ليّت اللِذي خَلق العُيون السُود ... خَلق القُلوب الخَافقات حَديد

البارت السادس والثلاثين

ارتخت ذراعه وكفَ يده وسقط الجوال من يده ، اخذ نفس يحسّ الدنيا تلفّ فيه ، نزل عيونه يشوف الجوال بين رجوله انحنى يجيبه ورفع راسه علطول من سمع زميّر شاحنة واصطدم ثامر فيها واندهست سيارته وانعدم بين الحديد ..
" في بيت جديد بيت ضيدان "
دخل البيت وفسخ شماغه وحطه ع كتفه ، نزل مفاتيح بيته ع الطاولة ومشى يدخل ، سحب جواله واتصل عليها ومشى يتجّول ببيته ويرتبه لقدومها بكره ، جاب لها سيارة جديدة وباقة ورد زيّنت الصالة وبداخلها خمس مية وردة ، كسّاها اللون الاحمر وبمنتصّفها مفتاح السيارة ، يبيها تغتّر معه ويبي يكسّيها غرور ويدلعها هو خذاها من قصور مساعد ومن عند اهلها متدلعة وتعهّد يكمل ع هالنهج ، ضحك من وصله صوت " عزيزي المتصل ان الهاتف المطلوب مغلق .. " رمى جواله وسحب ثوبه ينزله ونزل ملابسه ودخل غرفته يلف منشفته ع خصره ويدخل الحمام ، اخذ دش سريع ومشى لغرفة الملابس وطلع له بجامة وسحب بوكيت دخانه واوراق مهمة لازم يخلصها ، نزل للصالة ورفع جواله وشاف اتصالين منها ورسالة ، فتحها وحطّ زقارته بين شفايفه وشغلها وزفره وضحك من شافها كاتبه : انت م تدق الا وانا مشغولة !؟
ولحقتها برسايل ثانية كاتبه فيها : يمه بغيت شيء ؟ .. ضيدان وينك !! .. لا تخوفني رد ع الجوال !
ابتسم واتصل فيها وسرعان م وصله صوتها وهي تقول : والله انك بزر !!
ضيدان ابتسم وقال : ليه ي فاتنة بن حثلين ؟
دالين ابتسمت ابتسامة عريضة وكتمت صرختها ، ابتعدت عن الجوال ورجعت من سمعته يناديها ، ضحكت وقالت : سمّ ؟
ضيدان : سمّ الله عدوينك يحلوه
دالين : ايه وش بغيت ؟
ضيدان : سلامتك والله
دالين : يعني بتسكر ؟!
ضيدان : اذا م ودك وعد م اسكر
دالين عضّت شفايفها لثواني ونطقت : لا يمكن مشغول وبكره ورانا عرس
ضيدان ابتسم وقال : صح والله اجل اشوفك ع خير ي بنت سالم !
دالين : معسلامة بس اسمع
رجع الجوال ع اذنه وقال : سمّي لبيه ؟
دالين : بتجي بكره ؟
ضيدان : والله م اعلم بس ان شاءالله
دالين : عطني خبر طيب
ضيدان : صوري لي طيب
ضحكت وقالت : طيب
ضيدان ضحك بصوت عالي وقال : جعلها تطّيب حياتك يبنتي
دالين رفعت شعرها وقالت : Bye !
*وداعًا !*
ضيدان ضحك من نطقت بالانقليزي : في امان الله
سكرت ورمى جواله ، طفى زقارته ومشى يطلع لغرفته ودفن نفسه بسريره وضحك بخفه وقال : بكره ادفن وجهي بصدرها
عضّ شفايفه من تخيل الوضع ، هي صغيرة وجدًا عنده وبجانبه ، تناسق زيرو بينهم بس حُبهم مفضوح والكل يقدر يشوفه ، غمض عيونه دايخ ويتخيلها جنبه ..
" فالمعسّكر "
دخل بكل هيبته وشاراته وسلاحه ، النقّيب آسر بِن عَايض آل مقّبل ، يشوفهم يضربون فالجّو تحية له ويردها لهم بهدوء كبير منه ، طلع جواله واتصل ع الميلا وسرعان م ردت ونطق : ميالتي وصلت بقفل جوالي الحين
الميلا ابتسمت وقالت : ودعتك ربي يحبيبي انت
اسر : بحفظ الرحمن
سكر منها واتصل بثامر وم وصله رد ، زفر بتوتر وقال بهمس : ثويمر وصلت البيت ولا لا !
مشى واتصل ع عقاب ، بس حسّايف اتصاله جاء وعقاب بأحضان الجود واستحالة يرد او يصحى حتى ، شّد ع قبضته ونطق بحدة : اختفيتوا كلكم !!
رفع راسه من شاف العقيد قدامه والسّلة في يده ، قفل جواله واستودع اهله لربه الذي لا تضيع ودائعه ، مشى وبدأ مشوار السنة وست اشهر ولزوم عليه يشّد حيله عشان يعجل بخروجه ..
" فالسجن "
جلس مهلوك تعب ، رفع عيونه ونطق بهمس : صقر كيف صرت كذا !؟ وليش احسني صرت بخير بالوقت الغلط والوقت اللي انتهت حياتي فيه !!
لف من نطق واحد بصراخ : اطلع برا مالك مكان بيننا !
ابو شيمة : فايز اجلس مالك شغل بالرجال !!
فايز بحدة : يطلع بررا ولا والله ان اذبحه !
ابو شيمة : واضح انه م بيطول اصلاً
ضحك صقر وقال : سنة وشوي مفروض تخلونه يتعّود علي
ابو شيمة ضحك بسخرية وقال : طويل لسان اشوف ؟
لف صقر ع الشايب اللي بأواخر العُمر ، التجاعيد والشّيب كسّت ملامحه ، والظاهر انه رئيس العصابة ، صدّ صقر عنهم وهمس : اللهم اكفنيهم بما شئت وكيف شئت انك على ما تشاء قدير !
انسدح بهدوء وغمض عيونه ، وكّل امره لله والنعم بالله ، هم اكثر عددًا منه والكثرة تغلب الشجاعة وتغلب قوة صقر ، بينما عندهم كان فايز فعلاً مصّر يطرد صقر من الغرفة وان م طلع توعّده يقتله بدون رحمة ! ، كان يتأمل صقر معطيهم ظهره ونايم بزاوية الغرفة ومغطي نفسه ببطانية ع قّد الحال قديمة جدًا ومليانه غبار ، طلع سكينته وحطّها تحت مخدته يبي صقر يتعّود عليهم ويقتله غدرة ..
