البطل المغمور

الجزء السادس

#البطل_المغمور

#جمان_فريد

الجزء السادس6

💐..
مقعمزات مقابلات بعض وفي نصهم صونيه كبيرة وحداهم شكارة بازلياء كبيرة يفرطوا فيها مع بعض
فكت طرف محرمتها اللي كانت رافعاته ع راسها بعدين رجعت ربطاته بإحكام وهي تقول بإبتسامه متهكمه:قصدك كان خطبت بنتها لرفيق تقول باهي!
سماح وهي تفرط في البازلياء قالت:وين تلقى خير من رفيق تي هي تتمناه تمنايه..
عفاف بنفس الإبتسامه وهي تفرط فالبازلياء:متأكده ياسماح!؟
سماح بضحكه:خيرك عفاف!
عفاف:ماخيرني شي لكن اختك قاصه رجلها من حوشي وقالوا راجلها معاش يبيها تواصلنا كيف بيعطينا بنته ترا؟!
كيف جت سماح بترد سمعوا باب الحوش الدخلاني انفتح بقوة وجاهم صوت عياط تهاني وهي تقول:باااباا ياااام بااابا..
حطت سماح يدها ع قلبها اللي قريب وقف..
اما عفاف جمدت في مكانها وهي تشوف بعيون شاخصة البصر لفم وسط الحوش اللي خشت منه تهاني وهي تبكي وتقول:بابا يام ضربوه بموس يام..رفعوه ودمه يصب يام..
عفاف حولت من عليها الشرشاف اللي كانت طرحاته تحت الصونيه بقوة لين انكفت الصونيه باللي فيها وناضت لبنتها وهي تقول بفجعه وعياط؛شن تقولي يابنت!! بوك خيره..
بعدين دفتها ومشت تجري وهي تقول:خالد حي خالد!..
وناضت وراها اختها اللي بكت طول وهي حاطه يدها ع قلبها اللي كان ينبض بقوة خوف ع خالد..
🌿عفاف ركبت فيها نار خلتها مش مستاقظه لروحها وهي طالعه تجري بقفطان حوش حفيانه..
مش حاسه بشي ولا واعيه بشي وهي بس تقول..
"خالد خالد..حي عليا خالد"
🌿🌿🌿
في نفس الوقت..
جو زوز سيارات اسعاف..
رفعوا خالد اللي ركب معاه ولده رفيق..
وزياد اللي ركبت معاه اخته وواحد من الجيران
إصابة زياد مش خطيره زي اصابة خالد..
اللي كان يحاول يقعد فايق..
رفيق ودموعه ينزلوا كان يقوله بغضب:وديني يابوي وديني ندوره ندوره ونلقاه وديني نمزقه تمزيق..
خالد بتعب شديد؛مادو..مادور..حد..
المسعف:ماتجهدش نفسك..
رفيق:خلاص خلاص بوي مش وقت كلام اهو اني سكتت..
وحط يده ع فمه وهو يشوف لبوه ولاقالوا دموعه نوقفوا..
اما خالد فكان يشوفله بعيونه اللي يدوب فاتحهم وع وجهه ارتسمت ابتسامه خفيفه...
رجع بيه الزمان في هاللحظه للخلف واذكر موقف نقيض لهالموقف تماما قبل سنين طويله لما كان طفل عمره ست سنوات..
♦️فلاش باك..
في عز الصيف الحارق..
كان يخدم هو وخوته في ورشة بوهم..
كانوا يقطروا عرق..والمعدات اللي كانوا يرفعوا فيها ويحطوا ويخدموا بيها كانت سخونه تحرق وهما مجبرين يشدوها..
"هيا خف روحك انت وياه "
مجرد يسمعوا صوته وهو يتكلم بنبرة الصوت الأشبه بفحيح الأفعى قلوبهم الصغيره كانت ترجف في صدورهم..
جار ليهم جايب سيارته بيصلحها لما شاف حالتهم وجعه قلبه وقال:كان تعفيهم من الخدمه فهالجو ياأسطى جمعه..
جمعه "بوهم" وهو يخدم ع السياره:ياما خدمت فيه الجو هدا واني في عمرهم ماصارلي شي وحتى هما مايصيرلهم شي..
سكت الجار ماقدرش يناقشه عارفه راجل لسانه حار وكلامه كله سو..
قعد بس مركز ع الصغار اللي كان خالد اصغرهم..
لعند مافجأة سمعوا صوت حاجه طاحت..
جمعه قام راسه وقال بنظرة عين تخوف:شن طيحتوا ياحمار انت وياه!
كلهم كانوا يرجفوا وهما يشوفوا لخوهم الكبير وهو يشبح لوحده من البتاريات طايحه منه والميه اللي فيها تبزعت..
شبحله جمعه بنفس النظرة وقال:تحرك ياكلب تحرك للقراج..
الولاد لما سمعوا كلمه "قراج"..قلبوهم كادت توقف من الخوف..
وخوهم الكبير نفد الأمر ومشي طول طلع من الورشه..
الجار:عاديه ماصار شي ياجمعه..
جمعه بنرفزة:ترا بالله معاش تدخل..
ورجع يصلح فالسيارة..
الجار مشي طلع من حداه ووقف فم الباب وهو مضايق..
اما الولاد رجعوا يخدموا مرة تانيه وهما يفكروا في اللي بيصير لخوهم في القراج..
جهنم حوشهم..
🍂بعد كمل جمعه تصليح سيارة الجار مشي روح للحوش..
وخش ع ولده القراج ..
والولد كان يستنى في العقاب وهو مستسلم
كان يحساب بوه بيجلده بخيط الضي ويحبسه ليله كامله في القراج..
بس هالمرة مادارش هكي..
هالمره..علقه من رجليه في سقف القراج..
وخلاه ليله كامله وهو معلق فيه...
ما يقدر حد يخش عليه ولايقدر حد يديرله حاجه..
لاامه المستضعفه اللي ذاقت اسوأ اصناف العذاب حتى هي ولاخواته المسكينات..ولاخوته الصغار اللي كانوا يموتوا خوف من بوهم..
العقاب هدا تسبب لخو خالد الكبير في مشكله في الدماغ خلاته انسان مش طبيعي ولعند هاللحظه عايش بهالمشكله..
♦️الوقت الحاضر..
غمض خالد عيونه..فقد وعيه..
رفيق بفجعه:بوي..بوي!!
المسعف:ماتخافش فقد وعيه بس..
رفيق شبحله شويه بعدين قال بصوت عالي:هيااا بسرعه سوق بسرعه ولاعطوني نسوق اني..
المسعف:خليك هادي وضع الوالد ان شاء الله مش خطير..
رفيق شبح لبوه ودموعه تنزل شد يده بإيديه الزوز وقعد يكرر بصوت هامس:بسرعه..بسرعه..
