ليّت اللِذي خَلق العُيون السُود ... خَلق القُلوب الخَافقات حَديد

البارت الخامس والثلاثين

" في جناح عقاب "
دخلت وهمست : موجود ؟
الخادمة برعب وهي تستعجل : ايوه ! شوي انا خلص بعدين اطلع
الجود : استعجلي طيب
لفت الجود تصّد ورجعت بلحظة سريعة تناظر بالخادمة ولبسها اللي مفتوح من فوق ، جهة صدرها ، تنفست النيران وزفرت لهيبّ ، نطقت بحدة : وش تسوين هنا ؟
الخادمة بتوتر : ماما انا سوي نظيف الحين روح برا
الجود : وم تعرفين عقاب م يحب احد منكم يدخل !؟
الخادمة : ايوه
مشت لها الجود ونطقت بحدة : سكري لبستس !
الخادمة بربكة من اللهجة : شنو ماما ؟
الجود تقدمت وسحبت السحّاب تقفله ونطقت بهمس وهي تصّر ع اسنانها : برا !!
مشت الخادمة تركض وطلعت علطول ، لفت من طلع عقاب بعد الشور ، الشك ووقع والشيطان شاطر ، عضّت شفايفها لثواني ونطقت بهدوء يعكس النيران اللي تشتعّل داخل صدرها : ايوه فريق اول عقاب ؟ بتتكلم وتبرر ولا وش !
عقاب خلخل اصابعه بشعره ونثّر الموية ، تناثرت ع صدره وكتوفه العارية ، مشى لها وقال : وشفيه ؟ عسى م شر
الجود بحدة : خادمة طالعة من جناحك وملابسها مفتّحة وانت طالع من الحمام بعد دش ؟ وافهم يفهيم
صدّ يستغفر ومشى من قدامه ولف بقوة من صرخت بحدة : اننطق !! م تخلييني ع ناار هادية !!! احتتررق انا احتررق
عقاب بعصبية : يعني شاكه فيني ؟
الجود ودموعها متحجّرة بعيونها : حتى الورع بيشّك !
عقاب ابتسم ع جنب وقال : يعني تعترفين انتس ورعه ؟
عضّت شفايفها بقوة تمنع دموعها تنزل ونطقت : تكلم !!
عقاب مشى للدولاب يفتحه وهو يقول : ماشاءالله صح قلنا ان عيال عايض خبيثين ومستعجلين ع عيالهم بس مو لذي الدرجة اسويها واتروش في اقل من خمس دقايق ! هذي حتى ابوي نفسه م سواها !!
طلع شورت له ولبس وخلص ولف عليها وم شافها موجودة ، ميّل براسه ونطق بهدوء : يارب انها سمعتني
مشى للسرير ورفع المفرش ودخل فيه ينام بعمق ، بينما الجود كانت عند الباب واقفه ، ابتسمت وهي عارفه انه مستحيل يخونها بالشكل المقزز ذا بس الشيطان ولعّب لعبته وانتهى ..
" بدون اي احداث مهمة ، ثالثة العيد "
الكل مستنفر وركض من اخر القصر لأوله ، ابو فهد يشّرف ع العمل يبي يقابل رجال قاضي بأكمل وجه واجمل حّلة ، ابتسم من دق جواله ورفعه ووصله صوت ابو رعد وهو يقول : سلام عليكم !
ابو فهد ابتسم وقال : ارحب ي محمد عليكم السلام والرحمة
ابو رعد ابتسم وقال : يالله انك تبّقيه وتسلمه
ابو فهد : بشرني جايين ؟
ابو رعد ضحك بسخرية وقال : ضيعّنا ضاري معاد دلينا وابيك ترسل لي الموقع
ابو فهد استغرب ونطق : غريبة ! عقاب مرسل الموقع لولدك رعد
ابو رعد : ايه ايه داري بس رعد فالدوام وم يرد عوايده م نستغرب !
ضحك ابو فهد وقال : الله يصلحهم ويبارك فيهم وابد الحين ارسل لك الموقع
ابو رعد : م تقصر في امان الله
قفل ابو فهد ومشى لثامر ونطق بحدة : صبي !
ثامر فزّ وقال : ارحب يجد !!
ابو فهد جلس وسحب نظارته يلبسها وقال : ارسل الموقع لعمك ابو رعد
ثامر اخذ جوال جده وقال : اخس يجدي معك ايفون !؟
رفسه ابو فهد بالمعكاز ونطق : اخس ع الشيطان يالخسيس !!
ثامر ضحك وارسل الموقع ورجع الجوال وقال : سمّ ارسلته
ابو فهد : هذا العشم يحفيدي
مشى ثامر يتجّول بالقصر يشوف الورود اللي مّلت سماء القصر والاقمشة والجلسات ، ابتسم ونطق : يارب احد نفس عمري !
مشى يجلس بأحد الجلسات وقال : عم اسر شفت اغراضك برا عسى م شر ؟ الميلا طردتك
اسر بحدة : اعقب عقّبت صدز !!
ثامر : محشوم يعني بس اسأل
اسر : بسافر سنة وستة اشهر
ثامر فزّ ونطق بصدمة : الله يخارجنا صدز !!!
اسر : مهمة عسكرية اولى اكيد بطول
ثامر طلّع لسانه بحيث يقهر اسر ونطق : القم بشوف بنتك قبلك
اسر قام يركض ورا ثامر اللي يصارخ ميت ضحك ويستفزع بعمه ناصر ، ناصر لفّ بقوة ونطق بفشلة : انطموووا جاوا !!
سكتوا علطول يشوفون دخول سيارات آل قاضي كلهم بدون اي نقصان ، كُل فرد منهم وكُل من له صلة في قاضي موجود من بناته واولاده لأحفاده وحفيداته ..
" سابقًا في بيت صقر ، تبوك "
صحت من نومها ولفت عيونها للغرفة ، مشت بصعوبة ونزلت الدرج بهدوء وفزّت من نطق العسكري : فييه احد هنا ؟؟
البندري سحبت الجاكيت المعلّق عند الباب ونطقت بخوف وربكة : انا انا !
