يوسف : ايه رايك نقعد فـ الهوا
علياء " بابتسامة " : ياريت
_ قاعدين علي كراسي عالية اودامهم سور وباصين علي الشارع وبيضحكوا بصوت عالي الي حد ما وبيفتكروا اول مواقف ليهم سوا
علياء " بتضحك" : لا وانت كنت سخيف سخافة مش طبيعية الصراحة مكنتش طيقاك لا ولا كمان
يوسف | باصصلها ، وللحظة حس انه بيتاخد في عالم تاني ، بتركيزه في فرحة علياء وروحها اللي بتشده ليه .
يوسف " قاطعها ، من غير مقدمات " : مرطبتيش وحبيتي ولا مرة ليه
علياء | وقفت ضحك وسكتت للحظات ، وبصتلوا وابتسمت ، بتجمع احاسيسها وشعورها في كل اللي هتقولوا
علياء " اتنهدت ، وبصت عالطريق " : كان دايما عندي احساس كبير اني مش عاوز اعمل اي حاجة او ادخل حياة شخص او شخص يدخل حياتي حاسة ان لسه في حاجة اكبر من ده كله متشلالي ، وعاوزة لحد اما ده يجي مخاطرش عشان يوم ما اعيش اي لحظة معاه احس بيها واحبها لاول مرة
يوسف | بيسمعها وسرحان في تفاصيل كل كلمة بتقولها .
علياء " بتكمل وهي سرحانة جوه نفسها " : عاوزاه يعرف انا صبرت عشانه هو اد ايه وحافظت علي اني اكون ليه هو وبس ومكنتش لحد قبله يعرف اد ايه كنت بفكر فيه كتير وهو مش موجود وبتخيلوا وانا مبسوطة وبحكيله وانا زعلانة وبعيط وبشكيله ، يعرف اد ايه انا كنت بدعي ربنا دايما بانه يرزقني بالشخص اللي بتمناه لحد ما ربنا جعلوا هو من نصيبي
علياء | ووقفت كلام لثواني ، وبصت في عين يوسف واترسمت ابتسامة خفيفة علي وشها
علياء ' بتكمل كلامها ' : يبقي عارف ان اول ما عيني شافتوا اتمنيت ان ربنا يجعل فيه الخير ويبقي هو ده اللي عاوزة اكمل معاه حياتي .
علياء | استوعبت سرحانها في عين يوسف ، ابتسمت بخجل وبعدت عينيها عنه .
علياء ' بتضحك ، وبتوه ' : بس ياسيدي ديه كل الحكاية
يوسف : انا هاكون ليكي الشخص ده يا عاليا
علياء " برد فعل سريع " : مش فاهمة ، اقصد فاهمة يعني تؤ هو انت فاهمني !
يوسف " ضحك ، وهز دماغه " : اهدي " بجدية " انا مش عاوز منك اي رد ، انا يمكن مش انسب شخص ليكي بس اللي اعرفه اني اقدر اعمل اي حاجة ترضيكي
علياء | بدات تتوتر
يوسف " بيطمنها " : علي قد ما انتي استنيتي علي قد ما أنا عشت عمري كله بدور عليكي واما لقيتك لقيت نفسي اللي مكنتش عارف انها موجودة اما بقيت اعافر واعمل كل حاجة مكنتش متخيل ان هيجي اليوم واعملها عشان اوصلك ، ومش هسمح لبني ادم يوصل لقلبك غيري .
علياء ' وشها احمر من الكسوف ' : انا ، انا مش عارفة اقول ايه
يوسف : انا مش عاوزك تقولي حاجة انا عاوزك تبقي متاكدة من كل كلمة بقولها ، وتديني فرصه اقدر احكيلك علي حجات محدش غيرك هايبقي عارفها وتستني عليا وانا هثبتلك اتفقنا
علياء | من فرحتها ولغبطت مشاعرها قدرت انها ترد عليه بابتسامة بس .
يوسف ' ضحك ' : اتفقنا ، قومي يالا اوصلك الوقت اتاخر
علياء " بكسوف " : لا مش هينفع هاروح مواصلات
يوسف' بتحكم ' : انتي لسه هاتقولي لا ، لا ديه كانت زمان يالا اودامي
ــــــــــــــــــــــــــــــــــــــــــــــــــــــــــــــــــــــــــ
علياء | داخلة البيت بتتسحب لحد الاوضة، بعد اما اتاكدت ان بسمة مفضيالها الطريق .
