القلوب مُشتاقة

الحلقة (١٣)

علياء | بتتصل علي يوسف
علياء ' بابتسامة ' : صباح الخير
يوسف : صباح النور
علياء : اما كلمتني كنت نايمة
يوسف : قولت كدة
علياء : مالك .. انت كويس
يوسف : اه تمام
علياء : بتعمل ايه
يوسف : بره هخلص ونتكلم تمام
يوسف | قفل الموبايل وحطه علي الترابيزة وبص اودامه
يوسف : خلصتي اكل
نادين 'هزت دماغها ' : مين اللي كان بيكلمك؟
يوسف : شغل
_______________
فاطمة | بتلعب في الموبايل ومركزة فيه
انجي | بتبص علي موبايل فاطمة وبتشوفها بتعمل ايه
انجي : فاتحة صورة يوسف ليه
فاطمة ' اتوترت وبتداري الموبايل ' : لا عادي هو منزل صورة وهي ظهرت
انجي : انا اول مرة احس فعلا ان اللي بيصبر بينول
فاطمة : ده ليه
انجي : علياء دايما رافضة الصحوبية والارتباط ومقتنعة انه نصيبها هيجيلها هيجيلها لحد اما قبلت يوسف
فاطمة : متهيالك يوسف بصباص
انجي : ليه كان بصبصلك
فاطمة : ليه هو انتي مشوفتيش كان بيبصلي ازاي في فرح بسمة
_______________
بعد ايام ..
في شقة بسمة وسط عيلة علياء وعيلة خالد ..
الكل باصص علي التليفزيون بيتفرجوا علي فيديو الفرح
ام علياء ' بتخبطها في رجليها ' : عيب كدة كفاية بحلئة في الموبايل
علياء ' بترجع بعينيها عالموبايل ' : حاضر حاضر
علياء بتكتب رسالة والضحكة علي وشها  ' ماما مش طيقاني وهتقوم تولع فيا '
يوسف رد عليها وهو بيضحك ' لو مش عاوزينك انا عاوزك '
علياء ' ده انا بتتلكك بقي لا هما ميقدروش يستغنوا عني '
يوسف ' ولا انا كمان اقدر استغني عنك'
علياء بايموشنات ضحك ' هتعلوا علي بعض '
كريم | عينيه عليها وملاحظ انشغالها بالموبايل ..
مامت كريم : انتي يا علياء اخر سنة مش كدة
علياء ' سابت الموبايل وبابتسامة : ايوة يا طنط ادعيلي
مامت كريم : ربنا معاكي ي حبيبتي ونفرح بيكي
كريم | بص لمامته
مامت علياء : يارب وتفرحي بكريم
مامت كريم : يارب عقبال ما نفرح بيهم هما الاتنين
علياء | ابتسمت وبصتلهم ورجعت بصت لكريم لقيته باصص عليها ، ابتسمت له وبعدت عينيها عنه
________________
غادة ' خارجة من مكتب يوسف ' : انتي هنا ، عاوزة انم شوية
علياء : انا فاضية يالا بينا علي فوق
غادة : هودي الملف ده لسامح واحصلك
قاطعهم |  صوت كعب جزمة بنت جمبهم ، رايحة ناحية باب مكتب يوسف
غادة ' بصت ، بتنهيده ' : هاااه بدأنا
_ جريت غادة عالبنت توقفها قبل ما تدخل المكتب
علياء | استغربت خضت غادة وجريها عالبنت ، بصت عليها كانت ملامحها مش غريبة ' ديه نادين !!! '

____________________
يوسف | في مكتبه وبيزعق في الموبايل
يوسف : هو انا قايلك ايه
هنا ' بتهديه ' : يا يوسف اسمع بس
يوسف : هنا هنا انا مش فاضي
هنا : طب استني يا يوسف ما هو ده مش اسلوب
يوسف : سلام
هنا : خلاص هجيلك النهاردة
يوسف : ذي المرة اللي فاتت .. لا يا هنا
____________________
نادين 'باستحقار ' : في حاجة
