ابد ماكو يوم بحياتي جنت اتوقع راح اوصل لهيج مرحلة … عندي جانت احلام كومة .. و جنت احفر الكاع على كولة ابو المثل و اطلع شغل اليا … من عمر صغير بديت اشتغل .. من الاول متوسط .. اشتغل كهربائي مال سيارات و بعدين اشتغلت بمحل دراجات بحي اور .. جنا نبيع اكسسوارات مال دراجات وهم نصلحهن … جنت اطلع مصرفي .. و بصراحة احنا ناس على كد الحال .. يعني مو مترفين ماديا .. قررت اترك الدراسة و ابقى بالشغل … صف ثاني متوسط بطلت من الدراسة .. و التزمت بشغل و جان طالع مصرفي و حلوة العيشة … سنة ورى سنة كبرت … و اكيد حالي حال غيري لازم اتزوج .. بس كلت خلي اشوف غير شغل حتى اكدر ادبر مصاريف الزواج .. و اشتغلت شغل ثاني جان احسن من شغلة الاكسسوارات للدراجات … راتبها اقوى .. و قررت اتزوج … اتزوجت الحمدلله ببغداد و كدرت اخذ مشتمل صغيروني ايجار اكعد بي .. و الله رزقني بعلاوي … جنت مرتاح و يومي حلو .. يعني مصرف البيت و الايجار طالع و ابني كبال عيوني .. حلوة العيشة لهنا .. صارت مشاكل بالشغل و مجنت محسبلها حساب .. كامو يحاربوني بالشغلة لان رادو يجيبون واحد بمكاني صاحبهم … كامو يطلعون عيوب بالشغل مالتي حتى بس يطلعوني من الشغل .. و طلعوني .. بطلوني بليلة ويوم .. هم مفقدت الامل و كمت ادور شغل منا و منا حتى بس اعيش … هواي واعدوني على شغل و هواي كالولي تعال و ان شاء الله خير .. واروح و اجي بس ؟؟؟
ماكو شي … مخليت مكان و مخليت دائرة و مخليت معارف مطلبت منهم شغل .. والله مطلبت مساعدة مالية ولا مديت ايدي بيوم .. جنت بس اريد اشتغل و اعيش … و صدفة لكيت شغل بس مو ببغداد .. بسليمانية .. قبلت رأسا لان انسدت كل الابواب بوجهي … و اخذت زوجتي و علاوي و رحت لسليمانية .. اجرت مكان على كد الحال و طبعا شكو اثاث عندي قديم ببغداد بعته .. و كعدت بمكان بسيط كلش و اثاثه على كد الحال .. بس ميخالف المهم اعيش … وعشت .. كمت شوية شوية ارتب البيت .. مرة اخذلي طباخ زين من الراتب .. مرة اشتريلي تخم مستعمل .. يعني ارتب العيشة و الشي الي اشتري على كد الراتب … يعني احاول اساوي و ارتب المصرف بس المهم اعيش … و الحمدلله مشت السالفة … و عشت عادي .. و رتبت وضعي زين .. و اجاني يوسف … طرت من الفرح من اجاني يوسف .. بس .. يوسف حبيب كلبي عنده مشكلة .. اني متوقعت بيوم من الايام راح اطلب مساعدة من انسان .. ومن جنت اسمع اكو ناس توصل مرحلة اليأس جنت اضحك و خصوصا اني بعدني صغير و متعلم على الشغل من الصغر … يوسف حبيب كلبي ماعنده مقعد .. و كمت اراجع بي دكاترة يمنى و يسرى … يوميا اروح وياه لدكتور .. مرة لبغداد و مرة لكربلاء و مرة يكولولي علاجه مو هنا … ابني حاليا الخروج مالته (مكرم القارئ) من بطنه .. سويتله اكثر من عملية لحد الان … حالي تغير و حتى الضحكة راحت مني .. تعبت نفسيا و ماديا .. و هسه اني ماريد مساعدة مالية و لا بعمري طلبتها من انسان .. بس الي اريدة دكتور لو دكتورة يساعدني .. الوضع تعبني و شاهد الله لو مو الحال وصل لهل الحال بحياتي و بعمري ما اطلب هالشي … اريد بس يوسف يصير زين .. لان و الله والله بكل خروج يصير عنده و اشوف دموعة روحي تطلع من جسمي .. و الله لا يشوف انسان هالحال .. عمره اربع اشهر و حالته كاعد يوم ورى يوم تدهور .. وفوكاها يكولون الا يكبر يله نسويله حل .. زين معقولة ماكو حل .. معقولة راح يبقى هيج بهل الحال .. يعني ماعرف التمت عليا و صعبة من تلتلم عالبشر … كمت احس الابواب كلها انسدت بوجهي .. وهسه حاير بين الايجار و وقت دوامي و المصرف و علاج يوسف .. والله مرات اروح للدوام عيوني مغافية ساعة .. يعني اكون راجع من كربلاء و بنفس اليوم عندي دوام .. و اني اعتمادي كله و حياتي كلها معتمدة على دوامي .. اروح عين مغمضة و عين مفتوحة من التعب .. شسوي ؟؟؟
اني هسه مرايد شي بس دكتور او دكتورة تسويله حل ليوسف .. حتى لو واحد من الدولة يساعدني وزارة الصحة .. والله متوقعت بيوم من الايام راح اطلب هالطلب .. بس شسوي ابني هذا و روحي من الدنيا .. و الحمدلله على كل حال .. اخوكم حسين ابو علي و يوسف .. و هاي التقارير و هاي صورة يوسف .. و الله ينطيكم الصحة والعافية راح انشر صورة العمليات هم .. و اتمنى من اهل الخير يساعدوني لان خلص اعترف وصلت للمرحلة الي مجنت متوقع بيوم اوصلها ..
اليأس .
انتهى
اخواني و اخواتي بالصفحة … الي عنده معارف و يكدر يوصل موضوع يوسف ميقصر … و طبعا حسابة الشخصي و عنوانه عندي الولد .. و اتمنى من وجوهكم الطيبة تشوفولنه حل .. لان ابو علي اخوكم واكع بشده .. و الولد مطالب مساعدة مالية بس طالب يلكة حل ليوسف .. واتمنى (متقصرون)
انتهى
