بالثمانية و تسعين جان اكو مطعم صغير مال فلافل ... هالمطعم صغير لدرجة ميكدرون اكثر من ٣ اشخاص يفوتون بي سوى .. و علمود هالشي چنا نشتري من الشباك و ناكل وگفه .. طبعا ابو المطعم مخلي طاستين كبار وحده عمبه و وحده صاص و نخلي براحتنه .. المطعم كلش بسيط و بي بس ثنين يشتغلون (الاب و الابن) .. الاب مبين متقاعد من الوظيفة بس الابن حسب ما عرفنه هو طالب اكاديمية الفنون الجميلة الي بالوزيرية .. رسام .. چان راسم عالحايط مال بيتهم و عالحديده الي جوى الكزاز مال الواجهية للمحل .. راسم كابتن ماجد شايل لفه فلافل و راسم عبسي شايل فلفلاية صغيره بيده و راسم دوق فليد (دايسكي) شايل صمونه حجرية .. طبعا الموضوع جان كلش بسيط و المكان بشارع فرعي و منطقه شعبية .. و اذا شويه نتعب نفسنه و نمشي للشارع العام نلگه مطعمين كبار مال فلافل و گص .. بس هالمطعم الصغيروني كل جهال المنطقه و كل الشباب يروحوله عالرغم من قلة امكانيته ليش؟؟؟
يمكن واضح السبب .. اولا الدعاية البسيطة الي تبقى بالعقل لدرجة صار هالمطعم نيشان بسبب الرسومات مال دايسكي و عبسي و كابتن ماجد و ثانيا التعامل .. الرجل صاحب المحل و ابنه مو شغلتهم المطاعم بس بسبب قلة الحيلة فتحو هالشي حتى يسترزقون منه و كل حجيهم بسيط وي الناس .. الدعاية و اللسان الحلو هي الي تكبر مصدر رزقك و تجيبلك الناس حتى لو مشروعك صغير ..
يعني من الاخير مرات تسوي مشروع و ماعندك امكانية حتى تطوره بس ببساطتك و ببساطة امكانياتك و بأسلوبك الحلو شغلك يمشي و تنعرف خصوصا اذا انت همك الاول و الاخير هو رزقك وبس ..
و اخيرا اتمنى للجميع الصحة و السلامة و الرزق ..
