#البطل_المغمور"شمس الغروب"
#الجزء_الخامس_والعشرين"القسم الثالث"
#الجمان_الفريد
الصلاة اولا....💓💓💓
🍁🍁🍁🍁🍁🍁🍁🍁🍁🍁🍁🍁🍁🍁🍁🍁🍁
💐...
في حوش الكاتب...
في الصالة تحديدا...
اللي كانوا مجتمعين مع نسيبه...
ماجده وضرتها سدينه...وعفاف...ولجين...
لجين:هو توا اهم شي الراجل ينوض منها...
نسيبه بحزن:والله قعدت ندعيله في كل وقت ينوض منها..
عفاف:حتى حني ندعوله...لكن زياد لتوا ماعرفتولاش طريق!؟
نسيبه بحزن:تس..
ماجده بألم:ااخ بس ياربي وين كان مدرق هدا كله..
سدينه:قضاء ربي وقدرة ياماجده...ادعيله يفرج ويدير لزياد مسكين طريق..
ماجده:يارب يارب طلعنا من هالمصيبة على خير يارب..
كلهم بأصوات متقطعه قالوا:آمين...
....في دار سارة....
دانيه:معقوله مافيش مرة حاول يتواصل معاكم فيها ؟!
سارة بدموع:بكل يادانيه لينا شهر لتوا لاريناه ولاسمعنا صوته..
دانيه:وعمي هيثم مايعرفش عليه شي؟!
سارة رشفت وقالت:متأكده انه يعرف بس مايبيش يقول اني مانبيش نصدق الاشاعات اللي نسمع..لما دار حادث بالسيارة وقت اللي خش سباق غير قانوني ماخلوا ماطلعوا عليه وكله كذب..وتوا بعد اللي صار رجعوا طلعوا نفس الدوة..
تهاني قعدت تشبح لسارة بضيق واحتفظت بصمتها..
دانيه:طبعا عاد توا ماصدقوا حصلوا جنازة بيشبعوا فيها لطم..
رشفت سارة وهي رافعه عيونها فوق وقالت:حسبنا الله ونعم الوكيل...
تهاني:شن حال عمي هيثم بكري شفته حسيته شاد روحه..
سارة بنبرة باكيه:والله توا خوفي عليه هو اكبر مع المرض اللي جاه..خايفه مايتحملش...وحطت ايديها ع فمها وهي تكتم في بكاها..
مسحت تهاني ع ظهرها وقالت:ربي يحفظه ويكون معاه..
دانيه وهي حاطه يدها ع رجل سارة:ربي يخليه ويطول في عمره ويفرج من عنده عن قريب..
سارة حولت ايديها وقالت بنبرة ألم:يارب..يارب...
🍁🍁🍁🍁
وهيثم في هالوقت كان في غرفة العمليات...
يدير في العمليه بدقه وانتباه مبالغ فيهم...وكل اللي كانوا معاه ملاحظين هالشي والسبب بالنسبه ليهم معروف...
▪▪▪▪
◇مافيش عملية درتها في حياتي من لما بديت الخدمه في تخصصي كنت متوتر فيها زي توا..
يقولوا طبيب الجراحه لازم يكونوا أعصابه تلاجه..واني كنت على طول هكي...الا فهالمرة..برغم بساطة العمليه قدام هلبه عمليات درتهم في السنين الأخيرة...
في حالات كانت نسبة النجاح فيها ضعيف لكن بفضل الله كانت تنجح والحمد لله وكنت مبرد فيها اعصابي ع الآخر واثق من ربي..ومن ثم نفسي...بس هادي...
كنت خايف..ومش واثق الا بالله وبس...
ولاحول ولاقوة إلا بالله....
▪▪▪▪▪
غمض عيونه وخدي نفس عميق بعدين قال:الحمد لله..
وفتح عيونه...
:الحمد لله دكتور العمليه ناجحه..
هز هيثم راسه وشبح لوجه الأستاذ وهو يفكر هل ياترى بعد يفيق حيرضى يتنازل ؟!..
.....بعد طلع هيثم من غرفة العمليات....
