البطل المغمور

تكمله

#البطل_المغمور"شمس الغروب"
#الجزء_الحادي_والثلاثين"القسم الأخير"
#الجمان_الفريد

الصلاة الصلاة وماملكت ايمانكم....
اخر وصايا الرسول قبل موته..اللهم صل وسلم وبارك عليه💕
الصلاة أولا🌸
تنبيه..
اخر الجزء اللي فات ماكانتش آية قرآنيه...
مايشابهها في المعنى بس...
🍁🍁🍁🍁🍁🍁🍁🍁🍁🍁🍁🍁🍁🍁🍁🍁🍁
واقف هو وبنته قدام وحده من اللوحات يهدرزوا..
هيثم:هاشن رايك بابا في فرق ولا؟
سارة بإبتسامه ٩فرح:وهلبه مش شويه..ماتوقعتش نشوفه هكي بكل..
هيثم ابتسم وقال:الحمد لله..
والزوز غيروا عيونهم لزياد اللي كان واقف على عمته وخالته يهدرز عليهم..
ماجده؛وليدي رد بالك مش اي حد تصاحبه هنايا..
زياد بضحكه:زيي زيهم مافيش فرق راهو..
ماجده؛لا حبيبي مش زيك زيهم فيه اللي مبلي وفي اللي هو هكي شيطان رجيم من لما جاباته امه..
ضحكت نسيبه وقالت؛اتقي الله ياموجي والله يبانوا ناس كويسه..
ماجده؛ايه زي اللي شدوهم دايرين رواحهم يبوا يتعالجوا وطلعوا خاشين بش يبيعوا السم هنايا..
زياد؛عندها الحق من الناحيه هادي..اطمني خالتي الامور تمام..
ماجده؛ربي يحفظك بحفظه...خل نمشي نشوف سارة وبوها ع شن واقفين ليهم ساعه..
ومشت ماجده وخلتهم يضحكوا..
بعدين زياد شبح لعمته وقال؛نحس فيها مش تمام..
تنهدت نسيبه وقالت؛بتطلق..
زياد؛توقعتها..
نسيبه؛من ماكانش متوقعها..
زياد شبحلها شويه وقال؛وانتي تزوجتي..
نسيبه ابتسمت وقالت؛مقرية فاتحتي بس..
زياد:كيف صار شن اللي غيرك هكي؟
نسيبه؛هلبه حاجات صارت وانت غايب..
زياد؛اهم شي انتي مقتنعه ومرتاحه..
نسيبه؛فوق ماتتصور..
زياد ابتسم وقال؛ربي يسعدك..
نسيبه مسحت ع شعره وقالت:ويفرحنا بيك يارب..
ضحك ضحكة خفيفه ونزل عيونه...
••••••°°°°°°°
"حادثه اعتداء اخرى على عضو هيئة تدريس بجامعه درنه في المنطقه الشرقيه..والمعتدي هنا ايضا ابن احد المسؤولين..
هل عدنا لعهد الفوضى وطغيان وتمادي المسؤولين وذويهم تارة في مؤسسة حكوميه وتارة اخرى في الأماكن العامه..الطرقات...وغيرها...
هل المسؤول فعلا لايعلم عن تجاوزات المحيطين بيه...
وهل تمادي ذويهم هذا نابع من ضعف تطبيق القانون وغياب العداله؟!
كل هذه الأسئله وغيرها سنعرف اجوبتها في حلقه اليوم من برنامج"السابعه"...
معي في الأستديو اليوم..
ضيوفي...الأستاذ عبد الوارث الشاعري عضو هيئة تدريس بجامعة درنه..وهو من تم الاعتداء عليه من قبل احد الطلاب..
والأستاد جلال الوافي عضو هيئة تدريس بجامعة طرابلس
صاحب القضية الأشهر التي اثارت الرأي العام خلال الشهرين المنصرمين...
مرحبا بيكم..
جلال وعبد الوارث:اهلا بيك...اهلا..
الإعلامي:نبدوا بيك استاذ عبد الوارث نبوا نسمعوا منك القصه الكامله..المنبر منبرك والمساحه ليك وليك كامل الحريه  في قول ماتريد...
عبدالوراث:بسم الله وبه نستعين وعليه توكلنا واليه أنبنا واليه المصير...اولا نشكركم ع منحي هالمساحه بش نتكلم بإسمي واسم كل زملائي..عن حجم الطغيان والبغي اللي قاعد يصير معانا بالذات في جامعة درنه...تلقى الطالب ولا الطالبه ابن ولابنت عضو او عضوة في البرلمان..او ضابط في الأمن الداخلي..او الجيش..او في وزارة من هالوزرات...تلقاه لامهتم لقرايه لاحضور لاغياب لاامتحان ويبي يجي يلقى روحه ناجح في اخر الفصل..يبونا نساووا بينهم وبين الطلبه الملتزمين اللي يتعبوا ويشقوا ويجتهدوا...وهذا اللي صار معاي شخص رفضت نعطي درجة النجاح لطالب ماشفتش وجهه طول الفصل ولما يمتحن ورقته تجيني فاضيه يبيني نجحه وبكل وقاحه يقول..نبيها جيد يااستاذ!...
وحاول يعطيني مقابل لهالشي وقالي والدي يعطيك ويديرلك اللي تبيها...ولما رفضت رفض قاطع اعتدي عليا بالضرب هو واللي معاه...كيف ماتشوف قدامك..واشر بيده ع انفه..كسر انفي كسر وكان قاصدها...وماكتفاش بهكي وبس...بعتلي من يكسر السيارة...
الآعلامي:أستاذ انت حاولت تقدم فيه بلاغ اعتداء؟
عبدالوارث ابتسم بتهكم بعدين قال:قدمت..ومااستفدت شي والده ضابط كبير في الدوله..
الإعلامي؛اممم...تقدر تقول اسمه ع الهواء هي الناس تعرفه من الخبر اللي تناقلوه عبر وسائل التواصل..لكن اني نبيك تقوله بش يبدا كل واضح وموثق..
عبدالوارث:ايه ابدا معنديش مشكله رواد عبدالعاطي*****...
الإعلامي؛اممم..للاسف الشديد وكأن حادثه الاعتداء اللي صارت معاك استاذ جلال زادت شجعت ع ارتكاب مثلها..
جلال:للأسف لأن القانون مش فوق كل شي فالبلاد هادي..
الإعلامي:مالذي حدث معك في جلسة المحكمه الاسبوع الماضي..
جلال:برغم ان كل شي كان واضح اجلوا الجلسه وطلبوا شهادة البنت..
الإعلامي؛البنت اللي تعرضت للتحرش..
