#البطل_المغمور"شمس الغروب"
#الجزء_الثلاثون"القسم الثاني"
#الجمان_الفريد
عندما تقدم الصلاة ع كل شي في حياة في حياتك..
يقدم الله لك الخير في كل أمرك...
الصلاة أولا🌷🌷🌷
🍁🍁🍁🍁🍁🍁🍁🍁🍁🍁🍁🍁🍁🍁🍁🍁🍁
💐...
في المطبخ..
بعد الغدي...
الثلاته في المطبخ..
وحده تغسل في الماعين...
ووحده اضم....ووحده ادير في الشاهي..
ماجده:ياوخيتي سلمه..ربي يشفيه ويفك اسره يارب..
سارة هي تكنس في الكوجينه:يارب..
نسيبه وهي تغسل في الماعين كانت ساكته ماقالتش كلمه ماينسمعش منها الا صوت الماعين اللي تغسل فيهم..
ماجده شبحت لسارة غمزتلها بعدين قالت:نوسه العروسه هدرزي..
نسيبه قلبت عيونها بملل وقعدت ساكته..
سارة:عميمه شن بتلبسي؟
نسيبه:جلوة..
ضحكت سارة..
ماجده:تي خير دعوتك تقول جابرينك كان مش عارفه اللي فيها..
نسيبه شبحتلها وقالت بتفنيصه:خالتي!!
ماجده قعدت تضحك..وسارة معاها..
قلبت نسيبه عيونها ورجعت تشوف للماعين وهي تقول:اسامه بن لادن جابك؟
كتمت سارة ضحكتها ولفت عنهم وهي تكنس..
ماجده:ياصامته...ولده..
ابتسمت سارة وقلبها بدي يدق بقوة..
نسيبه:اها...شبحت لخالتها وضيقت عيونها وهي تقول:ايه حقه..الحديده اللي فيدك تهبل ماتقوليش هو خدهالك..
ماجده قامت يدها اللي فيها الحديده وقالت بإبتسامه:لا تريحي مش هو...هادي جتني في يوم الأم خداهالي ربيبي..
سارة التفتت وقعدت تشوف للحديده وعلت ع خدودها حمرة الحياء..
نسيبه ابتسمت وقالت:مكويسته الوليد هدا..
ماجده:ايه والله ربي يحفظه ويخليه لاميمته ووخياته ويفرحهم بيه...
"وين الشاهي..ياهوو..يللي فالكوجينه"
ضحكوا..
ماجده علت صوتها وهي تقول بضحكه:شويه ونجيبه ولدي..
ومشت للدولاب فتحاته وطلعت منه فناجين الشاهي...
🌹🌹🌹🌹
بعد ماكلموا حوسة الكوجينه..
قعمزوا ماجده وساره مع هيثم يشربوا في الشاهي ويهدرزوا وحداهم البنات يتفرجوا ع التلفزيون...
اما نسيبه..
ركبت لدارها....
صلت استخارة...بعدين قعمزت ع سريرها وقعدت تردد في ورد الصلاة ع النبي وفي قلبها لله دعوات هو عارفها ويسمع فيها رغم الصمت...
🌷أقرب من حبل الوريد...🌷
🌹🌹🌹🌹
وفي حوش الجيران...
كانت عفاف لاهيه دور في دبشها اللي قعد عندها ه حاجه مناسبه تلبسها...
وتهاني صاير فيها نفس الحاله...
في الوقت اللي فيه سجى كانت تتناقش مع رفيق اللي كان مطروح ع السرير يبي يرقد..
...سجى بتهكم:بالك تبيني بالمرة نخطبك بنت خوها..
رفيق وهو مغمض عيونه:اليوم اللي بنخطبها فيه انت مش حتكوني موجوده..
سجى ودموعها في عيونها:غير والله احلم ع قلبك قاعده يارفيق..
غم راسه بالمخده وطنشها..
وهي مشت بغيظ فتحت الدولاب وطلعت منه في لبسه وفي داخلها تتوعد في رفيق..
"تو نوريك يارفيق توتشوف"..
🍁🍁🍁🍁
وتحركت عقارب الساعه في تتابع بسرعه...
وآذن العصر...
هيثم طلع للجامع ومنه بيمشي للمصحه..
وخالته وبنته بعد ماصلوا هما والبنات الصغار..
جهزوا انفسهم ولبسوا وبعدها بدوا يوتوا في ضيافتهم...
🌹والعروس..
بعد ماصلت صلتها ودعت بكل جوارحها في سجداتها...
بدت تلبس وتوتي في روحها...وذكر الصلاة على النبي مافارقش لسانها...
▪▪▪▪▪
◇ولافارق لساني اني يومها..اني كنت متأمل بيه من الله تفريج كل همومي اللي كانت ثقيله بكل معنى الكلمه...
ومتمني منه كذلك انه يبارك في موضوع اختي نسيبه وخليل اللي اني من داخلي كنت مرتاحله لدرجة كبيرة..
امم..نذكر يومها لما وصلت المصحه كنت نبي نشوف زياد..
بس لقيت قدامي حالات قلت نشوفهم الأول وبعدين نمشيله..
وفي الوقت اللي اني فيه كنت لاهي بشغلي...صارت مشكله...
▪▪▪▪▪
طلعوا فاتح من الحجرة اللي كان فيها بعد تحسن وضعه بعض الشي..
وهو طالع للباحه...
شاف زياد مقعمز بروحه...
جي بين عيونه شكله في اليوم اللي انقده فيه..
ارتسمت ع وجهه ملامح العصبيه..
وباندفاع مشاله طول...
لما وصل فيه ضربه بقبضة يده ع وجهه وقال بغل:تبيها ياحيوان...
زياد ناض وقف وهو مفجوع ويمس بيده في فمه ويشوف للدم..
فاتح ضحك بسخريه وقال:ماتدخل في مالايعنيه هذا مايلقى تعاودها مرة تانيه ندمك ع جيتك للدنيا
ولف بيمشي والكل يشبحوله..
"بنعاودها"..
وقف ورفع حاجبه والتفتله..
زياد قعد يشبحله بتحدي..
فاتح رفع حواجبه وقال:شكلك ماتفهمش..هز راسه وقال..تبي شرح..تمام تو نشرحلك...
وقدم بيضربه شده واحد من النزلاء وقاله:فوته ياراجل..