بشر اهله بنجاح العمليه...
وامه قعدت تدعي لهيثم وتقول انها حتخلي ولدها يتنازل بعد يفيق..
وسبب تغيير موقفها وثباتها ع التغيير معرفتها ان مشكلة القلب عند ولدها ماانكشفتش الا بعد اصابته ع راسه في عركته مع زياد..!
🍁🍁🍁🍁
في مكتب الدكتور المسؤول عن حالة الأستاذ...
الدكتور:صارله نزيف قدرنا نوقفوه ولما حطيناه في العناية المشددة كان من باب زيادة الاطمئنان لاأكثر..لكن اللي صار قبل كم ساعه اربكنا ماعرفناش من البداية السبب وبعد مافحصنا القلب عرفنا المشكلة اللي كانت حتشكل خطورة ع حياته وين..وسبحان الله وجودك في المستشفى انقده..
هيثم:يعني ع هكي بشكل عام..معاش في خطر ع حياته نهائيا بفضل الله..الحمد لله..
الدكتور ابتسم بأسف وقال:ان شاء الله هالشي يفيدكم..
هيثم غمض عيونه وهز راسه بإيجاب بعدين فتحهم وقال:ان شاء الله...
🍁🍁🍁🍁
طلع من المستشفى...
وتوجه لأقرب مسجد بش يصلي صلاة المغرب..
وماسلمش كذلك من نظرات الناس وهمسهم عليه..
ووللأسف في بعض من الناس عبارة عن عاهات ...
زي اللي قاعده يصور في هيثم وهو يصلي في راتبه المغرب بدون ماحد يحس بيه..
وبعد ماصور...
مشي طول طلع من المسجد...
كتب منشور ونزل الفيديو على وحده من المجموعات المعروفه ع الفيس بوك...
والتفاعل عليه كان رهيب...وانتشاره كان رهيب اكثر...
•••••°°°°°•••••°°°°°••••••
الساعه الثامنه مساءا..
"هيثم الكاتب يلمع في صورة مشوشه"
عفاف:ترا نشوف..
مدت تهاني الهاتف لأمها...
عفاف وهي تتفرج ع الفيديو:من نهار عرفناه وصلاته في الجامع..
تهاني:وهما هني داروه مرائي ويبي يلمع صورته..
عفاف:خزي..ناس مرضى...
..........
"يقولوا فيها الجمل لما يطيح يكثروا جزارته"
سارة ببكي:حسبنا الله ونعم الوكيل يعني بيقعدوا شادينها في جرته هكي..حتى وهو يصلي مش سالم منهم!؟
نسيبه بعصبيه ودموعها في عيونها:الناس هني هكي مايصدقوا تصير مشكله لحد باهي وسمعته نظيفه..يفرحوا بيها ويبدوا يشوهوا فيه...
سارة قعدت تشبح للتعليقات اللي نازلين في بوها وخوها فيه اكثر من اللي يدافعوا...
استغربت في الناس كيف مايشفعش لواحد زي بوها اللي داره من خير عندهم!!
لا وكأنهم زي ماقالت عمتها يفرحوا لما تتشوه صورة حد نظيف ع بالهم هما مازال خير منه...وان كل المدح والشكر انقالوا فيه خلال الفترة اللي فاتت ماكانش بيستحقهم...
وان كل من كان يمدح فيه ويتكلم عن انجازاته ينفخ فيه ع الفاضي...
للحظه مر قدام عيونها شريط حياة من لما وعت ع الدنيا وهي تشوف في بوها كيف تعب واجتهد وواصل الليل بالنهار بش يبني مكانته اسمه في عالم المهنة متاعه وبين الناس..
وفي خلال اقل من ساعه غلطه من ولده...
مسحت كل شي...
خدت نفس ومسحت دموعها وقالت:زي ماقال هو...لازم نقاوموا....الجاي اصعب هكي..لازم نتعودوا ونتعايشوا معاه ومانخلوا شي يكسرنا حني عارفين رواحنا كويس..ويكفي ان ربي عارفنا..
