#البطل_المغمور"شمس الغروب"
#الجزء_العاشر
#Goman_Fared💕
💐..
فتح على بوه باب المربوعه وخش وصكر الباب..
خالد وهو يتفرج ع التلفزيون قال:شفت شفت..
رفيق بصدمه:مش هدا اللي زمان قريب قتلك؟
هز خالد راسه بإيجاب..
رفيق حرك راسه يمين ويسار وقال:لالا هدا في من وراه ووصله لهني..
خالد قعد يشبح لإسم وزير الداخليه في شريط الخبر العاجل بنظرات كره...
•••°°°°••••°°°°••••
في مكتب اجتماعات وحده مكافحة المخدرات..
بعد نهاية احدي الإجتماعات..
"مش لاقي وين تحط فرحتك"
راجح بضحكه:اكيد..واخيرا الرجل المناسب في المكان المناسب...
زميله:هو جريء ومايخافش ومش حيخلوه في حاله..
راجح:وهو مش حيخليهم في حالهم نعرفه كويس الراجل هدا..وغير هكي عنده معاهم ثار وهو اللي يحرك فيه..هو اللي وصله لحقيبة وزارة الداخليه مرة وحده..
زميله هز راسه وهو يفكر في كلامه بعدين شبحله وقال:قاعد تراقب في عيت خالد..
ضيق عيونه وقال:ايه وراهم ع العفسه لكن في حاجه صارت اليوم لفتت انتباهي هلبه...
زميله:حاجة شني؟
راجح:اليوم صارت عركه بين واحد من رجال الأجدم مع خليل ولد خالد الكبير..كان حيقتله..
زميله؛ماادخلتش!؟
راجح:في اللحظه اللي كنت بندخل فيها سبقتني وحده جاية تجري بحديده خبطت بيها راس راجل الاجدم اللي جاي بيقتل خليل..
زميله:قصدك وحده تانيه غير ملاك؟!
راجح:وحده تانيه غير ملاك..الأغرب ان خليل خداها بالإجبار وردها لسيارتها وبان عليا انه يعارك فيها هكي فهمت انها مش في جوهم..
زميله :وانت اكيد قعدت وراها لين عرفت وين تسكن..
راجح رفع حواجبه ونزلهم وهو يقول:اكيد..
زميله:وخديت عنها معلومات!
راجح:وطلعت جارة خالد..قصدي اخت جار خالد ولو تعرف من يكون جار خالد اللي هي اخته..
زميله ضيق عيونه وقال؛مني؟!
ابتسم راجح ابتسامة جانبيه وقال:الدكتور هيثم عبدالحكيم الكاتب.. وزير الصحه الجديد..
فتح صاحبه عيونه ع وسعهم بصدمه..
وهو بنفس الإبتسامه قعد يهز فراسه بإيجاب تأكيدا لما قال...
••••°°°°••••°°°°••••
"قصدك عارفه!"
أسيمه بضحكه:مش بالزبط..
نسيبه:وااك وكيف قدرتي ادسيها كان اني بكيتها من اول ماقالي..
ضحكت أسيمه..
نسيبه ابتسمت بحماس وقالت:والله لما نقعد وراه لين يرد عليا..
وناضت من حداهم بتليفونها ومشت طلعت للفيرندا..
اسيمه بعد ماكانت تشوفلها شبحت لزياد وسارة..
الزوز كانت ملامح وجوههم بارده ولاكأنه في حاجه..
أسيمه:مش فرحانين!؟
زياد شبحلها وقال:بشني؟
اسيمه رفعت حواجبها وقالت:تستعبط!
قلب عيونه بملل وشبح للتلفزيون وقال:عادي..
غيرت اسيمه عيونها عنه وشبحت لسارة..
سارة:ايه صح ماما عادي..
اسيمه غيرت عيونها عنها لخوها..
وقعدت تمرر فنظرها عليهم وهي تفكر لعند ماوصلت لنتيجه ان برود صغارها هدا اتجاه بوهم هو رد فعل لبرود بوهم اتجاههم..
ع قد ماداروا عمره ماشاف لنجاحاتهم بعين التقدير..
كان ديما يستخف بيها ويتجاهل فيها..
وجي دروهم هما اليوم يتجاهلوا نجاحاته وانجازاته..
