_ في بيت إنجي
إنجي : اقولك علي حاجة .. اول مرة اشوف علياء مبسوطة كده يعني حاسة اني مبسوطة لانبساطها اكتر من انها هتتخطب
فاطمة ' بضيق ' : عشان مشوفتيهاش مع واحد قبل كده
انجي : علي قد ما كنا ناقر ونقير في الموضوع ده بس بجد هي قدرت تحافظ علي قلبها وربنا عوضها
فاطمة : هو انتي حاسة انهم هيكملوا ؟
انجي | سكتت لحظات بإستغراب
انجي : ليه لا يا فاطمة
فاطمة : علي فكرة بحب علياء وخايفة عليها تتكسر من الموضوع ده
انجي : ليه يابنتي ما بيحبها وبتحبوا
فاطمة : كل ده بدايات ، مش لايقين علي بعض يا انجي
انجي : ممكن مش هقولك لا يعني يوسف من الناس اللي تشوفيها تقولي هياخد حد هاي في استايله ولبسه وتعليم وكل حاجة الصراحة واخر واحدة كنت اتوقع ان يحصل بينهم حاجة علياء حلوة واستايلها حلو بس مش واو ذي ما كنت متخيلة ليوسف وسبحان الله دوناً عن كل ده حبها واتقدملها بدل المرة اتنين وثواني انا شوفت بعيني موقف مش هنساه واحنا في الفندق وطلع عند الاوضة عشان يراضيها
فاطمة : نعم .. يعني كلكم كنتوا عارفين من الاول ان في بينهم حاجة معادا أنا
انجي : لا ياستي والله لحد الموقف ده وقطعوا مع بعض ومعرفتش اي حاجة عنهم تاني غير اما بدات تحكي وتجيب سيرة يوسف قدامنا
_________________
_ الصبح ، علياء نازلة من البيت
علياء ' في الموبايل ' : مورنينج عليك يا جو
يوسف : بتبهريني كل يوم الصراحة من بونجور ل مورنينج
علياء : بجددلك عشان متملش مني
يوسف ' بيضحك ' : الملل بيجي بعد الجواز مش دلوقتي
علياء : اصطبح
يوسف ' ضحك ' : هصطبح علي وشك امته
علياء : أما تتلم
يوسف : كل ده ومش ملموم
علياء : أه ، وقولي انت فين
يوسف : تحت البيت نزلت الشنطة العربية
علياء : كان نفسي اشوفك قبل ما تسافر
يوسف : للاسف معنديش حاجة في الشركة هطلع من البيت علي المطار
علياء : مش مهم يا حبيبي هستناك اما ترجع
يوسف : كان نفسك تشوفيني أوي يعني ؟
علياء : أه ونتمشي شوية ونشرب قهوة يالا بقي مش مهم هتمشي لوحدي واشرب قهوة لوحدي واشوف حد اسمه يوسف الحياة مبتوقفش علي يوسف واحد
يوسف ' بيضحك ' : بتضايقيني
علياء ' بتخرج من شارعها ' : أبداً بس اللي كان عاوز يشوفني قبل ما يسافر كان شافني
يوسف ' ساند علي شنطة العربية ' : ما ترفعي وشك وانتي ماشية بدل ما انتي باصة للارض
علياء ' بتلقائية بترفع وشها ' : براحتي
علياء | عينيها برقت .. رجعت خطوتين بضهرها من الخضة
يوسف ' باصصلها وبيضحك ' : قولتيلي كان نفسك في إيه
علياء | مبرقة
يوسف : المفروض تكوني اتعودتي تعالي تعالي
علياء ' بتستوعب الموقف وبتقرب ' : ايه اللي جابك
يوسف : إنتي
علياء | بتاخد نفسها
يوسف ' بابتسامة هادية ' : صباح الخير
علياء ' رفعت عينيها عليه ، إبتسمت ' : صباح الخير
_ بعد وقت قليل
_ علي ترابيزة علي عربية فول في الشارع ، الاكل بينزل علي الترابيزة
علياء ' بتسقف بإيديها بهدوء ' : يسلام يسلام
يوسف : المرة الجاية هتخليني اوديكي مصمط
علياء : عرفت منين وتأكلني قمبلة
يوسف ' بيضحك ' : قمبلة
علياء : أه .. الله الطعمية حلوة اوي
علياء | قطعت حتة من الطعمية
علياء ' بعفوية ' : دوقها
يوسف : مبحبهاش
علياء ' بتمد إيديها بعفوية تأكلهاله ' : عشان خاطري جميلة والله
يوسف | حب عفويتها وتلقائيتها من غير ما تحس باللي عملته
علياء : إيه رأيك
يوسف ' باصلها لحظات ، وبيستطعم ' : حلوة
— يوسف وصل علياء عند الشركة وركن العربية وطلب عربية توصله المطار .