غادة ' وقفت اودامها ' : سوري يا نادين مستر يوسف مش فاضي
نادين ' ابتسمت ' : هيفضالي
علياء | واقفة بعيد عنهم بخطوتين
غادة ' بتوقفها ' : هو قالي ان ماحدش يدخلوا هو بيخلص شغل وعنده ميتينج مهم
نادين : خلصتي كلامك
غادة ' بنفاذ صبر ' : ايوه تقدري تتفضلي وانا هاقوله انك جيتي
نادين : اوعي من اودامي عشان انا كدة كدة هدخل
غادة : انا اسفة مش هقدر ادخلك
نادين : انتي ازاي بتتكلمي معايا كدة
علياء | بتحاول تتمالك وتكتم غيظها بس مقدرتش
علياء ' لنادين ' : انتي اللي بتكلميها كدة ليه
نادين ' بصت لعياء وطبطبت علي كتفها ' : بس يا ماما
' وجهت كلامها لغادة ' اوعي من اودامي
علياء ' اتكت علي سنانها ' : لا والله انا مش ماما وهي لحد دلوقتي مغلطتش فيكي
نادين ' بضحك سخرية ' : وهي تقدر تغلط فيا
علياء ' ابتسمت ' : اكيد تقدر بس هي بتحاول توصل معاكي لنقطة انك تفهمي ان مستر يوسف هو اللي مانع انك تدخليله مش هي
نادين ' بنرفزة ، وهي بطبطب علي كتف علياء ' : طب امشي من وشي انتي كمان
علياء ' بتكتم غيظها ' : هو انتي مبتعرفيش تتكلمي ببوقك ، بس ما دام انتي مبتفهميش غير كدة ' طبطبت علي كتفها ' تقدري تتصلي بيه ولو قال انك تدخلي ابقي ادخليله
يوسف ' قاطعهم ، بفتح الباب ' : ايه الزعيق ده في ايه
يوسف | اتصدم بوجود نادين وعلياء ، وعينيه جت علي عين علياء وهي واقفة مضايقة مربعة ايديها وبتهز في  رجلها
يوسف ' لنادين ' : بتعملي ايه هنا
نادين : قال ايه مش عاوزني ادخلك
غادة : انا كنت بمنعها من الدخول ذي ما انت قايل وعلياء من غير متقصد لقيتها بتكلمني وحش ف اتدخلت بس صدقني هي مكنتش تقصد
علياء ' بجراة ' : لا كنت اقصد
نادين : ماهو عشان
يوسف ' قاطع نادين ' : تمام تمام ، ادخلي يا نادين
علياء | رفعت عينيها عليه وكانها بتقوله ' تدخل !! '
نادين | بصت لغادة وعلياء وهي بتبتسم بسخرية
يوسف : حقكم عليا انا
يوسف | داخل ورا نادين ، وهو باصص لعلياء ومش عارف يقولها حاجة ..
___________________
في بيت علياء
علياء ' بترد بصوت نايم ' : ايوة يا يوسف
يوسف : انتي مش نايمة متمثليش
علياء ' بتداري ضحكتها ' : لا كنت هنام
يوسف : لسه زعلانة
علياء : لا
يوسف : يبقي لسه
علياء : لا يا يوسف انا فعلا مش زعلانة الزعل حاجة واللي حصل حاجة تانية انا بس استغربت منين بنقولها لا  ومنين تطلع من مكتبك وتدخلها
يوسف : انا معرفش ايه اللي جابها و كان لازم يا عاليا ادخلها عشان ميحصلش مشاكل
علياء : مافيش مشكلة دخلها و اعمل اللي انت عاوزوا بس ما دام هتعمل كدة يبقي متطلبش من حد انه يمنعها ما دام انت مش هتقدر وهترجع تدخلها عادي
يوسف : صدقيني مكنتش قادر اني ادخل في اي مشاكل  انهاردة
علياء ' بتتجنب غيرتها ' : في حاجة حصلت
يوسف ' سكت للحظات وهو بيحاول يتكلم ، مقدرش ' : ولا حاجة مصدع من الصبح
علياء ' بقلق ' : طب انت كلت ؟!