التفتت فجأة لما سمعت نسيبه تتكلم بالتليفون..
نسيبه بنبرة فرح؛ايه ياموجي ايه ريتي ولد اختك ماشاء الله عليه!........لالا من بكري نخبط عليه نلقى فيه مشغول خلاص توا ولى مسؤول معاش نوصلوا فيه إلا بموعد.......
ابتسمت أسيمه وهي تسمع فيها..
▪▪▪▪
◇هداكا اليوم ماقدرتش نتنفس من التملق والنفاق وسيل المباركات والتهاني في ناس ليا سنين مافيش بيني وبينهم تواصل كلموني يومها...اني من هديكا اللحظه استثقلت المسؤوليه الجديده هلبه برغم انها اكبر اهدافي واخر محطه من محطات أحلامي..لكن حملها ثقيل هلبه...
بس مع هذا كنت عازم ع تنفيد اللي خططتله بعد الوصول لهالمنصب وكنت هالمرة بأمس الحاجه للدعاء وكأني ماشي بنقاتل في جبهه حرب...هي فعلا جبهة حرب من نوع آخر..
▪▪▪▪
خشت ع أمها لوسط الحوش وفيدها تليفونها وهي تقول:سمعتي امي!
عفاف وهي تخيط في المنادير:شنو؟!
تهاني:عمي هيثم جارنا ولى وزير الصحه..
سيبت عفاف اللي فيدها وهي متفاجئة وقالت:بالله!..
جتها تهاني قعمزت حداها خدت الريموت وهي تغير فالمحطه وقالت:شوفي بروحك..
حطت ع قناة الدوله الرسميه لقوا الخبر العاجل ع اسم هيثم بالكامل في جنبه صفة وزير الصحه..
عفاف:ماشاااء الله تبارك الرحمن! يستاهل والله يستاهل هالراجل المقوم..
تهاني بإبتسامه:خل نكلم سارة ونباركلها..
عفاف وهي مبتسمه؛ايه كلميها كلمي..
وولت تخيط في المندار وهي مبتسمه وتقول؛ماشاء الله ماشاء الله ماتطلع كان عليه..الله يبارك..
•••••°°°°
"هربت هروب".
نسيبه بضحكه:هادي حياة المشاهير ياهيثومه..
هيثم بضحكه؛باهي ياهبلة انتي كان اسيمه حداك عطيهالي..
نسيبه :شويه بس..وبصوت عالي قالت..سوووماااااا
هيثم غمض عينه اليمين بشده وبعد التليفون..
نادت عليها نسيبه مرتين..
جتها اسيمه وهي تقول بضحكه:شني؟
مدتلها التليفون وهي مبتسمه ابتسامة عريضه وقالت؛هيثومه..
ابتسمت أسيمه وخدت الهاتف حطاته ع وذنها وقالت:هيثم
نسيبه مشت وخلتها بروحها...
هيثم بإبتسامه:شن شعورك؟
اسيمه؛شن بيكون شعوري غير اني فرحانه بيك وفخورة ورافعه راسي يحقلي حتى ننغر..
هيثم بإبتسامه؛انتي يحقلك كل شي يحقلك اللي
مايحقش لغيرك..
ضحكت اسيمه وقالت:باهي قولي انت شن شعورك وشن صاير حواليك؟
هيثم:ايييه ع اللي صاير ياسومه تقول وليت رئيس الدوله هربت منهم بش نرد ع نوسه..
اسيمه بإبتسامه:المرحله الجايه صعبه هلبه هيثم..
هيثم:من توا بدت تبان صعوبتها..رفع حواجبه وقال..غدوة ان شاء الله بنأدوا القسم قدام البرلمان..
اسيمه :ربي يعطيك القوة ع هالحمل الثقيل ياهيثم..
هيثم:ايوه اسيمه كثري من هالدعوات..
اسيمه بضحكه:من غير ماتوصي..
••••°°°°°•••••°°°°•••••
"اكيد ياحبيب بنمشي نبارك لوليد اختي"..
مجيد:باهي وهو توا موجود في حوشه؟
ماجده وهي تحط في الماسكرة:اكيد بيروح مع المغرب..
مجيد:باهي نرفعك نحطك توا والمغرب نولي نباركله ونروح بيك..