ضحكت نسيبه من بين دموعها وقالت:ايوه..هكي خليك..هدا الصح..
ابتسمت سارة وهي تمسح في دموعها بعدين ناضت وقالت:بنمشي نحدد بدلتي..
غمضت نسيبه عيونها وفتحتهم وهي مبتسمه..
مشت سارة لدارها..
وعيون عمتها معاها لين ادرقت من قدامهم...
تلاشت ابتسامتها وتبدلت بملامح القلق...غيرت عيونها ناحية الروشن وهي تشوفله وتفكر...شن مازال يشوفوا وشن مازال يراجي فيهم...
••••••°°°°°°••••••°°°°°°•••••••
في إحدى شوارع العاصمة..
تحديدا في سيارة هيثم....
كان مقعمز مع راجح ويسمع منه اخر المستجدات..
راجح:لما يفيق جلال الوافي"الأستاذ" حيحققوا معاه ويعرفوا شن اللي صار بالزبط...
هيثم عقد حواجبه وقال:باهي..الكاميرات اللي صورت الحادث..تبان وكأنها صوت جزء من المشكله..اني تفرجت ع الفيديو اكثر من مرة لاحظت...وقعد يمثل بإيديه...ان بدايته زياد يدف فيه اكثر من مرة وبعدين دفعه بقوة وطاح...فاهم عليا؟
راجح:ايه فاهم عليك..وهالشي لاحظوه ضباط التحقيق كذلك لهذا هما يبوا يعرفوا اللي صار بالزبط من جلال..وحتى من زياد...المشكله ان هروب زياد...حيزيد يثبت عليه التهمه اكثر..
هيثم فرك جبهته وهو يقول:معقوله ماقدرتوش توصلوله ولاتوصلوا لأي شي يدل عليه هو اللي معاه..
راجح:في طرابلس كلها ملهمش وجود..
هيثم عقد حواجبه وقال:كيف قصدك ممكن يكونوا طلعوا برا البلاد!
راجح:تس تس..مستبعد هالشي..بس الأكيد انهم طلعوا برا طرابلس..الريقا معروف بقدرته على التخفي والأختفاء نذكر قبل عامين لما شدوه قعدوا ستة شهور يدوروا..
هيثم بصدمه:سته شهور!
راجح تنهد:هدا قبل بس توا بإذن الله حنلقوه في اقرب وقت..
هيثم شبح القدام وهو يفكر بقلق...
راجح:مرات يتصل بيكم..
شبحله هيثم..
راجح:في حالة صار شي زي هدا..حاولوا تقنعوه يجي يسلم نفسه اسلمله...
ارتسمت ع وجه هيثم ملامح الألم...رجع شاف القدام وهز راسه بإيجاب..
راجح تنهد وقال:إن شاء الله خير...نستأذن منك...
هيثم بصوت مبحوح:مشكور جدا..
راجح:العفو..
وفتح باب السيارة ونزل وسكره ومشي..
وهيثم تحرك طول...
وبدت السيناريوهات السودا تنكتب في عقله...
لقي روحه وصل لأقصى مراحل الخوف..
حس برعشة ضربت جسمه...وبدي قطرات العرق تطيح ...
بصعوبه وقف السيارة على جنب...
حاول يشد الدومان ويشد نفسه كذلك ويقاول..ولان لسانه ثقل..
بقلبه قعد يردد..
لاحول ولاقوة الابالله...
صدفه خطموا جنب سيارته تلاته نساوين كبار..
وحده منهم شافت للسيارة وركزت عليه وع وضعه قالت:خيره الراجل!! شوفوه..
صويحباتها شافوه...وحده منهم قالت:شكله دايخ..
قدموله التلاته..
وقفت وحدة منهم ع الروشن وقالت:خيرك وليدي شن تحس؟
هيثم قعد يشبحله بعيون اللي مدبلهم التعب..واتكى براسه ع ع الكلاكس وبدت الصوت يطلع..
انخلعوا التلاته ووحده قالت بهلع:سكره نازل السكر..
طلعت وحده من جيبها طرف حلوة وفتحاته..
