ليّت اللِذي خَلق العُيون السُود ... خَلق القُلوب الخَافقات حَديد

البارت الخامس عشر

مشت دانه مع وركبوا اثنينهم وكان ماهر ماسك خصرها ودانه متمسكة باللجام وصاروا اثنينهم يلاعبون المهرة ..
" فالمستشفى "
دخلوا الطاقم الطبي ركض بسريرين واحد كان شايل اسر والثاني شايل هزاع وفصلوهم بطريقين مختلفة وعيال ابو فهد وعيال عم اسر لحقوه وكل من يهمه هزاع راح وراه
عقاب بحدة : انتظظر طيب !!
العسكري وقف ودق تحية لعقاب وقال : سم طال عمرك
عقاب وقف وقال له : استرح
ولف عنه وكمل ورا اخوه وسنده واكثر شخص يحبه عقاب ووصل للعناية ووقفوهم هناك وقالت الدكتورة : معلييش م تقدر تدخل ارجع !!
عقاب : اخووي طيب ؟
الدكتور : م يصير الا الخير ان شاءالله
تسكر الباب فاصلهم عن بعضهم ولف عقاب وهو ع اعصابه وقال : نويصر
ناصر قام وقال : لبيه ؟
عقاب : بروح اشوف هزيع لأنه صاحي م اغمى عليه وانت اجلس جنب ابوي
مر عقاب بعد م سمع موافقة ناصر وباس راس ابوه وقال : يبه جعلني فداك والله انه بخييير ولا ناسي انه اسيير ؟
ضحك ابو فهد ودموعه بعيونه وقال : ان شاءالله
مشى عقاب وهو يحلف ان روحه ماهي معه وان اسر خذاها معه داخل غرفة العمليات ووصل لغرفة هزاع وحصل زابن عند الباب وقال بحدة : ولك وجه تجي !!
عقاب مشى وسحب زابن مع اذنه ورماه فالسيب وقال بحدة : انا عقااااابك فالدنيييا اعرف محلك والزمه !!
دخل بكل قوته وقال : بخير ؟
الممرض هز راسه بنعم وقال : ايه حضرة العقيد عقاب
عقاب سحب الستارة بكل قوته وقال : ماشاءالله ماشاءالله ذيييب م جاااك شيء !
هزاع برعب : خلاص وخروا مني م ابي بنتكم ولا ابي منكم شيء !
تقدم عقاب وخنقه بكل قوته وقال بحدة وهو يهمس ويصر ع اسنانه : ليييتك طعنت عقاب ولا طعنت اسر من بعد الخطوة اللي سويتها والله م يفكك مني الا الموت سامع ! والله لا اكرهك فاليوم اللي جيت وفكرت وسحبت يدك ومسكت الخنجر وغرزته داخل عضيدي !!
هزاع تغيير لون وجهه وقال بصوت متقطع ومخنوق : والله مع..معاد اتعرض..اتعرضضكمم والله
عقاب دفه بكل قوته وضرب راسه فالجدار وسحب الستارة وطلع وهو يفور عصبية وعيونه تطلع شرار مشى ووصل للشرطة وتقدم احدهم وقال : ارحب يالعقيد
عقاب لف له ورفع حاجبة وقال : البقى ؟
الشرطي : بناخذ كم شخص منكم عشان الافادة
عقاب : يالله مشينا
الشرطي اشر لخويه يجيب زابن وعقاب وركبوا وكل واحد بسيارة مختلفة وبأماكن مختلفة عقاب كان جالس قدام وزابن ورا
" داخل غرفة العمليات "
الدكتور بحدة : دمه ينقص انتبهوا !
الدكتورة : لا ان شاءالله بخييير
كملت تشتغل والممرضة عيونها ع جهاز المؤشرات الحيوية وتشوف النبض والضغط والاشياء الثانية وشهقت وقالت : نبضضات القلب تنخفض وبقوة !
الدكتور بخوف : اييه طبيعي عشان قاعدين نسحب الخنجر
الدكتورة : يارب يارب م نفقده
وكملوا بكل دقة وتوتر يسحبون الخنجر من بين ضلوع الآسر اللي طايح قدامهم وفي نص صدره كان الخنجر صامد بمكانه مخترق العظام والانسجة والرئتين
دقت الصافرة معلنة وفاة اسر بين يدينهم اول م طلعت الخنجر وكأنها كانت السبب بصموده والسبب في وفاته
صرخت الدكتورة برعب وقالت : الااااان جيببووا لي دم ع فصيلته والكثييير منه وعطوونني جهاااز الانعاااش
انطلقوا كلهم في طريقهم يساعدونها في ارجاع النبض واسر للحياة مره ثانية ..
" في بيت ابو تركي "
دخلت الميلا وهي جسد بلا روح ولفت بعيونها تشوفهم يصارخون ويبكون والفرحة تلاشت من البيت ومن الارواح اللي تسكنه شهقت بهدوء ونزلت دموعها بحرقة وقالت : خلاص يعمتي تكفين
ام فهد اول م شافتها ركضت لها وحضنتها بكل قوتها وقالت بصوت باكي : معلييتس يبنتي لا تبكيين انا اعرف ولدي م يروح ويخلينا وراه انا اعرفه
الميلا انفجرت تبكي وانهارت بكل حزن وكسر وقالت : كان فرحان يعمتي كان فرحان فيني وانا اللي جبته للوجع والالم والله اني اسفه يعمتي واسفه يبنات والله م كنت اقصد
ضحى تقدمت ومسكت الميلا وحضنتها وقالت بهدوء يعكس العواصف والدموع والانكسار اللي داخلها : معليه معليه يميلو اسر م بيروح ان شاءالله انه طيب وبخيير
البندري كانت تبكي بكل حزن و ضيق ع اخوها والجود جنبها تواسيها بكل حزن وهي م تدري وش حال عقاب اللي م يفترق عن الآسر ولطالما كان دايم جنبه
قربوا من بعض والكل صاروا يواسون بعض وام تركي تبكي وام فهد اسوء منهم كلهم ومحد مثل الميلا اللي من الصدمة تسكت وترجع تنهار وهي ماهي متخيلة حُب اسر لها وكيف وصله لموته !
" فالتوقيف "
دخلوا مع عقاب وزابن وراه وعقاب يحلف انه لو يلتفت لزابن كسر له وجهه وكمل طريقه ودخلوا غرفة الاستجوابات
المحقق : تفضل حضرة العقيد
عقاب جلس وقال : اسلم
المحقق : معك المحقق نايف ال طالب
عقاب ابتسم بكلافة وقال : ارحب وانا..
