#البطل_المغمور"شمس الغروب"
#الجزء_الثلاثون"القسم الأخير"
#الجمان_الفريد
🌷اول شي نبي نشكركم كلكم على دعواتكم الجميله وسؤالكم عليا وكلامكم الحلو الحمد لله عليكم...
ربي مايحرمني منكم حبيباتي...
وتاني شي وهو الأهم....الصلاة أولا...صلوا قبل بعدين اقروا🌹🌹🌹🌹🌹🌹🌹🌹🌹🌹🌹🌹🌹🌹🌹🌹🌹
💐...
طلعت من المربوعه وهي متوجهه للصاله..
ابتسامه حلوة مزينه وجهها..والدموع تنزل من عيونها..
لما وصلت في الممر الفاصل بين الصاله والمطبخ شافوا خالتها وبنت خوها جوها بسرعه..
ماجده بإستغراب؛شن صار خيرك تبكي؟
وسارة تشوفلها بقلق..
ضحكت نسيبه وقعدت تمسح في دموعها وهي تقول:مافي شي..
سارة:مالا خيرك تبكي..
ضحكت نسيبه تاني وقالت بصوت مبحوح؛فرحانه..
ضحكت ماجده وضمتها وهي تقول:ياوخيتي سلمها واخيرا ياربي هالبنت بنتهنى عليها..
ونسيبه تضحك ودموعها مازالوا ينزلوا..
وسارة تشوفلها بإبتسامه وعيونها مليانات دموع...
....برا.....
هيثم بإبتسامه؛مدام اتفقتوا معناها خلاص..موعد عقد القران بإذن الله حيكون يوم الخميس هدا..
خليل وهو مبتسم بفرح ودموعه في عيونه:إن شاء الله..
هيثم :طبعا العرس مادابيا يكون بعد تعدي فترة لابأس بيها ع وفاة أسيمه..هو صح الحزن الطويل منهي عنه لكن عندي صغار وجع فقد امهم مازالو يحسوا فيه واني مش خير منهم..
خليل؛عندك حق..وراهو المرحومه غاليه علينا كلنا..
هيثم تنهد بعدين ابتسم بألم وقال:الله يرحمها ويغفرلها..قداش تمنت تفرح بيها..نسيبه بالنسبه ليها اختها الصغيرة..
خليل بأسف:الله يرحمها..
خبط هيثم خليل ع ذراعه خبطات خفيفه وقال:ربي يوفقكم ان شاء الله ويتمم على خير..
خليل ابتسم وقال:اللهم آمين...
🍁🍁🍁
وروح خليل لأمه وبشرها..وفرحة عفاف كانت فرحة بحالات مختلفه..دموع ع ضحكات..ع زغاريد..وقلبها يرقص ع كل شعور بهجة يحسه...
واخته تهاني كذلك اللي فرحت لخوها هلبه انه واخيرا ربي اكرمه ونوله مايتمنى..
وكذلك خوته...
وفي عز فرحتهم خوه الصغير طلب منه طلب عكر عليه هالفرحه...
جهاد:مفروض تكلم بوي تبشره والله يطير من فرحته..
رفيق ارتسمت ع وجهه ملامح الأنزعاج..
وعفاف شبحت لخليل اللي تغير وجهه من طلب خوه..
سجى:يمشيله زيارة ويبشره..
رفيق:ضمي فمك انتي شن علاقتك..
سجى شبحتله بخوف..
وجهاد استغرب فيه وقال:خيرك عليها ماقالت شي غلط..مفروض يمشيله يبشره..
خليل هز راسه وقال مسايرة لخوه:إن شاء الله ان شاء الله..
جهاد ضيق عيونه بشك ومرر نظره عليهم وقال:في حاجه صايرة اني مانعرفهاش..
خليل ورفيق شبحوا لبعض وسجى تشوفلهم..
وتهاني تشبح لأمها وهي تحاول تنقد الموقف لما قالت:اللي صاير عندك انت..قول الحق ياولد شن خلا الراجل هدا يجي يدير فيك هني! دايرة حاجه لبنته!؟
جهاد انصدم في كلام امه وانحرج وهو يقول:شن تقولي يام شن الكلام هدا..مايجيش هكي راهو..
ومشي من حداهم ببعض الصعوبه وهو يتمتم لين خش للدلر..
وعفاف مشت وراه للكوجينه وهي تقول بشي من الربكه؛خل نمشي نطيب العشي..
وخليل ورفيق معاها بعيونهم..
تهاني:خليل..
شبحلها..
تهاني؛خليل نبي فلوس الباص..
خليل ضيق عيونه وقال:نسيتهم..راجي شويه..
ومشي توجه لداره..
اما رفيق جبد مرته من يدها وقال؛تعالي..
ومشي هو وياها..وتهاني تشوفلهم لين ادرقوا من قدام عيونها قالت؛عليك عيشة عايشتها كان مش طايقها علاش واخدها من الأول..
ع جية خليل وهو يقول:خيرك تكلمي في روحك!
ومدلها الفلوس..
هي خدتهم وقالت؛على معامله رفيق لسجى تصخف فيا الحق..رد بالك حتى انت دير زيه بعدين..
نكشلها شعرها وهو يقول:تحركي لدارك واقري قرايتك..
ضحكت ومشت لدارها..
اما هو تنهد بإبتسامه بعدين توجه لباب الحوش بش يطلع..
سمع صوت تليفونه يرن بنغمة الرساله..
فتح الباب وطلع..
وطلعه من جيبه كان نوعه "بيلا"وشاف الشاشه بعدين فتح الرساله..
(الليله في نفس الموعد... )
ارتسمت ع وجهه ملامح الضيق ..رد التليفون لجيبه ومشي كمل طريقه...
....الطريق اللي ماشي فيها توا ماتخوفش...
الطريق اللي بتاخده لباب الحوش..او للورشه...او للمسجد..
الطريق اللي تخوف...طريق تانيه مش معروفه شن نهايتها ماشي فيها خليل توا مجبر وبإراداته...
••••••°°°°°°••••••°°°°°°•••••••
بعدصلاة المغرب...
في الورشه..
رفيق وهو يخدم تحت وحده من السيارات:بكل انت ديما تخنس وشكاك..مافي شي قتلك مافي شي..
جهاد:رفيق..
طلع رفيق من تحت السيارة وقال:وااك..من امتى انت عش هكي..
وناض وقف ومشي بإتجاه الباب..
لحقه جهاد وهو يقول:اني اللي نعرفك ريفو ماتعرفش ادرق ع وجهك باينه...قول..تكلم ماتخلونيش زي الأطرش في الزفه..
وقفوا برا..
ورفيق طلع من جيبه دخان وولاعه وبيبدا يدخن..
وجهاد واقف يشبحله وهو حاط ايديه في نصه يراجي في رده..
رفيق نفخ الدخان وقال:مشاكل عاديه بين بوي وخليل..خليل يبي يولي..
جهاد ابتسم بتهكم وقال:قول ولى مش يبي يولي..
شبحله رفيق وهو متفاجئ..
جهاد:معقوله مش ملاحظه مش مركز عليه كيف قاعد يختفي الأيام هادي وتجيه اتصالات يطلع يتكلم برا..
رفيق غير عيونه عنه وهو يمرر فيهم ع الطريق ..مش مستوعب اللي سمعه..
يعني مادام ولى...علاش مازال شاد الصلاة في الجامع..وعايش دور التايب..
علاش بيحط بنت ناس في رقبته!؟ مش خايف عليها يلحقها شي من آذاهم..
مش خايف لو خوها عرف ينهي كل شي من قبل مايبدا!؟
وهو في عز تفكيره...
