تقى _السامرائي
تقربت عليه عمتي وكفشتني من شعري وتشيل راسي وتركعه بالحايط وتصيح// حركتي وليدي يا عاهره يا ك....بنت السكط ..
بالكوه فكوني منها عمي وجعفر انهديت بيها
وكلت//شجاج عمه شعليه اني ابنج من البدايه ماهو بسالم اني شكوو..؟!
رادت ترجع تهجم عليه بس لكفها عمي عدلت شيلتي ورحت لغرفتي مثل الي مجذبه ومصدكه بجذبتها..
كعدت والهدوء محتلني بشكل غريب..!
الي سويته صح يو غلط؟..
اني راضيه على نفسي ..!
حجيت بيني وبين نفسي//ياربي سامحني على السويته يارب انت اعلم بالي اعيشه يارب لاتخليني اندم .."
رحت شغلت التلفزيون وكعدت جانت اول عائله تشتري تلفزيون بالسلف كله هو بيت ابو جعفر
جانو متمكنين كلش وعدهم بساتين واملاك واني المدمغه حسبالي بس هل بيت عدهم..
كعدت اتفرج مسلسل (ناديه) العراقيه نوعا ما جانت حلوه..
تذكرت من نكعد اني ولبنات ننتضر المسلسل وبعد ماتخلص نطرح توقعاتنا للحلقه الجايه بس هسه صرت اشوفها وحدي..
سهت عيني ونمت بلا مااحس على روحي..
ماحسيت الا على عمتي وهيه تشحطني من شعري وتصيح// كومي يالعايبه كومي اشتغلي لا بارك الله بيج سكطتي وليدي ..!
دفعتها حيل ونهضت على حيلي بدون مااجاوبها رحت غسلت وجهي وضفرت شعري خليت عباتي وطلعت حت ما سئلت على فاقد وشصارله ماهمني
بس ردت اطلع ودعيت هيج وتدعمني سياره واخلص منهم..!
دكيت الباب على دلوف طلعتلي بنتها مرمر // هلا يسر هسه تجيج امي فوتي للحوش ...
بوست بنتها ااي جان عمرها مايقارب ال11سنه دخلت جوه وهيه تحجيلي عن دراستها ودرجاتها وشلون المعلمات حبينها لان شاطره وسئلتني//يسر انتي هم جنتي تدرسين؟!
تنهدت ورديتها
// اي حبيبتي وصلت للثالث متوسط وصارت حرب ايران واخذو صدام وبعد ماكملت
ابتسمت ابتسامه شفقه وكأنما ماجنت تريد تقهرني بس صارت بدون قصد..!
جتي دلوف وطلعت الصواني وكالت// صباح الخير
رديتها//صباح النور .. دلوف فدوه اغديلج خل نرد بساع اريدن اخبز واخيط الدشاديش للنسوان.."
تخوصرت وكالت// مصيبه تصيبك يا فاقد تشغل حرمتك وانته عايش ..
رجعت كالت// ولج سمعت البارحه النسوان يكولن فاقد محترك مدري شنهو صدك هل حجي..؟
هزيت راسي وكلت// اي من علايم عمتي احتركن قلاقيل وليدي ...
طكته بضحكه وكالت// يبو صخام شلون
توترت ورديتها// ولج خل يولي هذا يلا خل نمشي اكلها مستعجله تكعد تقصقصلي بسوالفها بعدين يمه من نسوان هل سلف يطشن الخبر بساع ..
ردتني//شو جنج ماترديني اعرف..!
غميتها وحجيت// اهمدا حضج وحضي انتي خيتي شلون اضمن عليج لاتتحسسين امشينا عاد بطيتي چبدي..
خليت الصينيه على راسي ومشيت اوزع الكيمر واللبن ونص العالم ما شترت مني بعد الصار بيه چيف فاقد هيج سوه بيه ..
انصدمت من عقليتهم ومن هل سبب يعني معقوله اكو هيج ناس معقوله؟؟!
مهتميت وصلت لبيت عمتي ام حارث دكيت الباب وطلعتلي هيه شافتني ودموعها غرغرت بعيونها
وكالت// وچ يمه شلون قبلت بيهم وچ يمه گمره سامحيني ماعرفت اصون الامانه..
هيه كالت هيج وچن دموعي واكفه على شعره وتنزل ذبيت الصينيه وشمرت روحي بحضنها..
اشهك من گلبي ماحجيت شي دموعي العبرن عن الي بداخلي...!
دخلتني جوه للحوش وكعدتني على القريوله..
خلصت راسي على صدرها وتمسد براسي بكل حنان هل مره جنها امي كد ما حنينه عليه..
مسحت دموعي واخذت مني لبن وماقبلت اخذ لفلوس ماسولفت وياها مااحس براحه لمن افضفض الها أو اشكي عن الي بداخلي الها ..
طلعت ورحت لبيت اهلي الي هو بيتي بقى فارغ محد بي دخلت جوه عجنت وبين مايختمر نضفت البيت وراها خبزت انتضرت علما يبرد..
ورحت وديته للفرن وناوشني المقسوم ورجعت بسرعه للبيت..
وشغلت المكينه وكعدت اخيط بهل دشاديش..
ولنها الباب انهجمت عليه معرف منهو يدك ويعيط
لمن فرزنت هل صوت هذا فاقد..!!
ركضت فتحتها وبدون لا سلام ولا كلام..
سحبني من شعري ويجر بي ويعيط// شعندج ضاله بالبيت وحيدج تردين تفضحيني ويامن جنتي..
يحجي بعياط دفعته عني وانصدم من قوه الدفعه...
وحجيت ويا بنفس النبره // اشو انته ما تحشم روحك هذا البيت وروح فتشه وهاذي المكينه دااخيط الدشاديش علمود انطيك الفلوس بس كلمن يشوف الناس بعين طبعه ..
اني حجيت هيج ولن تسودن عليه جرني من شعري وسحلني لحد ما وصلنه لبيتهم ولعالم تدحك علينا
معرف شلون اضم روحي فضحني...!
_________________________________________
#حمله_تعليقات
لاتنسون التصويت+رئيكم يهمني 💎💞