__________________
بعد فترة بسيطة ..
_ في كافيه قاعدين اودام بعض
علياء | بتفرج يوسف علي فيديوهات علي موبايلها
_ موبايل يوسف محطوط عالترابيزة ورن
علياء | بتبص لقت الرقم متسجل بنادين
علياء : نادين
يوسف ' كنسل ' : سيبك منها يالا وريني
علياء | بصاله وساكته
يوسف : في ايه
علياء : مقولتليش يعني انكوا رجعتوا تتكلموا
يوسف : عشان احنا مرجعناش نتكلم
علياء ' بتداري مشاعرها ' : ولو رجعتوا فيها ايه انا بسال عادي 'ورجعت تشغل الفيديو تاني '
قاطعهم صوت رنة موبايل يوسف ..
علياء | اتنهدت بنفاذ صبر وهي بتتمالك اعصابها
يوسف | اضايق عشان علياء ، وهيكنسل
علياء : رد يا يوسف يمكن في حاجة
يوسف | هيرد
علياء ' بغيرة ' : افتح المايك
يوسف : ايه
علياء : هو كدة
يوسف : اهي المكالمة خلصت
علياء | بصتلوا بصة شر
_ وموبايله رجع يرن تاني
علياء ' ابتسمت ' :  لا ديه حاجة مهمة اوي
علياء | فتحت المكالمة علي نادين ، وداست علي السبيكر
يوسف ' وهو مجبر ' : ايه يا نادين
نادين : هاي يا جو انت فين
يوسف : في مشوار في حاجة
نادين ' بدلع ' : في مشوار في حاجة ، في انك وحشتني
علياء | بصت ليوسف وهي بتحرك شفايفها ' وحشتها '
يوسف ' ضحك ' : نادين انا مش فاضي
نادين : اوكاي انا مستنياك في البيت و بليز متاكلش حاجة بره عشان طلبتلنا الاكل اللي احنا بنحبه
علياء | اتصدمت وفضلت بصاله وساكتة
_______________
منة : بص ياحمزة من الاخر انت مش عارف انت عاوز ايه في حياتك
حمزة : لا انا عاوزك
منة ' بضيق' : طب ممكن متكملش انا طلبت منك وقت
حمزة : ماشي يا منة وانا هثبتلك كل اللي انتي عاوزة تتاكدي منه
منة ' بابتسامة ' : طب هتقوم توصلني ولا لا
حمزة : رايحة فين لسه بدري
منة : هقابل فاطمة ورحمة ومنار
حمزة : انا مبرتحش لفاطمة
منة : وانت ترتحلها ليه
حمزة ' ضحك علي غيرتها ' : مقصدش اقصد ان هي مش مظبوطة يعني الباقيين اذا كانوا وحشين او كويسين بس واضحين تعرفي هما عاوزين ايه ، اانما هي لا
منة 'بتضحك'  : ذيك كدة
حمزة : تصدقي بالله انا غلطان يالا
منة ' بتضحك ' : لا اله الا الله ، خلاص خلاص احكي ليه بتقول كدة
___________________
يوسف ' قفل المايك ورفع الموبايل علي ودنه ' : نادين هو احنا اتكلمنا في ايه
نادين : وايه علاقة انك توحشني واجيلك باللي اتكلمنا فيه
علياء | بتلم حاجتها في الشنطة
يوسف | بيبصلها انها تقعد 
علياء : طيب يا يوسف همشي انا ونبقي نتكلم بعدين
علياء | خرجت
يوسف | قفل المكالمة وخرج وراها
يوسف 'بيمسك ايديها ' : اصبري
علياء : نزل ايديك
يوسف ' نزل ايديه ' : تمام ، انا معرفش هي عاوزة ايه
علياء ' باصة علي موبايلها ' : اما تروحلها البيت هتعرف
يوسف ' بضيق ' : مش عارف اقولك ايه
علياء : مش مجبر تقول حاجة وتقولها لمين اصلا ليا انا ، العربية وصلت  ' بابتسامة مزيفة '  باي اشوفك بكرة في الشركة
يوسف : عربية ايه
علياء : عشان اروح
يوسف : انا هروحك
علياء ' وهي بتسيبه وتمشي ' : لا انت يا دوب تلحق تروح عشان تتعشي الاكل اللي انتوا بتحبوه وانتوا بتتكلموا
_________________
يوسف | سايق العربية متنرفز
يوسف : انتي فين
نادين : ما انا قيلالك مستنياك في البيت
يوسف : ماشي نص ساعة وابقي عندك 
_______________
في بيت بسمة ..