فاتح بعصبيه:تي حول انت التاني خير عمكم انتم حشيشتكم تحشروا ارواحكم في اللي مالكمش فيه..تي حول غادي..
شده وقال في وذنه:تي تعال معاي وفوته هدا كانت ناضت عليه الهبله يقتلك تاهمينه في شروع بالقتل..
دف فاتح الشاب وقال بضحكه:اها صار طلعت مجرم وقاتل..تي مالا تعال..تعال اقتلني هي..واشهدوا يللي هني كلكم اني طلبت منه يقتلني...واشر بصبعه ع الكاميرات وقال وهو يدور حوالين نفسه..واحد اتنين تلاته اربعه...اشر ع نفسه بعدين اشر ع زياد بعدها مرر يده ع رقبته..
ووقف مقابل زياد وهو مبتسم بتهكم وقال وهو يأشر بايديه:هيا تعال..تعالى...ماتخافش مش حيحاكموك عليها اني متنازل....هي تعالى هي..مايديرولك شي..
وبدي يصفق..
وزياد واقف يتفرج عليه...هو وكل الموجودين..
فاتح:تعالى يا معلم ماعندك شي تخسره هكي ولاهكي شانقيك..
زياد تنهد...وربع ايديه وقعد يشبح لفاتح وهو ماط شواربه للأسفل ويشبحله..
فاتح اشر على نفسه وقال:تبيني اني نجيك...هز راسه وهويقول...اوكي..
ومشاله تاني..
وزياد واقف يشبحله لين وصل فيه...
قعد يشبح فاتح لزياد بإبتسامه مستفزة وهو يقول:قالوا عندك في التحرش حق!
كلام فاتح خلا الدم يغلي في عروق زياد وبدون مايفكر عطي فاتح كف قريب طيرله راسه...
فاتح قعد يضحك ويزيد يستفز فيه..
شده زياد من ياقة التيشرت متاعه وجبده وعطاه كف تاني اقوى من الأول...
وفاتح يضحك...
وباقي زملائهم لما حسوا الحكايه بتكبر..
جي بعضهم حزهم عن بعض..
وفاتح يعيط بعصبيه ويقول:شن دخلكم يابهايم...حولوا خلوه يقتلني...
وبدي يسب فيهم ويطلق في ألفاظ نابيه وزياد يشبحله بحده..
ع طلعة زوز عناصر من الشرطه الموجودين في المصحه...
واحد منهم قال:خير دعوتك انت وياه..
وقف ع زياد وقاله:ناقص انت مصايب على مصايبك..
زياد غير عيونه عنه وهو يمسح في فمه من الدم..
فاتح دف اللي شادينه وقال..اني قتله يقتلني خلوه..
شبحوا لفاتح بإمتعاض....
واحد منهم قال لزياد:تعالى معانا انت..
وشدوه الزوز وخدوه معاهم...
وفاتح ماشي وراهو وهو يقول:اني قتله يقتلني اني ياهووو..ياحكومه..
واحد منهم قال:برا غادي..
وخشوا داخل...
الممرض:قعمز عاقل كان ماتبيش تولي للدار..
ومشي خش وخلاه..
فاتح وهو يشبحله بغيظ قال لفظ نابي بعدين لف ومشي..
جي قدامه اللي حزه عن زياد المرة الأولى..
قرب منه وقاله:جوك ملخبط ..
فاتح:للوح..
قرب منه بدون مايلفت الانتباه وهو يمرر في عيونه حواليه وقال:عند ليك اللي يعدله...
فاتح شبحله شويه وقال:قصدك في هني؟!
=في واللي تبيه..
فاتح قعد يشبحله ....
وشويه شويه بدي يحس بشعور اشبه الموت..
صدره غم عليه...وحس كأن جسمه من داخل انهار...
عيونه تسكروا في اللحظه اللي طاح ع الأرض...
•••••••°°°°°°°•••••••°°°°°°°•••••••
في هالأثناء..
في حوش الكاتب..
كانوا ماجده وعفاف مقعمزات في الصاله يهدرزوا وهما يشربوا في العصير وياكلوا في الشوكولا..
وفي الكوجينه..
كانت تهاني تساعد في سارة في تحضير باقي الضيافه..
تهاني تستف في الحلويات في مترد كبير وتسمع في
ساره اللي واقفه ع بكرج كبير فيه حليب محطوط ع النار تراجي فيه يغلي...
سارة بضيق:القضيه شكلها معقده هما هلبه قضايا في بعض..
تهاني:الشروع بالقتل..والأدمان...و...سكتت..
سارة شبحتلها وقالت:تهاني اشبحيلي..
تهاني تنهدت والتفتت لسارة..
سارة:انتي مصدقه ان زياد ممكن يدير حاجه زي هادي؟!
تهاني شبحتلها شويه بعدين قالت:الصراحه سارة وانتي تعرفي خوك مانتقبلاش بكل..وجوابي ع سؤالك مالاش علاقه بهالشي..لكن اللي نعرفه ان اللي ياخد في المخدرات مش مسؤول عن تصرفاته .
سارة بضيق:يعني مصدقه...
تهاني غير عيونها عنها بإحراج..
وسارة وهي تشبحلها اذكرت كلام قاله بوها قبل...
عن اكتشافه لمشاعر زياد تجاه تهاني..
فجأة..سمعت صوت الحليب فاج..
شهقت والتفتت للبكرج وهي تقول بإنزعاج؛استغفر الله العظيم استغفر الله..
وتهاني تشوفلها بضيق..
🍁🍁
شويه ودارت النسكافيه وطلعاته مع تهاني اللي طلعت الحلويات..
🌹ونسيبه في دارها تستنى امتى ترن عليها سارة...
وهي بين دعاء وذكر الصلاة على النبي...
فاتوا زياده سبعه دقايق بالزبط...ورن تليفونها..
وقلبها زاد قوة في النبض..
شافت تليفونها لقت سارة ترن...
فصلت عليها...بعدين ناضت وقفت..
شافت لروحها في المرايه...خدت نفس عميق وزفرت..
بعدين مشت للباب وهي تقول...ربي اشرح لي صدري ويسر لي امري واحلل عقدة من لساني يفقهوا قولي....
🍁🍁
ماجده؛ماشاء الله تهونه كل ماتكبر تزيد سماحه..
ابتسمت تهاني بإستحياء وهي تقول:عيونك الحلوة خالتي ماجده..
ماجده:وخيتي سلمها وقوي سعدها..
