البطل المغمور

تكمله

#البطل_المغمور"شمس الغروب"
#الجزء_الثاني_عشر"القسم الاخير"
#Goman_Fared💕
اذكروا الله...سبحان الله الحمد لله لاإله إلا الله الله اكبر💓💓💓
كان مفروض نكمله ونزله امس بس نصيبه ينزل اليوم..
وغدوة ان شاء الله راحه..
💕💕💕💕💕💕💕💕💕💕💕💕💕💕
💐...
"خسارة قبل نبيك تجيني نكسدوا مع بعض"
تهاني:الله غالب ماما حكمت شن بنديرلها..
سارة:خلاص مالا تعالي غدوة ان شاء الله كانهدا..
تهاني بإبتسامه:اوكي ان شاء الله..اهو جي الباص..
ومشوا مع بعض طلعوا للباص...
■في الوقت اللي فيه كان مجاهد واصل للعياده اللي جنب مدرسة اخته دانيه..
نزل من السيارة وخش يجري..
وقعد يسأل عليها ويدور لين وصل في الحجره اللي هي فيها..
لقي المديرة ومعاها ابله تانيه واستاذ
مجاهد بفجعه:خيرها دانيه!!؟
المديرة بقلق:قريبها حضرتك؟.
مجاهد؛خوها..
ع طلعة الدكتور من الحجره..
شبحوله المديرة قالت:خير دكتور..
الدكتور:مع الاسف الشديد بعد التحاليل اللي درناها طلعت المريضه مصابه بمرض السكر..
انصدموا كلهم..
مجاهد بصدمه:سكر شني يادكتور!!؟ اختي اني دانيه فيها سكر!!؟
الدكتور:بمعنى اوضح جاها السكر..
المديرة بصدمه:ياربي..
الابله بحزن:شكلها حق انظلمت ياأبله
مجاهد عقد حواجبه ودموعه فعيونه وهو يقول بغضب:شن صار بالزبط تكلموا
.........
"اقسم بالله ياأستاذ ماعطتني حاجه اني كلمتها لكن هي مابتش تعطيني وحق ربي وحق ربي"
هادي هبه اللي انوجع قلبها ع صاحبتها واقفه تكلم في استاذ جمعه وتوضحله حقيقة اللي صار..
جمعه بغضب ممزوج بالضيق:خلاص..بري..
هبه لفت ومشت وهي تبكي..
اما هو مشي طول طلع من المدرسه متوجه للسيارة ركبها وكلكس بعصبيه لجيهان..
هي شغلت سيارتها وتحركت وهو لحقها...
••••••°°°°°•••••••°°°°°°•••••••
"صار بتمشوا تهيجوا في بنغازينو"
اسيمه بضحكه:هياجة شني الراجل عنده خدمه غادي..
نسيبه:علاش رافعك كان ماعنداش وقت ليك غادي..مارفعك الا وهو عارف ان عنده وقت يفرهد فيه ع روحه..
اسيمه ابتسمت وقالت:امم.. باهي..شفت سيارتك برا..
نسيبه غيرت عيونها عن اسيمه وقعدت تشرب في الميه..
اسيمه ضحكت وقالت:خالتي ماجده بتجي تبات هني اليوم..
حولت نسيبه الطاسه وقالت:الله!
اسيمه ضحكت وهزت راسها بإيجاب..
نسيبه بضحكة فرح:لا اليوم ماناش قاعدين في الحوش حتى حني..
ومشت تجري طلعت من الكوجينه..
واسيمه تضحك عليها..
وهي طالعه خطمت من قدام الصاله وهي تجري وتتزلحق ع ارضيه برجليها وهيثم يشبحلها بعد وصلت في الدروج قال:ربي يثبت علينا العقل..
انفتح باب الحوش...
وخشوا سارة وزياد..
سارة:ارجوك خليك بعيد وماتدخلش..
زياد:ع خاطر تهاني هيا مقاطعتيني!!
سارة سكتت ومشت وخلاته..
وهو قال بصوت عالي:كبرتلك راسك هلبه لكن والله من اليوم وبرا غادي معاد معبرك..
هيثم:خيركم!؟.
زياد انخلع لما سمع صوت بوه..وشبح لمصدر الصوت لقاه مقعمز ع الكنبه وفيده كتاب..
زياد بارتباك:شي..تعاركنا عادي..
ع طلعة اسيمه:برا بدل حوايجك وصلي بنحط الغدي..
زياد:صليت في الجامع..ومشي طول لداره..
اسيمه شبحت لهيثم لقاته رجع يقرا في الكتاب بلامبالاة..
تنهدت بعدين ولت خشت داخل..
••••••°°°°°°••••••°°°°°°•••••••
"دنون"
دانيه شبحت لوجه خوها الحنون وردت بصوت يدوب طالع:مجاهد..
مجاهد:والله حقك نجيبه وخيتي وتو تشوفي مادوري شي..
نزلوا دموع دانيه..
مجاهد وهو شاد دموعه بالسيف مسح دموعها وقال:لالالا..مش هكي دنون..حبيبتي..مادوريش قتلك اليوم حقك نجيبه قبل غدوة..
دانيه:نبي نروح..
مجاهد بلع ريقه وقال:معليشي حبيبتي اليوم تقعدي هني غدوة بإذن الله الصبح نروح بيك..
دانيه هزت راسها بعدين قالت:بنرقد..
مجاهد:لا راجي شويه حبيبتي مش توا..
دانيه:علاش!! شن طلع فيا!!؟
مجاهد:شي حبيبتي شي غير هكي الدكاترة قالوا..خلي ندردشوا اني وياك شويه تمام..