" فالصباح المنتظر ، زواج تركي وتالين "
الرجال والاهل فالبيت ، كُل شيء جاهز ركبوا سياراتهم وطلعوا للقاعة ، نطق ابو فلاح : فلاح وش صار ع اخوك ؟
فلاح : صقر ؟
ابو فلاح هز راسه بنعم وكمل فلاح يقول : صقر مسحور وكل اللي صار له عشان السحر بس ولا يهمك بنكلم ضيدان يتنازل ويطلع لنا بخير
ابو فلاح ابتسم وقال : واذا رفض قول دالين..
قاطعه فلاح وهو يقول : دالين ع ذمته خلاص لا تدخلونها بمشاكلكم يرحم اهلك يبه !!
ابو فلاح : يعني تهديد عرفت
فلاح : ليتك تمسّي بس
تكلم ابو فهد ولفّوا عليه من قال : القصور مقصرة بحقكم ي تركي ؟
تركي ضحك وقال : م نبي بنفس مكان الميلا واسر
ابو فهد زفر بعصبية وقال : الله يخارجنا !
ابتسم تركي والعيال يرقصون فرحانين فيه ، ناصر ضرب كتف عقاب وقال : وراك هاجد ؟
عقاب : فاقدن عضيدي
ناصر خزّه وقال : ونويصر تيس ماله نصيب بينكم ؟؟
ضحك عقاب بخفه وقال : رحم الله امرئ عرف قدر نفسه
ضربه ناصر بكل قوته ونطق : يحيووان !!
عقاب : سمّ يالكبير سمّ
ناصر بحدة : عزّ الله م احترمت وقدرت الكبير !
عقاب : عشان كذا م اقولك عضيدي
ناصر : عساك م قلت يشيخ !
لف ناصر عن عقاب وقال : فهوود يعضيدي !!
فهد فزّ وقال : احتزم !!
ناصر : بقاطعك انت والجحلطي ذاك معسلامة الندم بعدين
انفجر عقاب يضحك وقال : الا يستود البدنية
فهد ابتسم وقال : لبيه ي عضيد الآسر ؟
عقاب : لبيت حاج وين ثامر ؟
فهد : والله مدري من وصل اسر م وصلني منه رد
عقاب زفر من حسّ بشعور كتمة ، هو شاف اتصال اسر وزاد توتره وقال بهمس : اللهم اجعله خير !
هيثم : فيك شيء يبو تميّم ؟
عقاب لف عليه وضرب كتفه بخفه ونطق : م فيني الا العافية
هز هيثم راسه بمعنى " فهمت " وصدّ يشوفون الطريق ، الامهات مع عبدالهادي فالجمس الثاني والعيال مع فهد والبنات بيجون مع عبدالعزيز فالليل بعد م يخلصون من المشغل ..
" فالمشغل "
طلعت تالين بكامل حلّتها وجمالها ، عروس تركي واكبر بنات سالم ، يساعدونها تطلع الدور الثاني للبنات بشكلها الجميل جدًا ، وصلت وشافت امال بفستان ابيض هي بتنزف برضو بس زفة خفيفة قبل تالين لفلاح ، والتجهيزات بالقاعة لعروستين هم امال وتالين ، بس العيال م عندهم خبر وناوين تالين ودالين يفاجئون فلاح بأنهم يزفون عروسته عليه ويصير فرحتهم فرحتين ، صرخت امال وقالت : تالين عسسل !!
تالين فّلت طرحتها وقالت : انتي والله انتي !
الميلا ابتسمت وقالت : يحظ اخوي بس
ضحكت تالين وقالت : محد خلص ؟
دالين رفعت راسها لتالين وقالت : لا جودي توو دخلت والميلا مالها خلق مع انها حلوة بدون شيء بس مو راضية تقوم روحي حاولي فيها
امال قامت وقالت : اتركيها علي !
مشت وجلست جنبها وشافت الميلا ع جوالها ، جلست جنبها وم حسّت الميلا ابدًا بوجود امال جنبها ، ابتسمت تشوف الميلا تتأمل صورة بجوالها لآسر قبل يوصلون آل قاضّي ، الشماغ ع كتفه وعقاله ع راسه ، خاتمه بآخر اصابعه ورافع يده اليمين ومسوي حبتين ، شكله فوضوي بس لطالما حبّت فوضويته وعشقت طبيعته وعفويته ، ابتسمت امال ونطقت : ي بنت !
الميلا فزّت وقالت : اماال !!
امال : شفيه ؟ قومي تجهزي نبي نشوفتس امييرة !
الميلا ابتسمت وقالت : اميرة ؟
امال : اييوه واذا مو عشاننا عشان الخشة اللي تتأملينه !
ضحكت وضحكت امال معها ونطقت : تمام
امال : اييه عااشت !!
قامت الميلا ومشت تتجهز مع باقي البنات ..
" بعد ساعتين "
تجمعوا كلهم وبدأ التصوير والصراخ ، الجود ابتسمت ابتسامة عريضة وقالت : عندنا عروستين تعالوا جنب بعض نصوركم
امال ابتسمت ومشت تمسك ذراع تالين وتالين مسكت خصر امال ووقفوا جنب بعضهم ، امال فستانها ابيض ناعم جدًا ، حرير ويمسّك جسمها يبرز ملامحها ، وتالين فستانها الابيض اللي مليان كريستال من بدايته لنهايته بشكل فاتن ، يمسك عند خصرها وينفش بعده ، بالاكسسوارات والميكب فاتنات وبقوة ، صوروهم ومن انتهوا انطلقوا البنات يركضون يحضنون امال وتالين ، وبدأ التصوير وتجمعوا كلهم بصورة وحدة ، رفعت جوالها وقالت : هلا فلاح ؟
فلاح : اعجلوا اطلعوا !!
دالين ابتسمت وقالت : طالعين يهوه !
سكرت ومشت تشوف صور البنات واشكالهم ..
*تفصّيل بسيط*
الميلا بطلتنا تزيّنت بفستان ابيض وحدوده بنفسجية ، واطرافه تزيّنت باللافندر المرسوم ع اخره .
الجود لبست فستان باللون الاصفر الفاتح ماسك من عند خصرها وينفش من بعده ، مليان بالكريستال .
ضحى لبست فستان وردي فاتح اطرافه ريش ، ماسك وعاري الاكمام .
البندري لبست فستان بنفسجي فاتح من بدايته لنهايته ريش واطرافه تزيّن باللون الاصفر الهادي .
دالين لبست فستان اورنج شّاد من فوق وينفش من تحت .
واخيرًا غزيل تزّينت بالرويال بلو حرير وينفش من تحت خصرها .
-
دالين بعجلة : خلصنا ؟ مشينا فلاح برا
امال شهقت بقوة وقالت : خيير وش جابه !؟
دالين : لا انتي مالتس شغل اهجدي بتجون مع السايق انتي وتاليني
امال ضحكت من ضحكوا البنات وقالت : اوكيه !