عفاف بإبتسامه؛تسلمي....
"السلام عليكم"..
غيرت عفاف عيونها عن ماجده وشافت لمصدر الصوت...
ارتسمت ع وجهها ملامح الإنبهار...
أول مرة تشوف نسيبه هكي...انثى جميله بفستان ازرق من لون البحر..وشعر مفرود مغطي ذراعه الأيمن...
وبلمسات بسيطه ع وجهها خلت طلتها رغم بساطتها جميله جدا..
تهاني وهي تشوف لنسيبه بإنبهار"تقول مش هي!"
ونسيبه اللي كانت تمشي بإرتباك بسبب الموقف كامل..
قدمت لعفاف ومدت يدها وهي تقول:كيف حالك ابله عفاف..
عفاف ناضت وضمت نسيبه وهي تقول:الله يبارك عليك..
ابتسمت نسيبه بخجل وتوتر وضمت عفاف حتى هي..
وماجده والبنات يشوفولهم بإبتسامه..
بعدوا عن بعض وعفاف تقول:كيف حالك حبيبتي..
نسيبه بإبتسامه:الحمد لله..كيف حالك انتي..
عفاف بإبتسامه وهي تمرر عليها في نظرها:الحمد لله..
مشت نسيبه سلمت ع تهاني..
وعفاف اللي قعمزت قاعده تتفحص فيها بنظرها..
بعد كملت سلامها ع تهاني قالت عفاف:تعالي حداي حبيبتي..
مشت نسيبه قعمزت حدا عفاف..
عفاف خدت يدها وشدتها وهي تقول:ماشاء الله عليك..
نسيبه نزلت عيونها وهي مبتسمه بخجل وقالت:تسلمي..
طبطبت عفاف ع يد نسيبه وقالت:عمرك ماحتندمي..
ماجده:من زمان واني نقول خليل راجل مقوم ربي يحفظه..
عفاف شبحتله وقالت:وطاح في نعم الناس..
ماجده:تسلمي يارب الباهي يدور في بعضه ياعفاف..
عفاف شبحت لنسيبه وقالت بإبتسامه؛صدقتي..
ونسيبه كانت في حالة من الحياء والتوتر خلتها تتحول لأنسانه تانيه في نظر بنت خوها..
سارة اللي كانت تراقب في ملامح وجهها وهي مبتسمه حبت شكل عمتها الحقيقي اللي تحاول ديما تخفيه بثوب البنت القوية الجافه...
•••••••••°°°°°°°••••••••
واقف ع راسه يشوفله ويتأمل في ملامحه الباهته الذبلانه ويراجي فيه يفتح عيونه..
وفعلا..بدي يفتح فعيونه...شويه شويه..
لماوضحت الرؤية عنده قال بصوت مبحوح؛لاياربي..قاعد حي قصدكم!
هيثم بإبتسامه:اهمم..
شبح لمصدر الصوت وعقد حواجبه وقال:وخيرك انت فرحان هكي!
هيثم ضحك ومشي لمكتبه وهو يقول؛على تحساب كان متت بترتاح..
وقف ورا مكتبه وخدي ورقة وصفة طبيه..
فاتح ناض قعمز وهو يقول:مافيش اريح من الموت للي زيي..
هيثم شبحله وقال:باهي وبعدين شن بدير..
فاتح:شني شن بندير! هو البنادم بعد يموت مازال بيدير حاجه..
هيثم هز راسه وقال:اها..هو معاش يقدر يدير شي لكن حيعيش حياة تانيه هالمرة هو اللي اختارها وهو اللي اسسها من البدايه للنهايه...من بعد الموت ليوم القيامه..
فاتح بإنزعاج:ماعنديش بال بش نسمع التفلسيف..
وجي بيفك يبرة التغديه..
هيثم بنهي حاد:خليها..
شبحله فاتح..
هيثم بحزم:تكمل بعدين نحولها..
فاتح شبحله شويه بعدين قلب عيونه ورجع تمدد ع السرير وحط يده ورا راسه..
وهيثم وهو يشوفله...قعمز ع الكرسي...
فتح الدرج وطلع المصحف وفتحه وين ماوقف وبدي يتلى..
¤ قال كم لبثتم في الأرض عدد سنين ○قالوا لبثنا يوما أو بعض يوم فسئل العادين○قال إن لبثتم الا قليلا لو أنكم كنتم تعلمون○أفحسبتم انما خلقناكم عبثا وأنكم إلينا لاترجعون○¤
بطرف عينه شبح لهيثم وهو يتلي في القرآن..
ويسمع في كلام عمره ماسمعه...كلام وقع في قلب عاش عمر صدا الذنوب تاكل فيه..
كلام حسه ينقال ليه هو تحديدا...
ركز بالنظر على هيثم وهو يقرا لين وصل لآية..
¤وقل رب إغفر وأرحم وأنت خير الراحمين¤..
سكر المصحف وهو يقول..
سبحانك اللهم وبحمدك اشهد أن لا إله إلا انت استغفرك واتوب اليك..
رفع نظاراته بأصابعه وهو يدلك في عظمة انفه..
بعدين حولهم وشبح لفاتح اللي غير نظره عنه طول..
هيثم ضيق عيونه وقال؛رياضي انت..
فاتح ؛تس..مالبورو..
ضحك هيثم نص ضحكه بعدين قال:واضح من شكل جسمك برغم انه يبان في اضعف حالاته..
فاتح؛بالله دكتور ماتنفخليش الراس بروحه يوش من غير شي..
هيثم ضحك تاني وقال:وشكلك تحب تهتم بنفسك...لبسك وان كان يبان مبهدل فيه مسحة اناقه..
فاتح ابتسم ابتسامه صفرا وقال؛مسحة اناقه!..متحذلق..
هيثم رفع حواجبه وقال:قصدك تعرف شن معناها ؟
فاتح رفع حاجبه وقال:اني اللي نعرف معناها كان ماعندكش علم قاري قانون راهو..
هيثم ؛وسيبته..علاش؟
فاتح؛مليت..
هيثم؛فشلت مش مليت خشيت حاجه ماتحبهاش..
فاتح شبحله من فوق لتحت بعدين غير عيونه وغمضهم..
ابتسم هيثم وقال:مايبيش..
فتح عيونه وشبحله وقال:من هو؟
هيثم اشر بصبعه لفوق وقال؛مايبيكش تموت توا..شكله في حاجه باهيه بديرها في عمرك القدام...
