مشت الميلا واسر يلاحقها وبينهم مسافة كبيرة ووصلوا للديرة وشافها تدخل من الباب الخلفي وتسكره ابتسم ورجع ركض لبيتهم وهو يبي يسأل عقاب وش صار له فالليلة ذي وصل وفتح الباب وحصله مسكر عض ع اصابعه وقال بحدة : الله يالميلا قدتس ترجعيني البيت متأخر لدرجة احصل الباب متسكر !
مشى فالحارة وشاف المحلات كلها مقفلة والابواب مسكرة والانوار طافية ابتسم وقال بنفسه ( مقدر اقاوم بروح اشوفها ) مشى اسر ووصل لبيت عمه راشد ووقف عند الباب الخلفي وسمع صوت طالع منه وقرب وكل م قرب اعتلى الصوت ووصل لشباك كان شباك غرفة البنات وصار يسمع كل شيء وملامح الصدمة معتلية وجهه
" عند البنات "
دخلت الميلا بهدوء ولفت بقوة ع صوت الجود وهي تقول بعصبية : اخييرًا شرفتي يالاميرة !
الميلا ابتسمت بخرشة وقالت : يمه وش العلم ؟ وبعدين قصري صوتتس ابوي وامي نايمين وتروك بعد
الجود بحدة : انتي الحين اللي تنطمين وانا اللي اتكلم م تدريين وش ورطتيني فيه !
الميلا رفعت حاجبها وقالت : جود !! خير اختتس الكبيرة احترمي نفستس !
الجود بكت علطول وطاحت ع رجولها وقالت بصراخ : م تدررييين انيي تزوجتت زوجوونيي عقاااب اللي انتيي طااييرة فييه خليتتيينيي وجبررني ابووي علييه عشانتس م كنتي موجوودة !
الميلا توسعت عيونها بصدمة وحزن ع حال اختها وقالت بصوتها المهزوز : جود تست..تستهبلين صح ؟!
الجود : اااه يميلوو ليتننيي استهبلل شووفيي يدي شووفي الدبلة !!
رفعت الجود يدها وطارت الميلا وشافت الدبلة وقالت : انتي خذيتي عقاب !!!
الجود سحبت يدها من الميلا وقالت : اها يعني طلع ذا اللي يهمتس اني خذيته وانتي تبينه !؟
الميلا بحدة : جودي خير ! لا طبعًا بس وش صار قولي لي من البداية تكفيين
قربت الميلا وحضنت راس اختها ع صدرها وصارت الجود تحكي لها اللي صار من البداية للنهاية وهي تقول : وطلع حتى م لف وسلم علي وواضح انه مجبور هو بعد اتمنى يصير شيء ولا يتم هالزواج اتمنى
الميلا ابتسمت بضيق وقالت : يالله شوفي الجانب المشرق بتعيشين مع البندري اللي طايرة فيتس وتحبتس والشيء الثاني بنصير ننزل غصب عشانتس
الجود ابتسمت وقالت : والله صليت استخارة وحسيت بشعور حلو والحمدلله ع كل حال وان شاءالله يكون عقاب كذا دايم وم يقرب مني
الميلا قامت وقالت : تعالي نغسل وجهتس وبعدين فنهاية المطاف بتتقبلين عقاب وبتحبينه وانتظر هاللحظة عشان اطقطق عليتس
الجود قامت وهي تضحك وقالت : يارب تنفسخ الخطوبة وتأخذينه
الميلا ابتسمت وقالت بنفسها ( امييين وشلوون طار عقاب من يديني !! يارب لذي الدرجة خييرة ؟ وربي م يبيني معه لكن حسافة والله كنت اتمناه ) مشت مع الجود للحمام ودخلت الجود وسكرت الباب والميلا دخلت للمطبخ وسوت حليب شوكولاتة لها ولجود لأنهم يحبونه من هم صغار ويروقون عليه ..
" عند بطلنا "
كان يحس بشعور فظيع وفرحان بالوقت نفسه ابتسم وقام يناقز وقال بفرحة كبيرة : الميييلا م خذذذتت عقاااب يعننيي الطررييق مفتوووح لآسر بن عايض بن مساعد ال ***** حمدلله ياااارب !!
ابتسم وعض طرف ثوبه وركض علطول لبيتهم ووصل للجدار ونقز من فوقه وقال : من الفرحة وصلت علطول
ضحك ونزل لحوشهم ومشى ركض للمقلط ودخل وشاف عقاب ع جواله ولف لدخول اسر وقال : يحييوان تووك تجي !