نايف قاطعه وقال : معروف يالعقيد عقاب
عقاب : الله يجود عليك
نايف : طيب اسمعك عطني كل شيء صار وان شاءالله يطلع اخوك سليم
عقاب ابتسم بضيق وقال : باذن الواحد الاحد ابد والله كان عقد زواجه ..
وكمل يقوله كل تفصيل صار ونايف قدامه يسجل وانتهى عقاب وهو يقول : ودقينا ع الاسعاف وانتهى اسعد يوم لنا واسوء يوم
نايف : لا لا ان شاءالله سلييمة
وقفل دفتره وكمل كلامه وقال : الحين اسر اذا بينسجن لا محالة لكن بيكون سنة وشوي اذا اعتمد من القاضي دفاع عن النفس واذا م اعتمده ممكن تطول مدته انا بالنسبة للطرف الثاني الخسران وهو هزاع تهمته الشروع بالقتل واللي عليها عشر سنين وزيادة مع الاعمال الشاقة واذا توفى اسر بعيد الشر فقرار القاضي اعدام هزاع لا مجال ثاني
عقاب : لا خير ان شاءالله خيير
قام وسلم ع المحقق وكان نايف واثق بعقاب وانه يقول الصدق وطلع وقال بحدة : زابن وش قال
العسكري : كان متوتر وخايف وكب العفش كله
نايف ضحك وقال : زيين زين
مشى وشاف عقاب يطلع من المبنى كامل صد وكمل طريقه لمكتبه ..
" خارج المبنى "
طلع عقاب وهو يشّد ع قبضته ودموعه صامدة ضحك بخفه وقال : لا يعقيب بدري عليك تبكي م راح عضيدك عشان تطيح وتنهار !
مشى وشاف سيارة تركي ركب وقال : مشينا
تركي : بشرني ؟
عقاب بحدة : وش ابشرك ! اذا توفى عضيدي بعيد الشر بتنتهي حياة ناس واجد اولها الشخص اللي قدامك واذا عاش وان شاءالله يارب بينسجن سنة وزود !
تركي توسعت عيونه وقال : خييير ان شاءالله دافع عن نفسه طيب !
عقاب : والله القانون يقولك كذا
تركي بحدة : العن ابوه من قانون !!!
عقاب : امين
مشى تركي وقال : وين ؟
عقاب : من فالبيت ؟
تركي : ثامر بس
عقاب : خلاص يكفي ويوفي ابو فهد مشينا نشوف حال اهل المستشفى وحال ابو عقيب
تركي ابتسم وقال : تبشر
مشى تركي متوجهة للمستشفى وعقاب معه ودعواتهم الصادقة ترتفع فالسماء للآسر اللي داخل غرفة العمليات محد يدري هو عايش ولا ميت ..
" عند البنات بغرفة الميلا "
الميلا ابتسمت بحزن وقالت : والله اني قد قلت له اه يويل قلبي عليه
وهي تذكرت اول م قالت له " اسر تكفى لا تسوي شيء يوجعني فيك "
ضحى بحزن : الله يشفيه ويعافيه ويرد له عافيته يحبيبي ي اسر
غزيل بحزن : معليه يبنات الحمدلله ع كل حال وان شاءالله يرجع واقوى
تالين بتوتر : ويارب م ينسجن مدة طويلة
حصة بخوف : سجن !!!
الجود : ايه اكيد لأنه طلق ع هزاع
ضحى مسحت وجهها بيدينها وقالت : يجعل هزاع يموت الله ياخذه اخذت عزيييزٍ مقتدر !!
قامت ودخلت الحمام وهي م تبي تبكي وتنهار ابدًا ..
" عند عقاب وتركي "
وصلوا للمستشفى ونزلوا ولف عقاب ع صوت تركي من وراه وهو يقول : عقيب
عقاب : هلا ؟
تركي قرب وقال : لاتقنط من رحمة ربي وادع له
عقاب ابتسم اول م حضنه تركي وحاوطه وقال : جعلك تسلم يتروك
تركي : شدعوة يالنسيب ؟ م بيننا
مشى عقاب وتركي ماسك ذراعه ودخلوا داخل ومشوا للسيب اللي كل الرجال متجمعين فيه
ناصر بتوتر : اخييرًا جيتوا !
عقاب بحدة : وش علمك !!
ناصر : لا لا م فيه الا كل خير ان شاءالله
تركي : روعتنا
ناصر مسك تركي ومشوا اثنينهم مع بعض ووصل عقاب عند مدخل العمليات ولف لأبوه وقال : يبه
ابو فهد م كان قادر يرفع راسه وضغطه نازل ويرجف ولحد حس فيه تقدم عقاب بخوف ومسك ابوه وطاح بين يدينه وطارت عيونه برعب وقال : يععيياااللل ابووويي !!!
لف ناصر من بعيد وركض له وتركي وراهم وفلاح جاي من وراهم ووصلوا وشالوه ونقلوه لأحد الغرف وثامر منهار في حضن ابوه وهو م تحمل ذا كله
فهد بحدة : ثويمر خلاص لا تزعجني !
ثامر وهو يشهق كل شوي : يبه اوله عمي والحين جدي !
عقاب بصراخ : ابن الحيوان ذا اذا م سد حلقه كسرته له !!
ثامر كح بخرشة وقال : ابششر والله معاد ابكي
فهد انفجر يضحك وقال : حيوان !! والله فيييك يعقيب
عقاب : اصه يرجال
لف فهد لولده وقال : وانت قمطت من عمك وابوك لا
ثامر ابتسم وباس راس ابوه وقال : معليش يبه بس تراك م تخوفني ابدًا
فهد مد يده وقبص فخذه وقال : يكلب احترام شوي
انفجر ثامر يضحك بآلم وفهد يبتسم ولف وشاف ابوه قايم وقام فهد واتجهة له وقال : وشحال الشايب ؟
ابو فهد بتعب : بخير معليك ي فهود
فهد ابتسم وباس راسه بقوة وقال : جعلني قبلك يبه
ابو فهد : ابدن ابدن فال الله ولا فالك !
عقاب ابتسم وقال : خطاااااك الشششر يبو عقاب
ابو فهد ابتسم اول م سمع صوت عقاب وقال : خطااك اللاش يبو عايض
التموا كلهم حوله ومن سوالف واخذ وعطى بدؤا ينسون توتر اسر م عدا عقاب اللي كل شوي يقوم ويتجهة له ويرجع اول م يقولون له انه باقي م طلع ..
