يا وجع تحجون عليه .. يا حزن تسولفون بي … من تكتبون على صفحاتكم بالانترنت عن الحب و عن التعب من الشغل و عن الارهاق .. يا ارهاق يا حبيب عافكم .. تعاوفتو ؟؟ راح لغيرج ؟؟
انت تعبت من الشغل لان مديرك متعبك ؟؟
انت ضايج لان فلوس ماكو ؟؟ انتي مضايقة نفسيتج لان شعرج خرب لونه بالغلط ؟؟
انت محبط و حزين لان سيارتك اندعمت ؟
تعالووووو اني احجيلكم عالاذية و القهر و التعب .. تعالو الله ينطيكم الصحة و ميحرمكم من الي انحرمت منه … تعالو اروح فدوة لروحكم الطيبة تعالو .. تعالو احجيلكم على البيا …
البيا بغيري هواي بس يخجلون يحجون او اصلا يجوز ميعرفون يعبرون ..
انتو مجربين تعيشون يومكم خجلانين حتى من دخلة المرافق ؟؟؟ احجو مجربين ؟؟ مجربين من اهلكم داير مدايركم وانتو تخجلون لان تكررت السالفة اكثر من مرة و تطلبون مساعدتهم حتى تدخلون للحمام ؟؟ مجربين انو جسمكم ينلزك بي كرسي متنقل و متكدرون تطلعون منا لهنا بدونه ؟؟؟ مجربين تقضون حاجتكم بنفس مكان كعدتكم احجووو مجربين …. مجربين تشوفون اصدقائكم (اللهم بلا حسد) مجربين تشوفون اصدقائكم الي من عمركم كلهم يرتبطون و يتزوجون و كبال عيونكم يصير عدهم اطفال وانتو مكانكم كاعدين .. وخلو الف خط تحت كلمة بمكانكم كاعدين .. لان اني بمكاني كاعد .. حتى السفرات و الطلعات كمت اخجل اروح وياهم من يسألوني ….
و اني اعرف همه يريدون يونسوني و يطلعوني وياهم .. من يسألوني تجي نروح سفرة لفلان مكان .. اطلع الف عذر … و اعذاري كلها جذب .. اعذاري كلها اوهام .. بس في سبيل ما اخجل من روحي لان اعرف بطلعتي وياهم راح يحيرون بيا .. كل شوية يتكابلون عليا ينزلوني من السيارة يكعدوني عالكرسي .. و لازم واحد بيهم يحير بيا بالدفع هناك … ليششششش اصلا اروح و ليششش اصلا اخرب طلعتهم .. ابقى بمكاني و ابقى اباوع عالحياطين الداير مدايري الي حفظتهم .. خلي احجيلكم الحايط الي على يساري شكو عليه .. عليه صورت سفينة تمشي ببحر و عليها ناس واكفة .. ناس واكفة و واحد بيها شايل مثل الناظور اسود .. واكف .. الله ينطي الصحة واكف مو مثلي ميكدر يوكف .. و الناظور الاسود مالته بالضبط سوادة بلون النايلونات السود الي عالستيل مال الكرسي مالتي … و بصف الصورة مال السفينة اكو صورة ثانية لحديقة جبيرة كلها خضار .. هاي الصورة كل ما اباوع عليها احفظ تفاصيلها اكثر واتمنى من اموت الله يحققلي حلمي وارجع اوكف بنفس هاي الحديقة الي بالصورة .. اريد اركض .. الله يخليكم اريد اركض .. اريد اجرب اركض واعرك و اوكف امسح العرك و ارجع اركض بس بالحديقة الي بالصورة … الحايط الي كبالي بي شباك جبير و البردة مالته سلايت .. ورى الشباك مال هالحايط اكو الحديقة مال بيتنا .. الي هوووووواي شافت دمعي و هووووواي سمعت صوتي المخلوط بالبجي … حالها حال الغرفة الي اني عايش بيها هم شافت دموعي … بس الحديقة اكثر لان اسمع بالحديقة صوت الناس التمشي برى بالشارع … و هالصوت يخبلني يموتني … مجربين تخافون من الحب .. لان نهايته حب من طرف واحد .. منووووو و وينها الي يطلعوها بالانترنت الي تقبل بواحد عنده شلل اطراف و ايده اليسرى بالكوى تتحرك … مو يطلعون بالصور وحدة متزوجه من واحد مثلي .. منو تقبل تعيش وي واحد يقضي حاجته بمكانه .. اخ الله .. من احجي هالشي مو تعتبرو عيب .. لان مو بيدي ياناس مو بيدي … هاي حياتي .. يوميا اطلب الف مرة من رب العالمين ياخذ روحي واخلص ..