________________
_ بعد أيام ، في بيت علياء
ناصر : يعني عاوزه ايه دلوقتي ؟
علياء : يا بابا كان نفسي اعمل خطوبة بره البيت
ناصر : لا معنديش خطوبات في قاعة ورقص وتنطيط وصور معروفة الخطوبة بتختصر بين القريبين والبيت واسع وهنهيصلك شوية والفرح هيكون بالنص ان شاء الله
علياء : القريبين من قرايبنا ولا من صحابي معلش البيت مش هيكفي
ناصر : علياء انا اتفقت مع يوسف خلاص
علياء : طب افرض يوسف عاوز يعزم حد
ناصر : ينوروا
علياء ' بنفاذ صبر ' : طيب وانا صحابي كتير ولو عزمت حد وحد لا هيزعلوا
ناصر : اعزمي القريبين والباقي اعتذرلهم
صابرين : مش مهم يا علياء اللي مش هتعزميهم ..بعد الخطوبة بيومين ابقي راضيهم واعزميهم عالغدا هنا في البيت
علياء : يعني يا ماما ما كده كده هاجيب فستان وهعمل كوشة وهجيب ميكاب ارتيست وهتعملي اكل وجاتوه وكل ده انا بتكلم ان مش لازم اعمل في قاعة كبيرة في كافيهات
ناصر ' بيقوم ' : انا هقوم اصلي العشا عشان انتي رغاية ومبتفصليش
علياء : يوه
____________________
يوسف قاعد علي ترابيزة هادية ، في كافيه .. موبايله رن شاف الاسم متسجل ' فادي ' ابتسم بيرد
فادي : ياعم وحشنا ياعم
يوسف ' ضحك ' : بقلق اول ما بشوف اتصالك
فادي : حقك تعالالي يالا عزمك
يوسف : انسي
فادي : انسي إيه مافيش الكلام ده
_ بعد ساعة .. يوسف داخل مكان فيه اضواء كتيرة وصوت اغاني مالي المكان
فادي | علي البار جمب بنت
يوسف ' جي من وراه ' : مبتغيرش مكانك
فادي ' ضحك ولف ' : بس انت اتغيرت ياصاحبي
يوسف | سلم عليه
فادي ' بيعرفهم ' : يوسف اصغر بيزنس مان ممكن تقابليه في حياتك وديه بقي ... قولتيلي اسمك ايه
' ضربته في صدره ' : يا بايخ ' مدت ايديها ليوسف ' هاي أنا تالا
يوسف | سلم عليها بابتسامة
- واقفين التلاتة بيتكلموا .. قاطعهم صوت بنت رقيق وناعم
...... : هاااي
تالا : ايه الصدفة الحلوة ديه مش معقول
جومانة ' بمشاكسة ' : مش صدفة اوي كنت حاسة اني هاشوفك ما انتي علي طول مع فادي
يوسف ' مش منتبه ' | ماسك موبايله وبيشوف اماكن
تالا ' ضحكت ' : استني اعرفك ده يوسف
فادي | نغزه في كتفه
يوسف | رفع عينيه باستغراب ، عينيه وقعت علي عين جومانة
تالا : مش مركز خالص اومال لو كنت بتشرب
يوسف : سوري ماخدتش بالي
تالا ' بتعرفهم علي بعض ' : يوسف جومانة ، جومانة يوسف
جومانة ' بلطافة ' : نايس تو ميت يو
تالا : خلي بالك ودي اصغر بيزنس وومان عندنا
- بعد وقت قليل
فادي ويوسف واقفين بعيد عن الدوشة
فادي : حد يتجاهل بنت ذي جومانة ده لو عينيها كانت لمعت عليا كده مكنتش فرطت فيها ياجدع
يوسف ' من غير مقدمات ' : أنا هخطب