اسر ابتسم وصار يمسح ع كتوفه بغرور وقال : الميلا لي
عقاب توسعت عيونه وقال : هااه ؟
اسر جلس وقال : خذيت الصغيرة ؟
عقاب ابتسم وقال : ايييه هذا موضوعك يالدبشة ؟!
اسر ابتسم ومسك قلبه وقال : يويييل قلبي يعقااب عليها جمال مقدر اوصفه ولو يخلص شعري وكتاباتي م قدرت اوصف الميلا
عقاب مسك رقبته وقال : شفتها !؟؟
اسر لف يد عقاب بكل قوته وقال : اهجد لا نبدأ وتعرف من اللي بيفوز فينا
عقاب ابتسم ع جنب وقال : تتحدى ؟
اسر : اسمع السالفة بعدها نتحدى تخيل ..
وحكى اسر موقف الاسطبل لعقاب اللي كان يبتسم وفجأة ينصدم ويرجع يضحك وخلص اسر وقال : بس يعليها جمال لا اله الا الله سبحااان اللي سواها
عقاب ابتسم وقال : اللهم بارك لهما واجمع بينهما في خير
اسر رفع يدينه للسماء وقال : امييييييييين اييه وانت وش صار معك ؟
عقاب انسدح وصار يقول لآسر اللي صار تحت صدمة اسر وقال : بس والله باقي تبي تعرف شيء ؟
اسر : م عطاك الميلا عشانها عندي !!
عقاب توسعت عيونه وفز وقال : والله انك صااادز !!
اسر نقز وقال بصوت عالي : ايييييه ااادبب
ابو فهد ضرب الباب بكل قوته وقال بحدة وصراخ : نعنببوو ابلييسسك باقي ساعتييين ويأذن وانتت عااادك تصااييح الممسى اللي يسللم من اسلمكك يالاسسسر
عقاب انفجر يضحك وهو حاط وجهه ببطانيته واسر صفر وجهه من الخرشة وقال بحدة وهو يهمس : عقاب حرام انها كف سد حلقك !
عقاب تحولت ملامحه لجدية وقال : اعنبو غييرك نسيت اني عقاب ؟!
انسدح اسر وترك عقاب يضحك وراه ونام من الخرشة علطول اما عند عقاب لف ليده وقال بنفسه وهو يشوف الدبلة ( حتى الدبلة م لبستها والله من الدفاشة صدق ) انسدح وابتسم وكمل وهو يقول بنفسه ( احسن لك خلك كذا من البداية ووضح لها شخصيتك اصلاً ليته زواج عن حب هي مجبورة وانا اسوء منها وبتكون اضافة عدد لخواتي فقط لا اكثر ولا اقل ) انتهى من كلامه وهو م يكن بصدره ولا ذرة حب لجود مجرد احترام وتقدير لأنها بتحمل اسم " زوجة عقاب " غمض عيونه وضميره مرتاح وعقاب هو عقاب ومستحيل يقدر عليه الا رب العالمين..
" نرجع شوي في بيت ابو فلاح "
دخل فلاح للبيت وشاف دالين وقال : دالين وين تاليني ؟
دالين لفت له بقرف وقالت : من تكلم انت !؟ يع حثالة
مشت ودخلت وصد فلاح منها وقال بنفسه وهو شّاد ع قبضته ( خلاص اهدا من كذا انت تدري لو تضربها كسرت وجهها خلاص ) مشى ووقف فالحوش وهو محروم من وهو صغير م يدخل ارجاء بيتهم وبنى له ابوه غرفة لحاله برا البيت وقال بصوت عالي : توولييننيي
تالين طلعت تركض وقالت : فلاح اص امي لا تسمعك !
فلاح فتح يدينه وركضت تالين وحضنته وقال : ولعنتها اختي وابي اسلم عليها وبعدين طاح الحطب ؟
تالين ابتسمت وقالت : ايه بس بشرط تطلعني !
فلاح بعدها واشر ع عينه اليمين وقال : من عيني ذي
ولف بأصبعه لعينه اليسار وكمل وهو يقول : قبل ذي كم عندي تالين
تالين ضحكت وفزت وباست راسه وقالت : عساك لي ذخر وسند يحبيبي
فلاح : يالله اركضي البسي عبايتتس وتعالي
لفت تالين وركضت داخل واستوقفتها يد دالين وهي تقول : خير خير يالانسه ع ويين ؟!
تالين مسكت فك دالين بكل قوتها وقالت بحدة وهي تهمس : ويمين بالله ويمين عظيم لا يطلع الكلام لأمي لا اموتتس تسمعيين !!