دانيه هزت راسها وهي تشوفله بألم..
وهو طبس باس راسها بعدين قعمز ع الكرسي وقال:زمان وانتي صغيره لما يضربك حد كان يصيرلك هكي ديما مرعشتينا..
ضحكت دانيه بتعب..
وهو ضحك ومسح ع يدها بحنان...
وكمل هدرزته عليها وعقله يفكر بخوف في وقع الخبر ع امه ورتاج...اخته في عمر صغير يجيها مرض زي هدا..
والسبب فالمرض..خلا قلبه تولع فيه النار ومش حتطفى لين ياخد حق اخته تالث ومتلت..
•••••••°°°°°°°•••••••
تغدوا مع بعض في وسط اجواء هاديه..
كان هيثم ملتزم الهدوء التام ع قد ماصار قدامه من نقاشات وكلام ومشاغبات من البنات الصغار هو كان ساكن تماما..
بعد كمل غداه..
هيثم:ربي يحرم ايدياتك عن النار ياغاليه..
اسيمه ابتسمت بخجل وقالت:صحتين..
ناض هيثم وهو مبتسم..
ونسيبه قالت بضحكه:خوي في الرومانسيه مافيش منه..
اسيمه بضحكه:نوضي اغسلي الماعين نوضي..
نسيبه ضحكت وناضت وهي تقول:هي نوضي سارة هانم
سارة ناضت وهي تقول بضحكه:هاني نايضه..
ورفعوا الزوز الماعين..
ريحان:شبعت ماما..
جنان:واني ماما..
اسيمه:واللي يشبع شن يقول؟
الزوز مع بعض قالوا باللحن:الحمد لله..
اسيمه بإبتسامه:الحمد لله..هي بروا اغسلوا ايديكم..
ناضوا ومشوا مع بعض يجروا للحمام..
اسيمه شبحت لزياد لقاته سرحان فالصونيه قالت:زياد.
استاقظ وشبحلها
اسيمه:اني قلت اعتذر لأختك مش كبر معاها العركه..
زياد:بنتك اللي يكبرلها راسها تركب عليه..قالتلي مانقبلش اعتذارك لين تعتذر لتهاني هدا اللي ناقص..
اسيمه:هدا الحق..انت اهنت البنت ولازم تعتذرلها..
زياد بإنزعاج:لاااايام لاااهني وياسر..
وناض ومشي من حداها وخلاها مصدومه في اسلوب رده عليها..
"اسيمه"
اسيمه ناضت وهي تقول:هيا هيثم جايه..
•••••••°°°°°°°••••••••
في الوقت اللي تحرك فيه مجيد بماجده لحوش ولد اختها..
كان مجاهد واصل بسيارته لقدام العمارة..
نزل منها ومشي خش داخل..
وصل للشقة..فتح الباب وخش..
لقي امه واخته يراجو فيه..
رتاج بقلق:شن صار!!؟
مجاهد شبح لأمه بخوف..
سدينه بخوف:تكلم يامجاهد وينها اختك!؟
مجاهد بلع ريقه وقال:قاعده في العياده بتبات غادي اليوم.
رتاج وسدينه قعدوا يشبحوله بنظرات خوف شديد..
مجاهد بألم:دانيه جاها السكر..
•••••°°°°°°°••••••°°°°°°•••••••
"يامرحبتين مرحبا"
ماجده بضحكه:شن جو يامطرشقه..
نسيبه بضحكه وهي تسلم ع خالتها:بشوفتك حلو ياحلو..
ماجده بعدت وقالت:لااا رايقه والمزاج رايق..
اسيمه شبحت لنسيبه بإبتسامه..
نسيبه وهي مبتسمه بربكه:عادي زي قبل يعني.
ماجده بنظرات شك:اممم..وجت لسارة سلمت عليها وهي تقول..سويرة حبيبتي شنجوك وشن جو القرايه.
سارة بإبتسامه:تمام خالتو الحمد لله..
بعد سلمت ع سارة قالت:مالا وين زياد باشا؟
اسيمه بضحكه:بعد تغدا رقد طول..
ماجده:اها..صار بتمشوا تجددوا شهر العسل..
ضحكوا..
اسيمه بضحكه:شهر عسل شنو ياخالتي بس..كله يوم هيثم في اغلبه مشغول..غير هو قال سايريني ماقدرتش نقول لا.
ماجده:ربي يعاونه..ويخليكم لبعض..
اسيمه:آمين..
ع جية هيثم:اسيمه الرحلة تأجلت لقبل المغرب بربع ساعه..
نسيبه:هادي ليبيا ياساده ترادع فيها كل شي الا حركة الطيران..
هيثم:وين ترادع فيها كل شي! خليني ساكت..
ماجده:ايه والله صدقت الفساد قاعد في كل تركينه..
نسيبه:لكن عاد مش زي قبل في هلبه حاجات تصلحت عن قبل..
اسيمه:نسيبه عندها حق فرق كبير بين زمان وتوا..
هيثم هز راسه وقال:ايه ممكن..لكن مع هدا مازال تبي مازال..
ماجده:ربي يصلح الحال ويقويك انت واللي زيك..
هيثم:آمين آمين..ايه خالتي انتي شن حالك امورك ماشيه تمام؟
ماجده بإبتسامه:ايه والحمد لله...
اسيمه:حي قاعده واقفه..تعالي قعمزي..
ماجده بضحكه:خدتنا الهدرزة..
ومشوا كلهم للصاله ماعدا سارة مشت لدارها..
••••••°°°°°°••••••°°°°°•••••••
الساعه الخامسه عصرا..
في العياده..