فاتح:مانبي ندير شي..
هيثم ابتسم وقعد ساكت وهو يشوفله..
فاتح:انت دكتور نفساني ولاصحة عامه ولابالك تطلع من جماعة الشرطه!؟ مش مرتاحلك البته..
هيثم بضحكه:البته! ضحك وكمل يقول...اني دكتور جراحة قلب..وجيت نخدم هني ع خاطر ولدي..
فاتح رفع حواجبه وقال؛راجي شويه ولدك ...انت الوزير اللي يحكوا عليه؟
ابتسم هيثم وهو يشوفله وقعد ساكت..
ابتسم فاتح بتهكم وقال؛تفلسيفك هو كان وفرته لولدك راهو ماوصلش هني..مدمن وقاتل...ومتحرش..
تبدلت ملامح وجه هيثم للحده وهو يشوف لفاتح..
وفاتح مبتسم بإستفزاز..
▪▪▪▪▪
◇خطر على بالي نوض لعمود التغذيه وناخده ونخبطه بيه ع راسه لين نشفي غليلي..بس الحمد لله وقتها كنت قاري قرآن..
▪▪▪▪▪
فاتح بنفس الابتسامه:من تدخل فيما لايعنيه هدا مايسمع..٠
هيثم قعد يشبحله بإبتسامة وهو مضيق عيونه ويحك في حاجبه..
فاتح كان يبي يستفزه اكثر قاله؛شن الشبحات هادي!؟ ابتسم بخبث وقال..شكلكم عيله ياسلام عليها..وقال لفظ خلا هيثم يسكر عيونه وكأنه سمع صوت اظافر من حديد تخرط في لوحة من حديد..
فاتح غير عيونه عنه وغمضهم..
هيثم فتح عيونه لما طق الباب وقال:ادخل..
انفتح وخش موظف من الكافتيريا جايب صفرة فيها فنجان قهوة..
لما شم ريحتها فاتح فتح عيونه وشبحلها..
حطها قدام هيثم ومشي طلع..
هيثم خدي الفنجان بيشرب سمع فاتح يقول..
"ترا نذوقها"
شبحله هيثم ولاحظ نظرات الرغبة الطفوليه في عيونه..
فاتح؛ليا وقت عليها..
ناض خدي طاسة الميه صبها في محبس غرس موجود في روشن مكتبه بعدين صب رشفه من القهوة في الطاسه وجابها لفاتح...
فاتح جي مقعمز خدي منه الطاسه وذاق القهوة..
قعد يتبنن فيها ويقول بإشمئزار:مش هكي القهوة ماتندارش هكي..ومدله الطاسه وولى رقد..
هيثم خداها وقال؛مالا كيف تندار..
فاتح وهو مغمض عيونه؛تندار من القلب كيف ماكانت ادير فيها امي.
هيثم؛قهوة الأم بروحها..
فاتح ضحك وشبحله وهو يقول:مانقصدش امي امي..قصدي المراة اللي ربتني..امي ماكانتش فاضيه بش تربيني عندها حاجات اهم..
هيثم قعد يشبحله وهو يرشف القهوة بدون مايعلق..
فاتح رجع غمض عيونه وقال:امتى اتم هادي..
هيثم لف ومشي لمكتبه؛ارقد تو تم..
وقعمز ع كرسيه..
فاتح قال:احسن..
ابتسم هيثم وحط فنجان القهوة وفتح اللاب توب اللي قدامه وبدي يبحث فيه عن معلومات قانونيه تخص قضية ولده زياد..
وفاتح اللي كان مغمض عيونه قاعد يفكر في الحوار اللي صار بيناتهم...
••••••°°°°°•••••°°°°°••••••
مقعمزات في الجهة التانيه من الصاله بروحهم..
هي تسمع في جارتهم بإنتباه شن توصي فيها وتقول..
جارتهم ...او عمتها...أم خطيبها..
عفاف حاطه يدها ع يد نسيبه وهي تقول:تو تشوفي كيف حيولي من بعد اليوم..حتلقيه يدير كل شي بش يرضيك ويكبر في عينك ويخليك واثقه فيه ومأمنه...
نسيبه وهي مبتسمه قالت:خل نكون معاك صريحه الثقه اللي حطها فيه خوي هيثم هي اللي خلتني نوافق عليه..هيثم بوي مش خوي..والأب مستحيل يلوح بنته في النار بالذات لما يكون زي هيثم خوي..
عفاف ابتسمت وقالت؛وهو ماحطش فيه الثقه ورضي يعطيه اخته لو مش عارفه يستاهل..
نسيبه اكتفت بضحكه خفيفه وهي منزله عيونها..
عفاف تنهدت بإبتسامه وقالت:ربي يتمملكم على خير ويسعدكم يارب العالمين...
نسيبه شبحتلها وقالت بإبتسامه وهي تغمض في عيونها وتفتح فيهم:آمين..
وماجده وسارة وتهاني يشبحولهم بإبتسامه وهما مقعمزين مقابلهم يراقبوا فيهم ...
🍁🍁🍁
وفي الورشة...
العريس مقعمز يشرب في الشاهي ويمرر في نظره ع الطريق وهو متوتر وخوه والولد اللي يخدم معاهم يشتغلوا ومرة مرة يراقبوا في حالته..
لعند ماجاه اتصال..
خلاه ناض ومشي طلع من الورشة بسرعه..
ورفيق اللي كان يراقب فيه قعد يضحك..
••••••••°°°°°°
فتح باب الحوش وخش وسكره وراه وهو ينادي ..
"يام"...
مشي خش وقعد يدور بعيونه في الكوجينه لما وقف في الكوجينه..وقدامه في الممر لما مالقهاش..
خليل؛يااام..
طلعت عفاف من دارها وهي تلبس في محرمتها وتضحك:هاني هني..
وقف عليها وشدها من يدها وقال بلهفه:شن صار؟!
عفاف بضحكه:شن بيصير يعني..الأمور كلها تمام..
خليل ابتسم بإستحياء وحك شحمة وذنه وهو يقول:ايه يعني شن قالتلك شن قلتيلها وهكي..
عفاف ابتسمت وقالت:قالت اني حطيت فيه الثقه بعد حطها فيه خوي..معناها رد بالك هي والدكتور متعشمين فيك خير واني معاهم رد بالك تخذلنا...