دالين توسعت عيونها وقالت بصوت عالي : مننن تهدديييين انتتيي !!
تالين الجمتها بكف وقالت : ههيييه احتررممي اختتس الكبيييرة يحقيييرة !! بينيي وبيينتتس ست سنووات !
دالين ركضت بصدمة لغرفتها وسكرت الباب وابتسمت تالين وقالت : ناس م تمشي الا بالعين الحمراء
لبست وخلصت وطلعت لفلاح اللي كان بسيارته ينتظرها ركبت وقالت : دزز
فلاح ابتسم ومشى بسيارته وطلعوا من الديرة وقال : اذا تبين تشيلين النقاب شيليه الطريق فاضي
تالين شالته وطلعت راسها مع الشباك وشافت البدر كيف منور فالارض ابتسمت وقالت : وين بنروح ؟
فلاح : والله مدري ندجج لين نعين مكان
تالين : اسمع فلاح وين اسطبلكم ؟
فلاح استغرب وقال : ورا ليه ؟
تالين : اشتقت للأدهم ودي العب معه تحت القمراء ذي
فلاح ابتسم وقال : خلاص نروح نجيب لنا قهوة ونرجع
مشوا متجهين للرياض وتغطت تالين تجهز نفسها للمدينة وهي م استغربتها لأنها تروح دايم مع فلاح رغم ضرب امها لها وحرمانها من كل شيء وحبسها في غرفتها وكله من تحت راس دالين لكن م تابت تالين ابدًا ..
" فاليوم الثاني في بيت ابو تركي "
دخل الصالة وشاف ام تركي تجهز الفطور ع السفرة والميلا معها اخذ شهيق وزفره بعصبية وقال بحدة : ميلا وين كنتي امس !!
الميلا لفت بهدوء وقالت : فالحما..
وقاطعها كف ابوها ع خدها لدرجة طاحت الميلا ع الارض وكمل وهو يقول : لاا تكذبييين دوررت فيي كل زاوويية وحفررة ويين كننتي !!
الميلا بكت علطول وقالت : يبه اسمعني يبه
ابو تركي بحدة قرب ومسك فكها ورفعها له وقال : تبيين تفضحيينني انتي !! وييين كنتتي براا البييت صح ؟
الميلا انهارت وم قدرت تكذب وهزت راسها بنعم ودفها ابوها وقال : صباااح ! اول م نررجع الرياااض تكلمييين اختتس وتزوجيينها هزاااع !
الميلا فزت وقالت بصراخ : يببه كنتت عند ضحى بنتت عميي عااايض ولو تبيي اسأل عمتي قمراء مااهي انا اللي اجييب لك الفضييحة واسأل اسر بعد هو اللي وصلني للبيت ! وزواج من هزييع والله لو تنطبق السماء ع الارض م خذييته !
ابو تركي علطول رفع جواله ودق ع اسر ووصله صوته وهو يقول : اررحب يعم
ابو تركي فتح السبيكر وقال : اسر الميلا بنتي
اسر بلع ريقه بتوتر وقال بخوف : وشفيها ؟
ابو تركي جلس وزفر بقرف وقال : حرر افتحوا البيبااان انكتممناا !
اسر ابتسم وقال : وش تقول عني اللي فاتح الدكان من فجر
ابو تركي ابتسم وقال : الله يرزقك يولدي المهم بنتي الميلا امس كانت عندكم ؟
اسر ابتسم وقال بنفسه ( انكبها ؟ واقول لا اصلاً م يطاوعني قلبي ) كمل وهو يقول لعمه : ايه اييه امس كانت عند ضحى وامي قالت لي اوصلها لبيتكم
انجلطت الميلا من التخاطر اللي صار وكيف عرف اسر اللي بخاطرها ابتسمت بحب وقالت بنفسها ( اخ ي اسر انقذتني اااخ صدق يكبر حظي !! ) ناظرت بأبوها بأنتصار وقالت بفرحة : هاه وش قلت لك ؟
اسر ابتسم اول م سمع صوتها وقال : توصي يعمي ؟
ابو تركي ابتسم وقال : الله يحفظك
سكر وقام وباس خد بنته وراسها وقال : سامحيني يميمي
فزت الميلا وباست راس ابوها وقالت : يبه شدعوة جعلني قبلك تمون ع رقبتي
ابو تركي جلس ع السفرة وقال : الفطور برد
جلسوا كلهم وشوي ودخلت الجود وقالت : يمه دريتي اني اعرست ؟
ام تركي ضحكت وقالت : خير ايه ادري ومبروك يبنتي والله يجعله سند وذخر لتس يارب
الميلا بمزح ضحكت وقالت : شكل جويد مستانسه كل من هب ودب علمته انها اعرست
الجود توسعت عيونها وقالت بهمس : والله م اخليتس
ابو تركي ضحك وقال : من حقها والله واحد ياخذ عقاب وم يستانس ؟
تركي ابتسم وقال : ع اني ابعص فرحتكم لكن يبه متى بنرجع للرياض عشان دوامي ؟
ابو تركي : بعد اسبوع اول م تتزوج جودي
ام تركي غصت والجود م هي اقل منها والميلا اخس منهم ضحك ابو تركي وقال : صحة صحة وراكم ؟
الجود بصدمة وهي تكح : اسببوووعع !!!