تحديدا حجرة دانيه..
سدينه وهي تمسح ع راسها ودموعها ينزلوا:الله غالب بنتي ربي هكي كاتب..قولي الحمد لله ع كل حال..
دانيه ببكي:حسبي الله ونعم الوكيل فيهم حسبي الله ونعم الوكيل..
رتاج بدموع:من هما اللي من بكري تتحسبي فيه..
دانيه ببكي:استاذ جمعه الحقير الله لايسامحه..
رتاج:شن دارلك!؟
سدينه:من جمعه هدا!!؟
وبرا..
كان مجيد مقعمز ع الكراسي وهو في قمة الغضب..مش ع خاطر دانيه واللي صار معاها في المدرسه لا..
مالا علاش!!؟
مجيد:حتى نور الدين معاش يرضى بيها هادي توا بتقعد ع قلبي زي الهم لا وفوقها دوايات وايباري وسريب..اعوذ بالله من جيبة البنات..اللي يجيبهم عمره مايرتاح...
•••••°°°°°°••••••
مقعمز ورا مكتبه وحاط يده ع خده ويفكر في اللي صار اليوم..
ندم ندم شديد ع اللي داره..وع ردود فعله العدائية اتجاه طالبته اللي ماشافش منها اي غلط يستحق منه العداء هدا كله..
هو مش لاقي تفسير لتصرفاته معاها هي بالذات برغم انها مش الوحيده المشاغبه في الفصل..لكن هي بالذات يحس في روحه مش طايقها..
بدون سبب..ع قد مادور ع سبب مقنع ملقاش..
قطع عليه تفكيره طقة باب داره..
جمعه:خش..
انفتح الباب وخشت امه:في واحد يبيك برا..
جمعه عقد حواجبه وقال:واحد منو؟.
عيشه:مانعرفاشي اول مرة نشوفه..
جمعه ناض وهو يهز في راسه..
ومشي طلع من حداها متوجه لباب الحوش..
لما وصل طلع...
شاف سيارة مدرسه وفي شاب واقف عليها..
جمعه:السلام عليكم..تفضل خوي..
جاه مجاهد وقف قدامه حول نظاراته وقال:انت جمعه ****
جمعه رفع حاجبه وقال:ايه وصلت..
مجاهد:استاذ في مدرسة الامجاد الثانويه..
جمعه:ياريت تخش في الموضوع طول خوي..
مجاهد:بنخش في الموضوع..اني جاي نبلغك اني حنشكي فيك لوزارة التعليم بسبب الظلم اللي اوقعته ع طالبه عندك اسمها دانيه عبدالمجيد المجذوب..اختي..
جمعه عقد حواجبه وغير عيونه عنه..
مجاهد بإنفعال:ع اللي درته في اختي واللي صار فيها اليوم لدرجة انك ضريت صحتها وخليتها مصابة بمرض السكر..
قام عيونه وشبح لمجاهد بصدمه..
ومجاهد مكمل يقول:مفروض بدال ماقاعد نتعامل معاك بالدوة نعطيك طريحه ترقدك شهر في المستشفى..ولا نبعتلك من يرقدك في قبرك طول..لكن من حظك جيت متربي هلبه ونخاف ربي..لكن والله حق اختي ماهو ماشي هكي كان ماخليتهمش يفصلوك من التعليم مانتسماش..
ولبس نظاراته ولف بيمشي..
"لحظه ياخوي"..
مجاهد وقف في مكانه..
جمعه:اني مستعد نعتذر منها قدام المدرسه كلها ونعاودلها الإمتحان..
التفت مجاهد وشبحله..
جمعه:وراهو مش خوف من تهديدك..ابدا..لانك حتى لو مشيت شكيت مش حتستفيد شي..بندير هكي لاني فعلا غلطت في حقها وظلمتها ووصلتها لهالحاله..
مجاهد:تعتذر منها واني موجود نبيه رد اعتبار لأختي..ولو ان هالشي مش حيبرد قلبي بكل..ادعي ربك نقعد بعقلي وماندير في شي نندم عليه..وقول يهدد فيا..
ولف ومشي لسيارته وركبها وشغلها وتحرك طول.
وجمعه مع السيارة بعيونه بنظرات ضيق ممزوجه بالأسف...
••••••°°°°°°•••••••°°°°°°••••••
"بتبات في الحوازة؟"
خليل:ايه يام وبنرفعها معاي..
عفاف:مالا سلم وليدي شوف خوك رفيق قوله قتلك امك روح غدوة مستاحشاتك..
ابتسم بعدين باس راسها وقال:حاضر...ماتبي شي..
عفاف:لالا..سلامتك بس.
خليل:هي اوينا..
ولف ومشي بالقطوسه لبس سبيدروه..وبعدين طلع..
وامه كيف جت بتمشي للدار وقفت وقالت:حيي نسيت رقم ملاك ماخديتاش منه..
ومشت بسرعه وهي تحط في شاربتها ع راسها وبتطلع وراه تلحقه..
■فهالوقت..
في حوش هيثم...
كانت نسيبه واقفه ع سيارتها وفي جنبها جنان وريحان طالعات من الروشن ويراجو في سارة وماجده وزياد امتى يطلعوا..
نسيبه:اللهم طولك ياروح..
ريحان:من بكريكا وحني نراجو..
جنان:ديري كلاكس عمتو..
نسيبه:ايه بش يطلعلي بوك ياكلني..
ضحكوا البنات...
وهي ضحكت معاهم..بعدين خفت ضحكتها لما سمعت حس سيارة درست قدام حوشهم..
نسيبه:مني؟!
برا....
ورا باب الحوش...