خطمت من قدامهم سيارة شاف اللي راكب فيها...
حس بنار توقدت في صدره...قعد يتبع فيه بعيونه لين خش الزنقه..
جهاد:تعرفه؟
رفيق شبح لخوه شويه..بعدين لوح الدخان وقال..لا...
ولف وخش داخل..
وخلا جهاد يشوفله بإستغراب...
......قدام حوش هيثم....
درس مجاهد السيارة وقعد يستنى في مرت بوه...
....ومرت بوه....
في حوش ولد اختها تسلم عليهم قبل تطلع..
ماجده؛سلموا على هيثم..
نسيبه:يوصل..مانسيتي شي ولا..
ماجده وهي ماشيه للباب:لا..
ع جية سارة تجري:خويله..خالتي..
وقفت ماجده هي ونسيبه..
وقفت عليها سارة وقالت؛اعطي الكتاب هدا لدانيه..
خداته ماجده وهي مستعجله قالت:باهي..
وفتحت الباب وطلعت..
ووراها سارة..وقفت في الباب وقعدت تشبحلها لين طلعت من الحوش..
تنهدت بعدين خشت داخل وسكرت الباب..
لقت قدامها عمتها واقفه تشبحلها بنظرات شك..
سارة بإرتباك؛خيرك؟
نسيبه وهي مضيقه عيونها بشك؛مش تتلاقي انتي ودانيه في المدرسه علاش ما عطيتهاش الكتاب غدوة..
سارة وهي تحاول تخفي ارتباكها؛قلت مرات ننساه..
ومشت طول من حداها ...
ونسيبه اتبع فيها بعيونها وهي تقول؛مرات تنسيه...اممم..
وسارة خشت للدار وهي تضحك بصمت....
.....برا.....
في السيارة..
اول ماخشت ماجده سلمت على مجاهد وحطت الكتاب قدامها...
ماجده:روح بوك؟
مجاهد وهو يحرك في السيارة ويشبح للكتاب:قال في الطريق...
ماجده:اها...
مجاهد :ايه...شن حال العيله اللي كنتي عندهم..
ماجده ابتسمت وقالت:حالهم باهي الحمد لله..
مجاهد بإبتسامه؛شن اخبار زياد..
تنهدت ماجده وقالت؛ماشي حاله الحمد لله..خير من قبل..
مجاهد:كويس الحمد لله..
ماجده بحسرة:الحمد لله على كل حال...
🍁وكملوا طريقهم وهما يتجاذبوا في اطراف الحديث..
وكل مرة يهدرزوا ع حاجه...مرة ع وضع البلاد..
مرة ع خدمته وكان مرة مرة يسأل فيها بطريقه غير مباشرو عن سارة وهي تجاوب فيه اجابه تشبع فضوله ودايرة روحها مش قصده...
لعند ماوصلوا للعمارة..
الزوز شافوا رشيد واقف ع سيارة سودا مظلمه نفسها اللي شافه مجاهد مرة مروح فيها..
مجاهد دار كلاكس..
سمعه رشيد والتفت شاف لمصدر الصوت..
ارتبك وتوتر..ووخر عن السيارة وشبح لصاحبها وقعد يحي فيه بيده..
وطول السيارة تحركت..
نزلوا مجاهد وماجده من السيارة..
مجاهد وهو يشبح لرشيد بحده:اركبي خالتي تو نركبها اني الشنطه..
ماجده وهي تشبح لرشيد من فوق لتحت:باهي..
ومشت..
ورشيد يشبحلها بكره..
مجاهد قدمله وقاله:شن منزلك من الحوش توا انت!؟
رشيد وهو يحاول يخفي خوفه؛صاحبي جي يسأل ع حاجه في امتحان غدوة..
مجاهد شبحله شويه بعدين قال:ترا هات هاتفك..
رشيد بخوف مد تليفونه لمجاهد...
خداه مجاهد منه بقوة..وبدي يدور فيه...
رشيد:قالتلك حاجه هديكا..
شبحله مجاهد وقاله:من هي؟
رشيد؛مرت بوي..
مجاهد شبحله من فوق لتحت وقال:شن بتقولي؟
رشيد؛مانعرفش هي ليها وقت حاطه راسها براسي وتشبحلث في شبحات تخوف..
عقد مجاهد حواجبه وقال:علاش؟
رشيد:اسألها هي..
شبحله مجاهد شويه..بعدين رجع يفتش في التليفون ورشبد يشبحله بخوف..
لقي تليفونه نظيف وفاضي مافيه شي غير مقبول..
مدهوله وقال:اركب للحوش..
خداه ومشي طول خش للعمارة..
ومجاهد ولى للسيارة وهو يفكر في كلام رشيد عن مرت بوه...
لما خش السيارة وجي بياخد الشنطه..شاف الكتاب..
ابتسم وخداه...بعدين خدي الشنطه...وسكر السيارة...
وخش للعمارة...
••••••••°°°°°°°°•••••••
في مطعم المصحه..
كانوا النزلاء مقعمزين يتعشوا..
ومن ضمنهم زياد اللي كان مقعمز ياكل بروحه..
وفاتح مرة مرة يشبحله وهو ياكل...
شويه وقال بإنزعاج؛تي شن ماكلتكم هادي..
شبحوله اللي في المطعم كلهم من بينهم الناس المسؤوله عن اعداد الوجبات..
واحد منهم قال:وشن اللي مش عاجبك وحني نديروه زي ماتبي..
فاتح حرك راسه بالنفي وقال:تس..ماتقدروش..
رد عليه وقال:من قالك مانقدروش انت قول شن تبي بس..
ناض فاتح ومشاله وهويقول:حتى لو قلتلكم مش حتقدرول..
ع خشة هيثم للمطعم يبي زياد..
ركز ع الشوشرة اللي دايرها فاتح..
فاتح؛تطييب الماكله ياعزيزي..فن مش أي حد جيبه صح..
زياد رفع عيونه وشبحله..
فاتح وقف ع قدام الشباب اللي يطيبوا وقال:الفن هدا يخليك تحول وجبه عاديه لتحفة فنيه ياكلوها العيون قبل الفم..
مثلا...مثلا...سندويتش الطن اللي ديرولنا فيه الصبح المعبي هريسة حكه ع طن قاعد مكتل من غير نيه اديرو فيه..
لو تخلط بهريسة عربيه وشرايح زيتون اخضر واسود وخيار طماطم...وياسلام لو الهريسة العربيه تكون مخلطه بالحبق والكصبر...اني سندويتش زي هدا فوق الفايده اللي فيه بنته تقعد في فمي يوم كامل..
واحد من النزلاء قال:سهفتني يادعوة..
ضحكوا الموجودين..
فاتح:ماهو هما فاهمين ان حني زي المرضى متاع المستشفيات ياكلوا اللي يجي..رانا هني نتعالجوا من الادمان..يعني مرضى نفسانيا..لازم يسايسونا ويدلعونا اخر دلع بش نطلعوا من هني بنفسيه حلوة ونفيدوا المجتمع..
ضحكوا..
وزياد حرك راسه يمين ويسار..
واحد من الحرس قاله:ولي مكانك...
شبحله فاتح برفعة حاجب بعدين جو عيونه ع هيثم اللي كان واقف يشوفله..مرر عليه نظره من فوق لتحت...ومشي ولى لطاولته ..
هيثم ابتسم ومشي لولده..
وهو ماشي في نزلاء قعدوا يحيوا فيه..مع الشباب الطباخين..
وعيون فاتح وهو ياكل عليه...لين وصل لطاولة ولده وقعمز..
زياد بخوف:في حاجه..