ام تركي : لااا عاااد !
ابو تركي بحدة : اسمعوني ذا طبعن فينا وعادات جماعتنا ولا كلمة اسمعها زهبوا البنت وخلصوا اموركم
الميلا ابتسمت وقالت : ابشر يبه
الجود ضربت ركبتها وقالت : بشروتس بالوجع !! وانا استغفر ربي
الميلا انفجرت تضحك وقالت : معليش منزمااان عن الزواجات اخرها زواج بدور اللي يسد النفس
ام تركي ضحكت وقالت : اففوووه يالميلاا احد يبدأ صباحه ببدور !
تركي توسعت عيونه وقال : توفى الرجال أستغفروا ربكم وادعوا له بالرحمة !
ابو تركي استغفر وقال : لا اله الا الله الاكل تسمم من سوالفكم !!
الميلا توسعت عيونها وقالت : حشى وش قلنا ؟
قام ابو تركي وقال : تركي الحقني بنروح نكلم عمك ونشوف نسيبنا
الجود بأستهزاء وبهمس قالت : نسيبنا ! الله يفكني منه !!
الميلا غمزت لها وقالت : م معتس خلاص انتي لعقاب وعقاب لتس
الميلا فزت علطول اول م رمت الجود صحن الخبز اول م شافته فاضي ع الميلا اللي طاحت تضحك والجود تصارخ وتهاوشها وام تركي ابتسمت وشالت الصحون وقالت : اذا خلصتوا تعالوا غسلوا المواعين
وطلع ابو تركي وتركي معه من بيتهم ومشوا لبيت ابو فهد ووصلوا ودخلوا علطول ومشوا للمجلس وقال ابو تركي قبل يدخل : ياهل المحل
ابو فهد فز وهو ماسك عصاته وقال : اقلطط
دخل ابو تركي وسلم ع اخوه وجلس وتقدم تركي وسلم ع عمه وجلسوا وقال ابو فهد : يالله انك تحييهم ثامر يولدي
ثامر فز وقال : سم يجدي ؟
ابو فهد : انطلق جهزوا القهوة والشاهي والقدوع
ثامر اشر بأصبعه ع خشمه وقال : ع ذا الخشم
ركض ثامر ودخل وقال : عمة عمة عمة !
ضحى صرخت وقالت : عممىى يعمييييك ولعنه انططم !
ثامر توسعت عيونه وقال : احلفي ؟ اقول سوي قهوة وشاهي
ضحى ضحكت وسكتت شوي وقالت : تمزح صح ؟
ثامر ابتسم وهز راسه بنفي وانفجع من صراخ ضحى وهي تقول : لاااا عاااد ككذذاا قلللة حيااا وقللة ذوووق !!
ثامر سد اذانيه وقال : تكفين اخلصي جدي بيلعن ابوي
ضحى بحدة : العن ابوك هاا اطلع مني
ثامر اشر ع خشمه وقال : سمي طال عمرتس
طلع ولفت ضحى وحطت الدلة ع الغاز وضبطت لهم اطلق قهوة وخلصت الشاهي وحطت قدوع معها وحطتها فالصينية ودقت الشباك ثلاث مرات ودخل اسر وانفجعت وقالت : ولعنه من وين طلعت انت !!
اسر ابتسم وقال : الناس تصبح بالخير وانتي تلعنين اتقي الله
ضحى ضحكت وقالت : استغفرك يربي واتوب اليك امسك اعجل علي انكسرت يدي
تقدم اسر واخذ الصينية ولف بيطلع بس استوقفه صوتها وهي تقول : اسمع اسر صب لهم بشووويش عشان م تخلص واضطر اجددها
اسر انفجر يضحك وقال : الله يقلعتس يوضيحي
طلع للمجلس ودخل وقال : سلاام عليييكم
ابو تركي وقف وفز له اسر اول م نزل الصينية وقال : والله م تقوم يعمي
جلس ابو تركي وباس اسر راسه وقال : الله يرضى عليك يولدي
ولف وقال : هلا والله بدكتورنا اللي اشغلنا واشغل المسلمين
تركي ضحك وقال : انا الدكتور ت..