العسكري : قبضنا ع المجرم بقضّية الشروع بالقتل انتي مين ؟
البندري ارتخت ملامحها ونطقت بهدوء : مسكتوا صقر ؟
هز العسكري راسه بنعم وكمل : انتي مين ؟؟
البندري : انا بنت عمه وخاطفني من اهلي
العسكري : خلاص اختي انتي بخير اهم شيء وبترجعين لأهلك بأسرع وقت ممكن
البندري هزت راسها بمعنى " فهمت " ومشت معهم تطلع ، ركبت السيارة وهمست : لو سمحت
لف مقدام عليها ونطق : ي مرحبًا ؟
البندري : ضيدان بخير ؟!
مقدام ابتسم وقال : اووف تعرفين ضيدان ؟
البندري ضحكت بخفه وقالت : ايه خّوي اخوي ومتصاوب من ولد عمي اكيد بعرفه
مقدام : معليه بخير والله
البندري جلست ونطق مقدام : انتي اخت عقاب ؟
لفت له تشوف عيونه ع جواله قدامها ونطقت : ايه
مقدام : ونعم والله
ردت بهدوء وبصوت م ينسمع : معليك زود
ركب عسكري جنب مقدام ، دعس ومشى علطول متوجهة للرياض ، وبعد مسافة وصلوا للمطار ، نزل مقدام ومشى وفتح بابها ونطق : يالله ؟
البندري بصدمة : مو من جدك انزل بدون عباية !؟
ضحك وهو يشوفها ملتمّة داخل الجاكيت رُغم الحر ، توسعت عيونها بصدمة وهي تشوفه يضحك ونطقت : م يضحك ي تافه !
مقدام انّلجم وتبدلت ملامحه لجدية وقال : صادقة بس تبين تسافرين الف وميتين كيلو سيارة ؟
هزت راسها بنفي ونطقت : بس م قد ركبت طيارة بحياتي !
مقدام : م به الا الخير تعالي
مشت تنزل معه ، بدون شوز وبفستان العيد وعليه جاكيت واسع وكبير يخُص صقر ، دخلها احد الغرف ونطق : كم طول عبايتك ؟
البندري : اربعة وخمسين تقريبًا
مقدام : تمام تحتاجين شيء ثاني ؟
البندري بتوتر : عادي ؟
مقدام ابتسم وقال : افا عليك اطلبي وتآمرين امر
البندري : بجامة مقاسها سمول
مقدام اشر بأصبعه ع خشمه وقال : ع ذا الخشم ابشري ي اخت عقاب !!
ابتسمت تشوفه يختفي من انظارها ورجعت تدخل غرفة التبديل تنتظره ..
" بعد ساعات "
دق الباب ومشت البندري بتعب ونطقت : مين ؟
مقدام : انا
فتحت نص الباب وطلعت يدها ، ابتسم ومدّ لها الكيس كله واخذته منه وسكرت الباب ، مشت تلبس وخلصت ولبست عبايتها وطلعت علطول وقالت : شكرًا مره
مقدام لف لها بهدوء وقال : عفوًا مره نمشي قبل تحلق الطايرة بدوننا ؟
البندري ابتسمت وقالت : توكلنا ع الله
مشى مقدام بكل هيبته بثوبه ، هي لاحظت انه بّدل ملابسه من البدلة العسكرية المليانة شارات للثوب السعودي ، مشت تطلع للممر معه ونطقت بتوتر : خايفه
مقدام لف عليها وقال : خير خير
مشى يركب الطايرة وركبت البندري وهي ترجف ، مشى يدّلها ع مقعدها وقال : اجلسي هنا اذا تحتاجين شيء..
قاطعته وهي تقول : وانت وين ؟؟ اجلس جنبي
مقدام توسعت عيونه بصدمة وقال : سمّي ؟
البندري برعب : مقدر مقدر اول مره اركب طيارة بحياتي كلها
مقدام : صعبة ي اخت عقاب اجلس جنبك !
البندري بسخرية هي تدري انه مو وقتها ابدًا : قلت جنبي مو بحضني !
طارت عيونه وشهقت بصدمة وانفجر يضحك بصوت خافت قدامها ، نطقت بصدمة : والله م اقصد !!
مقدام ابتسم وجلس جنب الشباك وقال : اقعدي بس فشلتينا
جلست جنبه وقالت : كيف تمشي الطيارة ؟
مقدام : كيف يعني ؟ تمشي وشهي شيء جديد
البندري خزّته ولفت عنه ، ابتسم وشاف الساعة عشر الصباح ثالث العيد ، ابتسم وقال بنفسه " ان شاءالله لاحقين ع خير وتوصل لأهلها قبل يوصل صقر للسجن " لف عليها يشوفها مرعوبة وبزيادة ، عيونها جميلة جدًا ويعترف انه من شافها خذت عقله بس كعسكري وبمهمة م يبي يفكر بشيء ثاني مهمته يوصلها لبيت اهلها بعّلم عقاب ، وهالشيء المهم الحين ، قاطع سرحانه فيها مسكتها لذراعه برعب من مشت الطيارة وشهقت برعب وقالت : يمه يمه يمه بسم الله !!
مقدام صدّ بوجهه للشباك وقال : خير ي بنت والله خير ارتاحي
البندري برعب صرخت من حلّق الطيار بالجو وضحك مقدام بخفه ونطق : يدي كسرتيها
البندري دفنت وجهها بذراعه ، ابتسم يشوف حجمها بالنسبة له وتقدم يقرب لها ، من حاوطته وصارت رسميًا حاضنته بفزع ورعب من الطيارة واصوات الاقلاع العالية ، مسح ع راسها بخفه ونطق : خلاص استوت ترا
ابعدت منه بهدوء تشوف قربه منها ، فزّت ودفنت نفسها بالمقعد جنبه متفشلة ، ضحك بسخرية ولف يطلع الملفات المهمة يخلصها فالساعتين اللي بتنقّضي فالجو ..
