبتكم وصحابه
علياء : لا اله الا الله وانا مالي ومالهم اسمعني بس الرحلة اللي عاملها اخو صاحبتنا هنروح كلنا في باص واحد واول ما نوصل هانبقي احنا لوحدينا وهما لوحديهم
يوسف : خلصتي
علياء ' علي أمل انه يوافق ' : أه
يوسف : لا مافييش سفر
علياء : ربنا علي الظالم والمفتري واللي بيقول لا
____________________
_ يوم الجمعة
علياء | واقفة قدام دولابها ، بتحاول تختار طقم تخرج بيه مع يوسف ، مسكت شماعتين عليهم طقمين وخرجت تاخد راي مامتها
علياء : ماما ماما
صابرين | بتتكلم في الموبايل بتشاورلها تستني
علياء | واقفة مستنية صابرين تقفل المكالمة
ناصر | بيفتح باب الشقة
صابرين | بتقفل المكالمة
صابرين : هالة ام كريم
علياء ' بتتجاهل ' : طب قوليلي البس ايه
صابرين : اجلي بقي الخروجة عشان هما جايين يباركلولك
علياء : أأجل إيه ، مقولتلهمش اننا مش موجودين ليه بس ياماما
صابرين : عشان أجلت معاهم قبل كده اما اتاخرتي في الشغل
علياء : بس انتي عارفة اننا ماجلين الخروجة ديه من بدري
ناصر : الخروجة هتتعوض عادي مينفعش الناس تقدرنا ويقولوا جايين ونعتذر عشان نخرج ، انا هكلم يوسف اعتزرله هو اكيد هيقدر
علياء | مشيت من قدامهم وهي مضايقة ، دخلت اوضتها رمت الهدوم ، بتهز رجلها بضيق
- بعد دقايق ، صوت رنة موبايلها بإسم يوسف ، بتفكر هترد تقوله إيه
علياء ' بترد ' : بص زيي زيك والله لسه عارفة حالا
يوسف ' بضيق ' : مين الناس المهمة اللي جاية
علياء : عمت خالد جوز بسمة واهل خالد
يوسف : ما اهل خالد كانوا موجودين في الخطوبة
علياء ' بنفاذ صبر ' : أيوه هما جايين النهاردة كده مع طنط هالة عشان تبارك
يوسف : ماشي يا علياء
علياء : ما قولتش لبابا حاجة طيب
يوسف : قولتله مش هنتاخر وهخليها تلحق الضيوف قالي هتروحوا في ايه وتيجوا في ايه مش مهم وبكرة هنبقي موجودين كلنا في عزومة حسين
علياء : مضايق مني انا ليه طيب
يوسف : مش مضايق منك .. روحي اجهزي عشان الناس اللي جاية ونبقي نتكلم
علياء : هتعمل ايه دلوقتي طيب هتنزل او هتروح لعمو حسين
يوسف : لا
علياء ' بتفكير ' : ما تيجي
يوسف : أجي فين
علياء : عندنا كإنك كنت قريب من البيت وانا هخلي بابا يكلمك وتعالي
يوسف : لا
_ علياء خارجة من اوضتها لاوضة مامتها
علياء : ماما
صابرين : ايه
علياء : بما ان في ناس جاية وخالد ما تكلمي يوسف يجي وسطنا بدل الخروجة اللي اتاجلت
صابرين : ما يجي يابنتي هو محتاج عزومة
علياء : ازاي يا ماما هيجي من نفسه كدا
صابرين : هخلي ابوكي يكلمه اما يرجع عشان بعته يجيب حلو للناس اللي جاية
علياء : لسه هنستني كلميه انتي علي طول دلوقتي او كلمي بابا يكلمه
صابرين : ماشي ياست علياء خشي البسي وافرديلنا وشك
- بعد وقت .. علياء قاعدة وسط التجمع العائلي بتبص علي موبايلها من فترة للتانية
كريم | عينيه بتروح عليها كتير
علياء | في انشغالها بالموبايل ، بترفع عينيها شافت تركيز كريم عليها ، ارتبكت ابتسمت بخجل ورجعت عينيها علي الموبايل
صابرين : تيجوا نسيب الرجالة ونقعد جوا لوحدينا احسن
صابرين | خدت هالة ومامت خالد وريهام وبسمة وعلياء ودخلوا الريسبشن الصغير بالبلكونة
علياء | بتتصل علي يوسف
علياء ' بتقوم من مكانها ، تدخل البلكونة ' : انت فين
يوسف : مع حمزة
علياء : مش هاتيجي !
يوسف : لا
هالة ' بتنادي علي علياء ' : العروسة بتاعتنا راحت فين
علياء ' لهالة ' : جاية يا طنط
هالة : تعالي الناس كلها فرحت بيكي وانا اللي زعلت عشان كنت حاطة عيني عليكي لكريم
- يوسف سمعها
علياء | اتصدمت من صراحة هالة
يوسف ' بيستوعب اللي سمعه ' : مين ديه وازاي تقول كده
علياء : طنط هالة معرفش انا استغربت
يوسف : هو مين اللي عندك
علياء : طنط هالة وجوزها وابنها وخالد وعيلته وبسمة
يوسف : ابنها ده اللي هو كريم اللي شوفته قبل كده !