ماجده نزلت الماسكرة وقالت:لالا مجيد بنقعد للساعه عشرة والله مانعرفك ولا نزعل راهو وتنسى سهرة الليله..
مجيد تنهد وقال؛حاضر حاضر ياعبمبرتي قربلها ومشي بيطلع..
وهي ولت تكمل في حط زينتها..
••••°°°°••••°°°°••••
الساعه الثامنة مساءا..
طقت باب الدار..
سمعت صوت ولدها الصغير يقول"خش"..
فتحت الباب وخشت..
جهاد اللي كان لاهي بتليفونه شبحلها وقال:خير امي؟
عفاف بقلق:وينه خوك خليل من طلعته الصبح معاش روح!
جهاد نفسه كان قلق عليه للغايه ويحاول يوصل فيه وكذلك رفيق ومش محصلينه..
مع هذا أخفى قلقه بملامح وجه عاديه وهو يقول:فالحوازة يام قال نبي نبات غادي..
ضيقت عيونها بشك وهي تشوفله بعدين هزت راسها ومشت طلعت وصكرت الباب..
جهاد بعصبيه:وينه الزفت!..
واتصل بيه مرة عاشرة...
••••°°°°
كان مقعمز يغني في إحدى الأغاني بكل إحساس..
وصديقه الدكتور يلفله فذراعه بالشاش بعد خيطله الجرح وهو منطرب..
خليل:خلاص؟
نيار بضحكه:ايه..كمل..
خليل:شني؟!
نيار؛كمل الاغنية ياراجل ورب العزة تغني فيها احلى من الفنان نفسه..
خليل ضحك نص ضحكه:كمل خدمتك يابلعوط وبرا جيبلنا ماناكلوا..
نيار:ههههه..والله العظيم ندوي جديات..عقد حواجبه وكمل يقول..بعدين تعالى جاي شن قصتك انت كاظم ونزار وحب واحزان..غمز بعينه وقال..شن في..
خليل عكرش وجهه وقال:وراس بوك اطلع من راسي وبرا جيب ماناكل..
ضحك بعدين قعد يلم في حاجته في الشنطه لما كمل وصكرها ناض وهو يقول:شن تبي؟
خليل:اي حاجه تتاكل..
نيار بضحكه:تم ياكاظم قباني..
خليل بإزدراء:هههااا..
ضحك نيار ولف ومشي طلع من حداه..
اما هو قعد يشبح لذراعه المجروح..
فهاللحظه خطرت عليه نسيبه واللي داراته ضحك والقلب بدي يقربع بقوة..
《تعرف الحق مش فييك الحق فالجحشة اللي دارت فواحد زيك جميل..》
زاد ضحك وهو يذكر في كلامها ليه وهو يجر فيها للسيارة..
بعدين هدا ضحك وبعدين ارتسمت ع وجهه ابتسامه حلوة وسرح بتفكيره فيها..
🌷اما هي..
فكانت مع مرت خوها وخالتها وبنات خوها في الصاله يهدرزوا..
لاصقه في خالتها وهي تهدرز عليها من شوقها ليها..
نسيبه وهي تتفحص فخالتها بالنظر:موجي ضاعفه هلبه..
ماجده شبحتلها وقالت:لا وين ضاعفه بالعكس زايده 4 كيلو..
نسيبه رفعت حاجبها وقالت:مفروض تزيدي 10 اقل شي..
فنصوا ماجده وساره..
واسيمه تضحك..
فجأة..سمعوا الباب الخارجي انفتح..
ماجده بضحكه:معالي الوزير جي..
ناضت ومشت للباب..
ونسيبه واسيمه ناضوا وراها وهما يضحكوا بحماس..
ريحان وجنان قعدوا يشبحوا لسارة بعدين قالت ريحان..
ريحان:نوضي سارة..
سارة ابتسمت بضيق وقالت:بروا انتم..
شبحولها شويه..
بعدين شبحوا لبعض..ناضوا ومشوا بيطلعوا..
وسارة تشبحلهم بضيق...
🌾برا..
ماجده كانت واقفه تزغرد ونسيبه واسيمه يشوفوا لهيثم وهو نازل من السيارة..
يضحك وهو رافع حواجبه ويقول:خالتي!