" داخل غرفة العمليات "
الطاقم اجتمعوا كلهم ع راس الدكتورة وشحنت قطبين الانعاش وضربت صدر اسر وعلطول رجع نبضه وزفرت براحة وقالت بصوت عالي : رنا ! تعالي جنبي ساعديني !
رنا تقدمت بتوتر وسحبت الادوات وبدؤا يعقمون جرحه وخيطوه وانتهوا وقال الدكتور : ماشاءالله خلصنا مبروك لك غدير
غدير ابتسمت وهي ترجف وقالت : م سوينا شيء
مشت ومعها مساعدتها رنا اللي تكون اخت هزاع وطلعوا من غرفة العمليات
عقاب فز وقال : بشروني !
غدير ابتسمت وقالت : ابشرك يحضرة العقيد بسلامة عضيدك وبدون اي مضاعفات حاليًا لكن احتمال كبير يكون فيه
عقاب زفر براحة وقال : يجعلك تسلمين حضرة الدكتورة متى اقدر اشوفه ؟
غدير : بعد كم ساعة ان شاءالله
عقاب : تم
لف عقاب وانطلق لغرفة ابوه ودخل وقال بصوت عالي وبفرحة : ابشششركم اسر بخييير
ابو فهد فز وقال : يااارب لك الحمد
صاحوا العيال كلهم وقالوا بصوت واحد : الحمدلله الله يبشششرك
تركي ابتسم وحضن ناصر وقال : يهنيكم سلامة اسر يعمي
ابو فهد ابتسم وقال : الله يسلمك
ابو فلاح ضحك وقال : اسر تذكر انه ملّك ع الميلا وحلف م يموت
العيال انفجروا يضحكون وهم يحبون عمهم سالم اللي لطالما كان يغير جوهم
عقاب ابتسم وقال : الحمدلله ع سلامته وبس
وطلع برا ينتظرهم يدخلونه وطلع ناصر من وراه وسحب جواله ودق ع غزيل ووصله صوتها وهي تقول : هلا نويصر ؟
ناصر ابتسم وقال : والله ي ان صوتتس يرد الروح
غزيل ابتسمت وقالت : يحبيبي تسلم اعجل وش عندك بشرونا تكفون
ناصر : ابشرتس ان اسر بخيير وتعدى الخطر وكلها ساعات ويطلع للقسم
غزيل صرخت وقالت : يااااااارب للللك الحممدد !!!
فزوا الحريم كلهم واللي سبقتها دموعها وضحكت الميلا بدموعها وقالت : بخيير حبيب الميلا بخييير !
ام فهد بدموع الفرح قالت : اييه والله حبيبتس بخييير
الميلا ضحكت بفرحة وحضنت اختها وفزوا خوات اسر لغزيل وسحبت ضحى جوالها وقالت وهي تبكي : نوويصر !
ناصر ابتسم وقال : افااا وضييحي لييه البكى اخوتس بخيير يحماره ! وبعدين نسيتي انه اسر
ضحى ضحكت بطعم الدموع وقالت : الله يجعلني م افقدكم كلكم م حييت
ناصر ضحك وقال : ولا نفقد حستس يحبيبة اخوانتس
ضحى : ابي اسمع عقيب تكفى
ناصر لف بعيونه وقال : ابو عايض
لف عقاب وقال : لبيه
ناصر مشى له وعطاه الجوال وشاف عقاب الاسم وطارت عيونه وقال : وش ابي بحرمتك !
ناصر انفجر يضحك وقال : وضيحي يحمار
عقاب سحب الجوال وحطه ع اذنه وقال : اررحبي يدهر قلبي ورجعانه
فالجهة الثانية فز قلب الجود اول م سمعت صوته وابتسمت بحب وقالت بهمس : حي والله صوته
ضحى ضحكت وقالت : البقى ي مرررحب
عقاب : افاا ليه صوتتس متغيير ؟ بكييتي
ضحى وهي تشهق وتضحك وتمسح دموعها : وشلون م ابكي يعقيب
عقاب توسعت عيونه وقال : افااا يبنتي تبكييين ؟ تبكيين وانتي اخت اسر وعقاب !
ناصر ضربه وقال بحدة : وانا البط الاسود !
عقاب ابتسم وباس خشمه وقال : انت م تجتمع مع خبالنا يالثلاثة
ناصر ابتسم وقال : اعترفت بنفسك اني اعقل منك
مشى ناصر يركض وعقاب وراه يلحقه ابتسم عقاب وقال : بشري اللي عندتس ودعناكم الله
سكر عقاب ولحق ناصر داخل غرفة ابوهم ..
" عند الحريم "
الجود لفت وقالت بلهفة : سكر ؟
ضحى مدت الجوال لغزيل وقالت : ايه ليه ؟
الجود : لا لا ولا شيء
مشت للمطبخ تجدد الكاسات والفناجيل وابتسمت وقالت : مو طبيعي توو شفته قبل كم ساعة واشتقت له
غسلتها وحطتها بالصينية وطلعت وشافتهم مجتمعين وقل صوت الكآبة اللي خيمت عليهم قبل شوي ابتسمت بحب وجلست وقالت : يالبييييه يالله عسانا م نذوق طعم الحزن ابد
الكل بصوت واحد قالوا : اميين
وجلسوا حول بعض ويسولفون ويخططون لعزيمة سلامة اسر ومتى بيزورونه ..
" في اسطبل الصقلاوية "
ماهر كان متضايق لأن دانه مصّرة تحط السرج وهو م يكفيهم اثنينهم قام لف لها وقال : دانه م يحتاج سرج صدقيني
دانه لفت وهي تبعد شعرها من وجهها وقالت : الا يخوي عشان تقدر اسيطر ع المهرة
ماهر ابتسم وقال يبي يغيضها : فرستس وم تعرفين تسيطرين عليه !
دانه طارت عيونها بتحدي وقامت وقالت : ارفعني
ماهر ضحك بسخرية من ع ظهر المهرة ومد يده لدانه وسحبها له ولجهته وكان ظهر دانه ع راس المهرة فزت وقالت : وش تسوي شلون بقودها الحين !!