هيثم بإبتسامه:لا مافي شي..غير جايبلك خبر حلو..
زياد :شن هو؟
هيثم:عمتك نوسه..خلاص بنعطيها..
ضحك زياد ضحكه خفيفه وقال:كيف صار وقالت باهي؟
هيثم رفع حواجبه وقال؛نصيبها..
زياد؛باهي شن وضعه شن يخدم ..
هيثم؛تعرفه كويس انت...
زياد بإستغراب:مني؟
هيثم؛خليل ولد خالد جارنا..
فتح زياد عيونه بصدمه وقال:تبصر!
هيثم:لا ابدا..
زياد عقد حواجبه وقال؛كيف تعطيها لواحد زي هدا؟
هيثم رفع حواجبه وقعد ساكت..
زياد بحده:تموا الرجاله من البلاد خلاص!؟ ولازادت عليك!؟
هيثم تمالك اعصابه وكبتها وقعد يشبح لولده لحظات..
بعدين غير عيونه عنه وشبح لإيديه اللي كانوا فوق الطاوله وشبك صوابعهم في بعض..مصمص شواربه بعدين شبح لولده وقال:على شن اعتراضك بالزبط في شن مش عاجبك خليل؟
زياد رفع حواجبه وقال:انت تسأل سؤال زي هدا!؟ نبي نعرف شن غير موقفك منهم كيف تغير 180 درجة هكي!؟
هيثم بهدوء:معليشي جاوبني على سؤالي..
زياد ضم شواربه داخل بعدين هز راسه وقال:تو نقولك..ساد ان امثاله هما السبب اللي وصلني اني وكل اللي معاي هني لهالحاله..
هيثم قعد ساكت وهو يشوفله..
زياد:لتوا والله مامستوعب..اكيد تبصر صح..هي صح بصارة دمها ثقيل..لكن انت هكي بالعاده..
هيثم ضحك بعدين قال:اني هكي بالعاده فعلا مش متاع بصاره..ابتسم وقال..هو بنادم عادي لاهو رسول ولانبي معصوم ولاملك بش مايغلطش..يغلط زيه زيي زيك..وعنده فرصه زي ماكل الناس عندها فرصه..توب وتصلح من نفسها.
زياد تنهد وقال:تمام..لكن مش لدرجة تعطيه اختك..اختك هادي اختك..ورب العزة لو يجي واحد زيه لسارة مانعطيه لو يولي شيخ..
هيثم قعد يشبح لزياد وهو ساكت يفكر..
▪▪▪▪▪
◇شخصية زياد فيها عيب كبير وقتها بس تأكدت منه..الكبر..متكبر حتى بأخطاءه..ممكن يعترف بيها وبين نفسه لكن قدام الغير لا..عنده تعالي وللأسف هدا شي لاحظته حتى في تعامله معاي طول الوقت..شاف خليل مش من حقه حقه يتوب او يتصلح او ياخد فرصه..ونسي نفسه هو...لو كان هو في مكان خليل يلقى من يعطيه ع اللي داره وصار معاه!
هو هكي الكبر يعمي بصيرة القلب ...
ع العموم وقتها ماكنتش نبي ناقشه هلبه حاولت ننهي الموضوع بهدوء...
الهدوء اللي مش عارف كيف قعدت محافظ عليه وقتها!
▪▪▪▪▪
هيثم ابتسم وقال:مطمن ع سارة مدام وراها راجل زيك انت..
زياد؛وانت..
هيثم:خليني اني واختي نتفاهموا..
زياد هز راسه وهو يحاول يكتم عصبيته وقال:امم مادام هي راضيها وانت عاجبك..احرار...
هيثم هز راسه وهو مبتسم ومد لولده حاجه لما شافها تفاجئ بيها..
هيثم:خود..
قعد يشبح زياد للمصحف..بعدين مد يده وخداه..
هيثم :ماتبي شي..
زياد بدون مايشبحله:الالوان تموا..
هيثم هز راسه وقال:تمام..بعدين ناض وقال..في وديعة الله تصبح على خير..
ولف ومشي..
زياد وهو يشوفله كيف ماشي :قدامك كل خير..
طلع هيثم من المطعم وعيون فاتح كانوا يلحقوا فيه..بعدين رجعوا لزياد لقاه شاد فيده حاجه مغلفه ومش واضحه قعد مركز فيها ومركز في زياد كيف حريص عليها وهو شادها..
حط في في فمه حبة زيتون وهو يشوفله بنظرات ماكرة وعقله فكر في شي ناوي يديره..
"سمعتوا ياشباب..قالوا غدوة بيفتحوا صالة الرياضه"..
التفت فاتح لمصدر الصوت وقعد يشبحله بعيون يشعوا حماس..
وزياد في عيونه كانت نفس النظرة...
•••••°°°°°•••••°°°°°•••••
الساعه الثانية عشر بعد منتصف الليل...
واقفه في روشن دارها...من ورا ستارها تراقب في الزنقه وتشوف وهي تستنى ع نار..
لعند مابان عليها وهو جاي على رجليه..
تنهدت براحه...
اما هو وكأنه في شي قاله ارفع عيونك في روشنها..
رفعهم وشافها..ارتسمت ع وجهه ابتسامه جانبيه..
هي غطت الروشن بالستار وارتسمت ع وجهه ابتسامة حياء مخفيه عنها..بس هو شافها في خياله بعيون قلبه..
قلبه اللي مانبضش في حياته بحب مراة غير امه واخته الا ليها هي..
المرحله اللي وصللها فيها معاها...عطاته سبب تاني قوي بش يحب الحياة ويشوفلها بنظرة حلوة..فيها كل شي ملون وزاهي ومنور...
ولسان حاله يقول..زي ماقال الرافعي يوما...
....وأما قبل...فقد رأيت عندك الفجر...وأخذت منه نهارا أحمله في روحي لايظلم أبدا...وخالطت عندك الربيع..وانتزعت منه حديقة خالدة النضرة في نفسي لاتذبل أبدا......
🍁🍁🍁🍁
وماكانش هذا لسان حال خليل...
وحتى راجح اللي خدت دانيه عقله وخلاته مشغول بيها حتى وهو في عز خدمته...لازم عقله يشرد ناحيتها..
ومش عارف كيف يشكر جيهان اللي كانت سبب في ملاقاته بيها...
وجيهان مش عارفه كيف دير مع جمعه بش تخليه يحدد موعد العرس في أقرب وقت..
غيرتها الشديده عليه مخليتها معاش تتحمل
فكرة طول الخطبه اللي ممكن تخلي وحده تانيه تخطفه منها..
وجمعه حاله من حال خوها..عقله وقلبه ولوا مشغولين بدانيه هلبه...بدت تسيطر عليه وهو مايبيش يقاوم هالسيطرة...
اما هي ..
دانيه ..كانت مشغوله بس بقرايتها...ناويه حتى العام هدا تكون هي الأولى ع المدرسه..
ووجود منافسه شرسه زي سارة مخليها ضاعف اجتهادها...
وسارة...
كانت بين كتبها الدراسيه...سجادة صلاتها..
والمصحف...اغلب ليلها سهرانه تحوم حواليهم....
اما بوها ..
فكان يحوم في هالحياة....
عليهم...وعلى خوها...وعلى قضيته اللي كانت خيوطها متداخله في بعضها زي الأسلاك الشايكه...
ومش عارف كيف حيطلع منها...
بس لله تدبير عجيب للأمور...
تفرج...من حيث لايحتسب العبد..
وان طال أمد الكرب...
🍁🍁🍁
وعدت ايام هالأسبوع....