اسر احتدت نظرته وقرب وقال : عض ع شحمه !
تركي ابتسم وقال : وراه ذا تحول عقاب بسم الله !!
عقاب دخل وقال : خير ان شاءالله احشم ابوي واخواني وانت تحكي فيني !
تركي فز برعب من هيبة عقاب وقال : الله يخررشك
عقاب ابتسم وتقدم وسلم ع راسه ابوه وبعدها عمه وقال وهو يلعب بالسبحة بين يدينه : وشحالكم جميع ؟
ابو تركي : والله ع م يسرك يولدي وانت ؟
ابو فهد : بخيير بخيير كأنك مبكر اليوم ؟
عقاب جلس وقال : والله ؟ م داومت اصلاً ولا كان شفت البدلة علي بس خذيت اجازة بما ان العرس بعد اسبوع
ابو فهد : ايييه ازييين لك يولدي
ابو تركي ابتسم وهو يشوف هيبة عقاب وطوله وعرضه ويحلف انه عن مليون رجال وقال : ماشاءالله عليك يعقاب ماشاءالله ماشاءالله قدك رجال اطول مني ومن ابوك الله يحفظك ويخليك سند وذخر للجود
عقاب مسح وجهه وشنبه وقال : ابشر بعزك يعمي
وصد وقال بنفسه ( وقدني سندها ؟ يالله وشذا كله ! ) لف ع دخول فلاح وابو فلاح وهم يقولون : سلااام علييكم
فزوا المجلس كلهم وسلموا وخلصوا وجلسوا وقال اسر : فلييح وين طسيت امس ؟
فلاح : والله مع تالين ليه ؟
اسر مسك قلبه وقال بهمس : البدر امس زارني فالاسطبل وسلم علي وشفته من قريب وتمنيت اني اقبله اشهد بالله انها موتن حمر !
فلاح توسعت عيونه وقال بصدمة : المييلاا !!!
لفوا المجلس كله وقال تركي بحدة : وشفيييها !!
اسر مد يده وقبص فلاح بكل قوته وقال بهمس : الله ياخذ نفسك !
ابو تركي بحدة : فلاح انطق وشفيها !!
فلاح ضحك بفشلة وقال : لا بس سألت اسر من عقاب خذا وقالي الجود وقلت والميلا
اسر ضرب راسه بخفه وقال : عطبتها زيادة !!
ابو فهد بحدة : ووشدخلكم !!
عقاب كان يقلب عود الاسنان بين شفايفه ويضحك ويشوف كيف نكبوا انفسهم وقال : صدز وشدخلكم ؟
ابو فهد بصراخ : انقللع للدكان انقلع !!
اسر فز وقال : فليح قم معي
وكمل وهو يهمس له : قم قامت قيامتك
فلاح ابتسم وقام مع اسر وطلعوا يمشون بهدوء وقابلوا ام تركي والجود والميلا عند البوابة
اسر ابتسم وقال : ارحبي يعمتي
قرب وباس راسها وبعدته ام تركي بقرف وقالت : تحب الكعبة ي اسر
فلاح تقدم وباس راسها وقالت : تحب الكعبة ي فلاح
اسر ابتسم وقال : وشحالكم يبنات ؟
الجود لفت للميلا اللي مشت داخل وسحبت ع سؤال اسر وقالت : بخيير
ولحقتها ومشت امهم وراهم وكان اسر يناظر بمشيتها وطولها ورزتها ابتسم بحب وقال : اه يويل قلبي
فلاح ابتسم وقال : يولد شكلك طحت ولا سمي عليك !
اسر مشى وقال :
اخترتس يالميلا من الناس للقلب خلّى
وبحيثتس مرادي وكيفيي .... وذوقي
م رحت ادور ورا كل زولن تحلى
لولاتس تسوى م عطيتس خفوقي
-
فلاح ضحك بسخرية وقال : وابيات بعد عز الله كدينا خير طاحوا عيال عايض ع بنات راشد !!
اسر ابتسم وقال : امش نفتح الدكان
مشوا للدكان وفتحوه وجلسوا ع الدكة يشربون شاهي وكانت سوالف اسر ترجع وتلف للميلا وفلاح ماسكه طقطقة ..