نزل صاحب السيارة وصكر الباب وهو يشبح لحوش خالد..
انفتح باب حوش خالد وطلع منه خليل..
اول ماطلع شبح القدام وشافه..جمد في مكانه وعيونه انفتحوا ع وسعهم..
هو ابتسم ع جنب..
بعدين مشي لجرس حوش خالد..وضغط ع الزر متاعه..
ع طلعة عفاف لخليل:باهي لحقت عليك ولدي بنقولك عطيني رقم ملاك..
استغربت فيه لما لقاته واقف يشبح في اتجاه واحد..
شبحت وين مايشبح..انصدمت وقالت:هدا مش ضابط الشرطه هداكا!؟؟ شن يبي في حوش الدكتور!!؟
وخليل مكور قبضة يده وشاد عليها بقوة..
فهاللحظه..
انفتح باب حوش هيثم..
واللي فتحه كانت نسيبه..
راجح حول نظاراته وقال بإبتسامه:السلام عليكم..
نسيبه:هو انت!!؟
راجح بإبتسامه:مذكرتيني!
نسيبه:مالا شنو الناس اللي درهلي كبدي ماننسهاش..ع العموم مش هدا حوش خالد.
دفاته وقعدت تأشر وتقول..هوينا.....وسكتت لما شافت خليل وامه فم الحوش..
نزل يدها ووخرت..
راجح بضحكه:اني جاي لحوش لدكتور هيثم..
نسيبه بإستغراب:شن تبي فيه!! اسمع خوي مالاعلاقه بالأمور هادي اللي يتزوج واللي يطلق كل حد حر في اختياراته هكي حني قانون عيلتنا ماندخلوش في حد..
راجح بإبتسامه:ناديلي الدكتور هيثم..
نسيبه:اشبح ياأنت اني مش مستريحتلك لهدا برا في حالك.
وصكرت في وجهه الباب..
هو رفع حواجبه بصدمه وقعد يضحك..
طول خليل مشاله..
وعفاف تقول:تعالى هني وين ماشي!!؟
وصل خليل في راجح وقال:قتلك بنت جيرانا بس باش تفهم انت!؟
لف وجهه بشي من البطئ وشبحله برفعة حاجب بعدين ابتسم بتهكم ومشي للجرس وضربه مرة تانيه..
جاه خليل وقاله:تعال نتفاهم اني وياك في الورشه..
رفع حاجبه اليسار وضحك نص ضحكة ساخرة بدون صوت..بعدين مشي وقف في الباب..
خليل قعد يشبحله بغضب خايف يفقد اعصابه ويشده يضربه..
خليل:اسمع انت كان قاعد نكلم فيك كلام ماتخلنيش نفصل عليك..
فهاللحظه انفتح باب حوش هيثم مرة تانيه..
واللي فتحه هالمرة..كان هيثم..
شبح لراجح بعدين شبح لخليل بإستغراب ورجع شاف لراجح وقال:تفضل..
راجح بإبتسامه:تحياتي معالي الوزير..طلع التعريف متاعه من جيبه وقال معاك النقيب راجح ***** ..
هيثم عقد حواجبه بخوف وقال:ان شاء الله خير!!؟.
ابتسم راجح ورد تعريفه لجيبه وهو يقول:جيتي ماليهاش علاقه بمجال عملي نهائيا..جيتك لسبب شخصي وخاص..
ارتسمت ع وجه خليل ملامح الإستغراب..
هيثم رفع حواجبه وقال:امم..تفضل..
وخش..
وراجح خش وهو يقول:يزيد فضلك..وخش بعده وهيثم صكر الباب...
خليل قعد يشبح للباب ويفكر..شن هو السبب الشخصي اللي جي ع خاطره راجح لهيثم!؟
وهو يدور ع اجابة السؤال قطع على تفكيره صوت امه وهي تقول..
"نوسه ياخليل راهي فلتت منك"
هو التفتت بسرعه وشبح لأمه..وقعد سرحان بفكر في كلامها..
عفاف وهي تأشر ع القطوسه:راهي تطلع للطريق ياخليل..
استاقظ..وشبح وين ماامه اشرتله..
بعدين مشي يجري للقطوسه..لحق عليها وخداها رفعها وهو يمسح ع ظهره ومشي ورجع يفكر في راجح وجيته لهيثم..
🌺وكذلك نسيبه كانت تفكر في نفس الشي وهي راكبه سيارتها..
ماجده:وحق المعظم الا يجي يخطب باهي منظره يقول هكي..
زياد بضحكه:غير من بيخطب ياخالتي ماعندناش بنات حني.
شبحتله سارة برفعة حاجب..
والتفتتله عمته تقول:تبي تنزل!؟
زياد حرك راسه يمين ويسار وهو يضحك..
ماجده بضحكه:عنده حق..سويرة مازال بيبي..وانتي بمية راجل..
كلهم:ههههههه..
هي حركت السيارة وقالت:مانيش معكره مزاجي اكثر من هكي ومش راده عليكم...وولعت الراديو بالصدفه لقت اغنيه
معن برغوث"هلا بالخميس"
وبدت تغني معاها...هلا هلا هلا بالخميس..
وهما يضحكوا...
طلعت السيارة من الحوش وتصكر الباب..
اما داخل الحوش..
في المربوعه..
مد هيثم صفرة القهوة لضيفه وقال:تفضل..
خدي راجح الفنجان وهو يقول:بارك الله فيك..تعبنا معاليك..
حط هيثم الصفرة ع الطاوله ومشي قعمز..
حط رجل ع رجل وقال:ياريت تخش في الموضوع لاني عندي رحله بعد ساعه راجح رشف من القهوة وقال:مش معطل عليك..احمم..