وصاحبتها فتحت باب السيارة...
قربتله اللي فيدها الحلوة وقعدت توكله فيه..
هيثم قعد يمص فيه بتعب وهما يشبحوله..
وحده منهم قالت:عندك عصير ولا..
طلعاته المعنيه من الشكارة...كان طرف صغير..
خداته صاحبتها وفتحاته..وحطت فيه الطوبو...وقربانه من فمه وهي تقول:اشرب وليدي اشرب..
التقمه هيثم وقعد يشرب...
وحده منهم قالت:هدا بقولي الوزير متاع الصحه ولا؟
=كان كان...
=الله يخلف عليه...هو اللي وفر الجرعه متاع الكيماوي في مستشفى ******ووليد بنت خوي بدي ترجعله صحته بعد مايحسابوه بيموت خلاص...
هيثم بعد باكو العصير..ورفع راسه شويه عن الدومان..
=عندك السكر وليدي؟
هيثم هز راسه بتعب..
=ياروحي...ربي يفرج عليك وليدي..
على جية زوز شباب واحد منهم قال:خير خير شن في؟
وحده من النساوين قالت:بالله وليدي ارفعوه المستشفى الراجل سكره هابط...
شبحوله الزوز وعرفوه...
واحد منهم:تعالى نزله معاي..
▪▪▪▪▪
◇ماكانش عندي حيل للكلام وقتها...ولاقدرت نبين رفضي حتى بملامح وجهي..
نزلوني الزوز قعمزوني من الخلف وركبوا السيارة...
الحق كنت خايف منهم...لكن فوضت الأمر كله لله واستودعته نفسي...
وطلعوا ولاد حلال وصلوني المستشفى...
▪▪▪▪▪
"عطينا رقم حد من عيلتك نكلموه يجي يروح بيك"
هيثم وهو مقعمز ع الباريلا قال بتعب:نعطيك رقم صديق كلمه وقوله مايبلغ حد..
الشاب:تمام....
•••••°°°°°°••••••°°°°°°••••••
خدي مفاتيحه من فوق الزيانه وتوجه للباب...
"ادعلينا ياشيخ"
قالت سجى هالكلام تهكما لراجلها اللي ماشي بيصلي العشاء..
شد مقبض والتفت شبحلها بنظرة تخوف..
سجى بتهكم:شني ماعجبكش الكلام! ولا عارف ان دعائك مش مستجاب..
تمالك اعصابك وقرر يتجاهلها ويطلع..
لكن هي وقفاته لما قالت:تحسابني مش عارفه شن قصدك من الجو اللي دير فيه!..راني نعرفك كويس ياريفو...وصدقني لو تولي شيخ الشيوخ سارة هادي ماهي معبراتك..
غمض عيونه وهو يحاول يكبت غضبه...
حرك مقبض الباب وفتحه وطلع وخداه وراه بقوة..
سجى قالت بحقد هامسه:ان شاء الله ماتوصل يامنافق...
🍁🍁🍁🍁
ضغطت ع كلمة نشر...
وتنهدت بحماس وتوتر...وهي تشوف لشاشة اللاب توب متاعها..
نزلت منشور طويل...دافعت فيه بكل ماتقدر عن بوها...
ربي عطاها قدرة وامكانيه في صياغة الكلمة بشكل مذهل يخش القلب وياخد العقل..
ولأول مرة تكتب بالعاميه..كانت تبي كلامها يقروه الناس كلها..
وفي عز حماسها لرؤية التفاعل والتعليقات..
سمعت آذان...طول ناضت من مكانها ومشت طلعت من الدار...
🌷وخلال الوقت اللي كانت فيه سارة منشغله..
بالإستعداد للصلاة...والصلاة...وقراءة القرآن..
كان منشورها مداير ضجه ع الفيسبوك..
وانتشر بسرعه...والتفاعل عليه كان قوي..
وقروه القريب والبعيد..
🌟البعيد...
الموجود في النص التاني من البلاد....
مجاهد...
اللي كان مقعمز في مكان عمله يقرا في المنشور وابتسامة اعجاب مرسومه ع وجهه...
