عشق لا قانوني

🎀 بارت 6 🎀

🚫 عشــــق لا قــانــونـــــي 🚫

⭐ بقلم لمياء الشادلي ⭐

     💄 البارت 6💄

زدحت عليها باب الدار وتكات عليه كتنهج بخوف

نادية وقفت قدامها عقدت حجبانها ونطقت باستفسار : اويلي مالك وجهك صفر

سهام : ناري هاد الحومة كتخلع

نادية : وقف عليك شي واحد ؟ شفتي شي حاجة؟

سهام : هوووف والو والو غير شفت شي وحدين كيدابزو

نادية : هادشي خاصك تولفيه هنا

سهام : هوووف نمشي نبدل حوايجي ونتغدا

نادية : سيري

تمشات قدامها دخلت لبيتهم المشترك هزات بيجامة من الصاك لبساتها وطوات الحوايج لاخرين

هزات التليفون شعلاتو مكانش حس شي ابيل زيرت على يديها ولاحتو

خرجات عند مها كانت حطات العشا كلست حداها وهزات فورشيط كتلعب بداك سباكيتي

نادية : مالك كتلعبي هكاك كولي راك بديتي ضعافي

سهام سهات في الطبسيل ونطقت بهدوء : عرفتي اماما

نادية : شنو

سهام : لو كان عندنا شي راجل في حياتنا كيبغينا ويقدرنا ميحكروناش ويديرو لينا هكا

نادية : انا ديما كنقولك متخليش اللي يضحك عليك ربيتك على القصوحية غير باش متكونيش بحالي وتعولي على راسك ومتقوليش هاد الهضرة

سهام نزلو دموعها بدون شعور ونطقت بحرقة : يا ريت لو كان معانا دبا كان غدي يدير المستحيل ويحمينا علاش دار هكا ومشى وخلانا

نادية : واش غدي تدابزي مع اللي خلقك ربي بغاه وداه الاعمار بيد الله مكتعرفيش شكون السابق

سهام : الدنيا حكارة اماما

نادية عنقاتها ونزلو معاها دموعها حاولت تواسي بنتها إلا أن قلبها طايب اكثر منها : متديريش هكا في راسك كوني غير في المستوى وكيفما بغى وراه فينما كان غدي يكون فرحان ليك

سهام : بعد المرات كنفكر نتبعو ونهني راسي من هاد الدل اللي كيدلونا وهاد الحكرة اللي كاينة في البشار

نادية نطقت معاتباها بسؤالها : وانا ؟ لمن تخليني ابنتي ؟ ماليا حتى حد من غيرك

سهام حطات يديها على ذقنها ونطقت ببكاء : نتي اللي مصبراني نتي اميمتي نتي اللي مخلياني ندير المستحيل باش نخليك فرحانة

نادية : كوني غير مرا وقادة وغدي نكون فرحانة متخليهمش يضحكو عليك وحافظي على شرفك متخليش اللي يسوا واللي ميسوا ينعت فيك

سهام تقرصت من كلامها دفعات الطبلة ووقفت متهربة من نظراتها : تصبحي على خير انمشي نعس

نادية : مزال مكليتي ؟

سهام : مفياش غير بالصحة

نادية : وسيري تنعسي اكبيدتي راك غدا قارية وقيلة بكري

سهام : لا غدا عندي خاوي

نادية :وخا سيري ترتاحي

🌄 أصبحنا وأصبح الملك لله 🌄

وقفت عند راسها حطات يديها كتحركها ونطقت بصوت عالي: سهااااام نوضي سهااااام نوضي تسخري ليا ابنتي

سهام حلات عينيها مخنزرة ونطقت مراشقاش ليها : شنو بغيتي أمي في هاد الصباح

نادية: نوضي ابنتي تقطع الما ومعرفتش واش على الحومة ولا غير علينا

سهام : وانا شنو محلي من الإعراب

نادية : شوفي واحد جارة سميتها خالتك فاطمة عرفتها غير البارح الله يعمرها دار قوليلها انا بنت نادية وسوليها واش عندهم هما الما ولا حتى هما بحالنا

سهام تنهدت بعصبية جمعت شعرها كعكة تمشات ناحية لافابو حاولت تحلو ناسية الما مقطوع

نادية: راه قلت ليك الما مقطوع

حركات راسها بالايجاب و هزات كلاكيطة ووقفات قدام الباب  : فين ساكنة هاد خالتي زمرة

نادية : كوني تحشمي ابنتي ها هي غير في الدار اللي لاصقة علينا

سهام حركت راسها بالايجاب وخرجات من الدار تمشات ثانية غير كاملة وودقت في بابها

سمعت صوت رجولي مبحوح متساءل عن الطارق

ما إن فتح الباب ووجه نظراتو ناحيتها طلع حاجبو ونطق :

⚠️ التعاليق داخل الرد ⚠️
❌ تشالنج نكملو 200 جادوغ لكل بارت ❌