اني والله ليا فترة نراقب في المنطقه متاعكم واعتقد حضرتك عارف السبب..
هيثم هز راسه وقال:امم..
راجح:المهم خلال هالفترة..ابتسم وقال..وغصب عني ركزت ع كريمتكم اخت حضرتك الأنسة نسيبه..
رفع هيثم حواجبه..
راجح ارتبك شويه وقال:احمم..ماتفهمنيش غلط..اني بصدق اعجبت بيها جدا..وكلمت حتى اهلي عنها..واكيد كنت حنبعتهم هما الاولين بس حبيت ناخد من حضرتك الموافقه المبدئية بش نبعتهم..
هيثم:والله انت فاجئتني..اول شي لما عرفت بنفسك كضابط شرطه..وبعدين بالطلب هدا وشن اللي وصلك تجي وتطلبه..شن بنقولك..مبدئيا ماعنديش مانع...لكن عندي سؤال.
راجح بحماس:تفضل..
هيثم:شن كان يدور بينك وبين خليل ولد خالد قدام الباب قبل لنفتح..
راجح:اها..خليل..في بيني وبينه العداوة اللي بين المجرم وضابط الشرطه يعني شي طبيعي..
هيثم:ياريت توضح اكثر..
راجح ناض حط الفنجان في الصفرة بعدين ولى قعمز وقال:خالد واولاده هما وحده من فروع تنظيم عصابي لتجارة المخدرات في طرابلس..خالد تاريخه قديم معانا..وولاده خليل ورفيق معاونين ليه..والأبرز خليل..الولد هدا نشط جدا في تسيير عملياتهم الترويجيه والبيع كذلك لكن مع الأسف مسندوين بالناس كبار في الدوله مش مخليين وراهم اي دليل..
هيثم يسمع وهو مصدوم متوقعش يكونوا مجرمين من الطراز الرفيع..
راجح:جتنا اوامر المدة اللي فات بإلقاء القبض عليهم هما ومجموعات تانيه موجوده بإنتشار في طرابلس..وكان الهدف من العمليه هادي فضح المتعاونين مع هالعصابات من داخل الأمن..وفعلا وصلنا للهدف وكشفنا هلبه متواطئين..
هيثم بصدمه:لهني وصل الفساد!؟
راجح بإبتسامه:عندك حق ليك سنين عايش برا البلاد ماريتش كيف كانت قبل..
هيثم تنهد وقال:لاحول ولاقوة الا بالله..
راجح ضحك وقال:خل نرجعوا للموضوع الأصلي..يعني حضرتك موافق خلاص..
هيثم:موافق نعطيك موعد تجيب فيه العيله الموافقه اللي انت تراجي فيها مش شوري..
راجح بضحكه:فاهم عليك..خلاص بإذن الله الخميس القادم زي هاليوم؟
هيثم:اوكي..الخميس الجاي إن شاء الله يشرفونا اهلك..
راجح:الشرف لينا معاليك..
وناض...وهيثم ناض معاه..
مد راجح يده وقال:اسف اللي خديت من وقت حضرتك وعطلتك..
صافحه هيثم وقال:مافيش مشكله..معرفة خير ياراجح..
راجح بإبتسامه:ان شاء الله..
وسقد هيثم راجح..بعدين رجع خش للحوش بش يحكي لأسيمه..
في دار النوم واسيمه تلبس في شاربتها:الله عريس لنوسه!؟
هيثم بضحكه:ليا وقت ماجاني حد كلمني عنها..
اسيمه شبحت لهيثم وهي تفكر في نسيبه واللي عرفاته عنها منها..
هيثم:سومه..
اسيمه:نعم!
هيثم؛وين مشيتي!؟
اسيمه:قاعده معاك..نفكر زعمه نوسه توافق ولاترد..
هيثم:هي حره..هي حبيبتي لازم نطلعوا توا معاش في وقت..
وخدي الشنطه ومشي طلع..
واسيمه لبست شنطتها وطلعت وراه وصكرت الباب..
••••••°°°°°°°••••••••°°°°°°°••••••
في أحد المولات الشهيرة في العاصمه..
في مقهى للعائلات بس..
كانوا ماجده ونسيبه وسارة والتوأم مقعمزين فيه..
ماعدا زياد اللي خش لمقهى شبابي..
ماجده:والله بديت ننقرف من الطلوع للأماكن العامه..
نسيبه:زيك..وين ماشيين بيه هدا تقول قاعدين في لبنان..
ماجده:المشكله من عمر سارة تلقيهم هداكا اللبس المشحط والمكياج والحاجب خط..والوشاح اللي زيه قاعد زي مامهناش..
نسيبه:وتلقيها طالعه هكي مع امها وامها عادي جدا عندها..
ماجده:اضحكي امهاتهم هما اللي يبوهم هكي يديروا وين تجي تكلميها ع بنتها ولبس بنتها تقولك اني عاجبني انتي مادخلكش..
نسيبه:بيكلبوا ع الذكورة والزواج الخفيفات هادم..
ماجده:الناس قاعده تطور الا حني كل يوم لتالي في كل شي واولهم الدين معاش في خوف ياربي..ياويلهم يوم غدوة الامهات اللي مخليات بناتهم سايبات ويديروا مايبوا لما ربي يسألهم عليهم..الله يخلف ع اسيمه مرت هيثم..شوفي ساره ماشاء الله عليها لبس محترم وخلتها تتحجب ووجهها صافي مافيشي لبز..الربايه الباهيه تبان من وجهها..
ابتسمت سارة بخجل وقالت:تسلمي خالتو..
