ليّت اللِذي خَلق العُيون السُود ... خَلق القُلوب الخَافقات حَديد

البارت الرابع والثلاثين

مشى يطلع وضحكت دالين وقالت : يوسخه بستي اخوي ؟
امال : بعرف شيء واحد انتي ليه حشورة ؟
ضحكت دالين بصوت عالي ودخلت امال ولحقتها دالين ..
" عند البوابة "
دخلوا اهل مهُاب واهل سهم وضيدان وقداح وضارب جايين سوا ، وفعلاً شافوا عقاب يتجه لهم مثل م اتجه اسر لسهم وبدأ السلام والترحيب وكلن يعايد الثاني ، ضحك ضيدان وقال : جايين الليلة نطلب القرب
عقاب رفع حاجبة وقال : صل على النبي يبن حثلين
ضيدان : عليه الصلاة والسلام بس تراني اتكلم منجد
عقاب قرب وهمس : دالين ؟
هز ضيدان راسه بنعم وكمل عقاب : ماشاءالله الله يبارك لك ومن كبر حظوظنا يوم تبي نسبنا والقرب مننا يبو صالح
ضيدان شّد ع كتف عقاب وقال : ابشر بي
عقاب ابتسم بخفه وقال : م تقصر يطويل العمر
ضيدان توسعت عيونه وارتفع صوته وهو يضحك وقال : صرت انا طويل العمر ؟!
عقاب ضحك وقال : نعطيك ع جوك
ضيدان : الله يرفع قدرك يطويل العمر
مشى عقاب ودخل وتجمعوا كلهم ونطق مهُاب وقال : ي حلات جمعاتكم فقدنا اجواء الديرة
سهم بهمس لآسر : يحلو ضحى بس وينها ؟
اسر ضربه وقال : اهجد لا ادعسك
سهم : وحشتني يخوي
اسر صّد بعد م خزّه وقال : طولك ي نفس !!
سهم ابتسم بفشلة وقال : البخ ؟
اسر هز راسه بنعم وكمل سهم يقول : سمّ
بدأ ثامر يوزع القهوة عليهم ويصب لهم كلهم ، لفوا من نطق مهُاب : عقاب ترا رعد طلبني رقمك وعطيته
عقاب نزل فنجاله وقال : غريبة وش يبي ؟
مهُاب ابتسم وقال : وشدراني
عقاب سحب جواله وفتح الواتس وشاف رقم مو مسجل ودخل ع الرسالة وشاف المكتوب فيها :
يمرحبا ي ابو تميّم عاد عيدكم وتراكم معزومين عند بيت جدي رابعة العيد وان شاءالله انكم مو مرتبطين رد لي خبر معك رعد بن محمد بن قاضي .
ابتسم عقاب وكتب له :
ارحب يبو ايهم وابد والله م تسوون وتكلّفون وعزيمتكم انا اتكفل بها جمايلكم واجد والله وبرسلك اللوكيشن ثالثة العيد والله يحييكم
سكر جواله ولف ع ابوه اللي نطق : رعد بن قاضي ؟
كل من يعرف رعد فالمجلس رد عليه بالإيجاب وكمل ابو فهد وقال : ي ماشاءالله ع ذاك الرجال اذا هو يعزم احلف عليه وخل العزيمة عندنا
عقاب ابتسم وقال : سبقتك يبه
ابو فهد شرب من فنجاله وقال : ذا العشم يولدي
كملوا سوالفهم من بعد رسالة رعد والعزيمة اللي بتصير ثالثة العيد بقصور مساعد ..
" عند الحريم "
دخلوا الامهات وبدأ السلام ووصلت قوس عند ضحى وقالت : يمرحبا !!!
ضحى ضحكت بخجل وقالت : ي هلا بقوس ي هلا
قوس عبّست بملامحها وقالت : ماش احسك صرتي رسمية
ضحى : يبنت الحلال لا تفضحيني احاول اصير ناعمة
ضحكت وقالت : يحلوووك ! من العايدين يعسل
ضحى : وانتي من الفايزين
انتهى السلام الطويل جدًا وجلسوا كلهم ونطقت ام تركي وقالت : دامكم مجتمعين وصرنا اهل عازمينكم الليلة ع زواج ولدي تركي من بنت عمه تالين
شهقت لولوة وقالت : الله يسامحك يخالة تووك تقولين لنا
ام ذعار بهمس : بنت !!
قوس بحزن : منجد لولو صادقة كيف يمدينا
ضحكت ام تركي وقالت : شدعوة يمدي يمدي وعسولات بسم الرحمن الرحيم علييكم
ام ذعار ابتسمت ابتسامة عريضة وقالت : م علييك زود وابشروا
ام مهُاب بفرحة : جايين بعد لعيون بنتنا غالية
ضحكت غالية بخجل ونطقت سحاب : شدعوة شدخل امي ؟
ام مهُاب ابتسمت وقالت : انتي بنت غالية ؟
سحاب هزت راسها بنعم وقالت : ايه نعم بنتنا طال عمرتس
ام مهُاب : بسم الله علييها عسل !!