" في بيت ابو فهد "
دخلت الميلا وقالت : يع يجلط كيف كذا جريئ !!
الجود توسعت عيونها وقالت : ميلو ليه خدودتس حمراء !
الميلا غطت وجهها بيدينها وقالت : تحبين تسولفين ؟
الجود : ورربي استحييتتيي من سؤال عن الحاال !!
الميلا مشت وسحبت ع الجود تضحك وراها وم انحرجت الميلا من سؤال اسر لهم لكن قتلتها نظراته اللي عجزت الميلا تطلعها من راسها وعجزت تفسرها
ضحى قامت وقالت : العهد قريب اقعدوا
جلسوا البنات وقالت الجود : بنات ابي الحمام
البندري : جنب المطبخ شوفيه
قامت الجود ودخلت الحمام وعلطول تكلمت ضحى وهي تقول : تملكتي !!
الميلا تكت ع المركى وقالت : انا ؟
البندري بحماس : اجل ؟ اييه انتي !!
الميلا ابتسمت وقالت : يعزتي لكم تحسبوني زوجة عقاب ؟
ضحى قطبت وقالت : هاه ايه انتي امس جاء وشفت الدبلة بيده ! وين دبلتس !؟
الجود وهي تمسح يدينها بالمنديل قالت : قصدتس ذي ؟
شهقوا البندري وضحى وشوي وشهقت سحاب معهم وقالت : يوييلليي انتي الصغيييرة خذيتي خالي عقااب !!
الجود توسعت عيونها وقالت : شف شف الوراعين يقولون لي صغيرة !
البندري مسكت راسها وقالت : يويلي عليتس ي جودي خذيتي الجثة واكثر واحد عملاق ببيتنا واكثر واحد جدار م يحس !!
ضحى عضت ع اصبعها وقالت : يمه يمه شلوون وش صار كنت ابي الميلا عشانها بتقدر عليه شوي يررااسي صدق !!
غالية من وراهم قالت : وخير يطير حتى الجود بتقدر !
الجود زاد رعبها وخوفها من عقاب وقالت بهمس : ايه ايه بقدر اذا خواته يقولون كذا شلون بقدر !!
وطار قلبها اول م اعتلى صوت زوجها عند باب المطبخ وهو يقول : يوضييححيي تعااال جدد لنا القهووة
ضحى ضحكت وقالت : م انتي زوجته ؟ انقلعي جددي القهوة
الجود اشرت ع صدرها وقالت : هااه..ان..انا ؟
ضحى : ايييه يعيون امتس
ام تركي ضحكت وقالت : جودي يالله !
الجود مسكت يدينها بقوة ودخلت للمطبخ بعد صراع نفسي وقالت : وين الدلة ؟
عقاب رفع عينه وقال : وين ضحى ؟
الجود كانت العبرة خانقتها وعيونها امتلت بدموعها وقالت بصوت مهزوز : انا اللي بسويها
عقاب دخل وقال : امسكي طيب
مد لها الدلة ومسكتها الجود وطاحت وشهقت وقالت : حااااررة !!
عقاب صد بقرف وقال بحدة : م تحرق الا الرفلة امسكيها ونظفي البلاط بطلع شوي واجي وابيها جاهزة !
مشى واول م طلع طاحت الجود ومسكت صدرها اللي كان يرتفع وينزل من الرعب وقالت : بسم الله بسم الله وشذا !
ولفت اول م سمعت صوت البندري وهي تقول : ييمه بسم الله علييتس !! قومي
قامت الجود بعد م نظفت القهوة بمساعدة البندري وقالت : نوني كملي معي تكفين سويها بدالي مرره متوترة !
البندري حضنتها وقالت : اف جودي اتمنى بس مقدر عقاب يعرف قهوتي وقهوة ضحى وقهوة امي وقهوة غالية ويفرق بينها وقد حاولنا نلعب عليه وغسل شراعنا والصدق م اتمنى اشوفه بالشكل ذاك مره ثانية
الجود تنهدت وقالت : خلاص اجل
طلعت البندري وتقدمت الجود للفرن وحطت الدلة عليه وطلعت البهارات حقت القهوة وسوتها وجلست مركزة عشان تقصر عليها اول م تفور وشوي وفارت وقصرت علطول وطاحت علطول وصارت تنفض يدينها وقالت : خلاص راح الكثير وبقى القليل خلاص قومي
قامت بصعوبة ولفت وصارت تناظر بالباب وشوي وشافت ظله العملاق ودخل وهو يعصب راسه بشماغه وقال : جود وين الدلة ؟
الجود رفعت حاجبها وقالت : خير لذي الدرجة اعمى ؟ وش اللي ع الفرن ؟
عقاب توسعت عيونه وقال : ماشاءالله من بدايتها ذا اللسان ؟!