فادي ' بيستوعب ' : بتهزر .. بتألش صح
يوسف | هز دماغه ب لا
فادي : لا متهزرش
يوسف : والله بتكلم جد
فادي : مين
يوسف : متعرفهاش
فادي ' ضحك ' : أجمد من جومانة ؟
يوسف ' بتعبيرات حادة ' : ما تتلم مبهزرش
فادي : استني ، ده انت كمان بتحب مش حوار خطوبة ودبلتين
يوسف : بحب فعلا
فادي : ما انا بجد عندي فضول اشوفها اعرف مين ديه اللي خليتك تاخد خطوة
يوسف : هتشوفها قريب ان شاء الله
فادي : وياتري تستاهل ؟
يوسف ' خد نفس ' : تستاهل ، تستاهل اسيب كل حاجة ورا ضهري وأبقي معاها
فادي : إحكيلي عنها حصل امته وازاي وفين
تالا ' قاطعتهم ' : اتاخرنا عليكم
فادي ' بيستوعب كلام يوسف ' : لا
يوسف ' ابتسم لفادي ، غمزله ' : يادوب تلحق تجيب البدلة وتحجز تذكرة للاسبوع الجي ، هامشي دلوقتي عندي شغل الصبح
جومانة : وانا كمان اي هاف تو جو
تالا ' بتلقائية ' : يوسف ممكن توصل جومانة
____________
- يوسف وصل جومانة ، وأتحرك عالفندق ، خد دوش وعمل كوباية عصير وقاعد في البلكونة مسك موبايله بيتصل علي علياء
- علياء نامت من غيرما تحس بنفسها ، سمعت رنة موبايلها
علياء ' بترد بصوت نايم ' : ألو
يوسف ' ضحك ' : نمتي ده اللي هتستنيني عشان نتكلم
علياء : محستش بنفسي
يوسف : ألبسي وافتحي الكاميرا نتكلم فيديو كول
- علياء لبست الايسدال ، فتحت الكاميرا ، بتفرك في عينيها
- يوسف بيضحك
علياء : ما تبس بقي
يوسف : طفلة مصحينها من النوم
علياء : قابلت صاحبك الخمورجي
يوسف ' بيضحك ' : قابلته أه
علياء : مين بقي الاخت جومانة اللي بعتلي مسدج انك هتوصلها
يوسف : صاحية فايقة
علياء ' بتشاور بايديها ' : انجز عشان منكدش عليك
يوسف : صاحبة فادي معرفهاش طلب مني اوصلها قدامها معرفتش اتحجج بعتلك عشان عصافيرك في كل حتة
علياء : بتأمن نفسك يعني وفضلت تتكلم معاها طول الطريق
يوسف : محصلش
علياء : حلوة بقي ست جومانة ديه
يوسف : معرفش بس الاكيد ان مافيش احلي منك
علياء : متنرفزنيش
يوسف : انتي هبلة ما بقولك مافيش احلي منك بنرفزك فين
علياء : ما انت اكيد بتضحك عليا يابابا
يوسف : جاية معاكي بخناق
علياء : هاتيجي امته ، هانجيب بدلتك والدبلة امتة ، هنعمل ايه و
يوسف : أهدي أنتي تايهة ليه اما نخلص خناقة ندخل في التانية
علياء ' ضحكت ' : لا مش هتخانق علي موضوع البنت اللي وصلتها ، فرحت انك قولتلي وانك قدرت انها ممكن حاجة تزعلني ، الخطوبة حاسة أني مضغوطة وخايفة
يوسف : متخافيش كل حاجة هتمشي ذي ما انتي عاوزه والله يومين بالكتير وهاجي
علياء : وحشتني يا يوسف ♥️
___________________
بعد أيام - يوسف راجع من السفر
_ في بيت علياء