صكر الباب وجاهم وهو يمشي بسرعه ويقول:خلاص ياودي..
جاته ماجده وهي فاتحه حضنها:خليني نفرح بوليد اختي ولى وزير ياناس مش كل الخالات ولاد خواتهم ولوا وزراء.
ضحكوا كلهم..
هو وصل فيها وحضنها..
هي ضماته بعدين قعدت تسلم عليه بالخد وتقول:منها للاعلى..
هيثم:اعلى شني ربي يهديك مانبيش اعلى من هكي..
بعدوا عن بعض وهي تقول:لا اني نبيك تولي رئيس البلاد..
هيثم جي لنسيبه وهو يقول:لالالا اني نفهم في الطب بس..
ضحكوا..
ونسيبه سلمت عليه بالخد وهي تقول:مبروك مرة تانيه يادكترة..
هيثم:الله يبارك فيك نوسه..
بعد عنها وجي لأسيمه اللي كانت تشوفله بإبتسامه حب وفخر..
باس راسها بعدين قال:لولاك انتي ماكان شي..
ضحكت وقالت:دماغك واجتهادك هما اللي وصلوك..
هيثم وهو يشوف لعيونها:انتي اللي وصلتيني يااسيمه لا دماغي ولااجتهادي..
ابتسمت وهي تشوف لعيونه..
ونسيبه وماجده يشبحولهم وهما مبتسمات بحب..
▪▪▪▪
◇"وبشرها ببيت في الجنه من قصب..لاصخب فيه ولانصب"..
الكلام هذا قاله الملك الاعظم جبريل للرسول عليه الصلاه والسلام يبلغ بيه زوجته السيده خديجه..رب العالمين ارسل جبريل بش يقوله الكلام هدا منه ويوصله للرسول بش يوصله لخديجه..
علاش؟..وعلاش قال لاصخب فيه ولانصب؟! يعني مافيشي لادوشة ولا تعب..لأنها هيئت لزوجها كل وسائل الراحه بش يأدي مهمته الشاقه..شجعاته ودعماته بكلام والمال وفرتله الجو اللي يساعده بش يوصل للهدف..كان لما يمشي للغار ويقعد بالساعات والليالي الطوال غادي كانت هي متحمله مسؤولية البيت كامله..وكانت وهي في عمر الستين تركب الجبل بش توصل لمكانه في الغار وتجيبله ماياكل..اعتقد ان الرسول اللي قعد معاها فوق من عشر سنوات ماخداش عليها مراة تانيه لانه شاف فهالمراة كل شي يتمناه الرجل الحقيقي لانه كان مكتفي بيها تماما كانت مراة فوق المثاليه..حتى بعد ماتت وتزوج بعدها تسع نساء وكانت احبهم ليه عائشه اللي حبه ليها كان ينضرب بيه المثل وين قالتله غيرة ربي بدلك خير منها..قاللها بمامعناه والله ربي مابدلني بمراة خير منها ابدا...
اااه...وأسيمه مافيش مراة في نظري خير منها فدنيتنا هادي..
هي اللي وصلت هيثم للقمه هي من بعد فضل الله..
قامت بيا دعمتني وقفت معاي بكل اللي تقدر عليه وكانت تخلي فيا بتشجيعها ليا نلمس احلامي بإيديا لين وصلتلها وشديتها وولت بين ايديا حقيقه واقعه..
مهما قلت فيها زوجتي..حب حياتي..اجمل نعم ربي على عبده الفقير....مش حنوفيها ربع حقها...
▪▪▪▪
"مبروك بابا"..
شبحلهم بإبتسامه وهو عاقد حواجبه بعدين حط ايديه ع روسهم ولعب بشعرهم وقال:الله يبارك فيكم بابا..
مرر نظره عليهم كلهم وقال:هي خشوا..
ماجده:هيا هي...
هيثم خلا بناته يمشوا قدامهم..
خشوا هما الاولات بعدين خشوا بعدهم...
🥀سارة كانت مقعمزة في الصاله تتفرج ع التلفزيون وهي متوترة..سمعتهم خشوا..سمعت صوت بوها..بلعت ريقها وتصنعت القوة..
وصلوا في الصاله وخشولها..
هي شبحتلهم..
وهما شبحولها..