🌾في السيارة التانيه..
كانت سارة تبكي..
زياد بوجع:مافي شي خلاص اسكتي..
جارهم:بنتي بلغي بوك..
سارة ببكي:بابا مسافر..
زياد:عمتي..
سارة :مع ماما..
زياد غمض عيونه بشده وهو يفكر في حالة امه بعد تعرف..
🌿طلعوا السيارات الإسعاف من الشارع..
ع جية سيارة خليل اللي كان راكب معاه خوه جهاد..
كان جاي يجري...
خشوا الشارع..
ع وصلة سيارات نسيبه واسيمه اللي خشوا وراهم..
اسيمه لما شافت سيارتهم تجري قالت:ان شاء الله خير!
فهاللحظه..
كانت عفاف طالعه تجري وهي تعيط وتقول :ياربي مش قصدي ياربي..شبحت فوق وقالت..من ورا قلبي ياربي مش قصدي..
وحده من جاراتها شدتها وقالت:عفاف مافيه شي ياعفاف رفعوه وهو واعي..
دفتها عفاف وكملت تجري وهي تقول:حولي خليني اني اللي دعيت عليه اني وربي قبل..علاش ياربي عارفني انت عارفني..
وسماح وراها وهي تبكي وتقول في نفسها"ياربي ماتصيرله حاجه نموت لو صارتله حاجه"
ع جية خليل بالسياره..
وقف قدام الزنقه..ونزلوا هو وخوه يجروا لما شافوا حالة امهم..
وصل فيها خليل ضمها وقال:تعالي يام..
عفاف شدت فيه وقالت ببكي:بوك ياخليل بوك..
خليل وملامح الغضب ع وجهه وعيونه معبيات دموع:مافيه شي يام غير تعالي بالله عليك..
ضم امه وجي جهاد من الجهة التانيه ضمها معاه بش يستروا امهم..
اللي كانت تبكي وهي تقول:كله مني..اني اللي دعيت عليه..اني اللي قتلته..
جهاد رشف وهو يقول:ماصارله شي يام مافيه شي..
وقعدوا يمشوا بيها للحوش واختهم وخالتهم وراهم..
اما الجارات مشوا وقفوا قدام حياشهم وقعدوا يقولوا لبعض..
:الفجي فيها المراة هادي..
:ايه ياناري..تي غير تعالوا هني حق ولد الدكتور هيثم حتى هو انضرب!؟
:ايه حتى هو رفعوه مع خالد..
شافت وحده منهم لأسيمه جايه مع بناتها وحماتها من بداية الزنقه ع رجليهم قالت:اهيا جت امه حي كان تعرف! المراة هادي روحها فصغارها..
من بعيد شويه..
نسيبه:اشبح شن دايرين خالد هو وولاده المرة هادي!؟
اسيمه قعدت تشوف جهة حوش خالد بنظرات أسف..
لعند ماوصلوا في الجارات..
وقفوا وقالت اسيمه:شن صاير؟
شبحوا لبعض بعدين وحده منهم قالت:ياوخيتي صارت عركه فالشارع بين ولد خالد ومعاه ولدك وزوز ولاد مش من الشارع..
نسيبه واسيمه انصدموا بعدين نسيبه قالت؛كيف العركه بين مني ومني رفيق وزياد!!
الجاره:لالا رفيق وزياد الزوز اضاربوا مع شباب مش من شارعنا وخالد خش في العركه بيحز ضربوه بموس..
شهقت اسيمه وحطت يدها ع صدرها..
نسيبه بتوتر:ولد خوي صارتله حاجه!
وحده تانيه ردت تقول:انضرب حتى هو..
حطت اسيمه ايديها الزوز ع راسها وقالت:ولدي!!
شحب لون وجهها وقلبها نبضاته قعدت تزيد بقوة من الفجعه..
:جت الإسعاف رفعتهم للمستشفى اللي هني..
اسيمه نزلت ايديها ولفت ومشت تجري للسيارة..
ونسيبه كيف جت بتلحقها وقفت لما سمعت صوت البنات يقولوا بنبرة باكيه:ماما!!
شبحت للجارات وقالت:والنبي ردوبالكم عليهم..
ولفت ومشت تجري..
ووحده من الجارات خدت ريحان وجنان اللي كانوا يبكوا من ايديهم ودخلتهم لحوشها وهي تقول:خلاص بنياتي تو تجي ماما..
ريحان ببكي؛ز..ياد..
الجاره:مافيه شي بنتي تو يروح هو وماما..
ودخلتهم لحوشها وصكرت الباب..
اما الجارتين التانيه..
:ربي يسلم وينجوا الزوز..
:ان شاء الله ياوخيتي..هي بالسلامه توا..
:بالسلامه..
وخشوا لحياشهم وصكروا البيبان..
ع طلعة خليل وجهاد وامهم معاهم بعد لبست جلابيه ووشاح..
خليل وهو يمشي بعصبيه؛شن قالك رفيق..
جهاد وهو عاقد حواجبه:قال دخلوه العمليه توا..
حطت عفاف يدها ع خدها وهي تقول ببكي:حي عليا حي.
خليل:خلاص يام تربحي فكينا من حي ماحي معاش تفاولي..
حطت يدها ع فمها وسكتت وهي ترشف ودموعها يصبوا..
طبطب جهاد ع ظهرها..
هي غمضت عيونها بشده وفتحتهم..
وصلوا في السيارة اللي كانت مدرسه في بداية الزنقه مصكرتها..
ركبوا التلاته وتحرك خليل طول متوجه للمستشفى..
••••°°°°•••••°°°°••••°°°°••••
مانبيش..نروح لحوشكم..
راجل ستيني قال الجمله هادي بلعثمه لولد خوه وهما الزوز يمشوا في ممر المستشفى..
ولد خوه رد عليه بضحكه وهو يقول:باهي وين تبينا نمشوا؟
العم:لي..شقتك..
ضحك وقاله:علاش!؟
العم:بوك..وامك..نشافات وخلاص..قعاد بوك من غير خدمه..مصيبه..مابعد امك..
ضحك ولد خوه وقال:باهي..
هز عمه راسه وهو مبتسم..
بعدين كملوا طريقهم وهما ساكتين..
وين قربوا يوصلوا لباب المستشفى..
شافوا خليل وجهاد وعفاف خاشين يجروا..
وقفوا الزوز وهما يشبحولهم بعدين العم قال..
"خالد خالد..عمك"..
شد ولد خوه يده وقال:تعال معاي..
ومشوا طول لحقوهم..
وين قربوا يوصلوا للمصعد الولد قال وهو ينادي:خليل..خليل..
التفتوا التلاته..وتفاجئوا ع الآخر..
عفاف:علي!
علي:خيركم..خيركم..ياعفاف؟
عفاف بدموع:ضاربين خالد بموس ياعلي..