علياء | بتهز دماغها
يوسف : متهزليش دماغك انطقي
علياء : أه
يوسف : مقولتيش ليه من الاول انه جي معاها
علياء : مكنتش اعرف وانت مسالتش
يوسف : طب اقفلي
علياء : هتعمل ايه
يوسف ' بيجز علي سنانه ' : اقفلي انا جاي
___________________
_ بعد وقت قليل يوسف وصل لبيت علياء
علياء | طالعة تفتح الباب
يوسف ' اول ما شافها ، بيبص بغيظ ' : هو فين
علياء : هو مين
يوسف ' بغيظ ' : علي اخري منك
علياء ' بتكتم ضحكتها ' : وجيت ليه
يوسف ' داخل من باب الشقة ' : عدي يومك
علياء ' بتضحك ' : يختي جميلة ولا كل الناس يختي غيورة شبه النسناس
يوسف | بيداري ضحكته بنظرات غيظ
علياء ' بتضحك ' : تشرب ايه طيب
يوسف : اعمليلي قهوة
علياء : متاكد ، عاوزني انا اللي اعملك قهوة
يوسف : أه مش هاتبقي اوحش من انهارده
_ يوسف دخل سلم علي كل اللي قاعدين
كريم | شاف يوسف ، افتكره مبينش للقاعدين انهم اتقابله قبل كده
يوسف | سلم عليه وبيحاول يداري انه مش طايقه
_ علياء | داخلة بالقهوة ليوسف
يوسف | مراقبها بعينيه ومراقب نظرات كريم
كريم | رفع عينيه عليها للحظة اول ما دخلت
علياء ' بتديله القهوة بإبتسامة ' | إنه يفرد وشه
يوسف | بيبصلها انها تمشي
ناصر : علياء اعملي شاي وكريم تحب تشرب ايه
خالد : لا صبيلي انا بيبسي
كريم ' بص لعلياء ' : لا لا ولا حاجة شكرا
علياء : لا ازاي لازم تشرب حاجة
يوسف | بيجز علي سنانه
كريم : ممكن قهوة مظبوطة
ناصر : بلاش يا علياء خلي بسمة تعملها
كريم ' ضحك ' : ليه بس ما شربتها قبل كده وكانت حلوة
_ وفي أخر اليوم كلهم ماشيين وبيسلموا علي بعض
كريم | سلم علي يوسف ، ومد ايديه يسلم علي علياء
علياء | بإحراج وعينيها مابين يوسف وكريم مدت ايديها في ايديه وسلمت عليه
_______________________
يوسف | في البيت
علياء | بتتصل عليه
علياء : هننام واحنا زعلانين من بعض ؟
يوسف : انتي شايفة ان اللي حصل ميزعلش
علياء : يزعل ونص كمان انا في الموقف معرفتش اتصرف واقوله مبسلمش
يوسف : لا هو مش واحد لسه مقبلاه جديد ده واحد اتعود انه بيسلم عليكي عادي
علياء : ممكن تقول عليا منافقة اني بمنع نفسي اسلم علي ناس وناس لو تفتكر يوم فادي لو مكنتش انت خدت الخطوة وحطيت ايدك في ايديه انا كنت همد ايدي لا الموقف ولا الوقت كانوا يسمحوا اني احرجه يا يوسف
يوسف ' بيتك علي سنانه ' : علياء متقوليش الغلط غلط وترجعي تبرريه
علياء ' بتنهيده ' : طب قولي اللي يرضيك وأنا هعملوا
_____________________
_ في جنينة بيت حسين
علياء ويوسف قاعدين قدام بعض وباين إنهم مضايقين
نهلة ' مرات حسين ' : حسين حكالي عنكم كتير مبسوطة اني اتعرفت عليكم
صابرين ' بابتسامة ' : والله احنا اللي كنا عاوزين نتعرف عليكي وكان نفسنا تكوني معانا في الخطوبة
نهلة : لولا الورق كنت نزلت مصر أول ما يوسف قالي
يوسف ' قايم من مكانه ' : عم ناصر قهوتك مظبوطة
ناصر ' بيلعب شطرنج ' : أه
حسين ' بيلعب قدام ناصر ' : أعملي معاك يا انا يا حماك النهارده
يوسف | دخل المطبخ
بسمة ' بتوشوش علياء ' : متخانقين ؟
علياء | بصتلها بضيق
نهلة ' خدت بالها من سكوت علياء ' : اللي بتساعدني مشيت بدري ادخلي اقفي مع يوسف في المطبخ وشوفي ماما تشرب ايه شكل العصير بتاعي مش عاجبها
صابرين ' ضحكت ' : ابدا والله انا بس مبحبش العصير
نهلة : يخبر مش تقولي طيب طب تحبي تشربي ايه
صابرين : ممكن شاي
نهلة : طب يالا يالولو اعمليلي انا وماما شاي
علياء | داخلة المطبخ ليوسف
يوسف | بيبعد عينيه عنها
علياء : لسه زعلان
يوسف : لا
علياء : حقك عليا
يوسف ' بيتمالك غضبه ' : ماشي يا علياء
علياء | بتدور علي الشاي والسكر والكوبايات ، واقفة قدام الكاتيل ، متعصبة من تجاهله ليها
علياء ' من غير مقدمات ' : هو انت عاوز ايه يا يوسف
يوسف : مش عاوز حاجة
علياء ' بنرفزة ' بتخبط بايديها علي الرخامة ' : متجاهلني وقاصد انك متجبش عينك في عيني مع ان والله والله ربنا يعلم آني مضايقة عشانك وعمالة اراضي واعتذر
يوسف : إهدي
علياء : لا مش ههدي انت مكنتش كده اما بيحصل خلاف واتفقنا من الاول ان مافيش زعل بينا يبات وشوف مع اول مشكلة بتتجاهلني وكإني مش موجوده
يوسف ' حط ايديه علي ايديها ' : مش مضايق منك متعصب من امبارح وعارف ان ملكيش ذنب انك تشوفي اي حاجة وحشة من عصبيتي فمانع نفسي منك
علياء ' بتهدي ' : مش لدرجة تتجاهلني يا يوسف
يوسف : مقدرش والله العظيم ما اقدر
علياء : ايه اللي يرضيك لو عوزني اولعلك في كريم هولع فيه
يوسف : متنطقيش اسمه
علياء : اللي ما يتسمي
يوسف ' ضحك ' : واحد تقطعي علاقتك بيه نهائي، اتنين تمسحيه من الانستجرام والفيسبوك ملمحهوش عندك ، تلاتة ملكيش مرواح عند بسمة لو هيكون هناك ، وصح وأمه برضه يبقي واحد اتنين تلاتة امر
علياء ' كإنها مسمعتش ' : اربعة ، خمسة ، ستة
يوسف : هنهزر
علياء ' بتلؤم بتلف وشها تصب الشاي ' : فيها ايه ما اهزر ولا اروح اهزر مع كريم يعني
يوسف | باصلها بغيظ وبيجز علي سنانه
علياء ' خارجة من المطبخ ، بتتحرك للجنينة ' : عقبال ما اعمل الشاي في بيتنا
يوسف | باصلها وضحك
حسين : هاتروحي تتفرجي علي شقتك امته
علياء | بصت لناصر
ناصر : ذي ما يحبوا
يوسف ' خارج وراها ' : ياريت في اقرب وقت ونظبط فيها براحتنا
ناصر : خلاص اتفق مع علياء علي يوم وعرفونا
_____________________
_ يوسف صحي من النوم كتب رسالة لعلياء
' حقك عليا ، بحبك ♥️ '
_ علياء | صحيت من النوم بتفتح الموبايل شافت الرسالة
ابتسمت ' عارفة ان الموضوع خلص ، عارفة ان يوسف متخطاش زعلها واحساسها انه متجاهلها 'وهتكتب رسالة مسحتها واتصلت
يوسف : صباح الخير
علياء : ما تيجي أخطفك
يوسف : أجهزي بسرعة جايلك
علياء | اتنفضت من مكانها تشوف هتلبس ايه ، ووقفت قدام المراية تحط ميكاب بسيط
يوسف | جهز ونزل
_ بعد وقت علياء نزلت في ميعاد الشغل يوسف مستنيها تحت العمارة
يوسف | واقف قدام العربية مستنيها
علياء ' ابتسمت ، بلطافة ' : قونايدين ، قونايدين دن دن ، دندن دندن دن
يوسف | ضحك فتحلها باب العربية
علياء : إيه الدلع ده
يوسف : من حق الجميل يدلع
علياء ' بتركب ' : يولا يولا
علياء | ركبت العربية
يوسف | لف يركب من الناحية التانية
علياء ' لفت وشها عليه ' : واحد كله كله كوم اتنين وزعلك انت كوم تلاتة انا عندي الدنيا تزعل ولا تزعل مني يوم
يوسف : اربعة ، خمسة ، ستة
علياء ' ضحكت ، ضربته في كتفه ' : يوه متقلدنيش .. سابعا وده الاهم انا كمان بحبك ♥️
يوسف : ما الخناقات طلعت حلوة أهي
علياء ' بصوت طفولي ' : أوي أوي ياحسن
يوسف ' بيضحك ' : هتخطفيني فين
علياء ' بنظرات خبيثة ' : عمو شلبي
يوسف : فول وطعمية
علياء ' هزت دماغها بحب ' : أه ولا اقولك .. كشري
يوسف ' بص في الساعة ' : دلوقتي وبعديها نروح علي الشغل اكيد لا !