بسمة ' حطة ايديها ع وسطها ' : اهلا بالصايعة اللي جاية بهدية ، ياتري فيها ايه خلاكي خايفة حد يشوفك بيها وانتي داخلة
علياء ' بتحط ايديها ع بوئها ' : اخرسي وهحكيلك
علياء | بدات تحكي من وقت ما كانت مع صحابها وراح خدها لحد اما وصلها
بسمة ' منشكحة ' : ياختي عليه وعلي جمال امه
علياء ' بفرحة ' : قلبي كان هيفط من مكانه
بسمة : اعترفلك بس بالطريقة اللي تناسبك ، بس ايه اللي تستني عليه عشان يحكهولك
علياء ' بتهز دماغها ' : مش عارفة انا لسه مقدرتش اتملك كل اسراره بس معتقدش حاجة ليها علاقة ببنات عشان هو حكالي
بسمة : طب بتفكري في ايه
علياء : انا مبفكرش انا مبسوطة يا بسمة ، ومش هعكنن علي نفسي واحسب حاجات من اللاشئ انا يا ما حسبت ولو كنت صح مكنتش شوفت يوسف تاني اصلا ، فأنا قررت مش هحسبها ولا هرتب انا هسيبها تكمل بتدابير ربنا .
___________________________
علياء | بتفتكر كل اللي حصل، وبتتخيل كل كلمة وبتضحك وتحط ايديها علي وشها ، قاطع سرحانها صوت الموبايل بيرن والاسم يوسف ، اتعدلت وجمعت نفسها بسرعة
علياء ' ضحكت " : عاوز ايه
يوسف " بيضحك " : عاوز ايه هي حصلت !
علياء : انا خايفة تقولي انا مستنيكي تحت بيتك
يوسف " ضحك " : كان نفسي والله بس ميرضنيش انزلك في وقت ذي ده
علياء : ومادام الوقت متاخر متصل بيا ليه
يوسف : اسمع صوتك
علياء " بتداري ضحكتها " : لا ياعم يالا احنا بنام بدري
يوسف : عم ماشي انتي تقولي وتعملي كل اللي انتي عاوزاه
علياء " بكسوف " : رايح الشغل بكرة " استوعبت اللي بتقولوا " اه يعني اكيد رايح
يوسف : هسيبك للتوهان اللي انتي فيه ده ، فكرتي في اللي قولتوا
علياء " سكتت للحظات " : احنا بنام بدري فعلا
يوسف " ضحك " : توهي توهي كمان
علياء | قفلت مع يوسف ، لقت بسمة قاعدة عالسرير اللي جمبها وباصلها
بسمة : وايه كمان يا هدهد الجناين يا منبع الحنان كله
علياء " بصوت عالي " : مجرد صحااااااااب صووووححااااب
بسمة " بتحدف المخدة في وشها " : صوووحاااب انتي مصدقة اللي بتقوليه
ــــــــــــــــــــــــــــــــــــــــــــــــــــــــــــــــ
عدي فترة قصيرة جدا
يوسف | بيحاول ان علياء تصارحه بس هي قادرة انها تخفي مشاعرها اللي هو عارفها ومتاكد انها بتبادله نفس الشعور بس عندها حواجز كتير هي مش ممكن تخطيها ولو حتي عشانه وده عكس طريقة حبه ليها ..
علياء | بدات امتحانات نص السنة ، وفي ليلة امتحان اول مادة .
يوسف بعتلها رسالة ' نمتي ! '
علياء 'لسه '
يوسف ' ممكن تقفلي الموبايل وتحاولي تنامي ومتتوتريش انا متاكد ان يهمك تشوفيني مبسوط وانتي هاتروحي الامتحان وهتحلي كويس وهاتبقي مبسوطة '
علياء 'صليت الفجر وهنام اهو بس ده ايه علاقته بانك هاتبقي مبسوط '
___________________________
علياء | خارجة من الجامعة هي وصحابها ومحمد ماشي جمبها بيراجع معاها الامتحان
محمد ' بيضحك ' : اختارتي دي ايه
علياء ' بتضحك ' : استني بس انت عملتها ايه
محمد : و
علياء : و ايه اذا كان الاختيارات ا ب ج د
محمد : بتهززاااري اومال ايه و ديه
علياء ' بتضحك ' : بتهزززااار انت بتسالني انا انت بتس | وقبل ما تكمل الجملة لقت يوسف في وشها .