هيثم:شني ماخاطركش تباركي؟
اسيمه شبحتلها بشي من القلق..
هي ناضت وجاته وقالت ببرود؛مبروك..
هيثم مرر نظره عليها من فوق لتحت بعدين قال بنبرة متهكمه:الله يبارك فيك ياستي..
ماجده شبحت لهيثم بضيق..
واسيمه قعدت تشبح لسارة بحزن..
اما نسيبه حاولت تنقذ الموقف لما جت لساره شدتها من يدها وقالت:تعالي نوتوا العشي..
وجبدتها ومشوا من حداهم...
هيثم تجاهل اللي صار وقال؛خل نمشي نغير ونصلي العشي ..
اسيمه هزت راسها وقالت:باهي..
هيثم لخالته:عن اذنك خالتي..
ماجده:ليك الإذن حبيبي..
مشي من حداهم هيثم...
ماجده راجاته لين مشي بعدين قالت:متعارك هو وزياد؟
اسيمه شبحت لماجده بضيق واذكرت شن صار من يوم فات...
▪▪▪▪
◇قبلها بيوم كان حفل التكريم للطلبه الأوائل في مدرسة ولدي زياد المدرسه دايراته تكرم فيها طلابها المتفوقين خلال تلات سنوات الدراسه فيها وولدي كان منهم..
يومها اسيمه شدت فيا هلبه نجي..وحتى نسيبه..واني قلت باهي...لكن عمليه مستعجله منعتني نحضر...
وللأسف ماعطونيش زوجتي واختي العذر اما زياد فكنت واثق ومتأكد انها مش فارقه معاه..
المهم..هداكا اليوم كان في عندي لقاء تاني مع رئيس الوزراء اصرت اسيمه اني نجي قبل الموعد بش نعتذر من زياد خصوصا وان يومها....اففف..احمم..يومها..كل طالب خدي شهادة التقدير استلمها هو ووالده...المدرسه..احمم..المدرسه فاجئت الآباء بشهايد تقدير حتى هما..وولدي للأسف كان بيناتهم زي اليتيم...اااخ....
احمم..لما عرفت..قلبي وجعني..لهالسبب روحت للحوش بش نعتذر وطبعا زياد مااستقبلش اعتذاري بالقبول...
♦️فلاش باك..
ماشي وجاي فالدار قدام بوه وهو يقول متهكما..
▪زياد..
فاهم وعارف عندك..مؤتمر..او عمليه مهمه يادير فيها يامشرف عليها..يالمستشفى فيها مشكله وقعدت فيها لين تحلها..
وقف فمكانه وشبحله وكمل يقول..
المهم مانكش فاضي بش تجي وتحضر..ابتسم تهكم وهويقول..ع العموم حضورك من عدمه مش مهم..معاش يعنيلي الحق..غير امي ربي يسامحها تعبت روحها وتعباتك بش تجي تعتذر...
▪هيثم بإبتسامة ملل..
كملت؟
▪زياد بإبتسامه متهكمه هز راسه بإيجاب..
رد هيثم..
تصبح ع خير..
والتفت للباب فتحه وطلع مشي طول للكرسي خدي بالطوه المحطوط عليه والشال والشنطه وتوجه للباب مستعجل وهو يقول..
ربي يهديك ياأسيمه خلتيني نضيع وقت مهم ع حاجات تافهه..
فتح الباب وطلع وصكره وراه..
بينما زياد..
اللي قعد فداره لحظات وهو يفكر فلامبالاة بوه واهماله ليه واستصغاره الدائم لكل شي يديره..
كان معصب منه ع الآخر..
طلع من داره..
وتوجه طول لدار النوم..
وصل فيها طق الباب..
جاه رد من داخل..
"خش"
فتح الباب وخش..
لقي اخته مع امه داخل..
قال بعصبيه..
امي..ارجوك..الراجل هدا اني معاش يهمني يحضر ولا مايحضرش..معاش يعنيلي شي..خليه لاهي بالمستشفى متاعه وانجازاته اني معاش نبيه يدورني في شي..بالعربي معاش تجبريه يهتم بينا..
اسيمه بحده
زياد..الوقاحه وقلة الادب هادي تتكرر مرة تانيه حناخد منك موقف قوي هلبه..
