تكول : بابا ينسى المواعيد دائما … بس ماما ما تنسى … ذاكرتها زينه … جان بابا من يصير عنده موعد يدز الموعد على شكل رسالة لتلفون ماما … و ماما يوميا بليل تطلع المحادثه بينها و بين بابا حتى تشوف مواعيدة … هي جانت المنبه و سجل مواعيد بابا … و يوميا بليل قبل متنام تفوت للمحادثه الي بينها و بين بابا و تكله حبيبي عكب باجر عندك روحه لدكتور فلان … لو عندك روحه لفلان مكان … و ماتت حبيبة كلبي ماما …
بابا ورى وفاة ماما صار عنده النسيان ضعف … و كام ينسى هواي شغلات مواعيده بالدوام و مواعيده وي الدكاترة و مواعيد العلاج …
تعبت صحته و كلتله بابا الله يخليك مثل ما جنت تسوي وي ماما سوي وياي .. من تروح لدكتور دزلي على شكل رسالة الموعد الجاي … و اني اذكرك بي … بابا جان بحيله و يروح لدوامه عادي .. و يطلع و يطب وحده … بس ورى وفاة ماما تاذى كلش …
مره سألته ليش متتزوج بابا و جنت اتشاقى وياه .. عيونه دمعت كالي الله اذا خلق بشر ميخلق واحد يشبهه و اني اريد وحده نفس ماما بكل شي اكو منها ..
اذا لكيتي هسه اتزوجها …
و مرت ايام و بابا تعلم يدزلي المواعيد و اني هم بليل يوميا اطلع المحادثه و اشوف شنو مواعيده …
اخر موعد وصلني جان قبل اربع سنوات .. كاتبلي بي ..
حبيبة بابا يوم الاربعاء القادم عندي موعد حشوة دائمية مع الدكتور فلان الفلاني في الساعة الخامسة … بس ما راح بابا و ما سوى الحشوة ..
لان بابا جان عنده موعد ثاني و ما كالي عليه … عنده موعد وي ماما … و راح بابا هناااااك يم ماما .. ما كدر يصبر على فراكها اكثر من سنتين .. لحكها .. راحلها …
و عافني اني و اخوتي .. و هسه كل ما نفتح التلفون مال بابا لو ماما و نقرا المواعيد نبجي ..
و نكول شوكت موعدنا نلتقي و نلتم سوى ..