سحاب ابتسمت وقالت : طيب فهميني تعرفين امي ؟
ام مهُاب لفت لغالية وقالت : م قلتي لها ؟
سحاب رفعت حاجبها وقالت : م قالت لي ايش ؟
الجود تقدمت وسحبتها معها وقالت : تعالي نادي لي خالتس
سحاب : اف جود ! زوجتس دقي عليه تعبتيني
الجود ابتسمت وقالت : بقوله يدلعتس ويعايدتس ترا محّول لي خمسين الف
سحاب : عساس بصدقتس الحين ؟
الجود : شف البزر !! ناديه تكفين
سحاب مشت تطلع لعقاب تناديه للجود وتنادي الباقين يسلمون لأن بعد ساعتين بيمشون للرياض ، دخلت وقالت الجود للجميع : طيب سحاب بسم الله عليها نبيهة وبتفهم علطول بس صعبة نصدمها قدامكم وبتنفعل ولسانها طويل وكله من خوالها
غالية ابتسمت وقالت : الله يهدي اخواني مدلعينها
الميلا نزلت فنجالها وقالت : ماشاءالله عساس انتي مقصرة ؟
ضحكوا كلهم وقالت غزيل : بأختصار ي أم مهُاب حلوه تعرف الخبر بينها وبين امها
ام مهُاب هزت راسها بمعنى " تمام " وسكتت وشوي وارتفع صوته وهو يقول : يولد ندخل ؟
ام فهد قامت وقالت : يالله يبنات امشوا سلموا
مشوا بنات عايض وام فهد وحَرم عيال عايض وراهم ، طلعوا وسلموا وعايدوهم ودخلوا البنات ، الميلا : مين اول ؟
غزيل : وتسألين ؟ وشعرفني ؟!
الجود مشت وقالت : انا عقاب عند الباب
الميلا تكت جنب غزيل ينتظرون ، مشت وقالت : عقاب
عقاب لف عليها وهو ينسّف شماغه وقال : يعييونه ارحبي
ابتسمت بوسع ثغرها ونطقت : من العايدين الفايزين
عقاب سحبها وضمّها له وقال : وانتي من السالمين الغانمين بقلبي مقيمين
ضحكت وقالت : الله !!
عقاب سحب هديته وعطاها وقال : اقل شيء اقدمه
الجود ميّلت راسها ونطقت : بعد الخمسين م صرت اصدقك
عقاب : حرام انها قليلة عندتس يكاملة الحسن
الجود ابتسمت وقالت : لا عدمتك يحبيبي
عقاب : الله الله ادخلي لحد يشوفتس وعساتس من عواده ي حلاة العيد
مشى ودخلت وشهقت الميلا وقالت : اف اف وش ذا ؟
الجود غمزت لها وقالت : سر
مشت وارتفع صوت ناصر يقول : ام محسن تطلع لو سمحتوا
ضحكت الميلا وقالت : وسمّاه بعد
غزيل بحدة : واللي مطّير عقلي كيف عرف اني احب اسم محسن !!
الميلا : الحب ومايفعل
مشت غزيل وقالت : فشلتنا عندي اسم ترا وش ام محسن
ناصر ابتسم وقال : اجل افضحتس واقول حبيبة الدكتور ؟
غزيل : تراني م رضيت للحين !! لا تسولف طبيعي يورع
ناصر ميّل المسواك بشفاته وقال : والله البلشة تعالي اعايدتس يمسلمة
تقدمت له وحضنته ، حاوطها وباس راسها بقوة وقال : كل عام وانتي العيد والحاضرين وكل الناس بعيوني كل عام وانتي بخير وبين حضني وضلوعي كل عام وانتي حبيبة عمري وصاحبة الكيرليات غزلي الحلوة جدًا !
ضحكت بحب وقالت : تعرف تجيب راسي وانت بخيير ي ابوي انت
ناصر : روقنا من ابوي اه يبعد الدنييييا والله
غزيل بعدت وقالت : وين عيديتي ؟
ناصر رفع ظرف تزيّن بالنقش والكتابة عليه وتحته كرتون مغلف بشكل جميل ومرتب ، ابتسمت واخذته ومشت داخل وقال لها : افا وين عيديتي ؟
غزيل : تقلع بس
مشى يضحك وسحبه اسر وهو يقول : سنة يخوي سنة !!
ناصر : هاوش عقاب مفروض اننا بالاكبر يورعان
مشى وكّش اسر بوجهه ودخل وقال : ميالتي تعالي
مشت له وقالت : اهلاً بالعيد كله
اسر شافها تتقدم له بفستان ازرق يبين تفاصيلها القاتلة بالنسبة له ، حاوط خصرها وشّدها عليه وقال :
زراق فستانتس أجمل من زراق السماء
‏هم لون واحد ولكن مدري أحسّ غير
يمكن على شانتس أكرم وأنا ميّت ظما
‏ويمكن على شانتس أشرح وأنا محتاج أطير
-
ضحكت وسندت نفسها ع صدره وقالت : صح لسانك وعاد عيدك يا وليف الروح وكل عام وانت بخير يا ضلعي و أنيسي و كل ناسي !
اسر سحب يدها اللي ع صدره وباسها بكل حب وقال : والله اني كنت طيب واموري في السليم لين قلتي عاد عيدك اختلفت معتس وضاعت كل علومي !
ضحكت وقالت : هذي سواياك اللي يعاشرك يصير يقول كلام يقطر عسل
ابتسم وحط جبينه ع جبينها وقال :
من كثر ماشفت في وصفتس حلايا
‏ظنتي العسل يستخرجونه من وريدتس
‏شوفتتس تغني عن اصناف الهدايا
‏كل ليله وانت عيدي يالميلا عاد عيدتس
-
باست منطوقه بدون مقدمات وضاع اسر فيها زود ضياعه ، ضحكت وقالت : شفت العسل ؟ يطلع مع مخارج حروفك
اسر ابتعد وشّد حزامه وسلاحه وضبط نسفة شماغه وقال : يالله جارك يارب !