وجي اليوم المنتظر...لنسيبه وخليل...
عقد القران....
اللي دار ع خاطره خليل عزومه كبيره...
حضروها اقاربهم من امه وصحابهم كلهم موجودين في حوش عفاف بش يعاونوها...
حتى الحاجه صالحه...
وطبعا ملاك مش حاضرة...كانت حبيسة الحوش..ودارها...وحزنها وعذابها...🍁
🌹في الوقت
اللي كانت فيه نسيبه في حوش خوها مقعمزة بين احبابها واصحابها...
خالتها وعيلة راجل خالتها..
صديقات ليها من ايام الجامعه ...
مع بنات خوها اللي كانوا فرحانات لعمتهم..
بس كبيرتهم كانت مدرقه ورا ضحكاتها حزن كبير..
وهي تشوف بعيونها المحبوسه فيهم الدموع طيف امها بين كل الموجودين..
وياقداش تمنت اسيمه يجي هاليوم وتفرح بحماتها اللي كانت بالنسبه ليها اختها واعز..وهي اول من باحتله نسيبه بسر قلبها المكتوم...
♦️قبل شهور....
اسيمه:احكي نوسه..
نسيبه ودموعها ينزلوا:مش عارفه شن بنحكيلك..نكرهه..
ايه نكرهه لأن مخليني نحس بشعور ضعف عمري ماحسيت بحياتي..نكره روحي لما نحسه ياسومه..ومش عارفه علاش من بين الرجاله كلهم.....ليش هو مش عارفه..
اسيمه ابتسمت وقالت:قسم قلبك..
نسيبه قعدت تشبحلها ودموعها ينزلوا وهي ساكته..
اسيمه:هو من دونهم كلهم برغم انك تشوفي فيه ماينفعش..بس قلبك شافله بنظرة تانيه..ممكن لأنه من قسك قلبك..
نسيبه:قسم شني ياسومه مستحيل ناخد واحد زيه ولافي من يرضالي بيها..
اسيمه بإبتسامه:مافي حد يعرف حاجه زي هادي غير ربي..لو قاسمهولك...يهيأ الأسباب ويغير الظروف مهما كانت صعبه ويكسر الحواجز مهما كانت عاليه ومتينه..مافي شي يوقف قدام ارادته..
نسيبه:لكن اني مانبيشي..
اسيمه بضحكه:ايه ماهو واضح..
نسيبه مسحت دموعها وقالت وهي تشوفلها بطرف عيونها:ماتضحكيش..
واسيمه تزيد تضحك...
♦️الوقت الحاضر..
مسحت نسيبه دمعتها بسرعه وهي تشوف للوحه اللي كانت مقابلتها وقالت في قلبها..
"قداش تمنيتك معاي ياسومه هاليوم...الله يرحمك ياوخيتي الله يرحمك ياغاليه"
🍁🍁🍁
في الجامع ..
وبعد الصلاة العصر...
كان خليل وكيل نفسه...وهيثم وكيل اخته...
مقعمزين ع يمين ويسار المؤذون الشرعي..
وهو يلقن في كل واحد فيهم شي يقول...
وخليل من سرعه نبضات قلبه حس جسمه ثلج من الصقع برغم ان الجو ماكانش مصقع..
كان يردد الشيخ وكان يلقى يقول الكلام كله دفعة واحده المهم يتم الأمر ...
ولما جي دور هيثم..كان يشبحله وهو ياخد في انفاسه بسرعه..وحركة صدره وهو يهبط ويعلى كانت واضحه لخوته..
بعد ماكمل هيثم..
بدي الشيخ يدعي وهما وراه...
وخليل مع دعوة كان يأمن من وسط قلبه وبتوسل ماكانش واضح الا لله سبحانه وتعالى..
وتم الشيخ دعائه...وانعقد قلب خليل ع قلب نسيبه واخيرا...
🌹🌹
ومجرد ماوصل هالخبر لحوش خالد..
انقبلت الدنيا بالزغاريد..والشتاوات لكن بدون دربوكه...
مراعاة لوفاة جارتهم اللي مامرش عليها سته شهور..
وكذلك في حوش جارتهم نفسها..
زغردوا بس وقعدوا يهنوا في العروسه بدون مايغنوا او يبالغوا في اظهار الفرح...
🌷هو الصح في شريعتنا الغاليه الحزن مش اكثر ايام..لكن في ناس من غلاوتها وكبر مكانتها الحزن ع فقدها يكون اكبر من عزمنا...نبوا وقت طويل على مانتأقلموا ونتعودوا على غيابه...وزياده على هكي الظروف اللي تمر بيها العيله من اللي صاير مع زياد يخليهم مايقدروش يبالغوا هلبه في إظهار الفرح...🌷
••••••°°°°°•••••°°°°°••••••
"سقوا القصعتين هادوا بسرعه الولاد يراجو"..
هادي عفاف وهي تحط في القصاع لوحده من خواتها بش تسقيهم..
تهاني:يام طلعتهم وتينا المسير والمشروب وين القصع..
خالتها قالت:هما تعالوا ارفعوا...
فجأة سمعوا زغاريد..
عفاف وقفت وهي تقول بإبتسامه فرح:خليل جي..
وسمعوا زغاريد مرة تانيه وبدت معاها الشتاوات..
نور العين قري فاتحته..والعقبه لخوته اللي تحته..
خشت عفاف من الكوجينه وطلعت منها ومشت للممر لقت نساوين العيله واقفات يشتوا وخليل واقف في الباب وعيونه خالاته وهما يشتوا بحماس..فرحان لأنهم يبانوا فرحانات بيه..
غير عيونه عنهم لأمه اللي جت وهي تغني..
نور العين قري فاتحته...جاب العين اللي جارحته..
وطلعتله وضماته وهو حضنها..
عفاف بدموع؛مبارك وليدي مبارك بهناك ياربي..
باس خليل راسها وقال:وطول عمرك ياعمري..
ع طلعة تهاني وهي تغني..
يامبروك عليه شقيقي...هدا وين زمطته ريقي..
ضحك وجبدها وضمها حتى هي وهو يضحك..
وكملوا نساوين العيله شتاواتهم لين طلع خليل مع خوته بالعشي بطريقهم للصاله اللي داير فيها العزومه...
وهدا كله...
وملاك تسمع وهي بتتقطع من البكي...
🍁مش من قسمك ياملاك..ماتخليش عيونك فيه ولاقلبك عنده وارضي بالنصيب🍁
•••••°°°°°••••••°°°°°°••••••
مقعمز في مكان في المصحه وهو يشوف من باب الفيرندا للخارج ..
كان سرحان في عالم تاني...
لعند ماقطع عليه سرحانه احد شياطين الإنس..
:شن جو..
فاتح:شن تبي..
:جاي نشوف خيرك مالقيتش مشيت صالة الرياضه بكل اللي ليها فوق سبوع فاتحه..
فاتح؛ماخاطريش..
طلع الشاب من جيبه حاجه وحطها قدام عيون فاتح اللي لما راها كل شي فيه تلهفلها..
:خاطرك في هادي..
فاتح شبح لكيس البودرة بعدين شبح للشاب وقال؛فوتيني ماعندي شي راهو..
:ومن قالك نبي فلوس..
فاتح بتهكم؛لا تبي مصلحتي..
:هادي مني ليك هديه ياسيدي..
فاتح؛ماهو هي في الاول ديما هديه..
:يعني ماخاطركش..
فاتح:ايه وفوتني ونوض من حداي خير مانفضح بيك..
شبحله الشاب من فوق لتحت بعدين ناض من حداه..
قعد يشوفله فاتح لين تأكد انه تباعد..