نسيبه بإبتسامه:ردي بالك في يوم تسمعي لوحده تقولك عيشي حياتك والبسي ومكيجي ومش عارفه شنو..خليك ديما زي مارباتك امك..اللي زيك ولوا شويه ياسارة..
سارة تسمع في كلام عمتها وهي فرحانه بروحها وبالنعمه اللي ربي انعمها عليها وفضلها بيها ع هلبه من بنات جيلها..
هي أم فاضله زي أسيمه..ربتها احسن تربيه..ربتها ع الدين وحسن الخلق وخلتها تتفرد عن هلبه غيرها من البنات اللي تشوف فيهم حواليها اللي مع الأسف مالقوش من يوجههم للطريق الصحيح..
🥀ومش ضروري الام تكون متعلمه ومثقفه زي اسيمه بش اطلع جواهر زي سارة..
في عفاف..اللي برغم بساطتها..الا انها مراة تعرف ربي
رغم المحيط السيء اللي هي فيه عرفت كيف تربي بنتها صح..ع العفه وحسن الخلق والإحترام..
حاولت مع الاولاد بس ماقدرتش لان غالبا الابن يتأثر بالأب اكثر من الأم..
ولهدا اللي ماقدرتش اديره مع الاولاد داراته مع تهاني وطلعتها احسن بنان العيله اخلاقا..
وهما توا في سهرية "المستاذنات" متاع اختها تهاني
الوحيده اللي كان لبسها محتشم وتعول مع امها وخالاتها بإحترام..
عكس بنات العيله تماما وع راسهم سجى اللي لبسها كان يستحي منه الشيطان...
بعد مافرقوا قعمزوا عفاف وبنتها...
وسجى وسماح كان يراقبوا فيهم..
شويه سماح شبحت لسجى بعدين مشت للكوجينه.
وبعد لحظات سجى لحقتها..
سماح:مازال مصرة تمشي؟!
سجى:ايه غير انتي متأكده ان الحوش فاضي؟.
سماح:ايه تاكدت من عفاف توا..
سجى:خلاص خل نمشي نجيب عبايتي..
سماح؛عبايتك برا البسيها واطلعي طول..
سجى:حاضر..
ومشت طلعت خدت عبايتها اللي كانت ع الكرسي لبستها ولبست وشاح وطلعت من الحوش وماحد حس عليها وتوجهت لحوش خالتها..
وصلت في الباب..
طلعت المفتاح المنسوخ من الأصلي وفتحت الباب وخشت للحوش..
ورداته..بعدها فتحت باب الحوش الدخلاني وخشت..
اول مكان مشتله دار نوم خالتها فتحت الدواليب وطلعت شي من حوايج خالتها وشي من حوايج خالد..
وردت كل شي زي ماكان..
بعدها طلعت منها ومشت لدار الولاد..
وخشتلها بتاخد حاجه من اثر رفيق..
■فهالوقت..
كان رفيق ماشي يدعدع لحوشهم..
وين وصل في حوش هيثم..وقف وشبحله وقال..اااه..اااه
يا....نقص صوته وقال بهمس..ياسارة..
حتى وهو في الحاله كان محافظ ع سمعتها مايبيش يذكر اسمها بصوت عالي ويسمعوه الناس..
بعدين نزل راسه وهو يدمع ومشي كمل طريقه للحوش..
وصل فيه دف الباب وخش..
بعدين رده..
وكمل طريقه لداخل..
وخش...ومشي طول للدار بيتلوح فيها كالعاده..
فتح الباب..
انخلعت سجى وشهقت بصوت عالي..
هو شافها..
سجى وهي ترعش:رفيق!!!
ورفيق خشلها وهو وقتها كان تحت تأثير أم الكبائر..
ويكفي ان يقال عنها ام الكبائر لنعلم ماحدث بعد ذلك..
•••••••°°°°°°°•••••••••°°°°°°•••••••••
في احدى المطاعم في العاصمه..
ماجده:اللهم صل ع النبي عليك شاب خلوق لأبعد حد عيونه مايجوش عليا كان بالغلط..بوه برغم عذاريبه يحترم فيه احترام ماريتش زيه..صلاي..حافظ نص القرآن قالت امه..كريم..خدوم...وقلبه كبير..خواته وامه يموتوا عليه..
نسيبه بضحكه:شكلك حتى انتي حبتيه.
ماجده:ايه والله قداش نتمناه يناديني امي مش خالتي..
وسارة تسمع وهي تاكل وقلب يرفرف والوجه احمر..
زياد:الحق حتى اني عجبني اسلوبه في الكلام محترم وراجل مثقف وعقله كبير..
نسيبه:ربي يخليه لأمه وخواته..
ماجده:خسارة غير جيتي اكبر منه كان هدا والله مافوته..
زياد؛باهي اللي جت اكبر منه..
ضرباته نسيبه ع ذراعه وهما قعدوا يضحكوا..
نسيبه:كثرت راهو ماتخلنيش نقاطعك حتى اني..
سارة شبحتله وهو شبحلها بعدين قلبوا وجوههم ع بعض..
ماجده:خيركم اللطف!؟
نسيبه:ياحنه زيزو غالط في صاحبة سارونه بالكلام وسارة من يومها معاش بت تكلمه..
ماجده:لاعندها الحق.
زياد:عندها الحق تقاطعني ع خاطر وحده زي هديكا!؟
نسيبه:وخيرها تهاني بنت محترمه مافيش منها..
ماجده:ان شاء الله تهاني بنت خالد النسيمه المؤدبه..
زياد بسخريه:نسيمه قتلك..لا نسيمه حق!