ماهر ابتسم وقال : متوقعة بخليتس تعطيني ظهرتس ؟
دانه بدأت وجنتيها تحمّر وقالت برعب : اجل م يحتاج امش نتمشى
ماهر ابتسم ع جنب ووقف وهو مثبت رجوله ع الركّاب حق الخيل وهم بس حاطين حزام السرج بدون السرج نفسه وحط يده ع راس دانه وسدحها وقرب واعتلاها وقال : انا م تفرق معي الاماكن انا اسوي اللي بخاطري لو ع ظهر الخيل !
دانه طارت عيونها بصدمة وقالت : مااهر ابعد
ماهر ضحك وقال : زوجتي صح ! خلاص مالتس شغل
دانه برعب : واذا احد جاء وشافنا وافرض مشت المهرة بطيح ترا ! ماني مثبته بشيء
ماهر قرب اكثر ونزل لمبسمها وقلبها يدق بكل قوته داخل صدرها وبدأ جسمها يحتّر اثر فعايلة وعلى اللحظة فزت المهرة ولف وجه دانه وباس طرف منطوقها وضحك وقال : الله ياخذتس يالمهرة !
ودانه اللي كانت يدينها ع رقبة المهرة من ورا وميتة خجل عجزت تتمسك اكثر وطاحت ومسكت ياقته معها وسحبته وطاح ماهر فوق دانه اللي صرخت وقالت : ظظهررري
ماهر قام وسحبها وقال : وشنوحتس !
دانه دفته منها وقالت : م فيني شيء وبعدين وشفييييك اليوم مشفوح ؟
ماهر انفجر يضحك بصوت عالي وقال :
لاتلومين اللي يحبتس باع عمره واشتراتس
‏وهو ذنبه الاول يحبتس وذنبه الثاني غلااتس
-
دانه مشت وهي تعرج وقالت : صح منطوقك
ماهر مشى جنبها وحط يده ورا خصرها وسحبها قدامه وشّدها عليه وقال بصوته الرخّيم : م فيه الا انا وانتي بهاه م تخافين اجرم فيتس ؟
دانه مدت طول يدينها ع كتوفه وقالت : تجرم فيني ؟ والله اللي عقبت وانا بنت ملهم !
ماهر رفعها علطول وثبت رجولها ع خصره وحط ظهرها ع الجدار وقال بخبث : وم تخافين ولا تهابين ولد طلال الفيصل ! وهو المفروض انتس م تقربينه
دانه كان قلبها يدق وهي تشوف تفاصيله وقُربه منها قامت وقالت : ماهري ابعد خلاص حلى هو !
ماهر ضحك بحب وقرب اكثر قاطع المسافة بينهم سامح لطرف خشمه يلامس طرف خشمها وقال : ماهرتس بعد ؟ يويل حاله
دانه كانت كاتمة انفاسها بدون اي سبب وهي عندها حساسية بصدرها ولا تحبذ انها تكتم نفسها لوقت طويل وكم صار لها موقف اثر كتم انفاسها وهي تسابق وتنافس ع الخيل وكان ماهر ينرفزها ويقرب من شفايفها وم قدرت تكتم اكثر وداخت بين يدينه وفز ومسك ظهرها وقال برعب : دااانه !
دانه كانت عيونها شوي مفتوحة بس راسها ثقيل ولا هي قادرة تتكلم نزلها ومددها وحط راسها ع جحره ومسح شعرها وقال بخوف : دانتي وشنوحتس ؟
دانه غمضت عيونها ورفعت راسها اقصى شيء واخذت نفس عميييق وهي ترتاح اذا سوت كذا وبدأت ترتخي وفتحت عيونها وقالت بصوت مهزوز : م فيني شيء برجع البيت تعبت
ماهر حط يده ورا راسها والثانية ورا رجولها وشالها بين يدينه ومشى فيها وقال : عبايتتس وين ؟
دانه حطت خدها براحة ع صدره وحاوطت بيدينها رقبته وقالت بصوت هامس : بالغرفة حقتي
مشى ماهر ووصل للغرفة وساعدها ومشوا للسيارة بعد م قفلوا البوابات ومشى ماهر لبيت ابو دانه ..
" فاليوم الثاني "
تأكدت الممرضة من سلامة ابو فهد وصرفت له ادويته ومدتها لناصر وقالت : هو خلاص بخير وضغطه رجع طبيعي الحين ابيكم تهتمون فيه وفي ادويته وفي صحته
ناصر ابتسم وقال : ان شاءالله
طلع لأبوه وفهد وقال : مشينا اهلنا م عندهم احد
ابو تركي بتعب : ايه خلاص مشينا
ابو فهد بحدة : ومحاكمة اسر !
فهد : لا يبه باقي باقي
ابو فهد : ايه ازين اجل مشينا
طلعوا كلهم ولف ناصر لعقاب وقال : انت بترافق معه صح ؟
عقاب : ايه نعم
ناصر : اجل وداعتك نفسك واسير لا يجيه شيء
عقاب ابتسم وشّد ع كتف ناصر وقال : ابد بعيوني
ناصر : ودعناكم الله
طلع ناصر مع اهله وفضى المستشفى من ال مقبل وم بقى الا عقاب يتأمل اسر من الزجاج اللي يسمح له يشوفه طريح فراش اسر اللي لطالما كان مزعج وبايع الدنيا لأجل سعادته وضحكه ولعبه واسر اللي كان دايم عاشق للميلا ويتغزل فيها ويشعّر فيها خذاها وخذاه خنجر كان بينهي حياته كان منظر موجع لعقاب انه يشوف عضيده اللي يصغُره بسنتين طايح ولا يقدر يتحرك ويستنجد بعقاب وهو يدري لو يقدر ان عقاب م بيقصر وبسوي المستحيل عشان يطلع اسر من الموقف اللي انحط فيه وهو يعتبر صغير فالسن صد وقال : معاد عرفت وجهك يالعضيد من الاجهزة اللي ع صدرك اه حسيبه ربي اللي كان السبب حسيبه ربي م خاف الله فيك وفيني وفي اهلي والميلا !
جلس بتعب ع الكرسي ينتظر اسر يصحى بفارغ الصبر وبالوقت نفسه خايف عليه من المسائلة اللي بتصير والمحاكم وتحديد الحكم ابتسم بضيق وقال : ليتك م طلقت عليه ياليتك م فكرت ترفع سلاحك عليه كان طلعت سالم وعلطول رجعنا لبيتنا وش يصبرني يالعضيد انتظرك سنة كاملة واكثر !