وهو يشوف لعيونها حس بوجع في قلبه..ابتسم بألم وقال:إن شاء الله نكون عند حسن ظنكم..ورفع يدها وباسها..
هي مسحت ع شعره وقالت..ربي يريح بالك دوم ويتمملك ع خير ولدي..
ضمها خليل وقال وهو مبتسم بألم:آمين...
••••••°°°°°°••••••°°°°°••••••
فتح باب الغرفه اللي حابسين ولده فيها سكرها وهو يقول..
هيثم بقلق:زياد..شن درت ولدي؟!
زياد وهو معصب؛ارجوك..
هيثم وقف وقعد ساكت وهو يشبحله بعدين قال؛زياد..خليك قد الوعد اللي عطيته..
زياد بعصبيه:ماهو ماتعرفش شن قال الواطي هدا..
هيثم تنهد ومشي قعمز جنبه وقال:يبي يستفزك..يبي يستفز اي حد ويطلعه عن طوره بش يدير فيه شي..الشاب وضعه النفسي مدهور جدا..
زياد قعد ساكت وهو يهز في رجله بعصبيه..
هيثم حط يده ع ظهره وقال:ولدي..حاول تضبط اعصابك مهما حاولوا يستفزوك...فكر توا بس كيف تطلع من اللي انت فيه..
زياد بعصبيه مكتومه؛تحسابه ساهل انت تحسابه ساهل..لو تسمع اللي يقولوا لو تشوف كيف يشبحولي..حاولت نتجاهل ونفوت ونطنش لكن البنادم عنده طاقة تحمل محدوده يجيها وقت وخلاص..اتم..وخبط كفوفه في بعض..
هيثم قعد يمرر في يده ع ظهر ولده وهو يقول:فاهم عليك فاهم..حاس بيك..
زياد؛تس..لافاهم ولاحاس بحاجه..
هيثم حول يده وضمها لليد التانيه وقال متسائل:تصلي؟
زياد وكأنه كان جمرة متوقده وطاحت في الميه..
قعد جامد في مكانه ومش قادر يرد..
هيثم:إن الإنسان خلق هلوعا..إذا مسه الخير منوعا..وإذا مسه الشر جزوعا..إلا المصلين...
الصلاة تهون عليك هلبه..هي الحبل الوحيد اللي تشد فيه وانت واثق انه مش حيرخيك لأن اللي شادك منه الله سبحانه وتعالى...ربك..
ارتسمت ع وجه زياد ملامح الحزن وهو يشوف القدام..
هيثم:لما ترقالك بابا لما يستفزوك لما توصل لأقصى مراحل الغضب توضا وصل...صل..ولدي...صل...
حرك زياد عيونه اتجاه بوه بعدين شبحله..
هيثم ابتسم..وناض..جاه وباس راسه...بعدين بعد ومشي وهو يقول...شد روحك ولدي..شد روحك ع خاطرك وخاطرنا..
وفتح الباب وطلع وهو يقول..في وديعة الله..
وسكره..
وعيون زياد ع الباب...كان يفكر في كلام بوه...وفاهم انه كان يقوله ماتزيدش مصيبه ع مصايبك..لاأنت ناقص ولاحني ناقصين..
غير عيونه القدام بعدين مسح بيده ع وجهه بضيق..
•••••°°°°°•••••°°°°°•••••
الساعه الثامنه مساءا..
في دارهم مقعمزات..
وحده شاده تركينه وتشبح للفراغ وهي سرحانه...
والتانيه تحاول تقرا ومرة مرة تشبحلها بضيق...
فجأة..
رن تليفون..
الزوز شبحوا لبعض..
بعدين ناضت وحده منهم خدت التليفون من ع الطاوله..شافت المتصل..
بلعت ريقها بعدين فتحت الخط وردت..
رتاج بصوت يرجف:الو..
"عطيني اسمه كامل وشن يخدم"
رتاج شبحت لدانيه بخوف وقالت:علاش شن بدير؟
رد عليه بصوت غاضب..
"قتلك عطيني اسمه وشن يخدم"
بلعت ريقها وقالت:جهاد *****..يخدم في ورشة في *****
مجرد كملت كلامها سمعت الخط فصل قالت..الو...الو..
بعدين شافت للشاشه وقالت..صكر..
دانيه جتها وهي تقول بقلق:من هو؟
رتاج بخوف:عادل..قال يبي اسم جهاد وخدمته..
دانيه ضربت بيدها ع خدها بخفه وقالت:حي غبارة حي كان علق معاه راهو واحد متاع مخدرات هدا..
رتاج بصدمه:من هو متاع المخدرات!
دانيه:جهاد الزفت هدا..
رتاج:كيف!!من قالك!!؟ كيف عرفتي..
دانيه تنهدت بقلق وبدت تحكيلها...
🍁🍁🍁
■وفهالوقت..
عادل كان ماشي بطريقه للمكان اللي دلاته عليه رتاج بعد زاد تأكد منه من ناس يعرفهم..
وطبعا ماكانش ماشي بروحه...
بعد ماقطعوا مسافه لاباس بيها..
وصلوا للورشه...
درسوا سيارتين..
نزلوا من وحده منهم اربعه رجاله ضخام الجثه اشكالهم تبث الرعب في النفوس..
وصلوا للورشه..
اللي كانوا فيها رفيق وجهاد والولد اللي يخدم عندهم..
لما شافوا استغربوا وخافوا..
واحد منهم قال:وينه جهاد..
شبحوا رفيق واللي معاه لجهاد بعدم فهم..
وجهاد وهو يمرر في نظره عليهم قال:اني جهاد..
قاله:تعالى شويه..
جهاد سيب اللي فيده وجاي بيمشيلهم شده رفيق وقال:وين ماشي..
قال واحد منهم:هيا تعالى..
التفت رفيق وشبحله بحده..
جهاد جبد يده من خوه ومشالهم وهو يقول:تفضلوا شباب..
مجرد ماوصل فيهم..جبده واحد منهم..
وطاحوا فيه ضرب..
رفيق طلعلهم يجري بيحز عن خوه وهو يقول بصوت عالي غضب:شن ديروا ياكلاب!..
لكن للأسف حتى هو كلي نصيبه من الضرب
والولد اللي يخدم عندهم يتفرج وهو يرعش من الخوف..
بعد ماخلوهم طايحين مش قادرين يتحركوا...
وقفوا ضرب...
ونزل عادل من سيارتهم وجاهم...