اني اعرف اهلي خطية ممتعاجزين مني بس اني متعاجز من روحي والله .. كمت احس روحي ثكيل .. حتى مرات اخجل اخجل اكلهم اريد اسبح .. حاولت اسوي اشياء هواي لوحدي بس ماكدر .. والله ماكدر .. تدرون اني ما ادعي لروحي الله يطول عمري بس ادعي لأمي و لاخوتي الله ينطيهم صحة وعافية لان همه عافيتي و همه صحتي و همه كلشي اني اسوي .. اني بدونهم ابقى بمكاني .. بس بوجودهم اكل و اشرب و اسبح و ادخل حمام و اطلع شوية للحديقة .. الوجع البيا مكرر مو مرة و يروح .. مكرر الاف المرات .. وجع ميروح .. وجع ثابت .. وجع لازم اتأقلم بي .. تعالو احجيلكم عالنومة .. حتى النومه لازم اطلب مساعدة .. شايفين واحد ميكدر ينام اذا ميطلب مساعدة و يصيح اهله يشيلوه يخلوه بالسرير و يعدلوله المخدة .. و انتو ضايجين مو من حب ما انتهى على خير و مقهورين على سيارة اندعمت لو فلوس ماكو مووو .. الله ينطيكم الصحة و السلامة و الخير و الرزق ومخليكم تعيشون يوم واحد وانتو مكابلين كل تفاصيل الغرفة الي حفظتها و اجاوب على الموجود بيها اني و مغمض عيوني .. هسه شوية ملتهي اباوع بالتلفون و اكلب بالمواقع مال انترنت .. بس اتهرب .. هم اتهرب مرات .. بأصبعي بسرعة ارفع المقاطع .. اذا جانت مقاطع افلام حب لو علاقة حب .. اخاف اشوف بنية تحضن ولد .. لان ممجرب بنية تحضني .. ممجرب انحب و احب .. ممجرب اكعد وي بنية بمطعم و عيني بعينها وايدي بأيدها .. ممجرب اسمع كلمة احبك و اكول كلمة احبج … ممجرب امشي وي بنية و … دقيقة شلون امشي قصدي ممجرب بنية تدفعني .. كافي ماريد اتخيل والله ماريد .. هذا الشي الي يخليني اتهرب من هالمقاطع لان التخيل بالبداية يجيني حلو و بعدين اوصل مرحلة اطلع وارجع للغرفة .. ارجع للواقع .. ارجع للبجي و الخنكة مال كل يوم .. ارجع للروتين .. امي تجيبلي الاكل و تحاول تساعدني رغم ما اني ما احتاج مساعدة .. مرات من يجونا خطار ما اكل .. اكول لأهلي ممشتهي شي .. تعرفووووون ليش .. مو لان اني صدك ممشتهي اكل .. بس لان حتى ما اصيحهم وهمه بنص الكعدة وي الخطار واكلهم اريد اسوي حمام لو سويت حمام … كل هالتفاصيل اني كاعد امر عليها مرور الكرام لان الواقع اصعب من ان ينكتب بكل تفاصيله .. بس الي مجربه يعرف شقصد .. يحس بالاحرف .. تدك بداخله و تطلع الضامة عالناس … الناس يشوفونا حاله .. بس احتمال ميعرفون البينا و شنو تفاصيل يومنا المملة و المكررة و المخجلة و الكلها بجي…
اليوم عيد و ايامكم سعيدة ..
اخوتي كلهم طالعين بس امي باقية بالبيت علمود تداريني … اها نسيت اذكر شي .. اصعب شي من ضمن الصعوبات الي ما ذكرتها و الي كاعد اتخطاها هي صعوبة اهلك من يسوون جدولة للبقاء و للخروج .. لازم دائما يبقى واحد بالبيت علمودي .. مرات احس و اتخيل الي ديصير ورى الغرفة مالتي .. اتخيل اخوتي و حتى امي ملو مني .. و دائما يجيني هالاحساس لان هالشي يومي .. و كل ميجيني هالاحساس اسألهم .. تعبتكم مو .. يبوسوني و اكثر واحد يقهرني من اسأله هالسوال امي .. لان تبوسني و تبجي المسكينة .. واني رأسا اكلها داشاقى .. يجوز هو مجرد احساس و يجوز حقيقة .. لذلك ارجع و اطالب رب العالمين ان يسرع كلشي بجاه كل الاديان و كل الانبياء و كل الكتب السماوية .. ربي اخذ روحي لان الداير مدايري تعبو واني نفسي تعبت .. ربي عجل من موتي .. لان حياتي مالها معنى و مأذيتني و مأذية الداير مدايري .. و اخيرا .. اتمنى لكل واحد بيكم الصحة و السلامة .. لان الصحة تسوى الدنيا كلها .. و اتمنالكم عيد سعيد .. و اتمنى ايامكم كلها صحة و سلامة و رزق .. بس ادعولي .. ادعولي الله يعجل من روحتي من هالدنيا .. لان انتو دنيتكم جبيرة … بس اني دنيتي كلها عبارة عن .. الغرفة و الحديقة و الحمام … و الكرسي .. و تعب اهلي .. و التلفون الي بيدي هسه .. وبس .. ربي ساعدني واخذ روحي لان بقائي من عدمه واحد .. ربي اخذ روحي وخليني اجرب امشي فوك يمك … خليني احب .. خليني اركض واعرك ..
(الكرسي)
انتهى
