🐺Fate 🐺 || JJK (COMPLETED)

රතු ඇස් 🐺

"මානි අප්පායෝ..? (ගොඩක් රිදෙනවද..?)"

යුන්මිගෙ තොල් වලින් සිහින් කෙඳිරුමක් විදිහට ඒ වචන පිට උනේ කෙල්ලටත් හොරා.. ඒත් එක්වරම යමක් සිහි උනා වගේ කෙල්ල තමන්ගෙම ඔලුවට පාරක් ගහ ගත්තෙ ටැක්සි ඩ්‍රයිවර් මේ සිදුවීම දිහා කිසිවක් හිතා ගත නොහැකිව පුදුමෙන් බලන් ඉන්න අතරතුරේදි.. තමන් අපේක්ෂාවෙන් බලන් හිටි කිසිවක් සිදු නොවුණු එක ගැන ටැක්සි රියදුරා හිටියෙ පුදුමෙන්.. විදේශීය උච්චාරණයක් සහිත මේ කොරියන් පෙනුම ඇති තරුණ කාන්තාව තම රථයට නැඟි මොහොතේ සිට තමන්ට පෙනෙන්න අත් දකින්න වෙන අමුතු සිදුවීම් නිසාවෙන් ඔහුගෙ මනස අවුල් ජාලාවක් වෙන ඒ තරම් වෙලා ගියේ නැහැ.. ගොරවමින් කොයිම මොහොතක හෝ තමා දෙස කඩා පනින්න සූදානමින් ඉන්නා වෘක රැලක් වෙත ගොස් දණ ගහගෙන ඒ මැද කිසිම බයක් සැකක් නොමැතිව පලපුරුදු කෙනෙක් මෙන් ඉන්නා මේ අමුතු සිදුවීම හීනයක් යැයි අමතක කොට දැමීමට රියදුරාට මේ මොහොතෙ අවශ්‍යව තිබුණා.. එහෙත් අවාසනාවකට මේ කිසිවක් සිහිනයක් නොවී සැබෑවක්ම වුණා..

තම අවටින් සිදු වෙන දේ තියා තමන්ගෙම මුවෙන් පිටවෙන දේවල් ගැනවත් හරි හමන් අවබොධයක් නොවුණු යුන්මි ආයෙම වතාවක් තම හිසට තට්ටුවක් දැම්මෙ තමන් මීට පෙර මොහොතකට කලින් කියූ දෙය සිහිපත් වූ නිසා..

"යා.. යුන්මියා... නෝ මිච්චස්සෝ...? (ඔයාට පිස්සු ද..?) ඔයා දැන් මෙ සතා එක්ක කතා කරන්නත් ගත්තද..? පබෝයා..(පිස්සි) සත්තු එක්ක කතා කරන්න තමුන් මිස්ටර් ඩූ ලිට්ල්ගෙ කවුරුවත් නෙවෙයි..."

තමන්ගෙම වැඩ වලට ඇසෙන නෑසෙන ගනනට හෙමින් තමන්ටම බැන වදිමින් තමන්ගෙ අතේ උණු කුඩා ලේන්සුවෙන් ඒ හිම සුදු වෘකයාගෙ පාදයක උනු තුවාලය ලේ ගැල්ම මදක් අඩු වෙන ලෙසට පරිස්සමෙන් ගැට ගැසූ යුන්මි ආයෙම තම අත වෘකයාගෙ හිසේ එහා මෙහා ගෙන ගියේ පලපුරුදු පුද්ගලයෙක් වගේ.. කිසිම විරුද්ධත්වයක් නොපෙන්වා සුරතලෙකු මෙන් යුන්මි ඉදිරියේ හැසිරෙන මේ සත්වයා ජීවිතෙ පලවෙනි වතාවට හමුවූ සතෙකු යැයි කිවහොත් කෙනෙක් විශ්වාස නොකරනවා නොඅනුමානයි.. තවත් මොහොතකින් ඒ තැනින් නැගිට ඉන් ඉවතට පිය මැන්න යුන්මි ආයෙම හැරි බැලුවෙ වේදනාවෙන්..