علياء : نفسي فيه
يوسف : اوي يعني بتتوحمي
علياء : أه يرضيك العيال يطلع فيهم عتساية ورزاية
يوسف : بتبقي حاجة واحدة
علياء : لا ما انا نفسي في توأم
يوسف ' بيضحك ' : كشري كشري كله الا نفس ام العيال
_ المطعم فاضي مافيهوش غير علياء ويوسف
علياء | بترج ازازة الدقة
يوسف ' بيضحك ' : معلمة كُشري
علياء : أحطلك
يوسف : حبة صغيرين
علياء ' بتحط ليوسف دقة ' : حبة صغيرين ايه الكشري بيحب الدقة
يوسف | بيضحك
علياء ' بتقلب وبتاكل ' : تحفة تحفة تحفة ، كل عدل بدل ما اعملك فيها عبلة كامل في عودة الندلة واخليك تاكل غصب
يوسف ' بياكل ' : وربنا باكل
_ في محل عصير القصب
يوسف | طلب اتنين عصير قصب
علياء ' بتضحك ' : شفشق عاوزة شفشق عصير
يوسف ' بيضحك علي ضحكها ' : احنا واكلين كشري مش شاربين بيره علي اللي انتي عملاه ده
_ شربوا العصير ، ركبوا العربية
علياء | بتضحك بشكل هستيري
يوسف : بدأت اقلق عليكي
علياء : انت عارف الخروجة الجامدة ديه كانت خروجتي المفضلة كل عيد بعد الصلاة والتليفون اللعبة اللي كان بيفضل يقول الله عليك ياسيدي
يوسف ' بيضحك ' : كان نفسي اقول الحمدلله انك كبرتي للاسف لسه ذي ما انتي من غير التليفون اللع
_ سكت شاف ست واقفة علي رصيف بتبيع لعب اطفال ، ركن العربية ونزل
علياء ' باستغراب ' : رايح فين ، هتفجر بيا العربية
_ بتشوف يوسف راح فين ، لقيته واقف بيشتري تليفون لعبة اترسمت ابتسامة حب علي شفايفها
يوسف | رجع العربية ، بيديلها التليفون
علياء : الله الله حاسة اني رجعت ١٠ سنين
يوسف : كده اقول لسه ذي ما انتي وبالتليفون اللعبة
علياء : ووقتها قلبي كان فاضي دلوقتي مليان حب ليك
_____________________
_ في الشركة
علياء | بتخبط علي المكتب
يوسف ' مريح ضهره علي الكرسي ' : اتفضل
علياء | داخله في ايديها كوباية شاي اخضر
يوسف : هتعمل ايه
علياء : متستهونش بتعمل كتير
يوسف : أحلفلك بإيه اني اكلتي قليلة علي اللي بتعمليه فيا ده
علياء : احلفلك بإيه اني بغذيك ، اشربها بس أهم حاجة الشاي الاخضر حتي لو كلت جمل شاي اخضر بعدها ولا كانك كلت حاجة
يوسف : ولو مش شايف حاجة
علياء : امسك الكوباية كده
يوسف | خد الكوباية من ايديها
علياء : كده انت شايف وذي الفل باي يعسل اشوفك بكرا
_____________________
_ في بيت إنجي
فاطمة | ماسكة دبلة علياء ، بتقيسها
رحمة : المشكلة مش شايفاه هو
منار : اما مش هو مرتبطة بيه ليه
انجي ' بتضحك ' : اما اكلمه اتسلي بيه والاقيه جي يخطبني بجد
منة ' بتضحك ' : هي فعلا
علياء ' بتضحك' : يابنتي حرام عليكي ، حتي محمد كان معجب بيكي وصدرتيله وش خشب
رحمة : يجدعان عاوز يجيبلي شبكة ب ١٥ الف
فاطمة | لبست الدبلة
علياء ' بصت لفاطمة بحب ' : تحفة في ايديك ما شاء الله عقبال دبلتك يارب
فاطمة | ابتسمت بإبتسامة مكسورة
علياء : فال حلو كنت بفضل البس في دبل صحابي واجربها علي ايدي لحد ما لبست دبلتي
فاطمة ' بترفع ايديها قدام عينيها ، بتسرح في شكل الدبلة في ايديها ' : حلوة اوي
منار ' لرحمة ' : فين المشكلة ما ده اللي في مقدرته يجيبه
علياء : صح
رحمة : ال ١٥ الف بجيبوا ايه دلوقتي دبلة محترمة ومحبس
انجي : انتي عاوزه ايه يعني
رحمة : مش شايفين شبكة علياء معدية ال ٥٠ ألف
علياء | بصتلها بإستغراب
___________________
_ اليوم التاني
علياء | صحيت متاخرة طلعت بنطلون شارلستون وسويتشرت وطرحة بسرعة ولبستهم وبتحط حاجتها في الشنطة ، وصلت لباب الشقة بصت في ايديها ملاقتش الدبلة رجعت الاوضة تبص علي الكوميدينو ، دخلت تبص علي حوض الحمام ، والمطبخ مش لاقياها
صابرين ' صاحية من صوت خبط في الشقة ' : صباح الخير حاجة ضايعة منك
علياء : الدبلة مش لقياها
صابرين ' بخضة ' : إيه يلاهوي ضيعتيها فين ولا وقعتيها
علياء' بخوف ' : مش عارفة مش فاكرة قلعتها فين
صابرين | بدأت تزعق علي استهتار علياء ، وانها بترمي حاجتها ونسيانها لكل حاجة
علياء ' بتكلم منة ' : احنا روحنا سوا انا قلعتها في الطريق
منة : لا بس انا حاسة انك نسيتيها في ايد فاطمة
علياء : لا انا فاكرة اني خدتها منها
منة : اساليها يا علياء مافيهاش حاجة