مشوا كلهم يطلعون من المشغل ويركبون سيارة فلاح متجهين للقاعة ..
" بعد المغرب فالقاعة "
طلع وزقارته بين شفايفه من وصله اتصال وخرج من الازعاج عشان يقدر يسمع ، رد ع الاتصال وقال : هلا ؟
.. : تعرف ثامر بن فهد ؟
عقاب بربكة فزّ من محله ورمى زقارته وقال : ايه شسالفة ؟!
.. : توقف قلبه قبل شوي ورجع !
عقاب صرخ بصدمة : اذكر الله !!! ويينك ووش السالفة
.. : صار له حادث قبل سبعطعش ساعة
عقاب : لا حول ولا قوة الا بالله ! وكييف الحين
.. : استقر النبض نحمد الله ونشكره بس دخل غيبوبة وعنده شلل كامل م يحرك الا راسه
عقاب شّد ع شماغه يفصخه وقال : ارسل لي موقع المستشفى الان !
.. : سمّ
سكر عقاب وطار للجيّب حقه وركب ومشى علطول للمستشفى ، ناصر طلع يركض وقال : الله يستر وش جاه !
ضيدان وهو يضّبط نسفة شماغه : مدري !
سهم ابتسم وقال : ان شاءالله خير ادخلوا
مشوا الثلاثة يدخلون للقاعة ، وعند قسم الحريم كان الحضور طاغي والكل متواجد م عدّا حصة وسديم اللي راحوا للعزاء حق امهم ، بالنسبة لحصة م كانت تدري عن ثامر لأن اول م طاح جواله فصّل الاتصال ولا سمعت شيء ومن حزنها ع امها م فكرت تقلق عليه ..
" فالمستشفى "
دخل عقاب يركض ووصل للأستقبال وقال : ثامر بن فهد
الممرض : امش السيب كامل بتجيك غرفة العناية ع اليسار
مشى عقاب يركض للآخر السيب ، شافه من ورا الزجاج ، وجهه مشوه ويده اليمين الواضح انها مكسورة ، رجلة منكسرة كسر كامل ورافعينها له ، الأجهزة تحاوطه من يمينه وشماله ، ع صدره المكشوف اسلاك وابرّ وسوايل ومغذيات والأكسجين اللي متمسك بمنطوقه وتنفسه ، نزلت دمعته بحرقة ع ولد اخوه واول فرحة ببيت آل عايض ، شّد ع الحديد اللي مستند عقاب عليه وقال بهمس : تكفى ي ثويمر لا تخلينا وتروح !!
مسك راسه وقال بربكة : يارب وش اللي حاصل !!
نزل عيونه لجيبه تحديدًا جواله اللي يدق ، سحبه وشاف اسمها سكر علطول وقفل جواله ومشى للدكتور يسأله عن حالة ثامر ووش ناقصه ووش يحتاج ..
" فالقاعة "
ضحك ناصر وقال : سألتتس بالله !!
غزيل من ورا الباب : اي والله روح جيبه بسرعة
ناصر ابتسم ومشى يركض وسحب فلاح من عند الرجال ولبسه بشّت عقاب اللي ضبط ع فلاح اللي كان عريض مثل عقاب وناسبه ع وسعَه الخفيف بس مشى ، ضحك وقال بصوت عالي : بنزف عريسنا الاول !
فزّوا الحاضرين واهل مساعد بن محمد لولدهم ، ارتفع التصفير والتصفيق والصراخ من العيال وفلاح منلجّم ومصدوم ، ضحك وقال : وشدخلني !!؟
عبدالعزيز ضحك وقال : عرسك اليوم بأختي امال يالدبشة
فلاح شهق وقال : سألتك بالله تمزح ؟؟ يعييييال !!
ضخمّ ناصر صوته وقال : هيّا يعريس الله يوفقك وهالله هالله باللي كلنا خابرينه !
ضحكوا كلهم ورفسه بخفه ومشى ووصلوا للمدخل وارتفع صوتهم يقولون : ييوولدد ، طرييق ..
ابتسموا الين وبيسان وقالوا : العريس وصل !!
فتحوا المساعدات البوابة وتسّلط النور ع فلاح ودخل والربكة تنفضّه نفضّ ، مشى وزغرطوا بنات عمه ودالين اخته اللي يعتبرهم خواته وم قصّر معهم ابد ، شافها واقفه بنعومتها ورقّتها ، ضحك وقال : يالله الجنة !
مشى ووصل قدامها وابتسم يبوس راسها بقوة ، ضحكت وقالت : شرايك ؟
فلاح ضحك وقال : حرام اني ميت من الربكة لكن تهّون ي امالي !
امال ضحكت وقالت : حبيبي انا !!
فلاح ابتسم وبدؤوا اول جلسة تصوير ومشى فيها علطول يدخل للغرفة ، وانتهت اول زفة ودخلت دالين وقالت : اوبس ادري اقاطعكم بس ابسط حقوقي اسلم ع اخوي !
امال ضحكت وقالت : وش التصعيد ذا طيب ادخلي
دالين ضحكت وقالت : فليييح !!!
فلاح ابتسم وقال : عييوون فلييح
ابتسمت تحضنه وتبوس راسه ، ابتسمت تمسح روجها اللي انطبع ع جبهته وقالت : Sorry
*اسفه*
فلاح : ويش هو ؟!
ضحكت امال وقالت : اووهوو لازم دروس !!
دالين ابتسمت ابتسامة عريضة وقالت : عليتس فيه
ضحكت دالين وطلعت من عندهم ومشّوا اول عرسان من الزواج للفندق اللي حجزوه دالين وتالين لأخوهم كمكافأة له وابسط شيء يسوونه له ..
" وبعدها بساعة "
طلعت تركض للحوش ، وصلت وطلعت جوالها واتصلت فيه للمرة العاشرة وم وصلها صوته ولا حتى رده ، نطقت بغضّب : ويينك ي عقااب !
لفت ع ضحى اللي مشت والميلا وراها ، ابتسمت لهم وقالت : بتتصورون ؟
ضحى ابتسمت وقالت : ايه تعالي !
مشت توقف جنبهم وصورتهم قوس ونطقت : عسولات !!
ضحى ضحكت وقالت : يالشقرا م العسل الا انتي
قوس ضحكت بسخرية وقالت : تطقطقين علي ؟
الميلا انفجرت تضحك وقالت : شقرا وباضاء بس شعرها ماهو بحدّر ذنبها ماش
ضحكوا كلهم ونطقت قوس بغضّب : هيييه بحذف الصورة ترا والفيد برضو
ضحى قطّبت حواجبها وقالت : ويش هو !