وقف عند جهاد وهو يقول:انت...
جهاد حرك عيونه اتجاهه بالسيف لين شافه واول ماشافه عرفه طول..
عادل:قسما بمن رفع السماء من غير عمد..مازال نلقاك جاي جهة عيلتي ندمرك ننهيك..انت وكل من يعز عليك..راهو هدا مش تخويف..هدا تهديد..ياديوث..ورمقه بنظرة إزدراء..بعدين مشي لسيارته واللي معاه تبعوه...
ركبوا السيارات وتحركوا...
والناس تتفرج من بعيد ومافي حد يبي يجي ناحيتهم..
لين طلعلهم الولد اللي يخدم عندهم وهو يقول:سامحوني..والله خفت مانقدرهمش..
رفيق وهو يحاول ينوض:عاوني انوض..
ساعده ينوض ونوضه...بعدين الزوز مشوا لجهاد يساعدوا فيه بش ينوض..
رفيق وهو يسند فيه:من هو هدا!؟ شن يبي منك؟
جهاد قعد يمسح في الدم اللي ع فمه وهو يقول:بعدين نقولك..
سكت رفيق وهو يشوفله بشك...
ودخلوه للورشه....
••••••°°°°°°
في نفس الوقت..
كانوا خليل وهيثم طالعين من الجامع بعد صلوا صلاة العشاء وهما يهدرزوا في الموضوع القائم بيناتهم حاليا..
هيثم:ضروري جدا تقعمز معاها وتتفقوا قبل ليصير اي شي رسمي..
خليل:وحتى اني يعني من بعد اذنك هكي نبكي..
هيثم هز راسه بإبتسامه وهو ساكت..
وخليل يشوفله..
لعند ماوصل لسيارته قال لخليل:ع فكره نبي عقد قران ع طول..
خليل قعد واقف جامد في مكانه من الصدمه..
هيثم:عندك مشكله؟
خليل بعد مااستوعب اللي سمعه حرك راسه يمين ويسار نافيا وهو مصدوم..
هيثم ابتسم وقال:كويس..هي السلام عليكم..
وفتح باب السيارة وركب..
وخليل قعد واقف يشبحله بنظرات صدمه..
لين تحرك بسيارته...
بعد ماادرق من قدام عيونه قعد يضحك بصدمه وهو يقول..خايف نطلع نحلم في الأخير والله خايف..
ومشي لسيارته وهو يضحك من الفرحه ...
ركبها وتحرك طول للورشه...
•••••°°°°°•••••°°°°°••••••
"شن هو بمزاجك مرة تقول ارفعوها ومرة تقول بنروح بيها"
عادل ابتسم وقال:ابدا والله..لكن المشاكل تصير بين الراجل ومرته يتعاركوا بعدين يتراضوا..وهاني جيت بروحي نطلب السماح منكم ونروح بيها..
مجاهد بحزم:حط في راسك ان مرتك هادي وراها تريس مايرضولهاش تعيش منهانه ولامظلومه..اختي مش زايده علينا راهو .
عادل بإبتسامه:لاعاش ولاكان اللي يبي يهينها ويظلمها..وصدقني المشكله عاديه ماوصلتش بيني وبينها لهني ولافي يوم حتوصل..وتو ارجوك تسمحلي نروح بمرتي..من فضلك..
مجاهد اللي كان يشبحله بحده..مش طايقه ولامتحمله ..
لكن خوفه ع اخته من بوه ومن المشاكل اللي حيديرها لو روح ولقاها حرجانه خلوه هالمره يعديها لعادل ويقول..
لحظه بس..
وناض ومشي طلع لدار خواته..
.....اللي كانوا فيها هما وأمهم....
سدينه وهي تدعي بخوف:يارب سترك يارب..
ورتاج واقفه مربعه ايديها وتشبح للفراغ بحده..
ودانيه تشوفلها..
ع خشة مجاهد وهو يقول:رتاج..
شبحلته ..نزلت ايديها وجاته..
مجاهد:يبي يروح بيك..تبي تروحي؟
سدينه:مالا بتقعد..ايه روحي بنتي روحي للحوش شوق مايصير بين المراة وراجلها..
مجاهد:يام ارجوك..
سدينه بشي من الانفعال:ارجوك انت..بوها لو روح وشافها هني حرجانه انت ماتقدرش تحزها منه..
سكت مجاهد وهو مضايق..
رتاج:ماتخافيش يام اصلا حتى اني نبي نروح..
ومشت تلم في حاجاتها..
ودانيه تشبحلها بحزن..
سدينه:ايوه هدا الصح سلم بنيتي راهو المراة في النهايه ماليها كان حوشها وراجلها...بعدين غيرت عيونها لمجاهد وقالت..خل نمشي ندير للراجل قهوة يشربها لبين مااختك وتت روحها...
ومشت طلعت من حداهم...
مجاهد اللي كان يشبح لرتاج بضيق قال:رتاج..ك...
قاطعاته رتاج وهي تلم في حاجاته:خلاص مجاهد خلاص امي عندها حق..
هو جي بيناقشها لكن حس ان الكلام مافيش منه فايده..
مشي طول طلع من الدار..
ودانيه بعد ماكانت تشوفله رجعت عيونها لأختها وهي تشوفلها كيف طلع في دبش بش تغير ودموعها تنزل..
وجعها قلبها عليها ع الآخر لكن ماقدرتش تواسيها ...
•••••°°°°°•••••°°°°°•••••
"توا تقول الحق ياجهاد والله ورب الكون"
جهاد بعصبيه:تي الزفت...تي هدا...واحد عند بنت نبيها وناوي معاها الجديات وهو مايبيش يعطيني..وانت عارف علاش ارتحت توا..
خليل وهو حاط ايديه في نصه بعد ماكان يشبحله بغضب غير عيونه لرفيق وهو مضايق..
رفيق:طز فيه وفيهم..خليها بنته تقعد عنده..حني ناسبنا اللي مايجوش في عفسة رجله..
ابتسم خليل وهو عاقد حواجبه
شبحله جهاد وقاله بضحكه:مالا راجل خالتك..
خليل شد ضحكته..
رفيق بضحكه:لايازفت الدكتور هيثم..
جهاد بصدمه:كيف ..مني!؟
رفيق بإبتسامه:بيعطي اخته لخليل..
جهاد اتفاجأ ع الآخر وهو يشوف لخليل.
