البطل المغمور

أبطال

#سارة
هدا اسمي..
بالكامل تبوه؟
سارة هيثم الكاتب...
هيثم الكاتب..دكتور كبير ومشهور هلبه ويطلع ع TV في المدرسه في المعهد اللي نتعلم فيه لغه وين مانمشي الكل لما يعرفني بنت هيثم الكاتب يعاملوني معامله خاصه عمرها مافرحتني...الناس ماتحبش هيثم الكاتب لانه دكتور مشهور لا يحبوه لأنه يده ديما في الخير...دكتور فاتح قلبه لكل مرضاه...ولأمي في بعض الأحيان بس حني قلبه من ناحيتنا مصكر..مش عارفه علاش..هو في نظره ان الأبوة هي كفاية حاجتنا الماديه فقط..لا مش هكي وبس ويقول اني عطيتكم اسم ملايين من الصغار زيكم يتمنوا يحملوه...
تمنيت لو كانت عندي الجرأة اللي تخليني اناقشه نفهمه شن هو اللي نبوه منه..بس كلهم بيقولولي واولهم ماما انتي قاعده ماوصلتيش 16 سنه بتعلمي بوك واجبه؟!
ولأن ماما مخليتنا مؤدبين هلبه بزايد لين ندرهو الكبد..مانقدروش نرفعوا عيوننا فيه..
احيانا بيني وبين ربي نقول ياربي انت عطتينا قطعه من الجنه ع هيئة بشر وهي امي..علاش من الجنه ماعطيتناش قطعه تانيه ع هيئة أب؟!
للأسف..مانقدر نغير شي هدا بوي ومافي حد يختار والديه..
وفي النهايه
قدام كل الناس مجبره وين نسمع جملة "سعدودكم ع بوكم" نبتسم ابتسامة فرح مزيفه بش نكمل باقي برستيج هيثم الكاتب...