جلال:ايه..طبعا هما نقصد المحيطين بالمعتدي ولد هيثم الكاتب وع راسهم بوه..خلوه يقول كلام طبق الاصل من الكلام اللي اني قلته يعني يحكي الحادثه كيف صارت لكن يرمي بتهمته عليا ويطلع فيها هو البطل والضحيه في نفس وقت..ومش عارف كيف خدوا بأقواله وهما يعرف والكل يعرف ان الولد مدمن مخدرات ضايع منتهي وهوينا موجود في مركز الإدمان التابع للدوله..ونزيدك من الشعر بيت حولوا المدير متاعه وعينوا هيثم الكاتب بو الولد الضايع هداكا في مكانه..
الإعلامي:استاذ جلال حاول تتمالك اعصابك شويه..
جلال خدي طاسة الميه اللي قدامه وشرب منها وحاول يتظاهر بأنه اعصابه تاعبه...خلا يده ترجف بشكل ملحوظ وهو شاد الطاسه ومبالغته في ردة فعله خلت وجهه يتلون باللون الأحمر...بش يبان وكأنه من الغضب..
والحركات هادي كلها القصد منها استعطاف الناس اللي تشوف..
نزل الطاسه وقال:اسف جدا..لكن والله ياخوي شي يقهر..اني تشوف فيا قدامك استاذ ليا سنين طويله في حياتي ماتعرضت لموقف مهين وظالم زي اللي انحطيت فيه توا..يعني لو تعرف..ان بعد ماطلعنا من جلسة المحكمه قدام الصحافه هيثم الكاتب نفسه حاول يعتدي بالضرب..
الإعلامي؛فعلا والصور موجوده عندنا...
وعرض المخرج الصور اللي فيها هيثم حاول يضرب جلال..
جلال:هادوا المسؤولين في بلادنا هدا بالذات حني قدرناه هلبه واحترمناه وقداش بنينا عليه امال حني جماعة قطاع الصحه وشوف شن طلعت حقيقته..وع فكره ولده معروف من قبل بطيشه وتصرفاته غير المسؤوله زي مرة خش في عركه كبيره وانضرب فيها بموس..ومرة تانيه خش سباق سيارات غير قانوني ودار حادث كبير كان حيودي فيه بحياته وحياة الموجودين اللي يحضروا في السباقات هادي...وهدا كله مانجيبش فيه من راسي الناس كلها تعرفه..
الآعلامي:انت توا قلت ان هيثم الكاتب استلم ادارة مركز الإدمان..
جلال:طبعا وقالوا جماعته في الوزارة هما اللي دبروهاله الحكايه زي ماوصلني من المعلومات..
الآعلامي:لحظه...وزراة الصحه بموظيفها بمعالي الوزيرة ليكم حق الرد...
جلال:ياريت يتصلوا ويردوا يقولوا كان كلامي كذب..هدا كله بش يكون مع ولده خايفه يدير عمله جديده تزيد تورطه ولامش عارف...اعذروني ع انفعالي بس فعلا شي يقهر ويطلع الواحد من طوره قضيه زي هادي الحكم فيها واضح وهما مازال مايأجلوا بس يسمعوا شهادة البنت اللي حتما حتخاف على نفسها وسمعتها لان اسمعها حيطلع في قضيه طالعه للرأي العام..البنت في مجتمعنا وضعها حساس وسمعتها راس مالها مش حتقدر تطلع وتقول اني...
الإعلامي:القانون حيخليها تطلع وتكلم انصافا ليك في هالقضيه..
جلال شبحله شويه وقال:والله اني مادابيا لكن هي للأسف حتكون الخاسر الأكبر..
الإعلامي:للأسف..شبح للكاميرا وقال..فاصل ونواصل مشاهدينا....
.....بعد ماطلعوا الفاصل.....
نقص احسان صوت التلفزيون...وبدي يفكر في اللقاء والكلام اللي قاله جلال بالذات الأخير منه..
لاحظ وكأنه جلال يوصل في رساله للبنت نفسها مضمونها التخويف...
...وفعلا.....
رنيم وهي تابع في الحلقه بروحها في دراها عن طريق الآنترنت..
كانت تبكي من الضغط النفسي اللي هي فيه..خايفه من الفضيحه وفي نفس الوقت ضميرها مش مريحها..
رن تليفونها طول ردت...
رنيم ببكي؛ريتيه الوسخ الحقير ريتيه..
"ماريتش احقر واوطى من هكي في حياتي شن الحيوان هدا"
رنيم ببكي:ربي ينتقم منه ربي ياخده اخد عزيز مقتدر...
...............
"كذاب من عادي هدا واحد كذاب"
تهاني:وعلاش..واضح عليه مايكذبش راجل محروق ومنقهر..
عفاف:جو يدير فيه..اقسم بالله خليقته تقول انه بنادم مش مزبوط وامك تعرف الناس من نظره .
تهاني:غير تحبي عيلة دكتور هيثم زياده عن اللزوم وتوا ولوا نساباتك..
عفاف:وانتي مش سارة صاحبتك ونسيبه ولت مرت خوك!
تهاني؛ايه ماقلت شي لكن الحق الحق..
عفاف:لامش قصة حق ولاغيره..انتي قلبك اسود مش قادرة تنسي اللي صار بينك وبين زياد ولا؟
تهاني ارتبكت ووجهها ولى احمر وهي تقول؛ايه كان يشوفلنا بنفس النظرة اللي ناس تشوفله بيها ربي انتقم منه ياماما..
عفاف؛باهي وطي صوتك تو يسمعوك البنات..
تهاني بضيق:راقدات...
عفاف تنهدت وقالت؛خل نوض نشوفهم..
وناضت عفاف ومشت طلعت من الصاله..
وتهاني سرحت بتفكيرها وهي تذكر في الموقف اللي صار بينها وبين زياد والكلام اللي سمعولها..
تهاني بكره؛يستاهل..الجزاء من جنس العمل...
••••••°°°°°°°°••••••
في الإستديو..
الإعلامي:حاول تهدا شويه استاذ جلال وماتقولش شي ينحسب عليك..
جلال وهو يشرب في عصير الليمون؛امم..غضب عني اقسم بالله..
عبدالوارث يشبحله بدون مايعلق بكلمه..
الإعلامي موجه كلامه للمخرج:خلاص نبدوا....تمام...المكياج..
جت البنت اللي دير في المكياج...
قربت للمذيع وقعدت اديرله في البودرة اللي تخص الكاميرا في البرامج التلفزيونيه والمسلسلات وغيره فيما يخص اي شي ليه علاقه بالتصوير...
البنت كان لبسها عادي..بس ملفته للنظر بجمال شكلها..
عيون جلال زاغو عليه وكانت نظراته ليها وقحه كعادته...
وعبدالوارث انتبهله..
بعد ماكملت جت بتمشي..
جلال وهو يشوفلها :وشن حني مش لازم..
هي ابتسمت بإرتباك..
والاعلامي ثبت ع لقطه لما كان يساوي فنظاراته وهو يشوفله..
وعبدالوارث ركز ع نظراته..
جلال اللي طبعه غصب عنه غلبه ادرك الموقف اللي حط روحه فيه وحاول يتدارك نفسه بضحكه وهو يقول؛نبصر..نحاول نطري الجو بس...