الميلا ضحكت وقالت : هيّا خذلك
ضحكت الجود وقالت : امشوا ندخل هواء برا
ضحى ابتسمت وقالت : سمعت صوت سهم بسلم عليه واجيكم
غزيل تقدمت وقالت بحدة : ويييلمها وشتبين فيه !؟
ضحى : وييل امتس انتي زوجي !!
قوس مشت تدخل وهي تضحك ودخلوا الجود والميلا ونطقت الجود قبل تدخل : اسأليه عن عقاب
ضحى ابتسمت وقالت : طييب حاضر ي حَرمه
مشت ونطقت : سهم ؟
سهم لف للباب وقال بفرحة : ي مرحبًا ي اريش العين !!
تقدم يدخل ويسكر الباب وراه ، ابتسم وقال : بتراضيني ؟
ضحى ضحكت وقالت : كنت منفسه ذاك اليوم اسف..
قاطعها من باس يدها وقال : لا يالغناة م تعتذرين جعلني فداك
ضحى ابتسمت وقالت : من العايدين يحلو
ابتسم بوسع ثغره يضمّها له ، حاوطته وقالت : سهم امي دقت ع عقاب وم يرد وينه ؟
سهم : طلع قبل شوي مستعجل بس ان شاءالله خير
بعدت عنها ومسك كتوفها وقال : ايه شخباركم ؟
ضحى : والله بخيير متى العرس ؟ ولا م بتسوي
سهم مسك طرف شاربه وقال : عيب بحق هالشارب م اسوي لك عرس
ضحى تقدمت وقبّلت طرف شاربه ونطقت : كفو !
وقف بصدمة من بعدت عنه وقالت : متى ؟
شافته شارد فيها ومصدوم ضحكت وقالت : ادري تسرعت بس يعني ؟
صدّ ومشى يفتح الباب وضحكت بصوت عالي ، لفّ يسحبها وطبع منطوقه ع مبسمها وابعد وقال : م يروح ابو سلطان وهو م اخذ ثاره !
طلع يركض وضحى انقطع نفسها من الصدمة ، اول مره يتجرأ احد يبوس شفايفها ويقرب من منطقة كانت ضحى بتوضح لسهم انها محضورة بالنسبة لها وم تحب احد يقرب منها ، كسّر الحاجز وطمر بكل قوته ولا اهتم لردة فعلها اللي كانت هادية ومشت تركض للقاعة ..
" فالمستشفى "
رفع راسه من شاف الممرضة واقفه ، ابتسمت وقالت : معليش اخوي بس هذي اغراض ثامر
عقاب صّد عنها وخذا الاغراض ، طلع جوال ثامر وشغله وانفجر بالاتصالات وانفجع عقاب وقرأ الاسم " ورعي الحلو " كتم ضحكته وقطّب بحواجبه ورد ووصله صوت سامي يصارخ : يحيييووان ويينك !!!
عقاب تنحنح وقال : من الحيوان ؟
صرخ سامي برعب ورمى الجوال ناطق : يييمممههههه !!!!
انفجر يضحك وقال : من انت ؟
سامي مشى ياخذ جواله من الارض وقال : هاه ؟
عقاب : انطق من انت يورعي الحلو ؟
سامي ضرب راسه بخفه ونطق : سامي ولد هادي !
عقاب ضحك وقال : حيّ ي ثويمر مسميك ورعه ؟
سامي عضّ شفايفه يتحلف بثامر ونطق : هو وينه السلقة !
عقاب : والله فالمستشفى صار عليه حادث
شهق سامي برعب ونطق : لا حول ولا قوة الا بالله !! ارسل لي الموقع يبو تميّم !
عقاب : رافق معه تكفى ي سامي
سامي : افا علييك رفيقي وهدّب عيني م اخليه !!
عقاب : م تقصر
سكر سامي وركض طالع من البيت من وصله الموقع ، وبالجهة الثانية انطلق عقاب يرجع للقاعة يحلق ع العشاء والزفة ..
" فالقاعة "
وصل ولف وانلجم من ضربة الكتف اللي جاته من ضيدان ونطق بعصبية : لعنة يطويل العمر لعنة !!
ضحك عقاب وقال : افا وش علمك ؟!
ضيدان بحدة : يخوي دخت والله وابي زوجتي بس مستحي وانت انشقت الارض وبلعتك !
عقاب نطق بصدمة : اووح سرى المعرس ؟
ضيدان : لا يرجال
عقاب ضحك بخبث وقال : اجل احلم مستحيل تطلع وهي م شافت زفة اختها اركد يبو صالح لاحقن ع خير
ضيدان : شف الحمار اقوله دايخ ويفكر كذا
عقاب ضحك وقال : تحسست وانا م قلت شيء
مشى ورفع جواله من اتصلت ورد علطول ووصله صوتها وهي تقول : اخيييييييرًا !!
عقاب : هلا هلا
الجود زفرت بملل من برود عقاب وثُقله وقالت : هلا والله وينك ؟
عقاب : موجود وش بغيتي ؟
الجود : تعال قسم الحريم
عقاب رفع حاجبة وقال : عسى م هنا خلّاف !
الجود بحدة : عقاب بوريك شيء امش !
عقاب : اذا كشختتس ترا ماني فاضي اشوفها فالبيت
الجود توسعت عيونها وقالت : وقسم بالله اذا م جيت ان اخلعك ترا اختي محامية
عقاب ابتسم وقال : وبتقدرين ي ام تميّم ؟
الجود عبّست ونطقت بحزن واضح : بتجي ولا بزعل عليك
ابتسم وقال : جاي جاي
سكر ومشى طالع لقسم الحريم ، وصل وضرب الباب بيده الضخمة ، صرخت برعب وقال بحدة : وجع وجع انا افتحي !!
فتحت ودخل وسكر الباب وراه وقال : وشفيه والصراخ !!؟
الجود ضحكت ببراءة وقالت : عاداتنا وتقاليدنا يبو تميّم
عقاب : اخلصي وش بتوريني ؟
الجود دارت بفستانها وقالت : امدح يزفت !
عقاب توسعت عيونه وقال : قلت لتس ماني فاضي !!
الجود ميّلت راسها وقالت : من مكدر عليك انت ؟!
عقاب : محد !
الجود زفرت بملل وقالت : طيب اسفه اني ناديتك عشان تشوفني وتعطيني رايك ع بطني المنفوخ وشكلي المرتب والحلو واسفه اني اخذت من وقتك وانا ماني من ضمن جدول اعمالك ي حضرة الفريق اول
صدّت وابتسم بخفه يسحبها ويلّفها عليه ، باس منطوقها ونطق :
عزّ الله اني كِنت شايف وعَايف
‏الِين ذقت يالجود الحلى من ورا التوت
فستانتس اصفر ؟ وحُمر الشفَايف
‏تِسعين بالميّه مواري من الموت !