علي حط ايديه ع راسه وقال:خالد!
خليل غير عيونه عنهم وهو متنرفز وضغط ع زر المصعد انفتح الباب وقال لأمه:خشي يام..
عفاف شبحت لولدها بعدين شبحت للمصعد المفتوح وخشت..
وولادها خشوا وراها..والباب تصكر..
ولد عمهم قال:عندهم حق كلنا مقاطعينهم ولافينا حد يندري علي حالهم
علي:قول لبوك يقول..لخوته ..وخواته..
الولد هز راسه وقال:باهي
•••••°°°°°
في المصعد
عفاف رشفت وقالت وهي تشوف لولدها خليل:عمك علي ماذنبه شي ياخليل..
جهاد:لا ليه يام زيه زيهم..راهو يقدر يقول ارفعوني لخوي نشوفه اتصلولي بيه نكلمه..
خليل:هما اختاروا يقطعونا وحتى حني مانبولهم مواصله لافي خير ولافي شر..
عفاف كانت تقدر ترد عليهم لكن اختارت السكوت لان الوقت مش وقت عراكات ونقاشات حاده..
وصلوا الدور اللي فيه حجرة العمليات اللي فيها بوهم..
طلعوا من المصعد ومشوله طول..
🌿في مكان تاني في نفس المستشفى..
اسيمه ببكي:ديما نقولك حكم عقلك ديما..
زياد:يام المواقف هادي مايقعدش معاها عقل..
نسيبه شبحت لسارة وهي رافعه حاجبها:ماهو كان المعفنه هادي تلبس وشاح راهو ماصارش هكي..
سارة:اهي تهاني لابسه وشاح ناشبوها..
زياد؛ايه يام شن صار في عمي خالد راهو الراجل خدي عليا الضربه..
نسيبه بصدمه؛شني!!
زياد شبحلها وقال:الكلب اللي ضربه جي بيضربني اني غير هو وقف بيناتنا..
اسيمه حطت يدها ع فمها وشبحت لحماتها وحماتها شبحتلها..
سارة بحزن:نزف هلبه..
زياد؛اني جتني في خياطه يام خيطولي الجرح وتمت لكن هو الله اعلم في شن جاته..
اسيمه شبحت لنسيبه وقالت:تمشي تشوفيه نسيبه؟!
نسيبه رفعت حواجبها واشرت ع روحها وهي تقول:اني؟!
اسيمه:ايه بالله عليك اني غير نطمن ع زياد نلحقك..
نسيبه شبحتلها شويه بضيق بعدين هزت راسها وقالت:باهي..
تنهدت ومشت ناحية الباب وهما معاها بعيونهم لين فتحت الباب وطلعت وصكراته وراها..
زياد بعدين شبح لأمه وقال:ماتخبريش بوي..
اسيمه شبحتله بعدين قالت بضيق:مانقدرش نقوله توا..
زياد:لاتوا ولابعدين مش لازم يعرف..
سارة قعدت تشوفله بضيق وهي ساكته..
اما اسيمه وزعت نظرها القدام وهي تفكر..
•••°°°•••°°°°•••°°°•••
قدام غرفة العمليات..
كانت عفاف ع كرسي وولادها حواليها يراجو ع نار..
ع طلعة ممرضة من غرفة العمليات..
عفاف ناضت وهي تشوفلها وقالت هي وولادها باصوات متقطعه..
"شن صار..شن حاله؟!"
الممرضه:الدكتور طالع تو يبلغكم هو..
ومشت..
خليل بعصبيه؛تي شن في الزفت!؟
ع طلعة الدكتور..
قدموله طول..وهو شاف لهفتهم وقال:الحمدلله وضعه مستقر وقفنا النزيف والطعنه ماضرتش اعضائه الداخليه كانت نوعا ماسطحيه..
عفاف:معناها حاله باهي يادكتور ولا؟
الدكتور هز راسه وقال:ايه اطمنوا..الحمد لله ع سلامته..
كلهم بأصوات متقطعه ردوا:الله يسلمك..
مشي الدكتور..
وامهم حطت ايديها ع صدرها وغمضت عيونها بشده وهي تقول:الحمد لله ياربي..
ضمها رفيق لحضنه وباس ع راسها..
وجهاد قعد يمسح ع ظهرها..
اما خليل كان يشبح لباب غرفة العمليات وهو يمسح ع لحيته ..
فجأة..طلعت الباريلا اللي عليها بوهم وحواليه الممرضات..
فتح عيونه ع وسعهم ونزل يده ومشاله ومع خوته.
أما امه قعدت واقفه تشوفله وقلبها موجوع
فاتوا من قدامها..لما شافاته بلون وجهه الشاحب وهو مغمض عيونه ومازال تحت تاثير البنج..
جي بين عيونها اول مرة شافاته فيها..
♦️فلاش باك..
مروح بيها بوها في سيارته من المدرسة الثانويه كانت تقرا اول ثانوي وقتها..
بوها:في طرف نبيه للسيارة نشوفوا الورشه هادي كان حصلناه باهي كان هدا نروحوا طول بنتي..
عفاف:خود راحتك بوي دير مشاوريك كلها لاحقين ع الحوش..
ضحك بوها وفتح الباب ونزل وصكره كويس بعدين مشي للورشه..
وعفاف قعدت تشبح القدام..
اما بوها قعد واقف قدام الورشه نادى الشاب الموجود داخلها طلعله..
والشاب هدا كان خالد وقتها عمره 19 عام..
سأله بوها ع الطرف اللي يبيه للسيارة..
خالد:اهو الاسطى جي..
التفت بو عفاف شاف خو خالد الاوسط واللي وقتها كان ماسك الورشه بعد توفى بوهم
سلم ع اب عفاف وقعدوا الزوز يهدرزوا ع الطرف اللي يبيه..
وخالد وهو يسمعلهم مرر نظره ع الطريق لعند ماجت عينه ع سيارة اب عفاف وهي فيها..
وين راها أنضرب فيها...
سهم فيها وخلاص..
اما هي لفت وجهها جهة الورشه بش تشبح بوها..
عيونها جو ع خالد وهو يشبحلها..
عجبها من اول نظره..ونظراته ليها خجلتها شبحت القدام طول ومعاش شبحت جيهته لين بوها ولى للسيارة
🌿وعاود بوها جي مرة تانيه وهي معاه..وشافوا بعض والنظرات زادت وطالت وانعادت الكرة مرة بعد مرة لان بوها دار صحبه معاهم وين يخطم حدا ورشتهم لازم يسلم ويهدرز عليهم..وهو في مرة تبع حوشهم وعرف مكان سكنتهم وعرف مدرستها وقعد يمشيلها..طار عقله بيها معاش قادر يعيش من غيرها..
شد في خوته يخطبوهاله ودار ع خاطرها حال..