بعد كمله...طلع من الفيس وخش ع جهات الإتصال في الهاتف..
.............
"كلامها يهبل ويجلد في نفس الوقت"
عبرت دانيه عن اعجابها بمنشور سارة بهالكلمات..
وبدت تكتب في تعليقها...فجأة طلع قدامها رقم خوها مجاهد..
ضحكت وفتحت الخط وردت:السلام عليكم جهودي..
مجاهد:وعليكم السلام يابطه شن جو
دانيه بضحكه:تمام الحمد لله...انت شن جوك وشن اخبارك..
مجاهد:اهو جو الخدمه...المهم ماشيه...قوليلي شن دايرين عيلة الدكتور هيثم..
تنهدت دانيه وقالت:يوجعوا كان تشوف حالهم مساكين ربي يفرج عليهم..
مجاهد حك حاجبه وقال:اممم..لكن..توا قريت منشور كاتباته بنته..تقريبا اسمها سارة ولا؟
ابتسمت وقال:ايه سارة قريته كله مش عادي..
مجاهد:صراحة الله يبارك عليها..انتقاء مفردات وقوة تعبير مش لسنها...
دانيه بإبتسامه:سارة في كل شي تبان اكبر من سنها عاقله ورزينه ومثقفه..
مجاهد ابتسم وقال:هدا علاش اني واثق ومتأكد ان الكلام اللي ينقال على خوها مافيش منه...اكيد في شي خلاه يدير اللي داره في حاجه ناقصه وحتطلع بعدين...ولد طلع من حوش زي حوش استاذ هيثم مايضيعش..
دانيه:كلنا قلنا هكي ربي يفرج عليهم..
مجاهد:إن شاء الله...ايه..شن حال امي وبوي ورشيد ورتاج رتاج معاش حصلتوها؟.
دانيه بضحكه:كانت عندنا امس..
مجاهد بضيق:احكيلي بصراحه دانيه شن حالها شن لاحظتي عليها شن حكتلك..مش مسامحك كان درقي ولاكذبتي..
دانيه ضحكت وقالت:والله لما نحكليك كل شي بتفاصيل المفصله بش يتحول منك خوفك عليها..
ربع يده اليسار وقال:احكي نسمع....
••••••°°°°°••••••°°°°°••••••°°°°°••••••
الساعه التاسعه ليلا..
في الطريق..
هيثم:الحمد لله عداها على خير..
خليل:رد بالك مرة تانيه خليك حريص اكثر دكتور وشد حيلك..كله يعدي ان شاء الله كله يفوت...سيمر كل مر..
ابتسم هيثم وشبح لخليل...
وخليل مركز في الطريق وهو يقول:متعرف على شيخ ماشاء الله عنده علم الله يبارك..وكلامك زي بلسم ينزل ع القلب..
مرة كنت عنده نهدرز عليه مشي حكالي قصة النبي ايوب اكيد عارفها..
هيثم:اعجوبة الصبر..
ابتسم خليل وهو يلف بالسيارة وخش بيها لطريق حيهم وهو يقول:ياسيدي القصه هادي حكهالي بطريقه عكس اللي حني نعرفوها..
هيثم عقد حواجبه وقال:كيف؟
خليل:كيف...هدا ياسيدي بن سيد النبي ايوب كيف مانعرفوا كان اغنى الأغنياء ماديا..عايش في قصر ثروته كنوز..عنده صغار هلبه..مرته في قمة الجمال..وهو كان يعبد في ربي عبادة ماحد عبد زيها هداكا الوقت..
المهم مرة سمع ناس قالوا...ايوب يعبد في ربي هكي ع خاطر مبسوط ومرتاح..تو نشوفوه لو ربي ابتلاه وخدي منه اللي عنده شن يدير..
هني النبي ايوب ركبه الخوف وقعد يفكر في كلامهم معقوله هو لو ربي خدي منه كل شي حيبعد عنه ويكفر!؟
الراجل الموضوع تعبه وركبه الوسواس ماكانش همه لافلوسه ولااي شي عنده كل همه ايمانه اللي خاف عليه..