بعدين ناض من مكانه ومشي جهة الديار...
....لما وصل للدار اللي يقعد فيها زياد..
خشلها طول وتوجه لسريره...
حول المخده...شاف الحاجه المغلفه بغلاف اسود..
طلعها ع باله فيها شي مادي غالي...
فتحه وشاف شن فيه..
صابت جسمه قشعريره...وعيونه يشوفوا بجحوظ لكلمة..
"القرآن الكريم"..
رجع دسه بسرعه ورده لمكانه..
وناض...ومشي وكأنه هارب وطلع من الدار...
■فالوقت..
اللي كان فيه زياد في صالة الرياضه يتريض ع وحده من الآلات بإشراف مدربين متخصصين...
في اول الأيام كان حاس بإنهاك وتعب..بس توا بدي يتعود وهو قاعد يحس بإن هلبه حاجات كانت مدمره ورجعت تعمر من اول وجديد...
لكن ماقدرش يحول من راسه التفكير في عمته اللي ارتبطته اليوم بعقد مقدس وميثاق غليظ..براجل للآن شايفه مش مناسب ليها برغم انه بوه حاول يوصله الصورة اكثر من مرة بس هو مازال شايف للموضوع بعين الكبر...
•••••°°°°
عكس هيثم اللي تخلى عن هالنظرة من وقت طويل..
من بعد ماصفعات الحياة وعاته ع حقيقة كل شي قاعد يصير حواليه..
هيثم:هي تفضل خليل..
خش خليل وهو مبتسم ويقول:يزيد فضلك...
قعمز خليل..
وهيثم وقال:عن اذنك لحظه..
خليل:اذنك معاك..
....في الكوجينه..
ماجده:تطلعي بالوشاح نشنقك بيه..
ضحكوا الموجودات..
نسيبه بخجل وانزعاج:ياربي.. مش متعوده الهم .
ماجده:تو تتعودي....
"نسيبه..نوسه"
ماجده؛هي تيتي..
جت بتطلع نسيبه والوشاح محطوط ع رقبتها جتها ماجده وجبداته..
نسيبه:واااك منك..
ضحكت ماجده هي والبنات..
ونسيبه مشت لخوها وهي متحشمه منه..
هيثم لما شافها ابتسم وقال:نوسه..
هي جاته خدت يدها وجت بتبوسها..
هو جبدها وحطها ع راسها وباسها بعدين قال:مبارك ..
نسيبه وهي مبتسمه استحياءا:الله يبارك فيك..
هيثم شد يدها وقال:زوجك في المربوعه يبي يشوفك..
نسيبه لما سمعت كلمة زوجك حست قلبها قريب طلع من مكانه..
مشي وهي مشت معاه لين وصلوا لفم المربوعه..
هيثم اشرلها بيده ع الباب بمعنى خشي..
هي بشي من الخجل والتردد خشت للمربوعه..
وهيثم مشي طلع من الحوش..
🌹🌹في المربوعه🌹🌹
نسيبه:السلام عليكم..
هو ناض وقف وعيونه يلمعوا بدمعة فرح:وعليكم السلام..
مشت قعمزت طول..
هو صدماته الحركه..لكن عداها..
وقعمز وقعد يشبحلها..
كيف مربعه ايديها وتشبح للباب الخارجي متاع المربوعه وجهها احمر..
رفع حاجبه اليسار وهو مبتسم ..
وهي عيونها ع الباب..
هو حرك عيونه للباب بعدين رجع شافلها..
هي حركت عيونها اتجاهه وقالت:خيرك!؟
هو رفع حواجبه وقال:لاسلامتك..
هي تنهدت بعدين اشرت عليه بصبعها وهي تقول بشي من الانفعال:انت تعرفني من الاول ماعنديش في الجو هدا لهدا بتصبر عليا غصب عنك ايوه..
خليل بإبتسامه:اللي يبي الورد يتحمل شوكه..ماعنديش مشكله..
هي انطفت مرة وحده...رمشت عيونها بخجل بعدين رجعت شافت للباب وربعت ايديها..
هو ابتسم وقال:باهي ياستي مبارك.
نسيبه:الله يبارك فيك..
هو ضحك وقال:ومبارك ليا اني..والله يبارك فيك ليك انتي.
شدت ضحكتها..
ضحك وناض وجاها قعمز جنبها بمسافه بسيطه وقال:ايه قوليلي شن تعرفي اطيبي..
هي صمتها السؤال وزادها توتر ع توترها..
شبحتله وقالت:شن هي !؟ من توا بتبدالي فيه ..لايابابا انت ماخدتنيش بش نطيبلك ايوه ..
خليل وهو يضحك:ماتعرفيش..عادي مش مشكله امي تعلمك..الله غالب..
نسيبه شبحتله وصغرت عيونها وقالت:بارد ع فكرة ..
هو ضيق عيونه وقال:وانتي بايرة...عليك بخت..
فنصت عيونها وقالت:نعم!
هو قعد يضحك..
نسيبه:تي ربي يحبك وراضي عليك اللي خديتني..
هو ابتسم وقال:عارف..والحمد لله..
هي غيرت عيونها عنه ع وجهها ابتسامه عصبيه..
خليل:نحبك..وعمري ماحبيت غيرك واللي عطاك ليا شاهد..لو تعرفي قداش صليت ودعيت بش تصير اللحظة هادي وربي يكتبهالي...اني دفعت مهرك دعوات في عز الليل...طلبتك من ربي مرات ومرات...وهو جبر بخاطري وفرحلي قلبي بيك..مانبيش نقولك قداش نحبك يانوسه...ربي بس اللي عالم..
شبحتله بعيون مليانات دموع وقالت:راهو حتى انت لازم تعرف ان قلبي لما يتعلق بحد مايبراش منه بسهوله..ماتخلنيش نندم خليل..
خليل:ربي يخليني ليك ديما دوا يارب...ماتخافيش اني عطيتك وعد الشاهد علينا فيه ربي نواستي..
ضحكت من بين دموعها وقالت:نواستي!
خليل:اها..اني دوننا عن الكل بناديك هكي مانبي حد يناديك زي مااني ناديك ..من توا حطيها في راسك اني عندك في كفه والناس كلها في كفه..زي ماانتي عندي بالزبط.
نسيبه:لاياوحش مش هكي هدي ياكينج..
خليل ضحك بعدين قال:والله تقول نهدرز ع البرو..
خبطاته ع كتفه وهي تفنص فيه..
وخليل تحسس كتفه وهو يتوجع ويضحك في نفس الوقت ..
حط يده في جيب الفرمله وطلع منها علبة مجوهرات صغيرة ومدهالها وهو يقول:هي هاتي نواستي..
هي قعدت تشوف فيه كيف فتح العلبه وطلع منها الخاتم ويقول:هدا ماتحوليشي بكل..
ضحكت ومدت يدها وقالت؛طلع عندك ذوق..
هو خدي يدها وقاللها بضحكه؛اكيد عندي ذوق دام خديتك..
نسيبه بضحكه:ايه عندك حق طلعت تفهم مليح..
وخليل يلبس فيها وهو يضحك وشويه وبدت تتلاشى الضحكه لما الخاتم ماباش يخش..
نسيبه انحرجت بس حاولت تبان طبيعيه قالتله:ترا شويه..
سحبت يدها وبدت تحاول فيه وخليل يشوفلها وهوشاد ضحكته..
نسيبه؛قايسه ع صبع تهاني شكلك..
خليل بضحكه:والله قسته ع صبع امي..مفروض جربته على جهاد..
شبحتله ع جنب بعدين جبدت الخاتم وناضت..