" فالقصور سابقًا "
مشت معه وابتسمت وقالت : الله يوفقك ويسعدك ويزوجك مره مشكور !!
مقدام ضحك بسخرية وقال : امين امي وياك وتراني متزوج
كحت البندري بصدمة وقالت : واو ! منجد مو واضح
مقدام : شلون مو واضح والدبلة اللي بيدي
رفعت عيونها ليده هي نفسها اليد اللي حضنتها ، صدّت بغضب من نفسها وقالت بتوتر : اسفه والله م كان قصدي ان شاءالله اني م ضايقتك ابدًا
مقدام : حشى ابدًا م فيه مضايقة والله يسعدك ي اخت عقاب
رفع جواله ورد بحُب شافته بعيونه : ارحبي يعروق قلبي
عضّت شفايفها السُفلية لثواني ونطقت بهمس : ويناظر وعيونه طويلة وزايغة وجعااه يالرجال كلكم طينة وحدة !
مشت تدخل للقصور ، قابلت عقاب قدامها وابتسم لها وضحكت وقالت : افا عليك يعقيب خايف ؟ تراني اختك ومع ولد عمك م بيسوي شيء !
عقاب ابتسم بحزن وضمّها له وقال : كفو ي اخت عقاب كفو بس م بظن بصقر شيء هو مسحور اصلاً وكل اللي سواه هو اثر السحر عليه بس الله يفرج عنه م نقدر نسوي شيء وادري بصقر بيأذي الكل الا انتي !
البندري توسعت عيونها بصدمة وتذكرت كل شيء قاله لها قبل يسحبونه للسجن ، تغورقت بدموعها وقالت بدقن راجف : السحر ينفك اذا تزوجني !
عقاب عقّد حواجبه وقال : ايش ؟
البندري بعدت من عقاب وقالت : هي وحدة من الثنتين احلام ساحرته ولا امه والسحر ينفك بوفاة وحده منهم ع حسب اللي ساحرته ولا اذا تزوجني !!
عقاب : م نقدر نسوي شيء واحنا م عندنا دليل
البندري ضربت بيدها ع صدرها وقالت : افا صدز انا بجيبه لو احفر بيديني بس اثبت برائته !
مشت تركض داخل ووصلت للصلاة وقالت بصوت عالي من سمعتهم يرحبون فيها : الله يبقيكم وبخيير كنت مع عقاب وابيتس يعمة خديجة بموضوع
ام تالين نزلت كوبها وقامت ومشت لها وقالت : عساه خير ؟
البندري مسكت يدها وركضت معها داخل ، قفلت الباب عليهم فغرفة الجلوس وقالت : صقر مسحور !
ام تالين شهقت برعب وقالت : يارب الحمدلله اقّلها م سوى سواته وهو عاقل يارب لك الحمد
البندري بشّك : مالتس دخل فالسحر صح ؟
ام تالين زفرت بملل وقالت : كم مره بقولكم انا مسحورة وكنت مسّيرة لأحلام واسوي الاشياء اللي هي م تقدر تسويها خوف من انكم تشكون فيها !! م اعرف فالسحر شيء والله يزيدني جهل فيه !
البندري ابتسمت وقالت : حمدلله كويس !! الحين ابيتس تدقين ع احلام وتسألينها كيف تتجنبون بطلان السحر عشان نعرف كيف البطلان ونبطلة !
ام تالين ابتسمت ابتسامة عريضة وقالت : والله انتس صادزة الحين ادق عليها
رفعت جوالها وطلعت رقم احلام واتصلت عليها ، بعد ثواني مّالت للدقايق رد صوت مختلف ونطق : مين ؟
ام تالين بغرابة : هلا هلا وين احلام ؟
شاهرة بحزن وهي تبكي : توفت احلام اليوم الفجر
ام تالين شهقت بخوف من طاري الموت وقالت : الله يرحمها يارب
شاهرة : انتي مين ؟ لا يكون من اهل طليقها الله يسود وجيهكم
ام تالين : اوكيه اعرف كيف بتصير الامور احسن الله عزاكم معسلامة
سكرت الجوال ولفت للبندري اللي شهقت وقالت : وش ماتت !!؟
ام تالين بحزن : الله يرحمها يارب
البندري برعب : تدرين انه م يصلى عليها ولا تدفن مع المسلمين !!
ام تالين مسحت وجهها واستغفرت وقالت : عيالها وزوجها لازم يدرون
البندري ضربت ع صدرها واستوعبت ونطقت بهمس : زودتها انا كل شوي ضاربة صدري اح يوجع !!
ام تالين نطقت : ويش هو ؟
البندري ضحكت بفشلة وقالت : شدعوة ولا شيء حبيبتي بس بروح بما اني اخت فهد وعمتهم وانقل الخبر لهم فالجنة ان شاءالله
ركضت تطلع وضحكت ام تالين وهي عارفة ان البندري مستحيل تتكلم بس الخبر بيوصل يعني بيوصل ..
" نرجع للوقت الحالي فالقصور "
ابو فهد وقف وجنبه عياله واخوانه وعيال اخوانه ، يشوفون عيال واحفاد قاضي يتقدمون لهم وبدأ الترحيب ولفّوا من صرخ رعد وقال : يبه جيت خلاص
ابو رعد بحدة : فشلتنا صّف
ابتسم رعد وقال : البقى يرجال البقى
عقاب ابتسم وقال : ارحب يالرعد
رعد رفع حاجبة وقال : الله يبقيييه حضرة الفريق اول عقاب !