خليل قعد يحك في لحيته وهو في راسه وع وجهه ابتسامه جانبيه..
جهاد نسي اللي هو فيه وناض لخوه فتح ايديه وجاه وهو يقول بضحكه:مش معقول...مش ممكن..
وضمه بقوة وهو يضحك..
وخليل حتى هو ضمه وقعد يضحك..
جهاد:الله عليك...الله عليك ياآندر تيكر..
شحه خليل من شعره..بعدين خبطه ع ظهره..
وجهاد يضحك ويتوجع وهو يقول:آااه..تي خلاص خلاص..مبارك ياباشا..مبارك..ربي يتمم ع خير..
خليل ابتسم وهو يقول:آمين ..والفال ليك حتى انت دير عقل وتاخد ماتتمنى..
ابتسم جهاد وقعد ساكت..
ورفيق يقول في نفسه"الفال ليا حتى اني ان شاء الله زي هاليوم"...
••••••°°°°°°••••••°°°°°°•••••••
في الطريق...
نقص صوت الراديو وقال..
عادل:هدرزي..
رتاج وهي تشبح للروشن قعدت ساكته..
عادل شبحلها شويه بعدين شبح للطريق وقال:خلاص اقلبي الصفحه..وانسي اللي صار..
رتاج شبحتله بعدين قالت:وانت..بتقلبها الصفحه وتنسى..
عادل:لو مادرتش هكي ماروحتش بيك..
رتاج غيرت عيونها عنه وشبحت للروشن..
هو شبحلها شويه بعدين شبح للطريق..وعلى صوت الراديو مرة تانيه...
••••••°°°°°••••••°°°°°°••••••
"هذا وقد قام وزير العدل بزيارة الى سجن ابوسليم بعد ان تجهيزه للمحكومين في جرائم القتل والجرائم المتعلقه بتجارة المخدرات وتعاطيها وسرقة الاموال العامه.."
وزير العدل..
"السجون صار فيها تطوير في قوانينها ونظامها كبير جدا عن قبل..بناءا ع القانون الاخير اللي سناته الدول..في اعادة تأهيل المسجون..وتوفير سبل لكسب الرزق داخل السجن وايضا حتى اكمال الدراسه للمحكومين من غير من حكم عليهم اعدام او مؤبد او مافوق 15سنه...ايضا مع التشديد كذلك في المراقبه والحراسه وتعيين ناس اكفاء لإدارة السجن العمل هدا تعاونا فيه مع وزارة الداخليه..كان وفق خطه مدروسه ومحكمه..الهدف الأساسي من هدا كله هي ابعاد المحكومين عن فكرة العودة لما كانوا عليه سابقا..وهدا نفعه يعود عليهم هما وع المجتمع بآسره"
هيثم وهو مقعمز قدام التلفزيون يتابع في الأخبار قال:شي يشرف يخلي الواحد يزيد يتفائل خير في البلاد هادي..
ماجده:والله صدقت..من قال ليبيا توصل لهني سبحان الذي يغير ولايتغير..
هيثم:الناس لما بدت تتغير ولت واعيه لكل شي ولت تعرف معنى كلمة وطن حق ربي خلا واقعهم يتغير...
سارة:إن الله لايغير مابقوم حتى يغيروا مابأنفسهم..
هيثم ابتسم وقال:هي هادي..
ابتسمت سارة..
هيثم:ايه حق شن صار في المسابقه؟!.
سارة :تطلع نتيجتها الليله..بعد مايكملوا تصليح وراق التحريري..
هيثم:اها قصدها نصها شفهي ونصها تحريري..
سارة:ايه..
ماجده:اكيده انتم الفايزين مادام انتي فيها..
هيثم تلاشت ابتسامته وهو يشوف لسارة..
اللي حافظت ع ابتسامتها بالسيف وهي تبلع في ريقها وقالت:لا خالتو اني مش فيها..
ماجده:انتي مش فيها؟وعلاش..
هيثم:عندها امتحانات السبوع الجاي تبي تتفرغلهم..
سارة كتمت تنهيدتها وهي تشوف لبوها بعيون معبيات دموع..
وهو شبحلها وقال:وين عشانا ..
سارة ابتسمت وقالت:شويه ويكون واتي..
وناضت ومشت للكوجينه..
هيثم شبح لخالته وقال:قولي خالتي..
ماجده:نعم خويله..
هيثم:شن جو نوسه بعد زيارة اليوم..
ابتسمت ماجده وقالت:فل الفل..
ابتسم وهو يقول:مالا قوليلها تجهز نفسها غدوة بيجي خليل يقابلها..في امور لازم يتفقوا عليها قبل لنديروا اي خطوة رسميه..
ماجده بضحكه:ان شاء الله تو نقوللها....
🌹وبعد العشي..
بلغت ماجده نسيبه بزيارة خليل ونسيبه كانت تبي هالزيارة لأن عندها ماتقول لخليل وعنده ماتبي تسمعه منه...
ووصلت ماجده لهيثم انها بلغتها...
وهيثم وصل المعلومه لخليل وحددله الموعد بالساعه...
وخليل اللي كان قريب يطير من الفرحه قعد يراجي فيه بالساعه والدقيقه..
وليله كله والنوم مايبيش يجيه..سهران...من الفرحه...والقلق....
🍁وغيره سهران...
سهران قدام اللوحه متاعه....
كان يرسم فيها صورة مرسومه في خياله..
فضاء اسود كبير....فيه سجادة صلاة تسبح....
وواحد بنصف جسد واقف عليها ويصلي ودموعه تتطاير في هالفضاء...
كان يرسم فيها ودموعه ينزلوا..ويسمح فيهم...
وفي عيونه مليانه فضول تراقب في اللي يدير فيه...
فاتح واقف في الباب يشوفله..
جاه الحارس وقاله؛شن دير هني؟
فاتح التفتله وقال:جيت لواحد صاحبه..
الحارس:تحرك قدامي تحرك..
قلب عيونه ومشي للغرفه اللي يقعد فيها هو وزملاء ليه في المصحه..
دخله وسكر عليه الباب..
فاتح:الجو اللي يديرو فيه..
وانطرح على سريره وحطه ايديه تحت راسه وبدي يفكر..
《 اها..هو معاش يقدر يدير شي لكن حيعيش حياة تانيه هالمرة هو اللي اختارها وهو اللي اسسها من البدايه للنهايه...من بعد الموت ليوم القيامه..》
عقد حواجبه لما حس بشي من الخوف..