ومن كثر ماقعد يفكر في الموضوع صدق خلاص ان ربي ممكن يبتليه بش يختبر ايمانه.....
وفعلا جي هاليوم...وشوف هاه من ظنه ان ربي حيختبره جاه ماظن...
وخسر كل شي عنده حتى صغاره وصحته لدرجة انه ولى طريح الفراش..ومن الفقر مرته باعت شعرها بش تشري ماياكلوا..
المهم هو طول فترة الابتلاء..قعد يفكر مع نفسه اهو طلع ايمانه بالله قوي في كل حالاته وصبر..باهي علاش وصل للمرحلة هادي لمرحلة ان مرته تقص شعرها وتبيعه!
حس ان في حاجه عنده ناقصه..والحاجه هادي هي اللي وصلاته لهني..
وسوسة الشيطان اللي هو مشي وراها ان رب العالمين لازم يبتليه بش يشوف ايمانه..وانه توقعه في ربي اللي تسببله فيه الشيطان بوساسه هو اللي وصله لهني..
هيثم: ان عند ظني عبدي بي..
خليل:ايوااااه عليك نور هي هادي..فهم النبي ايوب الحاجه هيا وهني دعي ربي وقاله مش حافظها الآيه كويس..بمعنى ياربي الشيطان ضرني..
هيثم ابتسم وقال:اني مسني الشيطان بنصب وعذاب..
خليل بضحكه احراج:هي هادي..ولما خلاص وصل للمقصود وعرف النقص متاعه وين ودعي ربي يرفع عنه الابتلاء ربي رفعه عنه...وعطاه اضعاف اضعاف ماكان عنده وردله شبابه وهو مرته...الشاهد من القصه..ان الواحد مفروض ديما يكون ظنه بالله خير..وان ربي رب خير لايأتي الا بالخير..
هيثم ضحك وربت بيده ع كتف خليل وقال:ممنون لربي اللي خلاني نكلمك انت تجي تروح بيا..
ضحك خليل بعدين قال:وصلنا..
وخشوا للزنقه ولما درس خليل وجي بينزل قاله هيثم:نبيك شويه..خش معاي الحوش..
خليل شبحله وقال:تمام..
....وخش خليل بالسيارة للحوش....
ونسيبه وسارة لما سمعوا صوت الباب طول وقفوا في الروشن وقعدوا يشوفوا...
تفاجئوا لما شافوا خليل نازل من باب السواق وهيثم نزل من الباب التاني..
سارة بخوف:بابا صارتله حاجه واضحه!
نسيبه بقلق:اهدي حبيبتي اهو قدامك واقف على رجليه مافيه شي...
.....برا....
هيثم جي لخليل وقف قدامه وحط يده ع كتفه وقال:اني معروف عني راجل مانحطش ثقتي في أي حد بالساهل لو مالقيتاش قدها مستحيل نعطيه ثقتي لو شن يدير..وانت ياخليل قدرت تكسب ثقتي بسرعه وسهوله..والحمد لله طلع عندي فراسة قوية تخليني نعرف الناس من نظرة..ضحك وكمل يقول بعد ماتنهد....خليل...بلع ريقه وشبح لعيونه بتركيز وقال...نبي مساعدتك..ونبي نأمنك على سر..
خليل عقد حواجبه وقال:حاضر باللي تبيه وسرك يقعد في قلبي لاخر نفس..
تنهد هيثم تاني وقال بصوت مخنوق:للأسف ولدي زياد مخلط ع ناس ماتنفعش خلوه...يولي مدمن...
خليل نزل عيونه وشبح لسبيدروه وهو عاقد حواجبه..
هيثم وهو يحاول يتماسك:هدا اللي صار...هادي نتيجة تربيتي الغلط ليه...
رفع خليل عيونه وشبح لهيثم وهو متفاجئ..
هيثم هز راسه وقال:ايه ربيته غلط...ماقدرتش نكونله زي ماكانلكم بوكم...
انصدم خليل..