البنت ابتسمت مجامله ومشت..
وهو حاول يشد روحه بش مايتبعهاش بعيونه..
عبدالوارث شبح للإعلامي..وهوكذلك شبحله بعدين شبح لجلال وقال:هي بنرجعوا توا...
قعد جلال يساوي في جاكيته وهو يقول:تمام..
وعبدالوارث هز راسه بإيجاب..
الإعلامي شبح للكاميرا وقال:اهلا بيكم مجددا مشاهدينا...
••••••°°°°°°••••••°°°°°°••••••
في المكان اللي كان فيه البوفيه..
كانوا ضيوف المعرض حاضرين..
قدام طاوله طويله فيها مختلف انواع الأطعمه..حلو وحار..
منها اندار في المصح..ومنها من برا...
هيثم؛نبيكم اذوقوا من اللي داروه الشباب هني..
خالته جت عند وذنه وقالت:متأكد انه نظيف !
ضحك هيثم وقال:خالتي كان مش هكي نخليكم تقربوه؟!
ماجده ضحكت..
وهما ضحكوا معاها ومشوا وين ماواقف فاتح..
اللي كانوا واقفين قدامه مجموعه من الضيوف الحاضرين..
لما وقفوا عنده جاهم زياد اللي كان يهدرز مع الدكتورة ثريا..
هيثم:هي ترا ورينا نتيجه وقفتك في المطبخ 4ساعات اليوم...
سارة قعدت تشبح للماكله اللي قدامه..
فاتح سرقلها نظره بعدين شبح لهيثم وقال بإبتسامه:ترا شوف هادي...وخدي قطعه حلو ومدها لهيثم..
سارة شافتها وقالت تلقائيا:لالا بابا..
فاتح اتفاجئ في ردة فعلها..وخوها كذلك..
فاتح؛ماتخافيش ياأنسه حاجه نظيفه راهو وهو بروحه يعرف..
سارة شبحتله وقالت:مش هدا قصدي بابا ماياكلش حلو..
هيثم ابتسم وماباش يعلق يبيها هي ترد..
فاتح شبح لزياد اللي كان يشبح لبوه بإستغراب وقال:خلاص مالا يختار بروحه..
هيثم:هي تختارلي..
سارة شبحت لبوها بإبتسامه بعدين شبحت للطاوله واشرت ع السلاطه اللي فيها "لوز خزايني "وقالت..ترا صبله من هديكا..ومعاها استيك ..
فاتح ابتسم ونزل راسه وقال:حاضر..وخدي صونيه...
زياد شد يد اخته وقال:ترا شويه..
وخداها وبعدوا..
هيثم تبعهم بعيونه بعدين شبح لفاتح..
ماجده:شن فيها كان كليت حويجه حلوة مرة مرة..
نسيبه بضحكه:ايه ياكل مرة مرة بس ع حسب النظام اللي هي دايراته بس مايزيدش عليه..
فاتح شبح لهيثم وقال:مريض سكر دكتور؟
.............
"ايه"
زياد بصدمه:من امتى!؟
سارة غيرت عيونها عنه وهي شاده دموعها..
زياد تعبوا عيونه بالدموع وهو يقول :مني اني ولا؟
سارة شبحتله وقالت:لالا..من الحزن على ماما بابا تعذب هلبه يازياد..
التفت زياد وشبح لبوه..
وساره تشوفله وهي تقول في نفسها"ماباش يخليه يعرف بش مايحطش الذنب على روحه..الله يابابا كل يوم نزيد نحبك اكثر من اليوم اللي قبله"..
اما زياد فكان حاس بمشاعر متداخله وكلها موجعه.
حزن..ذنب...حب...مشاعر اختلطت ع قلبه اللي كان ينبض بقوة ومخلي الدموع رغما عنه تنزل من عيونه...
سارة شدت ذراعه وقالت:زياد ..
مسح دموعها وشبحلها وقال؛تعالي..
حولت يدها هو شدها وولى بيها وين ماكانوا واقفين..
هيثم:مبدع ياولد انت..
فاتح ضحك وقال؛تسلم دكتور..
ماجده وهي تاكل:كنت طباخ قبل؟
هو شبحلها شويه بعدين ابتسم وحرك راسه بالنفي..
رفع حواجبها وهي تمضع متعجبه..
هيثم:شكلها كانت هوايه..
فاتح ضحك وقال؛شكلها..
جاته وحده كبيره في العمر وقالت:الله يبارك عليكم في بنة زايده فالماكله..
فاتح ابتسم واشر بصبعه ع قلبه وقال:من هني ماهو.
ضحكوا..وسارة تشبحله..
~~~~~~~
♡استفزني..مش عارفه علاش استفزني وقتها ؟!...حسيته يتكلم بغرور..حتى شبحاته كانت مستفزه..حاجبه المرفوع طول الوقت مستفز..نبرة صوته مستفزة..استفزني هلبه..
علاش مش عارفه...لا وزاد استفزني لما قال لخالتي التطييب فن مش اي حد يقدر عليه..
~~~~~~
زياد بضحكته:هدا علاش ادحنست علي فني بش تعرض فنك..
ضحكوا
فاتح؛ولد هدا يبيله برنامج علاجي فيه طريحه
قعد يضحك زياد..
جي واحد تاني وقال:معليشي خوي عطيني من هدا..واشر عليه..
فاتح مدله الكوكيز ولاحظ عيونه ساره عليه..
بعد ماخدي الراجل ومشي..
فاتح:ماخديتي شي ياآنسه..
هيثم؛خودي حاجه بابا..
سارة؛ترا بابا عطيني من الكوكيز...
فاتح خدي منه ومد لهيثم..
هيثم خداه ومده لسارة..
فاتح قعد يشوفلها وهي تاكل بعدين مرر نظره ع زياد وهيثم وقال..نسألها سؤال..
شبحوا نسيبه وماجده لسارة..
وسارة وهي تاكل شبحتله..
هيثم:اسأل..
وزياد يمرر في نظره عليهم
فاتح:علاش اخترتي سلاطة اللوز الخزايني..
سارة بلعت وقالت؛لأن اللوز الخزايني مفيد لمرضى السكري يعدله ويحمي من مرض السكر حتى والسرطان..وفيه هلبه معادن وفيتامينات ويعطي فايده كبيرة للدماغ يزيد التركيز هلبه وينقص حتى التوتر..شبحت لبوها وقالت...ويسموا فيه صديق القلب
هيثم بإبتسامه؛فيه الاوميغا3 اللي ماينتجش فيه الجسم لكنه بحاجته حاجه ماسة
فاتح:الحق نعرف انه كويس لجماعة السكر لكن مانحسابش في منه الفوايد هادي كلها..
زياد شبح لبوه بنظرة حزن..
"دكتور هيثم"
هيثم؛لحظه وجاي..
ومشي مع الدكتور اللي ناداه..
