قبل ٢٠٠٣ بشوية صارت انتخابات اذا تذكرون … اني بذاك الوكت جنت طالب اعدادية زراعة بغداد المهنية الي بالفضيلية … بوقتها المدارس توقفت علمود الانتخابات و المدارس صارت عبارة عن مراكز انتخابية … و كل منطقة تنتخب بمنطقتها … اني و هيثم الرفش رحنا ننتخب .. هالحجي بالامين الثانية (النواب ضباط) منطقتي .. و تحديدا الانتخاب صار بمدرسة (البويب الي بظهر الفرقة الحزبية) … رحنا اني و هيثم .. بالباب جانو واكفين ثنين حزبية .. نعرفهم حق المعرفة بس نخاف منهم لان قلمهم حاد كلش .. ولد منطقتنا همه بس منلتقي بيهم نخاف لا تطلع حجاية و نتغلف ..
عالعموم .. الولد ثنينهم واكفين بالباب مال مدرسة و شايلين (دنبوس صغير) شنو شغلتهم تتوقعون ؟؟؟
يجكون جكه صغير بالاصبع مال الشخص الجاي ينتخب حتى يطلع دم و يخلي بصمة الاصبع المجكوك بالورقة مال الانتخاب .. حتى تصير السالفة احنا انتخبنا بالدم الرئيس .. من الاخير جانو لوكية درجة ذهبية للحزب .. راحت سنين و جتي سنين تبدل النظام .. و طبعا اني سافرت .. بس اتصالي مستمر بهيثم الرفش .. قبل يومين خابرني هيثم جان يصيح على ابنه علاوي (علاوي عمره ١٦ سنة) كلتله شبيك تصيح .. كال هذا خبلني يريد يطلع مظاهرات و امه متخبله و حصرته مرتين و يطفر من الباب الورى لحد ماخلاني اني اروح و تدري بيا اني عندي ربو خوية و الدخان يخنكني بس شسويلة .. جبته يمنى جبته يسرى قافل ..
يكول بس احلى شي سالته لأبني علاوي انته ليش تريد تطلع مظاهرات ؟؟
كالي اريد وضع البلد يترتب و يصير براسه خير ههههه ضحكت اني كلتله لك انته غرفتك مترتبتها تريد ترتب وضع البلد … بس قنعني و خلاني انزل وياه و هاي هناك مكظيها لازم الخاولي و افتر بس مجلب بأيده لأن امه محلفتني ما اهد ايده
المهم ..
سألته عالمنطقة و على الناس و جبناها على الجكه مال الاصبع و ننتخب بالدم (لان الحجي جان كله مرتبط بالسياسة)
.. كلتله هيثم صدك ذولة الاثنين وين صفى بيهم الدهر اكيد طفرو لان كاتبين تقارير على نص اهل المنطقة ؟
كال انته والله بطران .. كلتله ليش .. كل خوية ذولة صارو احوال وي الحكومة و ضباط و سيارات و حمايات .. كلتله ياحكومة شبيك هيثم ؟؟
كال وداعة جهالي صارو بالدولة .. كلتله معقولة ؟؟
كال بهل البلد كلشي معقول حبي ليوثي و الي جان بوكت صدام لوكي مو جبيرة عليه يصير بهل الوكت لوكي .. اللوكية هواي خوية ويعرفون شلون يعيشون بهل البلد.. زين توقعو اذا هذولة الاثنين يسلموهم سلطه عالمتظاهرين راح يهمهم شي اذا ضربوهم طلق حي لو مسيل الدموع لو حتى كيمياوي ؟؟؟؟؟؟؟؟؟؟
اكيد ميهتمون اهم شي عدهم الكرسي الكاعدين عليه و هذولة مجرد سمجات صغار بنص الحيتان .. الحيتان الكبار المتحصنين بالمنطقة الخضراء و داير مدايرهم هالسمج الصغير … من الاخير اذا الضمير انعدم .. انعدمت الانسانية ..
و هاي مثل صغير من امثله هواي حاكمتنا اليوم و بيدهم حياتنا … الي طلعو اليوم مظاهرات طلعو علمود وطن دينباك و ينقتل .. يريدون يرتبوه على حجاية حبيبي علاوي .. يريدون يسوون براسه خير .. و احنا نعرف زين الاساليب الي تمارسها الدول اذا رادو يحرفون مجرى المظاهرات الحره .. هاي الدروب قديمة مال تلبسون كم واحد هدوم عادية و تصوروهم علساس بايكين غراض وهمه ربعكم و منكم وبيكم .. و هاي الدروب مال تخلون واحد ثنين بنص المتظاهرين يضربون طلقات علمود تعلكوها بين الجيش و المتظاهرين هم قديمة .. و اخاف عبالكم انتو اذكياء و تطبقون مالات داعش عالمتظاهرين و تدسون انغماسية بنصهم يشيلون عبارات طائفية لو صور لو يحركون لو يسرقون ترى المتظاهرين اكبر من ان يسوون هيج اشياء .. الي طلع يهدي روحه للوطن ما اتوقع تدني نفسه على شي .. الي عاف عائلته واهله في سبيل البلد ما اتوقع راح يأذي ممتلكات بلده .. وخلص اتمنى توصل الفكرة .. انتهى