نزل كراتين وباقة ورد كبيرة ولف عليها وقال : عيدياتس ي ام عيون سود كلها جاذبية والبوسة قسم بالله ان احاسبتس عليها
طلع يركض وضحكت بخجل ومشت للورد وتوسط الورد مفتاح بيت ، قطبت حواجبها وقالت بنفسها " بسأله بعدين " مشت تشيل الهدايا وتدخلها غرفته وتسكر الباب وراها طلعت ولفت ع صوت تركي اللي قال : ميلو تعالي
مشت له وابتسمت تتقدم تسلم عليه وتعايده وعايدها وقال : وين تالين ؟
الميلا انفجرت تضحك وقالت : جحفلتك تالين فالرياض م جات معنا
تركي زفر بقهر وقال : حيوانه صدز !
الميلا : انادي امي ؟
تركي هز راسه بنفي وقال : عايدتها قبلكم نادي جودي
الميلا ابتسمت وقالت : الان
مشت تنادي الجود لتركي وطلعت علطول وقالت : ترووك !
تركي : هلا بالنشبة اللي م تعترف بزوجها
الجود حضنته وقالت : اصلاً نسيت منك من بعد الخمسين
عقاب كان يشوفهم ونطق بصوته الجهورّي : حلفت عليتس تعلمين العرب كلهم عن الخمسين يبنتي اصه !
ضحكت وقالت : مقدر مصدومة للحين اشوف التحويل
تركي : الله يفشلتس فرحانه بخمسين ريال ؟ نسيتي الزرقاء اللي كنت اعايدتس فيها ؟!
الجود بعدت عنه وقالت : الله يفشلك انت خمسين الف
شهق تركي وقال : انا في وجه الله !!!!
الجود ضحكت وقالت : المهم بتعايدني ؟
تركي طلع الزرقاء وباسها ودخلها بجيبه وقال : حرام م تجيتس
مشى وانفجر عقاب يضحك وقال : انا اعايدتس ولا يهمتس
الجود : يووه لا انت ارتاح يعقيب لا يجيني منك شيء
عقاب اشر ع خشمه وقال : ابشري ي جودي ابشري
ابتسمت له وارسلت قُبلة فالسماء ، توسعت عيونه بصدمة وقال : ابو تميّم !!!
اسر ابتسم وقال : ونعم وش السالفة ؟
عقاب تنحنح وقال : امش ندخل بس امش
دخلوا للمجلس ع خروج سهم وضحكوا عليه ومشى يشّتم فيهم ..
" عند باب المطبخ الخلفي "
نزلت اللحم فالصحن وقالت بصوت عالي : بندري هاتي غطاء القدر اعجلي
رفعت عيونها لجيّته وانصدمت وقالت بنفسها " اه لييه جاء الحيين !!! " ضحكت له وقالت : واو يالتوقيت !
سهم ابتسم وقال : سنعة ماشاءالله عليك
ضحى بأحراج : لا تقرب خلك بعيد حبك يزيد
طلعت قوس وقالت : خير م تشوف البنت مشغولة ؟
سهم بحدة : ورا م تساعدينها يالعاقبة ؟!
قوس بقرف : يع !! لحم والله م المسه
ضحى ضربت راسها بخفه وقالت بنفسها " تكره اللحم وهو توأمها اكيد يكرهه اااه يراسي " سكتت تطالعهم وضحك سهم وقال : صادقة لحم قعود بعد
ضحى : لا خروف
سهم : كلها واحد
ضحى عبّست لثواني وقالت : م تحبه ؟
هز راسه بالنفي وضحك وقال : م ادانيه ع قولتكم
ضحى : جهز نفسك تاكله غصب من يديني
قوس : لا م احبه انا بس سهم يمقلبك
ضحى لفت عليه وضحك وقال : احبه احبه بس امازحك
ضحى ابتسمت وقالت : من العايدين ي سهم
سهم ابتسم وقال : ابعدي من القدر طيب
مشت له وتقدم لها وباس راسها بقوة وحاوط خصرها وقال : عاد عيدك يعيون سهم وروحه
ضحى ابتسمت وقالت : لا داعي
ضحك وقال : وشدخل لا داعي
ضحى رفسته بهدوء وقالت : لا تدقق ميته ترا !!
سهم : مستحية ؟
ضحى : لا طبعًا ميته شغل وكرف
سهم ابتسم وباس يديها وسحبتها علطول وقالت : لااا !!
سهم ابتسم وقال : وشفيك ؟
ضحى بفشلة : نزلت اللحم وم غسلت
سهم : نزلتيه بكفوفك مو ظهر الكف !
ضحى : كلها واحد !
سهم ابتسم وقال : انا اشتكيت طيب ؟
ضحى : جيتك بكبرها غلط
سهم رجع خطوتين وقال : يعني نادمة اني جيت ؟
ضحى هزت راسها بنعم وقال : طيب عاد عيدك
مشى راجع للرجال وهو محترق م توقع يصير كذا ابدًا ، ضحى جلفة وجدًا بس هي عطته من اول بس م توقعها كذا ابدًا صدّ بغيظه ودخل المجلس ، شافته يبتعد وكملت شغلها ودخلت علطول للمطبخ ..
" عند باب المجلس "
طلع صقر يركض وسحب دخانه وشغله ورفع عيونه يشوفها تشّيك ع اللحم ، ابتسم وقال : انتي يالبندري عيدي واجمل ايام العمر وانتي فرحة قلبي وحظي الحلو كل عام وانتي لعيدي فرح
رفعت عيونها له وابتسمت بهدوء وقالت : وانت بخير وصحة وسلامة
سكرت القدر ومشت تدخل علطول ، صدّ ورمى زقارته ومشى يدخل واستوقفه صوت ضيدان وهو يقول : وينك فيه من اول ي صقر ؟
صقر بهدوء وهو يناظره : يوم عيد فكنا يبن حثلين
ضيدان : انتبه تسحب نفسك للقاع ! والله م ارحمك
صقر : كانك تبي دالين اقطع الشر
ضيدان ضحك بخفه ونطق : محد بيقدر يمنعني من دالين الا الموت لا انت ولا ابوها ولا حتى امها بتقدرون
صقر بحدة وهو يشّد ع ياقة ضيدان : اذبحك ولا يرَف لي رمش !!
