كسر القوارير

الفصل الاول

اراده الحياة 💔💔

يامن يقول للشيء كن فيكون...

مثل كل يوم كعدت على صوت بيبي وهي تقرأ سوره يس قبل صلاه الفجر... بيبي تكول قرأت سوره يس تحفظنه من كل مكروه...
صليت وره جدو وبابا

بابا اخ يهاي الكلمه شكد الهه معاني وابويه  اخ يابويه .. خليهه سكته ...

حياتي كولش حلوه وهادئه اعيش ويه بيبي وجدو وبابا وعندي عمه متزوجه بيتهه كدام بيتنه بابا معلم وجدو عده دكان برأس الفرع مالتنه ...

بين ماصارت الساعه بل 6بيبي جهزت الريوك كعدنه نتريك جدو طلع يفتح الدوكان وبيبي بدلتلي حته اروح ويه بابا للمدرسه هنا اني بصف الثالث واليوم اول يوم من امتحانات النهائيه وبابا خطيه سهر وياي حته يقريني

اليوم استلمت الشهاده وبيبي خيطلتي ثوب احمر لان طلعت الاولى وجدو جابلي بسكت ابو التمر وعصير وعمه رشا  جابتلي قراصات حمر  وسوتلي كيكه ام الككو كووولش طيبه وبابا حبيبي جابلي لعابه وكلش فرحنه وبيب تصفك وتكول

اراده يااراده احلى بنات الحاره كصايبهه وراهه اجه محمد خطبهه ابوهه مانطاهه هه تظل تعيد بيهه

وعمه تركص بتهه الصغيره نور وتلاشيني

مرت الايام وحياتي بدفئ وحب عائلتي ولا احلى

مرت العطله بسرعه وبدت المدرسه ماكتلكم المدرسه الي يدرس بيهه بابا مدرسه مختلطه فأني اروح وارجع ويا بس ما اعرف اسمعه مرات يكول عليه من احد يسأله بنت خالتي
مرت نصف السنه وصارت عطله كولش كبيره اسمع بيبي تكول بغداد سقطت وبابا بده يلح على جدو انو نشيل لديالى لان يكول مو امان ويخاف انو منطقتنه تنقصف  بس جدو مقبل وبيبي تكول ما اطلع من بغداد واعوف رشا وجدو بعد اكثر معارضه 

مر كم يوم كان بابا طالع من الصبح ورجع المغرب وبيبي وجدو جانو كولش خايفين عليه
شويه وطب بابا من شفته ركضت حضنته وهو رفعني فوك ويضحك كالي حبيبت بابا هسه صرتي بنتي صدك شنو رأيج اصيحلج باسم جديد

جدو صاح بصوت قوي على بابا

  ـ ها صالح كسرت كلمتي ومشيت كلمتك انت خايف من المستقبل تره اليذب الحم احمر مستحيل يرجعله وعدت وسقلت بل كلام بس انت الحايط يفتهم وانت متفتهم

ـ حجي برد اعصابك ضغطك ليعلك هو اكيد صالح مسواهه صدك وديجس نبضك مو وليدي

ـ لا يمه اني احجي صدك وحتى مسحت كلشي قديم  بل مدرسه  وبدلتهه بمعلومات جديده وانتهينه تره اني مبلغكم من زمان واني هسهه صحتلي الفرصه لان سقوط ومو كل مره تصحلنه نفس الفرصه

ـ ليش يوم ليش عارضتنه بجيتهه

ـ يووووم اني ما اريد اعلي صوتي عليج
بس مو كدامهه

طبعا كلشي ما فهمت وعمري متخيلت الكلام النكال عني بابا شالني وصعدني ويا بغرفته لان كل مره اني انام يم بيبي ومرات يم بابا بس بيبي ظلت تصيح وتكول سويتهه قربه لوجه الله وداريته بس شحصلت ابني يعلي صوته عليه

مرت الايام بس بيبي بعد متنومني يمهه وبابا هو ينومني يمه وجدو بعد ميلاعبني مثل قبل وحتى عمه من تجي متخليني العب ويه نور وكله تصيح عليه واني ابجي بل منور الخلفي مال البيت لان محد يحبني بس بابا

مر شهر تقريبا
بليل جدو نادى بابا وجمعنه كلنا بس كال لعمه تاخذتني  لبيتهه طبعا كولش فرحت لان حسيت عمه رجعت تحبني وظليت العب ويه نور الصغيره وبابا دك الباب ودخل حته نرجع للبيت عمه شاورته وطلع بس ما كدرت اسمع

من رجعت نمت يم بابا و الفجر كعدت هل مره عل صياح بيبي وعمه

تدرون شنو الموت الموت مو مثل متتخيلون الموت بل عراق مختلف كووولش الموت عدنه غير شي تدرون ليش لان الموت بس بل عراق يدك الباب ههه والشي الي يضحك انو شأت ام ابيت هو ياخذك
جدو كاعد مثل كليوم طبعا من كمت انام يم بابا بعد ما اسمع صوت بيبي وهي تقرأ قران واا اصلي وره جدو كله ويه بابا لان بعد ميحبوني مثل قبل
جدو سامع الباب يندك راح حتى يفتحه  المفاجأه  بده الرصاص الحي يرش بجسمه مثل الجكليت ومات

مرت ايام الفاتحه وبيبي بس تبجي ومن تشوفني تكوم تصيح عليه وعمه بس تشوفني تكتلني كمت اختل جوه سرير بابا ومن اشوفه يجي اركض الحضنه وابجي لان محد يحبني ولان حتى بابا بده يتغير.....
.
.
.
........ وللحكايه بقيه

لنسون التصويت✨⭐