سارة شبحت لخوها بضيق
وزياد كبت غضبه وطول لف ومشي طلع..
ساره..
تو نكلمه اني ماما..
ناضت ومشت طلعت وراه تجري..
اما اسيمه مسحت بإيديها ع وجهها بعدين وخرت بيهم شعرها وهي تقول بعيون مليانه دموع..
ربي يهديك ياهيثم ربي يهديك..
برا..
كانت سارة ماشيه ورا خوها وتنادي فيه وهو مش معبرها..
سرعت خطواتها وشداته من ذراعه..
زياد بعصبيه..
حولي يدك سارة..
سارة..
فاهمه عليك يا زياد..مش انت الوحيد اللي تعاني منه كلنا نعانوا منه من اهماله وتجاهله لوجودنا..زيك عمري ماحسيت بيه بوي..كل شي فحياته اهم منا..ومرات نحس ان حني مش موجودين فحياته من اصله..هدا علاش دير زيي اعتبره مش موجود زي مااني معتبراته مش موجود..معاش تخلي اهماله يوجعك ويأثر عليك..
"انساه"..
ترتاح..
ابتسم زياد ومسح بيده ع شعرها وقال..
اصغر مني وطايشه بس طلعتي تفهمي اكثر مني..
ضحكت سارة..
زياد..
عندك حق..لازم نعامله بالمثل بش نرتاح
▪▪▪▪
◇نستاهل شن ماجاني منهم نستاهل..حتى لو ماعطيتهمش عذر وقتها لكن توا عاطيهم كل العذر ومسامحهم ونبي من ربي ماياخذهمش ع اي غلط ارتكبوه في حقي...
▪▪▪▪
وزياد وقتها كان في الريفودجي متاع الحوش...
لاهي باللوحه اللي بيخش بيها المسابقه يرسم فيها بكل مشاعره..من قلبه...
•••••°°°°°•••••°°°°°•••••
🌿هديكا الليله...هيثم بعد ماروح..
هلت الناس ع حوشه..الجيران...المعارف..الباب مابطلش دقان...الجرس ماوقفش رن..
والنساوين مابطلوش تجهيز ضيافه...
طبعا..توا الاحباب بيزيدوا..حتى العدو احيانا ينقلب حبيب في الحالة هادي..
وهيثم كان مجبور يجامل...ويساير...
•••••°°°°°•••••
في وسط حوش خالد..
عفاف وهي تتكلم بالتليفون؛باهي لأمتى؟!...............باهي باهي........المهم كلمني كل يوم وين نتصل بيك ترد..............سلامتك بس ياأمي هدا مانبي.........قدامك كل خير....نزلت التليفون وهي تقول..ربي يحفظكم ويهديكم..
تهاني:وينه؟..
عفاف شبحتلها وقالت:في الخمس مزرد مع اصحابه ايام القرايه..
تهاني هزت راسها وقالت:باهي..
تنهدت عفاف وشبحت للتلفزيون..
تهاني شبحتلها شويه وقالت؛امي..
عفاف:نعم..
تهاني؛توا جارنا عمي هيثم بعد ولى وزير زعمه يحول من هني؟
شبحتلها عفاف وقالت:الحق مافكرتش فيها هادي..مرات يحول..ابتسمت بتهكم وقالت..ماعنده مايدير بجيرتنا حني بالذات..
ارتسمت ع وجه تهاني ملامح الضيق..غيرت عيونها عن امها وشبحت لكتابها...
ضحكت امها ضحكه متهكمه بدون صوت..بعدين رجعت عيونها للتلفزيون وقعدت تتفرج...
••••°°°°°•••••°°°°••••
الساعه العاشرة ليلا...
كان مدرس بسيارته حدا الحوازة اللي قاعد فيها خليل ويراقب فيها..
قطع عليه مراقبته صوت هاتفه اللي يرن..
غمض عيونه بنفاد صبر بعدين فتحهم وخدي الهاتف وفتح الخط ورد...
راجح:ايوه يام..
امه بصوت عالي:وييين البيتزاااا..
راجح خبط بيده ع جبهته بعدين نزلها وقال بشي من الربكه:جايبها وجاي..جاي...
امه:سقد روحك سقد.
"هيا ياهو هيا هيا.."
راجح:شن هيااا؟!!