وهما مابوش يخطبوها في البدايه لأن خوهم ماكانش راكز كان كيف بادي يحادي في مجموعه من الشباب اخلاقهم مش مزبوطه وكذلك ماعنده شي..
لكن في نفس الوقت واحد من خوته قال لو زوجناه ممكن بعد يدير مسؤولية في رقبته يتعدل..اقتنعوا الباقي برأيه..
ولأن ربي عاطيهم وكل حد فيهم عنده مصدر دخل يخصه وكل حد بحوشه وخواته كلهم متزوجات..تنازلوله عن حوش العيله واتفقوا يكتبوله نص الورشه..
بعد دارو هكي مشوا خطبوله عفاف..ولأن بوها شبه عارفهم كويس وافق مبدئيا بعدين خدي راي بنته اللي مامنعتش..
وخلال سته شهور تم الموضوع وتزوجوا..
وخالد وقتها عمره 20 عام وهي 17عام...
♦️الوقت الحاضر..
مشت وراهم وهي مازال تشوفله بعيونها اللي دموعهم تنهمر انهمار..
الممرضه:بنرفعوه لغرفة العنايه..
وقفوا الولاد في مكانهم..
وهما دخلوه للمصعد..
وعيون ولاده اللي نظراتهم كلها الم عليه..
تصكر باب المصعد وقال رفيق..
رفيق بغضب:ال#### من تحت الأرض ماضال الاجايبهم..
جهاد عقد حواجبه وقال:تعرفهم..
رفيق:ايه..
خليل:من هما..
عفاف وهي تهز فراسها قالت بنبرة باكيه:ايه هو هدا كملوا عليا حتى انتم..
شبحولها رفيق وجهاد..اما خليل مط شواربه بملل وحرك راسه يمين ويسار..
جاها جهاد وضمها وباس راسها بعدين قال:خلاص يام ماناش دايرين شي..شبح لخوته وغمز بعينه وقال..حسيبهم ربي..
رفيق هز راسه وقال:ايه منهم لربي ياخد فيهم الحق..
اما خليل شبحلهم وهو رافع حاجبه اليسار..
عفاف وهي فحضن ولدها قالت بصوت مكتوم:خليل..
شبحوله خوته وهما يفنصوا فيه..
هو قلب عيونه بملل بعدين هز راسه وقال:باهي يام باهي زي ماتبي.. بعدين حرك يده وهو يقول..هي تحركوا شن وافقين هني؟!
مشي وهما مشوا معاه..
رفيق:ايه خل ندوروا ولد الدكتور هيثم حتى هو..
خليل شبحله وقال:وين ادوره؟!
رفيق:تي ماهو حتى هو كان فالعركه وانضرب في رجله..
عفاف:نهار احرش!!
جهاد:هدا يعرف يخش عركه!!
خليل ضحك والتفت لجهاد..
ورفيق بضحكه:ريتك ريته وهو يضرب وحش ياراجل..
جهاد رفع حواجبه وقال:ولله في خلقه شؤون ع قولة بوك..
عفاف:ياسر بلاهزوة ع الناس بعدين الوليد صغير شن جابه ليكم..
رفيق:تي في عمره يام كنا نغزوا فالرشاد غز..
جهاد وخليل:اهاااا..
ضحكت امهم وهي تحرك فراسها يمين ويسار..
وصلوا لأخر الممر..
تلاشت ضحكة خليل ووقف فمكانه وخوته شبحوله ووقفوا حتى هما..
عفاف:نسيبه!
نسيبه وهي عاقده حواجبها ووجهها مولي احمر قالت لعفاف وهي تشوفلها:احمم..قدمتلها ومدت يدها وقالت..كيف حالك..
صافحتها عفاف وقالت:الحمدلله بنتي..جيتوا لولد خوك؟
نسيبه:ايه هو حاله باهي توا..حكالنا اللي صار بالزبط..شن صار في..احمم..عمي خالد..
رفيق وجهاد قعدوا يمرروا في نظرهم بينها وبين خوهم اللي كان يشبحلها وخلاص..
عفاف:داروله عمليه والدكتور قال حاله باهي رفعوه العناية توا..
نسيبه هزت راسها وقالت:امم..الحمد لله ع سلامته..
عفاف:أسيمه هني؟
نسيبه:ايه..
عفاف:باهي ارفعيني ليها..
نسيبه:باهي..تعالي..
مشت عفاف مع نسيبه والولاد مشوا وراهم..
وخليل عيونه عليها وهو يتفكر في اللي صار في المطعم..
اما هي كانت تمشي وحواجبها معقودات ومرة مرة تحرك في عيونها للخلف..
وصلوا في المصعد..
ضغطت نسيبه ع الزر متاعه..
خليل تنحنح وقال:شباب..
شبحوله خوته..اشرلهم براسه يلحقوه..
مشي..وهما فهموا عليه ومشوا معاه..
اما عفاف ونسيبه خشوا للمصعد وقبل يتصكر الباب كانت نسيبه تشوف لخليل وهو ماشي مع خوته..والباب تصكر..
•••°°•••°°°•••°°°•••
في الوقت اللي كانت فيه عفاف عند اسيمه تطمن ع حالة ولدها زياد
من باب المشفى خشوا خوت وخوات خالد
بنتين..واربعه اولاد من غيره هو وخوه الكبير
ايه هما مقاطعينه بسبب مشيه في الطريق البطال اللي ياما حاولوا يبعدوه عنه وماقدروش..لكن وقت سمعوا باللي صارله نسوا كل شي وجوه يجروا
🌿كخوت ارتباطهم ببعض قوي..بسبب اللي عانوه وشافوه في حياتهم..اللي روه خالد وخوته وخواته وامهم من البني آدم اللي ينقاله جمعه بوهم شي مايصدقاش عقل..
جمعه انسان مايحملش في قلبه ذرة رحمه...
كان قاسي وجبار وبخيل واناني..الناس كانوا يتجنبوا فيه من عمايله في مرته وصغاره امه اللي هي امه كانت كارهاته ع اللي دايره فيهم
ممكن مايصدقش العقل انه يخلي فيهم مرات جيعانين بالأيام وكان لقوا ماياكلوا مش اكثر من مكرونه مسلوقه ولا فردات خبزة تجيبهم جدتهم بالخنبه
ومرة مرة كانت تخش عليهم بطبق دحي يستهلكوا فيه بإقتصاد..ومرة تشري دجاجه تذبحها وتجيبهالهم وكذلك حتى هي يستهلكوا فيها بإقتصاد..
وياما ياما دار فيهم ياما..وكأنهم كانوا عايشين في معتقل وكأنه كان بمعاملته ليهم ينتقم منهم بس ليش ماحد يعرف..
الحاجه الوحيده اللي ماحرمهمش منها التعليم خلاهم يقروا في المدرسه لسبب واحد بش يعبوا ع ارواحهم بعدين ومايطمعوا منه بشي برغم اللي عنده من رزق خيرات الله..
