Mending Fina [COMPLETED]

Chapter 23

"Okay, ma'am." Sabay kapit nito sa dala niyang bagpack. "Akin na, ako na magbubuhat."

"'Wag na, kaya ko. Magaan lang naman."

"Mabibinat ka, sige ka."

Natawa na lang siya. "Grabe, bag lang 'to, Pierre."

"Tsk, ang tigas naman ng ulo. Akin na."

Natigilan na lang siya kasi biglang sumeryoso ang tono nito. Parang gusto talaga nitong buhatin ang bag niya. Hindi na siya humindi. Binigay niya na.

Inalalayan siya nito habang hinuhubad niya ang bag, tapos ito na ang nagdala sa isang balikat.

"Magaan ba 'to?" Kumunot ang noo nito. "Ang bigat kaya. Ano bang laman nito, bahay niyo?"

Natawa uli siya. Parang nawawala nang tuluyan ang sama ng pakiramdam niya dahil sa mga biro nito ni Pierre e.

"OA mo," sabi niya na lang. "Uy ingatan mo 'yang bag ko, ah. Lahat ng importante nandyan."

"Talaga? E ba't wala ako dito?"

Pinigilan niyang mapangiti. Hindi niya inexpect ang banat na 'yun. 'Di tuloy siya nakasagot.

Si Pierre naman natawa lang tapos umakbay sa kanya habang papasok na sila sa cafeteria. "Biro lang. Pinapangiti lang kita. Kahapon kasi para kang namatayan e. Nataranta kaya 'ko, 'di ko alam kung anong gagawin sa 'yo."

Tipid na lang siyang ngumiti. Napaka-bait talaga nito.

Pagkapasok nila sa cafeteria, natigilan agad sila kasi ang dami palang tao sa loob. Wala na silang mape-pwestuhan. Lunch time nga pala kasi.

Bigla namang tinuro ni Pierre 'yung pinaka-dulong mesa. "Ah, ayun pala si Gio. Sabay na lang tayo sa kanila."

Napatingin agad siya ro'n at halos tumalon na lang ang puso niya nang makitang ando'n din sa table si Jett!

Mabilis siyang humawak sa braso ni Pierre. "A-ayoko ro'n. Sa ibang table na lang tayo."

"Wala ng bakanteng table, Fina. Lunch time eh. Do'n na lang tayo kila Gio. Kilala mo naman na sila tsaka saglit lang din tayo." Hinawakan na siya nito sa kamay para magpatuloy sa paglalakad.

Wala na siyang nagawa. Kabadong-kabado siya feeling niya babalik na naman ang sama ng pakiramdam niya.

Hindi nga siya makatingin sa mesa nila Jett e. Napansin na kasi niya kanina na nakita na siya nito kasama si Pierre at alam niyang nakapako na ang mga mata nito sa kanya.

Pagkarating nila sa pwesto, 'tong si Gio agad ang unang namansin. "Nakanang, Pierre! Ang sweet ah. Holding hands while walking. Kayo na ba? 'Di niyo sinasabi."

'Tong si Pierre naman, tumawa lang. Pati 'yung isang kaibigan ni Jett na may lahing Chinese na hanggang ngayon e hindi niya alam ang pangalan.

"Oo kami na," biglang sabi ni Pierre. "Mahal na mahal nga namin isa't isa, e."

Nagulat siya! Diniinan niya agad ang kapit sa kamay nito para tumingin ito sa kanya. Nginitian lang naman siya nito nang tipid sabay kindat. Hindi niya naintindihan!

Pagkatapos no'n inalalayan na siya ni Pierre para maupo sa bakanteng silya sa tabi ni Gio.

"Congrats, Pierre," sabat naman bigla nung chinito. "May love life ka na. Eto kasing si Jett, sawi 'to, e."

Nagtawanan ang mga ito.

Siya, nakatingin lang sa iba. Ayaw niyang silipin si Jett kasi sa totoo lang, hindi pa talaga siya handang makita ito ulit.