مسح وجهه وشنبه واستغفر وانسدح ع الكرسي الحديد البارد وغمض عيونه بهدوء يبي يرتاح جفنه لوقت قصير ..
" عند اهل مساعد "
كانوا كلهم مجتمعين في بيت ابو فهد الكل ولحد غاب وارتفع صوتها وهي داخلة وقالت : سلام علييكم ي اهل زوجي
قامت ام فهد وقالت : احلام !
احلام مشت وحطت يدها ع راس ام فهد وباست يدها موهمة البنات اني بست راس امكم وقالت : شخباركم ؟
ضحى بقرف : وش اللي شخباركم !! اخونا فالعناية المركزة وممكن ينسجن وانتي تجيين باردة مبردة وتقولين شخبارنا !؟
احلام ضحكت بسخرية وقالت : وضحى للحين م هي ناوية تعقل ؟
مشت وسلمت ع غالية وجلست بصدر المجلس وضحى ع اعصابها وم كانت مستعدة ابدًا تقابل احلام صدت وقالت للميلا : ميلا امسكيني لا اقول اعفس وجه الفلس ذي
الميلا فزت اول م قالت ضحى اسمها وهي تعتبر اول مره بعد اللي صار وقالت بأبتسامة عذبّة ووجهها التعبان : محد ناقصها ومستحيل امسكتس قومي والعني شكلها
ضحى شّدت ع يد الميلا وقالت : يارب يارب تفارقنا
احلام بصوت عالي : ويين البندري ؟
البندري دخلت والجود معها وقالت : نعم ؟
احلام : جيبي لي موية من المطبخ وهاتي الثلج معها
الجود طارت عيونها وقالت بحدة : هييييه انتي من قاعدة توصين اصغر عيالتس !! وش قلة الادب ذي قومي جعل يدينتس الكسر وجيبي لتس اللي تبينه محد ناقصتس ترا
احلام طارت عيونها وقالت : من ذي طويلة اللسان !!
الجود تقدمت ومسكت رسغها بكل قوتها وقالت : انا زوجة العقاب
احلام طارت عيونها وهي اختفت عن عايلتهم شهرين بعذر انها حامل وتعبانة وقالت بحدة : عقاب تزوج !!
الجود رمت يدها عليها وقالت : لاتحشرين خشمتس بشيءٍ م يعنيتس !
وجلست بقرف وضحى ميتة فرحة وقالت بهمس : حييي والله عيينتس يزوجة العقاب
الجود ابتسمت وقالت : ابششري بي
البندري ابتسمت وقالت : تبشرين بالجنة يعيوني
غزيل دخلت وقالت برعب : بسسم الله من عجوز قريح ذي !
انفجروا البنات يضحكون ع ردها وقالت الميلا : مدري من هي لكن اتفق معتس
غزيل بغثى وقرف : يعووووه لايكون ذي احلام !!
احلام بصدمة وهي اللي كانت مسيطرة ع البيت ورجعت وشافت العدد زاد وقالت بحدة : وشتقصدين !
غزيل ضحكت وقالت : هذي كوابيس والله ماهي صوب الاحلام ولا تدّل دربها
طاحوا البنات يضحكون بصوت عالي وجلست غزيل وهي تضحك وقالت : دوم التضاحيك فديتكم
احلام بحدة : وانتي مين !
غزيل : انا الغزل كله انا الحبيبة وانا زوجة ناصر
احلام بصدمة : خالتي من باقي م تزوج !!
ام فهد بفرحة وهي تشوف كيف البنات كثروا ببيتها قالت : والله تزوج عقاب قبل شهرين بالجود وبعدها تزوج ناصر وبعده بفترة قصيرة م يقارب يومين خطب اسر وتملّك
احلام بفجعة : اسر خطب !!! ويينها ؟
الميلا رفعت يدها وقالت : هنا
لفت احلام وشافت الميلا بجمالها وعيونها الوساع السود انجلطت وقالت : انتي بنت راشد الكبيرة ؟؟ يعني الاخوين خذوا بنات راشد !
الجود : بالضبط
احلام صدت بقرف ومسكت جوالها ودقت ع فهد ووصلها صوته وهو يقول : هلا والله باللي لها الخافق يهلي
احلام ابتسمت وقالت : فهود وينك ؟
ضحى بقرف : اه واخوي خروف عندها اعنبوه وشهو يشوف فيها !!!
الميلا انفجرت تضحك وقالت : الحب اعمى
ضحى : اي حب واي خرابيط عجوز وشايب الله يمغصهم
الميلا : ليه كم عمر فهد ؟
ضحى : خمسييني جاد والزفت ذي اربعينية
انهارت الميلا تضحك وقالت : يقلع ابليستس يوضوح
غزيل قامت وجلست جنبهم وقالت : وش العلم ؟
الميلا بضحك : ضحى تطقطق ع فهد وزوجته
غزيل : مالومها وعووه وحومة الكبد
فجأة ارتفع صوت ناصر عند باب المطبخ وقال : يووولدد
فزت ضحى بفرحة والبندري وغالية وحصة وام فهد وسحاب وسديم يركضون له فالمطبخ ودخلوا وضحك وقال : ارحببوواا جعللنني قبلكمم
ام فهد بكت وحضنته بكل شوق وقالت : وشحالكم يوليدي ؟
حاوطها ناصر وقال : بخييير جعلتس بخير يميمتي
وبعدت وطاروا البندري وضحى بحضنه وابتسم وحاوطهم وقال : علامكم والدموع لحد ينكد علي !
ضحى مسحت دموعها وقالت : ابشر ينويصر
ناصر باس راسها وقال : خلوني اسلم ع غلو
تقدم وسلم ع غالية وباس راسها ولف ع قرابته حصة وسديم وسحاب بنات اخوه واخته وحضنهم وسلم عليهم وبعد وقال : وش علومكم ؟
ام فهد : والله م فيه شيء جديد ننتظركم ونتتظر اسر يقوم بالسلامة
ناصر : معليه بخير ان شاءالله
ولف لضحى وهمس لها وقال : وين حرمتي ؟
ضحى ضحكت وقالت : بغرفتك اظن
ناصر : اجل انسحب انا تعبان ولا نمت زين
ضحى ضحكت وغمزت للبندري وفهمت البندري وضحكت وسبقتهم وقالت من برا المطبخ : غزييل
غزيل لفت لها وهي تشرب قهوتها : عيوني ؟
البندري : ناصر بيدخل غرفته جهزيها له
قامت غزيل وقالت : مسرع تووه جاء وبيكرفني
دخلت غرفته وكانت نظيفة توسعت عيونها وقالت : وش انظف بالله !