اسر ابتسم يشّد ذراع اخوه فخر فيه وعزوة ، ابتسموا كلهم وبفرحة تقدموا يسلمون ع بعض بكل حُب وكرم داعي وتلبية دعوة ، ابو هيام ابتسم وقال : ندخل ؟
ابو تركي : تفضلوا يرجال
ابو ضاري : ايه بس حريمنا
رعد ابتسم وقال : استريح يعم انا بدخلهم
لف رعد ع اسر اللي فهمه علطول ومشى معه ، رعد ابتسم وسلم ع خشم اسر وقال : خطاكم الشر من اخر مره م شفناكم
اسر ابتسم وقال : خطاك اللاش يبو ايهم
رعد : اييه ؟ وين باب الحريم
اسر اشر ع المدخل وقال : مناك
رعد : تسلم
مشى اسر يرجع للرجال وتقدم رعد للحريم ، نطق وقال : لين
لين لفت عليه وقالت : اخييرًا متنا واحنا واقفين
رعد : والله لو انكم سألين الحراس كان دخلتوا
هيام تقدمت ومسكت يده وقالت : اخلص وين الطريق ؟
رعد ابتسم وباس راسها وقال : تعالوا
مشى معهم وهيام متمسكة بذراعه ، صوت كعبها وفخامة مشيتها ، ولا قصور فالباقيين ، مشى ووصلهم وقال : حصنتي نفستس ؟
هيام ابتسمت وقالت : ايه معليك وانت ؟
رعد حكّ راسه وضحك بخفه ونطق : الرجال محد يعيّنه
مشى يركض ونطق : تفضلوا يحريمنا تفضلوا
سلمى بقرف : اصه فشلتنا
رعد ضحك ومشى راجع ركض للرجال ، بينما عند باب الحريم ، فتحت الباب ضحى وقالت : ارحبوا ي ال قاضي
ام محمد ابتسمت وقالت : البقى
لفت لحريمهم وقالت : يالله يبنات
وعد ابتسمت وقالت : يالله يجدة
دخلوا كلهم وبدأ السلام الطويل جدًا ، وانتهوا وجلسوا بالقعدة الخلفية فالحوش الكبير ، ام محمد ابتسمت ابتسامة عريضة وقالت : اشهد ان المحل شرح
ام فهد : اي والله انتس صادزة
ام رعد ابتسمت وقالت : عرفونا ؟
الميلا ضحكت وقالت : شلون بنبدأ الحين
سلمى قامت بحماس وقالت : ابي وحدة تتفاعل معي
ضحى قامت وقالت : م حبيت انتس خذيتي الجو وانتي الضيفة
سلمى ضحكت وقالت : افا عليتس بس انا سلمى
ضحى ضحكت وقالت : تقريبًا نفس صيغة الاسم انا ضحى
سلمى : يوه لا بعيد م تصيرين سلووم لو ايش
ضحى خزّتها وقالت : يشينتس
سلمى مشت وقالت : هذول الحلويين جدًا خواتي وكلهم متزوجين العجز لا تحاولون
الكل طاحوا يضحكون من ردود وحماس وجراءة سلمى ، ضحكت معهم وقالت : اول خواتي العنود بعدها جميلة الجميلات سلمى بعدين بشرى واخر عنقودنا بيان
الكل بدأ يهَلي ويسمي عليهم ، ابتسمت وقالت : وهذول بنات خالتي عبير وعد وعهود وشوق
مشت بعد الكلام المعتاد وقالت : وهذي وحيدة خالتي رهف وجميلتنا وعشيقة الرعد
هيام توسعت عيونها وقالت : لا افضحينا خلاص ؟
سلمى غمزت لضحى وقالت : تصدقين كنت الوحيدة اللي اشبكهم وفعلاً حبّوا بعض
ضحى : امحق لو انتس طالبة مليون بس
ضحكوا كلهم ونطقت وعد : واو وربي اجمل ثنائي انتوا !!
سلمى : ايه خلاص ضحى خويتي
ضحى : ايه كملي
سلمى مشت وقالت : وهذول بنات خالي محمد حنين ولين واخر شيء بنات خالتي لمياء التوأم جميلة وصالحة وانتهينا دوركم
ضحى ابتسمت وقالت : بسم الله انا وخواتي غالية كبيرتنا وبعدها جميلة الجميلات ضحى..
قاطعها ضحكت سلمى بصراخ ، ضحكت ضحى وحضنتها وقالت : شرايتس اقلدتس
سلمى بضحك : حبيييتس دخلتي قلبي !!
ضحى ضحكت وقالت : الله يرفع قدرتس وهذي البندري اخر عنقودنا وبنات عمي راشد الميلا والجود..
قاطعتها حنين وقالت : سبق وتعارفنا انا والجود
الجود ابتسمت وقالت : حبيبي والله
ضحى بحدة : اص لاتقاطعوني المهم وبنات عمي سالم تالين ودالين وبنات اخوي فهد حصة وسديم وبنت اختي غالية سحاب وبنات عمتي سعاد امال والتوأم الين وبيسان وبس والله !
الكل ارتفع صوتهم وهو يقولون : تشرفنا ..
ضحى ابتسمت وناظرت بهيام وحنين وبشرى وقالت : بس انتوا ماشاءالله مخلّفين !
هيام ابتسمت وقالت : م عندي الا ايهم وعمره سنة
حنين ابتسمت وقالت : وانا م عندي الا ليما
ضحى ضحكت بلطافة وقالت : عسل الله يخليهم لكم وانتي ؟
بشرى ابتسمت وقالت : عندي لميس وحامل الحين
وعد قامت وقالت : بنات ندخل داخل ونخلي الحريم برا ؟
البندري قامت وقالت : امشوا ادّلكم
مشوا البنات كلهم ولفت هيام لأمها وقالت : امي شوفي ايهم نايم جنبتس انتبهي له
ام هيام ابتسمت وقالت : تمام انتبهوا لأنفسكم
هزت راسها بمعنى " تمام " ودخلت تلحق باقي البنات ..
" في مجلس الرجال "
الكل يسولفون ويتعارفون ، وبزاوية المجلس نطق بعد عدة محاولات وقال : سامي ؟
سامي لف لثامر وقال : ارحب !
ثامر مسك كتفه وقال : عمرك كم ؟
ضحك سامي بخفه وقال : بتخطبني انت ولا وش !
ثامر ابتسم وقال : يخي اخلص !! من زينك عاد
سامي ابتسم وقال : ابد والله عشرين
فزّ ثامر وصرخ وقال : يعييششون العشرينيين !!