علياء : اتكسف احرجها
صابرين ' بتهديها ' : روحي شغلك وانا هدور عليها هنا ان شاء الله هلاقيها ، ومتقوليش ليوسف حاجة
_ علياء وصلت الشركة ، وشها مخطوف من العياط والحزن ، منة بتتصل بعلياء
منة : علي فكرة انا سألتهم علي الجروب
علياء : ايه اللي خلاكي تعملي كده
منة : عادي يا علياء وبعدين اللي يفهم غلط يتفلق عمتا كله بيقول انه مشافهاش وانك ماشية بيها
علياء : والله ما فاكرة
منة : ان شاء الله هتلاقيها اتعاملي عادي متبينيش ليوسف
علياء : حاضر
_ يوسف | خارج من مكتبه قريب من مكتب علياء قابله موظف في الشركة وقف يبص معاه علي اوراق ، بص علي علياء كانت مشغوله في الورق واللاب توب
بعد وقت قليل ' علياء ' داخلة مكتب يوسف بورق وحاطة ايديها اليمين في جيب السويتشيرت ، يوسف بيتكلم في الموبايل وعينيه عليها وهي داخلة ، سابت الورق علي المكتب واتحججت انه بيتكلم في الموبايل وقالتله انها هتخرج ، بأيديه شاورلها انها تستني
يوسف ' قفل المكالمة ' : قالعة الدبلة ليه
علياء | استغربت
يوسف : مش عشان مدارية ايديك فأنا مخدتش بالي وانتي قاعدة علي المكتب وكل ما اقرب منك تداريها
علياء ' اتربكت ' : أصل .. كنت قلعاها وانا نايمة صحيت متاخر لبست بسرعة ونسيتها
يوسف : بتقلعيها ليه اصلا
علياء : مش بحب افضل لابسة دهب كتير بقلعها لو خايفة تقع وانا بغسل المواعين واحيانا قبل ما انام
يوسف : مالك طيب مخضوضة ليه
علياء ' بتهدي ' : مش مخضوضة
يوسف ' بهدوء ' : هي ضاعت منك ؟
علياء : لا لا نسيتها في البيت
يوسف : مضايقك مقاسها او شكلها اغيرهالك
علياء : لا والله
يوسف : وراكي ايه بعد الشغل
علياء : مش ورايا حاجة
يوسف : هنروح نتغدا مع فادي وصاحبته
علياء : كده ، خليها يوم تاني
يوسف : كده إيه
علياء : مش لابسة حلو
يوسف : لا شكلك حلو
_______________
_ علياء | داخلة المكان مع يوسف ، لافت نظرها لبس البنات اللي حواليها ولبسهم ، بصت ليوسف لقت عينيه مبتتلفتش علي أي حد في المكان ، وصلوا لترابيزة فادي وصاحبته ، يوسف سلم عليهم ، فادي عرف صاحبته علي علياء سلموا علي بعض
_ يوسف بعد عنهم يعمل مكالمة شغل ، علياء قاعدة مش مرتاحة ونظرات صاحبت فادي ليها وللبسها
صاحبت فادي ' قربت من ودن فادي ' : ديه اللي جو خطبها
فادي ' نغزها في كتفها ' : بس ، علياء ساكته ليه مش عاجبك المكان
علياء : لا المكان حلو اوي
يوسف ' رجع ، بص في وش علياء ' : مش مرتاحة ليه ؟
علياء : المكان مكتوم حاسة اني مش قادرة اخد نفسي وصوت الموسيقي خاضضني
يوسف : نطلع نقعد في الاوبن ايير
علياء ' هزت دماغها ' : لو ينفع
يوسف | نده علي الويتر يطلب منه انهم يغيروا الترابيزة
علياء| بتاخد نفسها
يوسف : مرتاحة كده
علياء ' بتهز دماغها بابتسامة ' : أه
- بعد وقت قليل علياء بدأت تاخد علي الجو وتتكلم مع صاحبت فادي وياخدوا علي بعض ، يوسف باين عليه اهتماهه بعلياء وانشغاله بيها اكتر من وجود فادي معاهم
يوسف | قفل المكالمة بيلف وشه يرجع للترابيزة لقي فادي في وشه
فادي : شغل ولا بتعط
يوسف ' ضحك ' : شغل انت ايه نظامك مع تالا
فادي : تالا في دبي فريدة في مصر
يوسف : اتهد
فادي : وانت ايه الدنيا
يوسف : في ايه
فادي : مافيش حاجة كده علي جنب
يوسف : هي علياء وبس
فادي : متملاش
يوسف ' بملامح ضيق ' : اللي بيحوشني عنك كل مرة اني مش عاوز اخسرك
فادي : في ايه يعم تنشنت ليه مجرد كلام وبنهزر
يوسف : هي مش مجال للهزار بينا يا فادي وقولتلك انها مش نزوة
علياء | رايحة ليوسف ، سمعته ووقفت مكانها
يوسف : بحبها ، وبحب حياتي ونفسي وهي معايا عشنا مواقف مختلفة وتفاصيل كتير بقت جزأ من يومي وحياتي يعني لولا علياء مكنتش عرفت ألاقي نفسي وأحب
علياء ' قاطعتهم ' : يوسف
يوسف | باصلها
علياء : مش يالا عشان اتاخرت !
____________________
- في العربية
علياء باصة علي المراية بتظبط طرحتها ، مامتها بتتصل ردت عليها
صابرين : لقيتها يا مسطولة كانت واقعة منك تحت السرير
علياء ' بعفوية ' : بجد لقيتيها قلبي كان هيق..
_ سكتت وبصت بجمب عينيها ليوسف
_ قفلت المكالمة مع مامتها
يوسف : لقيتي الدبلة !