علياء ' بحزن ' : طب ازاي بيحبني وبيكدب عليا ، ازاي يقولي انا مبتكلمش معاها وده يحصل هو بيستغفلني انا هتجنن يا بسمة والله العظيم هتجنن
بسمة : بس لا يوسف بيحبك
علياء ' ب حيرة ' : مبقتش عارفة حاجة
بسمة | خرجت فتحت الباب
منة ' داخلة ' : طفشتي جوزك
بسمة : لا يا ختي هيبات في الشغل عشان كدة كلمتكم تيجوا تباتوا معايا
منة ' شافت علياء '  : هي سهرة نكد باين عليها
___ بعد وقت قليل
بسمة : بروطة اتصلي بالدليفري شوفيه فين عشان جعت  ويالا انتي يا لولو انزلي ارمي الزبالة وشوفي الاكل هاتيه بالمرة
علياء : مش قادرة البس يا بسمة
بسمة : البسي ايسدال ده هنا في العمارة من تحت ماحدش هيشوفك
علياء | كانت تعبانة ومرهقة لبست الايسدال وحطت طرحة الايسدال علي شعرها بعشوائية من غير مراية ..  وخدت الزبالة ونزلت
بسمة ومنة | كاتمين ضحكتهم علي شكل علياء في الايسدال
__ علياء | نزلت ولقت صندوق الزبالة عالرصيف التاني اودام باب العماره عدت ورمت الزبالة وهي خايفة من هدوء الشارع ورجعت بسرعة وهي بتقفل باب العمارة حد مسكه بسرعة قبل ما يتقفل ، اتخضت
يوسف : لما مترديش عليا مش هعرف اوصلك يعني
علياء ' بتاخد نفسها ، بارتباك ' : هو انت ، بتعمل ايه هنا
يوسف : مش جي في الهو ده عشان ادور علي عيلة تايهة
علياء : اومال جي ليه
يوسف : حقك تزعلي بس من حقي تسمعيني وتصدقي اني فعلا مكنتش عارف هي عاوزة ايه
علياء 'بتكابر ' : لا ثواني انت لو فاكر اني زعلانة او غيرانة عشان هي مبتتفهمش غير كدة تبقي غلطان انا مش من حقي اغير عليك انا اللي مزعلني انك كدبت عليا والفرق بينهم كبير
يوسف : انا مكدبتش عليكي
علياء ' بعصبية ' : لا كدبت يا يوسف لما تبقي مفهمني ان مافيش بينكم حاجة وهي مستنياك في البيت ده بيت ايه ده يا عينيا اللي بيستنوا فيه بيت الطاعة ! 
يوسف ' بيكتم ضحكته ' : كانت مستنياني نتكلم
علياء ' برد فعل سريع ' : وحيات امك
يوسف | ضحك جامد ..
