أول مرة طلعت بيها وي ابوية الله يرحمه و يرحم والديكم جان عمري ١١ سنة … جنت كصير و الكرك جبير عليا كلش .. وكل ما الزم الكرك تفوت بيدي سلايات صغار .. اعوف الشغل و اروح ادور فيي .. جوى شجرة .. ورى حايط … اكعد بالكاع بس بالبداية اوخر الحصو الصغار الي بالكاع حتى من اكعد ما احس بشي جوايا … اكعد و ابقى اعصر بجف ايدي لحد ما اطلع الخشب الصغار الفايتات جوى .. شوية شوية ايدي صارت خشنة مثل ايد ابوية .. و كمت مثله ما احس بهل الشي … عظمي جان طري و بشغلي وي ابوية صرت قوي .. جسمي تعدل بدون نادي ولا تمرين .. و صرت فحل على كولتهم … عمري صار ١٥ سنة كمت اني ابني و ابوية يكعد يباوع عليا .. تعلمت عالحر مو مثل اول ايام جنت كل شوية اروح اجر الصوندة و اغسل جسمي واني لابس الهدوم .. والله العظيم مرات جنت انتبه على جسمي من اغسل نفسي بالهدوم احس الهدوم تبخر تبخير خفيف و اني واكف جوى الشمس …
المهم .. صرت قوي و كمت الزم شغل و اطلع بدون ابوية مرات .. ابوية جان فقير و يحترم كل الناس .. بس مع الاسف مرات الناس الي عدهم فلوس يتعامون وياه شوية بخشونه .. يعني الي يصيح والي ينطي اوامر بس علمود يبين روحه هو صاحب الشغل .. اني جانت هالشغلات تأذيني بس ما احجي كلشي بداخلي يبقى .. مرة سالت ابوية كلتله يابه انت صارلك هواي تشتغل بالبناء شعجب ما اخذت كاع و بنيتها احسن من الايجارات ؟
كال ومنو كالك ماعدنا كاع .. عدنا بس بغير منطقة و المنطقة الي بيها الكاع بعدها مابيها خدمات ومابيها بيوت هواي .. انتظر كم سنة حتى ابنيها بس شوية تنعرف و يمدولها خدمات .. و صدك والله صار عمري ٢٢ سنة و بدينا نبني الكاع بعد ما المنطقة صارت معروفة وبيها خدمات .. سوينا بيت يخبل .. وانتقلنا بي .. بس المنطقة الجديدة بعيدة عن منطقتنا القديمة .. و شغلتنا (يعني شغلة البناء) جانت عالمعارف .. بالمنطقة الجديدة ماعدنا معارف هواي و شغلنا شوية وكف .. بذاك الوكت تعرفت على ولد يشتغل بالديكورات .. هو دارس الشغلة دراسة .. مرة كالي تطلع وياي ..شافني سبع بالشغل كام يوميا يطلعني وياه .. بديت اتعلم الصنعة مالته و صرت احسن منه .. هو صار عنده غيرة بداخله وهالشي حسيته .. فد يوم طلعنا شغل .. هو راح يتغده واني جنت شبعان وبقيت بالمكان .. اشتغلت مثل ممطلوب منه .. اجه هوى كالي هاي شمسوي انته شلون من راسك تشتغل .. بس بالضبط اني سويت المطلوب .. من يومها عرفت هو بده يغار .. عفته و رحت اشتغلت وي واحد ثاني هم بالديكورات … حتى ما اكون منافق و اكول الولد الجديد الي اشتغلت وياه اجاني من السماء .. بصراحة عن طريقه جنت اعرفه .. صرت كلش زين بالشغلة و كمت اتفنن بالشغل .. لحد ما انفتحت علينا باب رزق حلوة .. اجاني ابو الشغل ساعة ١١ بليل .. كالي اجتنا شغلة بيها خوش فلوس .. كلتله وين .. كال ببيت بالكرادة .. كلتله شلون ؟ كال كرايبي رجال جبير يشتغل بشركة اهليه .. صاحب الشركة متزوج ثنين .. الصغيرة مكعدها بالكرادة .. و مدللها كلش … تريد تسوي ديكورات بالبيت وهو يريد واحد ثقة .. حاجي لكرايبنا هالحجي وهو كايله عليا وعليك .. كلتله يله .. و رحنا صدك للبيت البنية طلباتها هواي جانت .. واني كله صار ست و صار ست .. كملنا البيت و هيه فرحت كلش بشغلنا لان بالضبط مثل مرادته .. الرجال من شاف مرته هيج مكيفة انطانا فوك حقنا فلوس .. و من يومها البنية من كامو يجوها صديقاتها لو معارفها يسألوها على الي اشتغل الديكورات وهيه تكلهم واحد معارف زوجي .. و بدينا مرحلة جديدة بحياتنا .. كمنا نشتغل بس للبيوت التوب .. فتت بيت ضباط كبار و مسوولين بذاك الوكت و فتت بيوت ناس زناكين و تجار .. صيتي و سمعتي بالسوك قوية صارت و فتحنا مكتب ديكورات بالمنصور .. المكتب انعرف و سويت كروب جبت بي فنانين مال ديكورات و حتى راسمين شغلت وياي .. بس كله بالحب و الاسلوب الطيب .. احترم الكل .. ما حسست العمال الي يشتغلون وياي همه عمال ابد ..