امه بصوت عالي:سقد رووحك..
راجح:ربي يهديكم يام انتم النساوين دوشتكم دوشه..
ورد امه كان تصكير الخط في وجهه..
هو تأفف بعدين قال:استغفر الله..والله ماوقته بيانك ياجيهان بكل..
وشغل السيارة وتحرك طول...
🌾مشي للمكان اللي حاجزة منه امه طلبية بيتزا..
خداها وتحرك للحوش..
وصل غادي...
لقي الدنيا الزحمه والسيارات مصكرات الطريق...
راجح:شورهم جابوا القبيله كلها!..
نزل من السيارة بالطلبيات..
ومشي للحوش من الباب الخلفي...
وهو يسمع في دوشة المنشطه..
"العب العب العب الللعب..ولعت ياحي عليهاااا ولعت ويش يطفيها"..
راجح؛نار جهنم اللي بتاكلكم يوم غدوة..
انفتح الباب وطلعت امه وهي تعارك:وين هدا كله وين؟الناس بتروح..وخدت منه الباكو..
راجح:اني بس نبي نعرف كان في البيان درتوا هكي فالعرس شن بديروا؟
امه:انت الهى بالمجارم والمخرومين جماعتك مادخلكش..
وخشت وصكرت الباب فوجهه..
راجح وهو مفنص عيونه:المخرومين جماعتي!!!؟
فجأة..انتفض من الخلعه لما طلعت الألعاب الناريه...
رفع راسه فوق وشبحلهم بعدين قال:هبال قسما بالله..
"والعقبة لوخيها نور العين وضيها"..
ضحك وقال:هادي امي قالتلي صحيت بطريقتها..
حرك.راسه يمين ويسار ومشي للحوش من الباب القدامي بش بيخش للرجاله...
خش..
وشاف العريس ورجالة عيلة حواليه..
لاحظهم كلهم فيهم شبه من ناس يعرفهم..
قلبه ماارتاحش..مع هدا ابتسم مجامله وخش قال:السلام عليكم..
🌾اما في الحوش..
في الصالة الكبيره..
كانت مقيومه بمعنى الكلمه..
المنشطه كانت مولعه الأجواء....
والعروس ترقص في النص مع صاحباتها وبنات عيلتها وامها وعماتها واقفات يصفقوا...
وام العريس وحمواتها وبناتها يتفرجوا..
حماتها:الباين عليها مش هوينه ياعويشه..
وحده من بناتها؛حتى اني قلتها ياعمتي مش ساهله بكل ردي بالك يام..
عيشه:تي غير شن ريتوا منها انتم! وبعدين راكم تنسوا راهو اللي خداته ولدي جمعه ماعنداش الروح مع امه وماعنداش الريح وين ادور...
بنتها:يستر الله وخلاص..
"تاتك ياتاتك ياحلوة في خواتك..راني عليك نغني يادلوعة باتك ياتاتك"..
وجيهان ترقص الساعه الثامنه والنصف...
مقعمز ورا طاولته وهو يقول:زي ماقلت امس اليوم حل المسائل اللي حليت وحده منهم كمثال...
شبح لوحده من الطالبات اشرلها بسبابته وقال:نوضي حلي الرابعه..
البنت ناضت وقالت:نحاول..
جمعه:مش مشكله..تكسبي شرف المحاوله..
ابتسمت ومشت طلعت بالكراسه ع السبورة كتبت صيغة السؤال بعدين بدت تحل وهو يسأل فيها هادي كيف جت وعلاش درتي هكي واشرحي النقطه هادي اربكها مسكينه لبزت هلبه لكن في الاخير حلتها..
ودانيه مركزة عليه وع اسلوبه..
وباقي البنات مركزين ع الدبله اللي فيده اليمين اول مرة يشوفوها...
🌾🌾🌾
فات من الحصة ربع ساعه وهو كل مرة ينوض في وحده تحل ومتجاهل وجود دانيه تجاهل تام..
لعند ماوصل في مسألة وقال:هادي صعبه شويه..وقتلكم اني بنحلها لكن خل نشوف بالك في وحده تبي تحاول..
رفعت دانيه يدها..الوحيده اللي رفعت يدها..
شبحلها ورفع حواجبه وقال؛حضرتك ماحضرتيش درس امس.