علياء ' بصت ليوسف ' : مش الدبلة حاجة كانت ضايعة
يوسف : هو انتي متخيلة اني لو عرفت ان الدبلة ضاعت هتخانق معاكي
علياء ' عرفت ان يوسف كان فاهم من الاول ' : مش عارفة ماحبتش اضايقك
يوسف : حاجة متضايقنيش ياستي فداكي ويجيلك غيرها واحسن منها
علياء ' بابتسامة ' : ينهار ابيض ينهار ابيض خلاص بقي لقيناها
يوسف : متخبيش عليا حاجة تاني
علياء ' ابتسمت ' : سمعت كلامك مع فادي
يوسف : سمعتي ايه
علياء : اللي قولته
يوسف | هز دماغه
علياء : أنا خايفة
يوسف ' بصلها بإستغراب ' : خايفة .. من إيه ؟
______________________
_ في بلد أهل علياء ، بعد ما وصلوا سلموا علي العيلة
شروق ' بتاخد علياء بالحضن ' : العروسة اللي كانت ذي القمر
علياء : كان نفسي تيجي أوي
شروق : بابا مرضاش ياخدنا معاه
علياء : هو فين
شروق : بيصلي العصر ألا فين خطيبك مش جي ده لو مجاش ابويا هيتخانق معاكم ده شارط علي عمي ناصر يجيبوه عشان ملحقش يتعرف عليه في الخطوبة
علياء ' ضحكت ' : يوسف مش حمل عمي
شروق : ولا احنا
_ بعد وقت قليل ، علياء قاعدة مع قرايبها بنات وولاد وسنهم قريب من بعض ، ماسكة موبايلها بتتصل علي يوسف
يوسف ' رد ' : ايه يحبيبي
علياء ' بتقوم بعيد ' : اتخطفت ولا لسه
يوسف ' ضحك ' : لسه جايلك اهو ونشوف الموضوع ده
علياء : إنت فين
يوسف : المفروض اني وصلت
علياء ' باصة من البلكونة بتدور ' : مش شيفاك .. أه أهو اركن ' بصوت عالي ' عصام قول لبابا او عمي ان يوسف جه
يوسف : وهو انتي قاعدة مع عصام
علياء ' ضحكت ' : هو عصام بس ده عصام ومعتز واحمد وشادي
_ عصام فتح الباب ليوسف وفي ايديه علبتين جاتوه وطبق حلو
يوسف ' بيبص لقي طفل ٨ سنين ' : انت عصام
عصام : أيوه
يوسف ' بيسلم عليه ، بيضحك ' : يراجل مش تقول من بدري
يوسف | دخل سلم علي ناصر وعلي عم علياء
علياء | واقفة جمبهم مبتسمة لابسة عباية بيت بكم وطرحة متزحلقة مبينه جزء من شعرها
يوسف | باصلها ، وبص علي لبسها ، مد ايديه سلم عليها وولاد وبنات عمها وعيالهم الكبار والصغيرين ، بص علي لبس علياء
علياء | مدت ايديها تسلم عليه مستغربة بصاته ليها
_ الرجالة بتتغدي في مكان والستات في مكان ، وفجأة سمعوا صوت ديجي
علياء ' بتشيل الاطباق في المطبخ مكان الاكل ' : إيه ده فرح
شروق : أه فرح جمبينا شوية ونطلع السطوح نتفرج
علياء | قابلت يوسف خارج من الحمام كان بيغسل ايديه مكان الاكل
شروق ' بتضحك ' : يوسف شكله ميعرفنيش
علياء : مسلمش عليكي
شروق : لا كنت بوضب الطبالي للاكل مشوفتوش
علياء : بسبسبس
يوسف | رفع عينيه عليها
علياء : ديه شروق بنت عمي
يوسف : ازيك يا شروق
شروق : الحمدلله مبروك الخطوبة
يوسف : الله يبارك فيكي
شروق | سبقت علياء علي المطبخ
علياء ' شايلة الاطباق بايديها الاتنين ، بتقلده ' : ازيك ياشروق
يوسف | حط ايديه علي دماغها وحرك الطرحة علي اودام يداري شعرها
علياء | اتكسفت من ردة فعله
يوسف : العباية ضايقة وشعرك نصه باين
علياء : الطرحة بتتزحلق
يوسف ' بغيظ ' : والعباية بتلزق !
علياء : يوسف
يوسف : طلعتي عين يوسف اتفضلي دخلي الاطباق وشوفي اي حاجة تانية البسيها
علياء : ألبس ايه
يوسف : معرفش ان شاء الله تلبسي ملحفة اي حاجة غير اللي انتي لابساه ده
_ العيلة كلها متجمعة منهم اللي بيتكلم ومنهم اللي بيلعب طاولة ، علياء نازلة لابسه عباية سودا واسعة جدا وطرحة
يوسف | بيلعب طاولة مع عم علياء ، سمع صوت علياء نزلت ، باصلها لقاها غيرت لبسها
علياء | بتبص ليوسف بغيظ
يوسف | خلص لعب ، بص في الساعة
يوسف : عم ناصر هتمشي أمته ؟
ناصر : شو
علي ' عم علياء ' : تمشوا فين والله ابدا هتباتوا وتمشوا بكره اخر النهار
ناصر : يا علي لا هناخد سهرتنا معاكم ونمشي
علي : والله ما يحصل
يوسف : خلاص يا دوب امشي انا
علي : لا انت ولا هما كلكم بايتين معانا لحد بكره
يوسف : مينفعش والله عندي شغل
علي : بكرة الجمعة
يوسف : مقابلة مع عميل
علي ' بشدة ' : اجلها خلاص انا حلفت ما حد فيكم ماشي
علياء ' بعتت ليوسف رسالة ' : عشان خاطري خليك السهرة هنا بتكون حلوة 🥹🤍
علي : البيت كبير والبنات هتبات في شقة ام شروق
علياء | طالعة بصينية شاي علي السطوح
يوسف ' بيتكلم مع طفلة صغيرة وبيمسح دموعها ' : خلاص اما يجي هزعقله ومش هخليه يزقك ولا يكلمك كده تاني
شادية : هو ضربني وزقني وخد من ايدي اللوليتا
علياء ' بلهفة ' : الله في لوليتا هنا ، وبعدين خدي هنا قاعدة مع خطيبي لوحديكم ليه
يوسف ' بصلها وضحك ' : بنحكي مع بعضينا شوية
علياء : أه يخطافة الرجالة ياصغيرة انتي
شادية ' بتضحك ' : شادي تحت
علياء : وزعقتله واتخانقت معاه كمان انزلي بقي افتحي شنطتي خدي منها فلوس وروحي هاتيلك وهاتيلي وهاتيلنا كلنا لوليتا
يوسف ' بيفتح محفظته ، بيديها فلوس ' : استني خدي فلوس اهي
علياء : استني هي هتاخد من الشنطة
يوسف ' مسك ايد شاديه ادالها الفلوس ' : اهم حاجة اللوليتا لعلياء
_ شادية نزلت
علياء ' بتضحك ' : اللي يشوف شادية وشادي يكره الاطفال التوأم
يوسف : شادي شقي وبيتغابي علي اخته
علياء : طالع لابوه
يوسف : ازاي