الكل يحسني اخ مو صاحب عمل .. و بيوم من الايام تعرفت على ولد عن طريق الشغل .. جان متزوج جديد و راد ارتبله البيت و طلب مني اشتغله البيت بيدي … الولد ابوه تاجر جبير كلش و اسمه نار بالسوك وعنده علاقات بالدولة .. صار صديقي الولد كلش و ورى مخلصتله البيت كام يلتقي يمي بالمكتب .. اني بذيج الفترة جنت بس اشرف عالشغل .. يعني ما اخلي ايدي بالشغل بس اذا اكو اخطاء بالعيني و اغاتي افهم الي يشتغلون شلون يصححوها .. يعني مو اكعد اصيح بحجة هذا غلط وهاذا ميصير .. لا بالعكس … حبيبي اخوية هالشي غلط و لازم يتصحح .. هالشي جان يحبب العمال بيا اكثر و يخليهم يشتغلون من كلبهم .. المهم .. الولد فد يوم جان يمي بالمكتب وكالي رائد شنو رائيك عندي مشروع بي خوش فلوس واريدك شريك وياي .. كلتله خوية الشراكة دائما نهايتها محلوة واني مرتاح بهل الشغل .. كال دسمع اني وياك اصدقاء و اريد افيدك … كلتله كول .. كال اريد افتح محل مرطبات جبير وعندي واحد يستوردلنا اجهزة كلها من الخارج و انت تسويلنا الديكور و الفائدة زينة ومابي خسارة .. اقتنعت و خليت فلوس وياه و فتحنا المحل .. طبعا المحل جان كلش جبير و المنطقة مجان بيها محل مرطبات .. اول يوم من فتحنا مجانا .. حتى المحل ينعرف .. المنطقة كلها التمت يم المحل .. وراها الشغل كام ميوكف .. برى الكراسي مفولة بشرية .. والكادر جبناه شباب مرتبين و لبسناهم زي واحد … انشهرنا و الفلوس كامت تركض ركض بيدنا .. صديقي عاف المحل عليا وجانت عنده سفرة خارج العراق سياحة هو وزوجته ٣ اشهر .. اني مثل مكلت جنت اتعامل وي الي يشتغلون وياي بالحب والاحترام بس هو شوية متكبر وهالشي مجنت احبه بي .. الحاصل .. فد يوم جتي مرية جبيرة وياها ولد صغير .. وكفو بالباب و طلبو يحاجون ابو الملك .. جنت اني جوى اجاني واحد من الولد كالي اكو مرية تريدك .. طلعت و هيه كامت تحجيلي على وضعها .. تكول هذا ابن ابني … وابني توفى قبل فترة .. وهذا الجبير وعنده بعد ثنين اخوه.. بطلته من المدرسة حتى يشتغل و دورتله شغل بس كله جان صعب عليه لان جسمه دشوف بعينك صغير .. وكامت تبجي اني رأسا دمعت وياها وحضنت الولد كلتلها خلص يمه خلي يشتغل هنا ويانا … و شغلت الولد وياي بس كلتله تبقى تداوم مدرسة و من تكمل دوامك تجي هنا … و حسبتله راتب قوي كلش اقوى حتى من العمال الي يشتغلون … و مرات جنت اروح وياه لبيتهم اساعد بلي الله يقدرني عليه .. حبيبي بده شوية وجه يضحك بعكس اول يوم شفته .. و راحت ايام وجتي ايام رجع صديقي من السفر .. هالحجي الولد الصغير صارله تلث اشهر يمي .. المهم ..