سارة بضحكه:حتى هي بنت امها شريناته كف صوت وصل لاخر المنطقه..
نسيبه:عطيها الصحه..
زياد وهو يشوف لعمته بتفنيصه ووجهه مولي أحمر:شن هيا!!!
ماجده:ههههههه..
هدا كله والصغيرونات حداهم يسمعوا وياكلوا بس...
🌸وبعد كملوا عشاهم...توكلوا طول للحوش اللي قاعد فاضي من المغرب...
••••••°°°°°°°•••••••°°°°°°°••••••••
في فندق من اكبر فنادق بنغازي..
كانوا هيثم واسيمه مقعمزين في الباحه متاعه..
ع جية مديرة مكتب هيثم..
هيثم:وهادي لجين..
ناضت اسيمه وهي مبتسمه..
لجين بإبتسامه:السلام عليكم..حمد لله ع سلامتكم..
هيثم:وعليكم السلام..الله يسلمك..
لجين:مادام اسيمه..
هيثم بإبتسامه:عزيزة قلبي.
ابتسمت اسيمه بخجل..
لجين؛واخيرا شفتك..
وسلموا ع بعض بالخد وهما يسألوا عن احوال بعض..
لجين بعدت وهي تقول:لازم يتكلم عنك الدكتور لين شوقني نشوفك..
اسيمه:حتى انتي حكالك عنك وخلاني متشوقه نشوفك..ديما يقول فرحان اللي في نساوين في البلاد هادي زي لجين يخدموا بضمير ويحاربوا في الفساد..
لجين بإبتسامه احراج:هدا واجبي..
هيثم اشر عليها وقال؛هدا الصح..هدا واجبها وواجب اي شاد مسؤوليه..مش بطوله من حد..
لجين:فعلا..عفوا دكتور نمشوا توا للمستشفى؟
هيثم ناض وقال؛توكلنا ع الله..هيا اسيمه..
ومشوا مع بعض..
▪▪▪▪▪
◇كنت نبيها تشوف بعينها اني شن قاعد نواجه وشن قاعد ندير..عارفها مقدرة من غير مانوريها شي..بس نبيها ماتحملش في قلبها عليا اي زعل وتتفهمني اكثر واكثر...
▪▪▪▪▪
••••••°°°°°°°••••••••°°°°°°••••••
"تو انت هدا ماهمك ياراجل"
مجيد:ايه هدا ماهمني وهو في اهم من هكي..البنت بتقعد في رقبتي ورقبتك من ياخد توا مريضة سكر..
ع خشة مجاهد عليهم وهويقول:تقعد في حوش بوها معززة مكرمه..وقعمز حدا بوه..
مجيد؛شن تقول يامجاهد ياولدي؟!
مجاهد:تقعد في رقبتي اني يابوي طول عمري..وفي ستين داهيه لنور الدين وغيره..
سدينه شبحت لمجاهد وعيونها معبيات دموع..
اما مجيد ناض وهو يقول:خلاص اني معاش دخلي فيها كان هكي...ومشي طلع من حداهم..
سدينه:كلامه حق..البنت بتقعد يامجاهد
مجاهد:بنتك ليها رب يام هو اللي كتبلها تنصاب بهالمرض..ولو كاتبلها نصيب حيجيها زي ماجاها هالمرض..فوضي الأمر لله سبحانه وتعالى..ومانبي حد يحسس دانيه انها ناقصه..مرض عادي ياما ناس تعايشت معاه وحياتهم جدا طبيعيه..
سدينه تنهدت بحزن وقالت:يارب فرج ع بنيتي يارب..
مجاهد تنهد بضيق وقعد ساكت..
بعدين شبح لرشيد لقاه لاهي بالتليفون قاله؛رشيد نوض اقرا قرايتك..
رشيد:حاضر..وناض طلع من حداهم..
ومجاهد يشبحله...
••••••°°°°°°°°••••••••°°°°°°°°••••••
في بنغازي..
كان هيثم يدير في جولة تفقديه لأحدى المستشفيات الكبيرة العامه غادي..جاي بنفسه يشوف شن صار في المستشفى بعد ماعطي اوامر بتزويده بالمعدات الناقصه وصيانة بعد المراكز فيه..
وكانت اسيمه معاه تشوف في راجلها كيف يخدم ويتعب وكيف متحمل المسؤوليه بكل معنى الكلمه..
🍁الوزراء كما هو معروف عنهم في وقتنا الحالي عايشين في ابراج عاجيه..اغلبهم همهم كله الميزانيه وبس..ياكل نصها ويقسم ربعها ع جماعته والباقي يلوحوه للقطاع اللي يخدموا فيه بموظفيه..
والفساد هدا تسبب في انهيارات لقطاعات كبيرة وع راسهم واهمهم قطاع الصحه اللي يعتبر القطاع الأكثر فسادا حسب ماصرحت بيه رئاسة الحكومه مؤخرا..
ياريتهم بس ولو للحظه فكروا في يوم القيامه..يوم قيامتهم هما يوم موتهم...ومابعد الموت...حسابكم حيبدا من اللحظه اللي يخلوك فيها الناس اللي حضروا دفينتك..وقتها مش حينفعك المال اللي قعدت تجمع فيه بالحرام عمرك كله🍁
🌸في اخر محطه لجولة هيثم التفقديه..
جاته مراة..
المراة:الله يرحم والديك يادكتور تربح نبيك دقيقه..
واحد من الدكاترة:مش وقته يااختي..بري غادي..
هيثم:لحظه لحظه..خليها...