فتحت الشباك تتهوى الغرفة ويتجدد هواءها وفتحت دولابه وقالت : ماشاءالله وش اختار ؟
سحبت البالطو ابتسمت وقالت : دكتوري وطبي وعلاجي
وصارت تدور وترقص بشعرها ابتسمت ورجعته وطلعت له بجامة سروالها بربري اسود والتيشيرت اسود كامل بدون اي اضافة وحطتها ع السرير وانفتح الباب ولفت غزيل لناصر وبعدت شعرها ورا اذنها وقالت : هلا هلا بنويصر
ناصر ابتسم وسكر الباب وراه بالمفتاح وقرب منها وفتح يدينه وابتسمت وقالت : وش تنتظرني اخمك ؟
ناصر بصوته الثقييل اثر التعب قال : خميني
غزيل : يبوي دز وراي الغداء تراه علي
ناصر تقدم وحضنها بكل قوته وقال : كملت يومين م انخمدت زين
غزيل بتوتر : محد عضك ع اصبعك وقالك لاتنام !
ناصر ضحك ودفن وجهه بشعرها واستنشقه وكانت ريحته نعيم بالنسبة لناصر ابتسم بحب وقال :
ضميني ضميني بالشمال وباليمين
‏ضميني ضمة صغيرٍ يحبونه هله
-
غزيل حاوطته وقالت بضحك : يفديييته الصغيير اللي طلع شاعر
ناصر ابتسم وشّد عليها وقال : خلينا نقول متذوق
غزيل بعدته وقالت : خلاص عاد
طلعت وابتسم ناصر وبدل ملابسه وحط راسه ونام علطول ..
" فالمستشفى "
غدير دخلت ورنا وراها وشافت عقاب منسدح ابتسمت بحزن وقالت : يعمري عليه م ترك اخوه ونام بالقسم البارد
رنا ضحكت وقالت : شعنددده غديير تخرفنتت !
غدير ابتسمت وقالت : والله لا تلوميني تشوفين الجمال ولا انا بلحالي اللي اشوفه
رنا : عندي وعندتس خيير
غدير : اف اف وشعندك انتي ؟
رنا : اسر اخوه جايب اخرتي
غدير ضحكت ومشت ورنا مصدومة وتقول : غدو ارجعي !
غدير قربت من عقاب وشافت ملامحه المرعبة والمهيبة كثافة حواجبة وحدّتها ورموشه والتحامها ببعضها وكثافتها وعيونه الوساع المغمضة والشق اللي توسط حاجبه وامتد ع عينه وشنبه وشفايفه كان عقاب عقاب لكل انثى تطالعه كان عنده كاريزما مرعبة ويجذب الكل بدون محد يحس فيه ابتسمت بحب وقلبها يدق له ومررت اصبعها ع القطع اللي بوجهه وفز عقاب وسحب يدها ولفها وطقت وطلع صوتها وصرخت غدير بآلم وقالت : شفيييييك !!!
عقاب بحدة : اعنبوتس الا نعم ! وش تسووين عندي
رنا فزت ومسكت غدير وقالت : اهدا شوي اهدا شافتك طايح حسبتك مغمى عليك وكنا بنستدعي الطاقم الطبي !
عقاب قام وقال بحدة : م فيني الا العافية عينكم ع اخوي واتركوني
غدير ابتسمت وقالت : ابشر واسفين حضرة العقيد
عقاب جلس بالكرسي الثاني وجلست غدير مقابلته وقالت : انا انصحك ترجع للبيت يعني ترا قعدتك عند اسر م راح تفيده ولا تفيدك بشيء واحد
عقاب : ومع ذلك م بروح فلا تتعبيني وتوجعين راسي
غدير : شدعوة بسم الله عليك من التعب
عقاب طارت عيونه وقال : وين الحمام ؟
غدير اشرت بيدها بأخر السيب وقالت : هناك
عقاب قام وهو طول الوقت صاد عنها بحكم انها كاشفة وجهها ومتحجبة وطالع شعرها بشكل فاتن كانت جميلة جدًا وعقاب م فضل انه يتأمل لأنه عارف زين الشيطان وعمايله قام علطول وهو م يبي الحمام كثر م انه يبي يبعد عنها لفت لرنا وقالت : ادخلي شيكي ع اسر وانا برجع لمكتبي
رنا ابتسمت وقالت : ابشري
دخلت رنا الغرفة بعد م عقمت نفسها ولبست ملابس خاصة وسكرت الباب بإحكام وقالت : سلام عليكم شيخنا
دخلت وقربت منه ومسحت ع راسه بيدها وقالت : اف حبيبي التعبان الله يشفيك يرد لك عافيتك يعيون رنا انت
كانت رنا من وهي صغيرة بأحد الاعياد فالديرة انعزموا الناس كلهم وجات مع اهلها وخالتها صباح ام تركي وشافت اسر ومن بعدها وهي تحبه حبًا جمًا ابتسمت وصارت تضمد جراحه بهدوء وانتهت عملها بأتقان وقالت : خطاااااك الشر والباس يروحي
ابتسمت له وطلعت وهو ممنوع احد يطول عند اسر وطلعت علطول وشغلت التعقيم فالغرفة وقفلت الباب من برا وقالت : اذا صار شيء اضغط الزر هذا وبيجينا انذار
عقاب جلس وقال : طيب
طلعت رنا من عندهم وتقفل الباب ومسك عقاب جواله وقال بضحك : وشلون بتدق عليها وجوالها معك ؟
ابتسم وكمل وهو يقول : معليه اكيد انها بخير
انسدح عقاب وحط ذراعه ع عيونه وغمض وهو م كان نايم كثر م انه مسترخي ..
" عند البنات فالمطبخ "
ضحى : حصيص الخيار بسررعة
تقدمت حصة وغسلت الخيار وحطته عندها وبدأت ضحى تقطع باقي السلطة وتسولف مع البنات
غزيل بعد م كبست الرز قالت : الحين سحاب وش تبي ؟
سحاب لفت وقالت : اح !
البندري : وغزول صادزة اطلعي عشان م تحترقين يالملسونة
سحاب : اف يكرهي خلوني اتعلم منكم شوي !