-
عبّست بهدوء تطالع فيه بعيون تتلألأ دموعها ، سحب شماغه ينزله ويرميه عند رجولها ونطق بحدة صوته وهو ماسك خصرها : لا تعبّسين بوجهي وتحزنين والله انتس في ذرى وجهي وجاهِي من الحزن وصدوف الوقت والدنيا واهلها !!
ابتسمت بخفه ونزلت تاخذ جاههّ ، ضحكت تسحب الشماغ تتعصّب فيه ولفت تعطيه ظهرها وتتمايل بشعرها وشماغه ع راسها ، مسك شعره من المنظر ومن لفت عليه بشعرها ونطقت : صح لسانك وجاهك يبطلي ع الراس ينحّط !
تقدم يمسكها ووقفها عن الحركة ، مسك شماغه ولطّمها فيه وقال بأبتسامة جميلة جدًا لها : انا وصلت لمرحلة اني اغار عليتس من لفحّ الهواء لا صافح خدتس الندّي !
ابتسمت وقالت : ريحة شماغك تجنن !!
ضحك يسحبه من عليها ويحطه ع كتفه ، ابتسمت له وقالت : تدري انك جميل ؟
تكى ع الجدار وقال وهو يناظر عيونها :
هدب عينتس يهدّ اللي يمره كان ما تدرين
‏تبين اللي حفظ سلهامها ما أنتي تهدّينه !؟
-
ضحكت بخجل وقالت : ودي اصير شاعرة وارد عليك بالشعّر
ابتسم وقال : بعيدة ع شواربتس بس
ضحكت بتحدّي وقالت : ماشاءالله كويس شايفني ارجل منك
ركضت من رمى زبيريته عليها ، مشت تدخل ونطقت من عند الباب : احبببك !
ضحك عقاب وقال بصوته الرخّيم : ها والله اني مو بس احبتس في غبة الليل الأكحل الا والله احبتس بعز القوايل !!
مشى بيطلع وضحكت وهي كانت تصوره ، ونطقت : عقابي
عقاب لف عليها وقال : يشريان قلبه امريني ؟
مشت تركض ووصلت عند المراية اللي كانوا واقفين عندها ووقفت وسحبته وصورت ، ابتسم وقال : وشذا ؟!
الجود ميّلت راسها تسنده ع كتفه ، ابتسم ينسف شماغه ويحاوط خصرها وصورت ونطقت : بكتب حبيبي البدوي
ابتسم وقال : والله ونعم دامه حبيبتس وبدوي !
ضحكت وقالت : ايه يجنن مره اعشقه
طلع وقال : انتي تحلفين تخليني م افكتس اذا اختليت فيتس بس ابشري بها يبنت راشد
سكرت الباب وهي تضحك ومشت ترجع لأن قربت الزفة ..
" زفة تالين عَ تركي "
طلعت بجمالها وفستانها وامها وابوها جنبها وطلع تركي ببشّته الاسود معه ابو تركي وام تركي ، مشوا ليّن وصلوا لبعضهم وشّد ع يدها وصرخوا الحضور لهم ، مشى يحسّ برجفتها وابتسم وقال : اخيرًا الحمدلله يارب !
ابتسمت بربكة وقالت : يالله يالتوتر !!
تركي ابتسم وقال : احببك باللهجة ذي واحبتس بلهجتنا واهييم بهواتس بكل لغات العالم !
ضحكت بخجل وقالت : يمه تركي مو وقته والله
ضحك ورفع يده وهو ماسك يدها فالهواء قدامهم كلهم وقال :
وأنا كنّي خذيتتس خطوةٍ فيها الشهور سنين
وخذيتتس شارةٍ يتعب ورَى تحقيقها الرامي !
-
توسعت عيونها بصدمة وقالت : اوووب تركي وشعر !!!
تركي ضحك وقال : افا عليتس بس
ضحكت وهو بدأ يخفف من توترها ونطقت : صح لسانك يحبيبي
ابتسم وقال : خذييييتها !!!
ضحكوا كل الحضور من سمعوه يصارخ بحب ، ضحكت قوس وقالت : لا توضحون انكم متزوجين عن حب برضو هم
انفجروا البنات يضحكون ع كلمتها وضحكت بصدمة معهم وقالت : يويلي اص اص !!
مشى ووصلوا للكوشة وجلس تركي وجلست تالين جنبه ، بدأ السلام والدموع والتباريك لهم والرّد من الطرفين والاكثر تركي بحكم توتر تالين ، ابتسم من شاف خواته انطلقوا له يحتضّنونه ونطق : بناااااتي !!
الميلا وسط دموعها : تزوجت ي ابونا ؟
الجود بعبّس ملامحها اللطيفة : اف تروووك مبروك يعيون الجود
ابتسم وباس رؤوسهم ونطق بحب : لاخلا ولا عدم والله يبارك فيكم يبناتي
الميلا : مبروك يالدنيا وثاني حبيب بعد ابوي مبروك
ابو تركي ابتسم وتقدم يحضنهم وضحك تركي من نطقت ام تركي : وسخييين انتظروني !
تحاضّنوا عايلة راشد بمشهد لطيف فالذاكرة وبعدسة دالين اللي صورت هالمنظر ، مسك يد تالين وقال : ودعناكم الله
ام تالين وسط دموعها : الله يحفظكم !
الكل وادعهم وطلعوا العرسان وانتهى عرس طَال انتظاره وعرسّان انهلكوا عشان يجتمعون تحت سقف واحد بمسمى زوج وزوجته ..
" فالفندق عند امال وفلاح "
دخلوا للغرفة وسكر الباب وقالت له : فلاح جوعانه تبي نطلب حاجة ؟
فلاح انسدح وقال : لا شوي واتخّم من المفطح ورا م دقيتي فيه ومليتي بطنتس ؟
امال صدّت بقرف وقالت : يع فلاح لحم !!
فلاح فزّ وقال : ابو سالم ابوه !!! م تاكلين لحم ؟!
امال هزت راسها بنفي وقالت : لا لا يع
فلاح : نعمة استغفري ربتس
رجع ينسدح وقال : تعالي بنام
امال : طيب ؟
رفع راسه وضحك من شاف نظراتها وم زاد ضحكه الا من نطقت : يعني يحمار اقولك جوعانه تقول تعالي ننام ؟!