صابرين : خلاص كلمي الراجل وأجلي معاه ليوم تاني يكون ابوكي موجود
علياء : يوم تاني امته يا ماما اما الخطوبة الاسبوع الجي وهو عاوز يجي ويشوف المكان عشان الكوشة والديكور اللي هعملهم عاوزاهم مميزين
صابرين : مش عارفة ايه كل ده ما هنحطلك فرعين نور وسماعتين وخلاص
علياء ' بنرفزة ' : ماما بعد اذنك عاوزه يومي يمشي زي ما رسماله وعاوزه ديكور حلو نتصور فيه صور حلوة بدل ما بابا رفض السيشن
صابرين ' بعصبية ' : متتنرفزيش عليا ياست علياء اللي انتي عوزاه اعمليه شوفي مين هيقف مع الراجل واخوكي ولا ابوكي قدامهم ع الاقل ٣ ساعات عشان يرجعوا من السفر
_ قاطعهم صوت رنة موبايل علياء
صابرين : هيقولوا اللي معملتش كوشة وورد اهي
علياء | بترد علي يوسف وبتكتم غيظها من الكلام
صابرين ' صوتها عالي ' : ما صاحبتك كانت عملاها في البيت ومعملتش كل ده
يوسف ' سمعها ' : في ايه
علياء ' بتنهيدة ' : روحت ولا لسه
يوسف : داخل علي البيت طنط بتزعق معاكي ؟
علياء : لا كنا بنتكلم عادي
يوسف : حصل ايه
علياء : مافييش الراجل اللي هيعملي الكوشة والديكور في الشقة كلمني هيجي عشان يشوف المكان واقولوا عاوزه اعمل في ايه وبابا ومصطفي في البلد ومش هينفع يجي وماحدش موجود
يوسف : مأجلتيش معاه ليه
علياء ' بعصبية ' : اكيد قولتله يعني يا يوسف وقالي انه مش فاضية غير انهارده واني لو عاوزه حاجة اسبيشيال هايحضرها عشان يوم الخطوبة
_________________
صابرين ' بترد علي الموبايل ' : الحمدلله حمدالله عالسلامة علياء لسه قيلالي انك وصلت
يوسف : الله يسلمك ، عرفت من علياء ان الراجل جي ومافيش حد موجود
صابرين ' بنفاذ صبر ' : بتحكم رأيها في حاجات مش مستاهلة
يوسف : هو ممكن أجي اقف مع الراجل لو يعني مافيهاش مشاكل انا اتصلت بعم ناصر قبل ما اكلمك ولقيت موبايله غير متاح
صابرين : لا خالص انت زيك زي مصطفي بس يابني انت لسه جي من السفر هي تخليها يوم تاني او مش مهم يبقي يعملها يوم الخطوبة الاشكال اللي معاه وخلاص
يوسف : لو مافيش مشكلة اني ابقي موجود فأنا قدامي ساعة بالكتير
صابرين ' بنفاذ صبر ' : تنور مستنيينك
- صابرين قفلت المكالمة ، بتنده علي علياء في اوضتها
علياء : نعم
صابرين : يوسف كلمني
علياء : ليه ؟
صابرين ' بإستغراب ' : انتي مش عارفة ولا بتستهبلي
علياء ' بنفاذ صبر ' : والله ما اعرف لسه قافلة معاه من شوية
صابرين : كلمني واستاذني يجي يقف مع الراجل ، اتصلي بالراجب بقي وقوليله ياخر نفسه شوية
علياء : يجي ، وبابا ؟
صابرين : بيفهم في الاصول اتصل علي ابوكي الاول وماردش كلمني ، وابوكي مش هيقول حاجة الولد محترم ، طلعي البانيه من الفريزر يفك عشان اعمله غدا