وهما تبعوه بعيونهم..
ع جية ضيف المعرض...الشخصية المشهورة على مواقع التواصل..
"ريان علي"..
قاللهم...السلام عليكم..
ردوا عليه السلام..
ريان بإبتسامه؛انا سألت وقالوا ان الاكل هون من طبخ النزلاء بالمصح صحيح هالحكي؟
فاتح:صحيح يائبضاي..
ضحكوا..وسارة شبحت لفاتح من فوق لتحت..
ريان بضحكه؛اني بدي نزل مقطع بخصصوا بدك تكون موجود معي ؟
فاتح شبحله شويه بعدين قال:مافيش مشكله..
نسيبه قالت لخالتها؛خل نمشوا نشربوا حاجه ريقي نشف.
ماجده:حتى اني هي تعالي..
مشوا مع بعض...
زياد شد سارة من يدها وقال:نستأذن..
هز ريان راسه بإيجاب..
وفاتح قال؛خودوا راحتكم..
مشوا الزوز وسارة تقول:عادي عنده ينزله المقطع والناس تشوفه!
زياد؛فضيحه ولا..
سارة انتبهت لروحها شن قالت بربكه ردت على خوها وقالت؛مش هدا قصدي..قصدي مرات اهله مايبوا حد يعرف هي هادي..
زياد:اخر همه..
سارة سكتت بعدين قالت؛زياد..
زياد؛امم..
سارة ؛والله ماقصدي..
هو ابتسم وقال؛والله عارف...وقفوا..وقاللها...ايه هدرزيلي عنك عن القرايه والمدرسة الجديده..
سارة بإبتسامه؛عادي يعني..القرايه امورها تمام والمدرسه كويسه هلبه ودرت فيها صاحبات..
رفع حاجبه وقال؛غير هديكا تهاني..غريبه..
سارة ابتسمت وقالت؛تهاني تقرا في مدرسة تانيه لكن يوميا نكلم فيها ونحكيلها في كل شي وحتى هي يخي اخر مرة حكتلي ع واحد يضايق فيها بتحرش فيه خوتها..
عقد حواجبه ووجهه تغير..مرر نظره ع المكان وقعد ساكت..
~~~~~~
♡قصدت نقوله هكي كنت نبي نتأكد من اللي قاله بابا وطلع كلامه مزبوط..وجعني خوي وقتها اللي قلبه حب انسانه ع الاقل مش طايقاته...على الأقل...
وحطيت في بالي انه حيكون خايف ضيع منه وياخدها غيره بعد اللي صار فيه..قداش وجعني وقتها وتمنيت لو نقدر نقوله اني نعرف بحقيقة مشاعره بش نخفف عليه شويه..
~~~~~~
••••••°°°°°°•••••••°°°°°•••••••
"والله دماغ يابرو الله يبارك انت لو كملت قرايتك راك بروفسور توا:"
خليل بإمتعاض؛خلاص اليوم!
نيار:لامش خلاص اليوم..
شبحله بطرف عينه..
نيار؛صل ع النبي ياراجل عاد وخليني نتم الموضوع ذليت امي الزفت..
خليل:اللهم صل ع النبي..اني مش قادر نعديهالك..
نيار؛قتلك الف مرة ليا اسبوع واني نقولك..تحشمت منك والله تحشمت البنت ليها سنين في بالي ولما عرفت انها فاتت الجو هداكا قلت نكلمك عليها لقيت تقولي تعالى للجامع اللي حدانا بنقرا فاتحتي ع ملاك..وحق الله قريب انتحرت غير جينا فرمضان بس..
خليل شبحله شويه وقال؛اسمع..البنيه امانه في رقبتي مانرضاش نعطيها لناس نخاف مايقبلوهاش بسبب ظروفها ولاانت حضرتك بعد وقتها تقعد تعزر فيها..
نيار:كلب مش بنادم كان درتها..انت عارفني ياخليل عقليتي مش هكي..ليك صاحبي عمر..عمرك سمعت مني كلمه جرحاتك!
خليل:اني حتى ع ماليك خواتك وامك واقاربك..
نيار:امي وخواتي حكيتلهم كل شي طبعا مش كله كله بس علاش خديتها وطلقتها وهما متفهمين وماعارضوش بكل..
خليل شبحله شويه وقال:نيار..لأخر مرة بنقولك البنت هادي امانه في رقبتي وبنأمنك عليها انت والله لو تجرحها بكلمه معاد نعرفك..
نيار ابتسم وقال؛اطمن ياغالي بنحطها في عيوني ونسكر عليها برموشهم..
خليل بإزدراء:بطله القداد هدا بطله..
نيار:هادي رومانسيه مش قداد يامتخلف..
رن تليفون خليل...طلعه من جيبه وهو قويه:اقطع رومانسيتك..
نيار قعد يضحك..وهو فتح الخط ورد..
خليل؛تعال لحوش الشيخ...........ايه بعد المغرب نكون غادي.........وعليكم السلام...وسكر وناض..
خليل؛غدوة جايك المستشفى إن شاء الله...
نيار ناض معاه وقال:كلمه اخيره في الموضوع..
خليل؛غدوة بإذن الله نعطيهالك..
نيار هز راسه وقال؛ان شاء الله...
....وطلع نيار سقد صاحبه وبعدها مشي لخدمته......
••••••••°°°°°°°°•••••••
في الطريق..
"عليك نظام عليك شي يشرفنا قدام العالم"
نسيبه:حتى الراجل السوري صور شوي وهو منبهر..
ماجده:ايه مالا شنو ربي يحفظ وليد اختي ويعليه وين مايمشي..
سارة تسمع في كلامهم وتشبح لبوها اللي يبان مركز في الطريق بالسيف...
سارة:بابا..
هيثم؛نعم بابا..
سارة:خيرك ساكت..
هيثم:نسمع بابا..
نسيبه:هيثم خيرك من لما طلعنا من المصحه واني مش على بعضك..
هيثم:كلمني عمتك بش تجهز البنات..
نسيبه:ايه..
هيثم زاد السرعه لين وصلوا للزنقه..
خشلها...درس قدام الحوش...ونزلت سارة بش تمشي تجيب خواتها من حوش خالد..
وصلت في الباب بطق..
انفتح وطلع رفيق لما شافه قلبه فر..
هي نزلت عيونها وقالت؛ترا نادي خالتي عفاف..
هو يتأمل فيها بعيونه ويقول:حاضر...
غيرهم عنها بالسيف والتفت ينادي:ياام..
ع طلعة عفاف بالتوأم وهي تقول:جيت جيت..
وخر رفيق وعيونه على سارة..
ريحان؛وين كنتوا؟
سارة:تو نقوللكم ..هي تعالوا ..مدت ايديها وهما شدوهم..
شبحت لعفاف وقالت:صحيتي خالتي وسامحينا تعبناك..
عفاف:تعب شني بنتي زي بنياتي هادم..