ابو فهد بصدمة : وجع يصبي !!!
رعد فتل شاربه وهو يتأمل ثامر الفرحان ولف لعقاب اللي جنبه جالس ، وقف سامي ونطق بصدمة : انت عشريني ؟!
ثامر ابتسم وقال : خشمك يرجال !
ضحك سامي وباسوا خشوم بعض " سلام الرجال " وابتعد ثامر وقال : شهر كم ؟
سامي : ثلاثة وانت ؟
ثامر : اربعة بيننا شهر اعزز الاخوياااء
مشى سامي وضحك وجلسوا جنب بعض وطايرين ببعض من الفرحة ، كاسر ابتسم ونطق : اسر كأنك مستعجل ؟
اسر ابتسم وقال : م بجلس للعشاء ماشي والله
كاسر : افا ع وين ؟
اسر تنهد وقال : مهمة
ذيب من جنب كاسر : شكلها سنة وست اشهر من التنهيدة
اسر ضحك وهز راسه بنعم وكمل ذيب : يلعن شكلها حسيت فيها طوييييلة !!!!
اسر خزّه وقال : تسوقها انت ترا م تساعدني
كاسر ضحك وضرب ذيب جنبه وقال : معليك من الذيب
اسر : الله ييسر
قام رعد وقال : جابك الله !
محمد ضحك وقال : تبشر بي يالنسيب
لفّوا كلهم لمحمد اللي دخل بالسماعة ، شبك بلوتوث قدامهم وقال : هيّا ي آل مقّبل خل نلعب ! تحمية قبل العشاء
فزّوا رجال مساعد واقفين وصفّوا من كبيرهم لصغيرهم ، بالجهة الثانية كانوا آل قاضّي صافّين يقابلونهم ، وبدأت العرضة النجدية معازفها ودّقها ، بالتناسق والمثالية كانوا يلعبون ، بالنُص اسر وكاسر يتمايلون بالسيوف قدام بعض بشكل مهُيب ، والحضور من تصفيق والصافرات الحماسية تنطلق ، وتصوير وتوثيق للحظة الجميلة ذي ، دخل ابو رعد يسحب ابو فهد معه ومشوا مع بعضهم لعيالهم ، اسر بجانبه وشّاد ع ذراعه ابو رعد ، وكاسر شّاد ع ذراع ابو فهد ، رعد ابتسم وقال : فريقنا !
عقاب ابتسم وهز راسه بنفي ، فزّ رعد وقال : حرام ع شاربي ذا ان طلعت من مجلسكم وانا م لعبت معك !
عقاب ابتسم وقال : م ودي العب انت وتعيش يبو ايهم
رعد سحب عقاب اجبارًا ، وضحكوا كلهم من دخل عقاب يلعب مع رعد ، باسوا خشوم بعض " سلام الرجال " تعزيز لعلاقتهم واصلاحها وترك كل ضغينة سابقة بينهم ، رعد ابتسم وهمس لعقاب : صرنا فريق اول يعقاب
عقاب توسعت عيونه وقال : ماشاءالله مبروك !!
رعد وهو يتمايل بالسيف نطق : ابو عبدالرحمن !
منصور فزّ بين الصفوف وقال : ارحب !!
رعد مدّ ذراعه ومسكها منصور يتمايل مع رعد قدام عقاب ، لفّوا من دخل ضيدان بين الصفوف يمشي ببطيء اثر عمليته ودخل بذراع عقاب اللي وقف بصدمة ونطق ضيدان : العب يبو تميّم !!
عقاب ابتسم وباس راس ضيدان اللي ضحك بصوت عالي والكل صرخوا له يسلمون عليه ويتحمدون بسلامته وانكتب العشاء لسلامة ضيدان ، عقاب بهمس لضيدان اللي يرقص بهدوء بحكم عمليته : متى طلعت ؟
ضيدان ابتسم بخفه وقال : العصر
عقاب : ليتك ارتحت شوي ؟
ضيدان : جاي اخطب يعقاب
عقاب ابتسم وقال : ع البركة !!
ضيدان ترك ذراع عقاب ومشى لأبو فلاح يسحبه بين الصفوف ومشى معه وقال : ارقص مع نسيبك يعم
ابو فلاح ابتسم وهو يشوف الشيخ يدخل ، وبدأ يرقص فرح بحظ بنته الزين وان اللي تقدم لها واحد مثل ضيدان ..
" عند البنات "
لين بحماس نطقت : وربي حماس !! ابي ارقص
سلمى قامت وقالت : ضحى عندكم سماعة ؟
ضحى هزت راسها بنعم وقالت : نجيبها ؟
سلمى : وتسأل !
مشت ضحى تضحك ورايحة تجيبها ، نزلوا وشبكوا علطول وبدأ رقص البنات ، والكل قاموا يصفقون للي بالنُص يرقصون ، وبعدها بدقايق فزّت هيام تربط الشيَلة ع اسفل خصرها وتشّدها عليه ونطقت : فيه منافس ؟
الميلا انفجرت تضحك وقالت : جوودي قومي احرقيها !!
الجود توسعت عيونها وقالت : يوه ميلو منزمان م رقصت وبعدين حامل
غزيل ضربتها بخفه وقالت : الله اكبر اللي يشوفتس يقول بتولدين الليلة اقولة قومي بس !!
هيام ابتسمت وقالت : عادي اذا م تبين تتفشلين اجلسي
الجود قامت وقالت : حبيت الثقة
سحبت شيلتها وصرخوا حفيدات مساعد تعزيز لحَرم عقاب ومقابلينهم حفيدات قاضي تعزيز لهيام الرعد ، شّدتها ومشت وبدأ الدقّ والهز ، كانت الجود تتمايل بشكل فاتن ومتناسق اكثر اتقان من رقص هيام ، ضحكت وقالت : عشتي !
الجود غمزت لها وقالت : تعيشين يهيام الرعد !!