حتى وهما ماشين يقروا كانوا مذلولين ناقصهم هلبه حاجات لكن برغم هدا كله كانت عندهم عزة نفس وعفه قل نظيرها..
والاغرب من هكي..انهم عمرهم ماذكروا بوهم بسوء لدرجة ان البنات كانوا وين ينشدهم حد عنه يشكروا فيه فشكر يخلي ناس تشك في اللي تشوف فيه بعيونها
مرات كان نشدوهم شن تغديتوا..يقولوا حوت..ومرة دجاج محمر..ومرة بازين بالوطني..شن فطرتوا..يقعدوا يعدوا في انواع واصناف الفطور
لاعمرهم قبلوا هبه من حد..ولاصدقه..كانوا قمة فالعفه..
صبروا وتحملوا لعند مارب العالمين رحمهم وبلي بوهم بمرض فرئتيه..بالك خلوه يعاني في المرض بروحه!بالعكس
عانوه هما معاناه ينضرب بيها المثل وع حياة عينه تزوج ولده الأوسط تزوج وجاب ولد سماه ع اسمه
ومع ذلك ماتغير في جمعه شي قاعد فظ غليظ القلب سليط اللسان لأخر لحظات عمره لين مات ماشافوه منه نظره حن ولاسمعوا منه كلمه طيبه
عاملوه هالمعامله لأن امهم ربتهم صح وكان تصبرفيهم معاها وديما توصي فيهم ع البر ديما كانوا يسمعوا منها"تلقوه عند ربي..تلقوه في صغاركم بعدين"
لكن قلوبهم مافيهاش ليه مثقال ذره من الحب ولعند هاللحظه مش قادرين يسامحوه..
▪▪▪▪
◇هو هدا اللي تكلمت عنه مره يعني بعدين قدام رب العالمين حيحاسبوه ع كل شي داره فيهم..اني بعد  سمعت بقصة اب خالد مش عارف علاش حسيت روحي نشبهله حتى ولو شويه بصدق لما حسيت هالإحساس كرهت نفسي هههه..ايه يعني هو مبالغه اني مش زيه بس فيا شي ولو شويه منه..
ايه وع فكره قصة اب خالد ماكانش يعرف بيها حد الا ناس كانت تسكن في المنطقه منهم اللي وافاه الأجل ومنهم اللي انتقل لمكان تاني..يعني حتى صغاره ومرته ماكانوش يعرفوا..ايه والله ماكانوش يعرفوا هما خالد وخوته تعودوا يكتموا اسرارهم ويخفوا الجانب المظلم من حياتهم عن عيون كل الناس اللي ماتعرفاش حتى اقرب الناس ليهم...
اااه...المهم..بعيد عن كل المعمعه اللي صارت..اني كنت بعيد تماما ومانندري ع شي..
بعد وصلت للبلد الأوروبي اللي فيه المؤتمر بساعه مشيت للندوة المقامه ع هامش هالمؤتمر واللي اني كنت ضمن ضيوفها..
كنت الدكتور العربي الوحيد فيها..ووفقني الله وتناقشت وجاوبت ع الأسئله بثقة اجابات شافيه وكافيه وتكلمت عن وضع الصحه وعن الخطط اللي راسمها في عقلي لما سألوني لو كنت وزير الصحه في ليبيا شن دير..
والندوة غطوها القنوات الإعلاميه العربيه والأجنبيه..
وبعد تمت دارت معاي احدى المحطات الغربيه لقاء ع الواقف..هههه...انسألت وجاوبت وكنت جدا موفق في إجاباتي..
هنوني زملائي اللي كانوا حاضرين وجتني موجة تعارف من هلبه اطباء اجانب وعرب..
امم..شعوري هداكا الوقت كان لايوصف كنت جدا فخور بنفسي وفرحان باللي وصلتله..كنت بطل بمعنى الكلمه في مهنتي..مجالي..محيط عملي..وكنت نحساب ان هدا هو النجاح اللي لازم يعيش ع خاطره البني آدم بش يحققه..
ماكنتش عارف ان البني آدم اللي في حياة عيلته وبين صغاره مجرد كومبارس...يقعد بني آدم فاشل مهما حقق من انجازات...
▪▪▪▪
•••••°°°°°•••••°°°°°°•••••
الساعه السابعه مساءا..
واقفه حدا باب الحوش تتكلم بالتليفون..
دانيه:لالا! علاش!!؟
صاحبتها:خلاص المراة بتجيب معاش تقدر تجي..
دانيه بضيق:خسارة والله كانت احسن ابله حببتنا في الفيزياء تو اكيد بيجيبولنا وحده تكرهنا فيها..
صاحبتها؛ابلة سهام قالت بيجي في مكاني استاذ اسمه جمعه..
دانيه:سماه جمعه!! وووك علينا ووك بينضم لطاكم الشيابين اللي يقروا فينا فالرياضيات والإنجليزي وكرهونا فيهم..
صاحبتها:شكله هكي..خلاص اصلا العام ماقعد منه كان شهر ونص نتحملوهم كيف مانتحملوهم وخلاص..
دانيه تنهدت وقالت:ايه هو هدا..خلاص مالا مانعطلش عليك هوبا..
صاحبتها:جايه غدوة ولا؟
دانيه:ايه ايه جايه ان شاء الله..
صاحبتها:باهي كويس.. مالا سلامات توا..
دانيه:سلام..وصكرت..
شبحت بعدها للباب لما سمعت صوت اطقطيق كعب ع الدروج..مطت شواربها بإزدراء وقالت..احني ملبسنا كنادر جداي وهي مخليها اطقطق بالكعب..خزي..
بعدين مشت لدارها وهي متعفلقه..
••••°°°°
وصلوا بوها ومرته لفم العماره..
ماجده:اها كيف ماوعدتني مجوده تدهور بيا بعدين تعشيني ولا؟
عبدالمجيد"بتفلس بيا من اول يوم"..
فنصت فيه وقالت:قصدك انت قاعد تفكر!؟
عبدالمجيد:نفكر في شني ياعبمبرة بس! اني عطيتك كلمه وكلمتي زي السيف..
ضحكت وقالت:سلم راجلي اللي كلمته كلمه..وشكلين مابيحكي..ومشت للسيارة وهو وراها شاد اعصابه بالسيف..
•••••°°°°•••••
في حوش هيثم الكاتب..
دار زياد..
كان مقعمز ع السرير وامه تغطي فيه..
زياد:مش لازم الجو سخون شويه اليوم..
اسيمه: باهي تو نحوله لكن بنخليه حداك..
حولت الغطا وحطاته جنبه..بعدين قالت:تبي حاجه تانيه؟
زياد ابتسم وقال:كتاب الاحصاء بس..