ضيدان ابتسم وقال : اخذ البندري اجل ؟ اقرب لي ترا وعقاب م بيرفضني
صقر سحب يده وضرب وجه ضيدان وطاروا عقاب وضارب وقداح له ، صقر بحدة : تخسى وتعقب م شّديتها !!! وبعيدة عن شواربك تسمعع !؟
اسر بحدة : صقر تعوذ من ابليس !!!
ناصر سحب صقر مع هيثم يساعده ، ضيدان قام وقال : يرجال م حصل شيء بس خل كلامي حلّق بأذنك تعرفني اسويها
صقر فزّ من بينهم ، دمه يحترق وعروقه برزت صرخ وقال : فكوووني !!!
اسر بصراخ : وجع انت وياه عيد عيد !!!
عقاب بحدة وعيونه تطلع شرار : ضيد !! وش العلم
ضيدان مشى للمغاسل يغسل فمه من الدم ، عقاب اشر لهم كلهم ونطق بحدة : داخل م حصل الا الخير ادخلوا
دخلوا الرجال والشيبان كلهم ونطق عقاب : اسر طلع صقر برا
صقر : والله م اطلع !!
عقاب بحدة : ولعنة طيب !! لعنة تلعنك وتلعن ضيدان امش داخل ولا اسمع لك حسَ !!
مشى صقر مع هيثم يدخلون المجلس ودخل اسر وعقاب وراهم ، مسح وجهه ولف من شافها تطالع فيه ، ابتسم واشر لها تجيه ، مشت تسبقه ورا البيت ومشى يلحق خطاها ، وصل وشافها بفستانها الاحمر وكشختها المميتة ، يحلف يمين انها اقوى آلم من ضربة اخوها صقر ، شهقت وفزّت تمسك شاربه وشفايفه ، سحبها مع خصرها ورفعها له ، لامس طرف خشمها وهمس : تتزوجيني ؟
دالين برعب : وشفيك طيب !؟ الصراخ والصوت منكم ؟
ضيدان ابتسم وقال : انتي توجعيني اكثر من آلم الرصاص والسكاكين والجروح ! وقسم بالله انك اقوى منهم كلهم يالفاتنة !
دالين ابتسمت وابعدت بس سحبها ضيدان وقال : م تروحين لين تعطيني جواب تتزوجيني ؟
هزت راسها بنعم وفزّ ضيدان يبوس خدها قريب من مبسمها ، كان منحني ومحاوطها وم قدرت تبعد ابدًا ، ابعد عنها وقال : احبك احبك واحب اللي يحبك واحب اللي تحبينه  ولو انه الدّ اعدائي اموت فيك واهواك واعيش معك حب م هويته لبني ادم قبلك انتي توسدتي عرش قلبي ولا احد نافسك ولا بيجي من ينافس ي فاتنة بن حثلين
ابتسمت وابعدت ترفع شيلتها ع راسها وتمشي من جنبه ، رجعت ومدت له فنجال قهوة ، ضحك وقال : وشذا ؟
دالين رفعت جوالها وقالت : بكتب قهوتي نهار العيد مع زوجي المستقبلي كيف ؟
مسك خصرها وقال : صوري ي الموت الحمّر
صورت ومشت تتعداه تدري انه مدح لون فستانها ودالين م تعرف ترد ع المدح واكتفت بالصمت ، مسك قلبه وقال : اذا م خذيتها قبل امشي م اكون ولد صالح
مشى يرجع للمجلس ناويها نيّة وياهو ي صقر ..
" في بيت ماهر بالشرقية " ~ اخر ظهور لهم ~
بعد رضى ابو دانه وحفلة بسيطة انتهت بخروج دانه زوجة لماهر رسميًا برضى اهلها واهل ماهر ، ع اطلالة البحر طلعت وشافته من اللطيم ع الشاطي ابتسمت وجلست وقالت : ماهر
لف عليها ونطق : لبيه ؟
دانه : تعال ابيك بشيء
مشى يتبعها ووصلوا لممر مُضيء بالشموع ، ابتسم ودخل وراها شاف جلسة وسادات ع الارض ويتوسطها صندوق ، ضحك وقال : وش ذا ؟
دانه جلست وقالت : دام بكره العيد واهلنا بيجتمعون عندنا قلت اعايدكم قبلهم كلهم
ابتسم بوسع ثغره ومشى يجلس ، مسك يدينها وباسهم وقال : اذا اللي داخل هدية اعرفي انتس اعظم هدية جاتني بحياتي وتعطين من زود يروحي
ضحكت وقالت : افتحها ولا تكثر حكي
ابتسم وفتحها يشوف صورهم ايام الاسطبل واول سباق خاضته دانه واخر سباق لمّا حضنها قدامهم كلهم بصورة جميلة جدًا ، ابتسم يرفع الصور وشاف اخر صورة طباعة سونار لجنين ، رفع راسه ونطق بدقن راجف : لا !
قطّرت دموعها وبكت علطول وقالت : انا حامل
ماهر بكى علطول وحضنها ، حاوطته وهي تشاهق مبسوطة ، هي ثبت حملها بعد شهر وشوي من الوصّل ، ضحكت وقالت : يكبر حظوظي فييك !