ضحكت هيام بفرحة وقالت : وانتي وش نقولتس ؟
الجود : الجود يكفيني
تالين زغرطت وقالت : عااااشت حَرم عقاااب !!
صرخوا بنات مساعد تعزيز وتصفيق وطبل ع الطاولات ، مشى من سمعهم يهتفون بصوتها ، فتح نصُ الباب وميّل راسه وتمنى انه م ميّله ، يشوفها تتمايل قدامه بخصرها المزّوي ، شعرها الطويل اللي بلون البُن ، انعمى من البنات كلهم ويحلف يمين انه م يشوف غيرها ، مثل فرق البدر عن النجوم ، وقف جنبه وميّل راسه ونطق بحدة : ابو ايهم !!!
عقاب فزّ من محله ونطق بصدمة : اخو العيال !
رعد سكر الباب ونطق : شفت اللي شفته !؟
عقاب بحدة : انت شفت شيء ؟
رعد : ايه !!!
عقاب طارت عيونه وقال : شفت حَرمي !؟
رعد قطّبت حواجبه بصدمة وقال : حَرمي صارت حَرمك ؟
زفر عقاب براحة وضحك بخفه ومشى يتراعد جسده من منظرها ويحلف م يعيَدها لها ، وعند رعد عضّ شفايفه ونطق : رجعنا ع طير ياللي ؟! طيب طيب يهيام الرعد
مشى يلحق ع الرجال فالمجلس ، عكس عقاب اللي ضبّط نسفة شماغه وتعطر ومشى ونطق : ي اهل البيت
كتمت السماعة البندري ونطقت : يمه عقاب !!
الجود ابعدت شعرها عن اطراف وجهها ونطقت : بروح اشوفه
مشت وصرخوا البنات يقولون لها : الشيلة !!
بمعنى تبعدها عن اسفل خصرها ، بس كانت مستعجلة ومو مستوعبة لكلامهم ، فتحت الباب وقالت : هلا عقاب ؟
عقاب ابتسم وتكى براسه ع الباب وقال : شفيتس ؟
الجود وهي تتنفس بسرعة : وش ؟
عقاب : وش صاير عندكم
الجود انحنت قدامه تنكس شعرها لقدام ، وتناثر ريحة عطرها عند خشمه وثوبه ، رفعت شعرها وضحكت بخجل وقالت : شفيك تناظر
عقاب تقدم وحاوط خصرها وشّدها عليه وقال بصوته الثقييل : وشفيني ؟ اعنبوتس تشوفين وش تسوين ؟!
ابتسمت وقالت : نسيت ربطتي
عقاب ابعد يدينها ونثر شعرها ع وجهها ، انحنى يبوس منطوقها وبكل خلية راجفة فيه يعطيها حقها بالقُبلة ، فزّت برعب تبعده ونطقت : عقاااب مو هنا !!
عقاب ابتسم وقال : خلي الميلا تطلع لآسر بيمشي وانا وانتي بيننا ليلٍ طويل يضامرة السرجوف !
مشى وضحكت بخجل وقالت بنفسها " يجنن !!!! " صرخت كاتمة انفاسها ومشت تقول للميلا تطلع لرَجلها ..
" عند اسر خارج القصور "
لف لجواله اللي يدق بجيبه وسحبه ورد ، ووصلها صوته وهو يقول : هلا ميالتي ؟
الميلا : اسر وينك ؟
اسر ابتسم وقال : جعلني فداتتس طلعت اركب اغراضي فالسيارة ثواني واجيتس
ثامر لف ع عمه وقال : يعم خوفي م ادل !
اسر سكر وقال : لازم نعتمد عليك بتوديني وتنزلني وترجع !
ثامر زفر بتوتر وقال : سمّ ابشر
مشى اسر يدخل للقصر يشوف العيال يحضرون العشاء وصدّ عنهم وسرعان م رجع يلتفت من نطق تركي : ودك اكنسل عرسي لين تجي ؟
اسر ضحك بسخرية وقال : هذا انت م صبرت ذي الليلة تبي الصبح ورابعة العيد تجي بتصبر سنة وستة اشهر ي نصاب !
تركي ابتسم وقال : اوكيه اجل ارسل هداياك
ضحكوا العيال وضحك تركي يسمع اسر يشَتمه ، مشى ورفع صوته يقول : ي مياالة قّلب ابن عايض !
عقاب رفع صوته وقال : حدّد يخوي م تنكبنا !!
ناصر : تشوف !!
اسر ضحك وسحب عليهم يشوفها جايه تركض ، ابتسم من حضّنته بكل قوتها وشهقت بحُضنه تبكي ، تبكي ع مّر الفراق وتبكي لأنها تتجرعه بأكثر وقت هي محتاجه اسر جنبها ، سنة وست شهور بدون تواصل ولا جوال مستحيلة للطرفين ، تسللت يدينه لخصرها يشّدها عليه ويبوس كتفها ، ابتسمت وسط بكائها وقالت : لا تخليني !!
ابتسم بحزن ونطق : عيّيت اخليتس !
بكت زيادة وشّد عليها يهديها ، ابعدها يشوف وجهها وقرب منها يقّبلها ، قُبل وداع وواضحة جدًا انتشر ع وجهها كامل تتحسسّ شفايفه وشاربه ع وجهها ، بكت وهي تضّم وجهه لها وهو يقبّلها قربوا من بعضهم لدرجة اختلط النبض والانفاس م ودها يروح ولا وده يتركها ، دموعه بعيونه وهي منهارة قدامه ، نطقت بحزن وقالت : لا توادع ميالتك تكره الموادع !
اسر ابتسم يشوفها تميّل براسها ونطق : ومن هلّت علي مزنة وداعتس وامطرت فرقاتس وانا داري بتزهر جروحي كل يوم وتورق ألامي !
بكت علطول وقالت ببكي : اسرّي لاتروح !!
