Worship Me, I Can Make You Rich (Myanmar Translation) U+Z (Complete)

Chapter 2 (U+Z)

သို့ပေမဲ့ အခုတော့ အခြားရွေးချယ်စရာလည်း ရှိမှမရှိပဲ။

သူက အလုပ်ပထမဆုံးတက်တဲ့နေ့မှာတင်ကို အလုပ်လစ်ပြီးပြီလေ။

သူဒီကနေ မကြာခင်ထွက်မသွားဘူးဆိုရင် မနက်ဖြန်လည်း ထပ်ပြီး အလုပ်လစ်သလို ဖြစ်ဦးမှာပဲ။

ကယ်တင်ရေးယာဉ်ငယ်လေးအတွင်းမှာ ဝမ်ရှောင်းယွင်ဟာ သူ့ရဲ့နေ့စဉ်မှတ်တမ်းကို အဆုံးသတ်လိုက်ပြီးနောက် လူငယ်လေးက အခုထိ အပြင်မှာရှိနေသေးတာကို တွေ့လိုက်ရတယ်။

သူက မှတ်စုတွေကို ဘေးမှာချလိုက်ပြီး အပြင်ကို ခုန်ထွက်လိုက်တယ်။

ဝမ်ရှောင်းယွင်က အသံဩဩနဲ့ ပြောလိုက်တယ်။ "မင်း မပြန်ဘူးလား"

ဒီနေရာမှာ နေတဲ့သူဆိုတော့ လူငယ်လေးမှာ ဒီကတစ်နေရာရာမှာ အိမ်တော့ရှိရမှာပဲ။

သူပြောပြီးတဲ့နောက်မှာ ဝမ်ရှောင်းယွင်ဟာ တစ်ဖက်လူက အများသုံးကြယ်စုဘာသာစကားကို နားမလည်ဘူးဆိုတာ ပြန်မှတ်မိသွားတယ်။ သူက ဟိုရှာဒီရှာလုပ်လိုက်ပြီးနောက် လူငယ်လေးရဲ့ ခြေထောက်ဘေးမှာ ချထားတဲ့ သူပေးထားတဲ့ရုပ်ပြစာအုပ်ကို တွေ့သွားတယ်။ သေချာပါတယ်။ ဒီလူငယ်လေးက စာအုပ်ကို မဖတ်ခဲ့ဘူး။

ဝမ်ရှောင်းယွင်က ရှေ့ကိုလှမ်းလိုက်ပြီး လမ်းညွှန်ရုပ်ပြစာအုပ်ကို ကောက်ယူလိုက်တယ်။

ကျွမ်းကျိုးက သေချာပေါက် နားမလည်နိုင်ဘူးပေါ့။ ဝမ်ရှောင်းယွင် ကယ်တင်ရေးယာဉ်ငယ်လေးကနေ ထွက်လာတာကို မြင်တော့ မသိစိတ်အရ ဝိညာဉ်ဆက်သွယ်ရေးလက်ဖွဲ့ကို သူ့အနောက်မှာ ဝှက်လိုက်တယ်။ ပြန်စဉ်းစားကြည့်လိုက်တော့ အပြင်လူတွေအတွက်ဆို ဝိညာဉ်ဆက်သွယ်ရေးလက်ဖွဲ့က သာမန်စာရွက်တစ်ရွက်နဲ့ပဲ တူနေမယ်ဆိုတာကို သတိရသွားတယ်။ လူသားတွေက အဆောင်လက်ဖွဲ့ပေါ်က ရေးထားတဲ့မန္တာန်တွေကို မမြင်နိုင်ဘူး။ အဲဒါနဲ့ ချက်ချင်း သက်သောင့်သက်သာပြန်ဖြစ်သွားပြီး ဝမ်ရှောင်းယွင်ကို နှစ်နှစ်ကာကာ ပြုံးပြလိုက်တယ်။ "ဟယ်လို"

သူတို့က တစ်ယောက်စကားတစ်ယောက် နားမလည်ကြပေမယ့် လူငယ်လေးရဲ့ တောက်ပနေတဲ့အပြုံးလေးက ဝမ်ရှောင်းယွင်ကို နောက်တစ်ကြိမ်ထပ်ကြည့်အောင် လုပ်လိုက်နိုင်သေးတယ်။