الجود م تنكر انها م تدري شلون قاعدة تكلمه لكن حبت توصل له انها م هي قصيرة يد ولا قصيرة لسان وقالت : خير تحسست علطول ؟
وطلعت جوالها قدامه وفز عقاب وحشرها ع الرخام وسحب جوالها منها وقال بحدة وهو يصر ع اسنانه : اسمعينني بس افعالتس في بيت ابوتس م تسوينها عندي وانا عقاب ! وكل شيء تغيرينه والجوال ذا اخر مره بحياتتس تشوفينه سامعه !! ولسانتس انا اعرف اتصرف واعرف اقصره لتس ايي اعترااض !!
كانت الجود رافعه راسها من طول عقاب وعرضه بالنسبة لها شهقت ونزلت دموعها وقالت : خيير ! وشذا الاسلوب !!
مسك فكها بقوة وقال : زوجتس انا وكلامي سمعًا وطاعة ! وم عندي اسلوب هذا انا وكذا اسلوبي ولا تبدأينها بالغلط عشان م اوجعتس انا م رحمت خواتي عشان ارحمتس !
الجود كانت مصدومة وعيونها تغورقت بدموعها وقالت : عقاب وخر مني وخر
عقاب سحب يده ورجع ورا وقال : ودموع التماسيح ذي لعاد اشوفها
تقدم وشال الدلة بدون م يقي يده بشيء تحت صدمة الجود وقالت بنفسها ( وش انتظر اصلاً فعلا جدار م يحس ! ) طلعت من المطبخ وعلطول دخلت الحمام وقالت بنفسها ( يمه شلون كذا كبير وعملاق يمه للحين قلبي يدق حسبي الله علييه يقلبي صدق شلون كذا مرعب لا من صوت ولا من شكل والقطع اللي عند عينه شكله تووه ) وبعدها سكتت شوي وشهقت وقالت بهمس : ذاااك يوم عمي كسر الفنجال عليه يرووحي !!
وغطت فمها علطول وقالت : روحتس ؟! وجعاه صدق مسرع اشفقت عليه
طلعت من الحمام وجلست وقالت : ميلو امي وين ؟
الميلا فزت وقالت : وشفيها عيونتس كنتي تبكيين !
البندري ضحكت وقالت : دخلت وشفتها مطيحة الدلة
ضحى فزت وقالت : اعقبي يالرفلة وسختييه !!
الجود توسعت عيونها وقالت : تكفين سدي حلقتس نظفته احترقت يدي من اخوكم الدبشة ذا
الميلا بعصبية : اوووهوو من بدايتها حرق !!
الجود : م كان يقصد مد لي الدلة وهي حارة بالنسبة لي واحرقتني وبس
الميلا قربت وهمست لأختها وقالت : م سووا لتس شيء صح ؟
الجود ابتسمت وقالت : لا لا معليتس م يقدر وانا اخت تركي
البندري ضحكت وقالت : ونعم والله
ضحى شمقت بعيونها وقالت : عاد كلن الا عقيب لا تزعلينه
الجود ضحكت وقالت : م بقدر اصلاً يمه مرعب الا ميلو امي وعمتي وينهم ؟
ضحى : برا فالحوش مع ام الهنوف
الميلا توسعت عيونها وقالت : يووه الهنوف عشيقة عقاب !
الجود رفعت حاجبها وقالت : نعم ؟
البندري : ايه ايه هي نفسها بيدخلون بعد شوي اصلاً
وم كملت البندري كلمتها الا والهنوف داخلة هي وامها واختها نوف الصغيرة وسلموا وقاموا البنات يسلمون ووصلت الهنوف عند الجود وسلمت عليها وسحبت يدها وشافت الدبلة وقالت بهمس : اها انتي خطيبة عقاب ؟
الجود بحدة ونظراتها كانت تدل ع القوة وقالت : قصدتس زوجة عقاب ؟ ايه نعم انا
الهنوف ابتسمت وقالت : الله يعينس اجل
سحبت يدها الجود وجلست وبدأت السوالف والجود م شالت عينها من الهنوف وتشوف كل تحركاتها ..