سارة:تسلمي ربي يحفظك ويطول في عمرك...تصبحي على خير..
عفاف:قدامك كل خير...سلمي على ماجده وعمتك..
سارة:يوصل..
خدت خواتها ومشت..
ورفيق لحقها وهو يقول:أوينا يام..
عفاف تنهدت وسكرت الباب وهي تقول:ياقعاده يحلم..
.....هو قاعد ماشي ورا سارة لين خشت مع خواتها للحوش....
ولما جت بتسكر الباب لقاته واقف يشبحلها..
ابتسملها..هي سكرت في وجهه الباب...
تبدلت ابتسامته بملامح الضيق ...تنهد..ومشي كمل طريقه للورشه..
•••••°°°°°°•••••••°°°°°°°••••••••
بعد صلاة المغرب..
في حوش الشيخ"أبو يزن"...
خليل:شكله في ناس من العدل والداخليه يمشولهم في امورهم هدا اللي فهمته من كلام فتحي الطويل لماتلاقيت اني وياه..
:مادام عرفوك ع فتحي الطويل معناها مأمنين فيك هلبه..
خليل:هذا علاش بنقولك قول لراجح حولوا المراقبه عليا نبيهم يعرفوا انكم ماشديتوا عليا شي وطلعتوني من الدايرة الحمرا...نبيهم يزيدوا يأمنولي..
:تمام...هذا كل شي عندك؟
خليل:ايه..ولما يولي عندي جديد اني نكلمكم اني..
:تمام تمام..
طق الباب..
خليل:تفضل..
انفتح الباب وخش الشيخ بصفرة فيها قهوة وضيافه.
ناض خليل وجاه خداها منه وقال؛سامحنا تعبناك..
الشيخ:لاتعب شني ياولدي اني فرحان اللي نخدم فيكم..
ابتسم خليل ومشي بالسفرة..
والضابط اللي معاه قال؛بارك الله فيك ياشيخ..
الشيخ قعمز وهو يقول:يبارك فيكم انتم ياولدي...
•••••••°°°°°°°•••••••°°°°°°°••••••
"هدا قاعد يضغط ع اعصابي"
هيثم في داره يتكلم في التليفون..
"رد بالك دكتور دير اللي يبيه"
هيثم خدي نفس وزفر بعدين قال:إنا لله وإنا إليه راجعون..حسبي الله ونعم الوكيل..حسبي الله ونعم الوكيل .
"اهدى دكتور واسمعني تصرفه هدا يبين انه خايف من شي وقاعد يستبق في الأحداث بش مايصيرش الشي اللي خايف منه"
هيثم؛من شني بيخاف؟
"دكتور تقدر تجيني المكتب توا.."
هيثم هز راسه وقال:ربع ساعه ونكون عندك..
"في الانتظار"
سكر هيثم ومشي طلع من الدار..
وهو ماشي بطريقه للباب قابلاته سارة وقالت:بتعطل بابا..
هيثم وهو ماشي:مش عارف..
وصل للباب لبس في رجليه فتحه وطلع ونساه مفتوح..
سارة لحقاته لين طلعت ووقفت في الباب وقعدت تشبحله بحزن وهو راكب سيارته وطالع بيها من الحوش..
~~~~~
♡كنت عارفه اللي صاير كيف مانعرفش وموقع الفيس بوك كان مقلوب بكلام جلال الوافي وبصور بابا يوم المحكمه لما جي بيضربه..الكلام اللي قريناه واللي انكتب عن خوي وبابا في التعليقات كان جارح وقاسي لأبعد حد..وكأن الناس ماصدقت تشوف غلطه ع حد بش يبانوا قدام انفسهم انهم احسن من غيرهم...كلامهم القاسي وصلني حتى اني..في من راسلني وقعد يسأل فيا اسئلة تافهه..في من سبني وسب بابا وخوي....تنهدت وقالت...الايام هديكا كل مانذكرها قلبي ينغم وصدري يضيق...وهكي كنت نحس وقتها...هدا علاش طول مشت خديت تليفوني حطيت سماعاتي في وذاني ولبست حجابي وطلعت قعمزت في الجنان فتحت القرآن وبديت نسمع...ابتسمت ودموعها في عيونها...غصب عنه الهم ينزاح غصب عنه...
~~~~~~
🍁وخوها اللي كان مايندري على شي..
ف المصلى اللي في المركز...مقعمز ع الصلايه وقدامه المصحف..
وكان مشغول بالتسبيح وهو يمرر فابهامه ع باقي اصابعه...
خش عليه فاتح وهو يشوفله..
مشاله وقعمز جنبه وعيونه ع المصحف..
زياد كمل تسبيح وشبحله وقال:نويت تستسلم..
شبحله فاتح وقال:وشن قالولك عليا كافر!
زياد ابتسم وقال:ماقالي حد اني نشوف بعيوني..
فاتح عقد حواجبه وقال:شن شفتني نعبد في بقرة ولاتمتال ولاباك شايفني ملحد..
زياد بضحكه؛امتى تنوى تصلي قولي..
فاتح شبح للمصحف وقاله:لما نحفظ القران..
زياد بصدمه؛كيف! كيف تحفظ القران بعدين تصلي كيف جت هادي!..
فاتح بإحراج:تي لايادمنقل..قصدي..اني مش حافظ منه شي..
زياد عقد حواجبه وقال:معقوله! بكل بكل..حتى الفاتحه لا!؟
فاتح تنهد بضيق وحرك راسه بالنفي..
زياد:تي كيف انت مش قاري في مدارسنا ولاكيف!؟قريت برا!؟
فاتح؛قاري هني لكن في مدارس خاصه..
زياد؛وفي المدارس الخاصه يقروا في الدين..
فاتح شبحله وقال بشي من الانفعال:في المدارس الخاصه ادفع تنجح..ولما تجي العطله كلها تمشي في السفر والدهوير هني وغادي مافيش من يهتم بيا ولابعقلي وشن فيه..