علياء : ابن عمي ده كان بيضرب مراته كل علقة وعلقة يا يوسف شادي طالع زيه غبي هنا الراجل يضرب مراته عادي
يوسف : عشان متخلفين
علياء : مش متخيلة اصلا ايه المشاكل اللي ممكن تحصل توصل انه يعمل كده يعني نتخانق انا وانت واعصبك واجلطك تقوم حادفني بحاجة تفتحلي دماغي
يوسف : تتقطع ايدي انا اكسر دماغك اه افتحها لا
علياء ' ضحكت ' : لا بجد
يوسف : تتقطع ايدي يا عاليا ، الموضوع ملوش علاقة بيحب اللي معاه ولا لا مافيش راجل ييحب او بيكره يضرب واحدة
علياء : ربنا يكملك بعقلك يا حبيبي متقعدش مع عمي كتير
يوسف ' بيضحك ' : عمك ده رهيب عملها ازاي واتجوز اربعة ومقعدهم في بيت واحد
علياء : ششش عملها ازاي معملهاش ازاي ملناش دعوة بص متهتمش ولا تسال ولا اقولك متبصلوش لا يكون الموضوع معدي ولا حاجة
يوسف | بيضحك
- شروق وولاد عم علياء طلعوا قعدوا مع يوسف
علياء : هو خطيبك فين
شروق ' بحزن ' : بابا مرخم عليه وعليا عشان ينجز في الشقة ومش بيعبره ولا بيدخلوا في حاجة تخصنا
علياء : عمي دماغه ناشفة وصعب
شروق : عارفة بقالي قد ايه مش عارفة اشوفه ٥ شهور وكل ما يكلم بابا عشان يجي يقوله لا والمرة اللي تيجي فيها تكون جبت الشقة
علياء : خلاص فكي ان شاء الله هتتحل
شادية ' طالعة معاها شنطة مليانة لوليتا ' : ابلة علياء اللوليتا أهي
علياء ' خدت منها الشنطة وعينيها بتطلع قلوب ' : قلبي قلبي قلبي
علياء | بتوزع علي اللي قاعدين
يوسف : مش عاوز
علياء ' بتبرقله ' : ياخدها
يوسف | خدها من ايديها حطها جمبه
علياء ' بتاكل اللوليتا الطرحة بتتزحلق وشعرها بيبان ' : حلوة اوي
شروق ' بتضحك عليها هي وشادية ' : طفلتين
علياء : كان نفسي فيها اوي
يوسف | بيتكلم مع ولاد عمها ، عينيه بتروح عليها ، ماسك نفسه من الضحك
شروق ' ميلت علي علياء ' : ابويا حبه اوي
علياء : أها ، ايه ده قصدك علي مين
شروق : يابنتي علي يوسف
علياء : قال حاجة
شروق : قبل ما اطلع لقيته بيشكر فيه مع عمي ناصر وبيتكلم عنه بالخير
علياء | ابتسمت
شروق : يالا نلعب شايب ' بتنادي علي الولاد ' ما يالا بدل ما كل حبة قاعدين لوحديهم نلعب كلنا كوتشينا
شادي : بس بأحكام
عصام : ونحكم علي شادية تاكل رمل
معتز ' سنة ٢٦ ' : اتلم ياه منك ليه
شادية : ها هاو معتز ويوسف موجودين مش هتقدروا تعملولي حاجة
_ ١٠ اشخاص سنهم مختلف بيلعبوا الشايب علياء قاعدة جمب يوسف
علياء : يوسف حبيبي كلهم ضد بعض الا انا وانت مع بعض
يوسف ' بغيظ ' : داري ميتين ام شعرك اللي بيتزحلق
علياء ' بتحرك الطرحة علي شعرها من اودام ' : اعمل ايه تاني اتنقب
يوسف ' حرك الطرحة علي شعرها لحد عينيها ' : مطلعيهاش في دماغي
_ بيلعبوا الشايب ، علياء هتسحب من يوسف
علياء | بتبصلوا بصعبانية ، هتسحب ورقة ، يوسف تبت ايديه علي الورق قالها بعينيه لا ، وطلعلها رقم اخر ورقة معاها ، سحبتها
علياء ' بتضحك ' : ترارار خلصت
بتبص علي ورق يوسف لقت معاه الشايب ، كملوا الدور لحد ما يوسف عرف يخلي شادي يسحب الشايب والدور خلص وسط ضحك وهزار واحكام علي شادي ، شادية عرفت تاخد حقها منه
بدأ عددهم يقل ، شروق نزلت تعمل شاي
علياء | واقفة قدام سور بتتفرج علي الفرح ، ومبسوطة بتفاصيله المختلفة عن افراح القاهرة مندمجة مع الاغنية وبتتمايل وتسقف بهدوء ' ياما رايح جاي وعيونه دي مغزلاني قالي صبي الشاي يمو العيون غزلاني فات عينيه جواي زي الحرير غزلاني شوف كسفني ازاي حمر خدودي يا ناس والله '
يوسف | عينيه مليانة حب لعفويتها
علياء ' لفت عينيها ليوسف بابتسامة ' : مهما قلت كلام في غرامك لسه عادي
يوسف | قرب منها حرك ايديه بهدوء علي راسها زق الطرحة علي قدام وايديه التانية علي شعرها بيدخلوا من الطرحة
شروق ' قاطعتهم ' : عقبال فرحكم
علياء | بعدت عن يوسف بهدوء ، رايحة تاخد منها صينية الشاي والماية
_ قعدوا حوالين بعض
شروق : اول مرة تشوف افراح في البلد
يوسف : أه
شروق : عارفة ان الافراح هنا بتكلف مبالغ
يوسف : بجد
شروق : دبايح واكل وشرب الليلة ديه بتحصل كل يوم لحد الفجر علي مدار اسبوع لحد الفرح يعني انهارده اخر يوم
علياء : في فرحك ان شاء الله هيكون موجود وهنخليه يعيش الحاجات ديه كلها
شروق ' بحزن ' : يارب
علياء ' بتواسيها ' : ايه رايك نحكي لبابا وهو يتكلم مع عمي
يوسف | مش فاهم
شروق 'بصتلها انه مافييش امل ' : حاولت كتير
علياء : اتكلم عادي
شروق : عشان يوسف يعني عادي
علياء | حكت ليوسف علي شروق وخاطبها
يوسف : هو عم علي مكنش موافق عليه
شروق : شايف انه مش جاهز وانه مبيعملش حاجة ' عينيها بتدمع ' بابا مش قادر يفهم انه شايل نفسه من كل حاجة بسبب ان امه وابوه مش بيساعدوه وشغال ٣ شغلانات والله عشان يجيب الشقة انا مش مراهقة ومعمية بحبه لا هو فعلا بيحبني وبيعمل عشاني كتير ومستحمل تنطيط بابا عليه عشاني
علياء | بصت ليوسف انها بتقول الحقيقة وكلامها صح
يوسف : هو منين
شروق : اسكندرية
يوسف : مش بعيد من هنا لهناك ساعة تقريبا مبتحاولوش تتقابلوا
علياء : يتقابلوا فين يا يوسف عمي لا بيخرجها ولا بيخليه يجي يشوفها
يوسف ' سكت للحظات ' : واللي يخليكي تشوفيه !