طرد التفكير بالكلام هدا من راسه وتقلب ع جنبه اليمين وغمض عيونه..
بعدين جبد المخده من تحت راسه وحطها على راسه...
🍁🍁
وهيثم فهالوقت..
جليس صديقه الصدوق...مؤنس ليله وقلبه اللي واجعته محن الدنيا وشدائدها...
هالمرة اختار يسمعه...
وكان يسمع فيه من القارئ ناصر القطامى اللي كانت تحب زوجته تسمع لقرائته هلبه...
كان يسمع لسورة الأحزاب...
وقف عند آية...
¤ياأيها الذين ءامنوا اذكروا الله ذكرا كثيرا*وسبحوه بكرة وأصيلا*هو الذي يصلي عليكم وملائكته ليخرجكم من الظلمات إلى النور وكان بالمؤمنين رحيما¤
▪▪▪▪
◇وكان بالمؤمنين رحيما...حسيت بمعنى الآيه هادي في كل شدة مريت بيها..في عز الشده ربي كان يبعتلي في حاجه حلوة يفرحني ويهون عليا بيها...زي وجود عيلتي حواليا ووجودي معاهم..لما نشوفهم يضحكوا..وفي فعيونهم لمعة فرحه تطلع من دموعهم..لما نشوف رعاية بنتي الكبيرة لخواتها وسؤالها المستمر عن خوها قوة هالترابط تفرح بيا..
حتى خالتي هدرزتها كلامها القنين..ضحك وقال..خفة دمها في عز الهم ضحكني..وخطبة نسيبة اختي..اللي كنت نبيها تم بسرعه..كنت نبي الفرح يخش حياتنا..ايه صح حيكون مؤقت..لكن حتى الشده مؤقته مهما طال وقتها وحيجيها يوم وتنتهي...واثق..ومتأكده..واثق بالله هلبه..
▪▪▪▪▪
......كل شي سينتهي..الأوقات الصعبه ستنتهي...الإكتئاب سينتهي.. الأيام السيئة ستنتهي....إنها مسألة وقت فقط..
وكل شيء سيبقى على مايرام مرة اخرى....
...ثق بالله.......
"مقتبس"
••••••°°°°°°°•••••••°°°°°°•••••••
وجي اليوم اللي بعده..
اللي استقبل سارة بخبر مفرح وهو فوز مدرستهم للمرة الأولى بالمسابقة المدرسيه ع مستوى طرابلس..
والبنات من فرحتهم احتفلوا بطريقتهم...
او على طريقة دانيه...
اهازيج....وتصفيق...
وكان اغلبها عن رهف اللي احتفوا بيها زميلاتها مع سارة لأنها كانت اكبر سبب في نجاحهم..
رهف وهي تضحك ودموعها تنزل:مش عارفه شن نقولك..كله منك سارة..
سارة بضحكه وهي تمسح في دموع رهف:كله من ربي..بعدين دماغك يافلتوز انت..
رهف عيطت وهي تقول:مش مصدقه ..وضمت سارة..
وسارة ضمتها وهي تضحك..
ودانيه تصيح وتصفق هيا وصاحباتها في الساحه..
والأبلات يتفرجوا عليهم والفرحه غامرتهم..
ومنهم جمعه اللي عيونه مابطلوش مراقبة لدانيه وخطيبته اللي كانت حتنفجر من الغيظ تشبح فيهم...
🍁🍁🍁🍁
وتعدي الساعات...
اللي كان يعد فيهم خليل...
لين قرب وقت الموعد..
روح للحوش بعد ماصلى العصر...وبدي يوتي في روحه..
🌹ومن جهة تانيه..
نسيبه بعد روحت مع بنات خوها من المدرسه بدت تجهز في نفسها...
طلعت عباية سودا وساعه..مع حجاب لونه زيني غامق..
وصلت ركعتين استخاره..
بعدين بدت تلبس ...
وبعد كملت قعمزت تراجي في جية خوها...
....اللي كان يراجي فيه خليل بفارغ الصبر.....
وهيثم روح للحوش....لقي خليل يراجي فيه حدا الورشة..
ركبه سيارته وتحركوا للحوش...
•••••°°°°°•••••°°°°°••••••
في المربوعة الدخلانيه..
هيثم:اشرب قهوتك..
خليل بإبتسامه يحاول يخفي بيها توتره:اهو نشرب..
هيثم ابتسم وقال:ماتخافش كل شي حيمشي تمام بإذن الله..
ابتسم خليل بود وهو يشوفله..
تنهد هيثم وحط فنجان القهوة وقال:لحظه...
وناض ومشي طلع...وعيون خليل بنظراتها الملهوفه معاه...
مرت لحظات...
ورجع هيثم ومعاه نسيبه اللي قالت..
"السلام عليكم"
خليل قلبه قريب وقف...العمليات الحيويه في جسمه شبه تلخبطت..
معاش عرف ينزل عيونه ولايشبحلها ولايرد عليها ولامايردش..
قعد في حالته هديكا لين قعمز خوها وهي قعمزت بحداه..
هيثم:مش حتطلعوا من هني لين تكون متفقين على كل شي..تكلموا في كل شي..كل شي....تمام..
نسيبه وهي منزله عيونها:حاضر..
خليل ومازال يحاول يغلب ارتباكه:احمم...تمام..
هيثم تنهد وناض فتح باب المربوعه البراني وخدي كرسي وقعمز حداه...
خليل بعد ماكان يشبحله حرك عيونه بإتجاه نسيبه..
هي قامت عيونها وشبحتله..
هو قاللها:كيف الحال ..
هي رفعت حاجبها وقالت:الحمد لله...وانت..
هو ابتسم وقال:في احسن حال والحمد لله..
وجهها ولى احمر وغيرت عيونها عنه..
هو شبك ايديه في بعض وقال:نسيبه..
شبحتله..
خليل:اول شي شبحتك هادي غيريها..نبي الأحترام بيني وبينك يكون قبل اي شي تاني واول حاجه نتفقوا عليها الإحترام...الإحترام اهم من كل شي..
نظراتها بروحهم تغيروا بعد سمعت كلامه وقالت:عندك حق..واني نقدر ونحترم الانسان الصادق والصريح..
خليل:واني حنكون صادق وصريح وربي شاهد على كل حرف نقوله...
نسيبه:كويس..
ابتسم خليل وقال:كويس.....
يتبع°•