علياء ' باحراج ' : مقصدش ، بس هو احنا هنستعبط يعني اي حد عاوز يكلم التاني يروحله البيت ده عادي
يوسف : اكيد لا
علياء : ما دام هو لا يبقي ده بيحصل ليه
يوسف : نادين بتتعامل بعشم اوي في الفترة اللي كنا قريبين فيها من بعض طلعت نسخة من المفتاح من غير ما اعرف عشان تيجي تعملي مفاجاة في عيدميلادي
علياء ' بضيق ' : بس انت اللي بتقولوا مش مقنع يا يوسف
يوسف : ديه الحقيقة انتي عاوزاني اقولك ايه
علياء : عادي انك ترجع تحن لنادين او ترجعلها وعادي برضوا انك تفضل تدور علي انسب شخص ليك وانا ذي مقولتلك مش من حقي ازعل
يوسف : ارجع ! مين قال اني عاوز ارجع
علياء : مش شرط تقول
يوسف : بس انا مش عاوز ارجع واسيبك ، ومهما دورت ولفيت مش هلاقي ولا واحدة فيهم انتي
علياء | لمعت عينيها من كلام يوسف
علياء ' بتنهيدة ' : انا للحظة حسيت اني مش مطمنة يا يوسف والاحساس ده وجعني
يوسف :  مافيش اي حاجة تستاهل زعلك
علياء ' بسرعة ' : بس استاهل ابقي مطمنةً
يوسف  :  اطمني .. عاوزك تبقي مطمنة وواثقة فيا ' بيدقق في ملامحها ولمعت عينيها ' وعارفة بقي لو تبقي واثقة ومتاكدة كدة ان مهما يحصل مافيش غيرك
علياء ' ربعت ايديها ' : في حاجة تاني مخبيها عليا
يوسف : لحد دلوقتي لا
علياء : والله
يوسف ' بيبص علي علياء وبيشوف الايسدال ' :
ايه الشياكة ديه ، هو اللي بيزعل بيبقي حلو كدة
علياء | اتكسفت  وبتحرك الطرحة علي شعرها اودام
علياء ' باحراج ' : حلو ايه بس هودي وشي منك فين بعد كدة
يوسف : من هنا ورايح مش هقولك ان انا تحت عشان تنزلي كدة
علياء ' ضحكت ' : والله عشان تشوفني مبهدلة يعني
يوسف : ديه احلي مرة شوفتك فيها
علياء : نعم يعني من ساعة ماشوفتني ولا مرة كنت حلو..
يوسف ' قاطعها وهو بيضحك ' : بس بس اسكتي مقصدش 'وقف ضحك ' انتي حلوة من يوم ما شوفتك وفي كل مرة بشوف فيكي حاجة احلي من اللي قبلها
علياء ' بخجل ' : يا سلام ده انت جي تاكل بعقلي حلاوة
يوسف ' ضحك ' : ما انتي واكلة عقلي كله وانا متكلمتش
علياء ' ضحكت للحظات ووقفت ضحك  ' : 
مش عاوزة احس اني مش مطمنة يا يوسف ، انا ما صدقت اطمنلك
يوسف : انا معنديش استعداد ارجع خطوة واحدة لورا في علاقتنا
حمزة ' قاطعهم ' : مساء  الخير الاوردر وصل
_________________
منة ' ماسكة الموبايل ' : يوسف منزل استوري
بسمة : وريني الحنين منزل ايه
منة | ضحكت بصوت عالي
علياء |  خارجة من المطبخ سامعة اغنية عبد الباسط ' يعجبني كلك يا ولا كلك عاجبني ' وبترقص
علياء : مين حبيب قلبي مشغلي عبدالباسط
بسمة ومنة باصوا لبعض وهما بيضحكوا
بسمة : ماحدش ديه في استوري حبيب قلبك
علياء ' بتستجمع ' : استوري مين
منة ' بتضحك ' : يوسف حموده
علياء | جريت مسكت موبايلها وفتحته ودخلت علي الاستوري بتاعت يوسف لقيته عامل فيديو وهو ماشي بالعربية ومشغل اغنية عبد الباسط وصوته طالع وهو بيغني وبيقول وصوته باين انه بيضحك وبيوجه كلامه لشخص معين ' اه والله عاجبني ' ، كملت الاستوري وهي الفرحة والضحكة علي وشها ولسه هترد علي الاستوي اتكسفت ولقت نفسها مش مجمعة كلام تقوله وفضلت تفكر لحد ما كتبتله
( من امتة واحنا بنسمع عبدالباسط )
رد عليها ( من يوم ماغنتيلي اغنيته )
علياء ' باحراج ' ( انا غنتلك لا محصلش )
يوسف ' ضحك ' ( المهم اني بغنيلك انتي دلوقتي )
علياء ( وايه كمان )
يوسف ( هتديني حب اكتر ؟ )
علياء ' بتضحك ' ( هديك الشوق يا سكر 😒♥️)
______________________
الجو ليل ، قاعدة في عربية لوحدها وساندة دماغها عالشباك  ..