بس سفر طلع لبس وكل....خلوني واحد شهواني تفكيره كله في رغباته وشهوته وبس..مايقعد شي فخاطري بفلوسي نشريه حتى ذمم الناس..مافي حد في يوم شدني وقالي هدا غلط وهدا صح..هدا حلال وهدا حرام..مافي حد عاركني ع قرايه ع لبس ع مرواح عقاب الليل ع صحابي ع طلوعي ع الصرف اللي نصرف فيه...عندي اب لكن عمره لاعلمني ولاوجهني...وعندي ام نشوف فيها ديما لابسه وبتطلع يالابسه وبتستقبل يادايره حفله يامعزومه ع حفله وتقعد لليل برا ع خاطر خدمتها وواجباتها الاجتماعيه...وعندي خوت كل واحد فينا في عالم..اللي تزوج وهاجر...واللي غارق مع بوي في عالم الفلوس..واللي همها الوحيد راجلها وكيف ترضيه..تي مانشوفش فيهم الا بالصدف ياراجل...وضحك تهكما ودموعها تنزل...بعدين مسحهم وقال..ريت هادوا كلهم من لما خشيت هني مافيش واحد اتصل سأل عني حتى السؤال
شفت شن شكل عيلتي والحياة اللي كنت عايشها.!! مانيش زيك عندي اب يدير في المستحيل بش يخلي الدنيا في عيني حلوة ويخليني نتعالج واني متشجع..ماعنديش اخت زي اختك تشد ع يدك طول الوقت...خايفه عليك تحبك تحترمك تشوف فيك حاجه كبيره برغم اللي انت فيه..ماكانش عندي زي امك يازياد...هديكا الشمس اللي قلت عليها...ماعنديش ربع اللي عندك يازياد بش تهزا عليا وين تشوف لانعرف نصلي ولاحافظ سورة من القرآن
وغطا عيونه بإيديه وقعد يبكي
زياد انوجع عليه هلبه صدمه اللي سمعه منه وماتوقعش ان حياة فاتح كانت كلها عبارة فراغ اسود كبير...ضياع في ضياع...يتيم من غير يتم...مقطوع من شجرة كبيرة مليانه يسمع في صوت عبراته اللي توجع...حط يده ع ركبته وهو يقول بصوت مبحوح:آسف..
وفاتح ماصدق حصل فرصه يبكي فيها ويطلع اللي فخاطره..
ناض زياد قعمز جنبه..حاوطه من كتفه بعدين ضمه...
وفاتح خبا وجهه في كتف زياد وقعد يبكي ويبكي..
وزياد يمسح ع شعره...
•••••••°°°°°°°••••••
فتحت الباب وخشت بسرعه وهي تقول:ريت الفضايح ريت..
ومدتله التليفون..
خداه وقعد يتفرج..
وهي واقفه قدامه مربعه ايديها وتغلي مع بعضها من الغضب..
هو شبحلها وقال؛مش تبرينا منه..
خدت تليفونها وقالت؛على من تمشي فيه تحسابني مانعرفش انك قاعد تعطي في مساهمات للمركز هدا من اول ماخشله..
وهو قاللها:ولاانتي موصية عليه الدكتورة ثريا داخل..
نزلت من عينها دمعه وقعدت ساكته..
هو قاللها:مدام متبريين منه والناس عارفه لايوصلك ولايوصلني شي..
:لا يوصلنا ويوصلنا..اني خاشه ع انتخابات برلمانيه مانبيش دوشة وشوشرة ..لكن باهي تو نحاسب اداره هالمصحه المستهتره..
ومشت بغضب وطلعت من حداه..
هو اتكا بمرافقه ع المكتب وحط راسه بين ايديه وتنهد بألم وقال...اااااه..يارب...
•••••••°°°°°°•••••••
في المكتب مقعمزين الزوز مقابلين بعض..
واحد يتكلم والتاني يسمع..
احسان:الأسبوع اللي فات مشيت سألت عنه في مكان سكنه وعمله ع اساس ان عندي اخت وهو جاي يخطبها..واللي سمعته من الناس كله يصب في جمله وحده"ماتعطوشي"..
وع فكره ساكن بروحه...وعنده خدمه في مدرسة خاصه يعطي في دورات لطلبة الجامعه..
هيثم:بروحه!؟
احسان؛برغم انه عنده اهل..
هيثم؛ايه عارفهم..بس هدا كله في شن ينفع زياد؟
احسان:ينفعه هلبه لو قدرنا نثبتوا انحرافه الأخلاقي الشي هدا يدعم اقوال زياد وبقوة لو اثبتناه..
هيثم ؛باهي كيف حتثبته..
احسان:خليها على الله ثم عليا يادكتور..
هيثم:باهي وموضوع البنت..
احسان؛قتلك مادور شي..
هيثم؛اني حاط ثقتي في الله ثم فيك انت..
احسان:واني نقولك كون مطمن بإذن الله الجلسه الجايه الموازين كلها حتنقلب..
هيثم تنهد وقال؛يارب..
••••••°°°°°°•••••••°°°°°°••••••
الساعه الحاديه عشر ليلا...
مقعمزه تحت روشن دارها متكيه ع يد الكنبه وتتكلم بالتليفون وهي تتأمل في القمر..
نسيبه:ايام صعبه ياخليل بدينا وين نضحكوا فيها ساعه نخافوا من الساعه اللي بعدها..
خليل؛هيا هكي ساعه بساعه..مادومش ع حال..
نسيبه؛بس والله صعبه ياخليل حاسه قلبي مغموم..
خليل:واني نقول خيرني مش قادر نتنفس افتحي الرواشن نوضي..
حطت يدها وجهها وقعدت تضحك..
خليل بإبتسامه؛ربي مايحرمني من هالضحكه ..
نسيبه بضحكه:ايه حقه شن صار في هداكا الموضوغ..
خليل:اي موضوع...
نسيبه بحده:خليل..
خليل:معلاق خليل ..
نسيبه:تي هيا عاد قول شن صار في موضوع نيار وهديكا..
خليل بضحكه؛خلاص تم..
نسيبه ابتسمت وقعدت ساكته..
خليل:نواستي..
نسيبه؛اممم..
خليل:مش نادمه..
نسيبه تنهدت وهي مبتسمه وقالت:على شني؟
خليل:عليا..
نسيبه ضحكت..
خليل؛ندوي جديات خايف نظلمك معاي..
نسيبه بضحكه:والله اني اللي خايفاتك تندم..يعني مانيش زي  بنات هالوقت ولاعندي فالدلع والكلام الحلو والجو اللي يديروا فيه..خايفه مع الوقت تقول شن درت في عمري..
خليل:انتي لو كنتي زيهم ماشبحتلكش...اني حبيتك لانك هكي...مراة بمعنى الكلمه نعبى عليها وعارف انها حتصوني في حضوري وغيابي...اني نوسه لقيت فيك مالقيتاش في غيرك هدا علاش حبيتك من غير مانفكر ..
ونسيبه تسمع في الكلام وهي مبتسمه بفرح وقلبها يرقص على نغمات كلامه الحلو..
خليل بإبتسامه؛وانتي؟
نسيبه:اني شني؟
خليل؛شن حبيتي فيا..
نسيبه؛ومن قالك نحبك اصلا!
خليل:ايه صح انتي تموتي فيا..
قعدت تضحك..
خليل بضحكه؛هيا جاوبي..
هدت ضحك وتنهدت بعدين قالت:مش عارفه الحق والله ماعارفه كنت مش طايقاتك مش عارفه كيف لقيت روحي العكس مع الوقت..ممكن لأن فيك هلبه حاجات حلوة..
رفع حاجبه وهو مبتسم قال:زيي؟
نسيبه؛امم..طيبة قلبك..حسيتك طيب هلبه..شهم..راجل يعني تصرفاتك كلها تصرفات راجل حقاني..واكثر شي اثر فيا علاقة ببوك وامك..بار هلبه انت...