هيثم:ايه صح بوكم غلط معاكم هلبه...لكن ماخلاكمش تهربوا منه...لكن اني خليت ولدي يهرب مني..
عقد خليل حواجبه بحزن وهو يشوف لهيثم كيف يحاول شد دموعه بقوة ويداريها..
هيثم تزل يدها وشبكها مع التانيه وهو يشبحلهم وقال:المهم توا..نبي منك تساعدني نلقاه..شبحله وقاله..ضروري نلقاه في أسرع...الشخص الموجود معاه..واحد معروف في عالم تجارة المخدرات...فقلت...سكت...بعدين مصمص شواربه وبعد عيونه عنه وقال...انت...يعني...تنهد ورجع شافله وقال...ممكن تكون ليك بيه سابق معرفه..
ابتسم خليل على جنب وقال:فاهم عليك...مش مشكله..مايحشمك شي..انت عطيني اسمه واني نقولك لو كنت نعرفه ولالا..
هيثم فك ايديه من بعض وقال:عبد الملك الفرجاني الملقب "ريقا"
خليل هز راسه وقال:نعرفه..
هيثم رفع حواجبه وقال:جديات!
خليل :وعز المعرفه..حط يده ع صدره وقال...خلي الموضوع عليا..وتو نعرف نتصرف..
هيثم ثقته في خليل كانت قويه لدرجة انه جاه احساس قوي ان لقي زياد خلاص...
بدون مايشعر لقي روحه حاضن خليل..
خليل تفاجئ وهو يضحك وضم هيثم حتى هو..
هيثم:لين نموت مش حننسالك معروفك ياخليل..
خليل:خل نلقاه الأول..
هيثم بعد عنه وقال:شن كنت تحكيلي وحني مروحين !
ضحك خليل وهز راسه وقال:صح صح..بإذن الله حنلقاه..
ربت هيثم ع ذراع خليل وقال:ربي يحفظك ياقدع..
ابتسم خليل وقال:ويحفظك دكتور...ماتبي شي تاني..
هيثم:اقعد تعشى..
خليل:لالا مرة تانيه ان شاء الله امي تراجي فيا تبيني نتعشى معاها..
هيثم حط ايديه في جيوبه وقال:لا كان امك تبي تتعشى معاها مافيهاش كيف...مرة تانيه ان شاء الله وخلاص..
خليل مد يده وقال:ان شاء الله...لاباس عليك والفرج قريب بعون الله..
صافحه هيثم وقال:بإذن الواحد الأحد..جزام الله خير ياخليل..
خليل:تسلم دكتور..تصبح على خير..
وطلقوا ايدين بعض وهيثم قال:قدامك كل خير..
كيف جاي خليل بيلف جو عيونه ع نسيبه واقفه في الروشن..
مش عارف شن جاه خلاه رجليه يتيبسوا وعيونه يثبتوا عليها..
هيثم لاحظ والتفت شبح وين مايشبح خليل..
شاف الستار تحرك قال:اكيد مشغولين عليا توا..
خليل استاقظ وشبحله وقال وهو يحاول يخفي ربكته:ايه اكيد..
ولف ومشي للباب وقلبه يدق بقوة..
....عند الروشن....
نسيبه ووجهها احمر:زعمه شن يبي منه؟!
سارة وهي مركزة في وجه عمتها:اكيد شي يخص زياد..
سمعوا صوت تسكير الباب...شبحوا للروشن..
لقوه خاش ومتوجه للباب...
مشوا للباب بسرعه..
وصلوا فيه وشويه وهيثم فتحه لقاهم قدامه ...
هيثم:السلام عليكم...وسكر الباب...وهويقول...نبي نرقد ماخاطري نهدرز في شي نبي نرقد وبس..
نسيبه:تمام على راحتك اهم شي انت كويس صحتك تمام؟
هز راسه ومشي من حداهم وهو يقول:تصبحوا على خير...
نسيبه شبحت لسارة وقالت:خلاص بري لدارك وحاولي ترقدي غدوة وراك قراية ان شاء الله..
سارة هزت راسها بضيق وقالت:تصبحي على خير..