دانيه نزلت يدها وقالت بثقه:مش مشكله..
نزل حاجبه اليسار وخلا اليمين مرفوع وقال:باهي..اطلعي..
دانيه طلعت من غير الكراسه ..
هو شبحلها بتضييقة عيون...
وقفت ع السبورة..
وخدت الخطاط وبدت تكتب في صيغة السؤال بخط حلو..
وهو مركز معاها..
بعد كملت..التفتت لزميلاتها وقرتلهم صيغة السؤال وشرحاته باسلوب مبسط..
بعدين قالت شن هو المطلوب..
دانيه؛مفتاح الحل القانون..حني بعد عرفنا المطلوب ع طول نعرفوا القانون اللي يحل المسأله..
وكتبت القانون وهي تقول فيه..
بعدين حطت دائرة ع نقطه معينه في القانون وقالت:حني عندنا هدا وهو حيوصلنا للمطلوب..
وقعدت تشرح وتكتب وكأنها ابله...
ولا غلطه..مافيش ارتباك...بكل ثقة...وصاحباتها يتجاوبوا معاها وممكن فهموا منها اكتر من مايفهموا منه..
هو ماقدرش يتكلم قعد يتفرج عليها وخلاص..
لعند ماكملت..بعد كملت...قالت..وهدا هو المطلوب..
وشبحتله..
مط شواربه للأسفل بإعجاب واستغراب وقال:باهي..كويس..خشي..
دانيه حطت الخطاط ومشت لمقعدها...
قعمزت...
وهو قال للبنات:بسرعه اكتبوا الحل..
غير عيونه عنهم لدانيه لقاها شاده القلم وتكتب في كتابها..
ضيق عيونه بعدين غيرهم عنها وطلع اللابتوب متاعه..
فتحه وخش ع ملف فيه قائمة اسمائهم ومداير جدول درجات حطلها درجة كامله..وباقي البنات اللي ناضوا حلو حطلهم درجات ع حسب مجهودهم...
وهو لاهي..
دانيه رفعت عيونها فيه وقعدت تشوفله بإبتسامه خفيفه..
بعدين نزلت عيونها ليده اليمين وشافت الدبله..
اختفت ابتسامتها ورجعت شافت للكتاب..
•••••°°°°°•••••°°°°°•••••
الساعه العاشرة صباحا...
"عيونها مفتوحات زي الفنجال ع كل شي "
هادي"عواطف" ام راجح مقعمزة هي وبنتها ع الفطور ويهدزوا ع ليلة امس..
جيهان رشفت من النسكافيه بعدين قالت:كله كوم ولما جومعه خش كوم تاني قريب ماتت هي وبناويتها..
عواطف:ايه ريتهم ..بعد روحوا صبيت ع مكاناتهم مية..
جيهان رجعت رشفت من نسكافيه وقالت؛الله غالب مرت عمي ومجبورين نحضروها..خلينا منها توا وقوليلي بابا وافق ع انتقالي من المدرسه؟
عواطف:ايه..وقال الأسبوع الجاي نتملها امورها فالمدرسه اللي يقري فيها خطيبك..
جيهان ابتسمت وقالت؛ربي يحفظه ويعليه وبيي..
عواطف:آمين..بتقري نفس السنه اللي يقري فيها هو؟
جيهان؛ايه مال شنو..
عواطف هزت راسها وكلت خبزة بالجبنه المعصورة..
وجيهان تشرب في النسكافيه وهي تفكر....
♧جيهان..اخت راجح عنده من غيرها زوز متزوجات وهي الصغيره..مدرسة لغة عربيه ليها سنتين بس تقري..
جيهان...انانيه..متملكه...متكبرة...
جمعه عجبها من اول ماشافاته والوحيد اللي لفت نظرها من بين عشرات العرسان اللي جوها..
ثقيل وعاجباته روحه وتعامله معاها فيه كبر جذبها هلبه..
وخلاها توافق عليه طول..
ولأنه راجل لايقاوم معرفتها انه يقري في مدرسة بنات ركبت فيها نار الغيرة وخلتها بدون ماتفكر تقرر تنتقل للمدرسة اللي هو فيها بش يقعد تحت عيونها..
مع العلم ان جمعه مازال مايعرفش
يتبع••°°