خليل يسمع في كلامها وهو مبتسم بحب وقلبه طاير بمشاعره..
نسيبه:تعرف...نشوف فيك القدام بإذن الله حتولي حاجه كبيرة هلبه..احساسي قوي..
خليل حط قبضة يده على خده وقال:كيف ترا؟
نسيبه؛مانعرفش بالزبط كيف لكن هكي نظرتي فيك..في ملامحك حاجه تقول هكي..في ناس سبحان الله ربي خلقهم ودار فيهم ملامح هكي..دل على انهم مع الوقت حيكونوا حاجه مهمه...
خليل بضحكه؛بتخليني نصدق روحي ..
نسيبه قعمزت وهي تقول؛صدق روحك ايه صدقها وعلاش ماتصدقهاش..انت ماناقصك شي بالعكس عندك هلبه ولو تبي مافي شي يكون مستحيل عليك..انت مؤمن وتعرف..ربي لما يشوف حد يتعب بش يوصل لهدف فيه خير يوصله لأعلى من هدفه بمراحل..
خليل نزل يده وساوا تقعميزته..
نسيبه؛حتكمل قرايتك وتولي دكتور وممكن توصل لأبعد من هكي..رد بالك تقول ان الظروف حتمنعك..مش ملاحظ ان هلبه حاجات تغيرت تقول رب العالمين غيرها كلها على خاطرك انت..
خليل دموعه عبوا عيونه...
نسيبه؛هدا كله مخليني متأكده انك حتوصل..
نزلوا دموعه وهو يقول:مش حتندمي بعدين؟
نسيبه؛بالعكس والله بالعكس حنكون فخورة ورافعه راسي..
خليل:حتستني هلبه..
نسيبه؛لو عمري كله المهم نكون ليك وع ذمتك هدا بس يكفيني...حنستناك بالساعه والدقيقه والثانيه من غير مانمل..
حنقعد ندعيلك في كل وقت وفي كل لحظه.....حنزيد نحبك اكثر واكثر والبعد حيقربني منك مش حيبعدني والله ياخليل ..
خليل حط يده ع جبهته وهو يبكي بصمت..
نسيبه ودموعها تنزل؛خليل..
نزل يده ع عيونه وقال بصوت مبحوح؛روحه..
نسيبه؛جعت..
خليل قعد يضحك من بين دموعه..
نسيبه بضحكه وهي تمسح في دموعه؛دويت هلبه صرفت طاقه مش طبيعيه مشاعر ودموع ودنيا حايسه..
خليل بضحكه:باهي انزلي ديرلنا حاجه جازورتي..
نسيبه فنصت وقالت؛ع الكلمه هادي ماك ضايق حاجه..سلام..وسكرت..
وهو يضحك من قلبه....
🌸وفي النهايه مشت مشت ودارتله معاها وخداها من قدام الباب وكملوا هدرزتهم للفجر🌸
•••••••°°°°°°•••••••°°°°°°°°••••••••
الساعه الخامسه عصرا...
في احدي عيادات الطب النفسي...
"هو توا زي وضعه زي وضع المدمن ع المواد المخدرة حتكون عنده اعراض انسحاب لازم ترافقه وتكون معاه فيها.."
مجاهد:دكتورة يعني في امل انه يتخلص من الحاجه هادي..
الدكتورة:طبعا اكيد..
مجاهد؛بإذن الله..باهي دكتورة اني توا نفكر ندخله الجامع يقرا اكيد القرآن حيكون ليه دور في العلاج..
الدكتورة غيرت عيونها عنه وهي تفكر بعدين شبحتله وقالت؛صدقا ماننصحكش بالشي هدا..
عقد حواجبه بإستغراب..
الدكتورة :مع الاسف الشديد في حالات جوني لاطفال اصغر من خوك وفي عمره تعلموا الحاجات هادي من الجامع..
مجاهد بصدمه:كيف!!
الدكتورة:والله زي مانحكيلك ياخوي..مع الاسف الشديد الشيخ حافظ القرآن معلم القرآن هو اللي يمارس في الرذيله مع الطلاب..
مجاهد قاعد يشبح للدكتورة بعدم استيعاب..
الدكتورة بأسف:لحد الآن اني مش عارفه شن اللي يخلي حافظ لكتاب الله حافظ قصة لوط وعذابهم اللي انذكرت اكثر من مرة يدير هكي...
مجاهد؛كارثه والله كارثه..
الدكتورة؛فعلا كارثه..لهدا ننصحك تركز ع مساعدتك انت وافراد العيله ليه..يعني مثلا انت قتلي ان عندك اخت تعرف بالمشكله خليها حتى هي تساعد خوها..
مجاهد؛لكن هو مايعرفش انها تعرف..
الدكتورة؛تساعده بدون ماتحسسه انها تعرف...تقرب منه تكون صديقته تحتوي دور الاخت في حياة خوها ليه تأثير اقوى ع فكرة من تأثير الأخ..
مجاهد هز راسه بإيجاب وقال:إن شاء الله...
••••••°°°°°°°••••••••
في وحده مدن الألعاب...
كان موجود هو وبناته واخته وخالته....
برغم انشغاله ماباش يكسر بخاطر بناته اللي اصروا يطلعوا معاه هو بالذات...
ريحان؛بابا زيد قوي دريجحه طيرني..
هيثم بضحكه؛حاضر...ودفها بشي من القوة وهو يقول...هي طيري هي..
وهي تضحك بحماس..
جنان:طيرني حتى اني بابا..
نسيبه:وشن مش عاجباتك اني ياجحشه..
جنان؛نبي بابا..
هيثم بضحكه؛حاضر حبيبتي راجي شويه..
وسارة وماجده مقعمزين ع كراسي بحداهم ويتفرجوا..
ماجده كانت سرحانه...لكن سارة كانت ملاحظه الناس ونظراتهم...
~~~~~~~
♡كانوا يتكلموا ويشبحوا لبابا..وبابا حسيته ملاحظ بس يتجاهل فيهم...
~~~~~~
هيثم؛هي خلاص بابا ريحان دور جنونه..
ريحان نزلت من الدريجحه وكان باين فيها تعب..
مشت طول لأختها سارة...
وهيثم كان مركز على جنان مالاحظهاش..
نسيبه:حبيبي ريحونه تعالي نمشوا للدويرة هديكا..
ركزت عليها تمشي بتعب..
عقدت حواجبها بإستغراب ومشتلها..
هيثم؛شدي كويس جنان..
جنان؛شديت بابا..
...وصلت نسيبه في ريحان وشدت يدها وهي تقول..
نسيبه؛حرجتي ريحونه...
وهي داهشه:لالا..
سارة وهي تشبحلهم لاحظت حالة اختها ناضتلها بسرعه...
سارة بخوف؛خيرك ريحونه..
ريحان وهي داهشه :شي...
....هيثم لاحظهم.....
وقف جنان وقال:انزلي بابا..