فلاح : اطلبي لتس واذا وصل صحيني اجيبه
امال قطّبت حواجبها وقالت : م فهمت ؟
فلاح بتهديد ووعيّد : لا اشوفتس تفتحين للعامل
ابتسمت وقالت : خير عادي ترا افتحه ببيت ابوي
فلاح : ايه عشان الرخوم اللي عندتس مغير يتسدحون ويتبطحون
امال : طيب طيب
لفت عليه من هجد صوته دليل نومه ، ودخلت التطبيق وصارت تهمس بجوع ولهفة للأكل : واو ! هذا جوسي مره وفيه دبل تشيز !!
طلبت اكلها ووجبتها كامله ، مشت تفتح باب الحمام ودخلت وسكرته همست بغضّب : وجع عشاننا ماخذين جناح عرسان م فيه مفتاح !!
صدّت بعصبية وفكت فستانها وبعد صراع مع السحاب قدرت تتخلص منه وتنزله ، لبست الروب ع جسدها وربطّته تشّده ع خصرها ومشت تفكه وتدخل تحت الدش اخذت شور طويل وخلصت وطلعت ومن عناية ببشرتها ودلع امال الخاص انتهت وتعطرت ورطبت جسدها بكريمات متنوعة وكل منها له غرض معين ، طلعت ع جوالها اللي يدق وابتسمت وقالت : ووصل اكلي !
لفت وشافت فلاح نايم بدون شيء واللحاف يستر سرتّه لركُبه ، قشعر جسدها من منظره م عمرها فكرت انها بتجتمع مع جنس اخر بنفس الغرفة ويطلق عليهم زوجين ، بس هي ع كرهها للرجال عشقت فلاح واختاره قلبها قبل عقلها وتعهدت تعوضه عن كل شيء وتصير الانثى اللي يقول فلاح لها ام وحبيبة وزوجة وصديقة واخت وبنت ، ابتسمت ومشت تفتح الباب بهدوء وسرعان م اندفع وطاحت امال ع الارض بروبها وشكلها وصدرها المكشوف من فتحة الروب ، رفعت عيونها بصدمة وهي ترجف وشافت العامل واقف والاكل بيدينه ، رجعت بخطواتها وهي تزحف اسوء م فيها ان عظامها تبرد وم تقدر تتكلم وتنطق بحرف واحد ، لمس اطراف قدميها قبل فلاح وتجرأ يسحبها له وصارت تحته بالضبط ، ضحك بضحكته المرعبة وتجددت الفوبيا عندها وتضاعفت ، باس نحرها قبل فلاح يستنشق ريحة جسدها الجميلة والمخدرة عن الف نوع خمر ، نطق بتخدر : يالله !
شهقت برعب من عرفت انه سعودي وم قدرت الا انها ترفع يدها تضربه لكنه صدّ ضربتها ومسك يدها يسحبها برا الجناح الملكي والخاص ..
" تالين وتركي "
دخلوا الفندق مع درج عالي يؤدي للأصنصير وهم طربانين ع الاخر ، ماسك يدها والمساعدين والمساعدات يساعدون تالين بطرف فستانها ، طلعوا بسهولة للغرفة وسكر الباب وسرعان م حضّنها له وشّد عليها يقول : يكبر حظوظي والله !!
ضحكت تالين ونطقت : فيك يحبيبي فيك
ابتسم وقال : شوفي من اول ماسك نفسي م اتابع هالفلم الا معتس تبين ؟
تالين ضحكت وقالت : م اقولك لا ننزل ونرتاح ونطلب اكلنا ونبدأ ؟
تركي باس خدها وقال : تم يالله
ركض ينزل ثوبه واغراضه ودخل ركض ياخذ دش سريع وطلع علطول ، جفف جسمه ورطبه وانتهى من روتينه بعد الشور ولد المدينة ولبس شورته الازرق وفنيله خفيفه بيضاء ، جلس ع السرير وشبك اللابتوب حقه وسحب السلك يشبكه ع التلفزيون قدامه ، خلص وجهز كل شيء واخذ جواله يطلب لهم افخم عشاء وراهم سهرة طويلة حلوة مع بعضهم ، ابتسم من سمعها تناديه ومشى وطق الباب وقال : اجي ؟
تالين ابتسمت وقالت : تعال
دخل وضحك من عرف مشكلة البنات الوحيدة وهي سحاب الفستان ، ضحكت وقالت : اف تركي بسرعه تعبني
تقدم وباس كتفها وقال : جعله الوجع يتعبتس الكلب !!
سحب السحاب وصفّر علطول وقال : اوووف يالجسم
شهقت وقالت : اطلع برا !!!
ضحك وقال بحدة مازحة : زوجتي حلااالي شتبين ؟!
دفعته وطلع يضحك ، اخذت دش وانتهت منه ومن اي روتين معروف بعد الشور خلصت وطلعت علطول وهي جاهزة بقميص نوم حرير بلون الوينتر قرين ، تركت شعرها اللي مصفّف وهي م غسلته لأن توها اخذت دش قبل الزواج ، جلست جنبه وقالت : وش تصنيفه
تركي سحبها يحتضنها وقال : وش يهمتس ؟
تالين ابتسمت تلف وجهها وتحسسّ دقنه بخدها ، ونطقت : لازم اعرف عشان اخذ احتياطاتي
تركي رفع حاجبة وقال : رعب ؟
تالين ابتسمت بحماس وقالت : جوووي !!!!
تركي ضحك وقال : بعد شوي بشوف الخرشة ع وجهتس وبسمع صراختس
تالين : انتبه لا تسويها انت وتختفي الرجولة
تنحنح تركي وعدل جلسته وقال : يعقب
^ بعد دقايق معدودة ^
كانت مصروعة ع السرير ضحك من صراخ تركي ، تركي فزّ اول م شاف المنظر المرعب قدامه وقال : يمااااعععه !!
انفجرت تالين تضحك بصدمة وقالت : تركي !! خلااص فشلتنا اسكت
تركي فزّ عليها ودفن وجهه بنحرها ، ضحكت بهدوء وقالت وهي تمسح ع راسه : خلاص بسم الله علييك مو لذي الدرجة
ابتسم بخبث وكل ذا كان مجرد مشهد عشان تسمح له يقرب منها من اول ليلة ، ابعد وباس نحرها وقال : مشت عليتس ؟
توقفت تالين عن الحركة والضحك ، سكتت لمدة طويلة وسرعان م حاوطها تركي من كل جهة وو..