هو ناض معاها وشد يدها وقال:والله نبصر..اسف خلاص..سامحيني..
نسيبه شبحتله من فوق لتحت وقالت:من قالك حرجت بش تتأسف.!..شبحت للخاتم وقالت..غدوة ان شاء الله نمشي نبدله غير عطيني اسم المحل..
عقد حواجبه وشد ع يدها وقال:اني نرفعك..ومشوار لأي مكان شن ماكان هالمكان مافيش من غير ماتاخدي اذني ولااني نرفعك..تمام..
نسيبه عكرشت وجهها بإنزعاج وقالت:هذا علاش نكره الزواج ..
هو ضحك وحواجبه معقودات قاللها:تمام!
هزت راسها وقالت؛تمام..هي فك يدي باشا خل بنخش داخل..
خليل ابتسم وقال:امتى قعمزتي انتي؟
نسيبه جبدت يدها وقالت:ليا ساعتين...يللا سلام..
ومشت للباب..
وهو معاها بعيونه قال؛غدوة ان شاء الله اني بنرفعكم المدرسه.
التفتت وشبحتله بإبتسامه وقالت؛باهي كان قال هيثم باهي..
وطلعت..
هو ضحك..بعدين خدي نفس عميق وزفر...
ومشي وهو بيطير من الفرح جهة باب المربوعه الخارجي...فتحه وطلع..
••••••••°°°°°°•••••••°°°°°°••••••
الساعه التاسعه ليلا..
علقت لبستها في الدولاب وهي تتكلم بالتليفون وتقول:لامافيش دربوكه وغني والجو هدا ..
"علاش مستعجلين بالفاتحه راجو لين سكرت سته شهور"
دانيه سكرت الدولاب وقالت؛عمي هيثم هكي يبي..
"باهي بنته عاديه؟!"
دانيه قعمزت ع المندار وقالت:ايه وفرحانه لعمتها هلبه..
"باهي ربي يهنيها ويتمم على خير"
دانيه:آمين..هي طيري توجي توا بنقراااا..
"معفنه...تصبحي ع خير"..
دانيه بضحكه:قدامك كل خير...
سكرت دانيه وحطت التليفون وجبدت شنطتها وقعدت تفتح فيها وهي تغني:يامبروك على غالينا هدا وين تسمت لينا..
....اما رتاج.....
بعد سكرت من اختها خشت ع الفيس وبدت تكسد عليه..
لين سمعت باب الحوش انفتح..
كالعاده تجاهلت..من لما روح بيها وهي مقاطعاته...
كل اللي دير فيه اطيب واضم وتغسل في الحوايج...
لاتكلم فيه..ولاتقعمز معاه...ولامعبرة وجوده..
وهو هالشي تعبه هلبه...حاول يرضيها..ويتطفل عليها..
لكن هي كانت تتجاهل فيه بإستمرار....
خش عليها الدار وفي يده حاجه وهو يقول:السلام عليكم..
هي ردت السلام بدون ماتشبحله..
ابتسم ومشي قعمز حداها وهو يقول:درتي عشي؟
رتاج:في الكوجينه..
عادل بإبتسامه:باهي اشبحيلي..
هي تنهدت..بعدين شبحتله..
عادل:للمرة المليون أسف..
رتاج ردت عيونها للتليفون..
عادل:رتاج...
شبحتله وقالت:نحطلك عشي؟
عادل بإبتسامه:مش قبل ماتقري الورقه هادي..
هي شبحت للورقه بإستغراب وخوف عقلها قاللها هادي ورقة طلاقك...
خدتها وهي ترعش..وفتحتها وبدت تقرا..
عيونها توسعوا ع الآخر..شبحتله وقالت..شن هدا؟!
عادل بضحكه:هادي ورقة تتبث ان الحوش هدا حوشك انتس يعني لو تعاركنا مرة تانيه انتي تلزيني..
هي ضحكت ومازال علامات المفاجأة ع وجهها..
عادل:اهم شي انتي ترضي..
رتاج؛قرايتي..
عادل:نرفعك اديري امتحاناتك نراجيك لين تكملي ونروح بيك..مش لشي غير خوفي عليك بس..
ابتسمت رتاج وقالت؛معناها انوض نويتلك احلى عشي..
حطت الورقه ونزلت من السرير ومشت تجري طلعت من الدار..
وعادل معاها بعيونه وهو يضحك بعدين تنهد وقال..غير شن درتي فيا بس..!
🍁جددت شبابك ورداتك سنين للورا بصغر سنها وجمالها وبرائتها...لكنها مع الأسف قاعده تصرف معاك في سنين شبابها واحلى ايام عمرها اللي مايعوضهم لافلوس ولاجاه..
وياقداش سمعنا عن نساوين زي رتاج ضحت بسنين شبابها مع واحد في عمر بوها وع قد ماحصلت من وراه فلوس وعز بعد وقت اكتشفت انها خسرت وانحرمت من هلبه حاجات مايعوضهم شي..وان كانت هني رتاج مجبورة..في هلبه غيرها بإرادتهم واختيارهم...🍁
🍁🍁🍁
وتعدي الأيام..
وتبدا الإمتحانات..
وعادل يرفع في رتاج لامتحاناتها ويقعد يستناها لين تكمل ويروح بيها..
واللي خايف ع رتاج منه...تربى كويس من الدرس اللي عطاهوله..وحول من راسه رتاج نهائيا وقعد لاهي بحياته زي قبل...
اما خوه الكبير فكان يوميا يرفع في مرته مع بنات خوها ويروح بيهم بعد خدي الإذن بهذا..
وكانت هالمشاوير الاحب على قلبه لما يرافق الحبيبه...والقمرات الزوز ريحان وجنان اللي مايملوش من الهدرزة معاه ولا من الشكلاطه اللي يجيبلهم فيها...
واختهم الكبيرة...
كانت منهمكه في دراستها وبوها يساعد فيها..
كان يقطع في جزء من وقته بش يروح يساعدها في الحوش..
ويقريها في المواد الصعبه عليها...
وكان كل مرة يديرلها في مشروب طبيعي ينشط الذاكرة ويفتح الذهن..وسارة تشرب ع خاطره..
زي ماهو ياكل في اللي ديرله فيه ع خاطرها رغم انه مايحباش..
ووجوده في مصحة الأدمان غير محبب لقلبه لكن ع خاطر ولده مستعد يدير اي شي..
زي كان يتابع في حالته مع الدكاترة والاخصائيين يوميا..
يتابع في قضيته مع المحامي اللي وكله..
برغم انه ماكانش مالي يده من المحامي اللي ماعطاشي امل قوي في براءة ولده..لكن كان متأمل في الله يفرجها مهما اشتدت...
طلب المحامي يشوف زياد ..
وفعلا قابله وسأله كم سؤال جاوب عليهم زياد بس الأحساس اللي حسه زياد اتجاه المحامي يشبه احساس..وكان فاقد الأمل بالمرة...
.....في مكتب المحامي....
المحامي:الموضوع كله عند البنت اللي صارت المشكله ع خاطرها وهما مالقوهاش لتوا ولالقوا اي شي يدل عليها ولاهي تبي تبان..مع الأسف موقف جلال قوي في القضيه بسبب تسجيل الفيديو اللي يدين ولدك...
هيثم بشي من الانفعال:اني مش فاهم كيف الشرطه ماوصلتش في البنت كيف مالقوا شي يدل عليها؟!