علياء ' بترد ، بصوت مبحوح ' : مش فاهمة ايه الناس ديه ياربي اللي بتقطع حبل افكار الواحد
يوسف ' بيضحك ' : وانتي بتفكري في مين يا حبيبتي
علياء : ما افكر في اللي افكر فيه لا اله الا الله
يوسف : انتي مخنفية ليه الاول
علياء : جالي برد
حمزة ' قاطعهم ' : بتكلم علياء ؟؟ قولها بقي
علياء : حمزة معاك
يوسف : اه كلمتك وكنسلتي ليه
علياء : مكنتش عارفة ارد
يوسف : ليه بتعملي ايه
_ قاطع علياء صوت كريم من برا العربية
كريم' بيديها الاكل '  : عاليا جبتلك اكلك سبايسي هاروح اجيب البيبسي  ولا انتي عاوزة عصير
يوسف ' ببطئ وبيقلد الصوت '  : عالياا !!
عالياء | اتشتت بين انها ترد علي كريم ولا ترد علي يوسف
علياء : بيبسي لالا عصير  بص اي حاجة
حمزة ' ليوسف ' : ها يالا قولها
يوسف ' بيبعد عن حمزة ' : استني بس كدا
يوسف ' بجدية ' : مين ده
علياء ' بتنهيده ': كريم ابن عمة خالد
يوسف : ومسافر معاكم يعمل ايه
علياء : طيب هرجع القرية واكلمك احكيلك
يوسف : لالا افهم دلوقتي وليه طريقة العشم في كلاموا ويوجهلك انتي الكلام ليه هو مافيش غيرك
علياء | سكتت
يوسف : ما تردي
علياء : مافيش غيري
يوسف بغيظ :  متستعبطيش عاوزة تفهميني انك معاه برا لوحدك
علياء ' بسرعة ' : اه بس هي حصلت صدفة انا وهو بس محبناش الاكل في القرية فطلعنا نجيب اكل وبعدين ماتقلقش هو محترم
يوسف : انا اللي مش محترم
علياء ' بتكتم الضحكة ' : مقولتش كدا انا قصدي انك .....متقلقيييش
كريم | رجع العربية ..
كريم : ملقتش بيبسي ساقع جبتلك عصير مانجة عارف انك بتحبيه
علياء : شكرا يا كريم معلش تعبتك معايا
كريم : علي ايه
يوسف ' بيتك علي سنانه ' : لا عرفيه بقي انك مبتحبيش العصير العلب وانه هتشربي ربعوا وترميه
علياء | ضحكت بصوت
يوسف : بطلي ضحك مبهزرش
علياء ' بتكتم ضحكتها ' : طب يا منة شوية وهكلمك
يوسف : منة !
علياء : اه
يوسف : لا منة بمنة بقي مش هتقفلي وهتفضلي معايا عالموبايل لحد اما ترجعي
علياء : ازاي يعني مينفعش
يوسف : اقسم بالله يا عاليا لو قفلتي مش هيعجبك اللي هعملوا

____________
رأيكم يهمني ؟ ♥️
#دعاءالسيدعامر
#دعاء_السيد