ماهر باس كتفها وقال : اجل انا مو محظوظ ؟ الله يخليتس لي زوجة وحبيبة واخت وسند وام عيال بعد
ابتسمت وقالت : اذا بنت وش نسميها واذا ولد وش نسميه ؟
ماهر ابتسم وشّد ع ذراعها وقال : اذا ولد بسميه طلال..
قاطعه صوتها وهي تقول : احلف ؟ بنبدأ بأسماء اباءنا اذا ع كذا بسميه ملهم احلى من طلال !
ضحك وقال : اسمعي يبنتي اذا بنت بسميها لؤلؤة ويصير معنى اسمتس مرتبط بأسمي
ابتسمت وقالت : ادري اني خفيفه بس رضيت خلاص
ماهر باس خشمها وقال : يزيين خشتتس بس
ضحكت وقالت : يحيوان وش خشة ؟؟
ماهر توسعت عيونه وضحك بعّلو صوته وقال : والله مدحة
دانه : ايه اشوا
جلس يتأمل الغيوم الخفيفة والبحر قدامهم ، ضحك وقال بفرحة : اتوقع انتهت قصتنا هنا ؟ بكل حب اقولتس اني احبتس يبنت ملهم ولا عاش من يخونتس وانتي فالحفظ والصون زوجة لي وروح ثانية اشيلها م حيّيت
دانه ابتسمت وقالت : بأحضان بعض وبيننا جنين الله يتمم ونشوفه يكبر ويكون دليل حبنا وحب حايل لديار نجد !
شّد عليها وابتسم وابتسمت تشوف يدينه تحاوطها بكل حب منه ووفاء ، حمدت ربها عليه وشكرته مثل ماهو يدّعي لها بنفسه ويدّعي لهم ولحياتهم البعيدة ..
•انتهّت قصِة ولَد حايِّل وبنِت نَجّد•
" في بيت جديد بيت هتّان " ~ اخر ظهور لهم ~
جالسين قبّال بعضهم فصالة بيتهم ، ابتسم وقال : يعني انتي اللي بديتي ولا م كنت صوبك حتى
ديم ضحكت وقالت : قصدك الحضن ؟
هز راسه بنعم وهو يتأملها وكملت وهي تقول : مقدر تحمست مع دانه واشعلت فتيلة الحُب بيننا
هتان : اصلاً كنت قدّ كذا
وقارب بين ابهامه والسبابة وكمل : واعترف لك بس كويس جات منك حافز للتقدم يبن سلطان بن جمعان وجيتكم ووافق ابوك وتيّسرت
ديم ابتسمت وابعدت وهي تقول : الكيكة احترقت وانا جالسة اسمع سوالفك
هتان : ماش رفلة
دخلت وهي تشّتم فيه وصوت ضحكاته انتشرت بالبيت ، طلعت بعد مدة وقالت : شراييييك بالله م اني كفو ؟
لف ونزل جواله وابتسم وقال : ماشاءالله لا سنعه سنعه
ديم ضحكت وقالت : اتعبك معي انا
هتان : بس ناقصها الزينة
ديم : ايه جبتها تزين معي ويطلع منك فايدة
هتان ابتسم واشر جنبه وقال : تعالي جنبي
مشت ونزلت القالب بالكيكة وطلعت الاغراض وبدؤوا يزينون كيكتهم للعيد وبعد انتهاء تقدم وباس راسها وقال : كل عيد ان شاءالله وحسّك فالبيت وعن عيوني م يغيب
ضحكت بخجل وقالت : وانت يحبيبي وكل عام وانت بخير وصحة وسلامة يارب
حضنها بشّدة يحلف انها سكنت بضلوعه بنفس الحضُن ذا بس بطريقة عفوية ولا غادرت فكره ابدًا ولا بتغادر ..
" في بيت ابو فهد "
دخل المجلس وجلس جنب عقاب ، لف عليه ونطق : انت بخير ؟
ابتسم ضيدان وهز راسه بنعم ، عمّ الهدوء المجلس بعد دخوله وتقدم وقال : انا طالب القرب ي اهل مساعد
لفّوا كلهم من نطق بصدمة ، كمل ضيدان كلامه وقال : واخصّ بكلامي ابو فلاح
فهم ابو فلاح لأنها م هي اول مره يخطب فيها ضيدان سواها قبل وكان الرفض من البنت ، ابتسم وقال : والله ونعم يبو صالح بس بنتنا رافضة
ضيدان : جربت تسألها ؟
فلاح ابتسم وقال : جربنا وشفت بعيونك طريقة رفضها
ضيدان ضحك بسخرية وقال : وانا من حقي اعرف اجابتها ع تقّدمي الثاني ليدها وابسط حقوقها هي تعرف وتقرر
صقر بحدة وعيونه تطلع شرار نطق وقال : مالك بنت عندنا
ضيدان : كلامي مع الشيبان واخوها الكبير
كان بكلمته ذي يسّكت صقر اللي صدّ بقهره ، تكلم ابو فهد وقال : والله ونعم الرجال ضيدان وتستاهل كل خير وابد الحين نروح نسأل البنت ويجيك العلم
ضيدان وقف ع رجوله وقال بجدية : طيب خلوني اوضح لكم كل شيء من البداية
الكل كانوا اذان صاغية له ويسمعونه كلمة وحدة وحرف واحد ، اخذ شهيق وزفره بتوتر وقال : انا يتيم الام والاب ولا عندي اخوان ولا خوات ولا عزوة اشّد ظهري فيها م عندي الا الله ثم شايبن كلاه الدهر والتجاعيد كسّت ملامحه لا اعرف لا عم ولا خال ولا قريب حتى مجرد نسل وهذا اللي عرفته اني من ال حثلين ، بعد الله سبحانه ربي سّير لي عقيب وصار لي اخو وسند وعزوة وحزام فالرخاء قبل الشّدة
ضحك عقاب وقال بحدة صوته : احتزم ي ضيد !