ضحكت بعدين مشت وين مافي طاولة القرايه كان محطوط عليها كتاباته قعدت ادور لين طلعت كتاب الإحصاء وجاته بيه..
هو خداه وقال:خلاص يام بري ارتاحي..
هزت راسها وقالت؛تبي حاجه نادي ولا رن عليا..
زياد هز راسه وهو مبتسم..
هي دارتله حركه بأنفها..هو ضحك..
ضحكت حتى هي  بعدين لفت ومشت طلعت من حداه وخلت الباب المفتوح..
وهي طالعه سمعت صوت نسيبه تنادي فيها وتقول..
"تعالي شوفي هيثم ياأسيمه"
ابتسمت بلهفه ومشت بسرعه للصاله..
اما زياد ابتسم بتهكم وفتح كتابه وبدي يقرا..
🌿وصلت اسيمه في الصاله لقت نسيبه وسارة والبنات الصغار يتفرجوا ع لقاء هيثم في التلفزيون..
هي لما شافاته عيونها لمعوا بالحب والإعجاب قعدت تشبحله وتسمع فيه شن يقول وهي فرحانه وفخورة بيه..
واخته كذلك..والبنات الصغيرات..
لكن سارة كانت تتفرج عليه ومش حاسه باللي هما حاسين بيه وتفكر لو سمع باللي صار مع زياد شن حتكون ردة فعله..
••••°°°•••••
في المستشفى..
واقفين ولاد خالد في بداية ممر المكان اللي فيه بوهم..
يتفرجوا ع مقطع فيديو في هاتف رفيق اللي كان واقف في نصهم..
رفيق:عليك شعب تقول اول عركه تصير فالبلاد!
خليل مط شواربه ع جنب بملل وقال:ناس فاضيه..
جهاد التفت وقعد يشوف لعمامه وعماته اللي كانوا واقفين يهدرزوا ع أمه بعدين شبح لخوته وقال:كان يحبوه هكي علاش قطعوه! خوهم خوهم مفروض شن ماداير يقعد خوهم مايخلوشي..
خليل التفت وقعد يشوفلهم بحده..
🌾قصدك اللي صار معاه مالاش علاقه بخدمته هديكا؟
عفاف هزت راسها وقالت:لا ياعبدالله..
عبدالله"اخ خالد الأوسط":باهي قوليلي ولادك قاعدين ماشين فطريقه
هزت راسها وع وجهها بادية ملامح الحسره
وحده من خواته قالت:خسارة وليدات زي الفرح والسعد ضيعهم معاه..حتى قرايتهم خلوها..
قعدت عفاف ساكته مش عارفه بشن ترد ولاشن تقول..
علي:خلاص..خلاص..توا..المهم حاله باهي..وان شاء الله ربي يهديهم
عبدالله تنهد وقال:ان شاء الله..شبح لخوته وقال..هيا..
هزت اخته راسها بعدين سلمت ع عفاف وقالت:كان تبي حاجه كلميني..
عفاف:تسلمي بارك الله فيك..
عبدالله:لما يفيق بلغونا..
عفاف:إن شاء الله..
عبدالله:هي السلام عليكم..ومشي..
واخته قالت:بالسلامه توا..
عفاف:بالسلامه..
اختهم:هيا علي..
علي:بالسلامه...
عفاف ابتسمت وقالت:بالسلامه..
ومشوا مع بعض وعفاف تشبحلهم كيف فاتوا من حدا الأولاد اللي كانوا متجاهلينهم تماما..
مشتلهم وهي معصبه وصلت فيهم وقالت بحده:شن قلة الربايه متاعكم هادي!؟
التلاته قلبوا وجوههم عن امهم..
عفاف بغضب:تجيبوا في الدوة ليا ولبوكم بتصرفاتكم هادي بوكم بروحه لو يعرف باللي درتوه مع عمامكم تشوفوا شن يدير فيكم..
خليل تنهد بضيق وشبح لأمه وقال:هي كام بتروحي يام غدوة ان شاء الله لمايفيق بوي نجيبك..
عفاف عقدت حواجبها وقالت:مانبيش نجي..ومشت...
هما قعدوا يشبحولها بضيق بعدين خليل مشي وراها...
جهاد:اشبح شن قالولها وقلبوها عليه..
رفيق:امك قلبها مش حيصفى ناحية بوك بكلامهم ومن غيره..
🌿ايه مش حيصفى مادام خالد مصر يقعد ماشي في نفس الطريق ورافعكم معاه..
اللي عفاف ماتعرفاش إن هالطريق الرجعه منها شبه مستحيله خالد لو يبي يولي حيكلفه رجوعه ثمن غالي هلبه..الثمن هدا هو ارواحهم ارواح كل الناس اللي يحبها 🌿
••••°°°°••••°°°°••••
خش لغرفته في الفندق وهو يشوف لتليفونه..
هيثم وهو مبتسم ورافع حواجبه:رسايل ومكالمات وحال...
عقد حواحبه بعدين قال..لكن غريبه اسيمه مااتصلتش بكل!
صكر الباب ورفع حواجبه..
بعدين مشي للدار..خشلها ومشي قعمز ع السرير بش يتصل بيها..
قبل يتصل جاته رسالة ماسنجر مط شواربه بملل وقال:منو تاني..
شافها لقاها مقطع فيديو جاي من وحده من صفحات الاخبار العامه اللي متابعها..
بالعاده الصفحه هادي تبعت في فيديوهات فيها اهم اخبرها وهو مايدورش فيها هلبه..
جاي بيرفع الستار متاع الشاشه بالغلط ضغط ع الرساله طلعت قدامه..
مكتوب في الخبر مشاجره واصابات في حي*****
عقد حواجبه بخوف وفتح الفيديو...
ضيق عيونه وهو يتفرج...
بعدين بدوا يتوسعوا شويه شويه وهو يشوف لعند ماشاف الطعنه اللي جت في رجل ولده..
وهني وقف الفيديو..
ناض وقف وهو يرجف من الخوف..
بلع ريقه ومسح بيده اليسار ع شعره ووخره للخلف بعنف..
وهو يتصل بمرته...
••••••°°°°°
اللي يسمع يقول اول عركه تصير فيك ياليبيا!
اسيمه وهي تشوف للتعليقات بتوتر:هلبه ناس عرفوا زياد..
نسيبه:ويعرفوه وين المشكله لاداير عيب ولاحرام بالعكس الولد تصرف برجوليه وحاما ع عرضه..
اسيمه شبحتلها وقالت:هيثم خوك لو يعرف يانوسه لو يشوف الفيديو شن يدير!؟
ارتسمت ع وجه نسيبة ملامح القلق وقعدت ساكته..
فجأة..
رن تليفون أسيمه..
غمضت عيونها بشده وقالت:عرف..فتحتهم وهي تقول..شافه..