صديقي استلم المحل وكام يجي العصريات و اني براسي شغلتين المكتب مال ديكورات و المحل مال مرطبات .. كلت لصديقي انته ابقى بالمحل فترة لان عندي كومة شغل متاخر بالمكتب … و رحت للمكتب كمت احاول ارتب كلشي .. بالمناسبة اني من ضمن الكادر الي يشتغلون وياي الولد الي اول مرة شغلني بالديكورات و جان يغار مني .. تصالحت وياه وجبته لان هو ايده هم ذهب … و بعد الولد الثاني هم الي كرايبه عرفنا على ابو بيت الكرادة .. يعني جان ماشي الشغل بس هم يحتاجوني .. الحاصل .. فد يوم اني بالمكتب وخابرني ولد من المحل مال مرطبات كالي يمعود استاذ فلان (قصدهم على شريكي) معصب و يغلط و يصيح و ترى احنا مو خدم عنده الله يخليك ارجع انته .. كلتلهم هسه جاي .. طرت طيران للمحل مال مرطبات لكيتهم وجوهم كلها ضايجه وهو كاعد يحجي بالتلفون الارضي .. و سالت على حمودي الولد الصغير لان مشفته .. كالو طرده .. كلتلهم شنووووو .. كالو طرده .. رحت فتت عليه سد التلفون و كلتله ليش خوية طردت حمودي ؟ كال يمعود مبهدل و مو مال شغل بعده صغير .. كلتله مو اني حجيتلك على وضعهم المادي .. كالي خوية الشغل شغل اني ممفتحها رعاية اجتماعية .. كلتله شوف .. العمال ضايجين من تعاملك وترى همه مو خدم .. كالي اكلك يروح نعال (مكرم القارئ) يجي الف نعال بمكانه .. اني من كال هيج كل الي جانو يصيحون على ابوية الله يرحمه قبل جوي بعيني .. و شكو ذكرى بالشغل جانت ماذيتني قبل حتى الوجع مال السلايات الي تفوت بيدي و حرارة الطاسة مال خبط من جنت اشيلها وانجوي جتي براسي .. صيحت بوجهه جان يرجع يصيح بوجهي .. متحملت جان اشيل الكرسي النايلون و خبزته بي .. طردني .. و تضاربنا اني وياه .. جوي العمال فكونا و هو راح ركب سيارته و شحطها قوي وطلع .. ماعبر اسبوع جان نفض كلشي بيناتنا .. بصراحة هو اكل حقي هواي .. طبعا هو دفعلي حصتي و كام يحاسبني عالفلس .. حتى راتب حمودي مال ٣ اشهر اخذه مني هههههه … اني هم وكلت وفوضت امري لله و رجعت لشغلي .. وخفت اتناطح وياه لان بصراحة يكدر يأذيني بكل سهولة … و جبت حمودي كمت اعلمة عالديكورات و جنت اني اروح اخذه بالسيارة و ارجعه بالسيارة وياي ورى منخلص شغل … وراحت سنين وجتي سنين وهسه اني الله موفقني و عندي مكتبين بمكان المكتب و كادر جبير عندي بس المكتب الثاني الجديد .. الي لازمه حمودي ههههههه .. حمودي صار رجال و ايده صارت ذهب و تخرج .. و طبعا اتزوجت و عندي اطفال ..بس جهالي مدللين .. جنت اتمنى واحد منهم يحب الشغل .. بس هاي ملتهين بالتلفونات و الابتوب من الصبح لليل .. و طبعا ما الومهم .. لان كل جيل ينولد بظروف غير ظروف الجيل القبله .. وهسه احمدلله واشكره على نعمته .. بالمناسبة .. شريكي القديم باع محل المرطبات لان خسر .. و حاشى لله ان تكون هاي شماته مني من اتذكر هالشي ..
بس السالفة ومابيها .. خسر لان معرف يتعامل وي الكادر و العمال .. العمال بشر حالهم حالك .. اذا ردت تنجح حتى لو عندك فلوس .. انجح بأحترام الي وياك و اكسب حبهم الك .. حتى يخافون على مالك والي يضرك يضرهم .. بس مو علمود والله عندك فلوس تدوس عالناس .. و تذكر تاليها مترتين .. تصعد تنزل تطير تاليها مترتين و قطعة قماش .. من الاخير .. الدنيا خلصانه و يابخته الي يحصل حب الناس بدون مصلحة ..
(تهوووون)
انتهى