الميلا : سحاب اطلعي غالية بتموتنا
سحاب طلعت وسحبت سديم معها وابتسمت حصة وقالت : خوفي تلفون علي
الجود : لا حبيبي انتي كبيرة خليتس
حصة ضحكت وقالت : اف اشتقت لعمي اسر اعرفه بالوقت ذا بيجي ويدخل ويحشر نفسه بيننا
ضحى ابتسمت بحزن وقالت : حصيص محد ناقص
الميلا ابتسمت وقالت : اف الله يرد له عافيته يارب وعسى اللي جاه خاتمة شر له
الكل بصوت واحد قالوا : اميين
لفت الميلا اول م دق جوالها وقالت : اهليييين دنو
دانه ابتسمت وقالت : يمرحببااا وحشتتووني
الميلا : م يوحشتس غالي سمي يعيوني ؟
دانه : جيت اسأل عن حالكم كيف وبرضو عندي خبر حلو
الميلا : علميني خبرتس بعدين بقولتس وش حالنا
دانه : تملكت
الميلا فزت وقالت : جووودي داانه تمللككتت
الجود فزت وقالت : اايششش
البندري ضحكت وقالت : ماشاءالله دنووو
الميلا فتحت السبيكر وكملت دانه وهي تقول : ماهر احد الفارسين عندنا وشافني وشكلي جبت راسه المهم خطب وافقت
البندري ضحكت وقالت : الله حب من اول نظرة !!
ضحى صدت اول م تذكرت سهم وكحت علطول وهي تذكرت تفاصيله وملامحه ونظراته وعيونه اللي كانت سهام ضربت بقلب ضحى صدت وقالت بنفسها ( ولد مدينة عيونه زايغة اكيد نسى منتس بس عاد ) سكتت وهي رجعت تنسي نفسها منه وكملت تقطع وتسمع سوالف دانه وهي تقول : وبس والله زواجي بشهر ذو الحجة ان شاءالله وكلكم حاضرين
البنات كلهم بصوت واحد قالوا : ان شاءالله
دانه : اييه وانتوا وش الجديد عندكم
غزيل ابتسمت وقالت : دانه تتذكريني ؟
دانه : اهلييين غزوولي اييه اكيد اتذكرتس
غزيل : هلا فيتس ابد تزوجت ناصر
دانه بصدمة : يخووونه محد عزمنني !!!
الجود : م امداها والله
دانه : ماشاءالله مبروك يعمري والله يجمع بينهم على خير
غزيل : اميين يروحي
دانه : طيب غيره اجلطوني ؟
الميلا ضحكت وقالت : تملكت امس من اسر ولد عمي
دانه صرخت بفرحة شابهة العيد وقالت : اخيييييرًا انتتصصرر الححبب !!!
الجود بفرحة وهي تعشق صوت دانه وهبالها : اييييه عششقي دنوستي
دانه : يحبيبي يجودي
الميلا بحزن ع الفرحة اللي م تمت قالت : وانطعن اسر بليلة الملكة بعد م وقع علطول واطلق ع ولد خالتي بسلاحه والحين بالعناية المركزة وولد خالتي متهم بالشروع بالقتل واسر م ندري للحين وش بيصير عليه لأنه م صحى
دانه بصدمة : ميلو تقولينه صادزة !؟!
الميلا : اي والله
دانه شهقت ونزلت دموعها وقالت : لا اله الا الله ! الله يجبر قلوبكم ويرده سالم معافى لكم يارب تكفون طمنووني !
الكل بصوت واحد قالوا : امييين ، ابششري
دانه : يالله يحبايبي انا استاذنكم م ودي اطول عليكم
الميلا : اذنتس معتس يعروسة
دانه ابتسمت وسكرت ولفت الميلا وقالت : اف الله ياخذ البصل
الجود : لا تبررين تبكين عليه عادي
البندري ضحكت وقالت : اصلاً م فيه بصل
غزيل حضنت الميلا وقالت : خلاص ان شاءالله انه بخيير
الميلا حاوطتها وقالت : بإذن الله
غزيل لفت وقالت : بنات م بتقولون لفهد اني اللي جلدت احلام صح ؟
ضحى : والله الضوء الاخضر لتس وان قال شيء ادخلي ورا ناصر تراه اطول من فهد
غزيل بحب : حاااااااي ينويييصري
الميلا وضحى انفجروا يضحكون وقالوا بصوت واحد : عشششنااا نويصصرك !!
غزيل شمرت اكمامها وقالت : اقول اصه بروح اجلدها واجيكم !
مشت وقاموا البنات معها اللي خلصوا شغلهم واللي باقي جلسوا ينهونه ..
" فالصالة "
دخلت غزيل والجود والبندري والميلا معها وجلسوا وقالت غزيل : ايه احلام قالوا لي انتس حامل وتعبانه وين الكرشة م اشوفها ؟
احلام بربكة : وشتبين انتي ؟ توو بأول الاشهر
البندري انفجرت تضحك وقالت : ايييه صح اول م رحتي قلتي انتس فالثالث ومر شهرين يعني الخامس الحين وين كرشتتس صدق ؟
غزيل ضحكت وقالت : م به حمل ولعبت عليكم عشان تهج
الميلا : ليتها م جات
الجود ابتسمت وارتفع صوت فهد وهو يقول : احلام وينتس ؟
احلام فزت وقالت بغنج : تعال يحبيبي انت تعال
فزت الميلا وقالت : وللمهاا تدخلييينه علينا !!
الجود بصدمة ضربت البندري وتكلمت وقالت : لا لا تجي !!