_____________________
_ بعد الفجر ، في عربية يوسف علي طريق اسكندرية
علياء ' بتلف وشها لشروق ' : إبسطي ياستي
شروق : هيصدقونا
علياء : متقلقيش
— يوسف | وصل شروق لحد خاطبها وسلم عليه ، يوسف ارتاحله وحس انه كويس ذي ما سمع عنه ، وسابهم قاعدين علي البحر لوحديهم ورجع هو وعلياء ركبوا العربية
يوسف : اللي عملناه صح
علياء ' بتنهيده ' : بص يا يوسف يا ابني احنا جمعنا قلبين مشتاقين اكيد صح
يوسف ' بيضحك ' : الحكمة
علياء : هنعمل ايه احنا
يوسف : نفطر ونقعد في مكان عشان في مكالمة فيديو ضروري لازم اعملها
علياء : نفطر علي البحر
_ شبابيك العربية مفتوحة ، والهوا وريحة البحر
وصوت الاغاني وعند اغنية معينة عالي الصوت بشكل ملحوظ وبيغني مع الاغنية بصوت ' طب اقولك كانت غايبة بس معايا هادية كانت صعبة بس معايا سهلة كانت جامدة بس معايا سايبة كانت عاقلة بس معايا هبلة تقفل لكله وتضحكلي تحزن بس تيجي ترقصني مقلوبة بس انا بعدلها كركوبة بس بحنلها '
علياء : الله الله من امته
يوسف : عشانك لايقة عليكي
عربية | جمبهم فيها بنات صوت بنت ' الحقوا بصوا سكر بيغني ازاي '
علياء ' بصتلها بقرف ' : مش مالية عينيك يحبيبتي ولا ايه
يوسف | قفل الازاز من ناحيتها وبيضحك
علياء : افتحلي الازاز ده اما اشوفها بتقول علي مين اللي سكر يا سكر
يوسف ' بيضحك ' : مشيوا
علياء 'بتشوح بايديها ' : مش مالية عينها انا
يوسف ' مسك ايديها وباسها ' : مالية عيني انا
علياء ' بكسوف ' : ييووووه
_ علي البحر ، بتشم الشاي بالنعناع وبتاخد نفس
علياء | شالت عينيها من علي البحر ليوسف سرحت لثواني
يوسف | باصلها بهدوء وابتسم
علياء ' بهدوء ' : انت عارف انا كنت بحب البحر اوي بقيت أحبه اكتر
يوسف : انتي عارفة انه بيفكرني بيكي
علياء | إبتسمت وعينيها بتسأل ازاي
يوسف ' ابتسم ' : شايف البحر شو كبير كبر البحر بحبك
علياء ' بتغني معاه ' : شايف السما شو بعيده بعد السما بحبك
في نفس واحد : كبر البحر وبعد السما بحبك يا حبيبي ياحبيبي بحبك
علياء | بتضحك وبتلف وشها شافت راجل وست كبار في السن بيتمشوا علي البحر
علياء ' بانبهار ' : الله يا يوسف بص
يوسف : شايفهم من بدري
علياء : بعد العُمر ده كله لسه الحب باين بينهم
يوسف : الحب مبيموتش
علياء ' سندت دقنها بإيديها ' : هنبقي زيهم
يوسف : هفضل احبك ولو بعد ١٠٠ سنة بنفس حبي ليكي من اول ما شوفتك
علياء : هاقولك عاوزه في شقتنا ان شاء الله نعمل ركن كدا للذكريات اعلق فيه كل حاجة ادتهاني وكل حاجة حتي لو حباية رملة نعمله زي متحف لينا نحكي عنه لولادنا ونعملهم ذكريات معانا يورثوا مننا الحب ' عينيها بتدمع ' حتي لو مت قبل ما يكبروا واشوفهم تبقي معاهم بتحكلهم عني وعن قصتنا يحبوني من حبك ليا
يوسف : ليه يا حبيبتي ليه يا ماما التخيلات ديه احنا مبسوطين دلوقتي
علياء ' بتبص علي الراجل والست بدموع ' : معرفش اتخيلت نفسي مكانهم واني ممكن مكونش معاك وتكون لوحدك من غيري ، انت عارف ساعات بتخيل لو مت وبعدها حبيت بعدي بتقهر
يوسف ' بيمسح دموعها ' : يا دراما
علياء : دراما فعلا هاتلي فريسكا
يوسف | قام يجبلها فريسكا رجع لقاها بتلم مكان الاكل بتاعهم في كيس ، ابتسم انها عادة فيها في اي مكان تساعد الناس ومتسبش زبالة مكانها حتي في المطاعم
يوسف : يالا
___________________
_ في كافيه علي البحر
يوسف ' بيفتح اللاب توب ' : عاليا مكالمة شغل مهمة
علياء ' قاعدة اودامه ، حطت ايديها علي بوقها ' : ولا كاني موجودة هوا هوا
يوسف | فتح اللاب توب وبدأ مكالمة الشغل
علياء | طلعت مراية من شنطتها ( بتحط روج ، بلاشر ) بتلعب ، تبص ليوسف تحول بعينيها
يوسف | واخد باله ماسك نفسه من الضحك
علياء | بتنفخ وبتشاورله يخلص ، بتفتح السناب شات وتصور يوسف بفلاتر
يوسف ' قفل اللاب توب نص قافلة وبيحرك شفايفه ' : أبوس ايديك اسكتي
علياء | مدت ايديها
يوسف | مسك ايديها
علياء | بعدت ايديها وهي بتضحك
يوسف | رجع يركز في اللاب
علياء | ملانة ، بتبص حواليها المكان فاضي لقت مرجيحة علي البحر ، سابت يوسف ومشيت ركبت المرجيحة ومش لاقية حد يزقها ، بتبص ليوسف بشر ، رجعت قعدت قدامه تاني ، حطت دماغها علي الترابيزة
يوسف | قفل مع العميل علي اللاب توب
يوسف : ده اللي هقعد ومش هتسمعلي صوت
علياء : ..........