شّد ضيدان ع كتف عقاب وكمل كلامه يقول : والله اني من اول طامع فالنسب حقه لكن صعبة اني اطلبه خواته لأني اعدّهم خواتي ولا قدرت ابعد عنه واخذ لي بنت حلال من بعيد وجيت عمي سالم وردّني وشوفوني كلكم واشهدوا ع كلامي اني جيته وتقدمت مره ثانية وعساه م يرّدني مثل تالي
ابو فلاح ابتسم وقال : زلينا وكان الطلب في وقت صعب لبنتي
ضيدان : انا مقدر كل شيء والله العظيم وان كان جات الموافقة تراني بمّلك وامشي بالبنت لبيتي
قاموا هيثم وصقر وفلاح بقوة واختلف قولهم من : ايش !! ، تستهبل ؟ ، تعقب !!!
ابو تركي بحدة : وجع جعلك الوجع انت وياه اجلسوا واسمعوا الرجال ليّن يخلص كلامه !!
جلسوا وابتسم ضيدان وكمل يقول : م ابي عرس م تحضّره امي ولا خواتي يزفوني ولو انكم موجودين م تقصرون بس محد يغطي محل الام والاب والخوات والأخوان ودي اني اخلص بسرعة وامشي
اسر ابتسم وقال : الله يجيب الخير
ابو فلاح قام وقال : الله الله ابد اعراسنا قبل كانت كذا نوقع ونمّلك ونروح بحريمنا وابد الان اكلم بنتي ونعطيك خبر تجهز قبل نمشي للرياض
مشى صقر قدامهم وضرب بكتف ضيدان يطلع من المجلس وعلطول سحب جواله واتصل ع دالين ، ردت علطول وقالت : هلا صقر ؟
صقر بحدة : شوفي ان وافقتي ع ضيدان والله لأذبحه وعينتس تشوف !!
دالين شهقت بقوة وقالت : مجنوون انت !
صقر : م عندي شيء اخسره البندري واضحة الامور بيني وبينها وحياتي منتهية والله اسويها !!!
دالين بصدمة : شدخلك ! تبي تخرب حياتي ؟؟
صقر : اجيب لتس عريس احسن من ضيدان السلقة ذا اللقّيط !
دالين ابتسمت وقالت : انا راضية فيه بكل حالاته وعيوبه ولو انكم عبتّوها انا اقبّلها له واداويها !
تركت صقر ع الخط تشوف ابوها قدامها وفلاح وفعلاً نقلوها لها الخبر وابتسمت براحة بالها ونطقت : انا موافقة يبه
ابو فلاح ابتسم وقال : حمدلله والله يتمم ع خير يبنتي
رفعت جوالها وقالت بتحدي : اعلى م في خيلك اركبه !!!!
سكرت بوجهه الجوال وشافت ابوها وفلاح اللي تقدّموا يسلمون عليها ، فلاح بسخرية : اعرستي يالنتفه قبل صقر وهيثم !!
دالين ابتسمت ابتسامة عريضة وقالت : حظ ونصيّب !
فلاح باس راسها وقال : الله يجمع بينكم ع خير يارب وحُب وحنان وامان
دالين رفعت راسها تبوس راس اخوها الكبير ونطقت : امين
ابو فلاح : هيّا نقول للرجال يستعجل
مشت تدخل تاركتهم ، ومشوا للمجلس راجعين ووقفوا بصدمتهم من سمعوا طلق النار اللي انفجر من مسدس صقر لصدر ضيدان قدام عيونهم كلهم ، صرخوا الحريم رعب لأنها م هي طلقة ترحيب ابدًا ، وفزّوا الرجال فازعين لجسد ضيدان الطريح ع الارض ، صرخ عقاب بوجه صقر : وش سويت انت !! والله ي صقر اني لا اندمك ع ضغطك للزناد والله لأسحبك للسجون ولا كأن انخلق بيننا دم ولا ابن عم !!
رفع طرف ثوبه وركض بكل سرعته خارج اسوار بيت ابو فهد تارك الكل وراه هو فعليًا يدري ان معاد وراه شيء يخسره وبعد فعلته الشنيعة قرر انه يهرب ..
" فالرياض بعدها بساعات طويلة ، مُنتصف الليل "
تالين واقفة في ممرات القصر وعاضّه ع اصبعها بتوتر ، بيدها الثانية جوالها ومثبته ع اذنها وكل شوي تسمع صفارة " عزيزي المتصل .. " زفرت بتوتر وقالت : يمه اكيد فيه شيء صاير شدعوة محد يرد !!
ام تالين بتوتر وربكة : اللهم استرنا بسترك يارب !
رفعت جوالها مره اخيرة واتصلت ع اللي مفروض يزفها الليلة عروس له ، وبعدها بثواني مّالت للدقايق رد ووصلها صوته وهو يقول : هلا تالين ؟
تالين فزّت من مكانها ونطقت : ترركي !!
زفرت ام تالين براحة وقالت : حمدلله اسأليه وينه !
تركي : لبيه ؟
تالين بحزن وضيقة ودموعها اخذت مجراها : ويينكم ؟!
تركي ابتسم وقال : تبكين ؟
تالين مسحت دموعها بعنّف وقالت : لا لا وينك ؟
تركي : قريّب
تالين : وين فيه بسرعة قول لي
تركي ابتسم وقال : والله قريّب تجهزتي ؟
تالين ضحكت بسخرية وقالت : لي من العصر بفستاني !