ناضت فتحت الخط وردت:ايوه هيثم..
هيثم:ايه يعني امتى كنتي ناويه تخبريني ياأبله؟
اسيمه غمضت عيونها وبلعت ريقها بعدين قالت:هيثم..هيثم اهدى شويه..
هيثم بإبنفعال؛كيف تبيني نهدا قولي!ولدي خاش عركه مع صياع وطاعنينه والله اعلم شن صار فيه تاني واني اخر من يعلم البلاد كلها عرفت كلها واني..بوه..اخر من يعلم!
اسيمه فتحت عيونها وقالت؛هيثم زياد مافيه شي جرح سطحي خيطوه و.....
قاطعها وهو يقول:غدوة مروح وبروحي نعرف كل شي..
وصكر عليها..
هي ضمت شفايفها لداخل بأسف..بعدين حولت التليفون ونزلاته..
نسيبه جتها وقالت بقلق:شن قالك؟
اسيمه شبحتلها وقالت وهي تحرك فيدها اللي شاده بيها التليفون:غدوة مروح..ونزلت يدها بعدين لفت ومشت لدار النوم وهي مضايقه..
نسيبه قعدت معاها بعيونها لين اختفت..
بعدين غيرت عيونها عنها وهي مضايقه ومشت للدروج بش تركب لدارها...
🌾في هالوقت..
خشت سيارة خليل الزنقه..
طول الطريق امه كانت قالبه وجهها عنه ماتبيش تشبحله ولاتكلمه..وهو كان مضايق هلبه لإنها واخده ع خاطرها منهم..
وصل بيها للحوش درس قدامه..
هي نزلت طول..وهو نزل معاها فتحلها الباب بالمفتاح..
خشت طول بدون ماتقوله كلمه..
هو تنهد بعدين صكر الباب وولى للسيارة...
🌿اما هي بعد خشت داخل..
طقت ع الباب الدخلاني فتحتلها اختها سماح وكانت باينه ع وجهها اللهفه وهي تقول:فاق ولا مازال!؟
حولت عفاف الكندره من رجليها وقالت بنبرة حاده؛غدوة يفيق..
ومشت خشت داخل وسماح ماشيه وراها وهي تسأل:حالته مش خطيره ولا؟
عفاف:تس تس..
ع طلعة تهاني من دارها لما شافت امها قالت:روحتي يام..
حولت عفاف وشاحها وهي تقول:ماتخافيش بنتي بوك حاله باهي..
تهاني هزت راسها وهي تشوف لملامح وجه امها..
عفاف:بنمشي نرقد..
ومشت طول لدار النوم..
غيرت تهاني عيونها عن امها وشبحت لخالتها من فوق لتحت وقالت:بتباتي هني؟
رفعت سماح حاجبها وقالت:خالك بلعيد بيجيني..
تهاني:امم..بعدين مشت خشت دارها وصكرت الباب..
سماح بهمس:وقحه...
ومشت لوسط الحوش وهي تقول:زعمه خالد امتى يفيق غدوة؟ تنهدت وقالت..ياريت نقدر نمشي نشوفه بس..
وخشت لوسط الحوش..
••••°°°°••••°°°°••••°°°°••••
اليوم التالي..
الساعه الثامنه إلاربع صباحا..
لبسوا كنادرهم هما الزوز..
بعدين الكبيره فتحت الباب وقالت:طلعنا يام..
جاهم صوت امهم من الكوجينه وهي تقول
"مربوحه بنياتي"..
طلعوا الزوز وصكرت الكبيرة الباب..
ومشوا للدروج ونزلوا..
رتاج :ياربي مانلقى المصيبه هداكا في وجهي ع صبح ربي..
دانيه بضحكه:من غير كلام..تلقيه فاتح المحل من السبعه وواقف قدامه يراجي..
رتاج:يعع..صبح ياربي صبح..
ودانيه تضحك..
وصلوا فم العمارة وطلعوا منها..
اول مالفوا يمين شافوا حسام واقف في الطريق وواضح انه يراجي..
رتاج:عطيك مايقرفك كيف ماقارفني ومكرهني فعيشتي..
ودانيه شاده ضحكتها بالسيف..
قعدوا يمشوا لين فاتوا من حداه قال:صباح الورد..
دانيه بس ردت؛صباح الخير..
وكملوا طريقهم وحسام معاهم بعيونه وقلبه واجعه من عدم تجاوب رتاج معاه عارفها ماتحباش وهو يحاول جهده بش يخليها تلفتله لكن
🌿كل شي بالسيف إلا حبني يابنادم🌿
وصلوا في بداية الشارع..
كان باص دانيه يراجي فيها..
اما رتاج كملت ع رجليها لباص الجامعه اللي مدرس بعيد شويه..
🌾دانيه اول ماركبت الباص قالت:صباح الخير صبايا..
كلهم ردوا عليها..
وهي مشت قعمزت في اخر الباص سلمت ع صاحبتها هبه بالخد..
بعدين قالت:طلعي العده طلعي..
طلعت هبه من شنطته كريمة اساس وبودرة وقلم كحل ومسكرة..
ودانيه طلعت وشاح ابيض من الشنطه..
حول الشاربه اللي كانت لابسه تحتها طاقيه ادرق شعرها..
بعد حولتها..بدت تحط في المكياج..
هبه؛قريتي لأختبار الكيميا؟
دانيه وهي توزع في الكريمه:ايه صميتها صمان..
هبه:عارفه شغلك دنونه ولا؟
دانيه ضحكت وقالت:باهي يامصلحجيه..
ضحكت هبه وقالت:خزي..
وكملت دانيه حطان مكياج بعدين لبست الوشاح..
وخدت الشاربه طبقتها وحطتها في الشنطه..بعدين طلعت من الجيب البراني كندره حطتها لوطا ورمت التانيه..
طبست خدتها ودستها وقعدت تلبس في الكندره التانيه..
بعد كملت قالت لهبه:الاولى فيزيا ولا؟
هبه:ايه..
دانيه:والله خسارة ابله سهام خسارة كبيره..
هبه:تعرفي امس سلمنا عليها وحني نبكوا لين بكيناها معانا..
دانيه بضحكه؛حيي بكيتوا! خسااره فاتني..
هبه بضحكه:ماعندكش الروح مع النكد انتي..
دانيه:هههه..تخصص..
🌾وكملوا هدرزتهم اللي يقصروا فيها الطريق للمدرسه..
•••°°°°••••°°°°••••
في باص تاني متجه لمدرسة تانيه..
سارة بضيق؛ماهناك ماقريت..
تهاني:اني عكسك لهيت روحي بالقرايه..
سارة:بتمشيله بوك؟
تهاني:ايه بيجي بيروح بيا رفيق بعدين بيرفعني غادي طول..
سارة:اني بابا بعد سمع باللي صار لزياد قطع سفره وبيروح اليوم..