" عند الرجال "
كان عقاب فالحوش والرجال فالمجلس وحط الدلة ع الضو ورفع عينه ع غامد اللي طلع وكان يشم وقاله عقاب بحدة : خير ان شاءالله ؟
غامد ضحك بسخرية وقال : فيك ريحة تجنن ريحة انثى
وهو قالها ولا م قالها فز عقاب عليه بشكل مرعب ومسك رقبته وحاوطها وقطع مجرى التنفس عنده وقال وهو يصر ع اسنانه : مالك فالعلوم ذي لزوووم والله لأذبحك ساااامع !
تركه وطلع غامد يركض من البوابة قام عقاب وهو يحس بحرارة م عمره حس فيها مسك صدره وقال بنفسه ( خيير عقاب وراك اختبصت !! كل ذا عشان محد يشم عطرها غيرك ؟ ) ابتسم اول م تذكر كيف تخدر اول م شم ريحة الجود وكيف كانت طفلك صدق وكمل وهو يقول بنفسه ( ان شاءالله انها م حست فيني ) كمل شغله وخلص وقعد ينتظر القهوة تقطع عشان يوديها للمجلس ولف اول م سمع صوت منزمان م سمعه وشاف الهنوف تناديه وفاتحة وجهها لف عقاب واستغفر ربه وقال بحدة وهو يهمس : اعنبوتس م تستحييين !
سحب الدلة بيده ودخل للمجلس ورفست الهنوف الارض برجلها وقالت : اف مسوي م يسمعني !!
وانصعقت اول م سمعت صوت الجود وراها وهي تقول بحدة : منهو جعلتس م تسمعين الرعد !!
الهنوف بحدة : اسمعي عاد ترا عقاب تزوجس عشان عمي عايض ولا م يحبس ولا شيء
الجود تخصرت وقالت : وبتقنعيني انه يحبتس ؟
الهنوف : ايه وتبين اثبت !
الجود رفعت حاجبها وقالت : وواثقة اثبتي اشوف !
الهنوف رجعت تناظر ومن حسن حظها كان عقاب فالحوش ومتجهة لجهتها عشان ياخذ الحطب اللي ورا البيت وابتسمت وتقدمت وسحبت شعر الجود اللي كان بني وطويل ويسحر ومثل اي ردة فعل الجود رفعت يدها وضربت الهنوف وفز عقاب وسحب الهنوف وراه وقال : انهبلتيي !!
الهنوف ابتسمت وراه وقالت بصوت هامس : شفتي !
" والمقصد من حركة عقاب انه يبعد الهنوف من الجود ويكون بينهم وحب يعطي وجهه لجود عشان م يشوف الهنوف وهي م تحل له "
لكن الجود م فكرت كذا ابدًا بالعكس كانت غيورة جدًا وم صدقت يكون شيء حلالها لحالها واحترقت علطول وقالت بحدة : تدافع عن مَن مِن مَن انت هاااه !!
عقاب فز وغطى فمها وقال : صوتتس لا يرتفع والله يجود م يحصل لتس طيب !
الجود دفته وقالت : هذا اذا عاد شفتني مره ثانية !!
دخلت علطول وقالت بنفسها ( انا اهيينك انت وياها وبعدين ليتني م قلت كذا قدامها بتحسب انها فصلت بيننا اه يارب وشذا اللي دخلتني يبه فيه !! )
مسح عقاب وجهه وشنبه وقال : ادخلي انتي بعد وافهمي ي ادمية انا م احبتس ولا اواطنتس ولا ادانيتس اعنبوتس انا م عمري حبيت بجي واحبتس ي اخر حبة !!
سحب له حطبتين ومشى من جنبها وهو صاد واستوقفته يد الهنوف وهي تقول : عقيب نسيت اللي بيننا !؟
عقاب ابتسم بقرف وقال : الله يعوض اهلتس
سحب يده بقوة ومشى وكان ع كلام عقاب القاسي الا ان الهنوف تحبه حب م حبه عاشق لمعشوقه ..
:::::::::::::::::::::::::::::::::::::::::::::
انتهى البارت ادعموني بنجمة وكومنت عشان اتحفز اكملكم ❤️
( ارحبوا يحباااااني رجعنا ببارت جديد اتمنى يعجبكم عطوني رايكم بكل شيء حرفيًا كل شيء ويويلكم م تحطون نجمة حطوها وكملوا ولا ترا م بينزل بارت خمسة احبكم اشوفكم ببارت جديد ع خييير ان شاءالله 😢😢😢💖💞💗💕💓 )
أنت تقرأ
ليّت اللِذي خَلق العُيون السُود ... خَلق القُلوب الخَافقات حَديد
Fantasyروايتي الثانية مُكتملة ✍🏻 ~ كُتبت بواسطة : الجُّود بِنت آل مطّلق 🌟 ~