المحامي:المرجح اختفاء البنت بعد الحادث..وهما فعلا دوروا في اسماء البنات اللي ليهم فترة غايبين ع الكليه وحاولوا يتواصلوا بيهم كلهم كانت ليهم اعذار ماليهاش علاقه بالحادث وبالإثبات..اللي مريضه..واللي عندها حالة وفاة..واللي عندها مشاكل خاصه..مافيش وحده فيهم ليها علاقه بالحادث اللي صار..يعني احتمال كبير البنت ماتكونش طالبة في الكليه اصلا..
هيثم:زياد قال طالبه..
المحامي رفع حواجبه ونزلهم بأسف وهو يقول:مافي شي يثبت صحة ادعائه هدا..
هيثم غمض عيونه وحط يده عليه فركهم بعدين نزل يده..تنهد وقال...يعني من الاخير استاذ موقف ولدي ضعيف..
المحامي:اني حندير جهدي كله بش نخلي القاضي يأجل الجلسه..
هيثم ضم شواربه لداخل بأسف وهز راسه بعدين قال:ان شاء الله..ناض وقف وهو يقول..السلام عليكم..
المحامي وهو يشوفله بأسف:وعليكم السلام..
ومشي هيثم طلع من المكتب..
▪▪▪▪▪
◇كنت نحاول ع قد مانقدر مانخليش اليأس يسيطر عليا..اني مسلم امري كله لله..يعني لو سمحت لليأس يتملكني حنفقد الثقه برحمة الله وهدا الشي اللي مانبيش نوصله..
قعدت نردد في نفسي...لعل الله يحدث بعد ذلك امره..
نردد فيها بش يرتاح قلبي اللي كلاه القلق ع ولدي ومسقبله اللي ع شفا جرف هار...
▪▪▪▪▪
○○○○○
☆وانا كنت زيه بالزبط او اكثر بشويه..خايف..محبط..مش متفائل...مافي شي مخليني تتفائل مافي شي كان لصالحي وقتها نهائيا...بس صراحة..اكثر شي كان مسببلي وجع في قلبي..هي ملامح العجز وقلة الحيله اللي كنت نشوف في بوي يدرق فيها بكل قوة..لم يبتسم ابتسامه باهته..ولايضحك ضحكه مش من قلبه طالعه مهما حاول يبينلي العكس كان كل شي واضح بالنسبه ليا..ضحك وقال..وقتها فكرت انه...قلت يعني..اكيد يقول لروحه شن درت في عمري ياربي بش بليتني بالولد...مسح دمعه هربت من عينه وقال..هكي كنت نفكر...
○○○○○
••••••••°°°°°°°••••••°°°°°°••••••••
الساعه الرابعه والنصف قبل العصر..
ورا واحد من شبابيك مبنى المدرسه اللي كان يطل ع الساحه..
كانوا واقفات يتفرجوا ع زميلتهم وراجلها وهما يمارسوا في هواياتهم المفضله..
:مش عارفه هالعيله شن قلب حالها بعد ماتت اسيمه اخر شي الدكتور هيثم يعطي اخته لواحد زي هدا..
:لكن ياوخيتي قالوا تاب ومعاش زي قبل..
:وكان تاب هدا بينه وبين ربي..لكن سمعته الزفته تقعد لحقاته لأخر يوم في عمره..
:خلوني من هدا كله هي كبيره عليه قالوا بيناتهم اربعه سنين..
:لالا كذب عامين بس..
:من الاخير هو شكله خاف اخته تقعد في رقبته عطاها وخلاص..
:مرات...
.....وبعيد عن هالحديث الملوث.....
وقريب من حديث تاني...حلو...صافي وكله حب..
بين قلبين رب العالمين جمعهم وزادهم ود ورحمه....
نسيبه:الروشن تعبى طواسي ورد..
خليل بضحكه:ياشفشفه حطيهم كلهم في طاسة وحده..
نسيبه وهي تشم في الورد:اممم..لولا الحشم راهو حطيتهم في فازا وحطيتها في نص الصاله..
خليل ضحك وقال:حطيها في دارك..
نسيبه:مافيش مكان دار زحمه حتى الطاوله اللي فيها عليها زحمه..كتب كراسات تحضير مذكرات وقربع تاني.
خليل:قولي فوضى مش زحمه دنيا مقلوبه فوقي لوطا..
نسيبه ضحكت وهي تشم في الورد..
خليل ابتسم وقال:خلاص شفطي ريحتهم كلها..
نسيبه بضحكه:بطل صماتك خيرلك..
خليل قعد يضحك وهي تتأمل فيه بعدين قالت :خليلو..
خليل ابتسم وشبح لعيونها وقال:نواستي.
ابتسمت وقالت:بنسألك..
خليل:اسألي..
نسيبه:امم..عندك حلم في حياتك خاطرك تحققه ..
خليل:كان في وجعله ربي حقا واهو قدامي..
ضحكت وقالت:مش هدا قصدي..قصدي يعني شي كنت تحلم بيه من قبل ماتشوفني..
خليل:اني نشوفك..
نسيبه عقدت حواجبها وهي تضحك قالت:خليل ياسر عاد..
ضحك خليل وقال:شن قلت اني!؟ انتي تسألي واني نجاوب فيك..
نسيبه ابتسمت وقالت:جديات خليل..لما كنت تقرا في المدرسه كان عندك طموح توصل لحاجه معينه..يعني لو قريت جامعه اي كليه حتختار..
ابتسم وغير عيونه عنها وقعد يمرر في نظره القدام وهو يقول:طب..
نزلت يدها اللي فيها الورد حطتها ع ركابها وقالت:عندك علم ان عمتي ورتني كراساتك ايام الابتدائي..
ضحك وشبحلها وهو يقول بدهشة:بالله!
نسيبه بضحكه:والله..احلى كراسة ولد نشوفها في حياتي ع قد ماقريت ولاد ولا واحد فيهم كانت كراسته هكي كلهم يحشموا..حتى زياد اللي نقول عليه احسنهم ماكانتش كراسته هكي..حتى خطك حلو هلبه..تقول خطاط..
ابتسم وغير عيونه القدام..
نسيبه سكتت شويه بعدين قالت:كنت تتمنى هلبه تولي دكتور صح؟
خليل:حكالك الدكتور..
نسيبه:عمتي حكتلي قبل..لما كنت تمرض ويرفعوك للمستشفى وين تشوف دكتور شن يصير فيك..
تعبوا عيونه دموع وتنهد بألم بعدين قال:مكتوب وصار..ربي مارادش..
نسيبه:من قالك مش رايد؟جربت تكمل من وين وقفت..جربت ترجع تحلم هالحلم مرة تانيه وتسعاله!؟
خليل شبحلها وقال:معاش ينفع خلاص..
نسيبه:وعلاش..
خليل مط شواربه ع جنب بعدين قال:معاش فيها توا اني عمري 31 عام فات القطار زي مايقولوا..
نسيبه:قطار شني اللي فات!..تي في وصلوا الخمسين وستين وعاودوا قروا شهاده ثانويه وخدوها وخشوا جامعه وقروا وتخرجوا..
خليل بضيق:صعبه يانوسه صعبه هلبه..
نسيبه:واني نعرفك مايصعب عليك شي وتقدر..انت لو تبي حاجه وتحطها في راسك توصلها توصلها...ولو حطيت في راسك ترجع تقرا بش توصل لحلمك حتوصل ياخليل..
شبحلها وقال:نوسه اشبحي للواقع..
نسيبه بإصرار:ياما ناس غيرت واقعها لما قررت تغيره مافي شي وقف قدامهم..اني اللي نعرفه..اول حاجه انك راجل قد اي حاجه صعبه..وتاني شي وهو الأهم انت مؤمن بربي..ووحده من وصايا الرسول ديما حطتها في بالي استعن بالله ولاتعجز...مافي شي مستحيل مع الله ياخليل..