" في بيت ضيدان "
نزلوا من السيارة ونطقت بتعب : ضيدان مقدر امشي
سكر سيارته وابتسم وقال : اشيلك ؟
دالين ابتسمت وقالت : لا شدعوة بس تعبانه مره
ضيدان مشى لها ورفعها يشيلها وقال : بسم الله عليك م فيك الا العافية ان شاءالله
حاوطت رقبته وضحكت بخجل وقالت : خوفي اتعبك ؟
ضحك وقال : اشيل وزن اثقل منك بأضعاف انا اقدر اشيل عقاب وم يتعبني
ضحكت بعّلو صوتها وقالت : ماشاءالله !!! وبعدين الارض شفيها بعيدة
ضيدان : كيف يعني ؟
دالين : كم طولك ؟
ضحك بخفه وفتح الباب ومشى فيها للصالة وشهقت من شافت الورد وقالت : وااو كم عددها ذي !!!!
ابتسم ينزلها ع الكنب ولفت عليه وقالت : بسم الله صدق م ابي انزل الكعب جنبك هيبتي وين ؟
ضيدان ضحك وقال : طولي ١٨٩ وانتي يالقملة ؟
توسعت عيونها بصدمة وقالت : اشهد بالله اني قملة !!
ضحك بصوت عالي ومشى يسكر باب البيت ، عضّت شفايفها السُفلية لثواني ونطقت بهدوء : ضيدان بتنام ؟
ضيدان : بحضنك
توردّت ملامحها بخجل وصدّت تشوف الورد ، تقدم للصالة وقال : هديتك م تبين تشوفيها ؟
قامت وقالت : ورني
ضحك وقال : م وصلتي للمفتاح
دالين بغضّب : احلف ؟ حاط لي مليون وردة وهو فالنص !
ضيدان مسكه وسحبه وقال : اسلمي ي فاتنتي
مسكته وقالت : اووووه سيااارة !!!
ضحك وقال : عسى تعرفين تسوقين ؟
دالين ابتسمت ابتسامة عريضة وقالت : افا عليك ! اسوق ونص بعد
ضحك ومسك يدها وقال : ننام لأني من قبل الزفة دايخ
دالين سحبت يدها منه وقالت : بس انا م فيني نوم بجلس اصور شكلي والهدايا حقتك والسيارة وبعدها بجي
ضيدان كتم عصبيته وقال : طيب
مشى يطلع وطلعت جوالها وصورت باقي كشختها ، ولفت للورد تصوره والمفتاح بيدها ومشت وحاولت تفتح الباب بس كان مأمن بكلمة سر ، لفت تناظر البيت المودرن وجدًا ومشت بالبياض وبلون فستانها الاورنج ، لفت تناظر الغرف فالدور الثاني وابتسمت وقالت : مستحيل انام جنبه يمه يالرعب
اخذت شنطتها الصغيرة وبأغراضها ومشت للحمام تاخذ دش سريع وطلعت ولبست بجامتها ومشت تنسدح بالصالة بعد م طفت النور ، سحبت اللحاف اللي ع طرف الكنب وانسدحت وشغلت افلام وبدأت تقلب فيها وداخت ونامت علطول ..
" عند سامي "
يتأمل خويه اللي م جلس معه الا بعزيمة وحدة ومجلس واحد ، زفر بتعب وقال : يالله يارب انك تلطف به
تقدم ودقق بالوجه ، توسعت عيونه بصدمة ومشى خطوتين وراء ونطق بصدمة : هذا ماهو بثويمر !!
فزّ للمعلومات ع الباب وكان مكتوب فيها " عبدالرحيم بن.." شهقت ونزلت دموعه بفرحة وقال : يالله لك الحمد !!!!
مشى يركض للأستقبال ونطق برعب وبيدين راجفة : وين ثامر بن فهد ؟
الممرض قام وقال : ثامر يطويل العمر بالدور الثاني فالقسم
ضحك سامي واستهَل وجهه وقال : ياربي وانت ربي !
مشى يركض يطلع مع الدرج ووصل للقسم ومشى للأستقبال الخاص بالدور الثاني وسألهم وقالت له الممرضة : غرفة مية وسبعة
ابتسم لها ومشى يشوف الغرف ووصل للغرفة وقرأ المعلومات ، الا والله هذي معلومات ثامر كاملة ، تقدم وفتح الباب ونطق : صاحبي !
ثامر لف بعد م كان يتأمل شروق الشمس ونطق بصدمة : ارحب يورعي !!
ضحك سامي وبكى علطول ، ابتسم ثامر بضيق وقال : رجلي مكسورة تعال يكلب !
سامي ضحك وفزّ له يضمّه بكل قوته ، ابتسم ثامر وقال : سلامتك وشفيك تبكي ؟ علي ؟ لأني م اصدق
ضحك سامي وقال : يحيوان لي اربع طعش ساعة تحت اشوف واحد م منه رجاء وقد روحي بتتقطع عليه احسبه انت الله يفجع عمك التيس !
ثامر ضحك وقال : لا يبن هادي م فيني ولا شيء عشاني طرت من السيارة وضربت بالرصيف ومن عمي ؟
سامي : حمدلله جاتك سلامة والشوقر دادي ذاك
ضحك ثامر وقال : جعلني قبله ! جاء ؟
سامي : تعبان البارح وقلت له يرجع للبيت وانا بتطمن عليك
ثامر ابتسم وقال بهدوء : جوالي ؟
سامي مد اغراض ثامر له وسرعان م طلع جواله وفتحه واتصل ع ابوه ، وعلطول وصله الرد من فهد اللي نطق : ثامر
ثامر ابتسم وقال : ارحب يبه
فهد فزّ وقال : يولدي وينك !؟
ثامر بتمثيل بكى بشكل درامي وقال : ااااه يبه صار علي حادث ومحد سأل ولحد جاني يبه بموت بموت
سامي ضربه ع رجله وصرخ ثامر آلم ونطق سامي : تفجع ابوك يجيه سكتة !!
ثامر خاف وقال : يبه امزح انا بخير ومن بعد الحادث وانا فالقسم 
فهد بحدة : الله يخلف عليّ ي ابوك !!
ثامر ابتسم بآلم وقال : من مين ؟ امي ماتت ولا ناوي تعرس
فهد ضحك بسخرية وقال : بزوجك وافتك منك
ثامر ضحك علطول وقال : طمن اللي عندك قول ثويمر قااعد ع قلوبكم وخصوصًا السلقة عمي عقاب
فهد نطق بحدة : اعقبب عقبت ي صبي !!
ثامر : معليش بس م يخصك بيني وبينه وربي لا ينزل بوقس اجل مخلي الغريب يخاف..
قاطعه سامي وقال : وعّلة يكلب ! من الغريب ؟
ثامر ضحك وقال : برسل لك اللوكيشن وتعال
فهد نطق : ويش هو ؟
ثامر ضرب راسه وضحك وقال : الموقع الموقع
فهد : يالله ارسله جايك
سكر ثامر وارسل رسالة يطمن حصة عليه ، م وصله رد والاكيد انها نايمة ، لف لسامي وقال : يرفيقي !!