تهاني:ان شاء الله مايديرش مشكله لخوك..
سارة ابتسمت تهكما وقالت؛زي مانشبح فيك حيمسح بزياد الوطا...
تهاني ضمت شواربها لداخل بأسف..وساره سكتت وهي تفكر بقلق..
••••°°°°••••°°°°•••
الساعه الثامنه والنصف..
في احدي فصول طالبات الصف الأول ثانوي...
في الصفه الوسطيه المقعد التاني..
دانيه:خلاص كريمه ناخدهم منك اليوم ؟
كريمه زميلتها في المقعد:ايه ماعندكش مشكله..
وحده من بنات صفة الروشن قالت بصوت عالي:شكله يابنات الاستاذ مش جاينا اليوم..
دانيه:احسن مايدير يختمنا هالأسبوع ع خير مش ناقص اليوم هو..رياضيات ع انجليزي ع اختبار كيميا ع تسميع الدين...
وحده من البنات قالت:غير عديتهم توا بطني وراسي وجعوني مع بعض..
ضحكوا البنات..
بعدين وحده تانيه قالت:توا الساعه تمانيه ونص وخمسه شكله مش جاي حد..دندونه..
دانيه:امم..
البنيه:سمعينا حاجه حلوة..
البنات باصوات متقطعه:ايه دنون..غني..نبوا ستر الله باقي..
ضحكت وقالت:باهي غير تطلع هبه تشوف الوضع..
ضحكت هبه وناضت..مشت للباب فتحاته وطلعت..
شويه ولت وهي تقول:الامن مستتب..وصكرت الباب..
البنات:هي ابدي دانيه..هيا دنون..
دانيه وهي مبتسمه:هيا هي..
وبدت تغني..
ستر الله باقي ديري عزم..ستر الله باقي ديري عزم..
ستر الله باقي يانا يانا ديري عزم..
ستر الله باقي وبعد فراق سيورك تلاقي.
ديري عزم ستر الله باقي يانا يانا ديري عزم..
•••••°°°°
اسف جدا ع التأخير مرة تانيه..
المديره؛مافيش مشكله استاذ جمعه...الفصل اللي عندك فيه حصه توا الدور التاني..تلف ايمين تكمل طول بعدين تلف يمين تاني اول فصل..
ابتسم جمعه وقال:تمام...شكرا استاذه..
المديره:العفو..
ومشي جمعه ركب..والمديره تشبحله لما اختفي من قدام عيونها قالت..ياما جاينا وجع وراس من وراه...
ولفت ومشت لحجرتها..
🌾اما هو..
وصل فوق ..خش الممر اللي ع يمينه..
وقعد يمشي طول لين وصل في اخره..خش يمين مره شاف الفصل ضيق عيونه ومشاله..
وين وصل في الباب سمع..
في باب المدينه ريت الزين..في باب المدينه ريت الزين
في باب المدينه يانا يانا ريت الزين..
في باب المدينه طفل صغير شاورلي بعينه..
جمعه بهمس قال تهكما:ياعيني..
طق الباب طقتين..
سكتت دانيه وشبحت للباب هي وباقي بنات فصلها..
بعدين..
انفتح الباب وخش استاذ جمعه وملامح وجهه كانت جاده جدا قال بصوت فيه شي من الصرامه؛السلام عليكم..
والبنات اللي جاهم جاهم..
قعدوا مسهمات فيه وخلاص..
هو حط شنطته وتليفونه ع الطاوله بعدين حط ايديه فجيوب سرواله وشبحلهم برفعة حاجب وقال:شن ماتعرفوش تردوا السلام!؟
البنات استاقظوا لرواحهم وردوا بصوت واحد:وعليكم السلام..
هز راسه وقال:امم..تمام..خدي نفس بعدين قال..اول شي لازم نعرف بنفسي..جمعه عبدالله..استاذ فيزيا جيت بديل عن الأبله سهام التايب..طبعا بنكمل معاكم باقي العام والعام الجاي لاني اساسا ندرس في فيزيا لطلاب سنه تاني ثانوي..
رفع سبابته فوق وهو يقول قبل كل شي لازم تعرفوا..نزل يده وقال..التسهويك الزايد مانحباش..اللي تبي تقرا نحطها ع راسي من فوق اللي جايه تتسهوك تتحمل مايجيها..
مرر نظره عليهم وهو يحرك في سبابته من اليمين لليسار عليهم..ردوا بالكم اني نعرف نحذر مرة وحده بس..نزل يده ردها لجيبه وهويقول برفعة حاجب..وبعدين قد اعذر..من أنذر..مفهوم؟
البنات هزوا روسهم وقالوا وهما يشبحوله بنظرات ريبه ممزوجه بالخوف :مفهوم..ايه..
هز راسه وقال:باهي توا وحده فيكم تعطيني كراسة الحصة..نبي كراسه طالبه مش مهزله..
شبحوا البنات لدانيه..
دانيه بلعت ريقها وقالت:احمم..اهيا استاذ..خدت كراستها ومدتها..
قدملها وهو يشوف للكراسه..
وصل فيها خداها منها ومشي للطاوله متاعه وقعد واقف..
والبنات مسحورات فيه..
في شخصيته..في طول وعرضه وأناقته..ووسامته...
فتح كراسة دانيه وهو عاقد حواجبه وقعد يشوف فيها..
وهي تشبحله بنظرات اعجاب وعيونها تلمع..
هو قعد يقلب في صفحات الكراسه..بعدين قام عيونه وشبحلها..
هي رمشت عيونها ونزلتهم..
رخي حواجبه وضيق عيونه بعدين رجع يشوف للكراسه..
كريمه بهمس:عجباته كراستك..
دانيه شدت ضحكتها وهي تعض ع شاربها..
هو قال؛اممم تمام...
ومشي ولى لدانيه عطاها الكراسه بدون مايشبحلها..
خدتها..وهو مشي ولى لمكانه وقال:لازم تعرفوا ان عندي اسلوب خاص في التدريس ونبيكم تاخدوا عليه من هاللحظه..ركزوا معاي...
وبدي جمعه يتكلم ع اسلوبه..
والبنات مركزات معاه لين داخيات..
ودانيه قعدت تشوفله وهي تتأمل فيه وفحركاته واسلوبه في الكلام..
اول مرة تشوف راجل فيه كل المواصفات اللي تحلم بيهم كل بنت..
ودانيه بنيه في سن المراهقه وهي تشوف لجمعه حست ان الدنيا كلها معاش فيها حد غيره هو..
سلبلها قلبها الفتي سلب...💓
🌿بس عاد يادانيه ردي بالك تنسي انتي متسميه ع نور الدين خو حسام اللي متسميه عليه اختك..هكي بوكم يبي ومافي حد يقدر يقول لبوكم لا🌿

...يتبع....