المراة طول جاته وقالت وهي متألمه:يادكتور نا نعرف انك دكتور قلب..كنت نبي نعديلك لطرابلس بعد سمعت انك ادير في عمليات بالمجان..لكن صار اللي صار وسمعت بيك وليت وزير قلت خلاص راحت ع بنتي..
اسيمه دموعها عبو عيونها.
هيثم:شن مشكلتها بنتك؟
المراة:يادكتور بنتي عندها مشكله في قلبها والله مانعرف نقولك شنو هي لكن فيها من لما كانت صغيره وقتها قالوا الدكاترة مانقدروا نديرولها عمليه كان بعد توصل 16سنه..واهي وصلت 16 وحالتهت تعبانه والعمليه مالقيت مو يديرهلها هنا..وفي الخاص تكلف واجد واني والله لو نبيع اللي فوقي واللي تحتي مانجيب حقها..وقعدت تبكي.
واسيمه بكت معاها..
هيثم:علاش مادرتولهاش عمليه هني!؟
مدير المستشفى:للأسف يادكتور الدكاترة هني مايبوش يديروا عمليات مكتفيين بالكشف العادي بس..
لجين:مايديروش عمليات الا بالفلوس طبعا..
الدكتور قعد ساكت..
هيثم بحده:نبي اسمائهم واحد واحد..لازم يحالوا للتحقيق نماذج زي هادم لازم يسحبوا منهم الشهاده مش لأمثالهم مهنة الطب..
بعدين شبح للمراة وكمل يقول..توا بنمشي نشوف حالة بنتك وملفها وبإذن الله حنديرلها عمليتها.
المراة :الله يربحك الله يعليك الله يفرحك بضنوتك الله يحفظهم لك يارب العالمين..جعنك ديما مستور ياربي يفك الله كروبك كيف مافكيت كربي..
هيثم ابتسم وهز راسه..
واسيمه تشوف للمراة بإبتسامه ودموعها ينزلوا وفي داخلها تردد"آمين.."
▪▪▪▪▪
◇ربي جابني للمراة هادي برجليا..سبحان الله..تحسابها تصكرت خلاص ..وهو فرجها عليها بطريقه ماخطرتش ع بالها..انه ساقني ليها سوق..نذكر لما مشيت شفت البنت جت بين عيوني بنتي سارة...تخيلت لو كانت مكانها...مجرد مافكرت بهالطريقه...زادت نقمتي ع اللي مدايرين روحهم اطباء وقاعدين يبزنزوا بمهنتهم واراوح الناس واواجعهم..في نظري مافيش فرق بينهم وبين تجار المخدرات..
عليهم من الله مايستحقوا..
▪▪▪▪▪
••••••°°°°°°••••••°°°°°••••••
الساعه الثانية عشر ليلا..
كانت سارة مقعمزة ورا اللاب توب متاعها وتكتب..
"نصائح عمتي لي اشعرتني حينها انني حقا جوهرة كما قالت الخاله عني...جوهرة تميزت بين اكوام الصخور الملقاة هنى وهناك..وحينها ايضا تذكرت ماقرأت في تلك المقاله..عن قيمة الحجاب في اثبات هوية المسلمه من غيرها...
فالحجاب عنوان للعفه..عفه تنبع من الداخل...
كما قال ادهم الشرقاوي..
《في قضية الحجاب..يظنون ان الإسلام خياط فصل الثياب واجبر المسلمات عليه..
ولايعلمون انه الإسلام ادب فصل اخلاقا وهن اخترن قماشا يناسب اخلاقهن》
وايضا من نصيحة عمتي تذكرت ماقالت حنان لاشين
《إحساس رائع...أن اسير بحجابي الفضفاض كاللؤلؤة المكنونه لاتهمني نظرات اعجاب فقدتها بغطائي لأن نظرة رضا من الله تعالى تغنيني وتكفيني》
لااقول بأني اتباهى..ولا اني ارى لغيري من لم يحظو بما حظيت به بنظرة ازدراء..على العكس..بل من كل قلبي اتمنى ان يصبحن مثلي بل افضل مني..لأننا جميعا معشر نون النساء..لانستحق الا ان نكون لآلئ مكنونه.....
هكذا الله خلقنا..وهذا مااراده لنا...
والسلام على من اتبع الهدى.....
"معزوفة اكتمال القمر"..
سارة بإبتسامة فرح:نشر...وضغطت ع زر النشر ونزلت قصتها القصيرة الجديده..."معزوفه اكتمال القمر"
••••••°°°°°
"وكان قتيلي ياوخيتي من بكري"
:مانحسابش بينقصوا عليا..
عفاف:خلاص تو نمشي نجيبهم..
:في هالليل ياكبدي..
عفاف:تي عادي اهو الحوش خطوة..
:حتى هالفروخ واخدين وجوههم كان هدا راهو بعت واحد منهم معاك..
عفاف بضحكه:زي فروخي..ماعليكش في شي اني ماشي نجيبهم مش مطوله..
ومشت خدت عبايتها من ع الشماعه وطلعت واختها تسقد فيها..
في وحده من الديار..
سماح بقلق:ردي يامصيبه ردي..حي عليا البنت وين مشت وينها لتوا ياغبارتي غبارة..
..........
وصلت عفاف لحوشها..
لقت بابه مردود عقدت حواجبها وقالت:زعمه رفيق روح؟ولا وباه!؟
خشت وصكرت الباب.
وشبحت قدامها لقت الدخلاني مفتوح زادت استغربت..
ومشت خشت وصكرت الباب..
وهي ماشيه تلامحت باب دار الولاد مردودة..
عفاف:اكيد رفيق سمع كلام خوه وروح..
ومشت للدار وفتحتها...

يتبع••°°