تركي : طيب يحلوه نزليه وامسحي مكياجتس ونامي الزواج تأجل
تالين شهقت ونزلت دموعها بحرقة وقالت : اييشش !!
فزّت ام تالين برعب وقالت : بسم الله يبنت وشفييتس !؟
تالين ضحكت بصدمة وقالت : تأجل الزواج !
ام تالين تقدمت وسحبت الجوال وتكلمت : تركي !
تركي بتعب نطق : سمّي يعمة ؟
ام تالين بحدة : الحين تقولي وش صاير عندكم
تركي : ضيدان تصاوب من ولدتس صقر ولا ندري هو حي ولا ميت لنا من الظهر اليوم ننتظر ولا احد طلع من غرفة العمليات !
ام تالين بصدمة شهقت وقالت : لا حول ولا قوة الا بالله !!
تالين بكتّ زيادة وقالت : يمه وش صايير احد مات !؟
ام تالين لفت لبنتها وهمست : ضيدان
تالين شهقت وطاحت تبكي منهارة ، ام تالين رجعت ترفع الجوال لأذنها وتكلمت : ودعناكم الله وطمنونا لعاد تقفلون جوالاتكم
تركي : ابشري وترانا جايين كلنا لأنهم نقلوه للرياض
ام تالين : اييه ازيين الله يلطف به يارب
تركي : امين يارب امين وتكفين وداعتتس تاليني
ام تالين ابتسمت وقالت : معليه تجيها بعد شوي
تركي ابتسم وقال : اجيها ليه م اجيها والله لا اطوي طريق الديرة للرياض واجيها ولو انها ابعد عن عيني لكن حرام انها بين ضلوعي ودموعها ذي كسّرتني ضلع ضلع
ام تالين ضحكت بخجل وهي م كانت المقصودة ونطقت : الله يخلييك لها يولدي واستودعناكم الله
سكرت ومشت لبنتها تحتضنها ، المفروض م شيء صار والحين دّقت ساعة الزفة وشافوا تركي وتالين بالبشّت الاسود والفستان الابيض ، ساعدتها خديجة تنزل فستانها وتبَدل للبجامة وطاحت ع فراشها ميته بكاء ، كان المفترض تحضن تركي وتنام بأحضانه زوجته وحليّلته فالليلة ذي بدال الوسادة اللي امتلّت بدموعها ، الكل مُستاء فالليلة ذي ومحد انهلك كُثر دالين وتالين ..
" فالصباح اليوم الثاني "
الكل مجتمعين بالحوش فالجلسة الرئيسية قدام القصر ، والكل ساكت ويسمع تعليمات عقاب ، مسح وجهه بغضب ونطق : اذا مات ضيدان بعيد الشر عنه بذبح صقر ولا بهتم !
سكتوا كلهم من عصبيته وكمل يقول : اصلاً مدري وش كان يفكر فيه !؟ حاسد اخته مثلاً !! ولا مقهور انها خذت واحد ارجل منه !!؟
ابو فلاح استغفر وصّد بوجهه بعيد ، اسر قام وقال بهمس : خلاص عقاب طمنا انا بسكر
عقاب : معسلامة
قفل اسر وقال بجدية : اقّلها الحمار ليه هرب ؟ ماهو واثق من نفسه فشلنا !
ناصر ابتسم وقال : اكيد بيهرب قاتل له واحد !
فلاح بهدوء : م قد طلعت لنا شهادة الوفاة
اسر لف بحدة وقال : وتنتظرها شيخ فلاح ؟!
فلاح رفع راسه وقال : م بيصير الا الخير واللي كاتبه ربي
ابو فهد قام ع معكازه وقال : ونعم بربي !! اذكروا الله وادعوا له بالشفاء ان شاءالله ان ربي بيلطف به
اسر : يارب
الكل همسوا بالدعاء لضيدان والشرطة م زالت فالبحث عن صقر اللي كمل يوم مختفي عن الانظار وكأنه مخطط لهالشيء من بدايته لنهايته ..
" عند البنات "
ضحى بحدة وهي ترجف برعب : يمه يمه ياربي وشذا اللي صاير وشلون بقول لأخواني ؟!
الميلا بصدمة : اصلاً شلون سوا كذا !؟!
دالين بحدة وصوتها راح من الصراخ امس : يعني المقصد من كلامه امس هو انه يخطفها ؟؟
الجود شّدت ع راسها ونطقت بصدمة : عقاب بينهي حياة صقر ! بعد م فرط بخويه والحين خاطف اخته !؟
غزيل ضحكت وقالت : اقسم بالله انه ماهو بصاحي !!
ضحى جلست برجفتها المرعبة ، هي من يوم جات للدنيا وهي ملزومة بعناية البندري اللي تكون اصغر منها ، زفرت برعب وقالت : يارب انها بخير صرت م اضمن صقر
دالين مسحت دموعها بعنّف وقالت : م لمتتس محد ضامنه ابد !!
الميلا مشت تطلع وقالت وهي تمشي : ضروري يعرفون اقّلها نعرف وين مكانها قبل يبتعدون
ركضت تالين ومسكتها وقالت بهمس : ميلو انا واثقة بصقر مستحيل يأذي البندري هو يحبها حّب والحبيب م عمره اذى حبيبه !
الميلا بجدية : تستهبلين ؟؟ اطلق ع ضيدان..
تالين بترجي : والله ادري والله بس ضيدان م يعرفه وهو اللي استفزه من البداية هيثم قالي ويمكن م صار فيه شيء وانتظري وعد مني اذا صار شيء لضيدان بعيد الشر اني لأتكلم بس انا اضمن لتس البندري وشهي عند صقر وخاطر صقر !