سامي ابتسم وقال : احتزم لبى كبدك
ثامر : اوووه شهيتني بكبدة الحين
سامي : تنزل لك الحين وترا عيال جدانك اعرسوا امس اشوف ستوريات هيثم
ثامر : ايه سلق بس طّبهم عندي انت ذلحين انقز جب فطور يحبه قلبي
سامي اشر بأصبعه ع خشمه وقال : ع ذا الخشم يبو فهد
قام وطلع يجيب فطور وابتسم ثامر ان سامي م تركه وجاه قبل اهله حتى ..
" فالفندق "
فزّ من منبه جواله وصحى هو بعد م دخلت للحمام حط منبه نص ساعة وبعدها يصحى يشوف طلبها وياخذه لها ، لف عيونه يمين يسار م شاف لها اثر قام ولبس ثوبه من جديد ونطق : للحين بالحما..
سكت من شاف الحمام مفتوح والارض فيها اثر اظافرها وهي تحاول تزحف لوراء ، رفع طرف ثوبه وركض بكل سرعته برا الجناح ، هو صحى بعد الحادثة بدقيقتين بس ، صرخ بجهورّية صوته ونطق : امااال !!
سمعته وهي بغرفة ادوات العمال بالطابق نفسه ، قدرت تدفع العامل برا وتسكر ع نفسها بس كان معه خويه اللي معه سبير للباب وجالسين يدورونه ، غطت اذانيها واخذت نفس وزفرته وسرعان م صرخت وقالت : فلااااح !!!
سمع صوتها وعلطول ركض لجهة الصوت وفك وجه اللي عند الباب بلكمة سددها فلاح له ، وتطارحوا ضرب ، كان يفور دمه ويحترق هو مثل م لعنهم بيلعنها ع تجاوزها قراره وتحذيره لها ، سحب المكنسة واخذ سلكها يربطهم فيها ونطق بحدة وبشكل مرعب : ولحد يتحرك اجرك للسجن يملعون الثوى !
كسر الباب بضربة وحدة وميّل راسه بحزن من شافها بالروب تمنى انه مات ولا شافها ، ركضت علطول وحضّنته وبكت برعب ورجفة ، سحب شماغه يلفه ع راسها ويشيلها من الارض ، وصلها للغرفة ونطق بحدة : حسابي معتس بعد شوي !!
مد كيس الاكل بقوة وقال : هذا اللي سبب كل شيء ؟!! تشوفينه يستاهل انتس م تصحيني اكليه ودقايق وراجع !
سكر الباب بقوة ومشى لهم ، رفع بلاغ علطول ووصلت الشرطة وحققّوا مع العاملين وشافوا الكاميرات والواضح قدامهم عملية تحرش كاملة ، شّد ع قبضته وانقبضّ قلبه يشوفهم فالسيب يجرجرونها وراهم ويلمسونها ، زفر اللهيّب ونطق بحدة : ولا بتنازل ياخذون جزائهم كامل !!
العسكري خبط ع كتفه ونطق : ابشر وابسط حقوقك وخطاكم الشر
فلاح : م تقصرون
مشى راجع للغرفة ووصل وفتح الباب ، دخل وشاف اكياس الاكل باقيه ع حالها وسكر الباب بالمفتاح وراه ومشى لنص الغرفة وشافها ع سجادتها منحنية براسها وغرقانه بدموعها ع وجنتيها ، مشى لها وباس راسها بقوة ، رفعت يدينها تحاوط رقبته ، ابتسم بضيق وقال بجدية وهو ماسك وجهها بين يدينه : ينكسر قلبتس لكن ترتفع هامه والله ان اموت ان تركت راستس ينحنى ارفعيه يبنت مقرن ارفعيه يمال الغناة وراس المال ! م حصل شيء ويخسون يلمسونتس والله لو اني ميت لأحيّا ولا يجون حولتس وانتي ع ذمتي وبوجهي وشنبي !
ضمّته لها تبكي وحاوطها وباس كتفها ، انسدح بثوبه وسحب شماغه يرميه وانسدحت بحضّنه ونامت علطول بين يدينه الحنونة وحضنّه الدافي ...
" في حدود نجران "
جالس فوق قمّة جمل ، مستمتع بالنسناس اللي يصافح وجهه ، ابتسم من تذكر اخر مره شافها هو فعلاً مشتاق ومن يلومه مرّت ثلاث شهور من مشى اسر من بيت اهله للمهمة الطويلة ، قام وسحب سلاحه ونزل من الجبل بعد م انتهى من المناوبات حقته ، ضحك وقال : الحجاج زاروا مكة وشافوا بيت الله وانا مبطيّ م زرت نجد ولا شفت خّلي !
دخل السكن ومشى لسريره ينسي نفسه طول الايام وبعد المسافات وقصّر صبره وحريق شوقه ، غمض عيونه ونام علطول بعد ايام طويلة مرهقة ..
" فالديرة "
الكل مجتمعين لعرس ضحى وسهم بعد اسبوع والفرحة تعجّ فالبيت ، مشت تشيل بطنها اللي بدأ يثقل ونطقت بتعب : ميلو تعالي ساعديني !
الميلا قامت ومشت لها وسرعان م حسّت بدوخة وغثيان وشهقت تركض للحمام ، فزّت الجود تركض بهدوء ورا اختها ودخلت معها تمسح ع ظهرها ونطقت : حامل صح ؟
الميلا اللي كملت شهرين تحسّ بالتعب والغثيان بس صار عندها رعب من التحاليل ولا ودّها تحمل بعيدة عنه ، هزت راسها بنفي مرارًا وتكرارًا ونطقت : لا ان شاءالله !
توسعت عيونها بصدمة وقالت : ميلو !! وش الكلام ذا ؟ غزيل وحملت وصارت فالشهر الثالث وتالين حامل من شهرين وامال توو بشرتنا قبل اسبوع !؟ متى يجي دورتس !! ترا ادري ان الدورة م تجيتس !
رفعت راسها ونطقت برعب : م ابي ادري بجيّة احد وهو ماهو بحوّلي ولا جنبي يواسيني ويحتضني ليه ما تحسين فيني ولا عشان عقاب اقرب لتس من هدّب عينتس ؟
الجود نزلت لمستوى اختها وضمّتها ونطقت : اقّلها فرحيه اذا جاء بالسلامة
::::::::::::::::::::::::::::::::::::
انتهى البارت ادعموني بنجمة وكومنت عشان اتحفز اكملكم ❤️
(ارحبوا يحباان الجُّود ، استمتعوا بآخر البارتات وعطوها حقها ، قربنا ع الختام وبنودع فيه روايتي الثانية 😞 ، لا تنسون النجمة 🤍🤍! )