فهد وقف وقال : وش العلم ؟
البندري طلعت وقالت : ارحب
فهد ابتسم وقال : البقى يالعنقود
تقدمت البندري وباست راسه وقالت : وشحالك ؟
فهد : بخير بخير
البندري : صد يعمري عشان البنات
لف فهد وطلعوا البنات ركض للمطبخ وقالت البندري : خلاص تفضل
دخل فهد وسلم ع احلام وشوي دخل ثامر والبنات يوايقون من باب المطبخ وقال : جننتتتيي
احلام ابتسمت وقالت : ارحب يولدي ارحب
تقدم ثامر وحضنها بكل شوق وقال : الله يجعلني فدوة اللي وحشتنا
حصة دخلت وسديم وقالت : امميي
احلام ضحكت ونزلت لسديم وحضنتها بكل حب وقالت : شحالتس يماما ؟
سديم ببراءة : بخير يماما
حصة باست راسها وحضنتها وقالت : عاش من شافتس يمه
احلام باست خد حصة وقالت بحنية : يعيش غاليتس يأمي
فهد ابتسم وقال : ان شاءالله مالتس رجعة عند اهلتس ؟
احلام هزت راسها بنفي وهي تضحك وقالت : لا لا
ثامر ابتسم وقال : يععيشش وش الخبر الحلو ذا
احلام ضحكت وقالت : يحبيبي يثموري
ثامر : يبه وين عماتي ؟
ضحى بصوت عالي : وراك يحلو
فتحت يدينها وطار ثامر ورفعها من الارض وقال : اررحبي يالغلااا كللله
ضحى ضحكت وقالت : الله يجعلنيي فداااك
ثامر باس راسها وقال : ابدن مجاره يروح ولد اخوتس
ضحى شّدت ع خده وباسته وقالت : نوني جات بعد
ثامر تقدم وسلم ع البندري وقالت : ثامر كيف اسر ؟
ثامر رفع كتوفه بمعنى " مدري " وكمل وهو يقول : وعمي عقاب بيخلي احد يشوف ؟
ضحى : طيب شرايك تودينا ؟
ثامر توسعت عيونه وقال : لا والله م اقول معتس كذا انتي وياها بعدها تورطوني دزوا
ضحى ضربته وقالت : وييين احترام العمات !
البندري : وهي صادقة !
ثامر رفع حاجبة وقال : احلفي انتي وياها ؟ هييييه ترا بيني وبينتس ينوني ثلاث سنين ! وانتي يوضيح خمس اهدااا
ضحى ضحكت وضربته وهو يضحك وقالت : انقلع والله لا اشرشحك !
ثامر طلع وهو يضحك ودخلوا البنات وقالت الجود : يحلوهم عيالها كيف طلعوا عليها
ضحى : ثامر وحصيص حسنة احلام وهم اللي يشفعون لها
غزيل : ايه والله صادزة
الميلا : خلصنا الغداء حضروا يالله
غزيل : بروح اصحي ناصر
البندري : اعجلي
مشت غزيل وشافت فهد معطيها ظهره حطت شيلتها ع راسها ودخلت ركض وفتحت الباب بقوة وانصفق براس ناصر اللي صرخ وقال : رراااااسسسيي !!!
غزيل انفجرت تضحك وقالت : ابرك واسعد ! احد قالك تجي ورا الباب
ناصر بآلم : الله يرجتس صدق ابعدي مني
غزيل : ايه الغداء جهز
ناصر بحدة : وخري طيب لا اله الا الله !
غزيل ضحكت ومسكت راسه وباسته بحنية وقالت : جعله بعمري والله
ناصر ارتخت ملامحه وقال : بعمرتس العافية
لف للدولاب وقال : تعالي طلعي لي ثوب وبروح اشوف راسي
غزيل مشت للدولاب وطلعت ثوبه الكحلي وشماغه وحطته ع السرير وتقدمت للتسريحة وقالت : فيه شيء ؟
ناصر بصدمة : فقشتييه !!
غزيل انفجرت تضحك وقالت : حييي والله عييينني وانا بنت عبدالملك تذكر الشبشب اللي صقعتني بجبهتي !؟
ناصر لف لها ورفع ظهره وكان طويل بشكل مرعب ومشى ورجعت غزيل ورا لين حست بالجدار وراها قرب منها وقال : قدها يبنت عبدالملك ؟
غزيل بحدة : اييه حرام بالله اني قدها وقدود !!
ناصر نزل وباس مبسمها بكل قوته وبعد وقال : هذي عشان تحترمين نفستس شوي
وقرب وسرق بوسته الثانية وقال : وهذي عشان الضربة
لف وغزيل وراه ميتة شهقت بقوة وقالت : تعااال !
ناصر لف لها وهو يلبس وقال : لبيه ؟
غزيل مشت له وصفقت وجهه بكل قوتها وقالت بحدة : يحقييير وش بيني وبيينك عشان تقرب مني !!!
ناصر مسح ع خده وقال : تمونين يزوجة ناصر
لبس ثوبه الكحلي وطلع وغزيل وراه مشى وفتح الباب وصرخت احلام وشهق ناصر وصد علطول ورجع ودفن وجهه بصدر غزيل اللي وقفت وصنمت مكانها وقالت برعب وخجل وهي احترقت خدودها : ناصر !
ناصر رفع وجهه لها وقال : رجعت الجنية ! ليه محد علمني
غزيل بخجل ووجهها اللي تحول للون الاحمر نزلت وجهها له ولامست خشمه بطرف خشمها وشهقت وضحك ناصر وابعدت منه وطلع يضبط شماغه ورفع طرف ثوبه وركض برا البيت وقلبه يدق من البوسة ومن جراءته كان طاير فالسماء وطلعت غزيل من الغرفة وهي تتراعد ولفت لأحلام وضربت بقفى يدها كتف احلام وقالت بحدة : وانتي اقصري حستس !
احلام بآلم : كسسر !
غزيل بحدة وهي اول مره تنحرج كذا قالت : يكسرتس !!
مشت ونزلت بنظرها لصدرها ورفعت عيونها علطول وهي احترت وقالت : بنات كتمة !
ضحى غمزت للميلا وقالت بضحك : ليه ؟
غزيل طارت وسحبت شعر ضحى وقالت : شفتتس تغمزين جعلتس العمى اللي يطس يعيونتس !!
ضحى انفجرت تضحك وقامت وبان فرق الطول وضحى اطول البنات وقالت : اهجدددي يالنتفه !!
الجود لفت لهم وضحكت وقالت : اف وضوح فتحتي مواجعي
ضحى ضحكت وقالت : لا يكون عقيب اسود الوجه يتنمر عليتس ؟
الجود ابتسمت وقالت : يحق له وم يحق لغيره
الميلا صرخت وقالت : عشششششنا !
البندري ضحكت بقوة وقالت : الله يقلعكم امشوا امشوا
قاموا البنات يحضرون ويتساعدون وبعدها التموا حول والغداء كلهم مثل م الرجال سووا بالجهة الثانية..
::::::::::::::::::::::::::::::::::::::::::::
انتهى البارت ادعموني بنجمة وكومنت عشان اتحفز اكملكم ❤️
( اهليييييين يحباااااني وحشتوني هنا 🫶🏻 ، رجعنا ببارت لذيييييذ وحلو عطوه حقه ولا تنسون النجمة واشوفكم ع خير ببارت جديد❤️❤️❤️ )