حضنها كآخر حضُن بينهم ونطق برجفة صوته :
معتس واشتاق لتس وشلون وانا بعيد ؟
‏والمشاعر ضوامي غصب تنساق لتس
كل ما بطت بتس الايام شوقي يزيد
‏شف جنون الغلا عقبتس وانا عاقلتس
أحترق لتس ولّه ولا أنكتب لتس قصيد
‏والشعر كم تباهى كل ما راق لتس ؟
من وداعتس ونظراتتس رميتيني وحيد
‏غربة شعور يالميلا هالجفا م لاق لتس !
-
مشى يبتعد عنها وتشوفه يبتعد ، شهقت وانهّد حيلها بقوة وهي تشوفه يبتعد وم زادها انهيار الا من رفع يده فالسماء وقال : وداعتس نفستس وعسى الله يهنيتس بشوفة كنوز !
اختفى عن انظارها وطاحت الميلا تبكي ، م توقعت تتعلق فيه بالشكل ذا ، بدايتهم كُره وحسَد لأجل فرس ، وهالفرس ساقهُم لبعضهم بعد الله ، واشعل فتيلة الحُب والعاطفة بينهم وصار قلب الآسر ميّال لحُب الميلا ، وكُل الميلا آسّرها حُب الآسر ، انتهى اخر لقاء بينهم ونطقت انفسهم ي عسى الله يكُتب لنا لقاء قريب ، فيه يفتحون ابواب الشوق لبعضهم وتطفيها كنوز بينهم ..
" خارج القصور "
طلع عقاب وزقارته بين شفايفه يمشي ، ابتسم اسر ونزل من السيارة ونطق : م به الا كل خير
عقاب زفر دخانه ونطق : اني داري !
حضنوا بعضهم وضحكوا من شّد الحضن ناصر ، اسر ابتسم وقال : وداعتكم اهل البيت
ناصر ابتسم وقال : توكل ع الله يعين اخوك وابشر
عقاب ابتسم وباس راسه وقال : ودعناك الله يالعضييد انتبه لنفسك وشّد حيلك
اسر ابتسم وقال : ابشروا الحقوا العشاء
ثامر بحزن زفر : اقّلها خلني اجيب سامي يونسني وبعدين خير مالي حق اتعشى !!
عقاب بحدة : يويل ام الصبي !! ورع ودّ عمك وعوّد لاحق ترا
ناصر ضحك وقال : يالله اسرّوا
اسر : يالله ي قلبي سرينا
ركب سيارة ثامر وانطلقوا لمكان تجمع العساكر وبعدها يسافرون للمهمة اللي تكون ع حدود نجران ..
" فالمجلس "
كتّبوا كتاب دالين وضيدان ووقع وسلموا الكتاب لفلاح اللي مشى وناداها ، وشوي وطلعت هي وام تالين متغطية وتشوف فلاح صادٍ عنها ويناظر بأخته ، ابتسم وقال : وقعي
دالين ابتسمت ابتسامة عريضة وقالت : ضيد ؟
هز فلاح راسه بنعم وفزّت توقع وضحك بعّلو صوته وقال : ماش خفيييفه !
دالين خزّته وقالت : اص لا اجيب امال الحين
ضحك بصوت عالي وضحكت معه ، تقدم ومسك فكها يبوس خدها وقال : مبروك ي داليني !
دالين ابتسمت بخجل وقالت : يبارك فيك ي فلييح !
مشى فلاح راجع للرجال وارتفع صوت زغاريط الحريم ، زفر براحة من عرف انها وقعت وقاموا الرجال يسلمون عليه ويباركون له ، ونطق ابو فهد : تفضلوا ع العشاء جميع بسلامة ولدي ضيدان !
واه وش كثر هزَته كلمة ولدي ! ، م عمره سمع احد يناديه ولدي والحين متزوج من عندهم وينادونه ولدهم ، يسّعد حظ بن حثلين برَجال مساعد آل مقّبل ، قام ولف ع ابو فلاح اللي نطق : تاخذها بعد العشاء ؟
ضيدان ابتسم وقال : بعد العرس بكره ان شاءالله
هز راسه ابو فلاح بمعنى " تمام " وم قال ضيدان كذا الا عشانه يبي يجهز بيته لأستقبال عروسته واول ضيفه له فالبيت خاصته ..
انتهى العشاء وودعّوا آل قاضّي وتسكرت بوابات آل مقّبل ..
" في جناح ناصر "
طلعت بالجهاز بعد م استفرغت ، زفرت بتوتر وسرعان م سقط من يدها من ظهر لها خطين بوضوح ، عضّت شفايفها السُفلية لثواني ونطقت : الله ياخذك ي ناصر !!
لفت من دخل وفزّت تشيل الجهاز وتمشي ترميه ، طلعت من الحمام وشافته منسدح يطبطب ع بطنه وقال : اني والله قد دريت !!
فزّت برعب وقالت : كيف عرفت !؟
ناصر لف عليها وقال : دكتور طب اسرة اكيد بعرف !
غزيل بتوتر زفرته ونطقت : طيب م تحس اننا استعجلنا وعلطول ثبت الحمل !!
ناصر قطّب حواجبه وقال : ايش ؟
غزيل جلست ع طرف السرير وقالت : لازم نحلل فالمستشفى احس ذا كذاب حشى شلون احمل بعد اربع ايام من الوصل !؟
ناصر بصدمة : انتي حامل ؟
غزيل : اييه مو هذا اللي تعرفه !!
ناصر انفجر يضحك وقال : لا يالدبشة اقصد الم بطني عشان اللحم والدهون والشطة تعرفين ضربت بالخمس فالمفطح جعله بعمري اسيّر م لحق علييه !
صرخت بصدمة وقالت : تممزح !!!
ناصر ضحك وقال : يعني محسن جاي ؟
غزيل : يشيخ الله ينتف هالخشة قال ايش قال محسن جاي يمَال فرقى العين صدز
ناصر سحبها يحتضنها وقال بخبث : بس قهر كنت ابي اجرب الشعور اكثر من مره الحين بنحرم تسع اشهر
صرخ من ضربته بكل قوتها وقالت : الله يصييبك نعم !!!