ومشت لدارها...
اما نسيبه مشت خشت للصاله...
حولت وشاحها ومشت بخطوات متعبه بإتجاه الكنبه اللي تحت الروشن وقعمزت...اتكت ع مسند الكنبه بمرفقها وحطت يدها تحت خدها وقعدت تشبح للجنان من الروشن..
عيونها على مكان خليل...ارتسمت ع وجهها ابتسامة وهي تذكر في اللي صار ...
بعدين تنهدت وقالت...زعمه شن يبي منك هيثم؟ وانت شن تقدر اديرله!.......
••••••••°°°°°°°•••••••°°°°°°°•••••••
الساعه السابعه والنصف صباحا..
طلعت من العمارة وهي شادة كتابها وتقرا ..
ومرة مرة تشبح قدامها...
لين وصلت لبداية الشارع...
دانيه:وينه هدا!..
....في نفس الوقت....
كان راجح راكب ع الموطو"دراجه ناريه" ومدرس قدام قهوة في بداية الشارع..
كان لاهي بتليفونه ويراجي طلبيه طلبها من القهوة..
تنهد..بعدين قام راسه...شافها عاطيه بالجنب وادور وتشوف للطرف..
راجح:هي هادي..
هي لفت وجهها للجهة التانيه من الطريق اللي كان واقف فيها..
جو عيونها في عيونه..
غيرتهم طول عنه وهي تشوف للطريق..
اما هو قعد مسهم فيها وخلاص ومعاش حس بنفسه..
ولما شاف ابتسامتها رفع حواجبه لإردايا..
وقعدت يتبع فيها بعيونه وهي ماشيه للباص..
لين وصلت فيه وركبت...
وعيونه قعدوا مع الباص وهو يقول:عندها الحق ماترتاحلهاش!
"تفضل خوي"..
شبح للعامل متاع القهوة وخدي منه الطلبيه وقال...نبيك تحفظ وجهي..من اليوم اني زبون دائم..
ابتسم العامل وقال: والله ان شاء الله مادا بينا...ومشي ولى للقهوة..
وراجح يضحك بعدين شرب من القهوة...
••••••°°°°°°•••••••°°°°°°°••••••
الساعه العاشرة صباحا..
واقفه قدام الكليه تراجي...وادور بعيونها في شخص ما ..
وهالشخص بان عليها...
ابتسمت وهي تشوفله واشرتله بيدها...
هو وصل فيها قال:اووو شيتا شن جو..
ملاك بضحكه:بيك حلو...
= ايه قولي شن جابنا على بالك؟
ملاك:غير تعالى معاي خل نعزمك ع فطور قنين بعدين نهدرزوا...
=نلقاني جعان هي عدي قدامي..
ضحكت ملاك ومشت وهو مشي معاها..
فاتوا من قدام رتاج اللي كانت مقعمزة وهي تشوف لتليفونها وتتصفح في الفيس...
كانت في قمة الأناقه ولابسه الغالي والماركه...
وحاطه مكياج بسيط...ومتعطره...
🥀وهذا حال بعض من البنات اللي تعيش في حوش حياة كلها كبت وحرمان بدون توجيه صحيح..وهالعيشه خلتها تشوف كل شي انحرمت منه حق طبيعي ليها لهذا اول ماتحصل فرصه دير كل شي في خاطرها حتى لو كان غلط🥀
شبحت ساعة هاتفها لقت وقت المحاضرة قرب..
نزل تليفونها وجت بتمشي..
وقفت جامده في مكانها لما شافت جهاد واقف قدامها بمسافه..حاط ايديه في جيوبه ومغطي عيونه بنظارات سود وهو يشبحلها..
ابتسم ع جنب...ورفع يده وحياها وهو يحرك في صوابعه...
وهي واقفه في مكانها تشبحله بصدمه خلتها مش قادره ترمش عيونها...
يتبع…
ياريت معاش تتسعجلوا الأحداث وتسألوا اسئله مش في مكانها..اصبروا وبإذن الله حتلقوني موضحتلكم كل شي مع كل جزء إن شاء الله》
