Against the Wind

EPILOGUE

 Treasure Hunt

"CONGRATS, Shyr Divine! You are really something!"

Napangiti ako nang malawak pagkatapos akong batiin ni Sir Yeji. Pati ang mga officemates ko ay binati rin ako. Hindi ko mapigilang matuwa kasi pakiramdam ko ang laki ng ambag ko sa Bustamante Prime.

Nakapag-close lang naman ako ng isang deal. Sa akin kasi in-assign ni Sir Joefel. No'ng una kinabahan pa ako pero mabuti na lang tinuruan ako ni Puppy kung paano makipag-usap sa client. Nag-research at nag-aral ako ng profile ng kliyente at ng project bago ako nakipag-meeting. Pati ang presentation ko ay pinagpuyatan ko pa. At nagbunga naman sa wakas ang efforts ko.

"Inspired po 'yan kaya ang dedicated sa trabaho," singit ni Vanessa.

Inirapan ko siya. Nagtawanan naman ang mga kasamahan namin. Alam na ng lahat ang tungkol sa relasyon namin ni Puppy kasi hayagan ba naman niya akong hinahawakan sa kamay kapag magkasama kami. Minsan nga halos sa office niya na ako patirahin. Paano ba naman kasi sa gitna ng trabaho ay tatawagin niya na lang ako bigla at papapasukin sa opisina niya. Akala ko ay may ipag-uutos siya, iyon pala gusto niya lang daw ako matitigan nang malapitan. Kaya madalas sa loob ng opisina niya ako gumagawa ng paper works.

"Salamat po, Sir. Kung hindi rin naman dahil sa magandang design ninyo, hindi ko iyon mapapapirmahan sa kliyente. 'Yong design n'yo po talaga ang nagdala," untag ko.

Magaling naman kasi talaga si Sir Yeji. Madalas nga lang parang hindi siya seryoso. Kung hindi pa siya masasabugan ng galit ni Puppy, hindi pa siya gagalaw.

"Nope. There are so many excellent architects in the industry, but it takes incredible interpersonal skills to convince the client to choose your design. You did well, Divine. The credit should all be yours," ani Sir.

Nahihiyang ngumiti ako. Tatanggapin ko na sana ang pakikipagkamay niya nang may naunang kumuha no'n.

"Thank you for assisting her. You both did a great job," untag ni Puppy.

Napangisi si Sir Yeji sabay iling bago binawi ang kamay niya.

"So, tuloy na ba ang team building bukas?"

"Yes. Have you made the arrangement for everyone? Make sure everyone will be able to arrive safely in the venue," ani Puppy.

"Don't worry, ako ang bahala."

Kumindat si Sir Yeji saka tinapik si Puppy sa balikat. May team building kasi kami bukas pero itong department lang namin. Mga 16 kaming lahat kasama na ang dalawang boss namin.

"Let's go?" untag ni Puppy.

Tumango ako at kinuha ang bag ko. Uwian na kasi. Kinuha naman niya iyon sa kamay ko at siya na ang nagbitbit. Nagngitian na naman tuloy ang mga officemates ko. Halos itago ko ang mukha ko sa sobrang hiya. Hindi pa rin kasi ako sanay. Minsan nga lady boss ang tawag nila sa 'kin.

"You did well today. What do you want for dinner?" untag niya nang makapasok kami sa elevator. Hindi sumabay ang ibang mga empleyado nang makita nilang nauna kami.

Hinapit niya ako saka hinalikan sa noo.

"Hmm... Pork chop o 'di kaya pasta?" patanong na sagot ko.

Magdadalawang buwan na ako sa Bustamante Prime. At nasanay na akong siya ang nagluluto ng makakain namin halos sa araw-araw. Paminsan-minsan kapag nauuna akong magising sa kanya sa umaga ay ako ang nagluluto ng mga basic lang na ulam.

"Puppy, puwedeng maglakad lang ulit tayo pauwi? Malapit lang naman ang Spire."

Ngumiti siya. "Okay. I will ask Presto to take care of the car."