قعد يشبح للإصرار اللي فعيونها وهي تتكلم بعدين شاف ليدها اللي شدت يده لما قالت:اني فاهمه عليك..لكن لو تشوف وتعرف اللي قاعد يصير توا تقتنع بكلامي..
هو شبحلها شويه بعدين قال:تو نفكر..
ابتسمت بفرح وقالت:وعد..
خليل ابتسم وقال:نوعدك اني نفكر..
حولت يدها وقالت بإبتسامه وهي تشم في الورد:فكر واني تو نزيد نزن عليك..الزن ع الودان امر من السحر..
ضحك ومسح بيده ع وجهه وهو يقول:أمان منك انتي..امان...
وهي تشم في الورد وتضحك بعدين عقدك حواجبها وقالت:شكلها ريحتهم مشت..
خليل:مش منهم من الخشوم ماشاء الله..
نسيبه:غير جينا في مدرسه يابارد كان عطيتهالك بونيه ع خشمك هدا اللي عاجبك فرشته..
وخليل يضحك وخلاص..
....ع طلعة الصغار وقت انتهاء الدوام ....
طلع خليل للسيارة..
ولحقوه بعده بشويه نسيبه والبنات...
بعد ماركبوا السيارة..
عيون خليل جو على عرفه وهو طالع من المدرسة مروح ع رجليه..
قدمله بالسيارة ووقف جنبه وقال:عرفه اركب..
عرفه شبح لنسيبه وقال:لاصحيت تو نروح بروحي..
خليل:قتلك اركب..
عرفه:مانبيش..
خليل:عرفه..
شبح عرفه لنسيبه...
وخليل شبحلها..
هي ابتسمت وقالت:تعالى اركب حبيبي..
شبحله خليل وقال:هيا سقدني..
مشي عرفه للباب الخلفي ..فتحه خليل..
وركب عرفه حدا البنات اللي بعدوا عنه بمسافه بسيطه..
بعد سكر الباب...تحرك خليل طول..
مد خليل شكارة الشوكولا للبنات..
خدتها ريحان وعطت اختها ومدت لعرفه..
عرفه:صحيتي مانبيش..
ريحان:غير خودها خودها ماتتحشمش..
ضحكت نسيبه..
وخليل يشوف لعرفه من المرايه كيف عاقد حواجبه ويبان مش طايق حد قاله:عرفه خود منها..
بالسيف خدي منها طرف الشكلاطه وقعد شاده من غير ماياكله..
خليل:ايه حقه..قريب المحكمه ولا؟
نسيبه بضيق:ايه مازال اسبوع..
خليل هز راسه وقال:ان شاء الله خير..
نسيبه:يارب...
🍁🍁🍁🍁
وعجلة الزمان ادور دون توقف..
وتمر الايام ويجي يوم جلسة المحكمه...
كان يوم الثلاثاء...
يوم عيلة كامله مش قادرة ادير شي من قلق ومن الخوف وهما يقضوا في ساعاتهم بدقايقها وثوانيها في انتظار متعب مؤلم ممرض..قاتل...
...هالإنتظار....
اللي عايش فيه هيثم وهو واقف حدا قاعة المحكمه..
يردد في همس....لاحول ولاقوة الابالله...حسبي الله ونعم الوكيل...
...وزياد....
فهالوقت ركبوه سيارة المساجين الموجوده في باحة المصحه..
وبعد ركبها تحركت طول وطلعت منها..
وهو في بإيديه المكبشات...كان يمرر في ابهام يده اليمين ع سلاميات اصابعه وهو يردد همسا...
لاإله الا انت سبحانك اني كنت من الظالمين..
تسبيح ذا النون...
اللي واقف فاتح يشوف في لوحة زياد الاخيره اللي رسمها محاكاة لقصة سيدنا يونس..
اللوحه كانت عبارة عن واحد مقعمز وهو ضام ركابه لصدره وغام راسه فيهم..
في وسط سجن مظلم..وهالسجن المظلم يسبح وسط فضاء مظلم..
بس كانت في نجوم لامعه تطلع من هداكا الشخص المرسوم في اللوحه وتركب فوق...نجمه ورا نجمه...
وفاتح وهو يتأمل في اللوحه ويحاول يفهمها مش قادر...
بس حس فيها شاداته بقوة..حس فيها شي يمثله..ويحكي اللي عايشه فيها...
ظلمات..بعضها فوق بعض..
•••••°°°°°
خش للممر اللي يوصل للمحكمه مع المحامي متاعه..
:كون هاني ياجلال اللي تبيه حيصير في الجلسه وحقك حتاخده تالت ومتلت..
جلال وهو يشبح لهيثم:إن شاء الله..
هيثم شاف جلال جاي من بعيد قعد يشبحله بحده..
تجاهله وجلال وقعمز هو ومحاميه..
محامي زياد:حاول تسيطر على روحك دكتور .
هيثم تنهد وهز راسه وشبح للباب القاعه ورجع يردد في نفس الذكر..
لحظات وجاهم موظف في المحكمه وقال:المتهم وصل..
هيثم شبحله بإنتباه..
:شويه وتبدا الجلسة..
ومشي خش للقاعه وسكر الباب..
جلال شبح لهيثم ابتسم بتهكم وغير عيونه عنه..
وهيثم تجاهله ومن داخله الدم يغلي في العروق..
وماان مرت دقيقتين لين طلع واحد ينادي:
جلال عبدالقادر الوافي...
محامي المتهم زياد هيثم الكاتب..
ناض جلال مع محاميه ومشوا للزوز خشوا بعد ماخش هيثم ومحامي زياد لقاعة المحكمه...
°°°°°°•••••••
في حمام شقتها..
كانت تكد فيه بقوة جهدها..من قلقها وخوفها كانت تبي تشغل نفسها بأي شي..
تحسس انفها من مواد التنظيف..
مشت بتفتح الروشن..
لما فتحاته...شافت رشيد نازل من سيارة..
بعد مانزل منها حد جبده داخل مرة تانيه...بعدين رجع طلع منها...
السيارة مشت..
ورشيد لف بيقص الطريق...كان يبان مرتبك..
لعند ماشاف للعمارة...عيونه جو ع ماجده اللي كانت واقفه تشوفله من الروشن..
ماجده اللي كانت تشبحله بصدمه هزت راسها تتوعد فيه بعدين سكرت الروشن..
هو من خوفه مشي يجري لين لف العمارة وصل لبابها خش لقي واحد من صحابه وقف عليه وهو داهش قاله:مرت بوي شافتني..
:حي ع امك...تو تقول لبوك..
جبده رشيد وقاله:تعالى معاي واللي نقوله قول عليه صار..
:باهي..
ومشوا الزوز خشوا للعمارة وركبوا يجروا ناويين شقة ماجده..
لكن وقفوا لما شافوا مجيد طالع مش شقة امه سدينه..
مجيد:خير دعوتكم علاش تجروا..
رشيد وهو داهش:بوي....شفت حاجه يابوي..
مجيد بإستغراب:شن شفت!؟.
رشيد:هادي خالتي ماجده..ريتها واقفه في روشن الحمام..تكلم في واحد تحت العمارة اللي ورانا..
مجيد بصدمه:شن تقطف انت!!؟
رشيد:مش مصدقني اسأل مروان..
شبح الولد لرشيد وقال:ايه حتى اني شفتها ومش اول مرة راهو..
مجيد ولى معاش يشوف في شي وركب لماجده يجري..
رشيد بصوت منخفض قال بحقد:تستاهل...ان شاء الله يقتلها...
يتبع …