ضحك وقال : اه لذييذة صاحبة الكيرلي لا تلوميني ي ام محسن
غزيل قَلب لونها احمر من ساسها لراسها ، زفرت بعصبية ولفت ترجع تنام ، ابتسم وتقدم يحاوط خصرها وهمس : الله يتمم ع خير ونشوف بنتنا ولا ولدنا
غزيل ضحكت بخفه وقالت : اذا بنت وش بتسميها ؟
ناصر ابتسم يكتم ضحكته وقال : محسنه
شهقت بصدمة وصرخ يضحك بعّلو صوته ، رفسته وقالت : بنسميها نوره !
ناصر : يبنت الحلال نوره نوره ابشري بس لا ترفعين سقف امالتس لأن محسن قادم وبقوة !
ميّلت راسها وقالت : عادي انام بحضنك ؟ احسني فاقدة حنان
ناصر فزّ وقال : يعقب الحنان ! تعالي بعطيتس حنان وفاطمة وزهرة ..
قاطعته من عضّت لحيته وضحك بخفه ونطق : بوسيها بدال العض يالخنفس !
غزيل رفعت راسها له وابتسم ينحني يقبّل شفايفها ويغذي غريزته وشوقه لهاللحظة ..
" في جناح عقاب "
سحبت الرشاش ومشت تفتح الباب ، دخل ازرار ثوبه مفكوكه وزقارته تحرق جوفه ، ابتسم وقال بصوته الرخّيم والجهورّي : نزل السلاح يعسكر !
الجود ابتسمت وقالت : ارفض اوامرك سيدي !
عقاب ابتسم بوسع ثغره وقال : اعقب !!
الجود ضحكت وقالت : اذا م تركتني انام بسلام بذبحك وانام
عقاب ابتسم واشّر بأصبعه ع صدره وقال : ذبحتيني بطرف غمازة الف مره وش تفرق عن الرصاصة ؟
الجود عضّت شفايفها لثواني ونطقت : بذبحك والله !
عقاب قرب منها ليّن توسط الرشاش صدره ونطق : اذبحيني بس لا تحرميني !
الجود ابتسمت وقالت : بذبحك !!
قرب منها وركضت تبعد ومشى وراها ، حاصرها معتّليها وانحنى لها وتساوى بطولها وقال بعذّبة صوته : اذبحيني جعلني بين الثمان ‏بين جمرة شفتتس فوق وتحت !
بدأ يخوض معركته المفضلة عنوانها شفايفها ، ياخذها ع هواه تعصف به يمين وشمال يعذب قلبه ويهتويها اكثر واكثر ، بادلته وسقط الرشاش بينهم نزل ذراعه يرفعها ويشيلها بين يدينه ، يحاسبها ع الميّل والعطر والشعر والنحر ، خذا وعطى ولا قصر ابدًا ..
" منتصَف الليل ، جناح فهد "
انتصف الفاس راسه ، ووصله خبر وفاة طليقته احلام ، ام عياله ام سديم ذات الست سنين فقط ، فقدت امها قبل تدخل اول سنة فالمدرسة ، تركت حصة في نصُ مشوارها فالثانوية وحاجتها الكبيرة لأمها ، وتركت بكّرها في بداية مشواره فالجامعة ، هز راسه بنفي مرارًا وتكرارًا شلون بيتعامل مع عياله ، نطق بصدمته : احلام توفت !!
لف بكل قوته من سمع صوت الزجاج اللي تساوى بالارض ، رفع عيونه يشوف حصة وراه مصدومة ، فزّ يضمّها له ونطق بصدمة : اذكري الله يبنتي اذكري الله
شهقت بقوة ورجع لها النفس بعد الانقباض اللي صار لها ، صرخت بأعلى صوتها تبكي وتشاهق ، بكى فهد وهو يحتضن اول بناته وفرحته بالجنس اللطيف الاولى ، شّد عليها وده يدخلها بضلوعه ولا تحسّ بمرارة الشعور ذا ، فقدان الام ماهو بسهل ولو انها م كانت زينة عندهم ، مواقف كثير جمعتهم عشرة عُمر بينهم ، صرخت وقالت وسط دموعها : يعني راحتت امي !! انا يتييمة ام الحيين خذيتووها مننا ولا سامحتوها اقّلها لخاطرنا شلوون بعيشش يبه تكفى يببه كيييف بحمّل هالعبء ع ظهري !!! يبه تكفى قول انه كذب امي م ماتت اااه يارربي قلبيي يعوررني مو قادرة اتنفس !!!!
فهد مسح ع ظهرها ونطق : انا موجود م رحت ي حصيص والله م اخليكم !!
حصة ابعدت عنه وقالت بعنّف : اصلاً انت كنت موجود من اول ؟ انت السبب ابعدتها وطلقتها والحين ماتت والله م اسامحك م حيّيت !!
ركضت تطلع من عنده وشهقت من حسّت الزجاج يخدش باطن رجلها ، سحبت جوالها واتصلت عليه ووصلها صوته وهو يقول : هلا حصة ؟
حصة بدموعها شهقت ونزلت بكل حُرقة ونطقت : ثامر ويينك !
ثامر فزّ وقال : تعوذي من ابليس وشفيتس ؟
حصة انهارت تبكي ونطقت : ثامر امي ماتت !!!
ارتخت ذراعه وكفَ يده وسقط الجوال من يده ، اخذ نفس يحسّ الدنيا تلفّ فيه ، نزل عيونه يشوف الجوال بين رجوله انحنى يجيبه ورفع راسه علطول من سمع زميّر شاحنة واصطدم ثامر فيها واندهست سيارته وانعدم بين الحديد ..
::::::::::::::::::::::::::::::::::::::::::
انتهى البارت ادعموني بنجمة وكومنت عشان اتحفز اكملكم ❤️
( ارحبوا يحباااااني عًدنا والعُود حميدٌ ، عطوها حقها لا تقصرون ابد ولاتنسون النجمة هي اللي تحفزني اجي انزل هنا ، قبل تقرأون اضغطوها واستمتعوا بالبارت اراكم بموعد اخر ❤️ )