يوسف | بيبص عليها لقاها نامت ، ضحك
الويتر ' بيشيل الكوبايات من قدامهم ' : تشربوا حاجة تانية
علياء | صحيت
يوسف : ممكن قهوة مظبوطة ' بص لعلياء '
علياء : مش قادره ، انا عاوزه اتمرجح
يوسف ' رافع الموبايل علي ودنه ' : مكالمة هعملها من الموبايل وهعملك اللي انتي عاوزاه
علياء ' بتقوم ، رايحة علي المرجيحة ' : ماليش دعوة
يوسف | زقها ومشي يخلص المكالمة
المرجيحة وقفت علياء نزلت وحطت ايديها في وسطها
يوسف | راجعلها تاني وبيتكلم في الشغل
علياء | مبسوطة كإنها طفلة
يوسف | مش مركز في الكلام
علياء : ركز معايا
يوسف : مركز
يوسف ' للبيكلمه ' : يعم مش انت ، المهم الكلاينت
علياء ' بتقلده ' : المهم الكلاينت
يوسف : مجنونة
يوسف ' للبيكلمه ' : مش الكلاينت ركز انت معايا بعتلك التفاصيل في ميل راجعه | قفل المكالمة
علياء : انا ولا الشغل
يوسف : انتوا الاتنين هتجلطوني
علياء : جلطتي انا أحلي
يوسف : مبسوطة
علياء ' بطفولة ' : أوي أوي أوي ياحسن
يوسف : نكشنا ولعبنا نشرب قهوة ونتمشي شوية عشان نجيب شروق ونرجع
علياء : انزل يعني من علي المرجيحة
يوسف : هعملك مرجيحة في الشقة
علياء : قول والله أحلف
يوسف ' بيضحك ' : والله
علياء : بتاعتي لوحدي
يوسف : بتاعتك لوحدك
علياء | نزلت وهتمشي مع يوسف
علياء : ولا بتضحك عليا ؟
يوسف : اقسم بالله مش بضحك عليكي
_ قعدوا شربوا قهوة وهزارهم مستمر ، وإتمشوا واتصوروا ، راحوا خدوا شروق وراجعين في العربية
علياء | بتنكش في يوسف
شروق | بتكلم خطيبها ومبسوطين وبيشكر في يوسف وعلياء انهم ساعدوهم يشوفوا بعض
_ وصلوا البيت في البلد وماحدش خد باله انهم خرجوا من بدري وكل واحد دخل المكان اللي هيبات فيه ..
علياء بعتت رسالة ' شكرا يايوسف علي كل حاجة ♥️'
_________________
نادين : انا نادين السباعي لا انا قليلة ولا جاية من الشارع عشان اجري وراه
سهير : عشان انتي نادين السباعي مينفعش تكوني غير ليوسف تفتكري ابوكي لو عرف اللي حصل بينكم هيسمي عليكي او عليه
نادين : بس
سهير ' بتقاطعها ' : من غير بس اللي حصل حصل متعمليش حاجة تاني جه دوري حطي رجل علي رجل واتفرجي
نادين | بتتنهد بنفاذ صبر
__________________
_ أخر اليوم بيجهزوا نفسيهم يرجعوا القاهرة
شروق ' بتسلم علي يوسف ' : شكرا يا يوسف ربنا يسعدكم
يوسف : المرة الجاية نبقي جايين لفرحكم
صابرين : هترجع في العربية لوحدك
علياء : ايه رايك اركب مع يوسف لحد ما يبقي هيمشي من طريق واحنا من طريق انزل واركب معاكم وابقي ونس طريق ليه
صابرين : خلاص ماشي
علياء ' غمزت ليوسف ' : اي خدمة
_ علياء | ركبت العربية مع يوسف
يوسف : استغفر الله العظيم يارب
علياء 'بتضحك' : ايوه استغفر وكفر عن سيئاتك
علياء | فتحت شنطة مليانة لوليتا وحلويات
يوسف : ايه ده
علياء : تسالي الطريق بيجوع
يوسف : انتي ساهتينا بعد الغدا عشان تنزلي تجيبي حلويات
علياء ' بتضحك ، بتهز دماغها ' : أه
- فتحت لوليتا ، بتدوقها ليوسف
يوسف : مش عاوز
علياء ' بتاكلهاله ، غصب ' : لا دوقها حلوة ، شوفت حلوة ازاي
- علياء بتاكل يوسف حلويات غصب طول الطريق
يوسف | مشي في طريق عكس ناصر قصد ، عشان يوصل علياء لحد البيت ومتنزلش في نص الطريق
علياء ' بتنزل مراية العربية ، شهقت ' : انا تخنانه
يوسف : يلاهوي حصل امته
علياء ' ضربته ' : متتريقش ' بتبص لوشها ' ايه اللغد والخدود ديه كلها مخدات
يوسف : اللوليتا السبب
علياء : ششششش انت دلوقت
يوسف ' بيضحك ' : كوباية شاي اخضر
علياء : صح السر في الشاي الاخضر نكمل حلويات
_ رجعت تفتح الحلويات وتاكل وتاكل يوسف ، وضحك مستمر لحد ما وصلوا تحت العمارة
علياء : لو عليك عاوز تفتح باب العربية وتحدفني بالرجل
يوسف : والله ما عاوزك تنزلي
علياء ' رجعت ضهرها علي الكرسي ' : الصراحة ولا انا
يوسف : تيجي نروح لحد حدود ليبيا ونرجع تاني
علياء ' بابتسامة حب ' : يالا
____________________
_ بعد أيام قليلة
علي رووف الشركة
علياء : متحمسة اوي اشوف الشقة ، بابا ان شاء الله هيجي بدري وهجهز علي طول تكون خلصت الميتينج
يوسف : ماشي ولو كلمتيني ومردتش اعرفي ان لسه مخلصتش انتي اكيد فاهمة الشركة مقلوبة ازاي عشان الميتينج ده
علياء | هزت دماغها
_ علياء رجعت البيت فتحت الباب ، بتدور علي مامتها داخلة الريسبشن
علياء : ماما ماما انا جيي
صابرين ' بابتسامة ' : تعالي سلمي علي مامت يوسف
علياء | لسانها عجز عن الكلام عينيها مبرقة فاقدة النطق
سهير ' بابتسامة ' : يمكن متكونيش شوفتيني قبل كده ، اكيد اتحكالك عني ' مدت ايديها ' سهير مامت يوسف
رأيكم يهمني ؟ 🤍
#دعاءالسيدعامر
#دعاء_السيد
