ကာရံညီညာက လက်ထဲမှ ကော်ခက်ရင်းလေးကို ဖိဆုပ်ရင်း ငြိမ်နေမိသည်။
" အင်းနော် ... သူတို့ခံစားချက်ဆိုတော့လည်း အပြစ်ဆိုရလည်း အခက်သားနော်။ ထားပါ ... ရှင်ကလည်း သူများသားသမီးကို ပြောမနေပါနဲ့။ "
ဒေါ်ခင်ချိုက ပွစိပွစိပြောပြီး စာရင်းစာအုပ်တွေဆီ လက်က ပြန်ရောက်သွားသည်။
" ခင်မီကျော့်လိုလည်း မလုပ်ကြနဲ့ဦး။သဘောကျတဲ့သူရှိရင် အိမ်အရင်ခေါ်လာ။ငါတို့နဲ့ အရင်တွေ့ပေးပြီး ကောင်း၏၊ဆိုး၏ ဆုံးဖြတ်ပေးမှာ။အိမ်ထောင်တစ်ခုက လွယ်တာမဟုတ်ဘူး။ကြားလား ... ဟိုနှစ်ယောက်။ "
စာအုပ်တွေ ထပ်နေရင်းမှ ဒေါ်ခင်ချိုက ထပ်ပြောလာပြန်တော့ ကာရံညီညာနဲ့ ခင်မီဇော်က ' ဟုတ်ကဲ့ ' ဟု ပြောကာ ခေါင်းငြိမ့်ကြသည်။
ကာရံညီညာက ကျောက်ရုပ််ချထားသလို ထိုင်နေပြီး ဦးမြတ်သာကိုသာ ခနခန ခိုးကြည့်နေမိသည်။ဖခင်ဖြစ်သူက စိတ်တိုခဲကာ စိတ်တိုဒေါသထွက်လာရင်လည်း တစ်ဆုံးထိပင် ဖြစ်သည်။ဒီရက်ပိုင်းအတွင်း စိုင်းစွမ်းထက်ပိုင်နဲ့ ကိစ္စ ပြောဖို့ စီစဥ်ထားပေမယ့် အခုတော့ဖြင့် ဘယ်က ဘယ်လို စရမှန်းတောင် မသိတော့ပါ။
" အဆင်ပြေသွားမှာပါ။ "
ခင်မီဇော်က အစ်ကိုဖြစ်သူ၏ လက်ကို လာကိုင်ရင်း နှစ်သိမ့်သလို ခပ်တိုးတိုးပြောလာတော့ ကာရံညီညာက ခေါင်းငြိမ့်လိုက်သည်။ စိတ်ထဲတွင်တော့ ခဲဆွဲသလို လေးလံသွားတာ အမှန်ပင်။
.......................
" ကိုကိုလေးလို့ ခေါ်လို့ရလား ဟင် "
ငွေလသာက စိုင်းရတုဟန်ကို ကြည့်ကာ မေးလာတော့ စိုင်းရတုဟန်က တဟားဟား အော်ရယ်သည်။ စားသောက်ဆိုင်ထဲမှာ ထိုင်နေရင်း ရယ်စရာ မပါပါဘဲ ပေါင်တွေကိုတောင် ကုပ်ဖဲ့ပြီး စိုင်းရတုဟန်က ရယ်နေတာမို့ ငွေလသာက နည်းနည်းနေရခက်သွားသည်။
" မင်းက ဘာလို့ အဲ့ဒီလို ခေါ်ချင်တာလဲ။ "
" ဟို ... အစ်ကို့ရည်းစားကောင်မလေးတွေက ကိုကိုလို့ ခေါ်ကြတယ်လေ။ အဲ့ဒါ သူတို့နဲ့ မတူချင်လို့ ကိုကိုရဲ့အနောက်မှာ လေးနက်ခြင်းဆိုတဲ့ အဓိပ္ပါယ်လည်းပါအောင် ကိုကိုလေးလို့ ခေါ်ချင်တာ။ ဒီနာမည်ရဖို့ နှစ်ည ...နှစ်ည စဥ်းစားခဲ့ရတာ။ "
YOU ARE READING
First Love , Perfect Love (Completed)
RandomMyanmar×OC အချစ်ဦး၊အချစ်ဆုံး၊လက်တွဲဖော်ဟာ တစ်ထပ်တည်းကျသောအခါဝယ် 8.2.2023 ___ 8.4.2023