يوسف | ساند عالعربية ومربع ايديه ، شايف علياء وباصصلها وهي بتضحك مع محمد، ومضايق جدا وبيتك علي سنانه غيظ ، وباصلها انها تروحله
______________________________
في العربية .
علياء ' بابتسامة ' : مقولتليش انك جي
يوسف ' بيحاول يبقي هادي ' : مين ده
علياء' بتبص حواليها ' : مين ده !
يوسف | بصلها وسكت
علياء : محمد محمد زميلي اللي حكتلك عليه
يوسف : لا محكتيليش عليه
علياء ' بتضحك وبتغير الموضوع ' : طب اديني حكتلك
يوسف : مش بهزر دلوقتي مش عشان قولتي محمد زميلي يبقي حكتيلي
علياء | ودت وشها النحية التانية
يوسف : ليا كلام معاكي في الموضوع ده بعدين بس طمنيني عملتي ايه الاول
علياء ' باستعباط ' : لسه فاكر ده انت حتي مهانش عليك امبارح تقولي ابقي كلميني طمنيني عليكي اما تخلصي
يوسف : وليه اخليكي تطمنيني عليكي لما ممكن اجي اشوفك واطمن بنفسي
علياء' ابتسمت ' : طب الامتحان كان حلو وانا حليت الحمدلله
يوسف :عرفتي اما قولتلك يهمك تشوفيني مبسوط
علياء | هزت دماغها ب لا
يوسف : ربنا مديكي الذكاء والنباهة كلها في كل حاجة الا معايا
علياء ' ضحكت ' : طب تقصد ايه بقي !
__________________________
بعيد عن بيت علياء بمسافة .
علياء : انت مضايق صح
يوسف : ان كنت عاوز اخدك ونروح اي مكان واقعد معاكي وقت اطول كفاية اني بقالي يومين مش عارف اشوفك
علياء ' بضيق ' : لو كنت عرفتني كنت هقولك اني لازم اروح علي طول عشان نازلة مع بسمة تجيب بقيت جهازها
يوسف : وانتي فاكرة اما تقوليلي كدة مش هاسيب كل اللي ورايا واجي عشان اشوفك حتي لو دقيقة
علياء ' ابتسمت ، وبتوه ' : ده انت تحمد ربنا بقي اني وافقت انكً توصلني
يوسف : انا بحمد ربنا اني قابلتك
علياء ' هتنزل ' : طيب تصبح علي خير
يوسف ' بيضحك ' : اتنين الضهر ، طب استني
يوسف | مد ايديه علي كنبة العربية ، جاب منها شنطة صغيرة ، بيدهالها
علياء ' بتفتحها ' : ايه ده ، شوووككلااااتهه
يوسف | باصص علي ضحكتها وفرحتها بالشوكلاته
علياء : تاعب نفسك ليه ،كفاية انك بسطني وجيت المشوار ده كله عشان تطمن عليا
يوسف ' بسرحان ' : وانا مافيش حاجة في الدنيا تبسطني اد اني اشوفك مبسوطة .
علياء | فهمت كان يقصد ايه لما قالها انه يهمك تشوفيني مبسوطة .
علياء ' بتضحك ' : تشوفني مبسوطة ، فهمت طب والله فهمت
يوسف ' بيضحك ' : لا اله الا الله ، الله اكبر
__________________________
_ حسين سمح لعلياء انها تبقي في اجازة طول فترة الامتحانات ، وعشان كل اسبوع بتمتحن مادة قدرت توفق بين الدراسة والشغل وقررت انها بدل ما تقعد فترة كبيرة متنزلش الشغل ولا تكون عارفة الدنيا ماشية ازاي فهتحاول تنزل يومين علي الاقل في الاسبوع بين الامتحانات .