ومشالهم بسرعه...وجنان نزلت ولحقاته تجري...
هيثم:ترا شويه....
بعدوا نسيبه وسارة وهما بيموتوا من الخوف..
هيثم وهو مقعمز ع روس صباعه قدام بنته شد ايديها وقال:خيرك بابا..
هي قربت من بوها وضماته...وهي مازال داهشه..
هيثم بخوف رفعها وقال:بروا اركبوا هيا..
ماجده؛ياحليلي خيرها البنت..
ومشوا كلهم ورا هيثم متجهين للسيارة...وعيون الناس مازال تراقب فيهم..
••••••••°°°°°°°•••••••°°°°°°°••••••
في مركز الادمان..
في الباحه.....هواء نقي..ومنظر حلو كله خضرة...
كانوا مقعمزين ع الأرضيه المعشبه...يسمعوا للضيف اللي كان واقف قدامهم يحكيلهم عن قصته اللي تلامس واقعهم وممكن تشبه قصصهم...
ريان:انا مثلي مثل اي شب...كانت عندي طموح بالحياة وحابب اوصلوا..وكانت اول خطوه لتحقيق هالهدف هي الهجرة...
بعد ماخلصت جامعه وتخرجت رحت ع اوروبا برغم معارضه الاهل ورجاء وتوسلات والدي الله يحفظها...كنت مصر على اني حقق هدفي وطموحي وبس..كنت عم شوفوا قدامي وانا واعي وانا نايم ...سيطر علي وتملكني تماما...
المهم...هاجرت وبلشت اشتغل وكمل دراسه وكان شغلي بمجال التجاره مجال دراستي...والله وقفني ونجحت بالدارسه والشغل نجاح كبير..ضليت عم اشتغل طول الوقت عم اشتغل بس لحتى وصل للي بدي وياه وكون رجال المال والأعمال..
الشغل هونيك والحياة هونيك بيخلوا الانسان غصب عنوا يصير تفكيروا مادي...ويبعد عن كل شي الوا علاقه بالروح والقلب الايمان..
لكون صريح اني كنت مسلم بس بالهويه مو اكثر..مابصلي..وكنت بصوم ببلدي من باب العادات والتقاليد بس..ولما عشت بأوروبا حتى الصيام تركناه...ولكون صريح اكثر..حسيت حالي بوقت من الاوقات فقدت ايماني بالمرة..
بهداك البلد لما بتروح وتختلط بالناس وتعيش معهن تبهرك طريقة حياتن وتفكيرن وتحس ان هن صح ونحن غلط...
يعني نحنا شو عملنا بالدين رجعنا لورا وتخلفنا..وهن لما بعدوا ع الدين نجحوا وقادوا العالم..
لهداكا الوقت كان هدا تفكيري...
المهم...ضليتني عم انجح اكثر واكثر لحتى وصلت للذروة...وقررت ادخل ع البورصه..
دخلت انا وثلاثه من اصدقائي من هديك البلد...وكنا متأكدين انا رح نربح لأننا اتبعنا استراتيجيه معينه بالشغل...وواثقين من حالنا كثير...
لكن...ثقتنا الكبيرة بحالنا عمتنا...بعد ماطرنا فوق هوينا ع الارض مثل ماوقعت اسهمنا وخسرنا كل شي كان معنا وافلسنا تماما...كانت ضربة قاضيه قضت علينا تماما..
ضحك وقال...مذكر لما سمعت بالخبر...حطيت ايديي ع راسي واول كلمه طلعت مني ...ياالله...
تنهد بألم بعدين قال...حجزوا ع كل شي معانا حتى ع بيوتنا وصفينا بالشارع...
تسكرت بوجوهنا تماما...احبطنا تحطمنا نفسيا دخلنا بحالة اكتئاب...
واحد من شركائي رجع لعند اهلو بقريه صغيره بهداكا البلد وظل هونيك قضى حياته بالنوم هروبا من الواقع...لعند مالقوه ميت بتختو...
والتاني كان عم يتردد معي ع البارات وعمل مشكله كبيرة ضرب فيا واحد قتلوا وفات ع السجن...
والثالت...انتحر...
ماظل حد غيري انا...اللي ادمنت ع المخدرات...وظليت عم اشتغل بالبار اللي كنت روح عليه لحتى حصل مصاري اشتري فيهن المخدرات...
مرر نظره عليهم وقال...اكيد سألتوا حالكن ليش مارجع ع بلدوا لعند اهلوا...انا رج جاوبكن بكل بساطه...ماكان الي عين...ماقدرت..ماقدرت ارجعلن وانا فاشل وضايع ومنتهي...ماكان بدي اسمع كلمة...قلنالك لاتروح...
المهم..بيوم...اضطريت اسرق من المحل اللي عم اشتغل فيه وانكشفت..ضحك وقال...واتقلعت...
وضليت بالشارع مافي سقف يأويني..ولاأكل ...ولا مخدرات..وهدا كان اصعب شي...تعذبت وكنت رح موت من العذاب...وبعز النوبه اخدوني ناس شافوني بالشارع واني عم عاني من اعراض الانسحاب...اخدوني ع مركز علاج ادمان حكومي...
تعذبت هونيك اكثر بس كنت عم اتعالج وعم بيعاملوني معامله انسانيه....حاولت انتحر اكثر من مرة بس هني كم ينقذوني بكل مرة..
....شبح زياد لفاتح وفاتح كان مركز مع ريان اللي تابع يقول...
وانقضت مدة علاجي وصار لازم اطلع وهدا اللي كنت خايف منو رح للشارع مرة تانيه..وين بدي روح...
مكان معي شي غير شنطة فيها شويه ملابس واوراق تخصني وجواز سفري وبس...
طلعت فيهن وظليت عم سوح بالشوارع...كان شتي والجو بارد...ثلج....ماكنت قادر امشي من البرد..
وقفت بمكان تحت مبنى...كان فيه مثل الظليله قعدت تحتا وعم ارجف من بردي...كنت مفكر حالي اني رح موت من البرد والجوع وهونيك استلسمت للقدر تماما وقلت انها النهايه...ضحك وقال...بس الله اراد انها تكون البدايه....
••••••••°°°°°°°°••••••••
في غرفة الفحص الطبي بأحدي المستشفيات...
كان موجود مع صديقه...والزوز يشوفوا في صورة  قلب بنته بجهاز"الإيكو"...
صديقه قال:الوضع واضح قدامك دكتور الادويه مادارتش نتيجه..لازم من التدخل الجراحي..
هيثم قعد يشوف لبنته وهي راقده بنظرات الم قال:بتوقف حياتها كلها لو دارتها ..
الدكتور:مؤقتا دكتور مؤقتا بش ترتاح مستقبلا يادكتور بإذن الله وتعيش حياتها زيها زي غيرها...
غمض عيونه وتنهد بألم بعدين فتحهم وهو يشبحلها وقال...
الله المستعان...ولاحول ولاقوة إلا بالله....

يتبع …