الميلا : براحتتس بس ع مسؤوليتتس !
مشت ودخلت داخل الغرفة ولحقتها تالين علطول ..
" فالمستشفى "
طلع الطاقم الطبي وفز عقاب يركض ونطق : بشرني !!
الدكتور : بخير نحمد الله ونشكره بس يحتاج راحة طويلة الامد ليّن م يستعيد عافيته
عقاب زفر براحة وقال : يارب لك الحمد والمنة متى اقدر اشوفه ؟
الدكتور : اذا حان الوقت طلعناه للقسم وتقدرون تزورون حاليًا خطير ع صحته
عقاب : لا لا بسيطة خارج من الشر ان شاءالله
الدكتور : بأذن الله
مشى وسحب عقاب جواله واتصل ع اسر علطول ووصله صوته وهو يقول : بشر !؟
عقاب : حمدلله ابشرك بخير نحمد الله ونشكره بس ظني بيأخذ وقت يتعافى
اسر ابتسم وقال : ذييب ذيب بن حثلين والذيب م يموت !!
عقاب ابتسم وقال : اشهد بالله انه ذيب !
اسر : بس صقر وش بيصير عليه ؟
عقاب : طبّه عندي
سكر عقاب ورجع يجلس يريّح له ساعتين ، قفل جواله وحط يده ورا راسه وسرعان م غفى ..
" عند صقر والبندري "
نزلها من السيارة وعيونها مغطّية بقماش ويدينها مربطة ، مشت ونطقت بتعب وصوتها المبحوح : انت مييين !!
صقر ابتسم بهدوء ومشى معها يدخلها داخل البيت ، دخلت وبغت تتعذر بالدرج بس نطق وقال : انتبهي !
وقفت الحياة عن الحركة برأس البندري ووقفت بصدمة وقالت : ص..صقر ؟
صقر ابتسم بآلم وقال : بتتزوجيني وتنقذيني من الجحيم اللي انا فيه !؟
البندري بحدة : شّيل الغطاء من عيوني شّيل !!
سحبه من عيونها وسرعان م تفلت في وجهه ونطقت بقسوة وحدّة : شّيل خلني اشوف سواد وجهك !! وفعايلك فيني وفي اهلي ؟ هذا وانت ولد عمي وش خليت للغريب !!؟
صقر مسح وجهه وشنبه وقال : انا شجاع..
البندري بحدة : تعقب !! تعقب ولا حّولك رجوله الله يسود وجهك وتبيني اتزوج واحد ماهو برجال !
فزّ صقر ومسك فكها وضرب ظهرها وراسها بالجدار اللي وراها ونطق بحدة وعيونه تطلع شرار : وم زلتي صاملة ع السبب اللي ترك بيننا هالفراغ !! انا رجال وانتي ادرى برجولتي !
البندري ضحكت بسخرية وقالت : وش ادري به يحسرة ؟ ادري بسواد وجهك وفعايلك وخطفك لي ؟
صقر : لأني اهواتس وانتي تدرين..
قاطعته البندري بحدة : يلعن ابوه من هوى وحُب ع حسابك يشيخ !! ليتك مت ولا شفت منك ذرة حُب !!
صقر نزلت دموعه ووجهه جّامد بدون اي شعور ، قربت من وجهه وقالت : ظنيتني عشقت لي رجال بيحرق الدنيا لا نزلت دمعتي ، وظنيت اني هويت لي رجال بيكسر قلوب وخشوم رجال يكسروني لكن طلعت خيخه م تسوى التالية من الغنم !!
ابعدت من ومشت تتجول بالبيت الفاخر اللي هي فيه ، م تدري هي وين وبأي ديار تقع م شافت من جات الا هالبيت اللي كسّاه البياض ووجه صقر ..
" فالقصور "
جالسين بعد اذان العشاء فالحوش كلهم ، لفّوا من دخلت سيارة عقاب ونزل منها ، فزّوا له كلهم واقفين وابتسم من بعيد وقال : ابشركم ان ضيدان طيب وبخير
ابو فهد ابتسم وقال : يالله لك الحمد ياربي
عقاب : اسمحوا لي اروح اريّح لي شوي
مشى ولحقه اسر يركض ونطق : عقاب
عقاب ابتسم وقال : يُمنى عقاب وسنده ؟
دخل اسر تحت ذراعه ونطق : سمّ وامرك ولبيه
اسر ضحك وقال : بكره مهمتي
عقاب : يوه مسرع ؟
اسر : والله هذا اللي حاصل
عقاب : ابد توكل على الله
اسر ابتسم وقال : باقي بتتوسط لي ؟
عقاب ابتسم واشر بأصبعه ع خشمه وقال : ع ذا الخشم يبو كنوز
اسر : عسى الله يبشرني بكنوز ع جّيتي
عقاب ابتسم وقال : كنوز ارض وكنوز بنتك كلها
اسر ابتسم وقال : كلمة بنتك حلوة يخي !
عقاب ضحك بخفه وقال : الله يتمم ع خير يالعضييد
مشى عقاب يدخل ورجع اسر يطلع للحوش مع الباقيين ..
" في جناح عقاب "
دخلت وهمست : موجود ؟
الخادمة برعب وهي تستعجل : ايوه ! شوي انا خلص بعدين اطلع
الجود : استعجلي طيب
:::::::::::::::::::::::::::::::::::::::::::
انتهى البارت ادعموني بنجمة وكومنت عشان اتحفز اكملكم ❤️
( ارحبوا يحباااااني رجعنا ببارت جديد ، عطوها حقها ولاتنسون النجمة 🥹 )